᥇ ᤜᤠᤱ 5 - LIFOTNT

ᤛᤥᤗᤥᤔᤏᤖᤧ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠᤖᤡᤵ ᤆᤥᤃᤢ

¹ ᤛᤥᤗᤥᤔᤏᤧᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤧᤰᤘᤠᤀᤥ ᤜᤠᤱ ᤔᤠᤱᤌᤥ᤺ᤰᤏᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤸᤗ ᤋᤢᤖᤥᤛᤒᤠ ᤜᤠᤱ ᤜᤣᤖᤠᤔᤧᤸᤗᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤜᤠᤱᤗᤠᤀᤡᤱᤒᤠᤜᤠ᤹ ᤛᤥᤗᤥᤔᤏᤖᤥ ᤐᤠᤱᤄᤢ ᤕᤢᤛᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤓᤧᤸᤗᤧᤛᤠᤱ ᤍᤠᤀᤢᤍ ᤜᤠᤱᤅᤡᤴᤏᤢ ᤆᤢᤶ ᤐᤥ᤺ᤰᤂᤧᤀᤠᤱ ᤘᤕᤧ॥

² ᤛᤥᤗᤥᤔᤏᤖᤧ ᤜᤧᤖᤠᤔᤀᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤍᤣᤛᤢᤖᤥ—

³ “ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤐᤡᤛᤠᤱᤗᤠᤶ ᤌᤱᤜᤠ᤹ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤁᤢᤗᤠᤱᤓᤥ ᤛᤡᤃᤠᤱ ᤔᤧᤴᤈᤥ᤺ᤰᤛᤡᤱᤅᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤔᤧᤛᤢᤰᤋᤢᤴ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤘᤠ᤹॥

⁴ ᤁᤖ ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤡᤛᤠᤱ ᤏᤠ᤺ᤶᤛᤡᤱᤔᤠ ᤐᤡᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤏᤡᤱᤔᤡ ᤔᤧᤜᤥᤵ ᤀᤡᤃᤪ ᤀᤠᤍᤢᤰᤂᤣ ᤀᤠᤗᤠᤰᤂᤣ ᤜᤥᤵ॥

⁵ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤗᤧ ᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠ॥ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ ‘ᤂᤧᤏᤧ᤹ ᤁᤧᤗᤧᤰᤘᤠᤀᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠᤴ ᤜᤠᤱᤕᤢᤰᤏᤠᤀᤥ ᤕᤢᤰᤂᤢᤱ᤹. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤂᤧᤴ ᤔᤠᤱᤜᤡᤶᤔᤡᤴ ᤆᤥᤃᤢ᤹॥’

⁶ “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤗᤧᤒᤏᤠᤏᤗᤠᤶ ᤛᤠᤶᤔᤠᤱᤛᤡᤱᤜᤠ᤹ ᤋᤠᤱᤔᤠ ᤀᤡᤱᤈᤠᤱ ᤐᤡᤖᤧᤛᤧ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ᤏᤢ ᤔᤧᤍᤱᤛᤡᤱᤅᤠᤱ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤰᤂᤩᤠᤖᤡᤰ ᤏᤠᤶᤕᤠᤰ ᤐᤡᤔᤠᤛᤡ ᤏᤡ᤺ᤴᤎᤥ ᤁᤧᤈᤥᤃᤢ᤹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤐᤡᤖᤢᤱᤛᤡᤱ᤹॥ ᤂᤡᤏᤡ᤹ ᤛᤡᤍᤥᤏᤡᤜᤠ᤹ ᤁᤢᤀᤡᤛᤡᤰ ᤛᤡᤱᤒᤢᤱᤜᤠ᤹ ᤋᤠᤱᤔᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤀᤠᤏᤡᤃᤣ ᤔᤏᤠ ᤔᤧᤜᤥᤵ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤏᤡᤛᤢᤖᤥ॥”

⁷ ᤀᤠᤸᤗ ᤜᤧᤖᤠᤔᤖᤧ ᤛᤥᤗᤥᤔᤏᤖᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤢ. ᤂᤧᤒᤩᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤐᤠ᤺ᤳᤋᤢ. “ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤖᤡᤰ ᤔᤏᤠᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤍᤠᤀᤢᤍᤧᤴ ᤗᤳᤇᤠ ᤛᤡᤰᤁᤢᤶᤛᤠᤒᤠ ᤛᤠᤎᤡᤰ ᤐᤡᤖᤢᤀᤠᤱ ᤘᤠ᤹॥”

⁸ ᤂᤢᤏᤧ᤹ ᤁᤴ ᤀᤡᤱᤄᤱᤅᤡᤴ ᤛᤥᤗᤥᤔᤏᤧᤴ ᤜᤠᤰᤋᤢᤖᤥ— “ᤂᤧᤏᤧ᤹ ᤁᤧᤜᤠᤅᤢᤒᤠ ᤀᤡᤱᤄᤱᤅᤡᤴ ᤀᤠᤱᤃᤠ᤹ ᤂᤧᤵᤛᤢᤱ॥ ᤛᤠᤶᤔᤠᤱᤛᤡᤱ ᤏᤢ ᤀᤠ᤺ᤱ ᤛᤡᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤧᤖᤧᤰ ᤜᤡᤛᤢᤱ ᤋᤱᤄᤢᤱ ᤐᤡᤏᤧᤖᤥ॥

⁹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤗᤧᤒᤏᤠᤏᤗᤠᤶ ᤘᤖ᤺ᤱᤅᤥ ᤌᤠᤖᤡᤰ ᤛᤡᤱᤗ᤺ᤱᤛᤠᤜᤠ᤹ ᤔᤧᤎᤠᤛᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤔᤧᤄᤣ᤺ᤰᤂᤢᤀᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤍᤧᤴᤏᤥ ᤘᤠᤔᤧᤍᤣ᤺ᤴᤍᤢ ᤔᤧᤕᤢᤛᤢᤖ ᤕᤠ᤺ᤴᤍᤢᤱᤛᤡᤱ᤹॥ ᤂᤧᤱᤜᤠ᤹ ᤂᤧᤵᤔᤥ ᤔᤧᤓᤠ᤺ᤰᤂᤢᤖ ᤕᤠ᤺ᤴᤍᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤴ ᤛᤡᤱᤜᤠ᤹ ᤂᤧᤏᤧ᤹ ᤋᤣ᤹ᤔᤠ ᤁᤧᤛᤢᤰᤋᤢ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤜᤠᤱ ᤜᤡᤶᤛᤕᤱᤗᤧ ᤗᤠᤃᤡ ᤂᤧᤏᤧ᤹ ᤆᤠᤔᤠ ᤁᤢᤈᤠ ᤜᤡᤛᤧ ᤋᤱᤄᤧᤀᤠᤱ ᤏᤡᤱᤘᤠ᤹ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤁᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ॥”

¹⁰ ᤁᤶᤓᤗ᤹ᤖᤡᤰ ᤛᤥᤗᤥᤔᤏᤖᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤧᤖᤧᤰ ᤛᤠᤶᤔᤠᤱᤛᤡᤱ ᤏᤢ ᤀᤠ᤺ᤱ ᤛᤡᤱᤗ᤺ᤱᤛᤠᤜᤠ᤹ ᤜᤧᤖᤠᤔᤖᤧ ᤜᤠᤅᤢᤕᤢᤛᤢ.

¹¹ ᤜᤧᤰᤁᤩᤠᤱ ᤛᤥᤗᤥᤔᤏᤖᤧ ᤜᤧᤖᤠᤔᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤁᤢᤈᤠᤖᤧ ᤗᤠᤃᤡ ᥋᥆.᥆᥆᥆ ᤔᤢᤖᤡ ᤔᤠᤛᤡ ᤏᤢ ᥊.᥋᥆᥆ ᤗᤡᤋᤖ ᤕᤢᤔᤏᤠᤒᤠ ᤆᤤᤋᤢᤏ ᤏᤡ᤺ᤱᤃᤣ᤹ ᤂᤢᤏᤧ᤹ ᤜᤠᤰᤋᤢᤍᤣᤛᤢ॥ ᤛᤥᤗᤥᤔᤏᤖᤧ ᤁᤴ ᤋᤱᤒᤣ ᤌᤰᤔᤠ ᤜᤣᤖᤠᤔᤧᤴ ᤜᤠᤰᤋᤢ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤛᤥᤗᤥᤔᤏᤧᤴ ᤛᤡᤰᤁᤢᤶ ᤏᤡᤱᤘᤠ᤹ ᤐᤡᤖᤢ॥ ᤜᤣᤖᤠᤔ ᤏᤢ ᤛᤥᤗᤥᤔᤏᤖᤧ ᤂᤢᤴᤇᤡ᤹ ᤗᤢᤶᤔᤥ ᤋᤱᤔᤠᤀᤠᤱ ᤘᤠ᤹ᤔᤠ ᤁᤠ᤹ᤀᤡ ᤘᤕᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤵᤔᤠᤱᤗᤧ ᤂᤧᤴ ᤏᤠᤍᤱ ᤆᤥᤃᤧᤳᤇᤢ॥

¹³ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤗᤠᤶ ᤛᤢᤶᤒᤥᤱ ᤜᤧᤴᤇᤡᤱ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤔᤧᤓᤳᤇᤢᤛᤡᤒᤠ ᤔᤏᤠᤜᤠ᤹ ᤛᤢᤵᤛᤢᤛᤡ॥

¹⁴ ᤂᤢᤏᤧ᤹ ᤂᤧᤱᤜᤠ᤹ ᤗᤠ ᤌᤰᤔᤠ ᤌᤡᤒᤥᤱ ᤌᤡᤒᤥᤱ ᤜᤧᤴᤇᤡᤱ ᤗᤧᤰᤋᤢᤛᤡᤖ ᤗᤣᤒᤏᤠᤏ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤔᤏᤠᤜᤠ᤹ ᤗᤳᤇᤠ ᤗᤠ ᤗᤣᤒᤏᤠᤏ ᤏᤢ ᤗᤠ ᤏᤧᤳᤇᤡ ᤜᤡᤶᤔᤥ ᤔᤧᤘᤕᤧ॥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤔᤢᤖᤠ ᤁᤧᤔᤧᤵᤐᤠ ᤗᤰᤐᤧᤴᤛᤠᤒᤠ ᤀᤍᤥᤏᤡᤖᤠᤔᤧᤴ ᤘᤕᤧ॥

¹⁵ ᤛᤥᤗᤥᤔᤏᤖᤧ ᥍᥆.᥆᥆᥆ ᤁᤰ ᤁᤧᤃᤢᤒᤠ ᤏᤢ ᤁᤥ᤺ᤰᤔᤠ ᤑᤠᤱᤈᤱᤅᤥ ᥎᥆.᥆᥆᥆ ᤗᤢᤱ ᤁᤧᤄᤰᤐᤠ ᤔᤏᤠᤜᤠ᤹ ᤁᤳᤋᤢᤛᤡ॥

¹⁶ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠ ᤏᤢ ᤔᤢᤖᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤔᤧᤓᤳᤇᤢᤛᤡᤒᤠ ᤔᤏᤠᤜᤠ᤹ ᥉.᥉᥆᥆ ᤗᤠᤶᤗᤥᤒᤠᤜᤠ᤹ ᤔᤧᤘᤕᤧ॥

¹⁷ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤕᤶᤒᤠ ᤁᤣ᤺ᤶᤒᤠ ᤔᤧᤄᤰᤋᤢᤀᤠᤱ ᤘᤖᤧᤱᤗᤧᤱ ᤔᤧᤈᤥᤃᤢᤒᤠ ᤗᤢᤱᤅᤡᤸᤗᤧ ᤁᤢᤒᤢᤱ ᤕᤢᤱᤔᤠᤖᤧ ᤗᤠᤃᤡ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤗᤢᤱᤜᤠ᤹ ᤗᤢᤱᤒᤢᤴᤏᤠᤀᤥᤗᤠᤶ ᤔᤧᤜᤧᤖᤢ ᤔᤧᤗ᤺ᤳᤋᤢ॥

¹⁸ ᤛᤥᤗᤥᤔᤏ ᤏᤢ ᤜᤧᤖᤠᤔᤖᤧ ᤂᤢᤴᤇᤡ᤹ ᤛᤡᤱᤃᤠᤶᤒᤠ ᤗᤢᤱᤃᤠᤶᤒᤠᤜᤠ᤹ ᤜᤧᤰᤁᤩᤠᤱ ᤃᤒᤠᤗᤒᤠ ᤔᤏᤠᤜᤠ᤹ᤖᤧ ᤔᤠᤱᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤛᤡᤱᤜᤠ᤹ ᤏᤢ ᤗᤢᤱᤜᤠ᤹ ᤔᤧᤄᤰᤋᤢᤀᤠᤱ ᤕᤠᤖᤡᤵ ᤔᤧᤈᤥᤃᤢᤖᤥ॥