᥇ ᤛᤠᤔᤢᤀᤧᤗ 13 - LIFOTNT

ᤐᤗᤡᤛ᤻ᤋᤡᤜᤠ᤹ᤏᤢ ᤋᤧᤴᤎᤱ ᤐᤥ᤺ᤰᤂᤧᤒᤠ

¹ ᤛᤠᤘᤗᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤛᤢᤶᤒᤥᤱ ᤋᤱᤒᤣ᤹ ᤕᤥᤖᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤗᤡᤒᤥᤱᤅᤠᤱ ᤋᤱᤒᤣ᤹ ᤏᤧᤳᤇᤡ ᤌᤠᤖᤡᤰ ᤜᤠᤱ ᤆᤥᤃᤢ॥

² ᤛᤠᤘᤗᤖᤧ ᤜᤧᤴᤇᤡᤱ ᤛᤢᤶᤛᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤛᤣᤃᤢᤛᤡ—ᤔᤡᤁᤔᤠᤛ ᤏᤢ ᤒᤣᤌᤣᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ᤀᤥ ᤂᤢᤏᤧ᤹ᤏᤢ ᤜᤧᤴᤇᤡᤱ ᤏᤧᤳᤇᤡ ᤔᤧᤘᤕᤧ. ᤜᤧᤰᤁᤩᤠᤱ ᤒᤣᤏᤩᤠᤔᤡᤴᤒᤠ ᤃᤡᤒᤠᤀᤥ ᤈᤥᤏᤠᤌᤠᤏᤧᤴᤏᤢ ᤜᤧᤴᤇᤡᤱᤎᤡᤰ ᤔᤧᤘᤕᤧ॥ ᤁᤧᤏᤶᤒᤠ ᤁᤢᤓᤠ᤹ ᤔᤏᤠᤜᤠ᤹ᤃ ᤂᤢᤏᤡ᤹ ᤜᤡᤶᤔᤥ ᤐᤠᤱᤄᤢᤍᤣᤛᤢᤛᤡ॥

³ ᤈᤥᤏᤠᤌᤠᤏᤧᤸᤗᤧ ᤃᤡᤒᤠᤀᤥ ᤁᤧᤏᤧᤒᤠ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤑᤳᤋᤢᤛᤡ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢ॥ ᤜᤧᤰᤁᤩᤠᤱ ᤛᤠᤘᤗᤖᤧ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤐᤡᤛᤠᤱ ᤁᤧᤕᤢᤱᤒᤠ “ᤜᤡᤒᤪᤢᤜᤠ᤹ᤖᤧ ᤔᤧᤄᤧᤵᤛᤢᤖ” ᤑᤠ᤹ᤀᤠᤱ ᤌᤢᤳᤋᤢᤖᤡ᤺ᤵᤐᤠᤴ ᤔᤢ᤺ᤵᤐᤠᤱᤄᤢᤛᤡ॥

⁴ ᤂᤧᤸᤗᤧᤆᤥᤃᤢᤸᤗᤧ “ᤛᤠᤘᤗᤧᤴ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠ ᤜᤣ᤺ᤰᤋᤧᤖᤧᤇ. ᤜᤧᤰᤁᤩᤠᤱ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤡ᤺ᤳᤋᤢᤛᤡ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ॥” ᤀᤠᤶᤓᤠ ᤁᤴ ᤌᤢᤳᤋᤢᤖᤡ᤺ᤵᤐᤠᤗᤠᤶ ᤔᤧᤄᤧᤵᤛᤢᤒᤠ ᤀᤡᤱᤄᤱᤅᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤃᤡᤗᤃᤠᤗᤒᤠ ᤛᤠᤘᤗᤖᤧᤀᤥ ᤔᤧᤈᤢᤵᤛᤧ ᤔᤧᤍᤩᤧ॥

⁵ ᤐᤗᤡᤛ᤻ᤋᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤏᤢ ᤜᤧᤴᤇᤡᤱ ᤛᤢᤶᤒᤥᤱ ᤀᤴᤗᤠᤎᤠ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠ ᤜᤧᤴᤇᤡᤱ ᤋᤢᤰᤛᤡ ᤔᤧᤘᤕᤧ॥ ᤜᤧᤰᤁᤩᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡᤰ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤳᤋᤣ ᤂᤠᤶᤔᤥ ᤁᤧᤎᤰᤐᤠ ᤋᤡᤸᤗᤡᤱᤃᤠᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ ᤒᤣᤌᤜᤠᤘᤏᤒᤠ ᤏᤠᤶᤃᤧᤳ ᤐᤡᤛᤠᤱ ᤔᤡᤁᤔᤠᤛᤀᤥ ᤌᤥ ᤔᤧᤒᤣᤀᤠᤱ ᤔᤧᤕᤢᤱᤛᤡᤱ॥

⁶ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤁᤧᤈᤠ᤹ᤒᤠ ᤋᤢᤰᤂᤣᤀᤥ ᤔᤧᤎᤩᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤓᤳᤋᤢ ᤔᤧᤓᤧᤳᤋᤢᤛᤡ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤑᤢᤰᤁᤢᤀᤥ. ᤕᤠ᤺ᤴᤛᤢᤱ ᤛᤡᤃᤠᤱ. ᤕᤠᤰᤐᤣ᤹ᤑᤡ᤺ᤵᤔᤥ. ᤜᤧᤰᤁᤩᤠᤱ ᤗᤢᤶᤒᤠ᤺ᤳᤜᤠ᤹ᤀᤥ ᤏᤢ ᤘᤒᤠᤰᤜᤠ᤹ᤀᤥ ᤔᤧᤈᤡᤱᤛᤡᤱ॥

⁷ ᤁᤢᤓᤠ ᤀᤡᤛᤪᤠᤀᤡᤗᤡᤜᤠ᤹ ᤕᤷᤍᤏ ᤕᤱᤄᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤃᤠᤍ ᤏᤢ ᤃᤡᤗᤠᤍ ᤗᤠᤈᤣ᤹ᤒᤠ ᤌᤢᤶᤜᤠ᤹ᤀᤥ ᤆᤡᤱᤛᤡᤱᤛᤧ ᤔᤧᤄᤧᤳᤇᤡᤱ ᤔᤧᤒᤣ॥ ᤁᤖ ᤛᤠᤘᤗᤧᤴ ᤃᤡᤸᤃᤠᤗᤀᤥᤀᤣ ᤕᤢᤅᤧ ᤕᤠ᤺ᤰᤋᤧ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤡᤔᤠ ᤕᤱᤔᤠ ᤔᤧᤜᤣ᤺ᤰᤋᤧ॥

⁸ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤛᤠᤘᤗᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤜᤠᤱᤄᤢᤀᤠᤱ ᤕᤢᤅᤧ. ᤁᤖ ᤛᤠᤔᤢᤀᤧᤗᤧᤴ ᤃᤡᤗᤃᤠᤗ ᤁᤧᤵᤔᤠ ᤔᤧᤛᤢᤰᤋᤧᤴ॥ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤁᤢᤔᤏᤠᤜᤠ᤹ ᤂᤧᤳᤇᤡᤱᤔᤠ ᤔᤧᤜᤣ᤺ᤰᤋᤧ॥

⁹ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤔᤧᤳᤋᤢᤛᤡ. “ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤛᤏᤠᤖᤢᤱ ᤛᤡᤍᤢᤱᤈᤓᤠᤖᤧ ᤌᤰᤛᤠᤜᤠ᤹ ᤋᤠᤖᤠᤶᤛᤧ᤹” ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥

¹⁰ ᤂᤢᤏᤧ᤹ ᤂᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤢᤖᤢᤖ ᤐᤳᤇᤧᤸᤗᤧ ᤛᤠᤔᤢᤀᤧᤗᤧᤴ ᤁᤧᤖᤧᤍᤩᤧ. ᤜᤧᤰᤁᤩᤠᤱ ᤛᤠᤘᤗᤧᤴ ᤂᤢᤏᤧ᤹ ᤁᤢᤗᤠᤱᤍᤠ᤺ᤰᤛᤧ ᤐᤣ॥

¹¹ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤴ ᤌᤣ ᤁᤧᤈᤥᤃᤢᤒᤠᤒᤣ᥅” ᤛᤠᤘᤗᤖᤧ ᤏᤥᤃᤵ ᤐᤡᤖᤢ. “ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤗᤧᤖᤠᤱᤅᤠᤱ ᤔᤧᤄᤧᤳᤇᤡᤱᤗ ᤔᤧᤒᤳᤇᤧᤒᤠ ᤏᤡᤛᤢᤱᤛᤡᤱ. ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠ ᤕᤧᤶᤔᤥ ᤀᤠᤍᤠᤱᤒᤠᤀᤠᤱ ᤁᤧᤱᤃᤧᤖᤧᤴ. ᤂᤧᤶᤒᤩᤠᤱ ᤐᤗᤡᤛ᤻ᤋᤜᤠ᤹ᤀᤠᤱ ᤔᤡᤁᤔᤠᤛᤀᤥ ᤔᤧᤈᤢᤵᤛᤧᤖ ᤔᤧᤒᤳᤇᤧ॥

¹² ᤀᤠᤸᤗ ᤐᤗᤡᤛ᤻ᤋᤡᤜᤠ᤹ ᤀᤠᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤃᤡᤗᤃᤠᤗᤀᤥ ᤔᤧᤍᤠ ᤁᤧᤗ᤹ᤒᤠ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴᤏᤠᤱ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤒᤠ ᤜᤥᤵ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤀᤠᤱᤃᤠ᤹ ᤀᤠᤒᤠᤅᤣ ᤆᤥ᤺ᤰᤔᤠᤀᤣ ᤁᤧᤒᤥᤱᤒᤠ ᤏᤡᤱᤘᤠ᤹ ᤂᤥᤛᤢᤱ॥”

¹³ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤍᤱ ᤕᤠ᤺ᤶᤒᤰ ᤁᤧᤈᤥᤃᤢ॥ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤁᤧᤴᤈᤥᤃᤢᤴ॥ ᤂᤧᤴ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤁᤧᤈᤥᤃᤢᤸᤗᤧᤃ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤁᤧᤜᤠᤱᤈᤢᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤐᤥ᤺ᤰᤂᤧᤒᤠᤔᤧᤴ॥

¹⁴ ᤁᤖ ᤀᤠᤸᤗ ᤂᤧᤏᤧ᤹ ᤁᤧᤜᤠᤱᤈᤢᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤔᤧᤒᤥᤱᤏᤧᤶᤒᤠ ᤐᤥ᤺ᤰᤂᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤏᤢ ᤂᤢᤏᤧ᤹ ᤁᤢᤏᤡᤱᤘᤠ᤹ ᤀᤡᤛᤡ᤺ᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤎᤡᤰ ᤁᤥ᤺ᤳᤋᤢᤀᤠᤱ ᤘᤠ᤹॥ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤁᤢᤔᤏᤠᤜᤠ᤹ᤀᤥ ᤗᤠᤶᤗᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤴᤀᤡ᤺ᤳᤋᤢᤴ ᤁᤧᤴᤏᤠ᤺ᤳᤋᤢᤴ॥”

¹⁵ ᤜᤧᤰᤁᤩᤠᤱ ᤃᤡᤗᤃᤠᤗ ᤋᤧᤴᤏᤡᤴ ᤗᤧᤖᤢᤀᤠᤱ ᤒᤣᤏᤩᤠᤔᤡᤴᤒᤠ ᤃᤡᤒᤠ ᤗᤧᤵᤛᤠᤱ ᤌᤠᤛᤡᤱ॥ ᤜᤧᤰᤁᤩᤠᤱ ᤛᤠᤘᤗᤖᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤡᤖᤢᤛᤡᤸᤗᤧ ᤂᤧᤱᤜᤠ᤹ ᤁᤡᤵ ᤋᤢᤰᤛᤡ ᤕᤠᤖᤡᤰ ᤔᤧᤘᤕᤧ॥

¹⁶ ᤛᤠᤘᤗᤧᤴ ᤏᤢ ᤁᤢᤛ᤻ᤛᤠ ᤈᤥᤏᤠᤌᤏᤧᤴ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤒᤣᤏᤩᤠᤔᤡᤴᤒᤠ ᤃᤡᤒᤠᤀᤥ ᤋᤢᤖᤠᤜᤡᤶ ᤔᤧᤈᤥᤃᤢ॥ ᤐᤗᤡᤛ᤻ᤋᤡᤜᤠ᤹ᤃ ᤔᤡᤁᤔᤠᤛᤀᤥ ᤋᤢᤖᤠᤜᤡᤶ ᤔᤧᤗᤣ᤺ᤳᤋᤢᤀᤠᤱ ᤔᤧᤕᤢᤱᤛᤡᤱ॥

¹⁷ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤔᤧᤕᤢᤱᤒᤠ ᤋᤧᤴᤏᤥᤗᤠᤶ ᤆᤡᤃᤰᤘᤠ ᤁᤧᤏᤠᤵᤐᤠ ᤔᤏᤠᤗᤢᤵ ᤛᤢᤶᤛᤡ ᤔᤧᤗ᤺ᤴᤍᤧ ᤔᤧᤓᤧᤖᤧ॥ ᤌᤡᤰᤛᤡᤃᤣᤰᤐᤠ ᤗᤢᤵᤜᤠ᤹ ᤛᤢᤀᤠᤗ ᤋᤧᤱᤃᤵᤐᤥ ᤁᤧᤏᤧᤒᤠ ᤀᤥᤐᤪᤠ ᤗᤧᤵᤔᤠᤱ ᤔᤧᤗᤠᤛᤧ॥

¹⁸ ᤏᤡᤛᤡᤃᤣᤰᤐᤠ ᤗᤢᤵᤜᤠ᤹ ᤒᤧᤌ-ᤜᤧᤖᤥᤏ ᤗᤧᤵᤔᤠᤱ ᤔᤧᤗᤠᤛᤧ॥ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤗᤢᤵᤜᤠ᤹ ᤛᤒᤥᤀᤡᤏ ᤋᤧᤶᤒᤣ᤹ ᤏᤢ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱᤒᤠ ᤁᤥ᤺ᤰᤔᤠ ᤗᤧᤵᤔᤠᤱ ᤔᤧᤗᤠᤛᤧ॥

¹⁹ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤁᤧᤖᤧᤰ ᤐᤡᤛᤠᤱ ᤑᤧᤴᤈᤣ᤹ ᤁᤧᤎᤰᤐᤠ ᤜᤠ᤺ᤳᤋᤠᤱ ᤂᤥᤔᤧᤴᤍᤧᤳᤋᤧᤴ. ᤌᤣᤀᤠᤱᤓᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤋᤠᤓᤣ ᤏᤢ ᤗᤠ᤺ᤰᤜᤠ᤹ ᤌᤰᤔᤠ ᤔᤧᤶᤒᤠᤱᤄᤢᤴᤇᤡᤴ॥

²⁰ ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤑᤠᤗᤡ. ᤁᤠ᤺ᤱ. ᤋ᤺ᤴᤍᤡ᤹ ᤏᤢ ᤁᤠᤳᤆᤩᤠᤜᤠ᤹ᤀᤠᤱ ᤜᤠᤛᤧᤶᤛᤧ ᤐᤗᤡᤛ᤻ᤋᤡᤜᤠ᤹ᤖᤧᤀᤥ ᤐᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧ॥

²¹ ᤗᤳᤇᤠ ᤑᤠᤗᤡ ᤕᤠ ᤁᤠ᤺ᤱ ᤜᤠᤛᤧᤶᤔᤧᤸᤗᤧ ᤁᤢᤔᤧᤸᤗᤢᤱ ᤕᤠᤱᤀᤡᤳᤇᤣᤎᤡᤰ ᤘᤕᤧ. ᤜᤧᤰᤁᤩᤠᤱ ᤐᤡᤳ ᤏᤠ᤺ᤵᤔᤠᤖᤧ ᤗᤠᤃᤡ ᤀ᤺ᤰᤂᤢ᤹ᤂᤢ᤹ᤒᤠᤴ ᤜᤠᤛᤶᤛᤶᤒᤠ ᤆᤥ᤺ᤰᤔᤠ ᤏᤢ ᤋ᤺ᤴᤍᤡ᤹ ᤜᤠᤛᤧᤶᤔᤠ ᤁᤢᤔᤧᤸᤗᤢᤱ ᤕᤠᤱᤀᤡᤳᤇᤣ ᤏᤧᤳᤇᤡ ᤘᤕᤧ॥

²² ᤂᤧᤸᤗᤧᤆᤥᤃᤢᤸᤗᤧ ᤌᤱ ᤐᤥᤱᤔᤠ ᤜᤣ᤺ᤰᤋᤧᤸᤗᤧ ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤌᤱ ᤆᤥ᤺ᤰᤔᤠ ᤁᤧᤓᤠ᤹ᤒᤠ ᤔᤏᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤋᤠᤓᤣ ᤏᤢ ᤗᤠ᤺ᤰ ᤔᤧᤱᤃᤳᤋᤢᤴ॥ ᤁᤖ ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤏᤧᤸᤗᤧᤖᤰ ᤑᤧᤈᤢᤶ ᤑᤧᤕᤠ ᤁᤳᤋᤧᤛᤢ॥

²³ ᤂᤧᤴ ᤕᤧᤶᤔᤥ ᤔᤡᤁᤔᤠᤛᤒᤠ ᤆᤡᤓᤡ᤹ᤑᤡ᤹ᤒᤠ ᤗᤠᤶᤔᤡᤴ ᤁᤶᤒᤪᤠᤱ ᤔᤧᤳᤇᤧ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤔᤧᤘᤕᤧᤖᤥ॥