᥇ ᤐᤋᤪᤢᤛ 4 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤃᤡ ᤜᤡᤱᤔᤠ

¹ ᤂᤧᤸᤗᤧᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤩᤧ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤒᤠᤜᤧᤰᤋᤱᤒᤠ ᤏᤡᤱᤘᤠ᤹ᤀᤡᤴ ᤁᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤁᤧᤈᤠᤒᤠᤸᤗᤧ ᤗᤠᤕᤥ ᤆᤥ᤺ᤰᤔᤠ ᤗᤧᤖᤢᤀᤠᤱ ᤘᤠ᤹ᤖᤥ॥

² ᤜᤧᤰᤁᤣ᤺ᤸᤗᤧ ᤂᤧᤴ ᤜᤡᤱᤗ ᤌᤠᤖᤡᤰ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤑᤧᤴᤏᤡᤱᤘᤠ᤹ ᤁᤢᤀᤡᤛᤡᤰ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤜᤡᤱᤗᤥ॥

³ ᤌᤣᤀᤠᤱᤓᤧᤸᤗᤧ ᤁᤧᤒᤣ᤺ᤰᤐᤠ ᤕᤧᤶᤔᤥ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤜᤧᤰᤁᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤑᤧᤴᤏᤡᤱᤘᤠ᤹ ᤆᤥ᤺ᤰᤔᤠ. ᤌᤡ᤺ᤸᤗᤧ ᤔ᤺ᤛᤡᤱᤔᤠ. ᤕᤖᤡᤰ ᤆᤠᤔᤠ ᤌᤢᤱᤔᤠᤀᤠᤱ ᤕᤠᤶᤒᤥ᤺ᤳᤇᤧ ᤆᤢᤶᤔᤠ. ᤕᤠᤶᤍᤠᤍᤠᤒᤠ ᤆᤠᤔᤢᤰ ᤌᤡᤔᤢᤰ ᤆᤥ᤺ᤰᤔᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤆᤥ᤺ᤰᤔᤠᤀᤥ ᤕᤖᤡᤰ ᤕᤧᤶ ᤁᤧᤍᤣ᤺ᤛᤢᤶᤗᤥ॥

⁴ ᤂᤧᤱᤜᤠ᤹ᤖᤧ ᤀᤠᤸᤗᤥ ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤂᤢᤏᤡ᤹ᤏᤢ ᤛᤥᤖᤡᤰ ᤁᤧᤶᤒᤳᤇᤡᤴᤒᤠ ᤔᤧᤏᤡᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡ᤹ᤖᤥ

⁵ ᤁᤖ ᤁᤢᤜᤡᤱᤘᤧᤳ ᤏᤢ ᤁᤧᤛᤡᤒᤠᤜᤠ᤹ᤖᤧ ᤂᤠᤛᤧᤴ ᤆᤥ᤺ᤰᤔᤠ ᤕᤠᤖᤡᤵ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤃ ᤕᤧᤵᤔᤠᤀᤣ ᤐᤥᤱᤗᤥ॥

⁶ ᤒᤠ ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤠᤸᤗᤥ ᤁᤧᤛᤡᤒᤠᤜᤠ᤹ᤀᤠᤱ ᤔᤧᤴᤇᤠᤶ ᤕᤠᤵᤔᤡ ᤜᤧᤰᤁᤣ ᤏᤠᤛᤡᤱᤃᤧᤴ ᤌᤰᤁᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴ ᤐᤥᤱᤗᤥ. ᤁᤖ ᤕᤠᤶᤛᤠᤶᤔᤥ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡᤰ ᤔᤧᤜᤡᤱᤗ ᤑᤠ᤹ᤀᤠᤱ ᤛᤢᤏᤠᤀᤡᤱᤅᤡᤴ ᤀᤡᤱᤓᤥᤛᤧᤀᤠᤱ ᤘᤠ᤹ᤖᤥ॥

⁷ ᤁᤠᤰ ᤐᤠ᤺ᤴᤜᤠ᤹ᤖᤧ ᤁᤢᤏᤢᤵᤔᤠᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤋᤢᤘᤠ ᤆᤥ᤺ᤰᤔᤠ ᤁᤧᤛᤢᤰᤋᤡᤖ ᤑᤠ᤹ᤀᤠᤱ ᤛᤣᤛᤣ ᤏᤡᤱᤘᤠ᤹ ᤏᤢ ᤆᤠᤱᤈᤠᤱᤅᤠᤱ ᤘᤕᤧᤶᤔᤧ᤹ᤀᤥ॥

⁸ ᤁᤠᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤥᤗᤠᤶ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤗᤢᤱᤔᤠ᤹ ᤋᤢᤰᤔᤠᤸᤗᤧᤃ ᤕᤖᤡᤰ ᤗᤠᤕᤥᤜᤠ᤹ ᤋᤧᤵᤋᤢ᤹ᤖᤥ॥

⁹ ᤜᤧᤰᤁᤩᤠᤱ ᤁᤠᤏᤠᤰᤏᤠᤰ ᤔᤧᤸᤗ᤹ᤀᤣ ᤋᤖᤣ ᤋᤥ᤺ᤀᤠᤛᤡᤶᤔᤧ᤹ᤀᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤐᤖᤡᤰ ᤐᤖᤡᤰᤐᤠ ᤐᤷᤎᤠ᤺ᤶᤔᤡᤴ ᤁᤧᤄᤥᤛᤢᤶᤔᤠᤱ ᤘᤠ᤹॥ ᤁᤠᤰᤗᤧ ᤂᤧᤴ ᤁᤧᤄᤥᤛᤢᤶᤒᤠ ᤐᤷᤎᤠ᤺ᤶᤔᤡᤴ ᤁᤢᤓᤠ᤹ ᤐᤡᤛᤡᤱᤔᤠᤀᤥ ᤏᤢᤖᤡᤰᤁᤠᤱ ᤕᤠᤅᤧᤶᤔᤧ᤹ᤀᤥ॥

¹¹ ᤐᤠ᤺ᤴᤈᤠᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤐᤠ᤺ᤳᤋᤢᤖ. ᤘᤣ᤹ᤜᤠ᤹ ᤛᤧᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤌᤢᤶᤔᤡᤸᤗᤧ ᤛᤧᤘᤠ ᤆᤥᤃᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤠ᤺ᤴᤏᤥ ᤕᤧᤛᤢ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ॥ ᤁᤠᤰ ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤣᤖᤥ॥ ᤀᤠᤔᤧᤴ॥

ᤂᤪᤡᤛ᤻ᤋᤖᤧ ᤗᤠᤃᤡ ᤋᤢᤰᤂᤣ ᤆᤠᤔᤠ ᤐᤥᤱ

¹² ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ ᤁᤢᤎᤡᤶᤒᤠ ᤜᤱᤛᤠ᤹ᤔᤥ ᤁᤧᤎᤩᤧ᤹ᤀᤡᤸᤗᤧ ᤂᤡᤏᤡ᤹ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠᤴ ᤐᤥ᤺ᤰᤂᤧ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ.

¹³ ᤁᤖ ᤂᤪᤡᤛ᤻ᤋᤧᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤛ᤺ᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤢᤕᤢᤔᤠ ᤕᤧᤴᤏᤥ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤐᤥᤱᤅᤡᤸᤗᤧ ᤐᤛ᤺ᤳ ᤁᤧᤛ᤺ᤳᤋᤡ᤹ᤖᤥ॥

¹⁴ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥

¹⁵ ᤂᤡᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤸᤗᤧ ᤔᤏᤠ ᤁᤧᤛᤧᤵᤐᤠ. ᤁᤧᤄᤢ᤺ᤶᤒᤠ. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤜᤢᤰ ᤁᤧᤕᤠᤰᤐᤠ ᤔᤏᤠᤴ ᤋᤢᤰᤂᤣ ᤆᤠ᤺ᤒᤠ ᤁᤢᤀᤡᤛᤡᤰ ᤋᤢᤰᤂᤣ ᤔᤧᤈᤧᤶᤔᤡᤴᤏᤧ᤹ᤀᤥ॥

¹⁶ ᤁᤖ ᤂᤪᤡᤛ᤻ᤋᤠᤏᤡ ᤁᤧᤒᤥ᤺ᤰᤂᤡᤒᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤏᤧ ᤑᤠ᤹ᤃᤪ ᤛᤡᤖᤡᤱ ᤔᤧᤔᤕᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡᤱᤅᤡᤴ ᤂᤡᤏᤡ᤹ ᤁᤧᤍᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ॥

¹⁷ ᤀᤠᤸᤗ ᤂᤠᤛᤧᤴ ᤐᤥᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤀᤥᤏᤢ ᤜᤣ᤺ᤰᤛᤡᤱᤗᤥ॥ ᤀᤠᤸᤗ ᤀᤠᤏᤡ᤹ᤗᤠᤶᤔᤣ ᤂᤠᤛᤧᤴ ᤐᤥᤱᤔᤠ ᤜᤣ᤺ᤰᤛᤡᤱᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤌᤣ ᤔᤧᤒᤥᤱᤒᤣ᥅

¹⁸ ᤀᤠᤸᤗ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤒᤠᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤛᤠᤰᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤢ ᤗᤠᤕᤥᤒᤠᤴ ᤌᤣ ᤐᤥᤱᤒᤠᤒᤣ᥅”

¹⁹ ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤔᤧᤎᤠ᤹᤺. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤛᤠᤒᤠ ᤆᤀᤡ᤺ᤳᤍᤠᤱᤒᤠᤀᤥ ᤋᤠ᤺ᤰᤐᤥ ᤔᤧᤕᤢᤰᤂᤢᤖ ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤏᤢᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤖᤥ॥