᥇ ᤛᤠᤔᤢᤀᤧᤗ 14 - LIFOTNT

ᤈᤥᤏᤠᤌᤠᤏᤖᤧ ᤔᤧᤱᤃᤡᤀᤣ ᤕᤠ᤺ᤶᤒᤰ ᤆᤥᤃᤢᤒᤠ

¹ ᤌᤡᤰᤕᤧᤴ ᤛᤠᤘᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤌᤠᤱᤒᤧᤴᤏᤡᤴ ᤔᤧᤳᤋᤢ. “ᤑᤧᤖᤧ᤹ ᤀᤠᤴᤇᤡ᤹ ᤂᤧᤴ ᤁᤥ᤺ᤰᤔᤠᤸᤗᤧ ᤏᤠᤜᤠᤱ ᤗᤧᤵᤔᤠᤱᤒᤠ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤜᤡᤶ ᤗᤧᤵᤔᤠᤱ ᤐᤡᤳᤇᤡ॥” ᤁᤖ ᤂᤧᤸᤗᤧ ᤁᤴ ᤐᤠ᤺ᤴᤏᤡᤴ ᤁᤢᤶᤒᤠ ᤔᤧᤶᤔᤧᤳᤋᤣ ᤘᤕᤧ॥

² ᤂᤧᤴ ᤕᤧᤶᤔᤥ ᤛᤠᤘᤗᤖᤧ ᤃᤡᤒᤠ ᤁᤢᤒᤣᤛᤠᤱ ᤔᤡᤃᤪᤥᤴ ᤔᤧᤵᤔᤏᤠᤒᤠ ᤋᤧᤴᤏᤥ ᤑᤢ᤹ᤗᤧᤛᤣ᤹ ᤛᤡᤱᤛᤣᤸᤗᤧ ᤁᤢᤛᤡᤃᤠᤱ ᤋᤢᤖᤠᤜᤡᤶ ᤗᤣ᤺ᤳᤋᤢᤀᤠᤱ ᤕᤢᤅᤧ॥ ᤂᤢᤏᤧ᤹ᤏᤢ ᤁᤧᤵᤔᤧᤱᤃᤧᤳ ᤁᤡᤵ ᤋᤢᤰᤛᤡ ᤕᤠᤖᤡᤰ ᤔᤏᤠᤜᤠ᤹ ᤔᤧᤘᤕᤧ॥

³ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤆᤠᤱᤔᤏᤠᤒᤠ ᤀᤣᤐᤥᤍ ᤆᤠᤱ ᤁᤧᤈᤠᤱᤒᤠ ᤀᤜᤡᤕᤠᤜᤴ ᤘᤕᤧ॥ ᤀᤜᤡᤕᤠᤜ᤺ᤱᤃ ᤀᤡᤰᤁᤠᤒᤥᤍᤖᤧ ᤁᤢᤴᤛᤠ᤹ ᤀᤜᤡᤋᤢᤒᤖᤧ ᤁᤢᤛ᤻ᤛᤠ ᤘᤕᤧ॥ ᤀᤡᤰᤁᤠᤒᤥᤍ ᤏᤢ ᤀᤜᤡᤋᤢᤒᤧᤱᤃ ᤛᤡᤗᤥᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤡᤖᤧ ᤁᤢᤶᤔᤧᤴᤇᤠ᤹ ᤜᤧᤰᤁᤩᤠᤱ ᤐᤡᤏᤜᤠᤛᤖᤧ ᤁᤢᤛ᤻ᤛᤠ ᤘᤕᤧᤛᤡ॥ ᤈᤥᤏᤠᤌᤠᤏᤧᤴ ᤐᤣᤒᤠ ᤜᤠ᤺ᤳᤗᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤛᤢᤴ॥

⁴ ᤈᤥᤏᤠᤌᤠᤏᤖᤧ ᤐᤗᤡᤛ᤻ᤋᤡ ᤋᤢᤖᤠᤜᤡᤶ ᤐᤣ᤺ᤰᤔᤠ ᤁᤥ᤺ᤳᤋᤢᤒᤠ ᤔᤡᤁᤔᤠᤛᤒᤠ ᤆᤡᤓᤡ᤹ᤑᤡ᤹ᤒᤠ ᤗᤠᤶᤔᤡᤸᤗᤧ ᤏᤧᤵᤔᤠᤱ ᤐᤡᤛᤠᤱ ᤕᤠᤰᤁᤣ᤺ᤰ ᤑᤢᤱᤃᤣ᤺ᤰ ᤐᤳᤇᤧ॥ ᤌᤡᤰ ᤗᤧᤵᤔᤠᤱᤒᤠᤴ ᤒᤥᤛᤣᤛ ᤏᤢ ᤘᤣ᤹ ᤗᤧᤵᤔᤠᤱᤒᤠᤴ ᤛᤣᤏᤣᤜ ᤔᤧᤔᤧᤳᤋᤢ॥

⁵ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤠᤰᤁᤣ᤺ᤰᤁᤡᤴ ᤔᤡᤰᤔᤠᤛᤖᤧ ᤁᤢᤍᤃᤡ ᤏᤢ ᤗᤠᤱᤃᤧᤳ ᤗᤧᤵᤛᤠᤱᤒᤠᤴ ᤃᤡᤒᤠᤖᤧ ᤁᤢᤍᤃᤡ ᤐᤳᤇᤧ॥

⁶ ᤈᤥᤏᤠᤌᤠᤏᤖᤧ ᤁᤢᤓᤧᤈᤠ ᤁᤢᤓᤧᤕᤢᤶ ᤁᤧᤒᤱᤒᤧᤴ ᤔᤧᤳᤋᤢ. “ᤑᤧᤖᤧ᤹. ᤀᤠᤴᤇᤡ᤹ ᤂᤧᤴ ᤜᤷᤍᤥ ᤔᤧᤴᤜᤧᤰᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤜᤡᤶᤔᤡᤴ ᤀᤥᤔᤧᤳᤇᤧ ᤐᤡᤳᤇᤡ॥ ᤀᤠᤏᤡ᤹ ᤕᤖᤡᤰ ᤀᤠᤘᤠ᤹ᤛᤠᤱ ᤛᤢ᤺ᤸᤗᤡᤰ ᤀᤠᤘᤠ᤹ᤛᤠᤱ ᤀᤠᤏᤡ᤹ ᤛᤧ᤺ᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤘᤠ᤹. ᤂᤢᤏᤧ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤠ᤺ᤶᤔᤠ ᤔᤧᤴᤇᤢᤰᤋᤢᤴ॥”

⁷ ᤂᤢᤏᤧ᤹ ᤁᤢᤓᤧᤈᤠ ᤁᤧᤓᤧᤕᤢᤶ ᤁᤧᤒᤱᤒᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤌᤣ ᤆᤥ᤺ᤰᤔᤠ ᤁᤧᤛᤡᤖᤠ᤹ᤎᤠᤱ. ᤆᤥᤃᤧ᤹॥ ᤗᤠᤶᤗᤥᤖᤧ᤹ ᤀᤠᤍᤠᤱᤒᤠᤖᤧ ᤌᤣ ᤁᤧᤈᤥᤃᤢᤛᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤗᤠᤶᤒᤠᤀᤣ ᤑᤠ᤹ᤏᤧ॥”

⁸ ᤈᤥᤏᤠᤌᤠᤏᤖᤧ ᤔᤧᤳᤋᤢ. “ᤑᤧᤖᤧ᤹. ᤀᤠᤴᤇᤡ᤹ ᤏᤠᤜᤠᤱᤍᤠᤱ ᤏᤠ᤺ᤱᤛᤢᤀᤠᤱ ᤐᤡᤳᤇᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤶᤏᤡᤛᤡᤖ॥

⁹ ᤂᤧᤱᤜᤠ᤹ᤖᤧ ‘ᤀᤠᤏᤡᤃᤣ ᤂᤧᤴᤇᤡ᤹ᤀᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤴᤇᤡ᤹ ᤜᤠᤒᤠ ᤂᤧᤵᤔᤥ ᤕᤧᤒᤧᤛᤧ᤹’ ᤀᤠᤶᤔᤧᤳᤇᤡᤏᤧᤑᤃᤪ ᤀᤠᤴᤇᤡ᤹ ᤀᤠᤕᤧᤵᤛᤡᤒᤠ ᤋᤧᤴᤏᤥᤀᤣ ᤕᤧᤵᤛᤡ ᤂᤧᤱᤜᤠ᤹ᤖᤧᤀᤥ ᤐᤡᤳᤇᤡ ᤔᤣ᤺ᤴ॥

¹⁰ ᤁᤖ ᤂᤧᤱᤜᤠ᤹ᤖᤧ ‘ᤁᤳᤌᤥ ᤌᤠᤅᤧᤛᤧ᤹’ ᤔᤧᤗ᤹ᤏᤣ ᤑᤃᤪ ᤀᤠᤴᤇᤡ᤹ ᤂᤠᤳᤌᤥ ᤐᤡᤳᤇᤡ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤀᤠᤴᤇᤡ᤹ᤜᤢᤰᤁᤥ ᤌᤠᤛᤢ ᤀᤠᤒᤡᤖᤧᤇᤡ ᤁᤧᤗ᤹ᤒᤠ ᤀᤠᤴᤇᤡ᤹ ᤗᤠᤃᤡ ᤀᤡᤒᤢ ᤐᤥᤱᤗᤥ॥”

¹¹ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧᤀᤥ ᤏᤡᤎᤠ᤺ᤶᤏᤧᤛᤡ॥ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤒᤠᤖᤧ. “ᤀᤥᤔᤧᤳᤋᤠᤶᤔᤧ᤹. ᤜᤡᤒᤪᤢᤜᤠ᤹ᤃ ᤂᤢᤏᤡ᤹ ᤔᤧᤈᤡᤱᤛᤡᤱᤒᤠ ᤜᤱᤃᤠᤖᤡᤱᤒᤠᤜᤠ᤹ᤗᤠᤶ ᤔᤧᤗ᤺ᤴᤗ ᤔᤧᤒᤳᤗᤥ॥”

¹² ᤐᤗᤡᤛ᤻ᤋᤡ ᤁᤶᤒᤪᤠᤱᤒᤠ ᤋᤢᤖᤠᤜᤡᤶ ᤌᤰᤛᤢᤒᤠᤜᤠ᤹ᤖᤧ ᤈᤥᤏᤠᤌᤠᤏᤧᤴ ᤏᤢ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤃᤢᤒᤠᤴ ᤔᤧᤔᤧᤳᤋᤢᤛᤡ. “ᤁᤳᤌᤥ ᤌᤠᤅᤧᤛᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤏᤡᤛᤠᤶ ᤜᤢ᤹ᤀᤠᤛᤡᤃᤧ॥” ᤜᤧᤰᤁᤣ᤺ᤸᤗᤧ ᤈᤥᤏᤠᤌᤠᤏᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤃᤢᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤀᤣᤃᤠᤱ ᤌᤠᤅᤧ᤹॥ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤀᤡᤛᤪᤠᤀᤡᤗᤡ ᤜᤢᤰᤁᤥ ᤌᤠᤛᤢᤛᤡᤀᤠᤱ ᤘᤠ᤹॥”

¹³ ᤜᤧᤰᤁᤩᤠᤱ ᤈᤥᤏᤠᤌᤠᤏᤖᤧ ᤁᤢᤗᤠᤱ ᤁᤢᤜᤢᤰᤗᤧ ᤋᤥ᤹ᤖᤢᤀᤠᤱ ᤀᤢ᤺ᤱᤛᤡᤱᤗ ᤌᤥ ᤌᤥ᤺ᤰᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤧᤴᤏᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤌᤠᤛᤡᤱ॥ ᤈᤥᤏᤠᤌᤠᤏᤖᤧ ᤂᤧᤴ ᤐᤗᤡᤛ᤻ᤋᤡᤜᤠ᤹ ᤜᤡᤵᤋᤢᤛᤡᤀᤠᤱ ᤜᤷᤃᤢᤵ ᤛᤥ᤺ᤴᤍᤢᤛᤡ. ᤂᤧᤒᤩᤠᤱ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤧᤸᤗᤧ ᤂᤧᤱᤜᤠ᤹ ᤛᤩᤧᤖᤢᤛᤡ॥

¹⁴ ᤁᤴ ᤌᤡᤰᤛᤡᤃᤣᤰᤐᤠ ᤌᤱᤅᤥ ᤁᤢᤃᤠᤵ ᤌᤡᤰ ᤐᤡᤳᤗᤧ ᤌᤡᤰᤕᤧᤴ ᤋᤥ᤺ᤱᤔᤧᤸᤗᤧ ᤁᤧᤈᤢ᤺ᤵᤐᤠᤍᤧᤴᤏᤥ ᤈᤥᤏᤠᤌᤠᤏ ᤏᤢ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤧᤸᤗᤧ ᤏᤡᤒᤥᤱ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤛᤧᤖᤧᤇᤢᤛᤡ॥

¹⁵ ᤜᤧᤰᤁᤩᤠᤱ ᤋᤢᤖᤠᤜᤡᤶ ᤌᤰᤋᤧᤴᤏᤥ ᤁᤧᤘᤠ᤹ᤒᤠ ᤌᤰᤛᤢᤒᤠᤜᤠ᤹ ᤕᤱᤔᤠ ᤔᤧᤛᤩᤧ॥ ᤂᤧᤒᤩᤠᤱ ᤋᤢᤖᤠᤜᤡᤶᤔᤥ ᤏᤢ ᤆᤡᤃᤰᤘᤠ ᤁᤢᤈᤠ ᤁᤧᤏᤠᤵᤐᤠ ᤗᤢᤵᤐᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤁᤧᤖᤧᤰ ᤐᤃᤡ ᤔᤧᤃᤡᤛᤧ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤴᤏᤣ ᤕᤰᤂᤧᤀᤠᤱ ᤕᤶᤒᤠ ᤁᤡᤔᤠ ᤕᤱᤔᤠ ᤐᤥ᤺ᤰᤂᤧ॥

ᤐᤗᤡᤛ᤻ᤋᤡᤜᤠ᤹ ᤜᤠᤖᤡᤔᤧᤍᤩᤧᤒᤠ

¹⁶ ᤒᤢᤏᤩᤠᤔᤡᤏ ᤋᤧᤱᤃᤵᤐᤥᤒᤠ ᤃᤡᤒᤠᤀᤥ ᤛᤠᤘᤗᤖᤧ ᤁᤢᤀᤡᤰ ᤁᤧᤃᤥᤒᤠ ᤔᤏᤠᤜᤠ᤹ᤖᤧ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤑᤢᤳᤆᤡᤱᤈᤩᤠ᤺ᤱ ᤔᤧᤒᤥ᤺ᤰᤂᤧᤀᤠᤱ ᤏᤠ ᤏᤢ ᤁᤳᤏᤠ ᤔᤧᤗᤥ᤺ᤰᤋᤧᤀᤠᤱ ᤔᤧᤘᤕᤧᤒᤠ ᤔᤧᤏᤡᤛᤢᤛᤡ॥

¹⁷ ᤜᤧᤰᤁᤩᤠᤱ ᤛᤠᤘᤗᤖᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤌᤰᤛᤢᤒᤠᤜᤠ᤹ ᤜᤠ᤺ᤳᤜᤠᤳ ᤔᤧᤘᤠ᤹ ᤜᤠ᤺ᤳᤜᤠᤳ ᤔᤧᤜᤥᤵ ᤏᤡᤖᤧᤶᤛᤡᤶᤔᤧ᤹॥” ᤂᤧᤱᤜᤠ᤹ᤖᤧ ᤔᤧᤏᤡᤖᤢᤛᤡᤸᤗᤧ ᤈᤥᤏᤠᤌᤠᤏ ᤏᤢ ᤁᤢᤓᤧᤈᤠ ᤁᤢᤓᤧᤕᤢᤶ ᤁᤧᤃᤢᤒᤧᤴ ᤂᤧᤵᤔᤥ ᤜᤥ᤺ᤵᤋᤧᤛᤡ॥

¹⁸ ᤜᤧᤰᤁᤩᤠᤱ ᤛᤠᤘᤗᤖᤧ ᤀᤜᤡᤕᤠᤜ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤁᤵᤔᤥ ᤑᤧᤳᤋᤧ᤹॥” (ᤂᤧᤴ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤘᤕᤧ॥)

¹⁹ ᤛᤠᤘᤗᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴᤏᤢ ᤐᤠᤖᤧᤖ ᤐᤳᤇᤧ. ᤏᤠ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤜᤡᤶᤔᤥ ᤛᤠ᤹ᤖᤡᤰ ᤛᤠ᤹ᤖᤡᤰ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤖ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤗ᤺ᤳᤋᤧ᤹॥”

²⁰ ᤜᤧᤰᤁᤩᤠᤱ ᤛᤠᤘᤗᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤔᤧᤈᤢᤵᤛᤧᤀᤠᤱ ᤌᤱ ᤌᤰᤔᤠᤍᤧᤴ ᤗᤧᤵᤛᤠᤱ ᤔᤧᤎᤠᤛᤡᤱ. ᤂᤧᤵᤔᤥ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤑᤢᤳᤆᤡᤱᤈᤩᤠ᤺ᤱ ᤔᤧᤒᤥ᤺ᤰᤂᤧᤀᤠᤱ ᤀᤠᤒᤠᤅᤣ ᤌᤱ ᤔᤧᤈᤩᤧᤵᤛᤡᤱ ᤔᤧᤎᤰᤛᤡᤱᤗ ᤔᤧᤕᤠᤃᤧᤒᤠ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤛᤡ॥

²¹ ᤂᤧᤴ ᤕᤧᤶᤔᤥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤜᤡᤶᤔᤥ ᤁᤧᤒᤣ᤺ᤰᤐᤠ ᤀᤡᤛᤪᤠᤀᤡᤗᤡᤜᤠ᤹ ᤐᤗᤡᤛ᤻ᤋᤡᤜᤠ᤹ ᤔᤧᤗᤧᤖᤢᤛᤡᤀᤠᤱ ᤛᤠᤘᤗ ᤜᤧᤰᤁᤩᤠᤱ ᤈᤥᤏᤠᤌᤠᤏᤧᤴᤏᤢ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤔᤧᤓᤧᤖᤧ॥

²² ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ ᤁᤧᤄᤧᤳᤇᤡᤱᤒᤠᤀᤠᤱ ᤁᤧᤈᤡᤱᤛᤡᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ ᤔᤧᤄᤧᤳᤇᤡᤱ ᤁᤧᤗ᤹ᤒᤠ ᤀᤡᤱᤄᤱ ᤔᤧᤄᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤀᤠᤱ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ᤏᤢ ᤔᤧᤍᤱᤛᤡᤱᤅᤠᤱ ᤐᤗᤡᤛ᤻ᤋᤡᤜᤠ᤹ ᤔᤧᤏᤠ᤺ᤳᤋᤢᤛᤡ॥

²³ ᤂᤧᤴ ᤕᤧᤴᤏᤥ. ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤌᤱᤗᤠᤶ ᤛᤧ᤺ᤵᤋᤢᤛᤡ. ᤜᤧᤰᤁᤩᤠᤱ ᤒᤣᤌ-ᤀᤠᤘᤏ ᤏᤠᤎᤠ᤺ᤶᤒᤡ ᤌᤠᤖᤡᤰ ᤌᤱ ᤐᤥ᤺ᤰᤂᤧᤖ ᤐᤣᤖᤥ॥

ᤌᤱ ᤐᤥ᤺ᤰᤂᤧᤀᤠᤱ ᤀᤣᤃᤠᤱᤒᤠ ᤜᤡᤴᤍᤥᤰᤜᤠ᤹

²⁴ ᤂᤧᤸᤗᤧ ᤕᤠ᤺ᤴᤍᤡᤰ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤕᤧᤳᤋᤢᤰᤂᤣ ᤔᤧᤍᤢᤔᤧᤀᤠᤱ ᤛᤠ᤹ᤖᤡᤰ ᤔᤧᤏᤠᤛᤧᤀᤠᤱ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤛᤠᤘᤗᤖᤧ “ᤏᤡᤱᤔᤡᤜᤠ᤹ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤕᤢ᤺ᤴᤇᤡᤰ ᤐᤥᤱᤔᤠ ᤋᤃᤡ ᤁᤢᤈᤠ ᤁᤧᤈᤠᤒᤠ ᤜᤠ᤺ᤳᤇᤠᤱ ᤔᤠᤱᤍᤣ ᤛᤠᤰᤔᤢᤖᤠ ᤋᤢᤶᤗ” ᤗ᤹ᤖᤡᤰ ᤔᤠᤱᤜᤧᤰ ᤆᤥᤰ ᤐᤠᤱᤄᤢᤛᤡᤀᤠᤱ ᤘᤕᤧ॥

²⁵ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤋᤠᤶᤓᤢᤱᤅᤥ ᤔᤧᤗᤠᤛᤧ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤂᤠᤶᤒᤠᤱᤅᤥ ᤂᤧᤱᤜᤠ᤹ᤖᤧ ᤕᤖᤡᤰ ᤛᤰᤘᤠᤄᤢ ᤔᤧᤏᤡᤛᤢ॥

²⁶ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤖᤡᤰ ᤛᤰᤘᤠᤄᤢᤴ ᤘᤠᤜᤥᤖᤧᤖ ᤐᤳᤇᤧᤒᤠ ᤔᤧᤏᤡᤛᤢᤛᤠᤱ ᤛᤠᤰᤔᤢᤖᤠ ᤔᤧᤍᤢᤶᤗ ᤁᤧᤗ᤹ᤒᤠ ᤔᤠᤰᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤜᤠ᤺ᤳᤗᤧᤀᤠᤱ ᤛᤰᤘᤠᤄᤢᤴ ᤔᤧᤴᤇᤢᤛᤢᤴ॥

²⁷ ᤁᤖ ᤛᤠᤘᤗᤖᤧ ᤁᤢᤔᤏᤠᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤧᤶᤔᤤ ᤔᤧᤱᤄᤧᤶᤔᤣ ᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤁᤢᤜᤢᤰᤁᤥᤒᤠ ᤋᤰᤁᤠᤋᤡᤸᤗᤧ ᤛᤰᤘᤠᤗᤧᤰᤁᤡᤴ ᤆᤡᤖᤰ ᤗᤰᤋᤢ॥ ᤜᤧᤰᤁᤩᤠᤱ ᤁᤢᤄᤢᤴ ᤗᤠᤃᤢᤀᤠᤱ ᤆ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤰᤔᤠ ᤁᤧᤖᤧ ᤂᤧᤒᤩᤠᤱ ᤆᤠᤱᤈᤠᤱ ᤗ᤹ᤖᤧᤀᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧ॥

²⁸ ᤜᤧᤰᤁᤩᤠᤱ ᤌᤰᤛᤢᤒᤠᤌᤡᤰᤗᤧ ᤈᤥᤏᤠᤌᤠᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤒᤠᤖᤧ ᤀᤰᤂᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤐᤠ᤺ᤳᤋᤢᤀᤠᤱ ᤘᤠ᤹॥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤀᤡᤴᤒᤠ ᤕᤧᤴᤏᤥ ᤁᤢᤈᤠ ᤁᤧᤈᤠᤒᤠ ᤔᤏᤠᤴ ᤛᤠᤰᤔᤢᤖᤠ ᤔᤠᤱᤍᤣ ᤋᤢᤶᤗ॥’ ᤂᤧᤸᤗᤧᤆᤥᤃᤢᤸᤗᤧᤛᤠ ᤔᤏᤠᤜᤠ᤹ ᤛᤠᤰᤁᤡᤸᤗᤧ ᤕᤰᤂᤢᤛᤡᤀᤠᤱ ᤔᤧᤘᤠ᤹॥”

²⁹ ᤈᤥᤏᤠᤌᤠᤏᤖᤧ ᤂᤧᤴᤏᤡᤴ ᤔᤧᤳᤋᤢ. “ᤀᤠᤶᤒᤠᤖᤧ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤗᤠᤈᤣ᤹ᤖᤧ ᤗᤠᤃᤡ ᤏᤢᤒᤠ ᤔᤧᤒᤥ᤺ᤰᤂᤧᤴ॥ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤀᤠᤈᤧ᤺ᤳᤇᤡᤰ ᤛᤰᤘᤠᤄᤢᤴ ᤛᤠ᤹ᤖᤢᤱᤅᤠᤱᤗᤰ ᤘᤕᤠᤱ ᤀᤠᤰᤂᤧᤴ ᤆᤠ᤺ᤳᤆᤠ᤺ᤵᤐᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥

³⁰ ᤏᤡᤱᤔᤡᤜᤠ᤹ᤗᤠᤶ ᤏᤠᤵᤔᤏᤠᤛᤡᤒᤠ ᤁᤢᤈᤠᤜᤠ᤹ ᤀᤠᤀᤡᤴ ᤔᤏᤠᤜᤠ᤹ᤖᤧ ᤆᤠᤔᤠ ᤔᤧᤄᤥᤛᤢᤸᤗᤧᤃ ᤇᤧᤴᤏᤠ ᤀᤠᤰᤂᤧᤴ ᤏᤢᤒᤠ ᤐᤥ᤺ᤰᤂᤧᤒᤠᤔᤧᤴ॥ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤀᤠᤸᤗᤛᤠᤱ ᤕᤖᤡᤰ ᤛᤧᤵᤔᤠ ᤔᤧᤛᤢᤰᤋᤢᤛᤡᤒᤠᤔᤧᤴ॥”

³¹ ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ ᤔᤡᤰᤔᤠᤛᤗᤠᤶᤒᤠᤏᤢ ᤀᤠᤕᤠᤗᤥᤏ ᤌᤠᤖᤡᤰ ᤔᤧᤏᤠ᤺ᤳᤋᤢᤛᤡᤖ ᤔᤧᤛᤧᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ ᤛᤠᤰᤁᤡᤸᤗᤧ ᤂᤢᤴᤇᤡ᤹ ᤌᤏᤠ ᤗᤧᤰᤂᤧᤀᤠᤱ ᤘᤕᤧ॥

³² ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤛᤠᤔᤠᤜᤠ᤹ ᤔᤧᤓᤳᤋᤢ. ᤔᤧᤗᤠᤛᤧ. ᤜᤧᤰᤁᤩᤠᤱ ᤔᤧᤸᤗᤢᤰ ᤐᤡᤳᤜᤠ᤹ ᤔᤧᤍᤧᤶᤛᤢᤛᤡ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥᤀᤣ ᤔᤧᤛᤧᤖᤢᤛᤡᤀᤠᤱ ᤔᤠᤰᤂᤡ᤹ᤏᤢᤛᤥᤖᤡ ᤛᤠ ᤔᤧᤈ॥

³³ “ᤔᤏᤠᤜᤠ᤹ᤖᤧ ᤔᤠᤰᤂᤡ᤹ ᤛᤥᤖᤡ ᤛᤠ ᤔᤧᤈᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤖ ᤔᤧᤕᤠᤰ” ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤸᤗᤧᤀᤡ ᤛᤠᤘᤗᤗᤧᤴ ᤔᤧᤳᤋᤢ॥ ᤛᤠᤘᤗᤖᤧ ᤔᤧᤳᤋᤢᤛᤡ. “ᤂᤧᤏᤡ᤹ ᤏᤛᤠ᤺ᤴᤏᤡᤴ ᤀᤠᤒᤠᤅᤣ ᤁᤧᤗᤧᤰᤂᤢᤶ॥ ᤗᤳᤇᤠ ᤕᤶᤒᤠ ᤗᤢᤱᤎᤡᤰ ᤜᤠᤖᤠ ᤁᤵᤔᤥ ᤋᤠᤖᤠᤶᤔᤧ᤹॥”

³⁴ ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤣᤃᤠᤶᤔᤧ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤠᤶᤛᤡᤶᤔᤧ᤹. ‘ᤀᤠᤒᤠᤅᤣ ᤂᤧᤏᤡ᤹ ᤔᤧᤸᤗᤢᤰ ᤏᤢ ᤐᤡᤳᤜᤠ᤹ ᤁᤵᤔᤥ ᤋᤠᤖᤠᤶᤛᤡᤶᤔᤧ᤹ ᤜᤧᤰᤁᤩᤠᤱ ᤛᤧᤖᤧᤶᤛᤡᤶᤔᤧ᤹ᤀᤠᤱ ᤆᤩᤧᤶᤔᤧ᤹॥ ᤀᤰᤂᤣᤗ᤹ᤖᤡᤰ ᤂᤧᤏᤡ᤹ ᤔᤠᤰᤂᤡ᤹ ᤛᤥᤖᤡᤒᤠ ᤛᤠ ᤁᤧᤈᤠᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹᥅’” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤛᤧᤴᤍᤡᤰ ᤁᤧᤖᤧᤰᤗᤧ ᤂᤢᤏᤡ᤹ ᤐᤡᤳᤜᤠ᤹ ᤂᤧᤵᤔᤥ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥᤀᤣ ᤔᤧᤛᤧᤖᤢᤛᤡ॥

³⁵ ᤂᤧᤶᤒᤩᤠᤱ ᤛᤠᤘᤗᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ॥ ᤂᤧᤱᤃ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤛᤠᤘᤗᤖᤧ ᤆᤥᤃᤢᤒᤠ ᤁᤧᤖᤧᤰᤏᤢ᤺ᤸᤗᤧ ᤋᤃᤡᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤘᤕᤧ॥

³⁶ ᤜᤧᤰᤁᤩᤠᤱ ᤛᤠᤘᤗᤖᤧ ᤔᤧᤳᤋᤢᤛᤡ. “ᤀᤠᤏᤡ᤹ ᤕᤥ ᤐᤗᤡᤛ᤻ᤋᤡᤜᤠ᤹ᤖᤧᤀᤥ ᤛᤧᤴᤍᤡᤰ ᤌᤱ ᤆᤥ᤺ᤰᤛᤧ ᤐᤣᤃᤡ. ᤜᤧᤰᤁᤩᤠᤱ ᤂᤠᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤂᤧᤱᤜᤠ᤹ ᤏᤠ᤺ᤳᤋᤢᤶᤛᤡᤶ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤏᤠᤎᤡᤰᤁᤠᤱ ᤗᤧᤵᤔᤠᤛᤡᤔᤧ᤺ᤴ. ᤁᤖ ᤁᤧᤖᤧᤰ ᤛᤧᤵᤔᤠᤛᤡ॥” ᤁᤢᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤛᤡᤖᤠ᤹ᤎᤠᤱ ᤆᤥᤃᤧ᤹॥” ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤐᤠ᤺ᤳᤋᤢ. “ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤛᤢᤈᤠ ᤏᤠ᤺ᤰᤋᤢᤶ॥”

³⁷ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤗᤠᤵᤋᤢ. “ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤳᤋᤢᤱᤛᤡᤱᤒᤡ᥅ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤁᤧᤎᤠᤛᤢᤛᤡᤒᤡ᥅” ᤁᤖ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤘᤗᤧᤴ ᤏᤥᤃᤵ ᤔᤧᤒᤡᤖᤢᤴᤗᤥ॥

³⁸ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤔᤧᤳᤋᤢᤛᤡ. “ᤀᤠᤀᤡᤴ ᤌᤣ ᤗᤠᤕᤥ ᤐᤥ᤺ᤰᤂᤧᤀᤠᤱ ᤘᤠ᤹ ᤂᤧᤴ ᤏᤡᤱᤘᤠ᤹ ᤂᤥᤛᤢᤶ॥

³⁹ ᤀᤡᤛᤪᤠᤀᤡᤗᤧᤴ ᤋᤠᤱᤃᤧᤛᤧ᤺ᤵᤐᤠ ᤕᤜᤘᤣ ᤍᤠᤱᤒᤧᤴ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤆᤥ᤺ᤰᤐᤠ ᤁᤢᤀᤡᤛᤡᤰ. ᤂᤢᤏᤧ᤹ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤅᤠᤀᤠᤱ ᤐᤠ᤺ᤳᤋᤢᤱᤗᤥ. ᤀᤠᤱᤃᤠ᤹ ᤀᤠᤛ᤻ᤛᤠ ᤈᤥᤏᤠᤌᤠᤏᤖᤧᤀᤣ ᤗᤠᤕᤥ ᤆᤥᤃᤢᤛᤠᤱ ᤂᤧᤴᤏᤡᤴ ᤛᤡᤖᤥ॥” ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤀᤠᤋᤡᤴᤜᤠ᤹ᤖᤧᤀᤠᤱ ᤌᤣᤀᤠᤱ ᤂᤢᤏᤧ᤹ ᤔᤧᤶᤔᤧᤋᤢᤴ॥

⁴⁰ ᤜᤧᤰᤁᤩᤠᤱ ᤛᤠᤘᤗᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤂᤧᤏᤡ᤹ ᤁᤧᤖᤧᤰ ᤌᤡᤰᤗᤧᤵᤔᤠᤱ ᤕᤢᤅᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢ ᤀᤠᤛ᤻ᤛᤠ ᤈᤥᤏᤠᤌᤠᤏᤧᤴ ᤘᤣ᤹ ᤗᤧᤵᤔᤠᤱ ᤕᤢᤱᤛᤡᤃᤧ॥” ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤌᤣ᤺ᤴ ᤏᤢᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢ ᤂᤧᤴᤏᤣ ᤆᤥᤃᤧ᤹ᤀᤥ॥”

⁴¹ ᤂᤧᤒᤩᤠᤱ ᤛᤠᤘᤗᤖᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤀᤠᤀᤡᤴ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤌᤣᤀᤠᤱ ᤏᤥᤃᤵ ᤁᤧᤶᤒᤡᤖᤠᤱᤅᤡᤴ᥅ ᤁᤴ ᤗᤠᤕᤥᤴ ᤀᤠᤱᤃᤠ᤹ ᤀᤡᤃᤪ ᤀᤠᤛ᤻ᤛᤠ ᤈᤥᤏᤠᤌᤠᤏᤗᤠᤶᤒᤠ ᤘᤠ᤹ᤏᤧᤑᤃᤪ. ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤸᤗᤧ ᤂᤧᤸᤗᤧ ᤁᤢᤗᤰᤁᤥ ‘ᤀᤢᤖᤡᤔ’ ᤌᤠᤖᤖᤥ॥ ᤁᤴ ᤗᤠᤕᤥᤴ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤗᤠᤶᤒᤠ ᤐᤥ᤺ᤰᤂᤧᤒᤠᤏᤧᤑᤃᤪ ᤂᤧᤸᤗᤧ ᤁᤢᤗᤰᤁᤥ ‘ᤋᤢᤶᤔᤡᤔ’ ᤌᤠᤖᤖᤥ॥” ᤈᤥᤏᤠᤌᤠᤏ ᤏᤢ ᤛᤠᤘᤗᤧᤴ ᤋ᤹ᤕᤠ᤺ᤴᤛᤥ᤺ᤴᤏᤡᤸᤗᤧ ᤀᤣ᤹ᤀᤣ ᤛᤧᤴᤍᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤍᤠᤅᤧ॥

⁴² ᤜᤧᤰᤁᤩᤠᤱ ᤛᤠᤘᤗᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤢ ᤀᤠᤛ᤻ᤛᤠ ᤈᤥᤏᤠᤌᤠᤏᤖᤧ ᤁᤢᤔᤡᤱᤀᤥ ᤛᤡᤱᤈᤣ᤺ᤰ ᤛᤧᤰᤂᤠᤶᤔᤧ᤹॥” ᤜᤧᤰᤁᤩᤠᤱ ᤈᤥᤏᤠᤌᤠᤏᤧᤴ ᤔᤧᤛᤣᤃᤢ॥

⁴³ ᤂᤧᤶᤒᤩᤠᤱ ᤛᤠᤘᤗᤖᤧ ᤈᤥᤏᤠᤌᤠᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤈᤥᤃᤢᤀᤠᤱ ᤘᤠ᤹᥅ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤈᤥᤏᤠᤌᤠᤏᤖᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤍᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤡᤸᤗᤧ ᤛᤰᤘᤠᤄᤢᤴ ᤗᤰᤋᤢᤱᤅᤠᤱ ᤆᤢᤒᤧᤳᤇᤡᤰ ᤆᤠᤱᤅᤠᤱ ᤘᤕᤧ॥ ᤌᤣ ᤀᤠᤸᤗ ᤀᤠᤱᤃᤠ᤹ ᤛᤡᤔᤠ ᤐᤥᤱᤒᤠᤒᤡ᥅”

⁴⁴ ᤛᤠᤘᤗᤖᤧ ᤔᤧᤳᤋᤢ. “ᤈᤥᤏᤠᤌᤠᤏᤣ. ᤂᤧᤏᤧ᤹ ᤁᤧᤛᤡᤖ ᤐᤥᤱ. ᤁᤴ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤛᤡᤔᤠ ᤂᤢᤶᤍᤡᤱ ᤁᤧᤱᤄᤥᤛᤢᤴᤏᤣ ᤑᤃᤪ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤛᤧᤳᤋᤠᤖ॥”

⁴⁵ ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤘᤗᤧᤴ ᤔᤧᤔᤧᤳᤋᤢ. “ᤌᤣ ᤈᤥᤏᤠᤌᤠᤏᤧᤴ ᤛᤡᤒᤠᤒᤡ᥅ ᤀᤠᤶᤓᤠ ᤂᤢᤏᤧ᤹ᤀᤣ ᤌᤱᤅᤥ ᤏᤡᤱᤔᤡᤜᤠ᤹ ᤏᤠ᤺ᤴᤍᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤧ᤺ᤵᤋᤢᤛᤡᤒᤠ ᤔᤣ᤺ᤶᤒᤡ᥅ ᤀᤰᤋᤱᤒᤠ ᤔᤧᤒᤥᤱᤏᤧᤸᤗ॥ ᤕᤜᤘᤣ ᤍᤠᤱᤒᤧᤴ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧ. ᤈᤥᤏᤠᤌᤠᤏᤧᤸᤗᤧ ᤁᤢᤎᤧᤃᤣᤰ ᤀᤡᤎᤡᤰᤁᤠᤱ ᤂᤠᤶᤒᤠᤱᤅᤥ ᤗᤢ᤺ᤰᤔᤠ ᤌᤠᤔᤠ ᤔᤧᤄᤥᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤓᤠ᤹ᤗᤠᤶ ᤁᤶᤓᤩᤠᤖᤡᤰ ᤕᤶᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹॥” ᤀᤰᤂᤣᤗ᤹ᤖᤡᤰ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤈᤥᤏᤠᤌᤠᤏᤧᤴ ᤔᤧᤛᤧ᤺ᤵᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤔᤠ ᤔᤧᤒᤥ᤺ᤰᤂᤧᤴ॥

⁴⁶ ᤜᤧᤰᤁᤩᤠᤱ ᤛᤠᤘᤗᤖᤧ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤵᤔᤠ ᤗᤧᤖᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥

ᤛᤠᤘᤗᤖᤧ ᤁᤢᤕᤢᤰ ᤏᤢ ᤁᤢᤜᤡᤶᤛᤕᤱ

⁴⁷ ᤛᤠᤘᤗᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤄᤡᤖᤡᤒᤠ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ᤏᤢ ᤁᤧᤖᤧᤰ ᤐᤡᤛᤠᤱ ᤌᤱ ᤌᤰᤋᤧ॥ ᤂᤢᤏᤧ᤹ ᤔᤥᤀᤠᤒ. ᤀᤶᤔᤥᤏ. ᤀᤣᤍᤥᤔᤒᤠ ᤔᤏᤠᤜᤠ᤹. ᤛᤥᤒᤠᤒᤠ ᤜᤠᤱᤜᤠ᤹ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥᤃᤧ॥ ᤂᤢᤏᤧ᤹ ᤀᤠᤳᤋᤥ ᤀᤠᤳᤋᤥ ᤌᤱ ᤆᤥ᤺ᤰᤛᤧ ᤐᤣ. ᤂᤧ᤹ᤕᤥ ᤁᤧᤕᤢᤱᤒᤠᤜᤠ᤹ ᤂᤢᤏᤧ᤹ ᤏᤠ᤺ᤴᤍᤢᤛᤡ॥

⁴⁸ ᤂᤢᤏᤧ᤹ ᤔᤧᤱᤃᤡᤀᤣ ᤌᤱ ᤌᤰᤋᤧ. ᤜᤧᤰᤁᤩᤠᤱ ᤀᤔᤠᤗᤧᤁᤡᤜᤠ᤹ ᤏᤠ᤺ᤴᤍᤢᤛᤡ॥ ᤜᤧᤰᤁᤩᤠᤱ ᤆᤡᤃᤰᤘᤠ ᤁᤧᤏᤠᤵᤐᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤛᤧ᤺ᤵᤋᤢᤛᤡ॥

⁴⁹ ᤛᤠᤘᤗᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤈᤥᤏᤠᤌᤠᤏ. ᤕᤡᤛ᤻ᤒᤡ ᤏᤢ ᤔᤸᤁᤡᤛᤢᤀ ᤔᤧᤘᤕᤧ॥ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠ ᤋᤢᤶᤔᤧᤸᤗᤧ ᤁᤢᤔᤡᤱ ᤔᤧᤖᤠᤒ ᤏᤢ ᤑᤥ᤺ᤰᤘᤠᤔᤠᤸᤗᤧ ᤁᤢᤔᤡᤱ ᤔᤡᤁᤗ ᤘᤕᤧ॥

⁵⁰ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤀᤜᤡᤔᤠᤛᤖᤧ ᤁᤢᤛ᤻ᤛᤠ ᤀᤜᤡᤏᤥᤔ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤰᤐᤧᤒᤠᤴ ᤂᤢᤏᤧ᤹ ᤁᤢᤶᤓᤅᤠ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤘᤕᤧ॥

⁵¹ ᤛᤠᤘᤗᤖᤧ ᤁᤢᤶᤒᤠ ᤁᤡᤛᤛᤧᤴ ᤏᤢ ᤀᤒᤏᤣᤖᤖᤧ ᤁᤢᤶᤒᤠ ᤏᤣᤖᤧᤴ ᤀᤒᤡᤀᤧᤗᤖᤧ ᤁᤢᤛ᤻ᤛᤠ ᤘᤕᤧᤛᤡ॥

⁵² ᤛᤠᤘᤗᤖᤧ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤐᤗᤡᤛ᤻ᤋᤡᤜᤠ᤹ᤏᤢ ᤐᤕᤶ ᤕᤶᤒᤠ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥ ᤂᤢᤏᤧ᤹ ᤋᤢᤔᤢᤛᤡᤒᤠ ᤁᤧᤎᤢᤶᤒᤠ ᤏᤢ ᤔᤧᤱᤃᤡᤔᤏᤠᤒᤠ ᤔᤏᤠᤜᤠ᤹ ᤛᤠᤘᤗᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤥ ᤜᤠᤖᤠᤘᤖᤠ ᤕᤢᤰᤋᤡᤱ ᤆᤥᤃᤢᤍᤣᤛᤢᤛᤡᤖᤥ॥