᥇ ᤛᤠᤔᤢᤀᤧᤗ 10 - LIFOTNT

¹ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤠᤴᤍᤩᤠᤎᤡᤁ ᤏᤡ᤺ᤱᤃᤣ᤹ ᤕᤠᤱᤛᤡᤱᤅᤠᤱ ᤂᤧᤴᤏᤡᤴ ᤛᤠᤘᤗᤖᤧ ᤁᤢᤎᤧᤃᤣᤰ ᤛᤶᤎᤠᤱ ᤜᤢᤰᤂᤢ॥ ᤜᤧᤰᤁᤩᤠᤱ ᤆᤢᤵ ᤔᤧᤳᤋᤢᤀᤠᤱ ᤀᤰᤂᤣ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗᤡ ᤁᤢᤔᤏᤠᤜᤠ᤹ᤀᤥ ᤗᤠᤶᤗᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤛᤣ᤺ᤴᤍᤧᤀᤠᤱ ᤘᤠ᤹॥

² ᤀᤠᤀᤡᤴ ᤀᤠᤱᤃᤠ᤹ᤀᤥᤗᤠᤶ ᤂᤧᤏᤧ᤹ ᤁᤧᤒᤣ᤺ᤰᤁᤠᤱ ᤒᤢᤏᤩᤠᤔᤡᤏ ᤌᤢᤶᤔᤡᤸᤗᤧ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤖᤠᤜᤣᤗᤖᤧ ᤁᤢᤀᤡᤐᤢᤱ ᤐᤣᤛᤠᤱ ᤛᤣᤸᤛᤜᤀᤥ ᤏᤧᤳᤇᤡ ᤔᤏᤠ ᤁᤧᤍᤢᤔᤢᤛᤡ᤹॥ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤀᤰᤂᤣ ᤁᤧᤶᤔᤧᤳ. ‘ᤂᤧᤏᤧ᤹ ᤁᤧᤃᤥ᤺ᤳᤋᤢᤛᤡᤖ ᤁᤧᤘᤠ᤹ᤒᤠ ᤀᤍᤱᤜᤠ᤹ ᤂᤥᤔᤧᤍᤧᤳᤋᤧᤀᤠᤱ ᤔᤧᤘᤠ᤹॥ ᤜᤧᤰᤁᤩᤠᤱ ᤁᤧᤶᤒᤠᤖᤧ ᤂᤧᤴ ᤀᤍᤱᤜᤠ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤗᤧᤖᤢᤛᤡᤀᤠᤱ ᤘᤠ᤹. ᤂᤧᤒᤩᤠᤱ ᤂᤧᤏᤧ᤹ ᤁᤧᤀᤡ᤺ᤳᤗ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤰᤂᤣ ᤆᤠᤖ “ᤀᤠᤸᤗ ᤀᤠᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤌᤣ ᤆᤥᤃᤢᤱᤒᤠᤒᤣ᥅”’ ᤐᤠ᤺ᤳᤋᤢᤖ ᤘᤠ᤹॥

³ “ᤂᤧᤶᤒᤩᤠᤱ ᤂᤧᤵᤔᤥᤏᤢ ᤋᤠᤒᤥᤖᤒᤠ ᤕᤶᤒᤠ ᤛᤡᤱᤒᤢᤱᤅᤥ ᤁᤧᤃᤧᤳᤋᤡᤸᤗᤧ ᤒᤣᤌᤣᤗᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤛᤢᤶᤛᤡ ᤔᤏᤠ ᤁᤧᤍᤢᤔᤢᤛᤡ᤹॥ ᤌᤡᤰᤛᤡᤃᤣᤰᤐᤠᤸᤗᤧ ᤔᤧ᤺ᤴᤍᤠᤛᤠ᤺ᤳ ᤛᤢᤶᤛᤡ. ᤏᤡᤛᤡᤃᤣ᤺ᤰᤐᤠᤸᤗᤧ ᤂᤖᤧ᤺ᤱ ᤛᤢᤶᤛᤡ. ᤜᤧᤰᤁᤩᤠᤱ ᤘᤣ᤹ᤀᤡᤸᤗᤧ ᤛᤣᤜᤥ᤹ ᤛᤢᤰᤘᤠᤎᤡᤰ ᤁᤢᤗᤧ᤺ᤶ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤔᤧᤃᤢᤕᤢᤀᤠᤱ ᤔᤧᤒᤣ᤺ᤰᤗ ᤔᤧᤒᤵᤐᤠ ᤁᤧᤍᤢᤔᤢᤛᤡᤖᤥ॥

⁴ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳ ᤜᤧᤰᤁᤩᤠᤱ ᤂᤖᤧ᤺ᤱ ᤏᤧᤳᤇᤡ ᤁᤧᤶᤒᤡ. ᤂᤧᤱᤜᤠ᤹ᤗᤠᤶ ᤂᤧᤏᤧ᤹ ᤂᤧᤴ ᤁᤧᤍᤠ᤺ᤰᤋᤢᤖᤥ॥

⁵ “ᤂᤧᤴ ᤀᤣᤃᤠᤱ ᤂᤧᤏᤧ᤹ ᤃᤡᤒᤠ ᤔᤧᤵᤔᤏᤠᤒᤠ ᤋᤧᤴᤏᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤥ᤺ᤰᤔᤠᤀᤥ ᤁᤧᤒᤣ᤺ᤰ. ᤂᤧ᤹ᤕᤥ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤕᤰ ᤏᤧ᤹᤺॥ ᤂᤧᤏᤧ᤹ ᤐᤠᤱᤈᤢᤶᤔᤥ ᤁᤧᤵᤔᤠ ᤁᤧᤈᤥ᤺ᤰᤁᤡᤸᤗᤧ. ᤁᤥ᤺ᤰᤔᤠᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤗᤠᤶ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠ. ᤔᤢᤑᤪᤠᤔᤠ ᤏᤢ ᤋᤢ᤺ᤱᤃᤣ ᤁᤧᤔᤢᤱᤒᤠᤖ ᤁᤧᤏᤢ᤺ᤱᤒᤠ ᤁᤧᤕᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤗᤢᤵᤜᤠ᤹ ᤁᤧᤍᤢᤔᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤢᤖ ᤔᤧᤒᤳ॥

⁶ ᤂᤡᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤕᤠᤶᤛᤠᤶᤔᤡᤴ ᤔᤢᤰᤛᤠᤶᤏᤢ ᤁᤧᤛᤶᤎᤠᤱ ᤆᤢᤰ. ᤂᤧᤒᤩᤠᤱ ᤂᤧᤏᤧ᤹ᤀᤠᤱ ᤂᤧᤱᤜᤠ᤹ᤏᤢᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤳ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤧᤱᤛᤡᤱᤅᤠᤱ ᤘᤣ᤹ ᤁᤢᤛᤱ ᤔᤏᤠ ᤁᤧᤒᤥᤱᤗᤥ॥

⁷ ᤁᤴ ᤔᤡᤰᤛᤣ᤺ᤴᤜᤠ᤹ ᤐᤥᤱᤈᤢ᤺ᤳ. ᤜᤧᤰᤁᤩᤠᤱ ᤂᤧᤏᤧ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤠ᤺ᤶᤒᤰ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹॥

⁸ “ᤂᤧᤏᤧ᤹ ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡ ᤕᤥ ᤃᤡᤗᤃᤠᤗ ᤌᤠᤛᤡᤱ ᤐᤣᤃᤧ᤹. ᤜᤧᤰᤁᤩᤠᤱ ᤀᤠᤈᤧᤳ ᤀᤣᤃᤠᤱ ᤀᤠᤱᤃᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤛᤏᤠᤖᤢᤱ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤕᤢᤀᤠ॥ ᤁᤖ ᤂᤧᤏᤧ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤜᤠᤱᤅᤠᤖ ᤐᤥᤱ॥ ᤂᤧᤒᤩᤠᤱ ᤀᤠᤱᤃᤠ᤹ ᤁᤧᤳᤋᤠ ᤕᤢᤀᤠᤀᤠᤱ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤒᤥᤱᤒᤠ ᤘᤠ᤹ ᤂᤧᤴ ᤔᤧᤳᤏᤧ॥”

⁹ ᤛᤠᤘᤗᤧᤴ ᤛᤠᤔᤢᤀᤧᤗᤖᤥ ᤐᤣᤀᤠᤱ ᤏᤢ᤺ᤰᤂᤧᤖ ᤐᤳᤇᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤘᤗᤖᤧ ᤁᤢᤏᤡᤱᤘᤠ᤹ᤀᤡᤴ ᤗᤧᤰᤂᤢᤀᤠᤱ ᤁᤢᤛᤱ ᤆᤥᤃᤢᤒᤡᤖᤢ॥ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤔᤡᤰᤛᤣ᤺ᤴᤜᤠ᤹ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤐᤥ᤺ᤰᤂᤧ॥

¹⁰ ᤛᤠᤘᤗᤧᤴ ᤏᤢ ᤁᤢᤛᤧᤘᤠᤖᤥᤒᤠᤴ ᤃᤡᤒᤠ ᤁᤧᤖᤧᤛᤡᤸᤗᤧ. ᤂᤧᤵᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤗᤢᤵᤜᤠ᤹ᤖᤧ ᤂᤢᤏᤧ᤹ ᤔᤧᤍᤢᤔᤢ॥ ᤀᤠᤶᤓᤠ ᤂᤧᤴ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤔᤢᤰᤛᤠᤶᤏᤢ ᤂᤢᤏᤧ᤹ᤀᤥ ᤋᤩᤧ. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤜᤣ᤺ᤰᤋᤧ॥

¹¹ ᤜᤧᤰᤁᤩᤠᤱ ᤋᤃᤡᤀᤠᤱᤎᤥ ᤂᤢᤏᤧ᤹ ᤁᤢᤛᤡᤱ ᤁᤧᤏᤡ᤺ᤵᤐᤠ ᤁᤧᤖᤧᤰᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤡᤛᤖᤧ ᤁᤢᤛ᤻ᤛᤠ ᤛᤠᤘᤗᤧᤴ ᤌᤧᤔᤠ ᤐᤥ᤺ᤰᤂᤧᤒᤣ᥅ ᤂᤢᤏᤧ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤗᤢᤵᤐᤥᤒᤠᤒᤡ᥅”

¹² ᤂᤧᤵᤔᤥ ᤁᤧᤕᤧᤵᤐᤠ ᤔᤏᤠᤎᤡᤰᤗᤧ ᤀᤰᤂᤣ ᤔᤧᤳᤋᤢᤛᤡ᤹. “ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠᤏᤢᤍᤡᤱ ᤐᤠ ᤀᤠᤳᤋᤡᤱᤃ᥅” ᤂᤧᤒᤩᤠᤱᤎᤥ ᤀᤰᤂᤣ ᤐᤠ᤺ᤵᤔᤠ ᤔᤧᤜᤣ᤺ᤰᤋᤢ. “ᤌᤣ ᤛᤠᤘᤗᤧᤴᤏᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤐᤥ᤺ᤰᤂᤧᤒᤠᤒᤡ᥅”

¹³ ᤛᤠᤘᤗᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤛᤢᤖᤢᤀᤠᤱ. ᤂᤢᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤏᤧᤒᤠ ᤌᤥ ᤁᤥ᤺ᤰᤔᤠᤀᤥ ᤐᤣ॥

¹⁴ ᤀᤠᤸᤗ ᤛᤠᤘᤗᤖᤧ ᤁᤢᤶᤓᤅᤠᤖᤧ ᤂᤢᤏᤧ᤹ ᤏᤢ ᤁᤢᤛᤧᤘᤠᤖᤥᤒᤧᤴ ᤛᤣ᤺ᤴᤍᤥᤛᤢᤛᤡ. “ᤂᤧᤴᤇᤡ᤹ ᤀᤠᤳᤋᤠᤴ ᤁᤧᤒᤣᤛᤡᤀᤠᤱ ᤁᤧᤘᤕᤧᤛᤡ᥅” ᤛᤠᤘᤗᤖᤧ ᤁᤢᤶᤓᤅᤠ ᤔᤧᤳᤋᤢ “ᤀᤍᤱ ᤁᤥ᤺ᤳᤇᤧ ᤀᤠᤴᤇᤡᤃᤣ ᤐᤣᤛᤡᤃᤧᤀᤠᤱ ᤘᤕᤧᤛᤡᤃᤧ॥ ᤁᤖ ᤀᤍᤱᤜᤠ᤹ ᤂᤥᤔᤠ ᤔᤧᤛᤢᤰᤋᤢᤛᤡᤃᤧᤴᤏᤠᤱ ᤛᤠᤔᤢᤀᤧᤗᤖᤧᤀᤥ ᤐᤣᤛᤡᤃᤧᤀᤠᤱ ᤘᤕᤧᤛᤡᤃᤧ॥”

¹⁵ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤓᤅᤠᤖᤧ ᤔᤧᤳᤋᤢ. “ᤛᤠᤔᤢᤀᤧᤗᤖᤧ ᤌᤣ ᤁᤧᤈᤧᤰᤋᤧᤛᤡ᥅ ᤀᤠᤱᤃᤠ᤹ ᤀᤥᤔᤧᤳᤋᤧ᤹॥”

¹⁶ ᤜᤧᤰᤁᤩᤠᤱ ᤛᤠᤘᤗᤖᤧ ᤔᤧᤳᤋᤢ. “ᤀᤍᤱᤜᤠ᤹ ᤔᤧᤄᤥᤛᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤴᤇᤡᤃᤣ ᤔᤧᤳᤋᤧᤇᤡᤃᤧ॥” ᤁᤖ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ ᤗ᤹ᤖᤡᤰ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤢᤶᤓᤅᤠ ᤔᤧᤔᤧᤳᤋᤢᤴ॥

ᤛᤠᤘᤗᤧᤴ ᤜᤠᤱ ᤐᤥᤱ᤹

¹⁷ ᤀᤠᤸᤗ ᤛᤠᤔᤢᤀᤧᤗᤖᤧ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤆᤢᤶᤛᤧ ᤔᤡᤛ᤻ᤐᤠ ᤔᤧᤵᤔᤏᤠᤒᤠ ᤋᤧᤴᤏᤥ ᤀᤢ᤺ᤳᤋᤢᤛᤡ.

¹⁸ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ॥ ᤂᤧᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤔᤡᤛᤪᤡᤜᤠ᤹ ᤏᤢ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤗᤠᤶ ᤂᤧᤏᤡ᤹ ᤛᤧ᤺ᤵᤏᤡᤱᤅᤠᤱ ᤘᤠ᤹॥’

¹⁹ ᤁᤖ ᤂᤧᤏᤡ᤹ ᤁᤧᤖᤧᤰ ᤋᤢᤰᤂᤣ ᤗᤠᤰᤂᤣᤗᤠᤶ ᤋᤠᤱᤃᤧᤛᤧ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤴ ᤕᤧᤶᤔᤥ ᤂᤧᤏᤡ᤹ ᤁᤧᤏᤠ᤹ᤖᤢᤶᤔᤠᤱ ᤁᤧᤘᤕᤡ॥ ᤜᤧᤰᤁᤩᤠᤱ ᤂᤧᤏᤡ᤹ ᤀᤰᤂᤣᤀᤠᤱ ᤁᤧᤒᤠ᤺ᤳᤋᤢᤶ ‘ᤔᤣ᤺ᤴ. ᤀᤠᤏᤡ᤹ ᤗᤢᤶᤔᤥ ᤗᤳᤇᤠ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤜᤠᤱᤎᤡᤰ ᤕᤢᤰᤋᤡᤱ ᤆᤥᤃᤧ᤹॥’ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤌᤠ᤺ᤰᤌᤠ᤺ᤰ ᤏᤢ ᤐᤠᤛᤡᤱ ᤐᤠᤛᤡᤱ ᤐᤥ᤺ᤰᤂᤧᤶᤔᤧ᤹ᤀᤠᤱ ᤀᤠᤒᤠᤅᤣ ᤀᤠᤒᤠᤅᤣ ᤋᤧᤴᤜᤠ᤹ᤀᤥ ᤆᤢᤵᤛᤠᤶᤔᤧ᤹॥”

²⁰ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ ᤌᤠ᤺ᤰ ᤌᤠ᤺ᤰ ᤛᤢᤵᤛᤢᤛᤡ. ᤜᤧᤰᤁᤩᤠᤱ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤸᤗᤧ ᤒᤡᤏᤩᤠᤔᤡᤴᤗᤧ ᤁᤢᤎᤠ᤺ᤰᤁᤡᤴ ᤔᤧᤛᤣᤃᤢ॥

²¹ ᤂᤧᤒᤩᤠᤱ ᤂᤢᤏᤧ᤹ ᤒᤢᤏᤩᤠᤔᤡᤏ ᤌᤠ᤺ᤰᤁᤥᤒᤠ ᤁᤧᤖᤧᤰ ᤜᤡᤶᤛᤕᤱᤒᤠ ᤔᤏᤠᤜᤠ᤹ ᤋᤃᤡ ᤋᤠᤖᤢᤛᤡ. ᤜᤧᤰᤁᤩᤠᤱ ᤔᤋᤪᤡ ᤗᤧᤵᤔᤠᤱᤒᤠ ᤜᤡᤶᤛᤕᤱᤅᤡᤴ ᤔᤧᤛᤣᤃᤢ॥ ᤜᤧᤰᤁᤩᤠᤱ ᤁᤢᤏᤢᤵᤔᤥ ᤁᤡᤛᤖᤧ ᤁᤢᤛ᤻ᤛᤠ ᤛᤠᤘᤗᤧᤴ ᤔᤧᤛᤣᤃᤢ॥ ᤁᤖ ᤔᤏᤠᤜᤠ᤹ᤖᤧ ᤂᤧᤴ ᤔᤧᤃᤥ᤺ᤳᤋᤢᤸᤗᤧ ᤂᤢᤏᤧ᤹ ᤂᤥᤔᤠ ᤔᤧᤴᤇᤢᤰᤋᤢᤴ॥

²² ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤛᤣ᤺ᤴᤔᤧᤍᤥᤛᤢ. “ᤂᤧᤴ ᤔᤏᤠᤴ ᤁᤵᤔᤥ ᤘᤠ᤹ᤒᤡ᥅” ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤏᤥᤃᤵ ᤐᤡᤖᤢᤛᤡ. “ᤘᤠ᤹. ᤂᤧᤴ ᤔᤏᤠᤴ ᤆᤡᤃᤰᤘᤠ ᤛᤠᤔᤠᤜᤠ᤹ᤖᤧ ᤁᤢᤗᤢᤶᤔᤥ ᤆᤡᤱᤛᤡᤱᤅᤠᤱ ᤕᤢᤱ॥”

²³ ᤂᤧᤱᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤂᤢᤏᤧ᤹ ᤔᤧᤓᤧᤳᤋᤢᤀᤠᤱ ᤔᤧᤓᤧᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤔᤧᤕᤧᤵᤛᤢ ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤓᤰᤋᤠᤱᤏᤢ᤺ᤸᤗᤧ ᤋᤠᤱᤛᤠᤖᤰ ᤔᤧᤘᤕᤧ॥

²⁴ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤧᤖᤧᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤔᤏᤠᤴ ᤁᤧᤏᤡᤛᤢᤶᤒᤡ᥅ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤂᤢᤏᤧ᤹ ᤁᤢᤛᤡᤰᤋᤠᤱᤒᤠ ᤔᤏᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤜᤥᤵ॥” ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧ. “ᤜᤠᤱᤅᤡᤴ ᤛᤍᤠᤍᤡᤱ ᤜᤡᤱᤗᤖᤥ᥄”

²⁵ ᤂᤧᤴ ᤀᤣᤃᤠᤱ ᤛᤠᤔᤢᤀᤧᤗᤖᤧ ᤔᤏᤠᤜᤠ᤹ ᤜᤠᤱᤅᤡᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤗᤳᤇᤠ ᤛᤠᤵᤗᤠᤀᤥ ᤛᤠᤵᤋᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤏᤧᤛ᤻ᤛᤢ ᤐᤡᤖᤢᤛᤡ॥ ᤂᤧᤶᤒᤩᤠᤱ ᤂᤢᤏᤧ᤹ ᤔᤏᤠᤜᤠ᤹ ᤀᤠᤒᤠᤅᤣ ᤂᤢᤏᤡ᤹ ᤜᤡᤶ ᤜᤡᤶᤔᤥ ᤏᤢ᤺ᤰᤂᤠᤶᤔᤧ ᤐᤣᤃᤠᤶᤔᤧ᤹ ᤔᤧᤳᤋᤢᤛᤡ॥

²⁶ ᤛᤠᤘᤗᤧᤴᤏᤠᤱ ᤃᤡᤒᤠᤒᤠ ᤁᤢᤜᤡᤶᤔᤥ ᤐᤣ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤱᤅᤥ ᤗᤠᤶᤗᤥᤛᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣ॥

²⁷ ᤁᤖ ᤂᤧᤵᤔᤥ ᤛᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤀᤠᤱ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤀᤰᤂᤣᤀᤠᤱ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤠᤓᤣᤗ᤹ᤖᤡᤰ ᤀᤠᤏᤡ᤹ ᤛᤧ᤺ᤵᤔᤠ ᤀᤠᤛᤢᤰᤐᤣ᥅” ᤂᤧᤱᤜᤠ᤹ᤖᤧ ᤛᤠᤘᤗᤧᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤖ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤃᤡ ᤌᤣᤀᤠᤱ ᤛᤢᤱ ᤔᤧᤴᤍᤠᤖᤢᤴ॥ ᤁᤖ ᤛᤠᤘᤗᤖᤧ ᤌᤣᤀᤠᤱ ᤔᤧᤒᤠ᤺ᤳᤋᤢᤴ॥