᥇ ᤛᤠᤔᤢᤀᤧᤗ 15 - LIFOTNTᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤐᤥ᤺ᤰᤂᤧᤒᤠ 1 ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗᤡ ᤁᤢᤔᤏᤠᤜᤠ᤹ᤀᤥ ᤜᤠᤱ ᤕᤢᤰᤋᤡᤱ ᤆᤥ᤺ᤰᤔᤠᤖᤧ ᤗᤠᤃᤡ ᤐᤠᤱᤄᤢᤒᤠ ᤔᤏᤠᤴ ᤀᤠᤱᤃᤠ᤹ᤀᤣᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤄᤱᤅᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ᤀᤥ॥ 2 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤀᤔᤠᤗᤧᤁᤡᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴᤍᤧ ᤔᤧᤎᤠᤅᤧᤸᤗᤧ ᤀᤔᤠᤗᤧᤁᤡᤜᤠ᤹ᤖᤧ ᤌᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤧᤓᤳᤋᤢᤛᤡᤀᤠᤱ ᤘᤠ᤹॥’ 3 ᤀᤠᤸᤗ ᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤐᤣᤃᤧ᤹॥ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤌᤣᤎᤡᤰᤁᤠᤱ ᤔᤧᤸᤗᤧᤳᤋᤣ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤆᤥᤃᤧ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤶᤒᤡᤳᤇᤠ. ᤔᤧᤴᤇᤢᤔᤠ. ᤀᤅᤧ᤺ᤰᤘᤠᤜᤠ᤹ ᤜᤧᤰᤁᤩᤠᤱ ᤏᤢᤃᤧᤎᤢᤱᤒᤠ ᤀᤅᤧ᤺ᤰᤘᤠ ᤛᤠᤜᤠ᤹. ᤁᤢᤶᤒᤠᤒᤠ ᤐᤡᤳ. ᤔᤧ᤺ᤴᤍᤠ ᤔᤧᤸᤗᤢᤰ. ᤀᤢᤔᤣ ᤏᤢ ᤀᤍᤱᤜᤠ᤹ ᤁᤧᤖᤧᤰ ᤔᤧᤰᤂᤧᤛᤧ᤹॥” 4 ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤋᤣᤗᤣᤔ ᤔᤧᤵᤔᤏᤠᤒᤠ ᤋᤧᤴᤏᤥ ᤛᤢᤵᤛᤢᤛᤡ॥ ᤂᤧᤵᤔᤥ ᤀᤡᤛᤪᤠᤀᤡᤗᤒᤠ ᤗᤠᤅᤧᤴᤇᤡᤱ ᤏᤧᤳᤇᤡ ᤂᤠᤶᤒᤠᤱᤅᤥ ᤁᤧᤎᤰᤐᤠ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤧᤴᤇᤡᤱ ᤌᤡᤒᤥᤱ ᤔᤏᤠᤜᤠ᤹ ᤔᤧᤘᤕᤧ॥ 5 ᤛᤠᤘᤗ ᤏᤢ ᤁᤢᤔᤏᤠᤜᤠ᤹ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤈᤢᤶᤔᤥ ᤔᤧᤒᤣ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤆᤫᤠ᤺ᤳ ᤁᤧᤜᤥᤵᤐᤠ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤂᤧᤱᤜᤠ᤹ ᤔᤧᤛᤢᤃᤢᤛᤡᤖ ᤔᤧᤕᤢᤅᤧ॥ 6 ᤂᤧᤶᤒᤩᤠᤱ ᤂᤢᤏᤧ᤹ ᤁᤣᤏᤡᤜᤠ᤹ ᤔᤧᤳᤋᤢᤛᤡ. “ᤂᤧᤏᤡ᤹ ᤀᤔᤠᤗᤧᤁᤡᤜᤠ᤹ᤖᤧᤀᤥᤗᤠᤶ ᤗ᤺ᤴᤍᤧᤶᤔᤧ᤹ᤀᤠᤱ ᤐᤣᤃᤠᤶᤔᤧ᤹. ᤜᤧᤰᤁᤣ ᤁᤧᤈᤥᤃᤢᤶᤏᤧᤓᤠᤃᤪ ᤀᤔᤠᤗᤧᤁᤡᤜᤠ᤹ ᤛᤧᤖᤢᤱᤛᤡᤱᤅᤡᤸᤗᤧ ᤂᤧᤏᤡ᤹ ᤁᤧᤴᤇ᤻ᤕᤧ᤹ᤀᤡᤴ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤔᤧᤗ᤺ᤴᤍᤧ ᤔᤧᤎᤠᤅᤧᤸᤗᤧ ᤂᤧᤏᤡ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠ ᤕᤠ᤺ᤶᤒᤰ ᤀᤥᤛᤣ᤺ᤴ ᤁᤧᤎᤠᤰᤋᤢᤶᤛᤡᤶ॥” ᤁᤴ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤀᤔᤠᤗᤧᤁᤡᤜᤠ᤹ᤗᤠᤶ ᤔᤧᤗ᤺ᤴᤍᤧ ᤔᤧᤒᤣ॥ 7 ᤜᤧᤰᤁᤩᤠᤱ ᤜᤠᤒᤡᤗᤠᤗᤠᤶ ᤔᤡᤛᤪᤒᤠ ᤏᤠᤶᤃᤧᤴ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤛᤢᤖ ᤌᤠᤖᤡᤰᤁᤣ ᤛᤠᤘᤗᤖᤧ ᤀᤔᤠᤗᤧᤁᤡᤜᤠ᤹ᤏᤢ ᤌᤱ ᤆᤥ᤺ᤰᤏᤢ ᤏᤠ᤺ᤴᤍᤢ ᤋᤣ᤹ᤖᤢᤛᤡ॥ 8 ᤂᤢᤏᤧ᤹ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤀᤃᤠᤃᤧᤴ ᤁᤢᤜᤡᤱᤘᤧᤳ ᤋᤧᤶᤛᤢ. ᤜᤧᤰᤁᤩᤠᤱ ᤀᤃᤠᤃ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤛᤧᤖᤢᤛᤡ॥ 9 ᤁᤖ ᤛᤠᤘᤗ ᤏᤢ ᤁᤢᤔᤏᤠᤜᤠ᤹ᤖᤧ ᤀᤃᤠᤃᤧᤴ ᤏᤢ ᤏᤢ᤺ᤒ᤻ᤏᤢᤒᤠ ᤔᤧᤸᤗᤢᤰ ᤜᤧᤰᤁᤩᤠᤱ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳ. ᤘᤖᤢᤵᤗᤢᤵᤐᤠ ᤐᤡᤳᤛᤠᤳ. ᤏᤢ ᤔᤧᤸᤗᤢᤰᤛᤠ᤺ᤳ ᤂᤧᤒᤩᤠᤱ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤜᤠᤒᤠ ᤔᤧᤛᤧ᤺ᤵᤋᤢ ᤔᤧᤃᤳᤋᤢᤛᤡ॥ ᤁᤖ ᤕᤠ᤺ᤶᤒᤰ ᤔᤧᤶᤒᤡᤔᤏᤠᤒᤠ ᤏᤢ ᤁᤢᤔᤧᤸᤗᤢᤱ ᤁᤧᤜᤥ᤺ᤵᤐᤠᤜᤠ᤹ᤃ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ॥ ᤛᤠᤘᤗᤧᤴ ᤜᤠᤱᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤔᤧᤏᤠ᤹ᤖᤢ 10 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤀᤰᤂᤣ ᤔᤧᤳᤋᤢ. 11 “ᤀᤠᤱᤃᤠ᤹ ᤛᤠᤘᤗᤧᤴ ᤜᤠᤱ ᤆᤥᤃᤢᤱᤒᤠᤀᤥ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤱᤃᤠ᤹ᤗᤠᤶ ᤏᤢ᤺ᤰᤂᤧᤒᤣᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴᤏᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤔᤧᤈᤥᤃᤢᤴᤗᤥ॥” ᤁᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤛᤠᤔᤢᤀᤧᤗᤖᤧ ᤁᤢᤏᤡᤱᤘᤠ᤹ ᤐᤅᤧ. ᤜᤧᤰᤁᤩᤠᤱ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ 12 ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤋᤠᤏᤠᤶᤛᤠ ᤐᤥᤃᤧᤀᤠᤱ ᤛᤠᤘᤗᤖᤧ ᤁᤢᤍᤢᤶᤛᤧ ᤐᤣ. ᤁᤖ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤠᤘᤗᤧᤱᤃ ᤁᤷᤔᤣᤗ ᤐᤣᤀᤠᤱ ᤕᤠᤰ॥ ᤂᤧᤵᤔᤥ ᤂᤢᤏᤧ᤹ ᤁᤢᤏᤡᤱᤘᤠ᤹ᤛᤥᤖᤧ ᤗᤠᤃᤡ ᤀᤡ᤺ᤳᤗᤢᤱᤎᤡᤰ ᤗᤣ᤺ᤳᤋᤢᤀᤠᤱ ᤕᤢᤱ. ᤜᤧᤰᤁᤩᤠᤱ ᤕᤥ ᤃᤡᤗᤃᤠᤗ ᤏᤢ᤺ᤰᤂᤧ ᤕᤧ ᤆᤢᤖᤧᤀᤠᤱ ᤘᤠ᤹॥” 13 ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤛᤠᤘᤗ ᤘᤕᤧᤒᤠ ᤋᤧᤴᤏᤥ ᤁᤢᤍᤢᤶᤛᤧ ᤁᤧᤖᤧ. ᤜᤧᤰᤁᤩᤠᤱ ᤛᤠᤘᤗᤖᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤀᤠᤍᤠᤱᤒᤠᤏᤢ ᤘᤠ᤹ᤖᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱ ᤜᤧᤰᤁᤣ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤖᤥ॥” 14 ᤁᤖ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤴᤓᤠᤰᤁᤥ ᤔᤧᤸᤗᤢᤰ ᤑᤧ᤺ᤰᤋᤧᤒᤠ ᤂᤧᤵᤛᤢᤱᤒᤠᤱᤃ ᤌᤣᤒᤣ᥅ ᤐᤡᤳᤜᤠ᤹ ᤔᤧᤔᤠ᤺ᤱᤒᤧᤴ ᤀᤠᤴᤓᤠᤰᤁᤥ ᤂᤧᤵᤛᤢᤱᤒᤠᤱᤃ ᤌᤣᤒᤣ᥅” 15 ᤛᤠᤘᤗᤖᤧ ᤔᤧᤳᤋᤢ. “ᤌᤰᤛᤢᤒᤠᤜᤠ᤹ᤖᤧ ᤂᤧᤱᤜᤠ᤹ ᤀᤔᤠᤗᤧᤁᤡᤜᤠ᤹ᤗᤠᤶ ᤔᤧᤍᤠᤖᤢᤛᤡᤒᤠᤖᤥ॥ ᤂᤧᤱᤜᤠ᤹ᤖᤧ ᤏᤢ᤺ᤒ᤻ᤏᤢᤒᤠ ᤔᤧᤸᤗᤢᤰ ᤏᤢ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤜᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤥ ᤗᤧᤳᤋᤡ ᤋᤥ᤺ᤴᤇᤧ ᤔᤧᤏᤴᤇᤢᤛᤡᤒᤠᤖᤥ॥ ᤁᤖ ᤀᤠᤏᤡᤃᤣ ᤘᤣ᤹ ᤁᤧᤏᤶᤒᤠᤜᤠ᤹ ᤁᤧᤖᤧᤰ ᤛᤧᤖᤢᤶᤛᤡᤶᤒᤧ॥” 16 ᤁᤖ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤔᤧᤒᤠᤖᤧᤴᤏᤧ᤹. ᤕᤠ᤺ᤰᤋᤢ᥄ ᤔᤡ᤺ᤵᤔᤠ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤠᤱᤒᤠ ᤐᤠ᤺ᤴᤏᤡᤴᤗᤰ ᤂᤧᤵᤛᤧ᤹॥” ᤛᤠᤘᤗᤖᤧ ᤛᤣ᤺ᤴᤍᤥᤛᤢ. “ᤀᤠᤰᤋᤱᤒᤠ ᤐᤠ᤺ᤴᤒᤣ᥅ ᤔᤧᤳᤋᤠᤱᤅᤧ᤹॥” 17 ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤒᤠᤅᤣ ᤆᤢ᤺ᤰᤛᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤛᤠᤱ ᤂᤧᤏᤧ᤹ᤃ ᤀᤡᤛᤪᤠᤀᤡᤗᤡ ᤛᤢᤘᤠᤱᤒᤠ ᤗᤠᤶᤗᤥᤒᤠ ᤁᤧᤴᤘᤕᤧᤴᤒᤡ᥅ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤜᤠᤱ ᤁᤧᤛᤣᤃᤧᤒᤠ ᤔᤣ᤺ᤶᤒᤡ᥅ 18 ᤜᤧᤰᤁᤩᤠᤱ ᤂᤢᤏᤧ᤹ ‘ᤐᤣᤃᤧ᤹. ᤜᤧᤰᤁᤩᤠᤱ ᤗᤠᤕᤥ ᤁᤧᤈᤥ᤺ᤰᤐᤠ ᤀᤔᤠᤗᤧᤁᤡᤜᤠ᤹ ᤁᤧᤖᤧᤰ ᤛᤧᤖᤧᤛᤧ᤹॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥᤃᤧ᤹’ ᤑᤠ᤹ᤀᤠᤱ ᤁᤧᤒᤠᤱᤄᤧ॥ 19 ᤌᤣᤀᤠᤱ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤜᤧᤰᤁᤣ ᤕᤠ᤺ᤶᤒᤰ ᤁᤧᤴᤈᤥᤃᤢᤴ᥅ ᤌᤣᤀᤠᤱ ᤔᤧᤏᤠᤵᤋᤢ ᤔᤧᤍᤠᤖᤢᤛᤡᤒᤠ ᤆᤡᤃᤰᤘᤠᤜᤠ᤹ ᤁᤧᤍᤠ᤺ᤰᤋᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤡᤖᤠ᤹ ᤔᤧᤴᤎᤠᤱᤔᤏᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠᤒᤣ᥅” 20 ᤛᤠᤘᤗᤖᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱ॥ ᤕᤜᤘᤣ ᤍᤠᤱᤒᤠᤸᤗᤧ ᤐᤣᤃᤧ᤹ᤀᤠᤱ ᤆᤥᤃᤧ᤹ ᤔᤧᤳᤋᤠᤱᤒᤠ ᤕᤠ᤺ᤶᤒᤰᤁᤡᤴ ᤆᤥᤃᤢᤱ॥ ᤜᤧᤰᤁᤩᤠᤱ ᤀᤔᤠᤗᤧᤁᤡ ᤜᤠᤱᤅᤡᤴ ᤋᤧᤶᤛᤢᤱ ᤋᤠᤖᤢᤱᤅᤠᤱ ᤘᤠ᤹॥ ᤂᤧᤱᤜᤠ᤹ᤀᤥ ᤘᤣ᤹ᤜᤠ᤹ᤃ ᤂᤰᤐᤧᤳ ᤔᤧᤰᤂᤢᤱᤛᤡᤱ॥ 21 ᤌᤰᤛᤢᤒᤠᤜᤠ᤹ᤖᤧ ᤔᤧᤏᤠᤵᤋᤢ ᤔᤧᤍᤠᤖᤢᤛᤡᤒᤠ ᤐᤠ᤺ᤴᤜᤠ᤹ ᤏᤢ᤺ᤒ᤻ᤏᤢᤒᤠ ᤔᤧᤸᤗᤢᤰ ᤏᤢ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤏᤢ᤺ᤒ᤻ᤏᤢᤒᤠ ᤆᤡᤃᤰᤘᤠᤜᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤃᤡᤗᤃᤠᤗᤀᤥ ᤔᤧᤕᤢᤰᤂᤢᤛᤡᤀᤠᤱ ᤘᤠ᤹॥” 22 ᤁᤖ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤘᤕᤠᤃᤧᤴ ᤛᤡᤍᤢᤱᤈᤓᤠᤏᤢ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥᤀᤣ ᤂᤢᤏᤧ᤹ ᤔᤧᤛ᤺ᤳᤏᤧᤶᤒᤡ᥅ ᤘᤕᤠᤃᤧᤴ ᤛᤡᤍᤢᤱᤈᤓᤠᤏᤢ᤺ᤸᤗᤧ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤢᤒᤠᤖᤥ॥ ᤜᤧᤰᤁᤩᤠᤱ ᤁᤢᤒᤠ᤺ᤴᤈᤠ᤺ᤰ ᤀᤡ᤺ᤵᤔᤠ ᤏᤠ᤺ᤵᤔᤠᤴ ᤔᤧᤸᤗᤢᤰ ᤛᤥ᤺ᤳᤋᤧᤏᤢ᤺ᤸᤗᤧ ᤏᤢᤒᤠᤖᤥ॥ 23 ᤂᤢᤏᤧ᤹ ᤁᤢᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤠᤃ ᤁᤡᤳᤆᤠᤰ ᤆᤥ᤺ᤰᤔᤠ ᤜᤧᤰᤋᤱᤒᤠ ᤗᤠᤕᤥᤖᤥ. ᤜᤧᤰᤁᤩᤠᤱ ᤀᤠᤱᤍᤡᤱ ᤗ᤹ᤔᤠᤃ ᤗᤢᤱ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤏᤠᤒᤠᤴᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠ᤺ᤰᤗᤠᤶ ᤔᤠ᤺ᤱᤄᤠ ᤁᤧᤒᤥ᤺ᤰᤂᤧ. ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧᤀᤠᤱ ᤂᤧᤏᤧ᤹ ᤜᤠᤱ ᤐᤥᤱᤔᤠᤗᤠᤶ ᤁᤧᤗᤧᤖᤧᤀᤠᤱ ᤘᤠ᤹ᤖᤥ॥” 24 ᤛᤠᤘᤗᤖᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤏᤢ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤂᤧᤶᤔᤠ ᤋᤧᤴᤍᤡᤱ ᤔᤧᤴᤈᤥ᤺ᤰᤐᤠᤴ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤏᤢ ᤁᤡᤛᤠᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤣ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢ ᤜᤠᤒᤠ ᤂᤧᤴᤏᤣ ᤆᤥᤃᤢᤱ॥ 25 ᤀᤠᤸᤗ ᤀᤠᤱᤃᤠ᤹ ᤐᤣᤗᤡ ᤆᤥ᤺ᤰᤁᤠ. ᤀᤠᤱᤃᤠ᤹ ᤀᤠᤗᤠᤕᤥᤴ ᤗᤧᤵᤔᤡ ᤆᤥᤃᤧ ᤀᤠᤒᤡᤖᤧ᤹. ᤀᤠᤱᤃᤠ᤹ᤏᤢ ᤑᤧᤖᤧ᤹. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤁᤢᤍᤃᤡ ᤔᤠᤱᤛᤧᤘᤠ ᤔᤧᤵᤔᤠ ᤛᤢᤰᤋᤢᤱᤗ॥” 26 ᤁᤖ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ᤏᤢ ᤔᤧᤒᤣ᤺ᤰᤁᤠᤴ॥ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠ᤺ᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤁᤧᤴᤈᤥᤃᤢᤴ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤜᤠᤱ ᤐᤥᤱᤔᤠᤗᤠᤶ ᤁᤧᤗᤧᤖᤧ ᤁᤧᤍᤣᤛᤧᤀᤠᤱ ᤘᤠ᤹॥” 27 ᤛᤠᤔᤢᤀᤧᤗᤧᤴ ᤐᤣ᤺ᤰᤔᤠ ᤑᤠ᤹ᤀᤠᤱ ᤜᤡᤛᤡᤱᤗ ᤐᤳᤇᤧ. ᤁᤖ ᤛᤠᤘᤗᤖᤧ ᤁᤢᤍᤣ᤺ᤳ ᤑᤧᤖᤠᤀᤥ ᤋᤧᤶᤛᤢ. ᤜᤧᤰᤁᤣ᤺ᤸᤗᤧ ᤂᤧᤴ ᤋᤣᤳ ᤑᤧᤖᤠ᤺ᤴ ᤋᤧᤖᤧ᤹ ᤋᤧ᤺ᤰᤂᤧ॥ 28 ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤀᤠᤀᤡᤴ ᤀᤡᤛᤪᤠᤀᤡᤗ ᤜᤠᤱᤈᤢᤶᤔᤡᤴ ᤂᤧᤏᤧ᤹ᤗᤠᤶ ᤂᤧ᤺ᤰᤂᤢᤀᤠᤱ ᤁᤧᤒᤣᤛᤠᤱᤒᤠ ᤜᤠᤱᤅᤡᤴ ᤐᤡᤖᤢᤀᤠᤱ ᤘᤠ᤹. ᤂᤧᤴᤏᤡᤱᤃ ᤂᤧᤏᤧ᤹ᤏᤢ᤺ᤸᤗᤧ ᤏᤢᤒᤠ ᤆᤥᤰ॥ 29 ᤕᤜᤘᤣ ᤍᤠᤱᤒᤠᤱᤃ ᤀᤡᤛᤪᤠᤀᤡᤗᤒᤠ ᤜᤠᤱᤘᤠ ᤔᤠᤱᤘᤠ ᤔᤡᤔᤡᤍᤡᤱᤗᤥ. ᤂᤢᤏᤧ᤹ ᤀᤡᤱᤗᤧᤰ ᤔᤧᤒᤠ᤺ᤳᤏᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤏᤠ ᤔᤣ᤺ᤴ ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ᤀᤠᤱ ᤔᤧᤗᤧᤰᤂᤢᤴ॥” 30 ᤛᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱ॥ ᤁᤖ ᤀᤡᤛᤪᤠᤀᤡᤗᤡ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤏᤢ ᤀᤡᤛᤪᤠᤀᤡᤗ ᤗᤠᤈᤣ᤹ ᤋᤃᤡ ᤌᤡᤰᤗᤧᤱᤗᤰ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤀᤠᤈᤥᤃᤧ᤹. ᤀᤠᤱᤃᤠ᤹ᤏᤢ ᤑᤧᤖᤧ᤹. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤁᤧᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤴ ᤔᤠᤱᤛᤧᤘᤠ ᤔᤧᤵᤔᤠ ᤛᤢᤰᤋᤢᤱᤗ॥” 31 ᤂᤧᤸᤗᤧᤆᤥᤃᤢᤸᤗᤧ ᤛᤠᤔᤢᤀᤧᤗᤧᤴ ᤛᤠᤘᤗᤧᤴᤏᤢ ᤛᤥᤖᤡᤰ ᤐᤣ. ᤜᤧᤰᤁᤩᤠᤱ ᤛᤠᤘᤗᤖᤧ ᤕᤜᤘᤣ ᤍᤠᤱᤒᤠᤴ ᤔᤠᤱᤛᤧᤘᤠ ᤔᤧᤳᤋᤢ॥ 32 ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤀᤔᤠᤗᤧᤁᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤀᤃᤠᤃᤧᤴ ᤀᤠᤱᤃᤠ᤹ᤀᤥ ᤑᤧᤳᤋᤧ᤹॥ ᤀᤃᤠᤃᤧᤴ ᤔᤧᤱᤃᤡᤀᤣ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤔᤧᤛᤡᤀᤠᤴ ᤜᤡᤱᤅᤠ” ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤂᤢᤏᤧ᤹ᤀᤥ ᤑᤧᤖᤧ॥ 33 ᤁᤖ ᤛᤠᤔᤢᤀᤧᤗᤖᤧ ᤀᤰᤂᤣ ᤐᤠ᤺ᤳᤋᤢ. “ᤂᤧᤏᤧ᤹ ᤁᤧᤍᤠᤓᤣ᤺ᤸᤗᤧ ᤔᤏᤠ ᤁᤧᤛᤧᤖᤢᤛᤡᤀᤠᤱ ᤔᤧᤴᤇᤢᤔᤠᤜᤠ᤹ ᤛᤠ ᤔᤣ᤺ᤴᤏᤣ ᤔᤧᤒᤥ᤺ᤰᤂᤧᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤏᤧ᤹ ᤛᤧᤳᤏᤧᤀᤠᤱ ᤁᤧᤶᤔᤠ ᤛᤠ ᤔᤣ᤺ᤴᤏᤣ ᤐᤥᤱᤗᤥ॥” ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤀᤔᤠᤗᤧᤁᤡ ᤜᤠᤱ ᤀᤃᤠᤃᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤃᤡᤗᤃᤠᤗᤀᤥ ᤛᤧᤖᤢᤖᤥ॥ 34 ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤖᤠᤔᤠ ᤁᤢᤒᤠᤱᤓᤣ᤹ ᤐᤣ. ᤁᤖ ᤛᤠᤘᤗᤧᤴ ᤃᤡᤒᤠᤒᤠ ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤡᤶᤔᤥ ᤐᤣ॥ 35 ᤛᤠᤔᤢᤀᤧᤗᤧᤴ ᤁᤢᤛᤡᤔᤠ ᤕᤧᤴ ᤌᤠᤖᤡᤰᤛᤠᤱ ᤛᤠᤘᤗᤖᤧ ᤁᤢᤍᤢᤶᤛᤧ ᤀᤠᤓᤧᤸᤗᤧᤀᤠᤱ ᤔᤧᤒᤣᤏᤧᤴ. ᤁᤖ ᤛᤠᤔᤢᤀᤧᤗᤧᤴ ᤛᤠᤘᤗᤖᤧ ᤁᤢᤗᤠᤃᤡ ᤔᤧᤖᤡᤱ ᤌᤰᤋᤧᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤘᤗᤧᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤆᤥᤃᤢᤒᤠᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.