᥇ ᤜᤠᤱ 8 - LIFOTNTᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤠᤱᤜᤡᤶᤔᤥ ᤔᤧᤍᤠᤖᤢ ( ᥈ ᤛᤠᤵᤔᤢ ᥋:᥈–᥌:᥈ ) 1 ᤂᤧᤒᤩᤠᤱ ᤛᤥᤗᤥᤔᤏᤖᤧ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤌᤠ᤺ᤰᤌᤠ᤺ᤰᤁᤥᤒᤠ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤜᤡᤶᤛᤕᤱᤅᤥᤒᤠ ᤁᤢᤎᤧᤃᤣᤰ ᤁᤢᤎᤧᤃᤣᤰ ᤔᤏᤠᤜᤠ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰ. ᤀᤡᤃᤪ ᤛᤡᤕᤥᤏᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤠ᤺ᤵᤔᤠᤖᤧ ᤗᤠᤃᤡ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤆᤢᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ॥ 2 ᤀᤣᤋᤠᤏᤡᤔ ᤗᤠ. ᤀᤡᤃᤪ ᤏᤢᤛᤡᤃᤣᤰᤐᤠ ᤗᤠᤀᤥ ᤁᤧᤍᤠᤒᤠ ᤋᤱᤏᤠᤶᤔᤥᤒᤠ ᤕᤧᤶᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤥᤗᤥᤔᤏ ᤜᤠᤱᤅᤥ ᤔᤧᤈᤢᤵᤛᤧ॥ 3 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤧᤍᤩᤧ ᤔᤧᤈᤢᤖᤧ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤁᤢᤛᤴᤍᤥ᤺ᤰᤁᤡᤴ ᤔᤧᤓᤥ᤺ᤰᤂᤢ॥ 4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤏᤢ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤣᤛᤣ ᤛᤠᤔᤠᤜᤠ᤹ ᤔᤧᤒᤰᤂᤢᤀᤠᤱ ᤌᤥ ᤔᤧᤍᤣ᤹ᤖᤢ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤂᤧᤴ ᤔᤧᤒᤰᤂᤢᤀᤠᤱ ᤌᤥ ᤔᤧᤍᤣ᤹ᤖᤢ. 5 ᤜᤧᤰᤁᤩᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤏᤡ᤺ᤵᤔᤧᤴᤍᤧᤳ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤸᤗᤢᤰᤜᤠ᤹ ᤏᤢ ᤛᤧᤃᤶᤒᤠ ᤐᤡᤳᤜᤠ᤹ ᤛᤡᤍᤢᤱᤛᤓᤠ ᤔᤧᤍᤥᤴᤍᤢᤛᤡᤖ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤔᤧᤘᤕᤧ॥ 6 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤠᤱᤜᤡᤶᤔᤥᤒᤠ ᤛᤡᤃᤠᤱᤒᤠ ᤛᤣᤛᤣᤒᤠᤍᤧᤴᤏᤥ. ᤀᤡᤃᤪ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴ ᤂᤧᤴ ᤋᤧᤴᤏᤥᤀᤣ ᤔᤧᤍᤠᤖᤢᤀᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤛᤡᤃᤠᤱ ᤔᤧᤕᤢᤰᤂᤢ॥ 7 ᤛᤴᤍᤥᤰ ᤔᤧᤕᤢᤰᤂᤢᤒᤠᤍᤧᤴᤏᤥ ᤌᤠ᤺ᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤑᤧᤛᤡᤱᤅᤠᤱ ᤐᤳᤇᤧ. ᤜᤧᤰᤁᤩᤠᤱ ᤛᤴᤍᤥᤰᤁᤡᤴ ᤏᤢ ᤂᤧᤸᤗᤧ ᤁᤢᤍ᤹ᤗᤠᤱᤜᤠ᤹ᤖᤧ ᤁᤢᤛᤶᤎᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ᤖᤧ ᤀᤡ᤺ᤵᤋᤢᤀᤠᤱ ᤐᤳᤇᤧ॥ 8 ᤁᤴ ᤋ᤹ᤗᤠᤱᤜᤠ᤹ᤖᤧ ᤁᤢᤛᤶᤜᤠ᤹ ᤛᤡᤃᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤍᤃᤠᤱᤒᤠ ᤛᤣᤛᤣᤍᤧᤴᤗᤠᤶ ᤏᤡᤔᤠ ᤛᤢᤰᤋᤧᤳᤋᤧᤖ ᤕᤠᤖᤡᤰ ᤛᤠ᤹ᤖᤡᤰ ᤁᤣ᤺ᤶᤒᤠ ᤆᤥᤃᤧ. ᤁᤖ ᤛᤣᤛᤣᤍᤧᤴᤏᤥᤒᤠ ᤗᤠ᤺ᤰᤁᤠᤳᤗᤠᤶ ᤏᤡᤔᤧᤍᤧᤳᤋᤧᤴ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰᤛᤠᤱ ᤂᤧᤵᤔᤥ ᤕᤢᤱ॥ 9 ᤂᤧᤴ ᤛᤴᤍᤥᤰᤁᤥ ᤛᤠᤵᤗᤢᤱ ᤏᤧᤳᤇᤡᤖᤰ ᤕᤠᤃᤧ. ᤘᤣ᤹ ᤌᤣᤀᤠᤱ ᤔᤧᤕᤠᤃᤧᤴ. ᤜᤥᤖᤣᤒ ᤁᤥ᤺ᤰᤔᤠᤀᤥ ᤔᤥᤛᤠ᤺ᤸᤗᤧ ᤂᤧᤴ ᤛᤠᤵᤗᤢᤱᤜᤠ᤹ ᤛᤴᤍᤥᤰᤁᤥ ᤕᤠᤰᤋᤢᤀᤠᤱ ᤕᤠᤃᤧ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤔᤧᤎᤠᤅᤧᤸᤗᤧ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤴᤇᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧ॥ 10 ᤀᤠᤸᤗ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣᤛᤣᤍᤧᤴᤏᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤂᤠ᤹ᤔᤡ᤺ᤳᤋᤧᤸᤗᤧ ᤋᤡᤶᤛᤧ॥ 11 ᤜᤧᤰᤁᤩᤠᤱ ᤂᤧᤵᤔᤥ ᤂᤠ᤹ᤔᤡᤳ ᤕᤠᤃᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤠᤱᤛᤧᤘᤠ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤔᤠᤱᤜᤡᤶᤔᤡᤴ ᤋᤡᤶᤛᤧᤀᤠᤱ ᤕᤢᤅᤧᤖᤥ॥ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢ 12 ᤂᤧᤒᤩᤠᤱ ᤛᤥᤗᤥᤔᤏᤖᤧ ᤐᤠ᤺ᤳᤋᤢ—“ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ᤂᤢᤏᤧ᤹ᤃ ᤔᤠᤰᤛ᤻ᤍᤡ᤺ᤱ ᤁᤩᤠ᤺ᤵᤐᤠ ᤂᤠ᤹ᤔᤡ᤺ᤵᤐᤥ ᤕᤠᤱᤎᤥᤰᤗᤥ॥ 13 ᤂᤧᤏᤧ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤕᤢᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤗᤳᤇᤠ ᤁᤧᤗᤠ᤹ᤒᤠ ᤁᤧᤄᤧᤶᤒᤠ ᤔᤠᤱᤜᤡᤶ ᤌᤡᤰ ᤆᤥᤃᤢᤱᤅᤠᤱ ᤕᤢᤱᤗᤥ॥” 14 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤂᤧᤵᤔᤥ ᤔᤧᤕᤧᤶᤛᤡᤱᤅᤠᤱ ᤔᤧᤕᤧᤒᤧ. ᤂᤧᤒᤩᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤜᤡᤛᤡᤱᤅᤠᤱ ᤂᤧᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ. 15 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ—“ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤂᤢᤏᤧ᤹ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴᤏᤢ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤪᤠ᤺ᤸᤗᤧ ᤐᤠ᤺ᤳᤋᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤁᤧᤳᤋᤢᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. 16 ‘ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤒᤠ ᤕᤧᤴᤏᤠᤱᤎᤥ ᤀᤰᤂᤣ ᤀᤡᤛᤪᤠᤀᤡᤗᤡᤜᤠ᤹ᤀᤥᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤕᤧᤰᤕᤰᤁᤡᤴᤏᤠᤱ ᤀᤠᤱᤃᤠ᤹ ᤀᤠᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤐᤥᤱ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤣᤃᤢᤱᤒᤠ ᤜᤥᤵ. ᤁᤖ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤍᤠᤀᤢᤍᤧᤴ ᤛᤣᤃᤢᤱᤅᤠᤱ ᤘᤠ᤹॥’” 17 “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤠᤱᤜᤡᤶ ᤌᤡᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤀᤥ ᤘᤕᤧ॥ 18 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴ ᤔᤧᤳᤋᤢ. ‘ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤏᤡᤴ ᤏᤢᤒᤠᤀᤣ ᤆᤥᤰ॥ 19 ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤴ ᤔᤠᤱᤜᤡᤶᤔᤡᤴ ᤁᤧᤴᤈᤥᤃᤢᤴ᤹. ᤁᤖ ᤂᤧᤏᤧ᤹ ᤀᤠᤵᤑᤣᤰ ᤁᤧᤏᤧᤰᤛᤠ ᤏᤢ ᤁᤧᤔᤠᤰᤂᤡ᤹ ᤗᤠᤶᤒᤠᤒᤠ ᤁᤧᤛ᤻ᤛᤠ᤺ᤸᤗᤧᤀᤣ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤔᤠᤱᤜᤡᤶ ᤆᤥᤃᤢ᤹॥’ 20 “ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤁᤧᤳᤋᤢ॥ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤗᤰᤂᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤠᤶᤒᤠᤖᤧ ᤁᤢᤗᤧᤰᤘᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤀᤠᤱᤃᤠ᤹ ᤕᤢᤱᤅᤠ᤹. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤔᤠᤱᤜᤡᤶᤔᤡᤴ ᤆᤥᤃᤢᤱᤅᤠᤱ ᤕᤢᤱ᤹॥ 21 ᤀᤠᤱᤃᤠ᤹ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤗᤠᤃᤡ ᤗᤳᤇᤠ ᤋᤧᤴ ᤌᤡᤰ ᤏᤧᤛ᤻ᤛᤢᤱᤅᤠᤱ ᤏᤧᤖᤥ. ᤂᤢᤏᤧ᤹ ᤀᤠᤏᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢ ᤌᤠᤰᤋᤢᤛᤡᤸᤗᤧ ᤂᤢᤴᤇᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤧᤵᤔᤥ ᤕᤠᤰᤗᤥ॥” ᤛᤥᤗᤥᤔᤏᤖᤧ ᤁᤢᤒᤣᤗᤡ ( ᥈ ᤛᤠᤵᤔᤢ ᥌:᥇᥈-᥊᥈ ) 22 ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤕᤜᤘᤣ ᤍᤠᤱᤒᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤋᤃᤡ ᤕᤧᤶᤛᤡᤱᤅᤠᤱ ᤛᤥᤗᤥᤔᤏᤖᤧ ᤁᤢᤜᤢᤰᤜᤠ᤹ ᤌᤠ᤺ᤱ ᤑᤥ᤺ᤰᤂᤢ. 23 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ ᤔᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤏᤧ᤹ ᤜᤧᤰᤋᤱᤒᤠ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤜᤠ᤺ᤳᤋᤠᤱ ᤜᤥᤵᤗᤥ—ᤁᤧᤖᤧᤰ ᤛᤡᤰᤗᤢᤱᤔᤠ᤹ᤖᤧ ᤆᤰᤔᤧᤸᤗ᤹ᤀᤣ ᤂᤧᤏᤧ᤹ ᤁᤧᤗᤠᤶ ᤁᤧᤍᤡᤶᤒᤠ. ᤂᤧᤴ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡ᤹॥ 24 ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴᤏᤢ ᤁᤧᤈᤥᤃᤢᤒᤠ ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤁᤧᤃᤧᤳᤋᤢᤀᤠᤱ ᤘᤠ᤹ᤖᤥ॥ ᤀᤠᤀᤡᤴ ᤐᤥ᤺ᤰᤂᤧᤀᤠᤱ ᤘᤠ᤹ᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤵᤑᤣᤰ ᤁᤧᤶᤒᤪᤠ᤺ᤸᤗᤧ ᤔᤠᤱᤜᤢᤵ ᤁᤧᤈᤥᤃᤢᤒᤠᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤢᤰᤁᤡᤸᤗᤧ ᤂᤧᤴ ᤁᤧᤃᤧᤳᤋᤢᤒᤠᤖᤥ॥ 25 “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤍᤠᤀᤢᤍ ᤀᤠᤱᤃᤠ᤹ ᤀᤠᤶᤒᤠᤏᤢ ᤀᤰᤂᤣᤗ᤹ᤖᤡᤰ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤁᤧᤒᤠ᤺ᤳᤋᤢᤒᤠᤴ ᤁᤧᤳᤋᤧ᤹ᤀᤥ. ‘ᤂᤧᤏᤧ᤹ ᤗᤠᤱᤃᤧᤄᤣᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤂᤢᤴᤇᤡ᤹ ᤕᤧᤵᤗᤧᤰᤁᤥ ᤛᤡᤱᤛᤡᤱᤅᤠᤱ ᤀᤠᤱᤃᤠ᤹ ᤀᤠᤍᤃᤡ ᤗᤠᤱᤔᤧᤄᤣ᤺ᤰᤏᤧᤓᤃᤪᤖᤰ. ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤗᤠᤃᤡ ᤀᤠᤓᤧᤸᤗᤧᤀᤠᤱ ᤔᤏᤠ ᤔᤧᤴᤇᤢ᤺ᤴᤏᤧᤴ᤹॥’ 26 ᤜᤧᤰᤁᤩᤠᤱ ᤀᤠᤸᤗ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴ ᤁᤧᤔᤧᤳᤋᤢᤒᤠ ᤁᤧᤒᤠ᤺ᤴᤈᤠ᤺ᤰᤁᤡᤴ ᤁᤧᤳᤋᤧ᤹ᤀᤥ॥ 27 “ᤁᤖ ᤌᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤠᤱᤎᤥ᤺ᤰᤐᤡ᥅ ᤛᤠᤱᤃᤪᤠᤶᤐᤣᤍᤠᤱᤜᤠ᤹. ᤛᤠᤶᤃᤪᤠᤶᤐᤣᤍᤠᤱᤏᤢ᤺ᤸᤗᤧ ᤌᤠ᤺ᤱᤎᤠᤰᤐᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤧᤏᤧ᤹ ᤁᤧᤴᤜᤳᤏᤧᤴᤏᤧᤸᤗᤧ. ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶᤔᤥᤃ ᤀᤠᤰᤂᤣᤗ᤹ᤖᤡᤰ ᤁᤧᤜᤳᤋᤠᤱᤒᤣ᥄ 28 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤒᤣᤗᤡᤴ ᤏᤢ ᤗᤢᤱᤔᤠ᤹ ᤋᤢᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤆᤥᤃᤢᤒᤠ ᤋᤢᤘᤠᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ ᤀᤠᤀᤡᤴᤒᤠ ᤕᤧᤴᤏᤥ ᤂᤧᤏᤧ᤹ᤀᤣ ᤁᤧᤍᤃᤡ ᤁᤧᤛᤧᤘᤠᤖᤥᤒᤧᤸᤗᤧ ᤆᤥᤃᤢᤒᤠ ᤐᤣᤗᤡᤴ ᤏᤢ ᤋᤢᤘᤠᤴ ᤂᤧᤵᤛᤧ᤹ᤀᤥ॥ 29 ᤁᤴ ᤔᤠᤱᤜᤡᤶᤔᤡᤴ ᤂᤧᤏᤧ᤹ ᤛᤧᤴᤍᤡᤰ ᤗᤧᤴᤍᤡᤰ ᤀᤥᤔᤧᤳᤋᤧᤀᤠᤱ ᤐᤳᤇᤧ᤹ᤀᤥ. ᤁᤴ ᤋᤧᤴᤏᤥ. ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤕᤧ. ‘ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤜᤠᤒᤠ ᤂᤧᤵᤔᤥᤀᤣ ᤘᤠ᤹’ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤸᤗᤧ ᤁᤴ ᤋᤧᤴᤏᤥ ᤜᤡᤛᤡᤱᤅᤠᤱ ᤐᤣᤗᤡ ᤑᤠᤰᤋᤢᤸᤗᤧ ᤂᤧᤏᤧ᤹ ᤂᤧᤵᤛᤧ᤹ᤀᤥ॥ 30 ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤏᤢ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤋᤧᤴᤏᤥ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤋᤢᤘᤠ ᤔᤧᤈᤥ᤺ᤰᤁᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤣᤗᤡᤴ ᤂᤧᤵᤛᤧ᤹ᤀᤥ॥ ᤂᤧᤏᤧ᤹ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤥ. ᤂᤶᤓᤩᤠᤱ ᤀᤠᤸᤗ ᤂᤧᤏᤧ᤹ ᤁᤧᤄᤧᤵᤛᤢᤸᤗᤧ. ᤂᤧᤱᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ 31 “ᤁᤢᤓᤠ ᤔᤏᤠ᤺ᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤔᤧᤴᤘᤠ᤹ᤔᤏᤠ ᤔᤧᤳᤋᤢᤀᤠᤱ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤢᤏᤧᤓᤃᤪ. ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤛᤡᤃᤠᤱ ᤀᤠᤍᤠᤱᤒᤠᤖᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤔᤠᤱᤜᤧᤰᤛᤡᤱᤏᤧᤓᤃᤪ. 32 ᤀᤠᤸᤗ ᤂᤧᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧᤀᤠᤱ ᤂᤠᤛᤧᤴ ᤆᤥᤃᤧ᤹ᤀᤥ॥ ᤀᤠᤵᤋᤡᤰᤛᤠᤒᤧᤴ ᤀᤠᤵᤋᤡᤰᤛᤠᤒᤠ ᤗᤣ᤺ᤳᤋᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤂᤢᤏᤧ᤹ᤀᤣ ᤁᤢᤎᤧᤃᤣ᤺ᤰᤐᤥ ᤌᤠᤛᤧ᤹ᤖ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤧ᤹ᤀᤥ॥ ᤁᤢᤍᤥ᤺ᤵᤔᤠᤴ ᤁᤢᤍᤥ᤺ᤵᤔᤠᤀᤣ ᤗᤣ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤁᤢᤍᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤥᤀᤣ ᤌᤎᤵ ᤔᤧᤸᤗ᤹ᤀᤣ ᤁᤧᤘᤠ᤹ᤒᤠ ᤆᤥᤃᤧ᤹ᤀᤥ॥ 33 “ᤀᤠᤸᤗ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤜᤠᤖᤡᤔᤧᤍᤩᤧᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤴ ᤔᤧᤒᤠ᤺ᤳᤋᤢᤖ ᤁᤴ ᤔᤠᤱᤜᤡᤶᤔᤥ ᤋᤢᤘᤠ ᤏᤢ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤣᤗᤡ ᤑᤠᤰᤁᤡ ᤀᤠᤍᤠᤱᤒᤠ ᤗᤧᤵᤔᤠᤱ ᤔᤧᤏᤢ᤺ᤱᤏᤧᤓᤃᤪ. 34 ᤂᤶᤓᤩᤠᤱ ᤀᤠᤍᤠᤱᤒᤠᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤧ᤹ᤀᤠᤱ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤆᤥᤃᤧ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤏᤢ᤺ᤰᤋᤧ ᤋᤠᤖᤧᤛᤧ᤹ᤀᤥ॥ 35 “ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤋᤠᤱᤛᤠᤱᤒᤧᤴ ᤛᤢᤵᤛᤡᤱᤅᤠᤱ ᤘᤜᤡᤳ ᤔᤧᤴᤎᤠᤀᤣ ᤘᤠ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤴ ᤐᤠ᤺ᤵᤔᤠ ᤔᤧᤍᤧᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤕᤥᤗᤠᤶ ᤂᤧᤴ ᤋᤧᤴᤏᤥ ᤔᤧᤏᤢ᤺ᤱ ᤔᤧᤍᤠᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤡᤸᤗᤧ. 36 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤧ᤹ᤀᤥ. ᤂᤶᤓᤩᤠᤱ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ. ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤏᤢᤒᤠ ᤕᤧᤵᤗᤧᤰᤁᤡᤴ ᤂᤧᤏᤧ᤹ ᤜᤢ᤹ᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤂᤢᤴᤇᤡ᤹ ᤗᤰᤂᤥᤔᤠᤖᤧ ᤗᤠᤃᤡ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤘᤜᤡᤳ ᤌᤠᤛᤢᤖ ᤕᤠ᤺ᤴᤍᤧ ᤐᤡᤖᤧᤛᤧ᤹ᤀᤥ॥ 37 “ᤀᤠᤸᤗ ᤗᤠᤈᤣ᤹ᤀᤥ ᤛᤠᤰ ᤐᤥᤰ ᤀᤡᤃᤪ ᤋᤢᤰᤂᤣ ᤗᤠᤰᤂᤣ ᤋᤠ᤺ᤸᤗᤧ. ᤁᤡᤃᤪ ᤛᤡᤱᤛᤣ᤹ᤜᤠ᤹ ᤜᤣᤛᤡ ᤀᤡᤃᤪ ᤂᤢᤰᤘᤠᤔᤣ᤺ᤳ ᤁᤧᤎᤠᤒᤠ ᤕᤧᤶ ᤁᤡᤃᤪ ᤏᤡ᤺ᤱᤄᤢᤰᤘᤠᤜᤠ᤹ ᤏᤢ ᤑᤣ᤹ᤒᤠ᤺ᤳᤜᤠ᤹ ᤋᤠᤔᤠ ᤕᤧᤶ ᤋᤠ᤺ᤸᤗᤧ. ᤀᤡᤃᤪ ᤏᤡᤱᤔᤡᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤠ ᤁᤢᤕᤧᤰᤕᤰᤁᤡᤴ ᤔᤧᤃᤢᤒᤢ᤹. ᤀᤠᤰᤋᤱᤒᤠ ᤋᤢᤰᤔᤠ ᤗᤠ᤺ᤰᤔᤠ ᤀᤡᤃᤪ ᤔᤧᤰᤔᤠᤛᤡᤔᤠ ᤋᤠᤛᤠᤱ 38 ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤁᤢᤓᤠᤖᤧ ᤋᤢᤘᤠ ᤔᤧᤈᤥᤃᤢ᤹ ᤀᤡᤃᤪ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤠᤱ ᤐᤣᤗᤡ ᤔᤧᤍᤥᤴᤍᤢ᤹ ᤂᤧᤒᤩᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥᤒᤠ ᤋᤢᤰᤂᤣᤴ ᤔᤧᤀᤡ᤺ᤳᤋᤢᤀᤠᤱ ᤂᤢᤴᤇᤡ᤹ ᤜᤢᤰᤜᤠ᤹ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤔᤧᤓᤥ᤺ᤰᤂᤢᤸᤗᤧ ᤂᤧᤏᤧ᤹ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹॥ ᤜᤧᤰᤁᤩᤠᤱ ᤗᤧᤵᤔᤡ ᤐᤡᤖᤧᤛᤧ᤹ᤀᤠᤱ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥ 39 ᤂᤧᤏᤧ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤏᤡᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤔᤧᤳᤋᤧᤛᤧ᤹ᤀᤥ (ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤖᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤁᤧᤏᤡᤛᤢᤖᤥ). 40 ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤢᤴᤇᤡ᤹ ᤜᤡᤱᤜᤡᤱᤅᤣ ᤂᤧᤏᤧ᤹ ᤁᤧᤶᤃᤡᤳᤗᤖᤥ॥ 41 “ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤏᤢ᤺ᤸᤗᤧ ᤗᤠ᤺ᤳᤁᤠᤳᤐᤠ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ 42 ᤂᤧᤏᤧ᤹ ᤐᤕᤶ ᤕᤶᤒᤠ ᤁᤧᤔᤡᤱᤅᤡᤴ ᤏᤢ ᤂᤧᤏᤧ᤹ ᤔᤢᤰᤛᤠᤶᤛᤠᤒᤠ ᤁᤧᤜᤢᤰᤁᤡᤴ ᤜᤧᤰᤁᤩᤠᤱ ᤁᤧᤛᤴᤇᤢᤒᤠ ᤁᤧᤜᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤠ ᤜᤧᤰᤁᤩᤠᤱ ᤀᤠᤸᤗ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤂᤧᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤸᤗᤧ 43 ᤂᤧᤏᤧ᤹ ᤁᤧᤕᤢᤰᤏᤠ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤘᤣ᤹ ᤗᤠᤈᤣ᤹ᤒᤠᤸᤗᤧ ᤏᤠ᤺ᤰᤋᤢᤒᤧᤴ ᤐᤡᤖᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤁᤢᤀᤡᤛᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤔᤡᤱᤅᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤂᤧᤏᤧ᤹ᤏᤢ ᤔᤧᤃᤡᤖᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶᤔᤡᤴ ᤂᤧᤏᤧ᤹ ᤁᤧᤔᤡᤱᤅᤥ ᤆᤥᤃᤢᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥ 44 “ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤠᤳᤋᤡ ᤀᤠᤳᤋᤡ ᤁᤧᤒᤠᤱᤄᤢᤛᤡ᤹. ᤂᤧᤵᤔᤥ ᤂᤧᤱᤜᤠ᤹ ᤁᤢᤓᤠ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤒᤣ᤺ᤰᤁᤡᤸᤗᤧ ᤂᤧᤏᤧ᤹ ᤁᤧᤛᤣᤃᤢᤒᤠ ᤁᤴ ᤕᤧᤰᤕᤰ ᤗᤧᤵᤔᤠᤱ ᤏᤢ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤡᤱᤅᤡᤸᤗᤧ ᤗᤠᤃᤡ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤂᤧᤱᤜᤠ᤹ ᤋᤢᤘᤠ ᤔᤧᤈᤥ᤺ᤰᤁᤡᤸᤗᤧ. 45 ᤂᤧᤏᤧ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤢᤘᤠᤴ ᤏᤢ ᤐᤣᤗᤡᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤴᤕᤧᤶᤔᤥ ᤐᤳᤇᤧ᤹ᤀᤥ॥ 46 “ᤀᤠᤸᤗ ᤁᤧᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢ᤹—ᤌᤣᤀᤠᤱᤓᤧᤸᤗᤧ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ ᤜᤠ᤺ᤳᤋᤠᤱ ᤜᤥᤵ—ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤱᤜᤠ᤹ᤏᤢ ᤁᤧᤛᤡᤰ ᤐᤥ᤺ᤰᤁᤠᤱ ᤂᤧᤱᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤎᤠᤛᤢᤛᤡ᤹ ᤜᤧᤰᤁᤩᤠᤱ ᤂᤧᤴ ᤏᤡᤱᤔᤡᤜᤠ᤹ᤖᤧ ᤂᤧᤱᤜᤠ᤹ ᤔᤠ᤺ᤱᤄᤠ ᤀᤡᤃᤪ ᤏᤡ᤺ᤳᤋᤠᤱ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ᤹. 47 ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤏᤡᤱᤘᤠ᤹ ᤏᤢ᤺ᤱᤅᤠᤱ ᤂᤧᤴ ᤗᤠᤈᤣ᤹ᤀᤥ ᤂᤢᤴᤇᤡ᤹ ᤗᤠᤕᤥᤗᤠᤶ ᤔᤧᤜᤡᤴ᤹ ᤜᤧᤰᤁᤩᤠᤱ ᤂᤧᤏᤧ᤹ ᤐᤣᤗᤡ ᤁᤧᤶᤓᤠᤰᤁᤠᤱ ‘ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧ. ᤀᤠᤏᤡᤃᤣ ᤕᤠ᤺ᤶᤒᤰ ᤑᤣ᤺ᤴᤍᤢᤶᤒᤧ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤆᤥᤃᤢᤶᤒᤧ.’ ᤔᤧᤒᤠ᤺ᤳᤋᤢᤏᤧᤓᤃᤪ. 48 ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤍᤧᤶᤒᤠ ᤁᤧᤍᤣ᤹ᤒᤠ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤕᤠᤶᤔᤥ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤁᤧᤖᤧᤰ ᤏᤡᤱᤘᤠ᤹ᤖᤧ ᤂᤧᤏᤧ᤹ ᤗᤧᤵᤔᤠᤱ ᤔᤧᤏᤢ᤺ᤱᤅᤠᤱ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤂᤧᤏᤧ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤏᤢ ᤂᤧᤏᤧ᤹ ᤁᤧᤛᤣᤃᤢᤒᤠ ᤁᤴ ᤕᤧᤰᤕᤰᤁᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤱᤅᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤂᤧᤏᤧ᤹ ᤐᤣᤗᤡ ᤁᤧᤶᤓᤠᤰᤏᤧᤓᤃᤪ. 49 ᤂᤧᤏᤧ᤹ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤢᤘᤠᤴ ᤏᤢ ᤐᤣᤗᤡᤴ ᤂᤧᤵᤛᤧ᤹ᤀᤥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤴᤕᤧᤶᤔᤥ ᤐᤳᤇᤧ᤹ᤀᤥ॥ 50 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤂᤧᤒᤩᤠᤱ ᤂᤢᤴᤇᤡ᤹ ᤁᤧᤏᤠ᤺ᤶᤒᤠᤜᤠ᤹ᤖᤧ ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤖ ᤕᤠ᤺ᤴᤍᤧᤛᤧ᤹ᤀᤥ॥ 51 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤧᤏᤧ᤹ ᤔᤡᤛᤪ ᤗᤠᤈᤣ᤹ᤗᤠᤶ. ᤀᤡᤃᤪ ᤑᤧᤴᤈᤣ᤹ ᤕᤥ᤺ᤶᤔᤠ ᤔᤡᤍ᤺ᤳᤋᤥᤗᤠᤶ ᤁᤧᤗ᤺ᤳᤋᤢ ᤁᤧᤎᤠᤰᤋᤢᤛᤡᤒᤠ ᤂᤧᤏᤧ᤹ᤀᤣ ᤁᤧᤗᤰᤂᤥᤒᤠ. ᤂᤧᤏᤧ᤹ᤀᤣ ᤁᤧᤔᤏᤠᤛᤡᤖᤥ॥ 52 “ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤒᤣᤗᤡᤃᤧᤴ ᤋᤢᤘᤠ ᤏᤢ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤗᤠᤃᤡ ᤂᤧᤏᤧ᤹ ᤁᤧᤔᤡᤰᤜᤠ᤹ ᤜᤱ ᤗ᤹ᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤣᤗᤡ ᤁᤧᤶᤓᤠᤰᤁᤡᤸᤗᤧ ᤂᤧᤏᤧ᤹ ᤏᤡᤱᤘᤠ᤹ ᤐᤡᤖᤧ᤹ᤀᤠᤱ ᤂᤧᤵᤛᤧ᤹ᤀᤥ॥ 53 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤐᤠᤎᤧᤒᤠᤜᤠ᤹. ᤔᤡᤛᤪ ᤗᤠᤈᤣ᤹ᤗᤠᤶ ᤁᤧᤗ᤺ᤳᤋᤢ ᤁᤧᤎᤠᤰᤋᤢᤛᤡᤸᤗᤧ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤔᤥᤛᤠᤗᤠᤶᤒᤠ ᤀᤢᤘᤠ ᤁᤧᤈᤥᤃᤢᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤂᤧᤏᤧ᤹ ᤂᤧᤱᤜᤠ᤹ ᤀᤠᤵᤑᤣᤰ ᤁᤧᤗᤰᤂᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤣ᤺ᤰ ᤁᤧᤛᤧᤴᤍᤢᤛᤡᤖᤥ॥” ᤁᤢᤏᤢᤵᤔᤠ ᤐᤣᤗᤡ 54 ᤀᤠᤸᤗ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤠᤀᤥ ᤁᤴ ᤋᤢᤘᤠᤴ ᤏᤢ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤣᤗᤡᤴ ᤆᤥᤃᤢᤛᤢᤖᤢᤀᤠᤱ ᤘᤕᤧ. ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤃᤡᤗᤠᤶ ᤐᤥᤃᤧ. ᤂᤢᤏᤧ᤹ ᤂᤧᤵᤔᤥ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤁᤢᤜᤢᤰᤜᤠ᤹ ᤑᤥ᤺ᤰᤂᤢᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤕᤢᤅᤧ॥ 55 ᤂᤢᤏᤧ᤹ ᤐᤥᤃᤧᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤖ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ— 56 “ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤺ᤶᤛᤡᤱᤔᤠ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤗᤠᤶᤒᤠ ᤆᤥᤃᤢᤒᤠ ᤁᤧᤖᤧᤰ ᤏᤢᤒᤠ ᤔᤠᤱᤜᤢᤵᤜᤠ᤹ᤀᤥ ᤗᤳᤇᤠᤀᤠᤱ ᤔᤧᤱᤃᤧᤵᤔᤏᤠᤒᤠ ᤔᤧᤶᤒᤥᤱᤅᤣ ᤘᤠ᤹॥ 57 ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤘᤕᤧᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤘᤠ᤹ᤖ॥ ᤂᤢᤏᤧ᤹ ᤀᤠᤏᤡ᤹ ᤀᤠᤵᤑᤠᤸᤗᤧᤀᤠᤱ ᤀᤠᤸᤗᤧᤳᤏᤧᤴᤗ ᤜᤧᤰᤁᤩᤠᤱ ᤗᤠᤵᤐᤠᤱ ᤀᤠᤶᤓᤢᤏᤧᤴᤗᤖᤥ॥ 58 ᤂᤢᤏᤧ᤹ ᤀᤠᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤢᤵᤜᤠ᤹. ᤀᤡᤱᤈᤠᤱᤜᤠ᤹ ᤏᤢ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤜᤠ᤹ᤀᤥ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤏᤡ᤹ ᤛᤡᤰᤗᤢᤱᤔᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤜᤡᤛᤢᤖ॥ 59 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤁᤴ ᤀᤠᤒᤠ᤺ᤴᤈᤠ᤺ᤰᤜᤠ᤹ ᤋᤥ᤺ᤴᤍᤢᤱᤅᤠᤱ ᤘᤠ᤹. ᤛᤧᤴᤍᤡᤰ ᤗᤧᤴᤍᤡᤰ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ᤖ. ᤌᤡᤰᤕᤠ᤺ᤴᤎᤰ ᤆᤠᤜᤠ ᤆᤥ᤺ᤰᤐᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤗᤧᤵᤔᤠᤱ ᤘᤠ᤹. 60 ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤴᤏᤣ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤢᤏᤧ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖ॥ 61 ᤁᤖ ᤀᤠᤀᤡᤴᤒᤠ ᤕᤧᤶ ᤜᤧᤰᤁᤣ ᤂᤢᤏᤧ᤹ ᤁᤢᤀᤡᤱᤍᤳᤜᤠ᤹ᤗᤠᤶ ᤜᤡᤱᤔᤠ ᤏᤢ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤖᤧᤰ ᤐᤖᤡᤰᤗᤧ ᤋᤥ᤺ᤶᤔᤠᤀᤣ ᤐᤥᤱᤗᤥ॥” ᤔᤠᤱᤜᤡᤶᤔᤡᤴ ᤔᤧᤍᤥᤴᤍᤢ ( ᥈ ᤛᤠᤵᤔᤢ ᥍:᥊-᥇᥆ ) 62 ᤂᤧᤒᤩᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ॥ 63 ᤛᤥᤗᤥᤔᤏᤖᤧ ᥈᥈.᥆᥆᥆ ᤐᤡᤳᤌᤰᤛᤠᤜᤠ᤹ ᤏᤢ ᥇.᥈᥆.᥆᥆᥆ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤋᤱᤈᤢᤶ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤥ᤺ᤴᤍᤢᤛᤡ॥ ᤁᤶᤓᤗ᤹ᤖᤡᤰᤁᤣ ᤜᤠᤱᤅᤡᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤔᤧᤍᤥᤴᤍᤢ॥ 64 ᤀᤠᤶᤓᤠ ᤁᤸᤗᤧ ᤕᤠ᤺ᤴᤍᤡᤰ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤋᤃᤡᤒᤠ ᤗᤰᤂᤢᤶᤔᤥᤒᤠ ᤁᤢᤗᤢᤶ ᤗᤰᤁᤡᤴ ᤋᤥ᤺ᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤋᤥ᤺ᤴᤍᤢ. ᤌᤣᤀᤠᤱᤓᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥᤳ ᤕᤠᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤠ᤹ᤖᤡᤰ ᤆᤢ᤺ᤰᤐᤠ ᤆᤥᤃᤧ॥ 65 ᤂᤶᤓᤩᤠᤱ ᤛᤥᤗᤥᤔᤏ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ. ᤗᤧᤒᤥ-ᤜᤔᤠᤋᤗᤠᤶ ᤔᤡᤛᤪ ᤗᤠᤈᤣᤒᤠ ᤋᤠᤱᤛᤠᤱᤘᤠ ᤌᤠᤖᤡᤰᤐᤠ ᤁᤧᤖᤧᤰ ᤗᤠᤈᤣ᤹ᤗᤠᤶ ᤗᤳᤇᤠ ᤕᤖᤡᤰ ᤁᤧᤕᤥᤒᤠ ᤛᤱᤈᤢᤶᤓᤥᤜᤠ᤹ᤖᤧ ᤜᤠᤒᤠ ᤂᤧᤴ ᤕᤧᤶᤔᤥ ᤋᤱᤏᤠᤶ ᤔᤧᤍᤥᤛᤢ॥ ᤂᤧᤱᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤏᤢ ᤀᤠᤸᤗᤛᤠᤱ ᤏᤢᤛᤡ ᤕᤧᤴ ᤌᤧᤶᤒᤠ ᤁᤠᤰᤗᤧ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤋᤱᤏᤠᤶ ᤔᤧᤍᤥᤛᤢᤀᤠᤱ ᤔᤧᤕᤠᤃᤧ॥ 66 ᤂᤧᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤂᤢᤏᤧ᤹ ᤔᤏᤠᤜᤠ᤹ ᤗᤠᤶᤔᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤒᤡᤖᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤏᤢ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤥᤃᤢᤒᤠ ᤁᤧᤖᤧᤰ ᤏᤢᤒᤠ ᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤛᤡᤰᤗᤢᤱᤔᤠ᤹ᤀᤥ ᤔᤧᤛ᤺ᤳᤋᤧᤖ ᤜᤧᤰᤁᤩᤠᤱ ᤏᤡᤱᤘᤠ᤹ ᤕᤧᤕᤧ ᤗ᤹ᤖᤧᤖ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤔᤧᤒᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.