᥇ ᤐᤋᤪᤢᤛ 5 - LIFOTNT

ᤋᤢᤶᤓᤠᤰᤛᤠᤜᤠ᤹ ᤏᤢ ᤌᤠᤱᤒᤧᤴᤜᤠ᤹ᤖᤧ ᤗᤠᤃᤡ ᤛᤢᤈᤠ

¹ ᤀᤠᤸᤗ ᤂᤪᤡᤛ᤻ᤋᤖᤧ ᤀᤡᤏᤥᤃᤧᤴ ᤁᤢᤍᤢᤰᤂᤣ᤺ᤸᤗᤧᤴ ᤋᤥ᤺ᤴᤍᤡ ᤏᤢ ᤋᤠ᤺ᤴᤍᤡ ᤀᤥᤛᤣ᤺ᤴᤍᤠᤱ ᤁᤧᤒᤥᤱᤒᤠ ᤔᤡᤔᤡᤍᤡᤱᤅᤡᤸᤗᤧᤴ ᤗᤰᤛᤠᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤛᤣᤛᤣᤜᤢᤵᤗᤰᤁᤥᤒᤠ ᤗᤳᤇᤠ ᤋᤢᤶ ᤗᤠᤶᤗᤥᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤶᤗᤠᤶᤗᤥᤒᤠᤜᤠ᤹ ᤐᤣᤗᤡ ᤑᤠᤰᤏᤡᤱᤗᤥ—

² ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤰᤜᤠ᤹ ᤏᤢᤖᤡᤰᤁᤠᤱ ᤁᤔᤧᤶᤛᤡᤶᤔᤧ᤹ᤀᤥ—ᤔᤢᤖᤠ ᤀᤠᤶᤔᤧᤳᤋᤡᤸᤗᤧᤖᤰ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤁᤔᤧᤶᤛᤡᤶᤔᤧ᤹. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡᤃ ᤔᤣ᤺ᤴ. ᤁᤖ ᤂᤡᤏᤡ᤹ ᤛᤡᤰ ᤐᤛᤶᤛᤶᤗ ᤛᤧᤘᤠ ᤆᤥᤃᤧᤶᤛᤡᤶᤔᤧ᤹ᤀᤥ॥

³ ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤛᤶᤍᤠᤱ ᤕᤢᤰ ᤆᤥ᤺ᤰᤔᤠ ᤔᤣ᤺ᤴ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤒᤡ ᤐᤥᤱᤔᤠ ᤐᤥᤱᤗᤥ॥

⁴ ᤜᤧᤰᤁᤩᤠᤱ ᤋᤢᤶ ᤔᤧᤸᤗᤢᤰᤁᤶᤒᤠᤴ ᤕᤢ᤺ᤸᤗᤧ ᤀᤠᤵᤑᤠᤸᤗᤧᤀᤠᤱ ᤀᤡᤔᤧᤸᤗᤧᤶᤔᤏᤠᤒᤠ ᤔᤡᤔᤡᤍᤡᤱ ᤏᤢ ᤀᤡᤱᤎᤠᤱᤅᤡᤸᤗᤧᤴ ᤋᤡᤆ᤺ ᤁᤧᤄᤥᤛᤢᤶᤗᤥ॥

⁵ ᤂᤡᤏᤡ᤹ ᤌᤠᤱᤒᤧᤴᤛᤠᤛᤣ. ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥᤱᤗᤥ॥ ᤂᤡᤏᤡ᤹ ᤁᤠᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤢᤖᤡᤰ ᤔᤧᤳᤋᤠᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤀᤳᤋᤢᤛᤡ᤹. ᤁᤖ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤃᤢᤶ ᤐᤡᤖᤢᤛᤡ᤹ᤖᤥ॥”

⁶ ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤂᤡᤏᤡ᤹ ᤆᤢᤱᤈᤡᤃᤧᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤛᤢᤕᤧᤶᤔᤥ ᤂᤡᤏᤡ᤹ ᤀᤡᤱᤎᤠᤱ ᤁᤧᤒᤡᤖᤡᤀᤠᤱ ᤌᤠ᤺ᤱ ᤁᤧᤓᤥ᤺ᤰᤂᤡ᤹ᤖᤥ॥

⁷ ᤁᤠᤰ ᤂᤡᤏᤡ᤹ ᤏᤡᤱᤛᤠᤶᤜᤠ᤹ ᤂᤢᤏᤧ᤹ᤀᤥ ᤋᤠᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤳᤋᤡ᤹ᤖᤥ॥

⁸ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤏᤢ ᤆᤠᤱᤈᤠᤱ ᤗ᤹ᤖᤧᤶᤔᤧ᤹᥄ ᤂᤡᤏᤡ᤹ ᤏᤡᤱᤔᤡ ᤔᤠᤑᤧᤴᤛᤠᤶᤔᤡᤴ ᤁᤧᤜᤢ᤺ᤰᤐᤠ ᤂᤡᤖᤡᤱᤒᤠᤴ ᤁᤢᤀᤡᤛᤡᤰ ᤀᤠᤳᤋᤡᤴ ᤂᤥᤛᤢᤱᤅᤠᤱ ᤗᤖᤢᤱᤍᤣᤛᤢᤱ ᤗ᤹ᤖᤡᤰ ᤁᤥ᤺ᤳᤋᤢᤖ ᤋᤠᤰᤁᤴᤗᤥ॥

⁹ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤂᤧᤴ ᤀᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠᤜᤠ᤹ᤖᤧᤀᤠᤱ ᤂᤡᤏᤡ᤹ ᤁᤧᤍᤢᤔᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ ᤜᤧᤰᤋᤱᤒᤠ ᤋᤢᤰᤂᤣᤴ ᤔᤧᤍᤢᤔᤢᤖ ᤔᤧᤘᤠ᤹ ᤁᤧᤗ᤹ᤒᤠᤴ ᤁᤧᤏᤡᤛᤢᤶᤗᤥ॥

¹⁰ ᤁᤠᤰ ᤗᤢᤱᤃᤢᤶ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤔᤧᤴᤏᤢᤵᤔᤏᤠᤒᤠ ᤁᤢᤔᤡᤔᤡᤍᤡᤱᤅᤡᤴ ᤗᤰ ᤁᤧᤄᤥᤛᤢᤶᤗ ᤑᤠ᤹ᤀᤠᤱ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ ᤁᤖ ᤛᤵᤑᤠᤎᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤀᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢᤗᤡᤱᤍᤥ ᤁᤧᤃᤧᤳᤋᤡ᤹ ᤜᤧᤰᤁᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤏᤢ ᤁᤧᤎᤢᤶᤒᤠ ᤁᤧᤈᤥᤃᤡᤀᤠᤱ ᤔᤧᤶᤔᤢᤶᤔᤏᤠ ᤏᤧᤶᤓᤥᤀᤥ ᤁᤧᤕᤢᤰᤂᤡ᤹ᤖᤥ॥

¹¹ ᤁᤠᤰ ᤔᤢᤰᤛᤠᤶᤔᤡᤴ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤣ ᤐᤥᤱᤗᤥ॥ ᤀᤠᤔᤧᤴ॥

ᤁᤢᤏᤢᤵᤔᤠ ᤛᤧᤘᤠ

¹² ᤏᤛᤠ᤺ᤴᤛᤠᤒᤠ ᤀᤡ᤺ᤳᤋᤢᤱᤒᤠ ᤏᤢᤛᤠ᤹ ᤛᤡᤗᤠᤛᤖᤧ ᤁᤢᤓᤠ᤹ᤗᤠᤶ ᤁᤴ ᤆᤢᤰᤛᤠ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤜᤠᤱᤜᤠᤱ ᤔᤧᤳᤏᤡᤱᤗ ᤁᤱᤃ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤥ ᤗ᤹ᤖᤡᤰ ᤋᤥ᤺ᤴᤍᤡ ᤐᤡᤏᤡᤱᤗᤥ॥ ᤁᤴ ᤗᤢᤱᤃᤢᤶᤔᤥᤀᤣ ᤂᤡᤏᤡ᤹ ᤌᤎᤵ ᤔᤧᤴᤗ᤹ᤔᤏᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥

¹³ ᤂᤡᤏᤡ᤹ ᤜᤧᤰᤁᤣᤀᤣ ᤛᤣᤃᤧᤔᤠ ᤒᤣᤒᤡᤗᤥᤏᤒᤠ ᤛᤣᤛᤣᤜᤢᤵᤗᤰᤁᤡᤸᤗᤧ ᤛᤧᤘᤠ ᤁᤧᤜᤠᤰᤋᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤛ᤻ᤛᤠ᤺ ᤔᤷᤁᤢᤛᤖᤧᤀᤠᤱ ᤛᤧᤘᤠ ᤁᤧᤜᤠᤰᤋᤡᤖᤥ॥

¹⁴ ᤔᤡ᤺ᤶᤈᤡ᤺ᤸᤗᤧ ᤛᤧᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤛᤏᤠᤖᤢᤱ ᤁᤧᤄᤥᤛᤢᤶᤗᤖᤥ॥