᥇ ᤜᤠᤱ 6 - LIFOTNTᤛᤥᤗᤥᤔᤏᤖᤧ ᤔᤠᤱᤜᤡᤶ ᤆᤥᤃᤢ 1 ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤒᤠ ᥊᥎᥆ ᤋᤱᤒᤣᤀᤥ. ᤛᤥᤗᤥᤔᤏᤖᤧ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤈᤡᤓ. ᤀᤡᤃᤪ ᤏᤡᤛᤡᤃᤣᤰᤐᤠ ᤗᤠᤀᤥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥ᤺ᤰᤔᤠ ᤜᤣ᤺ᤰᤋᤢ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤆᤥᤃᤢᤒᤠ ᤔᤠᤱᤜᤡᤶᤔᤧᤸᤗᤧ ᤁᤢᤗᤠᤶᤋᤡ ᤋᤢᤰᤐᤥᤱ ᤜᤢᤰᤛᤡᤰ. ᤁᤢᤓᤧᤖᤧ ᤏᤡᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ ᤜᤧᤰᤁᤩᤠᤱ ᤛᤢᤶᤒᤥᤱ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤐᤳᤇᤧ॥ 3 ᤔᤠᤱᤜᤡᤶ ᤗᤢᤶᤔᤥᤒᤠ ᤕᤶᤒᤠ ᤆᤢᤶᤗᤢᤱ ᤆᤥ᤺ᤰᤔᤠ ᤕᤠᤰᤑᤠᤱ ᤋᤃᤠᤱᤒᤠ ᤗᤰᤂᤢᤶᤔᤡᤴ ᤔᤠᤱᤜᤡᤶᤔᤡᤸᤗᤧ ᤁᤢᤓᤧᤖᤧ ᤂᤠᤖᤠᤰ ᤐᤥᤖᤧᤀᤠᤱ ᤏᤧᤛ᤻ᤛᤧ. ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥ ᤔᤠᤱᤜᤡᤶ ᤋᤃᤠᤱ ᤗᤧᤵᤔᤠᤱ ᤂᤧᤴ ᤌᤡᤒᤥᤱ ᤜᤢᤰᤛᤡᤰ ᤌᤧᤶᤒᤠ ᤗ᤺ᤴᤍᤧᤀᤠᤱ ᤏᤧᤛ᤻ᤛᤧ॥ 4 ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤂᤠᤶᤒᤢ ᤛᤡᤃᤠᤱ ᤆᤡᤓᤡ᤹ᤑᤡ᤹ᤒᤠ ᤐᤣᤎᤠ᤺ᤵᤜᤠ᤹ ᤆᤠᤱᤈᤠᤱ ᤑᤳᤇᤢ॥ 5 ᤁᤢᤗᤢᤶᤔᤥᤒᤠ ᤕᤶᤒᤠ ᤕᤠᤰᤑᤠᤱ ᤏᤢ ᤛᤡᤃᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤂᤧᤴ ᤜᤡᤶᤔᤥᤒᤠ ᤁᤧᤖᤧᤰ ᤐᤡᤛᤠᤱ ᤗᤢᤱᤎᤠᤰᤁᤡᤴᤏᤢ ᤛᤥᤖᤡᤰ ᤆᤰᤔᤏᤠᤒᤠ ᤕᤠᤰᤑᤠᤱᤜᤠ᤹ ᤆᤥᤃᤢ॥ 6 ᤁᤧᤖᤧᤰᤏᤢ᤺ᤸᤗᤧ ᤁᤢᤛᤡ᤺ᤰᤋᤥᤒᤠ ᤁᤢᤍᤠ᤺ᤳᤗᤠ᤺ᤸᤗᤧ ᤁᤢᤓᤧᤖᤧᤴ ᤜᤢᤰᤛᤡᤰ ᤅᤠᤛᤡ ᤏᤧᤛ᤻ᤛᤧ॥ ᤁᤢᤗᤢᤶᤔᤥᤒᤠ ᤁᤢᤍᤠ᤺ᤳᤗᤠ᤺ᤸᤗᤧ ᤁᤢᤓᤧᤖᤧᤴ ᤜᤢᤰᤛᤡᤰ ᤋᤢᤰᤛᤡ ᤏᤢ ᤛᤢᤶᤛᤡᤃᤣᤰᤐᤠ ᤁᤢᤍᤠ᤺ᤳᤗᤠᤴ ᤜᤢᤰᤛᤡᤰ ᤏᤢᤛᤡ ᤏᤧᤛ᤻ᤛᤧ॥ ᤂᤢᤏᤧ᤹ ᤔᤠᤱᤜᤡᤶ ᤁᤧᤖᤧᤰ ᤐᤡᤛᤠᤱ ᤐᤧᤖᤧᤶᤛᤡᤱᤜᤠ᤹ ᤋᤠ᤹ᤖᤢᤀᤠᤱ ᤗᤠ᤺ᤰᤁᤠᤳ ᤗᤧᤵᤔᤠᤱ ᤔᤠᤱᤜᤡᤶᤔᤥᤒᤠ ᤗᤢᤱᤎᤠᤰᤁᤥ ᤌᤣᤀᤠᤱ ᤔᤧᤴᤜᤥ᤺ᤶᤔᤣ ᤕᤠᤰᤑᤠᤱᤜᤠ᤹ ᤆᤰᤋᤢᤀᤠᤱ ᤗ᤺ᤳᤋᤢ॥ 7 ᤔᤠᤱᤜᤡᤶ ᤔᤧᤈᤥᤃᤢᤸᤗᤧ ᤗᤢᤱ ᤐᤢᤴᤏᤠᤀᤥᤀᤣ ᤕᤠᤖᤡᤵ ᤔᤧᤈᤥᤃᤢ ᤔᤧᤄᤰᤋᤢᤒᤠ ᤗᤢᤱᤜᤠ᤹ᤖᤰ ᤔᤧᤛᤧᤳᤋᤢ॥ ᤌᤘᤠ ᤀᤡᤃᤪ ᤗᤢᤱᤄᤧ᤺ᤵᤔᤠ ᤀᤡᤃᤪ ᤀᤠᤳᤋᤡᤴ ᤐᤖᤡᤰᤐᤠ ᤑᤧᤴᤈᤣ᤹ ᤛᤠᤔᤠᤜᤠ᤹ᤖᤧ ᤗᤥ᤺ᤰᤂᤢᤒᤧᤴᤏᤠᤱ ᤔᤠᤱᤜᤡᤶ ᤆᤥ᤺ᤰᤔᤠᤍᤧᤴᤏᤥ ᤂᤧᤶᤔᤧᤍᤧᤳᤋᤧᤴ॥ 8 ᤁᤧᤖᤧᤰᤏᤢ᤺ᤸᤗᤧ ᤔᤢ᤺ᤛᤔᤠ ᤁᤢᤍᤠ᤺ᤳᤗᤠᤀᤥᤒᤠ ᤗᤠᤶᤎᤣ᤺ᤳᤋᤡᤴ ᤔᤠᤱᤜᤡᤶ ᤕᤥᤜᤠᤱ ᤗᤠᤱᤃᤧᤳ ᤐᤡᤛᤠᤱ ᤐᤳᤇᤧ॥ ᤂᤧᤵᤔᤥᤗᤠᤶ ᤁᤢᤗᤢᤶᤔᤥ ᤏᤢ ᤌᤥᤛᤔᤠ ᤁᤢᤍᤠ᤺ᤳᤗᤠᤀᤥ ᤐᤣ᤺ᤰᤔᤠᤖᤧ ᤗᤠᤃᤡ ᤏᤠᤜᤠᤱᤛᤣᤰ ᤐᤳᤇᤧ॥ 9 ᤁᤶᤓᤗ᤹ᤖᤡᤰ ᤐᤧᤖᤧᤶᤛᤡᤱ ᤏᤢ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤜᤠ᤹ᤗᤠᤶ ᤂᤧᤸᤗᤧ ᤁᤢᤄᤠᤵᤔᤠ ᤂᤠᤶᤒᤢ ᤆᤥᤃᤢᤀᤠᤱ ᤂᤢᤏᤧ᤹ ᤔᤠᤱᤜᤡᤶ ᤆᤥ᤺ᤰᤔᤠ ᤛᤢᤖᤢ॥ 10 ᤂᤢᤏᤧ᤹ ᤔᤠᤱᤜᤡᤶ ᤁᤧᤖᤧᤰ ᤐᤡᤛᤠᤱ ᤆᤢᤈᤢᤰᤛᤠ ᤕᤠᤰᤑᤠᤱᤜᤠ᤹ ᤆᤥᤃᤢ॥ ᤁᤧᤖᤧᤰ ᤕᤠᤰᤑᤠᤱᤜᤠ᤹ ᤜᤢᤰᤛᤡᤰ ᤅᤠᤛᤡ ᤁᤣ᤺ᤶᤒᤠ ᤁᤢᤗᤡᤱᤃᤧᤴ ᤆᤥᤃᤧ. ᤜᤧᤰᤁᤩᤠᤱ ᤔᤠᤱᤜᤡᤶᤔᤡᤴᤏᤢ ᤛᤥᤖᤡᤰ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤜᤠ᤹ ᤆᤰᤛᤡᤱᤅᤠᤱ ᤐᤳᤇᤧ॥ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤛᤥᤗᤥᤔᤏᤀᤥ ᤕᤧᤖᤥ— 12 “ᤂᤧᤏᤧ᤹ ᤁᤧᤈᤥᤃᤢᤖ ᤁᤧᤕᤠᤰᤐᤠ ᤁᤴ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤀᤰᤂᤣ ᤐᤥᤱ᤹. ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤂᤧᤏᤧ᤹ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤀᤠᤎᤡᤶᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤈᤥᤃᤢ᤹. ᤂᤶᤓᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤁᤧᤍᤡᤶᤍᤢ ᤁᤧᤏᤠ᤺ᤳᤋᤢᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤒᤠᤏᤢ ᤆᤥᤃᤢᤱᤅᤠᤱ ᤘᤕᤧᤒᤠ ᤂᤧᤴ ᤀᤠᤔᤠᤱᤜᤢᤵᤐᤡᤴ ᤂᤧᤏᤧ᤹ᤗᤠᤶ ᤀᤠᤱᤃᤠ᤹ ᤁᤧᤳᤋᤢᤱ᤹॥ 13 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤘᤠ᤹ᤀᤠ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤗᤠᤵᤔᤧᤓᤢᤛᤢᤱᤛᤡᤱᤅᤡᤴᤗᤥ॥” ᤔᤠᤱᤜᤡᤶᤔᤥᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ ( ᥈ ᤛᤠᤵᤔᤢ ᥉:᥎-᥇᥊ ) 14 ᤁᤶᤓᤗ᤹ᤖᤡᤰ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥᤃᤢ ᤛᤢᤖᤢ॥ 15 ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤗᤢᤱᤎᤠᤰᤁᤡᤴ ᤛᤡᤃᤠᤱ ᤗᤧᤵᤔᤠᤱ ᤂᤠᤶᤒᤠᤱᤅᤥᤗᤠᤶ ᤐᤧᤖᤧᤶᤛᤡᤱᤜᤠ᤹ ᤌᤠᤖᤡᤰ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤜᤠ᤹ ᤋᤱᤄᤢᤀᤠᤱ ᤂᤡᤵᤛᤢ ᤜᤧᤰᤁᤩᤠᤱ ᤀᤠ᤺ᤱ ᤛᤡᤱᤓᤧᤸᤗᤧᤰᤜᤠ᤹ᤖᤧ ᤂᤠᤶᤒᤠᤱᤅᤡᤴ ᤋᤧᤵᤋᤢ॥ 16 ᤔᤠᤱᤜᤡᤶ ᤛᤡᤃᤠᤱ ᤀᤣᤃᤠᤱ ᤗᤧᤵᤔᤠᤱ ᤂᤢᤏᤧ᤹ ᤂᤠᤶᤒᤠᤱᤅᤥᤗᤠᤶ ᤐᤧᤖᤧᤶᤛᤡᤱᤅᤥ ᤌᤠᤖᤡᤰ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤜᤠ᤹ ᤋᤱᤄᤢᤀᤠᤱ ᤏᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤛᤡᤃᤠᤱ ᤛᤣᤛᤣᤍᤧᤴ. ᤀᤡᤃᤪ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤛᤣᤛᤣᤍᤧᤴ ᤆᤥᤃᤢ॥ 17 ᤂᤧᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤁᤢᤗᤢᤶᤔᤥᤒᤠ ᤆᤢᤶᤗᤢᤱ ᤕᤠᤰᤑᤠᤱᤅᤡᤴ ᤗᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤏᤧᤛ᤻ᤛᤧ॥ 18 ᤔᤠᤱᤜᤡᤶᤔᤥᤒᤠ ᤛᤡᤃᤠᤱ ᤗᤧᤵᤔᤠᤱᤒᤠ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤁᤥᤃ ᤁᤧᤓᤧᤰᤐᤠ ᤑᤢᤱᤜᤠ᤹ ᤏᤢ ᤘᤛᤥ᤹ ᤑᤢᤱᤘᤠ᤺ᤳᤜᤠ᤹ᤖᤧ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ॥ ᤂᤧᤱᤜᤠ᤹ ᤁᤧᤖᤧᤰ ᤛᤠᤶᤔᤠᤱᤛᤡᤱᤗᤧᤴ ᤐᤳᤇᤧ॥ ᤗᤢᤱ ᤗᤳᤇᤠᤀᤠᤱ ᤏᤡᤔᤧᤎᤠᤒᤧᤴ॥ 19 ᤔᤠᤱᤜᤡᤶᤔᤥᤒᤠ ᤛᤡᤃᤠᤱ ᤗᤧᤵᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤢᤱᤔᤠᤖᤥ ᤗᤠᤃᤡ ᤂᤢᤏᤧ᤹ ᤛᤡᤃᤠᤱ ᤛᤣᤛᤣᤍᤧᤴ ᤕᤠᤖᤡᤵ ᤆᤥᤃᤢ॥ 20 ᤁᤴ ᤛᤡᤃᤠᤱ ᤛᤣᤛᤣᤍᤧᤴᤏᤡᤴ ᤏᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ. ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤢ ᤏᤡᤒᤥᤱ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧ॥ ᤂᤢᤏᤧ᤹ ᤂᤧᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ ᤜᤧᤰᤁᤩᤠᤱ ᤛᤠᤶᤔᤠᤱᤛᤡᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤠᤱ ᤛᤢ᤺ᤵᤋᤢ॥ 21 ᤛᤥᤗᤥᤔᤏᤖᤧ ᤔᤠᤱᤜᤡᤶᤔᤥᤒᤠ ᤛᤡᤃᤠᤱ ᤁᤢᤗᤰᤁᤡᤴ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ. ᤜᤧᤰᤁᤩᤠᤱ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤛᤡᤃᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤍᤃᤡ ᤂᤢᤏᤧ᤹ ᤛᤠᤶᤔᤩᤠᤱ ᤛᤡᤰᤁᤪᤡᤜᤠ᤹ ᤑᤥ᤺ᤴᤍᤢᤀᤠᤱ ᤑᤥᤛᤢ॥ 22 ᤁᤶᤓᤗ᤹ᤖᤡᤰ ᤂᤢᤏᤧ᤹ ᤛᤡᤃᤠᤱᤒᤠ ᤁᤢᤗᤰᤁᤡᤴ ᤁᤧᤖᤧᤰ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥ ᤛᤡᤃᤠᤱ ᤛᤣᤛᤣᤍᤧᤴᤏᤥ ᤁᤧᤕᤢᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤠᤱ ᤂᤢᤏᤧ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥ 23 ᤛᤡᤃᤠᤱ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤠᤍᤧᤴᤏᤥ ᤂᤢᤏᤧ᤹ ᤆᤤᤋᤢᤏ ᤛᤡᤱᤗᤠᤶ ᤏᤧᤳᤇᤡ ᤁᤖᤢᤒ ᤆᤥᤃᤢᤛᤡ॥ ᤁᤖᤢᤒ ᤏᤧᤵᤔᤠᤱ ᤌᤡᤒᤥᤱ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧᤛᤡ॥ 24 ᤌᤡᤰᤛᤡᤃᤣᤰᤐᤠ ᤁᤖᤢᤒᤖᤧ ᤗᤳᤇᤠ ᤁᤢᤗᤠᤵᤐᤡᤴ ᤜᤢᤰᤛᤡᤰ ᤅᤠᤛᤡ ᤁᤣ᤺ᤶᤒᤠ ᤐᤳᤇᤧ ᤜᤧᤰᤁᤩᤠᤱ ᤘᤣ᤹ᤀᤡᤸᤗᤧᤴᤏᤠᤱ ᤜᤢᤰᤛᤡᤰ ᤅᤠᤛᤡ ᤁᤣ᤺ᤶᤒᤠ ᤐᤳᤇᤧ॥ ᤗᤳᤇᤠ ᤁᤢᤗᤠᤵᤐᤡᤸᤗᤧ ᤁᤢᤛᤶᤔᤥᤗᤠᤶ ᤘᤣ᤹ᤛᤔᤠ ᤁᤢᤗᤠᤵᤐᤡᤸᤗᤧ ᤁᤢᤛᤶᤔᤥ ᤌᤠᤖᤡᤰ ᤌᤡᤒᤥᤱ ᤜᤢᤰᤛᤡᤰ ᤐᤳᤇᤧ॥ 25 ᤏᤡᤛᤡᤃᤣᤰᤐᤠ ᤁᤖᤢᤒᤖᤧ ᤁᤢᤛᤡ᤺ᤰᤔᤧᤴᤏᤠᤱ ᤌᤡᤒᤥᤱ ᤜᤢᤰᤛᤡᤰ ᤐᤳᤇᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤧᤳᤇᤡ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤌᤰ ᤏᤢ ᤑᤧᤖᤧ ᤗᤠᤶᤋᤡᤜᤠ᤹ ᤗᤳᤇᤠ ᤐᤖᤡᤰᤐᤠ ᤆᤥᤃᤧ॥ 26 ᤁᤖᤢᤒ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤗᤡᤱᤃᤧᤴᤏᤡᤴ ᤌᤡᤒᤥᤱ ᤜᤢᤰᤛᤡᤰ ᤐᤳᤇᤧ॥ 27 ᤂᤢᤏᤧ᤹ ᤂᤧᤴ ᤁᤖᤢᤒᤜᤠ᤹ ᤔᤠᤱᤜᤡᤶᤔᤥᤒᤠ ᤛᤡᤃᤠᤱ ᤕᤠᤰᤑᤠᤱᤅᤥ ᤕᤢᤰᤂᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ᤃ ᤗᤠ᤺ᤰᤁᤠᤳ ᤗᤧᤵᤔᤠᤱ ᤜᤵᤑᤧ ᤗ᤹ᤖᤧᤀᤠᤱ ᤐᤳᤇᤧ॥ ᤗᤳᤇᤠ ᤁᤖᤢᤒᤖᤧ ᤁᤢᤗᤠᤵ ᤌᤡᤰᤗᤧ ᤘᤣ᤹ ᤗᤧᤵᤔᤠᤱᤒᤠ ᤗᤢᤱᤎᤠᤰᤁᤡᤴ ᤏᤢ ᤘᤣ᤹ ᤁᤖᤢᤒᤖᤧ ᤁᤢᤗᤠᤵ ᤌᤡᤰᤗᤧ ᤘᤣ᤹ ᤗᤧᤵᤔᤠᤱᤒᤠ ᤗᤢᤱᤎᤠᤰᤁᤡᤴ ᤛᤢᤛᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤘᤣ᤹ ᤗᤠᤵᤜᤠ᤹ᤖᤧᤃ ᤕᤠᤰᤑᤠᤱᤅᤡᤸᤗᤧ ᤁᤢᤗᤢᤶᤔᤥ ᤛᤢᤛᤢᤀᤠᤱ ᤐᤳᤇᤧ॥ 28 ᤂᤢᤏᤧ᤹ ᤂᤧᤴ ᤏᤧᤵᤑᤢ ᤁᤖᤢᤒᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢᤛᤡ॥ 29 ᤔᤠᤱᤜᤡᤶᤔᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤕᤠᤰᤑᤠᤱᤜᤠ᤹ᤀᤥᤒᤠ ᤁᤧᤖᤧᤰ ᤗᤢᤱᤎᤠᤰᤜᤠ᤹ᤀᤥ ᤂᤢᤏᤧ᤹ ᤁᤖᤢᤒᤜᤠ᤹. ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤢᤱᤜᤠ᤹ ᤏᤢ ᤁᤧᤓᤧᤰᤐᤠ ᤑᤢᤱᤜᤠ᤹ ᤁᤢᤓᤢᤱ ᤗᤰᤋᤢᤀᤠᤱ ᤆᤥᤃᤢ॥ 30 ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤏᤧᤵᤔᤠᤱ ᤕᤠᤰᤑᤠᤱᤜᤠ᤹ᤀᤥᤒᤠ ᤂᤠᤶᤒᤠᤱᤅᤡᤴᤏᤠᤱ ᤛᤠᤶᤔᤩᤠᤱᤅᤡᤸᤗᤧ ᤐᤴᤇᤢ॥ 31 ᤛᤡᤃᤠᤱᤒᤠ ᤛᤣᤛᤣᤍᤧᤴᤏᤥ ᤗᤠ᤺ᤵᤔᤠ ᤗᤠᤶᤎᤣᤳ ᤂᤧᤸᤗᤧᤰᤜᤠ᤹ ᤆᤤᤋᤢᤏ ᤛᤡᤱᤅᤡᤸᤗᤧᤴ ᤆᤥᤃᤢ ᤜᤧᤰᤁᤩᤠᤱ ᤂᤢᤏᤧ᤹ ᤅᤠᤛᤡ ᤁᤢᤎᤠ᤹ᤁᤢᤎᤠ᤹ ᤗᤰᤔᤏᤠᤒᤠ ᤁᤢᤍᤰᤔᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤆᤥᤃᤢ॥ 32 ᤜᤧᤰᤁᤩᤠᤱ ᤗᤠᤶᤎᤣ᤺ᤳᤜᤠ᤹ᤀᤥ ᤂᤢᤏᤧ᤹ ᤁᤖᤢᤒᤜᤠ᤹. ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤢᤱᤜᤠ᤹ ᤏᤢ ᤁᤧᤓᤧᤰᤐᤠ ᤑᤢᤱᤜᤠ᤹ᤖᤧ ᤁᤢᤓᤢᤱ ᤗᤰᤋᤢᤀᤠᤱ ᤆᤥᤃᤢ. ᤜᤧᤰᤁᤩᤠᤱ ᤁᤖᤢᤒᤜᤠ᤹ ᤏᤢ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤢᤱᤅᤡᤴ ᤑᤧᤔᤏᤠᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥ 33 ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤔᤠᤱᤜᤡᤶ ᤗᤢᤶᤔᤥᤒᤠ ᤆᤢᤶᤗᤢᤱ ᤆᤥ᤺ᤰᤔᤠ ᤕᤠᤰᤑᤠᤱᤅᤥ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤡᤛᤡ ᤁᤢᤎᤠ᤹ᤁᤢᤎᤠ᤹ ᤗᤰᤔᤏᤠᤒᤠ ᤆᤤᤋᤢᤏ ᤛᤡᤱᤅᤡᤸᤗᤧᤴ ᤛᤡᤳᤗᤠᤱᤜᤠ᤹ ᤆᤥᤃᤢ॥ 34 ᤁᤢᤜᤱᤅᤥ ᤁᤧᤀᤡᤒᤠ ᤁᤢᤓᤧᤸᤗᤧᤰ ᤏᤧᤳᤇᤡ ᤁᤧᤒᤵᤐᤠ ᤀᤠ᤺ᤱᤅᤡᤸᤗᤧᤴ ᤏᤧᤳᤇᤡ ᤗᤠᤶᤎᤣᤳ ᤆᤥᤃᤢ॥ 35 ᤂᤢᤏᤧ᤹ ᤂᤧᤵᤔᤥ ᤁᤖᤢᤒᤜᤠ᤹. ᤂᤧᤒᤰᤛᤡᤱᤜᤠ᤹ᤖᤧ ᤁᤢᤒᤢᤱᤜᤠ᤹ ᤏᤢ ᤁᤧᤓᤧᤰᤐᤠ ᤑᤢᤱᤜᤠ᤹ ᤁᤢᤓᤢᤱ ᤗᤰᤋᤢᤀᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤁᤢᤓᤢᤱᤜᤠ᤹ ᤛᤠᤶᤔᤩᤠᤱᤅᤡᤸᤗᤧ ᤁᤢᤍᤱᤒᤠ ᤛᤢ᤺ᤵᤋᤢ॥ 36 ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤃᤠᤱ ᤗᤰᤂᤢᤶᤔᤥᤒᤠ ᤗᤢᤱᤎᤠᤰᤁᤡᤴ ᤂᤰᤔᤏᤠᤒᤠ ᤗᤢᤱᤅᤡᤸᤗᤧᤴ ᤌᤧ᤺ᤰᤐᤧᤳ ᤁᤢᤍᤡ᤺ᤰᤗᤠ ᤛᤢᤶᤛᤡ ᤏᤢ ᤛᤠᤶᤔᤠᤱᤛᤡᤱ ᤛᤡᤱᤓᤧᤸᤗᤧᤰᤔᤧᤸᤗᤧᤴ ᤗᤳᤇᤠ ᤁᤢᤍᤡ᤺ᤰᤗᤠ ᤕᤧᤵᤛᤢᤀᤠᤱ ᤆᤥᤃᤢ॥ 37 ᤛᤥᤗᤥᤔᤏᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤈᤡᤓ ᤔᤧᤵᤔᤏᤠᤒᤠ ᤏᤡᤛᤡᤃᤣᤰᤐᤠ ᤗᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤒᤢᤱ ᤔᤧᤕᤢᤰᤂᤢ॥ 38 ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤒᤢᤗ ᤗᤠ. ᤀᤡᤃᤪ ᤕᤧᤳᤇᤡᤃᤣᤰᤐᤠ ᤗᤠᤀᤥ ᤂᤢᤏᤧ᤹ ᤁᤢᤀᤡᤱᤈᤠᤱ ᤜᤧᤰᤁᤣ ᤁᤧᤖᤧᤰ ᤁᤢᤛᤡ᤺ᤰᤔᤠ ᤁᤢᤈᤥ᤺ᤰᤔᤠ ᤁᤢᤀᤡᤛᤡᤰ ᤔᤠᤱᤜᤡᤶᤔᤡᤴ ᤔᤧᤈᤥᤃᤢ ᤔᤧᤛᤢᤖᤢ॥ ᤂᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤏᤢᤛᤡ ᤋᤱᤒᤣ ᤌᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.