᥇ ᤛᤠᤔᤢᤀᤧᤗ 11 - LIFOTNT

ᤛᤠᤘᤗᤖᤧ ᤀᤶᤔᤥᤏᤡᤜᤠ᤹ ᤏᤠ᤺ᤴᤍᤢᤛᤡᤒᤠ

¹ ᤗᤠᤎᤡᤰ ᤀᤣᤃᤠᤱ ᤀᤠᤶᤔᤥᤏᤒᤠ ᤜᤠᤱ ᤏᤠᤜᤠᤛᤖᤧ ᤁᤢᤎᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤕᤠᤒᤣᤛ-ᤃᤡᤗᤠᤍ ᤐᤣ. ᤜᤧᤰᤁᤩᤠᤱ ᤂᤧᤴ ᤋᤧᤴᤏᤡᤴ ᤁᤡᤷᤃᤵ ᤁᤒᤢ॥ ᤕᤠᤒᤣᤛᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤠᤜᤠᤛᤧᤴ ᤔᤧᤔᤧᤳᤋᤢ. “ᤀᤠᤏᤡᤃᤧᤏᤢ ᤁᤧᤍᤱᤃᤪ ᤀᤠᤏᤡᤃᤣ ᤂᤧᤏᤧ᤹ ᤁᤧᤛᤧᤘᤠ ᤁᤧᤈᤥ᤺ᤰᤐᤠ ᤁᤧᤔᤏᤠ ᤐᤥ᤺ᤰᤂᤡᤃᤧ॥”

² ᤁᤖ ᤀᤶᤔᤥᤏᤡ ᤏᤠᤜᤠᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤗᤳᤇᤠ ᤐᤠ᤺ᤴᤏᤥᤖᤰ ᤂᤧᤏᤡ᤹ᤏᤢ ᤋᤱᤅᤠ॥ ᤂᤧᤴ ᤋᤱᤔᤠ ᤐᤠ᤺ᤴᤜᤠ᤹ ᤀᤰᤋᤱᤒᤠ ᤘᤠ᤹. ᤂᤧᤏᤡ᤹ ᤁᤧᤖᤧᤰᤗᤧ ᤆᤢᤰᤘᤠ ᤗᤧᤵᤛᤠᤱᤒᤠ ᤔᤡᤰᤁᤡᤴ ᤗ᤺ᤳᤋᤢᤱᤍᤣᤛᤢᤱ ᤐᤡᤏᤡᤱ. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤐᤣᤰ॥”

³ ᤕᤠᤒᤣᤛᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤐᤡᤛᤠᤱ ᤁᤴ ᤀᤡᤱᤄᤱᤅᤡᤴ ᤛᤧᤔᤠᤖᤧ ᤗᤠᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤕᤧᤶ ᤕᤠᤵᤔᤡ ᤁᤧᤒᤡᤖ ᤐᤥᤱ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤛᤧ᤺ᤵᤛᤧ ᤜᤠ᤺ᤳᤋᤠᤱ ᤔᤧᤍᤠᤏᤧᤴᤏᤧᤑᤃᤪ ᤀᤠᤏᤡᤃᤣ ᤂᤧᤏᤧ᤹ᤀᤥᤀᤣ ᤜᤢᤰᤛᤢᤵᤐᤠᤛᤡᤃᤧ॥”

⁴ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤃᤡᤒᤠᤒᤠ ᤛᤠᤘᤗᤖᤧᤀᤥ ᤔᤧᤃᤧᤖᤧ ᤔᤧᤍᤩᤧ. ᤜᤧᤰᤁᤩᤠᤱ ᤁᤴ ᤀᤡᤱᤄᤱᤅᤡᤴ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡᤸᤗᤧ ᤁᤧᤖᤧᤰ ᤛᤠ᤹ᤖᤡᤰ ᤔᤧᤜᤠᤒᤧ ᤔᤧᤈᤡ᤺ᤰᤋᤧ॥

⁵ ᤂᤧᤴ ᤕᤧᤶᤔᤥ ᤛᤠᤘᤗᤧᤴ ᤐᤩᤠᤱᤛᤡᤀᤥᤗᤠᤶ ᤐᤡᤳᤜᤠ᤹ ᤏᤠ᤺ᤳᤋᤢᤛᤡᤀᤠᤱ ᤏᤢ᤺ᤰᤂᤧ ᤋᤩᤧᤖ ᤐᤳᤇᤧ॥ ᤜᤧᤰᤁᤩᤠᤱ “ᤌᤣ ᤐᤥ᤺ᤰᤂᤧ᥅ ᤌᤣᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤵᤐᤠ᥅” ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥ ᤜᤧᤰᤁᤩᤠᤱ ᤕᤠᤒᤣᤛᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤔᤧᤔᤧᤳᤋᤢ॥

⁶ ᤛᤠᤘᤗᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤜᤠ᤹ ᤂᤧᤵᤛᤢᤸᤗᤧ. ᤂᤡᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤢᤏᤧ᤹ᤀᤥ ᤋᤩᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤰᤁᤧᤴᤏᤡᤸᤗᤧ ᤔᤡ ᤐᤥ᤺ᤰᤂᤧ॥

⁷ ᤂᤧᤒᤩᤠᤱ ᤂᤢᤏᤧ᤹ ᤁᤢᤶᤒᤠᤒᤠ ᤐᤡᤳ ᤏᤧᤳᤇᤡ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤆᤠᤰᤂᤰ ᤆᤠᤰᤂᤰ ᤂᤰᤋᤢᤛᤡ. ᤜᤧᤰᤁᤩᤠᤱ ᤀᤡᤱᤄᤱ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ ᤂᤧᤴ ᤆᤠᤰᤂᤰ ᤆᤠᤰᤂᤰ ᤂᤰᤋᤢᤒᤠ ᤛᤠᤴ ᤐᤡᤖᤢᤛᤡ. ᤂᤶᤒᤩᤠᤱ ᤀᤡᤛᤪᤠᤀᤡᤗᤀᤥ ᤁᤧᤖᤧᤰ ᤐᤡᤛᤠᤱ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤐᤠᤱᤄᤢᤍᤣᤛᤢᤛᤡ. “ᤛᤠᤘᤗ ᤏᤢ ᤛᤠᤔᤢᤀᤧᤗᤖᤧ ᤂᤢᤴᤇᤡ᤹ ᤑᤠ᤹ᤛᤧ ᤌᤱ ᤆᤥ᤺ᤰᤛᤧ ᤋᤠᤔᤠ ᤔᤧᤴᤍᤧᤶᤔᤏᤠᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤡᤳᤜᤠ᤹ᤀᤠᤱ ᤜᤠᤒᤠ ᤀᤰᤂᤣᤗ᤹ᤖᤡᤰᤁᤣ ᤆᤠᤰᤂᤰ ᤆᤠᤰᤂᤰ ᤂᤰᤔᤠᤛᤡ ᤐᤥᤱ॥” ᤜᤧᤰᤁᤩᤠᤱ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤴᤏᤢ ᤔᤧᤃᤡᤛᤧᤀᤠᤱ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤗ᤺ᤴᤍᤧ ᤔᤧᤍᤩᤧ॥

⁸ ᤛᤠᤘᤗᤖᤧ ᤂᤧᤱᤜᤠ᤹ ᤌᤱ ᤌᤰᤔᤠ ᤑᤠ᤹ᤀᤠᤱ ᤒᤣᤈᤣᤰᤁᤥ ᤛᤢᤵᤛᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤖᤢᤛᤡᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤗᤠᤅᤧᤴᤇᤡᤱ ᤛᤢᤶᤛᤡ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ ᤜᤧᤴᤇᤡᤱ ᤛᤢᤶᤒᤥᤱ ᤔᤧᤘᤕᤧ॥

⁹ ᤂᤧᤱᤜᤠ᤹ᤖᤧ ᤀᤡᤱᤄᤱ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ. “ᤕᤠᤒᤣᤛ ᤃᤡᤗᤠᤍᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹. ‘ᤋᤠ᤺ᤴᤍᤡᤰ ᤗᤧᤴᤍᤡᤰ ᤏᤠᤶᤗᤠ᤺ᤱ ᤌᤠᤖᤡᤰᤗᤧ ᤂᤧᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤄᤥᤛᤢᤶ॥’” ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤔᤧᤒᤣᤀᤠᤱ ᤁᤴ ᤐᤠ᤺ᤴᤏᤡᤴ ᤕᤠᤒᤣᤛᤒᤠ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤰᤔᤠ ᤁᤧᤖᤧ॥

¹⁰ ᤜᤧᤰᤁᤩᤠᤱ ᤕᤠᤒᤣᤛᤒᤠ ᤔᤏᤠᤜᤠ᤹ᤖᤧ ᤏᤠᤜᤠᤛᤧᤴ ᤔᤧᤔᤧᤳᤋᤢ. “ᤋᤠ᤺ᤴᤍᤡᤰ ᤀᤠᤏᤡᤃᤣ ᤀᤠᤒᤠᤅᤣ ᤂᤧᤏᤧ᤹ ᤁᤧᤜᤢᤰᤁᤥ ᤜᤢᤰᤛᤢᤵᤐᤠᤛᤡᤃᤧ. ᤜᤧᤰᤁᤩᤠᤱ ᤀᤠᤏᤡᤃᤧᤏᤢ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤛᤡᤖᤠ᤹ᤎᤠᤱ ᤂᤧᤴ ᤆᤥᤃᤧ᤹ᤀᤥ॥”

¹¹ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤛᤠᤘᤗᤖᤧ ᤁᤢᤔᤏᤠᤜᤠ᤹ ᤁᤢᤗᤢᤵ ᤛᤢᤶᤛᤡ ᤆᤥᤃᤢᤛᤡ॥ ᤋᤠᤏᤠᤶᤛᤠ ᤀᤡᤛᤪᤠᤀᤡᤗᤡᤜᤠ᤹ ᤀᤶᤔᤥᤏᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤕᤰ ᤛᤡᤃᤠᤱ ᤔᤧᤗᤠᤛᤧᤀᤠᤱ ᤗᤧᤴᤈᤥ ᤌᤠᤖᤡᤰᤗᤧ ᤕᤖᤡᤰ ᤀᤶᤔᤥᤏᤡᤜᤠ᤹ ᤔᤧᤛᤩᤧᤖᤢᤛᤡ॥ ᤂᤧᤴ ᤀᤣᤃᤠᤱ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤏᤧᤵᤑᤢ ᤛᤥᤖᤡᤰ ᤐᤥᤱᤔᤠ ᤔᤧᤱᤄᤥᤀᤣ ᤑᤢᤳᤆᤡᤱᤈᤩᤠ᤺ᤱ ᤔᤧᤒᤥ᤺ᤰᤂᤧ॥

¹² ᤂᤧᤴ ᤀᤣᤃᤠᤱ ᤔᤏᤠᤜᤠ᤹ᤖᤧ ᤛᤠᤔᤢᤀᤧᤗᤧᤴ ᤔᤧᤔᤧᤳᤋᤢ. “ᤛᤠᤘᤗᤖᤧ ᤀᤠᤏᤡ᤹ ᤗᤢᤶᤔᤥ ᤜᤠᤱ ᤔᤧᤈᤥᤃᤢᤴᤗ ᤑᤠ᤹ᤀᤠᤱ ᤁᤧᤒᤠ᤺ᤵᤐᤠᤜᤠ᤹ ᤜᤠ᤺ᤳᤇᤡᤒᤣ᥅ ᤂᤧᤱᤜᤠ᤹ ᤁᤵᤔᤥ ᤋᤠᤖᤠᤶᤛᤡᤶᤔᤧ᤹ ᤀᤠᤏᤡᤃᤣ ᤂᤧᤱᤜᤠ᤹ ᤛᤧᤖᤢᤶᤛᤡᤶᤒᤧ॥”

¹³ ᤁᤖ ᤛᤠᤘᤗᤖᤧ ᤔᤧᤳᤋᤢᤛᤡ. “ᤜᤧᤰᤁᤣ ᤔᤣ᤺ᤴ. ᤕᤜᤘᤣ ᤍᤠᤱᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤶᤓᤗ᤹ᤖᤡᤰ ᤛᤧ᤺ᤵᤋᤢᤛᤡᤒᤠ ᤕᤧᤴᤏᤥ ᤀᤠᤳᤋᤡᤴᤜᤠ᤹ᤀᤠᤱ ᤛᤧᤵᤔᤠᤛᤡ ᤔᤧᤏᤢ᤹ᤏᤧᤴ॥”

¹⁴ ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤋᤩᤧᤶᤔᤧ᤹. ᤀᤠᤏᤡ᤹ ᤃᤡᤗᤃᤠᤗ ᤐᤣᤃᤡᤀᤠᤱ ᤂᤧᤵᤔᤥ ᤛᤠᤘᤗᤧᤴ ᤜᤠᤱ ᤕᤢᤰᤋᤡᤱ ᤆᤥᤃᤢᤶ॥”

¹⁵ ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤃᤡᤗᤃᤠᤗ ᤔᤧᤒᤣᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤛᤠᤘᤗᤧᤴ ᤜᤠᤱ ᤕᤢᤰᤋᤡᤱ ᤔᤧᤈᤥᤃᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤛᤏᤠᤖᤢᤱᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ ᤂᤧᤴ ᤕᤧᤴᤏᤥ ᤛᤠᤘᤗ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤐᤛ᤺ᤳ ᤔᤧᤛ᤺ᤳᤋᤧᤀᤠᤱ ᤕᤶᤒᤠ ᤛᤛᤠᤱᤛᤪᤥᤳ ᤔᤧᤈᤥᤃᤧᤖᤥ॥