᥇ ᤜᤠᤱ 9 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤥᤗᤥᤔᤏᤧᤴ ᤕᤠᤶᤔᤥ ᤛᤢᤑᤥ ᤀᤥᤛᤣ᤺ᤴᤎᤠᤰᤋᤢ ( ᥈ ᤛᤠᤵᤔᤢ ᥍:᥇᥇-᥈᥈ ) 1 ᤀᤠᤸᤗ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤏᤢ ᤜᤠᤱᤜᤡᤶᤔᤡᤴ ᤆᤥᤃᤢᤛᤢᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤖᤧ ᤀᤡ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢᤀᤠᤱ ᤁᤧᤳᤋᤢ. 2 ᤂᤧᤒᤩᤠᤱ ᤃᤡᤒᤥᤏᤀᤥ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱᤒᤠ ᤁᤢᤀᤡᤛᤡᤰ ᤏᤡᤛᤡᤃᤣᤰᤐᤠᤗᤧᤱ ᤂᤢᤏᤧ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢᤖᤥ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤃᤡ ᤁᤧᤍᤥ᤺ᤴᤍᤢᤒᤠ ᤋᤢᤘᤠᤴ ᤏᤢ ᤐᤣᤗᤡ ᤁᤧᤓᤠᤰᤋᤠᤱᤒᤠᤴ ᤀᤠᤱᤃᤠ᤹ ᤂᤧᤵᤛᤢᤱ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤴ ᤔᤠᤱᤜᤡᤶᤔᤡᤴ ᤀᤠᤱᤃᤠ᤹ ᤛᤣᤛᤣ ᤆᤥᤃᤢᤱᤅᤠᤱ ᤕᤢᤱ᤹. ᤜᤧᤰᤁᤩᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤁ᤹ᤕᤥ ᤕᤢᤰᤂᤢᤱᤅᤠᤱ ᤕᤢᤱ᤹॥ ᤀᤠᤱᤃᤠ᤹ ᤀᤠᤔᤡᤰᤁᤡᤴ ᤏᤢ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤀᤠᤓᤧᤸᤗᤧᤛᤠᤱ ᤂᤧᤵᤔᤥ ᤘᤠ᤹॥ 4 “ᤂᤧᤏᤧ᤹ ᤛᤡᤰᤗᤢᤱᤔᤥ ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤁᤢᤍᤥ᤺ᤵᤔᤠ ᤗᤠᤶᤔᤥ ᤂᤧᤏᤧ᤹ ᤁᤧᤶᤒᤠ ᤍᤠᤀᤢᤍᤧᤴ ᤜᤧᤰᤁᤣ ᤀᤠᤱᤃᤠ᤹ ᤀᤠᤍᤃᤡ ᤗᤠᤱᤃᤧᤄᤣᤰ. ᤂᤧᤒᤩᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤧᤒᤠᤜᤠ᤹ ᤁᤧᤖᤧᤰ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢᤖ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤡᤶᤍᤢᤏᤧᤓᤃᤪ. 5 ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤒᤠ ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤀᤰᤂᤣ ᤔᤧᤳᤋᤢᤱᤅᤠᤱ ᤘᤕᤧ. ‘ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤔᤏᤠᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤇᤢ᤺ᤴᤏᤧᤴ᤹.’ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤠᤱᤕᤢᤰᤏᤠᤴ ᤀᤡᤛᤪᤠᤀᤡᤗᤀᤥ ᤛᤍᤠᤍᤡᤱ ᤕᤢᤰᤛᤡᤱ ᤆᤥᤃᤢᤱ᤹॥ 6 “ᤁᤖ ᤂᤧᤏᤧ᤹ ᤀᤡᤃᤪ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤀᤠᤱᤃᤠ᤹ ᤕᤠᤵᤔᤡ ᤋᤡᤶᤔᤠ ᤁᤧᤗᤧᤖᤡᤀᤠᤱ ᤀᤠᤱᤃᤠ᤹ ᤐᤡᤏᤡᤱᤒᤠ ᤀᤠᤀᤡᤱᤈᤠᤱᤅᤡᤴ ᤏᤢ ᤀᤠᤛᤠᤶᤕᤥ ᤌᤡᤶᤜᤠ᤹ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴ᤹. ᤜᤧᤰᤁᤩᤠᤱ ᤁᤧᤒᤣᤃᤡᤀᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹. ᤂᤶᤓᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤛᤡᤴᤏᤧᤓᤃᤪ. 7 ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤗᤠᤈᤣ᤹ᤀᤥᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤹ᤏᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤛᤣᤛᤣ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶᤔᤡᤴ ᤏᤠ᤹ᤖᤢᤱ᤹॥ ᤂᤧᤒᤩᤠᤱ ᤂᤡᤏᤡ᤹ᤃ ᤘᤣ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤳᤇᤠ ᤀᤡᤱᤍᤥ ᤏᤢ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤁᤧᤒᤥ᤺ᤰᤂᤡ᤹॥ 8 ᤁᤴ ᤔᤠᤱᤜᤡᤶᤔᤡᤴ ᤗᤢ᤺ᤴᤏᤠᤱ ᤗᤢᤶᤛᤡᤱᤅᤠᤱ ᤏᤧᤖᤥ ᤜᤧᤰᤁᤩᤠᤱ ᤁᤴ ᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ‘ᤀᤠᤕᤠᤰᤁᤥ᥄’ ᤔᤧᤗ᤹ᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤕᤜᤘᤣ ᤍᤠᤱᤒᤧᤸᤗᤧ ᤌᤣᤀᤠᤱ ᤁᤴ ᤗᤠᤈᤣ᤺ᤴᤏᤢ ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶᤔᤡᤴᤏᤢ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤒᤠᤒᤣ᥅’ 9 “ᤔᤏᤠᤜᤠ᤹ᤖᤧ ᤀᤰᤋᤱᤒᤠ ᤏᤢᤃᤵ ᤔᤧᤒᤠ᤺ᤳᤋᤢ᤹. ‘ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤗᤧᤖᤢᤀᤠᤱ ᤘᤠ᤹. ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢ ᤌᤠᤰᤋᤢᤛᤡᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ ᤜᤧᤰᤁᤩᤠᤱ ᤁᤴᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤖ ᤔᤧᤜᤧᤵᤋᤢᤛᤡᤀᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠᤖᤢᤖᤥ॥’” ᤛᤥᤗᤥᤔᤏ ᤏᤢ ᤜᤧᤖᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤠ᤺ᤴᤍᤱ ( ᥈ ᤛᤠᤵᤔᤢ ᥎:᥇-᥈ ) 10 ᤁᤴ ᤏᤧᤳᤇᤡ ᤜᤡᤶᤜᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤏᤢ ᤜᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤛᤢ᤺ᤵᤔᤠᤖᤧ ᤗᤠᤃᤡ ᤛᤥᤗᤥᤔᤏᤧᤴ ᤏᤡᤒᤥᤱ ᤋᤱᤒᤣ ᤌᤖᤢ॥ 11 ᤛᤥᤗᤥᤔᤏᤧᤴ ᤆᤠᤜᤠ ᤆᤥᤃᤧᤒᤠ ᤁᤧᤖᤧᤰ ᤛᤠᤶᤔᤠᤱᤛᤡᤱᤜᤠ᤹ ᤏᤢ ᤀᤠ᤺ᤱᤛᤡᤱᤜᤠ᤹ ᤜᤧᤰᤁᤩᤠᤱ ᤛᤠᤶᤔᤩᤠᤱᤅᤡᤴ ᤜᤣᤖᤠᤔ ᤜᤠᤱᤅᤡᤸᤗᤧ ᤋᤠᤖᤢ ᤐᤡᤖᤢᤀᤠᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤜᤣᤖᤠᤔᤧᤴ ᤃᤠᤗᤡᤗᤀᤥ ᤏᤡᤒᤥᤱ ᤕᤧᤰᤕᤰᤜᤠ᤹ ᤐᤡᤖᤢ॥ 12 ᤀᤠᤸᤗ ᤛᤥᤗᤥᤔᤏᤖᤧ ᤂᤢᤏᤧ᤹ ᤐᤡᤖᤢᤒᤠ ᤂᤧᤴ ᤕᤧᤰᤕᤰᤜᤠ᤹ ᤀᤥᤔᤧᤵᤔᤠᤖᤧ ᤗᤠᤃᤡ ᤜᤣᤖᤠᤔᤧᤴ ᤋᤢᤖᤥᤛᤗᤠᤶ ᤕᤥ ᤕᤧ. ᤁᤖ ᤂᤢᤏᤧ᤹ ᤁᤴ ᤕᤧᤰᤕᤰᤜᤠ᤹ ᤁᤢᤛᤡᤖᤠ᤹ ᤔᤧᤎᤠᤅᤧᤴ. 13 ᤜᤧᤰᤁᤩᤠᤱ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤏᤢᤛᤠ᤹ᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤒᤡᤖᤠᤱᤒᤠ ᤁᤴ ᤕᤧᤰᤕᤰᤜᤠ᤹ᤃ ᤀᤠᤰᤋᤱᤒᤠ ᤐᤖᤡᤰᤐᤠᤏᤡ ᤆᤥ᤺ᤰᤐᤣ᥅” ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤋᤧᤱᤃᤵᤜᤠ᤹ ᤁᤠᤒᤢᤗ ᤗᤠᤈᤣ᤹ ᤔᤡᤱ ᤘᤠ᤺ᤳᤋᤢ॥ ᤂᤧᤴ ᤕᤧᤰᤕᤰᤜᤠ᤹ᤖᤧ ᤁᤴ ᤁᤢᤔᤡᤱᤅᤡᤴ ᤀᤠᤸᤗᤥ ᤌᤠᤖᤡᤰ ᤏᤧᤖᤥ॥ 14 ᤜᤧᤖᤠᤔᤖᤧ ᤛᤥᤗᤥᤔᤏ ᤜᤠᤱᤅᤡᤴ ᤜᤧᤴᤇᤡᤱ ᤗᤡᤛᤡ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ ᤜᤠᤰᤋᤢᤀᤠᤱ ᤘᤕᤧᤖᤥ॥ ᤛᤥᤗᤥᤔᤏᤖᤧ ᤘᤣ᤹ ᤁᤢᤕᤠ᤺ᤶᤒᤰᤜᤠ᤹ ( ᥈ ᤛᤠᤵᤔᤢ ᥎:᥉-᥇᥎ ) 15 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ. ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤡᤶᤔᤡᤴ. ᤁᤢᤍᤰᤔᤠ ᤗᤢᤱᤎᤠᤰᤜᤠ᤹. ᤕᤖᤢᤛᤗᤧ᤺ᤶᤒᤠ ᤗᤢᤱᤎᤠᤰᤜᤠ᤹. ᤜᤠᤛᤥᤖ. ᤔᤃᤡᤍ᤻ᤍᤥ ᤏᤢ ᤃᤣᤈᤣᤖᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤑᤳᤇᤢᤛᤡᤒᤠ ᤋᤠ᤹ᤈᤧᤱ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ॥ 16 (ᤔᤡᤛᤪ ᤗᤠᤈᤣ᤹ᤒᤠ ᤜᤠᤱ ᤑᤠᤖᤥᤸᤗᤧ ᤌᤱᤅᤥ ᤑᤳᤋᤢᤀᤠᤱ ᤃᤣᤈᤣᤖᤧᤴ ᤜᤢᤰᤁᤠᤵ ᤆᤥᤃᤢᤀᤠᤱ ᤏᤧᤛ᤻ᤛᤧ॥ ᤂᤢᤏᤧ᤹ ᤂᤧᤴ ᤔᤡᤎᤡᤰᤂᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢ॥ ᤂᤧᤵᤔᤥᤒᤠ ᤁᤏᤠᤏᤡ ᤕᤰᤕᤢᤱᤒᤠᤜᤠ᤹ ᤂᤢᤏᤧ᤹ ᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤢᤛ᤻ᤛᤠ ᤔᤧᤴᤇᤢᤔᤠ ᤛᤥᤗᤥᤔᤏᤖᤧ ᤁᤢᤔᤣ᤺ᤳᤋᤡᤴ ᤔᤣ᤺ᤰᤂᤡᤶ ᤐᤧᤘᤠ ᤐᤡᤖᤢ॥ 17 ᤜᤧᤰᤁᤩᤠᤱ ᤛᤥᤗᤥᤔᤏᤖᤧ ᤃᤣᤈᤣᤖᤧᤴ ᤕᤠᤶᤔᤥ ᤆᤥᤃᤢ॥) ᤂᤢᤏᤧ᤹ ᤕᤥᤛᤔᤠ ᤒᤣᤌ-ᤜᤥᤖᤥᤏ. 18 ᤒᤠᤗᤠᤋ ᤏᤢ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤁᤧᤏᤧᤒᤠ ᤋᤍᤔᤥᤖ. 19 ᤂᤶᤓᤩᤠᤱ ᤂᤢᤏᤧ᤹ ᤁᤢᤈᤠ ᤕᤢᤱᤔᤠᤖᤧ ᤗᤠᤃᤡ ᤂᤧᤴ ᤁᤧᤖᤧᤰ ᤕᤧᤰᤕᤰᤜᤠ᤹ ᤂᤧᤴᤏᤢ ᤛᤥᤛᤥᤖᤡᤰ ᤂᤢᤏᤧ᤹ ᤁᤢᤀᤴᤗᤠᤎᤠᤜᤠ᤹ ᤏᤢ ᤁᤢᤀᤴᤜᤠ᤹ ᤕᤧᤶᤔᤠᤛᤡᤖᤧ ᤗᤠᤃᤡ ᤐᤠᤱᤈᤢᤶᤜᤠ᤹ᤀᤠᤱ ᤆᤥᤃᤢ॥ ᤕᤖᤢᤛᤗᤧ᤺ᤶᤔᤥ. ᤗᤧᤒᤏᤠᤏᤀᤥ ᤏᤢ ᤂᤢᤏᤧ᤹ ᤕᤢᤰ ᤆᤥᤃᤢᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥ ᤂᤢᤏᤧ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥᤃᤢᤛᤢᤖᤢ॥ 20 ᤘᤣ᤹ ᤁᤧᤍᤠᤱᤒᤠᤀᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤀᤣᤔᤥᤖᤡᤜᤠ᤹. ᤜᤡᤳᤋᤡᤜᤠ᤹. ᤐᤖᤡᤈ᤻ᤈᤡᤜᤠ᤹. ᤜᤡᤒ᤻ᤒᤡᤜᤠ᤹ ᤏᤢ ᤕᤒᤢᤛᤡᤜᤠ᤹ (ᤁᤴ ᤔᤏᤠᤜᤠ᤹ ᤀᤡᤛᤪᤠᤀᤡᤗᤡ ᤔᤧᤜᤥ᤺ᤵᤋᤧ॥). 21 ᤀᤡᤃᤪ ᤂᤧᤴ ᤗᤠᤈᤣ᤹ᤀᤥ ᤁᤧᤍᤠᤱᤒᤠᤀᤠᤱ ᤁᤧᤘᤠ᤹ᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤆᤒᤧ᤺ᤳᤇᤡᤰᤁᤠᤱ ᤔᤧᤱᤔᤠ ᤔᤧᤴᤇᤢᤁᤣ ᤔᤧᤃᤳᤋᤢᤛᤡ. ᤛᤥᤗᤥᤔᤏᤖᤧ ᤂᤧᤱᤜᤠ᤹ᤀᤣ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤑᤳᤇᤢᤛᤡᤀᤠᤱ ᤘᤕᤧ. ᤂᤧᤱᤜᤠ᤹ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤀᤣ ᤔᤧᤘᤠ᤹॥ 22 ᤁᤖ ᤛᤥᤗᤥᤔᤏᤖᤧ ᤀᤡᤛᤪᤠᤀᤡᤗᤡ ᤀᤠᤳᤋᤡᤴᤜᤠ᤹ᤀᤠᤱ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤈᤥᤃᤢᤛᤡᤴ॥ ᤂᤧᤱᤜᤠ᤹ᤃ ᤂᤢᤏᤧ᤹ ᤁᤢᤎᤰᤛᤢᤒᤠ. ᤜᤠᤱᤈᤢᤶ ᤛᤢᤜᤠᤱᤕᤢᤰᤐᤠ. ᤛᤢᤜᤠᤱᤃᤧᤶᤒᤠ. ᤌᤰᤐᤣᤒᤠ ᤜᤧᤰᤁᤩᤠᤱ ᤀᤴᤗᤠᤎᤠ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤔᤧᤘᤕᤧ॥ 23 ᤂᤧᤱᤜᤠ᤹ ᤛᤥᤗᤥᤔᤏᤖᤧ ᤁᤢᤕᤠ᤺ᤶᤒᤰᤜᤠ᤹ᤀᤥᤒᤠ ᤁᤢᤎᤧᤃᤣᤰ ᤛᤢᤜᤠᤱᤕᤢᤰᤐᤠᤜᤠ᤹ᤀᤠᤱ ᤔᤧᤘᤕᤧ॥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤀᤥᤃᤧᤔᤧᤵᤐᤠᤜᤠ᤹ ᤁᤧᤖᤧᤰᤗᤧ ᥋᥋᥆ ᤔᤧᤘᤕᤧ॥ 24 ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤛᤥᤗᤥᤔᤏᤖᤧ ᤆᤥᤃᤢ ᤐᤡᤖᤢᤒᤠ ᤜᤡᤶᤔᤥ ᤍᤠᤀᤢᤍᤖᤧ ᤁᤢᤕᤧᤰᤕᤰᤗᤠᤶ ᤌᤥ ᤌᤠᤅᤧ. ᤂᤧᤴ ᤀᤣᤃᤠᤱ ᤛᤥᤗᤥᤔᤏᤖᤧ ᤁᤢᤍᤰᤔᤠ ᤗᤢᤱᤎᤠᤰᤜᤠ᤹ ᤛᤧᤳᤋᤢ॥ 25 ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤆᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤢᤏᤧ᤹ ᤋᤱᤒᤣᤖᤧ ᤛᤢᤶᤗᤧᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤢᤰᤐᤠ ᤜᤠ᤺ᤴᤍᤢ ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤔᤠᤱᤜᤡᤶ ᤗᤧᤵᤔᤠᤱ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤢᤕᤠ᤺ᤶᤒᤰᤜᤠ᤹ ᤁᤧᤳᤋᤢ॥ 26 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤀᤣᤍᤥᤔᤒᤠ ᤀᤣᤗᤠᤋ ᤁᤢᤒᤣᤛᤠᤱᤒᤠ ᤀᤣᤛᤩᤥᤏ-ᤃᤣᤒᤣᤖᤀᤥ ᤘᤠᤗᤠᤎᤠᤜᤠ᤹ᤀᤠᤱ ᤆᤥᤃᤢᤛᤡ॥ 27 ᤘᤖ᤺ᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤗᤧᤒᤠ ᤘᤠᤍᤥᤆᤠ᤺ᤰᤐᤠᤜᤠ᤹. ᤛᤥᤗᤥᤔᤏᤖᤧ ᤁᤢᤔᤏᤠᤜᤠ᤹ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤘᤠᤗᤠᤎᤠ ᤕᤠ᤺ᤶᤒᤰᤁᤥ ᤜᤧᤖᤠᤔᤖᤧ ᤁᤢᤔᤏᤠᤜᤠ᤹ ᤐᤠᤱᤄᤢᤛᤡ॥ 28 ᤂᤧᤱᤜᤠ᤹ ᤘᤠᤗᤠᤎᤠᤗᤠᤶ ᤀᤥᤐᤡᤖ ᤔᤧᤒᤣ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤌᤡᤒᤥᤱᤅᤠᤱ ᤗᤡᤛᤡ ᤜᤧᤴᤇᤡᤱ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ ᤔᤧᤎᤠᤰᤋᤢᤀᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤔᤧᤒᤡᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.