᥇ ᤛᤠᤔᤢᤀᤧᤗ 1 - LIFOTNTᤛᤡᤗᤥᤀᤥ ᤀᤣᤸᤁᤠᤏᤠ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱ 1 ᤀᤣᤑᤪᤠᤀᤡᤔ ᤛᤢᤘᤠᤱᤛᤔᤠ ᤀᤣᤸᤁᤠᤏᤠ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤢᤏᤧ᤹ ᤀᤣᤑᤪᤠᤀᤡᤔ ᤗᤠᤈᤣ᤹ᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤖᤠᤔᤠᤜ ᤐᤠᤱᤈᤢᤶ ᤁᤧᤕᤢᤱᤒᤠ ᤔᤏᤠ ᤘᤕᤧ॥ ᤂᤢᤏᤧ᤹ ᤕᤖᤥᤜᤠᤔᤖᤧ ᤁᤢᤛ᤻ᤛᤠ. ᤀᤣᤗᤡᤜᤢᤖᤧ ᤁᤢᤶᤔᤧᤴᤇᤠ᤹ ᤘᤕᤧ. ᤋᤥᤜᤢᤖᤧ ᤁᤢᤈᤰᤔᤧᤴᤇᤠ᤹. ᤛᤢᤐᤖᤧ ᤁᤢᤒᤧᤶᤔᤧᤴᤇᤠ᤹ ᤘᤕᤧᤖᤥ॥ 2 ᤂᤢᤏᤧ᤹ ᤁᤢᤔᤣᤳ ᤏᤧᤳᤇᤡ ᤘᤕᤧᤛᤡ. ᤋᤢᤶᤔᤧᤸᤗᤧ ᤁᤢᤔᤡᤱ ᤜᤴᤏᤠ ᤏᤢ ᤐᤠ᤺ᤰᤔᤧᤸᤗᤧ ᤁᤢᤔᤡᤱ ᤐᤧᤏᤡᤴᤏᤠ ᤘᤕᤧ॥ ᤐᤧᤏᤡᤴᤏᤠᤖᤧ ᤁᤢᤛ᤻ᤛᤠᤁᤢᤀᤣ ᤔᤧᤘᤕᤧ ᤁᤖ ᤜᤴᤏᤠᤖᤧ ᤁᤢᤛ᤻ᤛᤠᤁᤢᤀᤣ ᤔᤧᤜᤥ᤺ᤵᤋᤧ॥ 3 ᤀᤣᤸᤁᤠᤏᤠᤴ ᤋᤱᤒᤣᤎᤰᤔᤠ ᤁᤢᤜᤡᤶᤛᤕᤱᤏᤢ ᤛᤥᤖᤡᤰ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤜᤧᤰᤁᤩᤠᤱ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤖᤠᤔᤠᤜ ᤐᤠᤱᤈᤢᤶᤗᤠᤶ ᤛᤡᤗᤥ ᤐᤣᤖ ᤘᤕᤧ॥ ᤂᤧᤴ ᤕᤧᤶᤔᤥ ᤀᤣᤗᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤜᤥᤵᤏᤡᤴ ᤏᤢ ᤐᤡᤏᤜᤠᤛᤧᤴ ᤂᤢᤏᤧ᤹ᤏᤢ ᤛᤥᤖᤡᤰ ᤛᤧᤘᤠ ᤆᤥ᤺ᤰᤔᤠ ᤁᤧᤓᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤛᤡ॥ 4 ᤀᤧᤸᤁᤠᤏᤠ᤺ᤸᤗᤧ ᤛᤡᤗᤥᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥᤃᤢᤸᤗᤧ ᤛᤡᤍᤢᤱᤈᤓᤠᤀᤥᤒᤠ ᤛᤠᤗᤰᤜᤠ᤹ ᤆᤒᤧ᤺ᤳᤇᤡᤰ ᤁᤢᤔᤣᤳ ᤐᤧᤏᤡᤴᤏᤠ᤺ᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤡᤖᤢᤛᤡ॥ 5 ᤁᤖ ᤂᤢᤏᤧ᤹ ᤁᤢᤔᤣᤳ ᤜᤴᤏᤠ᤺ᤴ ᤁᤢᤗᤰ ᤏᤧᤳᤇᤡ ᤕᤠᤖᤡᤰ ᤐᤡᤖᤢ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤜᤴᤏᤠ᤺ᤸᤗᤧ ᤁᤢᤛᤠᤕᤠᤱᤍᤠᤱᤅᤡᤴ ᤛᤠᤰᤋᤢᤀᤠᤱ ᤘᤕᤧ॥ 6 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤜᤴᤏᤠ᤺ᤴ ᤛᤠᤔᤧᤃᤳᤋᤧᤸᤗ ᤕᤠ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤁᤢᤸᤗᤠ᤹ᤔᤠ ᤐᤧᤏᤡᤴᤏᤠ᤺ᤸᤗᤧ ᤂᤢᤏᤧ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖ ᤋᤢᤰᤂᤣ ᤆᤠ᤺ᤳᤋᤢ॥ 7 ᤜᤧᤰᤁᤣᤗ᤹ᤖᤡᤰᤁᤣ ᤋᤱᤒᤣᤎᤰᤔᤠ ᤀᤣᤸᤁᤠᤏᤠᤴ ᤁᤢᤜᤡᤶᤛᤠᤔᤠᤜᤠ᤹ᤏᤢ ᤔᤠᤱᤜᤡᤶᤔᤥ ᤔᤧᤒᤣᤖ ᤔᤧᤘᤕᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶᤔᤥ ᤀᤣᤸᤁᤠᤏᤠ᤺ᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤛᤧ ᤐᤣᤎᤰᤔᤠ ᤐᤧᤏᤡᤴᤏᤠ᤺ᤸᤗᤧ ᤜᤴᤏᤠ᤺ᤴ ᤜᤠ᤺ᤵᤛᤢᤀᤠᤱ ᤌᤣᤀᤠᤱ ᤔᤧᤴᤈᤠᤔᤏᤠᤔᤠ ᤐᤥ᤺ᤰᤂᤧᤖ ᤌᤠᤖᤡᤰ ᤆᤥᤃᤢ॥ 8 ᤂᤧᤸᤗᤧᤆᤥᤃᤢᤸᤗᤧ ᤀᤧᤸᤁᤠᤏᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤛᤣ᤺ᤴᤍᤥᤛᤢ. “ᤜᤴᤏᤠᤀᤣ᥄ ᤂᤧᤏᤧ᤹ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅ ᤂᤧᤏᤧ᤹ ᤌᤣᤀᤠᤱ ᤁᤢᤈᤠ ᤁᤧᤴᤈᤏᤧᤶᤒᤠᤒᤣ᥅ ᤌᤣᤀᤠᤱ ᤂᤧᤏᤧ᤹ ᤂᤧᤶᤕᤠᤰ ᤛᤠ᤹ᤖᤡᤰ ᤁᤧᤏᤡᤱᤘᤠ᤹ ᤋᤢᤃᤧᤒᤠᤒᤣ᥅ ᤀᤠᤱᤃᤠ᤹ ᤌᤣ ᤌᤡᤒᤥᤱ ᤁᤧᤛ᤻ᤛᤠᤁᤧᤀᤣᤏᤢ᤺ᤸᤗᤧᤀᤠᤱ ᤕᤶᤒᤠ ᤐᤠᤴ ᤔᤧ᤺ᤴᤏᤠᤒᤡ᥅” ᤜᤴᤏᤠᤴ ᤏᤢ ᤀᤣᤗᤡᤴ 9 ᤌᤡᤰᤗᤧᤱ ᤛᤡᤗᤥᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤆᤢᤖᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋ᤺ᤰ ᤆᤠᤔᤠ ᤌᤢᤱᤔᤠ ᤔᤧᤛᤢᤖᤢᤀᤠᤱ ᤜᤴᤏᤠ᤺ᤴ ᤐᤥᤃᤧ॥ ᤂᤧᤶᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤡᤴ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤛᤣᤛᤣ ᤔᤠᤱᤛᤧᤘᤠ ᤆᤥ᤺ᤰᤔᤠ ᤋᤧᤴᤏᤡᤸᤗᤧ ᤁᤢᤒᤣᤛᤠᤱᤒᤠ ᤗᤠᤶᤎᤣ᤺ᤵᤐᤥᤒᤠ ᤀᤣ᤺ᤰᤏᤠ᤺ᤶᤓᤣ᤹ᤀᤥ ᤕᤢᤅᤧᤃᤖᤧ॥ 10 ᤜᤴᤏᤠᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤖ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧ॥ 11 ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤔᤠᤱᤜᤢᤵ ᤆᤥᤃᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤀᤥᤃᤧᤔᤧᤳᤋᤢᤀᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤁᤧᤄᤧᤵᤛᤢ ᤜᤧᤰᤁᤩᤠᤱ ᤗᤢᤱᤔᤠ᤹ ᤁᤧᤍᤢᤰᤁᤠᤀᤠᤱ ᤏᤥᤃᤵ ᤁᤧᤒᤡᤀᤠ. ᤂᤧᤒᤩᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤅᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥ ᤂᤧᤏᤧ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤒᤡ᤹ᤀᤠᤏᤧᤓᤃᤪ ᤂᤧᤴ ᤁᤢᤜᤡᤱᤜᤡᤱ ᤌᤠᤖᤡᤰ ᤀᤠᤱᤃᤠ᤹ ᤀᤠᤍᤠᤱᤒᤠ ᤕᤜᤘᤣ ᤍᤠᤱᤒᤠᤴᤏᤣ ᤐᤡᤏᤧᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤎᤧᤃᤣᤰ ᤀᤡ᤺ᤴ ᤀᤠᤓᤧᤸᤗᤧᤀᤠᤱ ᤔᤧᤏ᤺ᤰᤂᤢᤸᤗᤥ॥” 12 ᤜᤧᤰᤁᤣᤗ᤹ᤖᤡᤰ ᤜᤴᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤆᤰᤔᤧᤴᤗ᤹ᤀᤣ ᤀᤡᤖᤡᤰ ᤌᤠᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. ᤁᤖ ᤀᤣᤗᤡ᤺ᤸᤗᤧ ᤜᤴᤏᤠ᤺ᤸᤗᤧ ᤁᤢᤶᤒᤪᤠ ᤔᤢᤛᤡᤰ ᤔᤢᤛᤡᤰ ᤔᤢᤴᤍᤧᤒᤠᤸᤗᤰ ᤛᤫᤠ᤺ᤳ ᤀᤥᤔᤧᤳᤋᤢ॥ 13 ᤜᤴᤏᤠ᤺ᤴ ᤁᤢᤏᤡᤱᤘᤠ᤹ᤀᤥ ᤛᤫᤠ᤺ᤳ ᤐᤣᤗᤡ ᤑᤠᤰᤏᤢ ᤕᤢᤅᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤪᤠ᤺ᤴ ᤔᤢᤴᤍᤧᤛᤠᤱ ᤐᤠ᤺ᤳᤋᤢᤒᤠ ᤀᤡᤰᤗᤠᤴ ᤔᤧᤄᤧᤵᤛᤢᤴᤏᤠᤱ ᤀᤣᤗᤡᤖᤧ ᤁᤱᤃ ᤛᤣᤈᤱᤘᤠ᤺ᤸᤗᤧ ᤔᤕᤢᤖᤧᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ॥ 14 ᤂᤧᤸᤗᤧᤆᤥᤃᤢᤸᤗᤧ ᤀᤣᤗᤡᤖᤧ ᤔᤧᤳᤋᤢ. “ᤀᤠᤓᤧᤸᤗᤧ ᤌᤠᤖᤡᤰ ᤂᤧᤏᤧ᤹ ᤜᤠᤒᤠ ᤀᤰᤂᤣᤗ᤹ᤖᤡᤰ ᤛᤣᤈᤱᤘᤠ᤺ᤸᤗᤧ ᤁᤧᤔᤀᤠᤱ ᤁᤧᤕᤢᤱᤒᤠᤒᤣ᥅ ᤂᤧᤏᤧ᤹ ᤁᤧᤛᤣᤈᤱᤘᤠᤴ ᤌᤢᤱᤔᤠ ᤗᤧᤖᤧ᤹॥” 15 ᤜᤴᤏᤠ᤺ᤸᤗᤧ ᤔᤧᤳᤋᤢ. “ᤜᤧᤰᤁᤣ ᤔᤣ᤺ᤴ. ᤀᤠᤍᤠᤱᤒᤣ᥄ ᤀᤠᤱᤃᤠ᤹ᤃ ᤏᤡᤱᤘᤠ᤹ᤀᤥ ᤐᤕᤶ ᤕᤶᤒᤠ ᤋᤢᤰᤂᤣ ᤁᤧᤈᤠᤔᤠ ᤔᤧᤴᤇᤢᤔᤠᤀᤠ॥ ᤛᤣᤈᤱᤘᤠ᤺ᤸᤗᤧ ᤔᤕᤠᤱᤒᤠ ᤔᤣ᤺ᤴ॥ ᤀᤠᤱᤃᤠ᤹ ᤛᤣᤈ᤺ᤱᤘᤠ ᤔᤧᤴᤎᤢᤱᤅᤣ ᤘᤠ᤹ᤀᤠ ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠᤴ ᤀᤠᤍᤢᤰᤂᤣ ᤀᤠᤗᤠᤰᤂᤣᤜᤠ᤹ ᤆᤧᤰᤋᤢᤱᤗ ᤐᤳᤋᤠ॥ 16 ᤀᤠᤍᤠᤱᤒᤣ. ᤀᤠᤱᤃᤠ᤹ ᤁᤢᤛᤢᤶᤔᤧᤴᤍᤶᤏᤠᤔᤠ ᤔᤧᤴᤇᤢᤔᤠ ᤔᤧᤗᤣ᤺ᤳᤋᤠᤱᤅᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤀᤠᤍᤢᤰᤂᤣ ᤀᤠᤗᤠᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱᤗ ᤐᤳᤋᤠ॥” 17 ᤜᤧᤰᤁᤣ᤺ᤸᤗᤧ ᤀᤣᤗᤡ᤺ᤸᤗᤧ ᤔᤧᤳᤋᤢ. “ᤁᤧᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤛᤏᤠᤖᤢᤱᤅᤠᤱ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤠ᤺ᤰᤋᤢᤒᤠᤴ ᤂᤢᤏᤧ᤹ ᤁᤧᤒᤡᤖᤖᤥ॥” 18 ᤜᤴᤏᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤏᤥᤃᤧᤴᤗᤥ᥄ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤐᤥᤱᤗ॥” ᤜᤧᤰᤁᤩᤠᤱ ᤂᤧᤴ ᤏᤢ᤺ᤰᤂᤧ ᤐᤣᤀᤠᤱ ᤁᤢᤓᤠ ᤁᤢᤈᤠᤈᤡ ᤆ. ᤂᤧᤒᤩᤠᤱ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤏᤡᤱᤘᤠ᤹ ᤋᤢᤰᤂᤣ ᤔᤧᤈᤩᤧᤏᤧᤴ॥ ᤜᤴᤏᤠ᤺ᤸᤗᤧ ᤛᤠᤔᤢᤀᤧᤗᤧᤴ ᤁᤳᤋᤢ 19 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤀᤣᤸᤁᤠᤏᤠᤴ ᤏᤢ ᤁᤢᤜᤡᤶᤛᤠᤔᤠᤜᤠ᤹ ᤔᤧᤒᤥᤃᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤛᤣᤛᤣ ᤔᤠᤱᤛᤧᤘᤠ ᤔᤧᤔᤧᤳᤋᤢ॥ ᤜᤧᤰᤁᤩᤠᤱ ᤖᤠᤔᤠᤒᤠ ᤀᤠᤒᤠᤅᤣ ᤂᤢᤏᤡ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ॥ ᤜᤧᤰᤁᤩᤠᤱ ᤛᤧᤴᤍᤡᤰ ᤀᤣᤸᤁᤠᤏᤠ᤺ᤴ ᤁᤢᤔᤣᤳ ᤜᤴᤏᤠ᤺ᤴᤏᤢ ᤀᤡᤵᤛᤧ. ᤂᤧᤶᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤜᤴᤏᤠ᤺ᤸᤗᤧ ᤁᤢᤒᤣᤗᤡᤴ ᤏᤡᤱᤘᤠ᤹ ᤀᤡ᤺ᤳᤋᤢ॥ 20 ᤜᤧᤰᤁᤣᤗ᤹ᤖᤡᤰ ᤜᤴᤏᤠ᤺ᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤛᤠᤘᤠ᤺ᤴᤍᤢ॥ ᤂᤢᤏᤧ᤹ ᤂᤧᤸᤗᤧ ᤁᤢᤔᤡᤱ ᤛᤠᤔᤢᤀᤧᤗ ᤔᤡᤱ ᤘᤠ᤺ᤳᤋᤢ. ᤜᤧᤰᤁᤩᤠᤱ ᤕᤠᤶᤔᤥ ᤐᤠ᤺ᤳᤋᤢ. “ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤏᤠ᤺ᤰᤋᤢᤱᤅᤠᤱᤅᤣ ᤁᤴ ᤕᤧᤶᤒᤡᤳᤇᤠ ᤛᤠᤴ ᤐᤥ᤺ᤰᤂᤧᤒᤠᤖᤥ॥” 21 ᤋᤱᤒᤣᤎᤡᤰ ᤀᤣᤃᤠᤱ ᤀᤣᤸᤁᤠᤏᤠᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤜᤧᤰ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤋᤱᤒᤣᤎᤰᤔᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤛᤡᤗᤥᤀᤥ ᤔᤧᤒᤣ॥ 22 ᤁᤖ ᤜᤴᤏᤠ᤺ᤴ ᤂᤧᤱᤜᤠ᤹ᤏᤢ ᤔᤧᤒᤣᤏᤧᤴ॥ ᤂᤧᤸᤗᤧ ᤁᤢᤕᤧᤶᤒᤠᤴ ᤔᤧᤳᤋᤢ. “ᤀᤅᤧ᤺ᤰᤘᤠ᤺ᤸᤗᤧ ᤏᤢᤎᤢᤱᤔᤠ ᤗᤧᤖᤢᤀᤠᤱ ᤋ᤺ᤰ ᤆᤠᤔᤠ ᤜᤣ᤺ᤰᤋᤢᤖ ᤌᤠᤖᤡᤰ ᤜᤠᤱᤔᤠ ᤐᤥᤱ. ᤜᤧᤰᤁᤩᤠᤱᤗᤰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤋᤣ᤹ᤖᤢᤱᤀᤠᤱ ᤋᤥ᤺ᤴᤍᤢᤱ॥ ᤜᤧᤰᤁᤩᤠᤱ ᤁᤢᤜᤡᤱᤜᤡᤱ ᤌᤠᤖᤡᤰ ᤂᤧᤵᤔᤥᤀᤣ ᤕᤜᤘᤣ ᤍᤠᤱᤒᤧᤴᤏᤢ ᤘᤠ᤹ᤖᤥ॥” 23 ᤁᤢᤕᤧᤶᤒᤠ ᤀᤧᤸᤁᤠᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤱᤃ ᤏᤢᤒᤠᤀᤣᤖᤥ॥ ᤀᤅᤧ᤺ᤰᤘᤠ᤺ᤸᤗᤧ ᤏᤢᤎᤢᤱᤔᤠ ᤔᤧᤸᤗᤧᤳᤋᤣ ᤌᤠᤖᤡᤰ ᤂᤧᤏᤧ᤹ ᤜᤡᤶᤔᤥᤀᤣ ᤕᤢᤅᤧ᤹॥ ᤂᤧᤏᤧ᤹ ᤔᤠᤱᤜᤧᤰ ᤁᤧᤈᤥᤃᤢᤒᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤓᤠ᤹ ᤁᤧᤒᤡᤖ॥” ᤂᤧᤸᤗᤧᤆᤥᤃᤢᤸᤗᤧ ᤜᤴᤏᤠ᤺ᤴ ᤜᤡᤶᤔᤥᤀᤣ ᤕᤢᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤅᤧ᤺ᤰᤘᤠ᤺ᤸᤗᤧ ᤏᤢᤎᤢᤱᤔᤠ ᤔᤧᤴᤏᤠ᤹ᤀᤣ ᤌᤠᤖᤡᤰ ᤐᤥᤖᤧᤖ ᤕᤠ᤺ᤴᤍᤢ॥ 24 ᤜᤴᤏᤠ᤺ᤸᤗᤧ ᤀᤅᤧ᤺ᤰᤘᤠᤴ ᤏᤢᤎᤢᤱᤔᤠ ᤗᤧᤖᤢᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤅᤧ᤺ᤰᤘᤠᤴ ᤛᤡᤗᤥᤀᤥ ᤋᤣ᤹ᤖᤢᤀᤠᤱ ᤐᤣ॥ ᤂᤢᤏᤧ᤹ ᤋᤱᤒᤣ ᤛᤢᤶᤛᤡ ᤁᤧᤃᤧᤵᤐᤠ ᤐᤡᤳᤛᤠᤳ. ᤑᤥᤗᤰ ᤅᤠᤛᤡ ᤑᤣ᤹ᤖᤢᤶ ᤜᤧᤰᤁᤩᤠᤱ ᤛᤡᤜᤥ᤹ᤒᤠ ᤛᤢᤰᤘᤠᤎᤡᤰ ᤁᤢᤗᤧᤶ ᤆᤧᤸᤗᤧᤰᤛᤣ᤹ ᤌᤡ ᤋᤣ᤹ᤖᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶᤔᤥ ᤐᤣ॥ ᤀᤅᤧ᤺ᤰᤘᤠᤴ ᤆᤢ᤺ᤰᤋᤧᤛᤠᤱ ᤂᤢᤏᤧ᤹ ᤂᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤣ᤹ᤖᤢᤀᤠᤱ ᤐᤣ॥ 25 ᤂᤧᤱᤜᤠ᤹ᤖᤧ ᤂᤧᤴ ᤁᤢᤶᤒᤠᤒᤠ ᤐᤡᤳᤋᤧᤴ ᤔᤧᤛᤧᤖᤢ ᤜᤧᤰᤁᤩᤠᤱ ᤀᤅᤧ᤺ᤰᤘᤠᤴ ᤀᤣᤗᤡᤖᤧ᤹ᤀᤥ ᤔᤧᤍᤠᤖᤢ॥ 26 ᤜᤴᤏᤠ᤺ᤸᤗᤧ ᤀᤣᤗᤡᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤢᤛᤡᤱ ᤁᤧᤏᤡ᤺ᤳᤋᤠᤱᤒᤡ᥅ ᤁᤢᤓᤠ ᤋᤱᤒᤣ᤹ ᤋᤃᤡ ᤁᤧᤒᤣᤛᤠᤱ ᤍᤠᤱᤒᤠᤴ ᤐᤣᤗᤡ ᤑᤠᤰᤏᤢ ᤁᤧᤕᤧᤵᤔᤠ ᤔᤧᤴᤇᤢᤔᤠᤴ ᤀᤠᤱᤃᤠ᤹ᤀᤣᤖᤥ॥ 27 ᤜᤠᤒᤠ ᤁᤴ ᤀᤅᤧ᤺ᤰᤘᤠᤴ ᤀᤠᤱᤃᤠ᤹ ᤁᤳᤋᤢᤱᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤁᤴ ᤀᤅᤧ᤺ᤰᤘᤠᤴ ᤂᤢᤏᤧ᤹ ᤐᤡᤖᤠᤱᤒᤠᤖᤥ॥ 28 ᤀᤠᤸᤗ ᤀᤠᤱᤃᤠ᤹ ᤁᤴ ᤀᤅᤧ᤺ᤰᤘᤠᤴ ᤕᤜᤘᤣ ᤍᤠᤱᤒᤠᤴᤏᤣ ᤐᤡᤖᤢᤱᤗ ᤐᤳᤋᤠᤖᤥ॥ ᤜᤧᤰᤁᤩᤠᤱ ᤁᤴ ᤀᤅᤧ᤺ᤰᤘᤠᤴ ᤁᤢᤜᤡᤱᤜᤡᤱ ᤌᤠᤖᤡᤰ ᤕᤜᤘᤣ ᤍᤠᤱᤒᤠᤗᤧᤴᤏᤣᤖᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤴ ᤛᤣᤛᤣ ᤔᤠᤱᤛᤧᤘᤠ ᤔᤧᤔᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.