᥇ ᤐᤋᤪᤢᤛ 3 - LIFOTNT

ᤜᤡᤶᤛᤠᤔᤠ ᤏᤢ ᤜᤡᤶᤛᤠᤒᤠᤜᤠ᤹

^1-2 ᤜᤧᤰᤁᤣᤗ᤹ᤖᤡᤰ ᤜᤡᤶᤛᤠᤔᤠᤛᤣ. ᤂᤡᤏᤡ᤹ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤀᤥ ᤁᤢᤓᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤧᤈᤥ᤺ᤰᤛᤠᤱ ᤂᤡᤏᤡ᤹ ᤌᤣᤀᤠᤱ ᤔᤧᤶᤔᤧᤳᤋᤣ ᤛᤣᤛᤣᤒᤠ ᤜᤡᤱᤔᤴᤏᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤁᤧᤒᤡᤖᤢᤶᤒᤠ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥ᤺ᤰᤔᤠ ᤔᤧᤛᤢᤰᤋᤢ᤹ᤖᤥ॥

³ ᤂᤡᤏᤡ᤹ᤃ ᤐᤖᤡᤰᤐᤖᤡᤰᤐᤠ ᤌᤠ᤺ᤰ ᤑ᤺ᤔᤠᤴ. ᤛᤠᤶᤔᤩᤠᤱ ᤘᤠ᤺ᤳᤋᤡᤜᤠ᤹ ᤘᤠ᤺ᤵᤔᤠᤴ ᤏᤢ ᤀᤡᤔᤧᤸᤗᤢᤱᤒᤠ ᤏᤠ-ᤏᤠ ᤐᤖᤡᤰᤐᤠ ᤆᤠᤱᤜᤠ᤹ ᤆᤠᤱᤔᤠᤴ. ᤗᤠ᤺ᤰᤁᤠᤳᤗᤠᤶᤒᤠ ᤁᤧᤎᤠ᤺ᤵᤐᤠ ᤆᤥ᤺ᤰᤛᤡᤱᤔᤥ ᤔᤣ᤺ᤴ.

⁴ ᤁᤖ ᤂᤡᤏᤡ᤹ ᤏᤢᤔᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤠᤔᤏᤠᤒᤠ ᤛᤢᤶᤛᤢᤶ ᤕᤧᤰᤕᤧᤰ ᤏᤢ ᤏ᤺ᤶᤏ᤺ᤶ ᤗ᤹ᤔᤠᤴ ᤛᤡᤃᤠᤱᤗᤠᤶᤒᤠᤀᤣ ᤏᤡᤎᤠ᤺ᤵᤗ ᤐᤥᤱᤗᤥ॥ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ॥

⁵ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤠ᤺ᤰᤐᤥ ᤁᤧᤈᤥ᤺ᤰᤔᤠ ᤀᤢᤴᤇᤣ᤺ᤴᤛᤔᤠ ᤛᤣᤛᤣ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤏᤢᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤘᤕᤧᤖᤥ॥

⁶ ᤁᤢᤒᤡᤀᤥ ᤛᤠᤖᤠᤖᤧ ᤁᤢᤜᤡᤶᤛᤠᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤖᤥ॥ ᤂᤡᤏᤡ᤹ᤀᤠᤱ ᤔᤧᤱᤃᤡᤀᤣ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤖᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤏᤡᤱᤗᤥ॥

⁷ ᤜᤡᤶᤛᤠᤒᤠᤛᤣ. ᤂᤡᤏᤡ᤹ᤀᤠᤱ ᤂᤡᤏᤡ᤹ ᤜᤡᤶᤛᤠᤔᤠᤜᤠ᤹ᤏᤢ ᤛᤥᤖᤡᤰ ᤁᤧᤘᤕᤡᤸᤗᤧ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹ᤖ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤂᤡᤏᤡ᤹ ᤜᤧᤰᤁᤣ ᤁᤧᤎᤢᤶᤔᤠ ᤔᤧᤴᤈᤥ᤺ᤰᤏᤧᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤢᤛᤱ ᤜᤡᤱᤔᤴᤏᤥ ᤂᤧᤱᤜᤠ᤹ᤃ ᤂᤡᤏᤡ᤹ ᤗᤰᤛᤠᤔᤠᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤢᤘᤠᤴ ᤌᤣ᤺ᤸᤗᤧᤀᤠᤱ ᤔᤧᤎᤣ᤺ᤰᤋᤢᤴᤗ ᤑᤠ᤹ᤀᤠᤱ ᤏᤢᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤸᤗᤧ ᤁᤧᤍᤠᤒᤠ ᤋᤢᤰᤂᤣᤴ

⁸ ᤁᤢᤏᤢᤵᤔᤥ. ᤂᤡᤏᤡ᤹ ᤏᤡᤱᤘᤠ᤹ᤀᤥ ᤁᤠᤰ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹. ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹. ᤔᤡ᤺ᤶᤈᤡ ᤔᤧᤳᤋᤠᤛᤡᤶᤔᤧ᤹. ᤜᤠᤱᤜᤠᤱᤘᤠ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤥ᤺ᤰᤂᤧᤶᤔᤧ᤹ᤀᤥ॥

⁹ ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤑᤧᤴᤐᤠᤴ ᤔᤧᤈᤥᤃᤧᤶᤔᤡᤴᤏᤧ᤹. ᤁᤡᤏᤠ᤺ᤴᤍᤡ᤺ᤸᤗᤧ ᤁᤢᤗᤧᤰᤘᤠ ᤁᤡᤏᤠ᤺ᤴᤍᤡ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤁᤖ ᤂᤧᤸᤗᤧ ᤁᤢᤗᤧᤰᤘᤠᤃ ᤔᤢ᤹ᤀᤡᤛᤠᤶ ᤐᤡᤖᤧᤶᤛᤡᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤐᤡᤛᤧ ᤁᤧᤀᤢ᤺ᤳᤋᤡᤀᤠᤱ ᤘᤠ᤹ᤖᤥ॥

¹⁰ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤜᤡᤱᤔᤴᤏᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠᤀᤠᤱ ᤛᤢᤕᤧᤴᤜᤠ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤑᤧᤴᤐᤠᤴ ᤐᤠ᤺ᤵᤔᤠ ᤏᤢ ᤀᤡᤱᤗᤧᤰ ᤐᤠᤴ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ॥

¹¹ ᤂᤧᤸᤗᤧ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤀᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱ॥ ᤛᤏᤠᤖᤢᤱᤅᤥ ᤘᤠ᤹ᤔᤠ ᤋᤶᤛᤡᤱ ᤆᤥᤃᤢᤖ ᤐᤥᤱ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤐᤠ᤺ᤴᤏᤥ ᤐᤵᤔᤠᤀᤣ ᤐᤥᤱᤗᤥ॥

¹² ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤴ ᤂᤧᤵᤛᤢ᤹. ᤁᤖ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤥ᤺ᤰᤗᤥ॥”

¹³ ᤂᤡᤏᤡ᤹ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤰ ᤛᤶᤒᤠᤸᤗᤧ ᤛᤧᤰᤂᤠᤀᤣ ᤀᤠᤳᤋᤡᤸᤗᤧᤀᤠᤱ ᤂᤠ᤺ᤶᤔᤠ ᤁᤧᤴᤇᤢᤰᤋᤡᤴᤗᤥ॥

¹⁴ ᤁᤖ ᤏᤢᤒᤠ ᤁᤧᤈᤥᤃᤢᤶᤔᤡᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ “ᤘᤣ᤹ᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ॥”

¹⁵ ᤁᤖ ᤂᤡᤏᤡ᤹ ᤜᤡᤱᤔᤴᤏᤥ ᤂᤪᤡᤛ᤻ᤋᤧᤴ ᤍᤠᤱᤒᤠ ᤗ᤹ᤖᤡᤰ ᤛᤧᤘᤠ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤏᤡᤱᤛᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤃᤧᤶᤗᤠᤵᤋᤡᤸᤗᤧ ᤗᤢᤶᤗᤢᤶᤔᤠᤱ ᤀᤡᤱᤎᤠᤱᤅᤡᤴᤏᤢ ᤏᤥᤃᤵ ᤐᤡᤔᤠ ᤛᤍᤠᤍᤡᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥

¹⁶ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤑᤧᤴᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤪᤡᤛ᤻ᤋᤀᤥᤒᤠ ᤂᤡᤏᤡ᤹ ᤏᤢᤒᤠ ᤕᤧᤵᤗᤧᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤛᤡᤖᤡᤱ ᤔᤧᤔᤖ ᤑᤠ᤹ᤀᤠᤱ ᤛᤣᤛᤣ ᤂᤠᤛᤡᤱ ᤁᤳᤋᤧᤶᤔᤧ᤹ᤀᤥ॥

¹⁷ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤃᤪ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠᤔᤠᤀᤣ ᤏᤢᤒᤠ ᤐᤥᤱᤗᤥ॥

¹⁸ ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤠ᤺ᤳᤇᤧ ᤀᤠᤏᤡ᤹ ᤗᤠᤕᤥᤜᤠ᤹ ᤛᤍᤠᤍᤡᤱ ᤗᤧᤵᤔᤡ ᤐᤡᤔᤠ ᤑᤠ᤹ᤀᤠᤱ ᤌᤡᤰᤗᤧᤱ ᤛᤩᤧᤖᤥ॥ ᤛᤠᤶᤕᤥᤒᤠ ᤂᤪᤡᤛ᤻ᤋᤧᤴ ᤗᤠᤕᤥᤒᤠᤖᤧ ᤁᤢᤗᤧᤰᤘᤠ ᤛᤩᤧᤖᤥ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤌᤰᤁᤥ ᤛᤩᤧ. ᤁᤖ ᤛᤣᤛᤣᤔᤠᤱᤅᤥᤗᤠᤶ ᤕᤠᤶᤔᤥ ᤜᤡᤅᤧᤖᤥ॥

¹⁹ ᤒᤠ ᤁᤴ ᤛᤣᤛᤣᤔᤠᤱᤗᤠᤶ ᤐᤣᤀᤠᤱ ᤂᤢᤏᤧ᤹ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠ ᤛᤡᤛᤠᤶᤜᤠ᤹ ᤀᤡᤱᤓᤥᤛᤢᤛᤡᤖᤥ॥

²⁰ ᤂᤧᤱᤜᤠ᤹ᤖᤧᤃ ᤀᤢᤴᤇᤣ᤺ᤴ ᤏᤢᤜᤠ᤺ᤸᤗᤧ ᤘᤠᤗᤠᤎᤠ ᤆᤥᤃᤢᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤡ ᤌ᤺ᤳᤋᤢᤛᤡᤀᤠᤱ ᤜᤠᤱᤄᤢᤛᤡᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠᤴ ᤂᤧᤶᤔᤠ ᤔᤧᤴᤍᤧᤴᤍᤧᤴᤏᤠᤱ ᤔᤧᤘᤕᤧᤖᤥ॥ ᤂᤧᤵᤔᤥ ᤕᤧᤳᤇᤡ ᤔᤏᤠᤜᤠ᤹ᤖᤰ ᤁᤡᤵᤔᤠ ᤁᤧᤄᤢᤒᤠ ᤘᤠᤍᤥ᤺ᤰᤔᤥᤗᤠᤶ ᤋᤠᤱᤔᤧᤛᤧ᤺ᤵᤋᤧᤀᤠᤱ ᤔᤧᤘᤕᤧ॥

²¹ ᤁᤴ ᤘᤠᤍᤥ᤺ᤰᤁᤡᤗᤧᤴ ᤆᤫᤠ᤺ᤳᤋᤡᤱᤃ ᤋᤠᤱᤃᤧᤛᤧ᤺ᤵᤋᤡᤒᤠ ᤒᤵᤋᤡᤛ᤻ᤔᤠᤸᤗᤧ ᤁᤢᤒᤡ ᤜᤧᤰᤋᤱᤒᤠᤖᤥ. ᤁᤱᤃ ᤌᤰᤁᤥᤗᤠᤶ ᤔᤠᤰᤂᤪᤰᤁᤡᤴ ᤘᤠᤃᤧᤜᤵᤋᤢᤶᤒᤠ ᤜᤧᤰᤁᤣᤃ ᤔᤣ᤺ᤴ. ᤁᤖ ᤛᤣᤛᤣ ᤂᤠᤛᤡᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤥ᤺ᤰᤔᤏᤠᤒᤠ ᤔᤠᤱᤜᤧᤰᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤂᤠᤛᤡᤱᤅᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠᤗᤠᤶ ᤋᤠᤖᤥ॥

²² ᤀᤠᤸᤗ ᤕᤧᤛᤢ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹. ᤕᤢᤰᤛᤠᤒᤠᤜᤠ᤹ ᤏᤢ ᤔᤢᤰᤛᤠᤶᤜᤠ᤹ ᤁᤢᤕᤢᤰᤁᤥ ᤁᤳᤋᤢᤛᤡᤖᤥ॥