᥇ ᤛᤠᤔᤢᤀᤧᤗ 12 - LIFOTNTᤛᤠᤔᤢᤀᤧᤗᤖᤧ ᤔᤏᤠᤜᤠ᤹ ᤀᤢᤘᤠ ᤆᤥᤃᤢᤛᤡᤒᤠ 1 ᤛᤠᤔᤢᤀᤧᤗᤖᤧ ᤂᤧᤵᤔᤥ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤂᤧᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤵᤛᤢᤱ. ᤂᤧᤒᤩᤠᤱ ᤂᤧᤏᤡ᤹ᤗᤢᤶᤔᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤜᤠᤱᤅᤡᤴ ᤕᤢᤰᤋᤡᤱ ᤆᤥᤃᤢᤱᤅᤠᤱ ᤘᤠ᤹॥ 2 ᤜᤠᤒᤠ ᤂᤧᤴ ᤜᤠᤱᤅᤡᤴ ᤂᤧᤏᤡ᤹ ᤗᤠᤶᤗᤥᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤱᤃᤠ᤹ᤃ ᤁᤠᤵᤐᤥᤒᤠ ᤋᤢᤶᤛᤠᤱᤅᤠᤱ ᤘᤠ᤹ᤀᤠ. ᤂᤧᤒᤩᤠᤱ ᤀᤠᤎᤧᤃᤣᤰ ᤔᤢᤖᤡᤰᤁᤠᤱ ᤑᤢᤳᤋᤧ ᤆᤢᤖᤧᤀᤠᤱ ᤘᤠ᤹॥ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ᤀᤠᤱ ᤂᤧᤏᤡ᤹ᤏᤢᤀᤣ ᤔᤧᤘᤠ᤹॥ ᤀᤠᤱᤃᤠ᤹ᤃ ᤆᤢ᤺ᤰᤋᤠᤱᤀᤠᤱᤎᤥ ᤀᤠᤸᤗᤥ ᤌᤧᤶᤒᤠ ᤂᤧᤏᤡ᤹ ᤗᤠᤶᤗᤥᤒᤠ ᤐᤥ᤺ᤰᤂᤠᤱ ᤌᤠᤅᤠᤱᤅᤠᤱ ᤘᤠ᤹ᤀᤠ॥ 3 ᤀᤠᤱᤃᤠ᤹ ᤀᤠᤶᤓᤠ ᤁᤵᤔᤥ ᤘᤠ᤹ᤀᤠ॥ ᤀᤠᤱᤃᤠ᤹ᤏᤢ ᤂᤧᤏᤡ᤹ ᤛᤡᤖᤠ᤹ᤔᤧᤴᤎᤠᤱᤔᤏᤠᤒᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤁᤧᤃᤳᤋᤢᤶᤏᤧᤓᤃᤪ ᤁᤵᤔᤥ ᤕᤜᤘᤣ ᤍᤠᤱᤒᤠᤴ ᤏᤢ ᤂᤢᤏᤧ᤹ ᤛᤣ᤺ᤴᤍᤢᤒᤠ ᤁᤢᤔᤏᤠ᤺ᤸᤗᤧ ᤁᤢᤍᤃᤡ ᤐᤠ᤺ᤳᤋᤠᤶᤔᤧ᤹॥ ᤀᤠᤱᤃᤠ᤹ ᤜᤠ᤺ᤳᤗᤧ ᤁᤢᤒᤡᤳᤋᤧᤴ ᤋᤣ᤹ᤖᤢᤱ ᤐᤡᤖᤢᤱᤅᤠᤱ ᤘᤠ᤹ᤀᤠ᥅ ᤜᤠ᤺ᤳᤗᤧ ᤁᤢᤀᤍᤱᤅᤡᤴ ᤋᤣ᤹ᤖᤢᤱ ᤐᤡᤖᤢᤱᤅᤠᤱ ᤘᤠ᤹ᤀᤠ᥅ ᤀᤠᤱᤃᤠ᤹ ᤀᤠᤳᤋᤡᤴ ᤀᤡᤱᤗᤧᤰᤋᤢᤱᤅᤠᤱ ᤘᤠᤀᤠ᥅ ᤀᤠᤱᤃᤠ᤹ ᤜᤠ᤺ᤳᤗᤧ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤠ᤹ᤔᤠᤖᤧ ᤗᤠᤃᤡ ᤕᤠᤱ ᤋᤧᤶᤛᤢᤱᤅᤠᤱ ᤘᤠ᤹ᤀᤠ᥅ ᤀᤠᤱᤃᤠ᤹ ᤀᤠᤔᤧᤳᤋᤠᤶᤔᤧ᤹. ᤂᤧᤴ ᤜᤠᤴᤋᤡ ᤁᤧᤒᤥᤱᤒᤠᤜᤠ᤹ ᤀᤠᤱᤃᤠ᤹ ᤏᤢ᤺ᤰᤋᤢᤱ᤹॥” 4 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤕᤠᤵᤔᤡ ᤀᤡᤱᤔᤧᤸᤗᤧᤰᤁᤣ ᤁᤧᤘᤠ᤹ᤖᤥ॥ ᤀᤠᤍᤠᤱᤒᤠᤖᤧ ᤀᤠᤏᤡᤃᤧᤏᤢ ᤋᤢᤰᤂᤣ ᤆᤠ᤺ᤵᤔᤠ ᤏᤡᤱᤄᤢᤶᤒᤠ ᤕᤠ᤺ᤶᤒᤰᤜᤠ᤹ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤖᤥ॥ ᤀᤠᤍᤠᤱᤒᤠᤖᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤌᤣᤀᤠᤱ ᤁᤧᤍᤣ᤹ᤖᤢ ᤁᤧᤒᤡᤖᤢᤛᤡᤒᤠ ᤜᤥᤵᤗᤥ॥” 5 ᤂᤧᤴ ᤀᤣᤃᤠᤱ ᤛᤠᤔᤢᤀᤧᤗᤖᤧ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤏᤡ᤹ ᤌᤣᤀᤠᤱ ᤐᤠ᤺ᤴᤜᤠ᤹ ᤁᤧᤱᤄᤥᤛᤢᤶᤔᤡᤴ ᤑᤠ᤹ᤀᤠᤱ ᤀᤠᤀᤡᤴᤒᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤴ ᤁᤧᤏᤡᤒᤠ ᤋᤥ᤺ᤴᤍᤡ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤛᤣ᤺ᤴᤍᤢᤒᤠ ᤔᤏᤠ᤺ᤴᤏᤠᤱ ᤋᤥ᤺ᤴᤍᤡ ᤘᤠ᤹ᤖᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤥᤖᤥ. ᤂᤢᤏᤧ᤹ ᤁᤧᤏᤡᤒᤠ ᤋᤥ᤺ᤴᤍᤡ ᤘᤠ᤹ᤖᤥ॥” 6 ᤛᤠᤔᤢᤀᤧᤗᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤏᤡ᤹ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤁᤧᤒᤡᤖᤡ. ᤜᤧᤰᤁᤩᤠᤱ ᤂᤧᤏᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢ ᤑᤧᤳᤋᤢᤛᤡ॥ 7 ᤀᤠᤸᤗ ᤂᤧᤏᤡ᤹ ᤁᤵᤔᤥ ᤕᤧᤒᤠᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤏᤡ᤹ ᤏᤢ ᤂᤧᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤔᤧᤳᤏᤡᤱ॥ 8 “ᤕᤠᤁᤢᤒᤧᤴ ᤔᤡᤛᤪᤗᤠᤈᤣ᤹ ᤐᤣᤀᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤔᤧᤎᤩᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢ. ᤂᤧᤒᤩᤠᤱ ᤂᤢᤏᤧ᤹ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤐᤠᤱᤄᤢᤛᤡ॥ ᤂᤧᤴ ᤏᤧᤵᤑᤢᤜᤠ᤹ᤖᤧ ᤂᤧᤏᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤧᤛᤢᤀᤠᤱ ᤂᤧᤱᤜᤠ᤹ ᤁᤴ ᤋᤧᤴᤏᤥ ᤕᤢᤰᤂᤢᤛᤡ॥ 9 “ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤴ ᤏᤡᤱᤘᤠ᤹ ᤔᤧᤔᤢ᤺ᤳᤇᤢ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤜᤠᤛᤥᤖᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤐᤣᤒᤠ ᤛᤡᤛᤣᤖᤠᤖᤧ ᤁᤢᤜᤢᤰᤁᤥ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤏᤢ ᤔᤥᤀᤠᤒᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤔᤧᤎᤩᤧᤖ ᤕᤠ᤺ᤴᤍᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤴᤍᤢᤛᤡ॥ 10 ᤜᤧᤰᤁᤩᤠᤱ ᤂᤧᤏᤡ᤹ ᤐᤠᤎᤧᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤰᤂᤠ ᤏᤡᤛ᤻ᤛᤣᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤀᤠᤱ ᤔᤧᤒᤠ᤺ᤳᤋᤢ. ‘ᤀᤠᤏᤡᤃᤣ ᤗᤠᤕᤥ ᤆᤥ᤺ᤰᤔᤏᤠ. ᤀᤠᤏᤡᤃᤣ ᤕᤜᤘᤣ ᤍᤠᤱᤒᤧᤴ ᤗᤧᤖᤢᤶᤒᤧᤀᤠᤱ ᤒᤠᤗ ᤔᤠᤱᤅᤡᤴ ᤏᤢ ᤀᤛ᤻ᤋᤥᤖᤣᤋ ᤔᤠᤱᤜᤠ᤹ ᤛᤧᤘᤠ ᤔᤧᤳᤋᤢᤶᤛᤡᤶᤒᤧ॥ ᤁᤖ ᤀᤠᤸᤗ ᤀᤠᤏᤡᤃᤣ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠᤗᤠᤶ ᤀᤠᤛᤧ᤺ᤵᤋᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤏᤧ᤹ᤀᤥ ᤔᤠᤱᤛᤧᤘᤠ ᤆᤥᤃᤢᤶᤒᤧ॥’ 11 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤃᤡᤍᤥᤏ. ᤒᤠᤖᤠᤁ. ᤕᤡᤵᤋᤠ ᤏᤢ ᤛᤠᤔᤢᤀᤧᤗᤗᤧᤴ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤡᤛᤠᤱᤒᤠ ᤂᤧᤏᤡ᤹ ᤏᤡᤱᤔᤡᤜᤠ᤹ᤗᤠᤶ ᤁᤧᤶᤛᤧ᤺ᤵᤋᤡ. ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤡ᤹ ᤏᤢᤖᤡᤰ ᤋᤠᤖᤡᤰᤁᤠᤱ ᤕᤢᤱᤔᤠ ᤁᤧᤜᤣ᤺ᤰᤋᤡ॥ 12 “ᤁᤖ ᤂᤧᤴ ᤀᤣᤃᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤏᤠᤜᤠᤛᤧᤴ ᤂᤧᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤑᤧᤖᤧᤖ ᤐᤳᤇᤧᤒᤠ ᤁᤧᤏᤡᤛᤢᤶ॥ ᤕᤜᤘᤣ ᤍᤠᤱᤒᤠ ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤧᤏᤡ᤹ ᤜᤠᤱ ᤘᤕᤧᤛᤠᤱ ᤂᤧᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤔᤧᤳᤋᤧ. ‘ᤔᤣ᤺ᤴ. ᤀᤠᤏᤡᤃᤧᤀᤥ ᤜᤠᤱ ᤁᤧᤈᤥ᤺ᤰᤐᤠ ᤜᤠᤱ ᤆᤠᤜᤠᤒ᤻ ᤆᤥᤃᤡᤃᤧ॥’ 13 “ᤀᤠᤸᤗ. ᤂᤧᤏᤡ᤹ ᤁᤧᤛᤣᤃᤢᤶᤒᤠ ᤜᤠᤱᤅᤡᤴ ᤁᤵᤔᤥ ᤘᤠ᤹॥ ᤂᤧᤏᤡ᤹ ᤜᤠᤱ ᤁᤧᤏᤠ᤺ᤰᤋᤢᤶ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤡ᤹ᤗᤢᤶᤔᤥ ᤜᤠᤱ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤠ᤹॥ 14 ᤕᤜᤘᤣ ᤍᤠᤱᤒᤠᤴ ᤂᤧᤏᤡ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤢᤶᤔᤠᤱ ᤂᤢᤏᤧ᤹ ᤁᤢᤛᤧᤘᤠ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤶᤒᤥ᤺ᤰᤁᤣ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤂᤧᤏᤡ᤹ ᤜᤠᤱᤅᤡᤴ ᤏᤢ ᤂᤧᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤛᤠ᤺ᤴᤛᤠᤒᤠ ᤁᤧᤒᤥᤰᤂᤡᤏᤧᤓᤃᤪ. ᤂᤧᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡ᤹॥ 15 ᤁᤖ ᤂᤧᤏᤡ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤱ ᤔᤧᤴᤈᤥ᤺ᤰᤁᤣ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤃᤡᤏᤧᤑᤃᤪ. ᤂᤧᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤂᤧᤏᤡ᤹ ᤋᤰᤗᤧᤱᤘᤠᤀᤥ ᤂᤢᤏᤧ᤹ ᤐᤥ᤺ᤰᤗᤥ॥ 16 “ᤀᤠᤸᤗ ᤛᤫᤠ᤺ᤳᤋᤠᤱ ᤕᤧᤒᤠᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤡᤏᤡ᤹ ᤋᤃᤡᤀᤣ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤀᤔᤧᤳᤋᤠᤶᤔᤧ᤹॥ 17 ᤀᤠᤸᤗᤥ ᤔᤠᤛᤡ ᤜᤧᤰᤔᤠ ᤕᤧᤶ ᤘᤠ᤹ ᤔᤣ᤺ᤶᤒᤡ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤺ᤶᤓᤣ ᤏᤢ ᤘᤜᤡᤳ ᤌᤠᤛᤢᤖ ᤕᤠ᤺ᤴᤍᤢᤖᤥ॥ ᤂᤧᤒᤩᤠᤱ ᤂᤧᤏᤡ᤹ ᤜᤠᤱ ᤁᤧᤏᤠ᤺ᤰᤋᤢᤶᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤗᤇ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤧᤏᤡᤛᤢᤶ᤹॥” 18 ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤢᤏᤧ᤹ ᤛᤠ᤺ᤶᤓᤣ ᤏᤢ ᤘᤜᤡᤳ ᤌᤩᤧᤖ ᤕᤠ᤺ᤴᤍᤢ॥ ᤂᤧᤴ ᤔᤧᤏᤡᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤴ ᤏᤢ ᤛᤠᤔᤢᤀᤧᤗᤖᤧ ᤂᤢᤴᤇᤡ᤹ ᤋᤃᤡ ᤔᤧᤃᤡᤛᤧᤖᤥ॥ 19 ᤂᤧᤴ ᤔᤏᤠᤜᤠ᤹ᤖᤧ ᤛᤠᤔᤢᤀᤧᤗᤗᤧᤴ ᤔᤧᤔᤧᤳᤋᤢ. “ᤛᤡᤔᤠᤗᤠᤶ ᤜᤡᤱᤔᤠ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤜᤠᤱ ᤏᤠ᤺ᤰᤋᤢᤶᤒᤧᤀᤠᤱ ᤗᤠᤕᤥ ᤛᤶᤎᤠᤱ ᤗᤠᤕᤥ ᤕᤥ᤹ᤖᤢᤶᤒᤧᤀᤠᤱ ᤘᤠ᤹ᤖᤥ॥” 20 ᤛᤠᤔᤢᤀᤧᤗᤖᤧ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤠᤶᤔᤡᤴᤏᤧ᤹. ᤂᤧᤏᤡ᤹ ᤁᤧᤖᤧᤰ ᤐᤖᤡᤰᤐᤠ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤛᤠᤱ ᤕᤜᤘᤣ ᤍᤠᤱᤒᤠᤴ ᤏᤛᤠᤴ ᤆᤥ᤺ᤰᤔᤠ ᤔᤧᤗᤧᤖᤠᤶᤔᤡᤴᤏᤧ᤹. ᤁᤖ ᤂᤧᤏᤡ᤹ ᤁᤠᤰ ᤏᤡᤱᤘᤠ᤹ ᤛᤡᤃᤠᤱᤗᤠᤶᤒᤠᤀᤣ ᤂᤢᤏᤧ᤹ ᤁᤢᤛᤧᤘᤠ ᤆᤥᤃᤠᤶᤔᤧ᤹᥄ 21 ᤛᤧᤰᤂᤠ ᤔᤣ᤺ᤶᤒᤠ ᤔᤠᤱᤜᤠ᤹ᤀᤥ ᤏᤛᤠᤴ ᤔᤧᤈᤥᤃᤠᤶᤔᤡᤴᤏᤧ᤹. ᤂᤧᤱᤜᤠ᤹ᤖᤧ ᤑᤠ᤹ᤔᤠᤀᤠᤱ ᤀᤠᤔᤧᤴᤇᤢᤰᤏᤧᤴ ᤛᤧ᤺ᤵᤔᤠᤀᤠᤱ ᤀᤠᤔᤧᤴᤇᤢᤰᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤌᤣᤛᤡᤀᤠᤱ ᤔᤣ᤺ᤴ॥ 22 ᤐᤕᤶ ᤕᤶᤒᤠ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤡ᤹ ᤀᤠᤑᤠᤸᤗᤧᤀᤠᤱ ᤗᤠᤵᤁᤧᤴᤍᤣᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤀᤠᤒᤠᤅᤣ ᤁᤢᤔᤏᤠ ᤆᤥ᤺ᤰᤔᤠ ᤂᤢᤏᤧ᤹ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹॥ 23 ᤂᤧᤏᤡ᤹ ᤗᤠᤃᤡ ᤋᤢᤘᤠ ᤆᤥ᤺ᤰᤔᤠ ᤗᤧᤵᤔᤠᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥ᤺ᤰᤔᤠ ᤐᤠᤴ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤥᤱᤗ॥ ᤜᤧᤰᤁᤩᤠᤱ ᤌᤣ᤺ᤴ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥᤰ ᤂᤧᤴᤏᤡᤴᤏᤣ ᤀᤥᤛᤣ᤺ᤴᤎᤠᤰᤏᤡᤱ॥ 24 ᤁᤖ ᤂᤧᤏᤡ᤹ ᤏᤡᤱᤘᤠ᤹ ᤛᤡᤃᤠᤱᤗᤠᤶᤔᤣ ᤕᤜᤘᤣ ᤍᤠᤱᤒᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤠᤶᤔᤧ᤹. ᤜᤧᤰᤁᤩᤠᤱ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤁᤢᤛᤧᤘᤠ ᤆᤥᤃᤠᤶᤔᤧ᤹॥ ᤂᤧᤏᤡ᤹ ᤗᤠᤃᤡ ᤂᤢᤏᤧ᤹ ᤀᤠᤰᤋᤱᤒᤠ ᤐᤕᤶ ᤕᤶᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ ᤂᤧᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤠᤶᤔᤧ᤹॥ 25 ᤁᤖ ᤂᤧᤏᤡ᤹ ᤀᤠᤓᤧᤸᤗᤧᤛᤠᤱ ᤑᤧᤴ ᤕᤠ᤺ᤶᤒᤰᤗᤰ ᤁᤧᤈᤥᤃᤢᤶᤏᤧᤑᤃᤪ ᤂᤧᤏᤡ᤹ ᤁᤧᤖᤧᤰ ᤁᤧᤔᤧᤃᤡ᤹ ᤜᤧᤰᤁᤩᤠᤱ ᤂᤧᤏᤡ᤹ ᤜᤠᤱᤅᤡᤴᤏᤠᤱ ᤔᤧᤰᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.