᥇ ᤜᤠᤱ 7 - LIFOTNTᤛᤥᤗᤥᤔᤏᤖᤧ ᤁᤢᤜᤠᤱᤜᤡᤶ 1 ᤁᤖ ᤛᤥᤗᤥᤔᤏᤖᤧ ᤂᤢᤏᤧ᤹ ᤁᤢᤜᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤛᤢ᤺ᤵᤔᤠᤖᤧ ᤗᤠᤃᤡ ᤌᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤌᤖᤢ॥ 2 ᤂᤢᤏᤧ᤹ ᤁᤡᤵ ᤌᤡᤰ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ. ᤅᤠᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ. ᤛᤢᤶᤒᤥᤱ ᤜᤢᤰᤛᤡᤰ ᤁᤢᤗᤡᤱᤃᤧᤴ. ᤁᤢᤍᤡ᤺ᤰᤗᤠ ᤗᤡᤛᤡ ᤛᤠᤶᤔᤠᤱᤛᤡᤱ ᤛᤡᤳᤗᤠᤱ ᤁᤧᤕᤧᤵᤐᤠ. ᤂᤧᤸᤗᤧ ᤌᤠ᤺ᤱ ᤁᤢᤛᤶᤎᤠᤱ ᤛᤠᤶᤔᤠᤱᤛᤡᤱᤅᤡᤴᤗᤧᤴᤏᤣ ᤐᤧᤖᤧᤶᤛᤡᤱ ᤁᤧᤕᤠᤰᤐᤠ ᤗᤧᤒᤠᤏᤠᤏᤒᤠ ᤋᤠᤶᤓᤢᤱ ᤔᤧᤵᤔᤏᤠᤒᤠ ᤕᤶᤒᤠ ᤜᤡᤶ ᤆᤥᤃᤢ॥ 3 ᤛᤡᤳᤗᤠᤱᤜᤠ᤹ᤀᤥ ᤁᤧᤏᤧᤒᤠ ᤂᤧᤴ ᤐᤧᤖᤧᤶᤛᤡᤱᤜᤠ᤹ᤖᤧ ᤁᤢᤛᤶᤎᤠᤱ ᤛᤠᤶᤔᤠᤱᤛᤡᤱ ᤗᤡᤱᤄᤠᤶᤒᤢ ᤔᤧᤓᤳᤇᤢ. ᤁᤢᤍᤡ᤺ᤰᤗᤠ ᤌᤰᤔᤠ ᤌᤡᤒᤥᤱᤅᤠᤱ ᤅᤠᤛᤡ ᤛᤡᤳᤗᤠᤱ ᤁᤧᤖᤧᤰᤗᤧ ᤗᤡᤒᤥᤱᤅᤠᤱ ᤅᤠᤛᤡ ᤛᤡᤳᤗᤠᤱᤜᤠ᤹ ᤕᤧᤒᤧ॥ 4 ᤂᤧᤵᤔᤥᤒᤠ ᤐᤣᤎᤠ᤺ᤵᤜᤠ᤹ᤀᤥᤒᤠ ᤛᤢᤶᤛᤡ ᤁᤢᤍᤡ᤺ᤰᤗᤠᤜᤠ᤹ᤀᤥ ᤆᤠᤱᤈᤠᤱ ᤗ᤹ᤖᤡᤰ ᤔᤧᤕᤧᤵᤛᤢᤀᤠᤱ ᤕᤧᤒᤧ. ᤂᤧᤱᤜᤠ᤹ ᤋᤰ ᤏᤢ ᤋᤰ ᤁᤧᤜᤡᤛᤡᤱᤒᤠ ᤐᤳᤇᤧ॥ 5 ᤁᤧᤖᤧᤰ ᤗᤠᤶᤎᤣ᤺ᤳᤜᤠ᤹ᤖᤧ ᤁᤢᤕᤧᤵᤏᤠᤜᤠ᤹ ᤁᤢᤛᤢᤰᤐᤠ ᤗᤡᤛᤡ ᤁᤧᤒᤵᤐᤠ ᤆᤥᤃᤧ. ᤂᤧᤴ ᤋᤃᤡ ᤗᤧᤵᤔᤠᤱ ᤛᤢᤶᤛᤡ ᤛᤢᤶᤛᤡ ᤁᤢᤍᤡ᤺ᤰᤗᤠᤀᤥ ᤋᤰ ᤏᤢ ᤋᤰ ᤁᤧᤜᤡᤛᤡᤱᤒᤠ ᤐᤳᤇᤧ॥ 6 ᤂᤢᤏᤧ᤹ ᤅᤠᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤛᤢᤶᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤛᤡᤳᤗᤠᤱᤜᤠ᤹ᤖᤧᤴ ᤕᤶᤒᤠ ᤜᤡᤶ ᤆᤥᤃᤢ॥ ᤂᤧᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤛᤡᤳᤗᤠᤱᤜᤠ᤹ᤖᤧ ᤋᤰᤋᤢᤒᤠ ᤀᤠ᤺ᤶᤓᤥ ᤌᤡᤰ ᤏᤧᤛ᤻ᤛᤧ॥ 7 ᤛᤥᤗᤥᤔᤏᤖᤧ ᤂᤠᤛᤧᤴᤜᤡᤶ. ᤀᤡᤃᤪ ᤜᤠᤱᤕᤢᤰᤏᤠ ᤜᤡᤶ ᤆᤥᤃᤢ॥ ᤜᤠᤒᤠ ᤂᤧᤵᤔᤥᤀᤣ ᤂᤢᤏᤧ᤹ ᤂᤠᤛᤧᤴ ᤗᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤢ॥ ᤂᤢᤏᤧ᤹ ᤂᤠᤶᤒᤠᤱᤅᤥᤏᤢ ᤁᤢᤍᤠ᤹ᤔᤠ ᤐᤧᤖᤧᤶᤛᤡᤱ ᤌᤠᤖᤡᤰ ᤂᤧᤴ ᤛᤠᤶᤔᤠᤱᤛᤡᤱᤅᤡᤸᤗᤧ ᤋᤧᤵᤋᤢ॥ 8 ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤢᤱᤔᤠ ᤜᤡᤶᤔᤡᤴ ᤂᤧᤸᤗᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤂᤠᤛᤧᤴᤜᤡᤶ ᤜᤧᤰᤋᤱᤒᤠᤀᤣ ᤆᤥᤃᤢ॥ ᤂᤢᤏᤧ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤌᤠᤰᤋᤢᤔᤠ ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤃᤡᤀᤠᤱ ᤜᤠᤒᤠ ᤜᤧᤰᤋᤱᤒᤠᤀᤣ ᤜᤡᤶ ᤆᤥᤃᤢ॥ 9 ᤁᤴ ᤁᤧᤖᤧᤰ ᤜᤡᤶᤜᤠ᤹ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤰᤂᤢᤶᤔᤥ ᤌᤠᤖᤡᤰ ᤜᤧᤰᤁᤩᤠᤱ ᤁᤢᤒᤢᤱᤅᤥᤏᤢ ᤌᤠ᤺ᤱ ᤗᤡᤱᤄᤠᤶᤒᤢᤀᤥ ᤌᤠᤖᤡᤰ ᤗᤢᤱᤄᤰᤔᤧᤸᤗᤧ ᤋᤅᤧᤖ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤁᤢᤏᤠᤜᤠ᤹ ᤔᤧᤄᤰᤋᤢᤒᤠ ᤛᤠ᤹ᤖᤡᤰ ᤏᤢᤒᤠ ᤗᤢᤱᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤕᤢᤅᤧ॥ 10 ᤁᤢᤒᤢᤱᤅᤥ ᤏᤢᤒᤠ ᤐᤖᤡᤰᤐᤠ ᤕᤶᤒᤕᤶᤒᤠ ᤗᤢᤱᤜᤠ᤹ ᤁᤢᤛᤡ᤺ᤰᤔᤥ ᤁᤢᤓᤠᤃ ᤌᤡᤒᤥᤱ ᤜᤢᤰᤛᤡᤰ ᤏᤢ ᤁᤢᤓᤠᤃ ᤕᤧᤳᤇᤡ ᤜᤢᤰᤛᤡᤰ ᤁᤧᤒᤵᤐᤠ ᤆᤥᤃᤧ॥ 11 ᤂᤧᤸᤗᤧ ᤁᤢᤛᤶᤎᤠᤱ ᤛᤠ᤹ᤖᤡᤰ ᤏᤢᤒᤠ ᤐᤖᤡᤰᤗᤧᤴ ᤁᤧᤍᤱᤒᤠ ᤁᤢᤛᤡ᤺ᤰᤔᤥ ᤔᤧᤄᤰᤋᤢᤀᤠᤱ ᤔᤧᤍᤱᤄᤢᤒᤠ ᤗᤢᤱ ᤏᤢ ᤛᤠᤶᤔᤠᤱᤛᤡᤱᤅᤧᤸᤗᤧᤴ ᤐᤧᤖᤧᤶᤛᤡᤱ ᤁᤢᤍᤠ᤺ᤰᤔᤠ ᤕᤠᤃᤧ॥ 12 ᤕᤶᤒᤠ ᤗᤰᤂᤢᤶᤔᤡᤸᤗᤧ ᤁᤧᤖᤧᤰ ᤐᤡᤛᤠᤱ ᤁᤒᤪᤡᤱ ᤔᤧᤄᤰᤋᤢᤀᤠᤱ ᤔᤧᤍᤱᤄᤢᤒᤠ ᤁᤢᤍᤡ᤺ᤰᤗᤠ ᤛᤢᤶᤛᤡ ᤗᤢᤱᤜᤠ᤹ ᤕᤠᤃᤧ. ᤜᤧᤰᤁᤩᤠᤱ ᤛᤠᤶᤔᤠᤱᤛᤡᤱ ᤁᤢᤍᤠ᤺ᤰᤔᤠ ᤐᤧᤖᤧᤶᤛᤡᤱᤜᤠ᤹ᤖᤧᤴ ᤗᤳᤇᤠ ᤁᤢᤍᤡ᤺ᤰᤗᤠ ᤕᤠᤃᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤛᤡᤃᤠᤱ ᤗᤰᤂᤢᤶᤔᤡᤴ ᤏᤢ ᤂᤧᤵᤔᤥᤒᤠ ᤀᤠ᤺ᤶᤓᤥ᤺ᤴᤏᤠᤱ ᤜᤧᤰᤋᤱᤒᤠᤀᤣ ᤏᤧᤛ᤻ᤛᤧᤖᤥ॥ ᤜᤢᤖᤠᤔᤖᤧ ᤁᤢᤕᤠ᤺ᤶᤒᤰ 13 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤋᤢᤖᤥᤛᤗᤠᤶ ᤜᤢᤖᤠᤔᤧᤴ ᤀᤢ᤺ᤵᤔᤠ ᤐᤠᤱᤄᤢᤛᤡ. 14 ᤂᤧᤸᤗᤧ ᤁᤢᤶᤔᤠ ᤏᤵᤋᤠᤗᤡ ᤌᤠ᤺ᤰᤁᤥᤒᤠ ᤗᤳᤇᤠ ᤔᤣᤔᤣᤍᤢᤔᤠ ᤘᤕᤧ ᤜᤧᤰᤁᤩᤠᤱ ᤁᤢᤶᤒᤠᤴ ᤋᤢᤖᤥᤛ ᤁᤧᤕᤢᤱᤒᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤁᤠᤛᤠ ᤁᤧᤎᤰᤐᤠ ᤘᤕᤧ॥ ᤜᤢᤖᤠᤔᤧᤴ ᤁᤠᤛᤠ᤺ᤸᤗᤧᤴ ᤁᤧᤖᤧᤰ ᤐᤖᤡᤰᤐᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠ᤹ᤖᤡᤰ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤏᤢ ᤋᤃᤡᤀᤠᤱᤎᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ ᤘᤕᤧ॥ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤥ ᤕᤧᤀᤠᤱ ᤂᤢᤏᤧ᤹ ᤆᤥ᤺ᤰᤔᤠ ᤔᤧᤒᤠᤱᤄᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥ ᤁᤠᤛᤠ᤺ᤸᤗᤧᤴ ᤏᤧᤳᤇᤡ ᤁᤢᤗ᤺ᤵᤗᤠ ᤛᤡᤳᤗᤠᤱᤜᤠ᤹ ( ᥈ ᤛᤠᤵᤔᤢ ᥉:᥇᥋-᥇᥍ ) 15 ᤜᤢᤖᤠᤔᤧᤸᤗᤧ ᤁᤠᤛᤠ ᤛᤡᤳᤗᤠᤱ ᤏᤧᤳᤇᤡ ᤁᤢᤗ᤺ᤵᤗᤠ ᤆᤥᤃᤢ. ᤁᤢᤛᤡ᤺ᤰᤔᤥ ᤂᤧᤴ ᤛᤡᤳᤗᤠᤱ ᤌᤰᤔᤠ ᤌᤡᤒᤥᤱᤅᤠᤱ ᤕᤧᤳᤇᤡ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤏᤢ ᤁᤒᤪᤡᤱ ᤁᤢᤓᤧᤖᤧᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤢᤰᤛᤡᤰ ᤐᤳᤇᤧ॥ 16 ᤂᤢᤏᤧ᤹ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤎᤠᤱ ᤔᤧ᤺ᤌ ᤑᤶᤔᤠᤖᤧ ᤗᤠᤃᤡ ᤕᤥ᤺ᤶᤔᤏᤠᤒᤠ ᤏᤧᤳᤇᤡ ᤁᤠᤛᤠ ᤛᤡᤳᤗᤠᤱ ᤔᤧ᤺ᤌ᤻ᤜᤠ᤹ᤀᤠᤱ ᤆᤥᤃᤢ॥ ᤁᤧᤖᤧᤰ ᤛᤡᤳᤗᤠᤱ ᤔᤧ᤺ᤌᤜᤠ᤹ ᤜᤢᤰᤛᤡᤰ ᤅᤠᤛᤡ ᤁᤣ᤺ᤶᤒᤠ ᤆᤥᤃᤧ॥ 17 ᤂᤢᤏᤧ᤹ ᤁᤧᤖᤧᤰ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤛᤡᤳᤗᤠᤱ ᤔᤧ᤺ᤌᤜᤠ᤹ᤖᤧ ᤗᤠᤃᤡ ᤆᤡᤳᤗᤡᤱᤃᤣ᤹ ᤏᤢ ᤁᤧᤓᤥ᤺ᤴᤇᤡᤱᤒᤠ ᤏᤢᤛᤡ ᤛᤡᤰᤁᤪᤡ ᤆᤥᤃᤢ॥ 18 ᤛᤡᤳᤗᤠᤱᤜᤠ᤹ᤀᤥᤒᤠ ᤛᤡᤳᤗᤠᤱ ᤔᤧ᤺ᤌᤧᤴ ᤁᤧᤄᤧᤶᤛᤡᤱᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤛᤡᤰᤁᤪᤡᤀᤥᤒᤠ ᤆᤡᤳᤗᤡᤱᤃᤣ᤹ ᤁᤒᤪᤡᤱ ᤐᤡᤛᤠᤱ ᤂᤢᤏᤧ᤹ ᤁᤢᤓᤢᤱ ᤗᤰᤔᤏᤠᤒᤠ ᤁᤢᤍᤡ᤺ᤰᤗᤠ ᤏᤧᤴᤇᤡ ᤑᤢ᤹ᤗᤧᤛᤣ᤹ᤜᤠ᤹ ᤆᤥᤃᤢ॥ ᤂᤢᤏᤧ᤹ ᤁᤧᤖᤧᤰ ᤛᤡᤳᤗᤠᤱ ᤔᤧ᤺ᤌ᤻ᤜᤠ᤹ᤀᤠᤱ ᤜᤧᤰᤁᤣᤀᤣ ᤆᤥᤃᤢ॥ 19 ᤀᤠ᤺ᤶᤓᤥ᤹ ᤛᤡᤃᤠᤱ ᤛᤡᤳᤗᤠᤱᤜᤠ᤹ᤀᤥᤒᤠ ᤔᤧ᤺ᤌ᤻ᤜᤠ᤹ᤀᤥ ᤗᤧᤰᤘᤠ ᤑᤢᤱᤜᤠ᤹ᤖᤧ ᤁᤢᤀᤡᤳᤜᤠ᤹ ᤜᤢᤰᤛᤡᤰ ᤗᤡᤛᤡ ᤁᤣ᤺ᤶᤒᤠ ᤆᤥᤃᤧ॥ 20 ᤏᤧᤵᤔᤠᤱ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤎᤠᤱᤒᤠ ᤛᤡᤳᤗᤠᤱ ᤔᤧ᤺ᤌ᤻ᤜᤠ᤹ᤀᤥ. ᤆᤡᤳᤗᤡᤱᤃᤣ᤹ ᤁᤢᤒᤣᤛᤠᤱᤒᤠ ᤂᤥᤷᤕᤠ᤺ᤸᤗᤧ ᤁᤢᤀᤡᤳ ᤁᤧᤒᤵᤐᤠ ᤗᤰᤁᤥ. ᤛᤡᤳᤗᤠᤱ ᤔᤧ᤺ᤌ᤻ᤀᤥᤒᤠ ᤁᤒᤪᤡᤱ ᤁᤢᤍᤡ᤺ᤰ ᤁᤢᤍᤡ᤺ᤰ ᤁᤡᤵ ᤏᤧᤳᤇᤡ ᤁᤢᤓᤢᤱ ᤀᤡᤛᤣ᤺ᤱᤒᤠ ᤑᤢ᤹ᤗᤧᤛᤣ᤹ᤜᤠ᤹ ᤔᤧᤈᤥᤃᤢᤀᤠᤱ ᤐᤳᤇᤧ॥ 21 ᤂᤢᤏᤧ᤹ ᤔᤠᤱᤜᤡᤶ ᤋᤃᤠᤱᤒᤠ ᤀᤠ᤺ᤶᤓᤥ᤹ᤀᤥ ᤂᤧᤴ ᤏᤧᤳᤇᤡ ᤛᤡᤳᤗᤠᤱᤜᤠ᤹ ᤕᤧᤵᤛᤢ॥ ᤂᤢᤏᤧ᤹ ᤕᤥ ᤗᤠᤱᤃᤧᤴ ᤗᤧᤵᤔᤠᤱᤒᤠ ᤛᤡᤳᤗᤠᤱᤅᤡᤸᤗᤧ ᤁᤢᤔᤡᤱ ᤕᤠᤁᤡᤏ ᤘᤠ᤺ᤳᤋᤢ ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱᤒᤧᤸᤗᤧ ᤁᤢᤔᤡᤱ ᤒᤥᤀᤈ ᤘᤠ᤺ᤳᤋᤢ॥ 22 ᤂᤧᤸᤗᤧ ᤁᤢᤛᤶᤎᤠᤱᤒᤠ ᤛᤡᤳᤗᤠᤱ ᤔᤧ᤺ᤌ᤻ᤀᤥ ᤗᤧᤰᤘᤠ ᤑᤢᤱᤅᤡᤸᤗᤧ ᤁᤢᤀᤡᤳ ᤐᤳᤇᤧ॥ ᤁᤶᤓᤗ᤹ᤖᤡᤰ ᤛᤡᤳᤗᤠᤱᤜᤠ᤹ᤖᤧ ᤗᤠᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠ ᤆᤢᤖᤧᤖᤥ॥ ᤆᤫᤠ᤺ᤳ ᤕᤠᤱᤔᤠ ᤁᤠᤛᤠ ᤑᤛᤡ ( ᥈ ᤛᤠᤵᤔᤢ ᥊:᥈-᥋ ) 23 ᤜᤢᤖᤠᤔᤧᤸᤗᤧ ᤕᤥ᤺ᤶᤔᤏᤠᤒᤠ ᤁᤠᤛᤠᤗᤠᤶ ᤁᤠᤰᤐᤧᤵᤐᤠ ᤐᤕᤶ ᤕᤶᤒᤠ ᤑᤛᤡ ᤌᤡᤰ ᤆᤥᤃᤢ॥ ᤂᤧᤸᤗᤧ ᤁᤢᤃ᤺ᤱᤃᤩᤠᤴ ᤌᤡᤰ ᤁᤢᤕᤠᤀᤥᤗᤠᤶ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤌᤡᤒᤥᤱ ᤜᤢᤰᤛᤡᤰ ᤐᤳᤇᤧ. ᤂᤶᤓᤩᤠᤱ ᤂᤧᤴ ᤜᤢᤰᤛᤡᤰ ᤅᤠᤛᤡ ᤁᤣ᤺ᤶᤒᤠ ᤁᤢᤗᤡᤱᤃᤧᤴ ᤆᤥᤃᤧ॥ ᤂᤧᤸᤗᤧ ᤁᤒᤪᤡᤱ ᤁᤢᤛᤠᤵᤐᤥ᤺ᤰᤁᤧᤴ ᤛᤡ᤺ᤰᤔᤠᤖᤧ ᤗᤠᤃᤡ ᤜᤢᤰᤛᤡᤰ ᤛᤢᤶᤒᤥᤱᤒᤠ ᤌᤠᤰᤐᤠ ᤆᤠᤜᤠ ᤆᤥᤃᤧ॥ 24 ᤂᤧᤴ ᤐᤕᤶ ᤕᤶᤒᤠ ᤑᤛᤡ᤺ᤸᤗᤧ ᤁᤒᤪᤡᤱ ᤗᤠ᤺ᤰᤁᤠᤳ ᤗᤧᤵᤔᤠᤱ. ᤁᤢᤃ᤺ᤱᤃᤩᤠ᤺ᤸᤗᤧ ᤁᤢᤛᤡᤃᤠᤱ. ᤜᤢᤰᤛᤡᤰ ᤌᤡᤰᤁᤥ ᤌᤡᤒᤥᤱ ᤘᤛᤥ᤹ ᤑᤢᤱᤘᤠ᤺ᤳ. ᤁᤢᤍᤡ᤺ᤰᤗᤠ ᤏᤧᤳᤇᤡᤒᤠ ᤐᤳᤇᤧ॥ ᤑᤛᤡᤴ ᤏᤢ ᤘᤛᤥ᤹ ᤑᤢᤱᤘᤠ᤺ᤳᤋᤡᤴ ᤗᤳᤇᤠ ᤁᤢᤗᤧᤵ ᤁᤠᤛᤠᤗᤠᤶ ᤔᤧᤈᤥᤃᤢᤒᤠ ᤆᤥᤃᤧ॥ 25 ᤂᤧᤴ ᤑᤛᤡᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤛᤧᤃᤶᤒᤠ ᤐᤡᤳ ᤀᤡᤳᤗᤠᤜᤠ᤹ ᤛᤶᤎᤠᤱ ᤔᤧᤕᤢᤰᤂᤢᤀᤠᤱ ᤕᤢᤅᤧ. ᤛᤢᤶᤛᤡ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ. ᤛᤢᤶᤛᤡ ᤏᤠᤶᤎᤠ ᤐᤡᤛᤠᤱ ᤁᤧᤜᤡᤛᤡᤱᤒᤠ. ᤛᤢᤶᤛᤡ ᤗᤠᤱᤃᤧᤳ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤏᤢ ᤛᤢᤶᤛᤡ ᤏᤠᤱᤃᤧᤴ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤔᤧᤈᤥᤃᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤗᤧᤵᤔᤠᤱᤒᤠ ᤗᤰᤁᤡᤴ ᤛᤡᤃᤠᤱ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ॥ ᤂᤧᤴ ᤑᤛᤡᤴᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤅᤧ॥ 26 ᤂᤧᤴ ᤜᤢᤰᤋᤠᤵᤐᤣ ᤌᤡᤰ ᤕᤠᤖᤡᤰ ᤁᤧᤎᤢᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤃ᤺ᤱᤃᤩᤠᤴᤃ ᤆᤸᤗᤠᤱᤏᤠ ᤂᤥᤷᤕᤠ᤺ᤸᤗᤧ ᤁᤢᤃ᤺ᤱᤃᤩᤠᤴ ᤜᤧᤰᤁᤣ ᤁᤧᤓᤧᤰᤐᤠ ᤗᤧᤰᤘᤠ ᤑᤢᤱ ᤜᤧᤰᤋᤱᤒᤠ ᤆᤥᤃᤧ॥ ᤂᤧᤵᤔᤥ ᤜᤵᤔᤧᤴ ᥊᥊.᥆᥆᥆ ᤗᤡᤋᤖ ᤆᤫᤠ᤺ᤳ ᤜᤳᤋᤢᤖᤥ॥ ᤁᤠᤛᤠ ᤗᤠᤎᤠᤜᤠ᤹ 27 ᤜᤢᤖᤠᤔᤖᤧ ᤆᤫᤠ᤺ᤳ ᤕᤢᤱᤔᤠ ᤁᤠᤛᤠ᤺ᤸᤗᤧᤴ ᤌᤡᤒᤥᤱ ᤗᤠᤎᤠᤜᤠ᤹ᤀᤠᤱ ᤆᤥᤃᤢᤛᤡ॥ ᤁᤧᤖᤧᤰ ᤜᤢᤰᤛᤡᤰ ᤗᤡᤛᤡ ᤁᤣ᤺ᤶᤒᤠ ᤁᤢᤗᤠᤶᤋᤡ. ᤜᤢᤰᤛᤡᤰ ᤗᤡᤛᤡ ᤁᤢᤓᤧᤖᤧ ᤏᤢ ᤜᤢᤰᤛᤡᤰ ᤛᤢᤶᤛᤡ ᤁᤣ᤺ᤶᤒᤠ ᤁᤢᤗᤡᤱᤃᤧᤴ ᤆᤥᤃᤧ॥ 28 ᤂᤧᤸᤗᤧ ᤗᤠᤎᤠᤜᤠ᤹ ᤁᤶᤓᤗ᤹ᤖᤡᤰ ᤆᤥᤃᤢᤀᤠᤱ ᤘᤕᤧ—ᤂᤧᤵᤔᤥ ᤁᤒᤪᤡᤱ ᤐᤡᤛᤠᤱᤒᤠ ᤁᤢᤕᤠᤶᤗᤧᤱᤒᤥᤒᤠ ᤁᤢᤍᤰᤔᤠᤜᤠ᤹ᤀᤥ ᤗᤧᤵᤐᤧᤳ ᤗᤧᤵᤐᤧᤵᤐᤠ ᤂᤡᤵᤛᤢᤀᤠᤱ ᤐᤳᤇᤧ॥ 29 ᤗᤧᤵᤐᤧᤳ ᤗᤧᤵᤐᤧᤵᤐᤥ ᤏᤢ ᤋᤰᤐᤧᤳ ᤋᤰᤐᤧᤵᤐᤠᤀᤥ ᤂᤡᤖᤡᤱᤒᤠ. ᤐᤡᤳ ᤛᤧᤃᤶᤒᤠ ᤏᤢ ᤔᤠᤱᤗᤠᤀᤡᤱᤒᤠ ᤆᤀᤡ᤺ᤳᤜᤠ᤹ ᤆᤥᤃᤢᤀᤠᤱ ᤐᤳᤇᤧ॥ ᤂᤡᤖᤡᤱᤒᤠ. ᤐᤡᤳ ᤛᤧᤃᤶᤒᤠ ᤏᤢ ᤔᤠᤱᤗᤠᤀᤡᤱᤒᤠ ᤆᤀᤡ᤺ᤳᤜᤠ᤹ᤖᤧ ᤔᤢᤜᤠᤱ ᤗᤧᤵᤔᤠᤱ ᤏᤢ ᤌᤥᤜᤠᤱ ᤗᤧᤵᤔᤠᤱ ᤁᤒᤪᤡᤱ ᤀᤡᤘᤠ᤺ᤳ ᤁᤢᤀᤡᤛᤡᤰ ᤁᤧᤃᤡᤳᤇᤡᤱᤒᤠ ᤁᤢᤓᤢᤱ ᤗᤰᤋᤢᤀᤠᤱ ᤁᤧᤄᤧᤶᤛᤡᤱᤒᤠ ᤆᤥᤃᤢᤀᤠᤱ ᤐᤳᤇᤧ॥ 30 ᤗᤠᤎᤠ ᤌᤰᤔᤠ ᤁᤠᤛᤠ᤺ᤸᤗᤧᤴ ᤋᤰᤐᤧᤵᤐᤠ ᤏᤢ ᤁᤠᤛᤠ᤺ᤸᤗᤧᤴ ᤗᤡᤛᤡ ᤁᤠᤵᤗᤥ᤺ᤰᤜᤠ᤹ ᤐᤳᤇᤧ॥ ᤗᤠᤎᤠ᤺ᤸᤗᤧ ᤁᤢᤛᤢᤰᤐᤥ ᤆᤫᤠ᤺ᤳ ᤕᤠᤱᤔᤠ ᤑᤛᤡ᤺ᤸᤗᤧ ᤁᤢᤍᤰᤔᤠᤜᤠ᤹ ᤐᤳᤇᤧ॥ ᤁᤴ ᤁᤢᤍᤰᤔᤠᤜᤠ᤹ ᤁᤧᤓᤛᤡᤱᤒᤠ ᤑᤢᤱᤜᤠ᤹ᤖᤧ ᤁᤧᤄᤧᤶᤛᤡᤱᤒᤠ ᤆᤥᤃᤢᤀᤠᤱ ᤐᤳᤇᤧ॥ 31 ᤗᤠᤎᤠ᤺ᤸᤗᤧ ᤁᤢᤛᤶᤎᤠᤱ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤔᤢ ᤐᤠᤰᤗᤢᤶ ᤁᤧᤗ᤹ᤒᤠ ᤑᤛᤡ᤺ᤸᤗᤧ ᤁᤢᤕᤢᤰᤏᤠ ᤐᤳᤇᤧ. ᤂᤧᤵᤔᤥ ᤁᤒᤪᤡᤱ ᤁᤢᤓᤢᤱ ᤗᤰᤔᤏᤠᤒᤠ ᤐᤳᤇᤧ॥ ᤗᤠᤎᤠ᤺ᤸᤗᤧ ᤁᤢᤕᤠᤶᤗᤧᤱᤒᤠᤜᤠ᤹ᤀᤥ ᤁᤢᤛᤢᤰᤐᤠ ᤗᤡᤛᤡ ᤁᤧᤒᤵᤐᤠ ᤗᤧᤵᤐᤧᤳ ᤗᤧᤵᤐᤧᤵᤐᤠ ᤐᤳᤇᤧ ᤁᤠᤰᤐᤧᤵᤐᤠ ᤔᤧᤈᤥᤃᤧᤴ॥ 32 ᤂᤧᤴ ᤁᤧᤖᤧᤰ ᤗᤡᤛᤡ ᤁᤠᤵᤗᤥ᤺ᤰᤜᤠ᤹ ᤁᤢᤕᤠᤶᤗᤧᤱᤒᤠᤜᤠ᤹ᤀᤥᤒᤠ ᤗᤧᤵᤐᤧᤳ ᤗᤧᤵᤐᤧᤵᤐᤠᤜᤠ᤹ᤖᤧ ᤁᤢᤛᤡᤃᤠᤱ ᤐᤳᤇᤧ ᤁᤠᤵᤗᤥ᤺ᤰᤜᤠ᤹ᤖᤧ ᤁᤢᤀᤢ᤺ᤱᤔᤠᤜᤠ᤹ ᤗᤠᤎᤠ᤺ᤸᤗᤧ ᤁᤢᤍᤰᤔᤠᤜᤠ᤹ᤀᤥ ᤋᤢᤔᤧᤀᤠᤱ ᤐᤳᤇᤧ॥ ᤁᤧᤖᤧᤰ ᤁᤠᤵᤗᤥ᤺ᤰᤜᤠ᤹ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤕᤠᤖᤡᤰ ᤁᤣ᤺ᤶᤒᤠ ᤁᤢᤗᤡᤱᤃᤧᤴ ᤆᤥᤃᤧ॥ 33 ᤁᤠᤵᤗᤥ᤺ᤰᤜᤠ᤹ ᤀᤴᤗᤠᤎᤠ ᤁᤠᤵᤗᤥᤰ ᤜᤧᤰᤋᤱᤒᤠ ᤆᤥᤃᤧ. ᤂᤧᤸᤗᤧ ᤁᤢᤜᤱ. ᤁᤢᤃ᤺ᤱᤃᤩᤠ. ᤁᤢᤗᤡ᤺ᤱᤔᤠ. ᤁᤢᤎᤧᤵᤔᤠᤜᤠ᤹ ᤁᤧᤖᤧᤰ ᤕᤥ᤺ᤶᤔᤏᤠᤀᤠᤱ ᤆᤥ᤺ᤰᤔᤏᤠᤒᤠ ᤁᤠᤛᤠ᤺ᤸᤗᤧᤴ ᤘᤕᤧ॥ 34 ᤁᤧᤖᤧᤰ ᤗᤠᤎᤠᤜᤠ᤹ᤖᤧ ᤁᤢᤛᤢᤰᤐᤠ ᤌᤰᤔᤠ ᤁᤢᤍᤧᤶᤛᤡᤃᤣ᤺ᤰ ᤐᤳᤇᤧ ᤂᤧᤴ ᤁᤢᤍᤧᤶᤛᤡᤃᤣ᤺ᤰᤜᤠ᤹ ᤗᤠᤎᤠᤗᤠᤶᤒᤠᤀᤣ ᤆᤶᤒᤧᤳ ᤁᤧᤗ᤺ᤶᤒᤠ ᤁᤢᤗ᤺ᤵᤗᤠ ᤐᤳᤇᤧ॥ 35 ᤗᤠᤎᤠ᤺ᤸᤗᤧ ᤁᤢᤛᤶᤎᤠᤱ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤔᤢ ᤐᤠᤰᤗᤢᤶ ᤁᤧᤗ᤹ᤒᤠ ᤑᤛᤡ᤺ᤸᤗᤧ ᤁᤢᤕᤢᤰᤏᤠ ᤐᤳᤇᤧ॥ ᤗᤧᤵᤐᤧᤳ ᤗᤧᤵᤐᤧᤵᤐᤠᤜᤠ᤹ ᤜᤧᤰᤁᤩᤠᤱ ᤁᤢᤍᤰᤔᤠᤜᤠ᤹ ᤗᤠᤎᤠ᤺ᤴᤏᤢ ᤗᤳᤇᤠ ᤁᤢᤗ᤺ᤵᤗᤠᤗᤠᤶ ᤔᤧᤈᤥᤃᤢᤒᤠ ᤆᤥᤃᤧ॥ 36 ᤜᤢᤖᤠᤔᤧᤸᤗᤧ ᤁᤖᤢᤒᤜᤠ᤹. ᤂᤡᤖᤡᤱᤒᤠᤜᤠ᤹ ᤏᤢ ᤂᤧᤒᤰᤛᤡᤱᤜᤠ᤹ ᤗᤧᤵᤐᤧᤳ ᤗᤧᤵᤐᤧᤳᤐᤠ ᤁᤢᤕᤠᤶᤗᤧᤱᤒᤠᤜᤠ᤹ᤀᤥ ᤏᤢ ᤋᤰᤐᤧᤵᤐᤠ ᤁᤢᤍᤰᤔᤠᤜᤠ᤹ᤀᤥ ᤁᤢᤄᤠᤗᤧᤶᤒᤠᤍᤧᤴ ᤁᤧᤒᤵᤐᤠ ᤁᤧᤖᤧᤰᤁᤥ ᤁᤢᤓᤢᤱ ᤗᤰᤋᤢ॥ 37 ᤁᤶᤓᤗ᤹ᤖᤡᤰᤁᤣ ᤂᤢᤏᤧ᤹ ᤂᤧᤴ ᤌᤡᤒᤥᤱ ᤁᤧᤗᤥ᤺ᤰᤐᤠ ᤁᤠᤛᤠ ᤗᤠᤎᤠᤜᤠ᤹ ᤆᤥᤃᤢ॥ ᤂᤧᤱᤜᤠ᤹ ᤁᤧᤖᤧᤰ ᤗᤳᤇᤠ ᤁᤢᤛᤡ᤺ᤰᤔᤠ ᤏᤢ ᤗᤳᤇᤠ ᤐᤖᤡᤰᤗᤧ ᤁᤢᤍᤱᤒᤠ ᤁᤢᤕᤥ᤺ᤶᤔᤠᤀᤥ ᤔᤧᤕᤠᤰᤋᤢᤀᤠᤱ ᤔᤧᤈᤥᤃᤢᤒᤠ ᤆᤥᤃᤧ॥ 38 ᤂᤧᤴ ᤀᤣᤃᤠᤱ ᤜᤢᤖᤠᤔᤧᤸᤗᤧ ᤌᤡᤒᤥᤱ ᤁᤠᤛᤠ ᤑᤛᤡᤜᤠ᤹ ᤌᤃᤢ॥ ᤁᤧᤖᤧᤰ ᥎᥎᥆ ᤗᤡᤋᤖ ᤆᤫᤠ᤺ᤳ ᤁᤧᤜᤵᤐᤠ ᤏᤢ ᤛᤡ᤺ᤰᤔᤧᤸᤗᤧ ᤜᤢᤰᤛᤡᤰ ᤗᤡᤛᤡ ᤁᤢᤍᤱᤒᤠ ᤆᤥᤃᤧ॥ ᤂᤧᤴ ᤌᤡᤒᤥᤱ ᤁᤧᤗᤥ᤺ᤰᤐᤠ ᤁᤠᤵᤗᤥᤰ ᤗᤠᤎᤠ᤺ᤸᤗᤧ ᤗᤠᤃᤡ ᤗᤳᤇᤠ ᤗᤳᤇᤠ ᤑᤛᤡ ᤕᤢᤅᤧ॥ 39 ᤂᤢᤏᤧ᤹ ᤅᤠᤛᤡ ᤁᤧᤗᤥ᤺ᤰᤐᤧᤸᤗᤧ ᤗᤠᤎᤠᤜᤠ᤹ ᤔᤠᤱᤜᤡᤶ ᤕᤥᤜᤠᤱ ᤗᤧᤵᤔᤠᤱ ᤏᤢ ᤅᤠᤛᤡ ᤌᤥᤜᤠᤱ ᤗᤧᤵᤔᤠᤱ ᤕᤢᤰᤂᤢ॥ ᤜᤧᤰᤁᤩᤠᤱ ᤆᤫᤠ᤺ᤳ ᤕᤠᤱᤔᤠ ᤕᤶᤒᤠ ᤑᤛᤡᤴ ᤔᤠᤱᤜᤡᤶ ᤗᤠᤱᤃᤧᤳ ᤗᤧᤵᤔᤠᤱ. ᤗᤠᤱᤃᤧᤳ-ᤏᤠᤶᤃᤧᤳᤐᤠ ᤁᤢᤛᤢᤰᤐᤥ ᤕᤢᤰᤂᤢᤖᤥ॥ ᤔᤠᤱᤜᤡᤶᤔᤥᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ᤖᤧ ᤁᤢᤔᤡᤱ ( ᥈ ᤛᤠᤵᤔᤢ ᥊:᥇᥇–᥋:᥇ ) 40 ᤜᤢᤖᤠᤔᤧᤸᤗᤧ ᤇᤧ᤺ᤱᤃᤩᤠ ᤏᤢ ᤁᤠ᤺ᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹ ᤌᤃᤢ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤘᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤁᤢᤗᤰᤐᤧᤴᤏᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤆᤥᤃᤢ ᤛᤢᤖᤢᤖᤥ— 41 ᤏᤧᤳᤇᤡ ᤛᤡᤳᤗᤠᤱᤜᤠ᤹. ᤛᤡᤳᤗᤠᤱᤅᤡᤸᤗᤧ ᤁᤢᤛᤶᤔᤥ ᤆᤸᤗᤠᤱᤏᤠ ᤂᤥᤷᤕᤠ ᤁᤢᤛᤡᤱᤒᤠ ᤏᤧᤳᤇᤡ ᤛᤡᤗᤠᤱ ᤔᤧ᤺ᤌᤜᤠ᤹. ᤛᤡᤳᤗᤠᤱ ᤛᤶᤎᤠᤱᤒᤠ ᤛᤡᤳᤗᤠᤱ ᤔᤧ᤺ᤌᤜᤠ᤹ᤖᤧ ᤁᤢᤄᤧᤶᤛᤡᤱᤔᤠ ᤑᤢᤱ ᤗᤰᤔᤏᤠᤒᤠ ᤏᤧᤳᤇᤡ ᤆᤡᤳᤗᤡᤱᤃᤣ᤹ᤜᤠ᤹. 42 ᤏᤧᤳᤇᤡ ᤆᤡᤳᤗᤡᤱᤃᤣ᤹ᤜᤠ᤹ᤖᤧ ᤗᤠᤃᤡ ᤁᤡᤵ ᤗᤡᤛᤡ ᤑᤢ᤹ᤗᤧᤛᤣ᤹ᤜᤠ᤹ (ᤏᤧᤳᤇᤡ ᤛᤡᤳᤗᤠᤱᤜᤠ᤹ᤀᤥᤒᤠ ᤆᤸᤗᤠᤱᤏᤠ ᤂᤥᤷᤕᤠ ᤁᤢᤛᤡᤱᤒᤠ ᤛᤡᤳᤗᤠᤱᤅᤡᤸᤗᤧ ᤁᤢᤛᤶᤔᤡᤴ ᤁᤧᤍᤧᤵᤐᤠ ᤁᤧᤖᤧᤰ ᤆᤡᤳᤗᤡᤱᤃᤣ᤺ᤸᤗᤧ ᤗᤠᤃᤡ ᤁᤢᤍᤡ᤺ᤰᤗᤠ ᤏᤧᤳᤇᤡ ᤑᤢ᤹ᤗᤧᤛᤣ᤹ᤜᤠ᤹). 43 ᤌᤡᤒᤥᤱ ᤗᤠᤎᤠᤜᤠ᤹. ᤂᤧᤴᤏᤢ ᤛᤥᤛᤥᤖᤡᤰ ᤌᤡᤒᤥᤱ ᤇᤧ᤺ᤱᤃᤩᤠᤜᤠ᤹. 44 ᤗᤳᤇᤠ ᤐᤕᤶ ᤕᤶᤒᤠ ᤑᤛᤡ ᤏᤢ ᤂᤧᤸᤗᤧ ᤔᤢ ᤁᤢᤛᤡᤃᤠᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤐᤡᤳ ᤛᤧᤃᤶᤒᤠᤜᤠ᤹. 45 ᤂᤵᤐᤩᤠᤜᤠ᤹. ᤁᤠ᤺ᤱᤜᤠ᤹ ᤏᤢ ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹॥ ᤁᤴ ᤁᤧᤖᤧᤰ ᤛᤠᤔᤠᤜᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤴ ᤜᤢᤖᤠᤔᤧᤸᤗᤧ ᤆᤥᤃᤢᤀᤠᤱ ᤘᤕᤧ. ᤂᤧᤱᤜᤠ᤹ ᤋᤡᤸᤗᤧᤰ ᤋᤡᤸᤗᤧᤰ ᤀᤡ᤺ᤱᤔᤏᤠᤒᤠ ᤁᤠᤛᤠ ᤘᤕᤧ॥ 46 ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤕᤷᤍᤏᤒᤠ ᤏᤧᤏᤧᤒᤠᤍᤧᤴ ᤛᤢᤰᤁᤥᤋ ᤏᤢ ᤛᤠᤷᤋᤠᤏ ᤁᤢᤗᤢᤶᤔᤥ ᤁᤢᤕᤥ᤺ᤶᤔᤥ ᤂᤠᤶᤔᤥ ᤕᤥ᤺ᤶᤔᤠᤀᤠᤱ ᤆᤥ᤺ᤰᤔᤠ ᤐᤠᤱᤄᤢᤛᤡᤀᤠᤱ ᤘᤕᤧ॥ 47 ᤛᤥᤗᤥᤔᤏᤖᤧ ᤛᤠ᤹ᤖᤡᤰ ᤕᤖᤡᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤆᤥᤃᤢᤛᤡ. ᤂᤧᤱᤜᤠ᤹ ᤔᤧᤴᤎᤠᤱᤛᤡᤱᤅᤧ ᤕᤢᤰᤂᤢᤛᤡ॥ ᤂᤧᤴ ᤆᤥᤃᤢᤛᤡᤒᤠ ᤛᤠᤔᤠᤜᤠ᤹ᤖᤧ ᤗᤠᤃᤡ ᤁᤠᤛᤠᤴ ᤌᤠᤱᤔᤠ ᤏᤡ᤺ᤴᤎᤥ ᤔᤧᤒᤥ᤺ᤰᤂᤧᤴ॥ 48 ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤁᤧᤖᤧᤰ ᤛᤠᤔᤠᤐᤢᤔᤠᤜᤠ᤹ᤀᤠᤱ ᤆᤥᤃᤢᤖᤥ— ᤛᤠᤶᤔᤩᤠᤱᤅᤡᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤣᤛᤣ ᤂᤖᤧ᤺ᤱ ᤏᤧᤔᤠ ᤛᤠᤶᤔᤩᤠᤱ ᤆᤵᤋᤧᤴ. 49 ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤛᤣᤔᤡᤕᤢᤱᤍᤧᤴ (ᤛᤡᤃᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤍᤃᤡ ᤆᤢᤰᤘᤠ ᤗᤧᤵᤛᤠᤱ ᤅᤠᤛᤡ ᤏᤢ ᤑᤧᤱᤘᤠ ᤗᤧᤵᤛᤠᤱ ᤅᤠᤛᤡ). ᤑᤢᤱ ᤁᤢᤛᤡᤱᤒᤠ ᤛᤠᤶᤔᤩᤠᤱ ᤁᤢᤓᤢᤱ ᤗᤰᤔᤏᤠᤒᤠᤜᤠ᤹. ᤛᤣᤔᤡᤜᤠ᤹ ᤏᤢ ᤗᤠᤓᤡ᤺ᤳᤜᤠ᤹. 50 ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤂᤵᤐᤩᤠᤜᤠ᤹. ᤛᤣᤔᤡ ᤜᤠ᤺ᤶᤔᤠ ᤗᤠᤓᤡ᤺ᤳᤜᤠ᤹. ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹. ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤏᤢ ᤛᤠᤱᤋᤧᤖᤧ᤺ᤱᤜᤠ᤹. ᤁᤧᤖᤧᤰᤏᤢ᤺ᤸᤗᤧ ᤛᤡᤃᤠᤱᤒᤠ ᤕᤠᤰᤑᤠᤱ ᤀᤡᤃᤪ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ᤖᤧ ᤗᤠᤃᤡ ᤏᤢ ᤔᤠᤱᤜᤡᤶᤔᤥᤒᤠ ᤁᤢᤗᤢᤶ ᤆᤢᤶᤗᤢᤱ ᤆᤥ᤺ᤰᤔᤠ ᤕᤠᤰᤑᤠᤱᤅᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ᤖᤧ ᤗᤠᤃᤡ ᤛᤠᤶᤔᤩᤠᤱ ᤂᤵᤐᤠᤜᤠ᤹॥ 51 ᤀᤠᤸᤗ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤛᤢᤖᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤋᤥ᤺ᤴᤍᤢᤒᤠ ᤐᤠ᤺ᤴᤜᤠ᤹. ᤀᤡᤃᤪ ᤕᤢᤵᤐᤠ. ᤛᤠᤶᤔᤩᤠᤱ ᤏᤢ ᤁᤢᤄᤧᤶᤛᤡᤱᤔᤠ ᤆᤡᤃᤰᤘᤠᤜᤠ᤹ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤌᤠ᤺ᤱᤅᤥ ᤕᤢᤰᤂᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.