᥇ ᤜᤠᤱ 4 - LIFOTNTᤛᤥᤗᤥᤔᤏᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ 1 ᤁᤶᤓᤗ᤹ᤖᤡᤰ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥᤃᤢ॥ 2 ᤂᤢᤏᤧ᤹ ᤕᤶᤒᤕᤶᤒᤠ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— ᤛᤠᤍᤥᤁᤖᤧ ᤁᤢᤛ᤻ᤛᤠ ᤀᤈᤷᤕᤠᤜ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ. 3 ᤛᤡᤛᤠᤖᤧ ᤁᤢᤛ᤻ᤛᤠ. ᤀᤣᤗᤡᤜᤥᤖᤣᤑ ᤏᤢ ᤀᤜᤡᤕᤠᤜ—ᤛᤢᤜᤠᤱᤔᤡᤒᤠᤜᤠ᤹ ᤘᤕᤧᤛᤡ. ᤀᤜᤡᤗᤢᤍᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋ—ᤛᤠᤵᤗᤠ ᤁᤧᤛᤠᤵᤐᤠ ᤘᤕᤧ. 4 ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜ—ᤔᤠ ᤌᤰᤔᤥᤒᤠ. ᤛᤠᤍᤥᤁ ᤏᤢ ᤀᤒᤡᤕᤠᤌᤠᤖ—ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤛᤡ. 5 ᤏᤠᤋᤠᤏᤖᤧ ᤁᤢᤛ᤻ᤛᤠ ᤀᤈᤷᤕᤠᤜᤴ—ᤌᤢᤶ ᤌᤢᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤛᤠᤒᤠ ᤘᤕᤧ. ᤏᤠᤋᤠᤏᤖᤧ ᤁᤢᤛ᤻ᤛᤠ ᤈᤠᤒᤢᤍᤧᤴ—ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤜᤠᤱᤅᤡᤸᤗᤧ ᤁᤢᤀᤠᤵᤑᤣᤰᤐᤠ ᤛᤢᤈᤠᤛᤠᤒᤠ ᤘᤕᤧ. 6 ᤀᤜᤡᤛᤠᤖᤧᤴ—ᤜᤠᤱᤜᤡᤶᤔᤥᤒᤠ ᤗᤰᤐᤧᤴᤛᤠᤒᤠ ᤘᤕᤧ. ᤀᤒ᤻ᤍᤠᤖᤧ ᤁᤢᤛ᤻ᤛᤠ ᤀᤍᤥᤏᤡᤖᤠᤔᤧᤴ—ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤔᤧᤓᤳᤇᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤛᤠᤒᤠ ᤘᤕᤧᤖᤥ॥ 7 ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤛᤥᤗᤥᤔᤏᤖᤧ ᤌᤢᤶ ᤌᤢᤶᤔᤥᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤕᤢᤰᤛᤠᤒᤠᤜᤠ᤹ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤏᤢ ᤜᤠᤱ ᤜᤡᤶᤛᤕᤱᤗᤧ ᤗᤠᤃᤡ ᤆᤠᤔᤠ ᤁᤢᤈᤠ ᤔᤧᤍᤠᤖᤢ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤋᤱᤒᤣᤖᤧ ᤗᤠᤎᤡᤰ ᤌᤡᤰᤐᤠ ᤆᤠᤔᤠ ᤁᤢᤈᤠ ᤋᤠ᤺ᤵᤔᤠ ᤁᤧᤒᤥᤱᤒᤠ ᤘᤕᤧ॥ 8 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤀᤠᤶᤓᤠ ᤁᤴᤜᤠ᤹ᤀᤣᤖᤥ— ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠᤒᤠ ᤗᤠᤈᤣ᤹ᤀᤥ—ᤒᤣᤏ-ᤜᤢᤖ॥ 9 ᤔᤠᤁᤠᤈ. ᤛᤠᤸᤒᤡᤔ. ᤒᤣᤌ-ᤛᤣᤔᤣᤛ. ᤀᤣᤗᤥᤏ-ᤒᤣᤌᤜᤠᤏᤠᤏᤀᤥ—ᤒᤣᤏ-ᤍᤣᤁᤣᤖ. 10 ᤀᤖᤢᤒ᤻ᤒᤥᤋᤀᤥ—ᤒᤣᤏ-ᤜᤣᤛᤣᤍ (ᤂᤧᤸᤗᤧ ᤁᤢᤗᤰᤐᤧᤴᤏᤥ ᤛᤥᤁᤥ ᤏᤢ ᤜᤣᤐᤣᤖᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤏᤧᤛ᤻ᤛᤧ॥). 11 ᤍᤥᤖᤒᤠ ᤌᤢᤶᤔᤥ—ᤒᤣᤏ-ᤀᤒᤡᤏᤠᤍᤠᤒ. (ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤋᤠᤑᤠᤋᤧᤴ ᤂᤧᤸᤗᤧ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ). 12 ᤀᤜᤡᤗᤢᤍᤖᤧ ᤁᤢᤛ᤻ᤛᤠ ᤒᤠᤏᤠ᤺ᤴ ᤋᤠᤏᤠᤁ. ᤔᤃᤡᤍ᤻ᤍᤥ ᤏᤢ ᤒᤠᤛᤠᤏᤀᤥ ᤗᤰᤐᤧᤴᤛᤠᤒᤠ ᤘᤕᤧ॥ (ᤒᤣᤌ-ᤛᤠᤏᤧᤴ ᤛᤠᤷᤋᤠᤏᤖᤧ ᤁᤢᤒᤣᤛᤠᤱ ᤕᤡᤈᤖᤣᤗ ᤁᤢᤛᤡᤱᤃᤠᤱ ᤏᤧᤛ᤻ᤛᤧ) ᤁᤧᤖᤧᤰ ᤜᤠᤒᤡᤗ-ᤔᤜᤥᤗᤠ ᤜᤧᤰᤁᤩᤠᤱ ᤕᤥᤰᤔᤠᤔ ᤌᤠᤖᤡᤰ॥ 13 ᤖᤠᤔᤥᤋ-ᤃᤡᤗᤠᤍᤀᤥ ᤒᤣᤏ-ᤃᤣᤒᤣᤖᤧᤴ ᤗᤰᤐᤧᤴᤛᤠᤒᤠ ᤘᤕᤧ ᤃᤡᤗᤠᤍᤀᤥ ᤁᤧᤏᤧᤒᤠ ᤕᤠᤀᤡᤖᤖᤧ ᤁᤢᤒᤠᤱᤓᤣ᤹ᤜᤠ᤹ (ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤕᤠᤀᤡᤖ) ᤜᤧᤰᤁᤩᤠᤱ ᤒᤠᤛᤠᤏᤀᤥ ᤁᤧᤏᤧᤒᤠ ᤀᤷᤃᤥᤒᤖᤧ ᤁᤢᤎᤢᤶᤔᤡᤴ ᤏᤢ ᤁᤠᤛᤠ᤺ᤸᤗᤧ ᤔᤧᤓᤠᤅᤢᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤁᤒᤢᤒᤠ ᤋᤢᤰᤐᤥᤱ ᤕᤶᤒᤕᤶᤒᤠ ᤕᤧᤰᤕᤰᤜᤠ᤹ᤀᤠᤱ ᤏᤧᤛ᤻ᤛᤧ. 14 ᤔᤜᤏᤥᤔᤀᤥ—ᤀᤡᤍ᤻ᤍᤥᤖᤧ ᤁᤢᤛ᤻ᤛᤠ ᤀᤜᤡᤏᤠᤍᤠᤒᤧᤴ ᤘᤕᤧ॥ 15 ᤏᤵᤋᤠᤗᤡᤀᤥ—ᤀᤜᤡᤔᤠᤛᤧᤴ ᤘᤕᤧ॥ (ᤂᤧᤸᤗᤧ ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤒᤠᤛᤔᤋᤧᤴ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ). 16 ᤀᤠᤛᤣᤖ ᤏᤢ ᤀᤠᤗᤥᤋᤀᤥ—ᤜᤢᤛ᤻ᤛᤤᤖᤧ ᤁᤢᤛ᤻ᤛᤠ ᤒᤠᤏᤠ᤺ᤴ ᤘᤕᤧ. 17 ᤀᤡᤛ᤻ᤛᤠᤂᤠᤖᤀᤥ—ᤐᤠᤖᤢᤜᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤘᤕᤧ. 18 ᤒᤣᤏᤩᤠᤔᤡᤏᤀᤥ—ᤀᤣᤗᤠᤖᤧ ᤁᤢᤛ᤻ᤛᤠ ᤛᤡᤔᤡᤴ ᤘᤕᤧ. 19 ᤃᤡᤗᤠᤍᤀᤥ—ᤀᤢᤖᤡᤖᤧ ᤁᤢᤛ᤻ᤛᤠ ᤃᤣᤒᤣᤖᤧᤴ ᤘᤕᤧ (ᤂᤧᤴ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤏᤢ ᤒᤠᤛᤠᤏᤒᤠ ᤜᤠᤱ ᤀᤥᤃᤖᤧ ᤁᤢᤗᤠᤈᤣ᤹ ᤏᤧᤛ᤻ᤛᤧ)॥ ᤂᤢᤏᤧ᤹ ᤂᤧᤴ ᤌᤢᤶᤔᤥᤒᤠ ᤗᤳᤇᤠᤖᤰ ᤌᤢᤶ ᤕᤢᤰᤛᤠᤒᤠ ᤘᤕᤧᤖᤥ॥ ᤛᤥᤗᤥᤔᤏᤖᤧ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤢᤜᤠᤱᤕᤢᤰ ᤕᤧᤶ 20 ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡᤰ ᤏᤡ᤺ᤵᤔᤧᤴᤍᤧᤳ ᤕᤖᤡᤰ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢᤀᤠᤱ ᤔᤧᤏᤢᤖᤧ ᤔᤧᤍᤠᤛᤧᤀᤠᤱ ᤔᤧᤘᤕᤧ॥ 21 ᤕᤢᤑᤪᤣᤋᤡᤛ ᤘᤜ᤺ᤱᤗᤠᤶ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤏᤢ ᤔᤡᤛᤪᤒᤠ ᤀᤡ᤺ᤴᤍᤥ ᤌᤠᤖᤡᤰᤐᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤀᤥ ᤛᤥᤗᤥᤔᤏᤖᤧ ᤕᤢᤰ ᤆᤥᤃᤢᤀᤠᤱ ᤏᤧᤛ᤻ᤛᤧ॥ ᤂᤧᤴ ᤗᤠᤈᤣ᤹ᤜᤠ᤹ᤖᤧ ᤂᤢᤏᤧ᤹ᤀᤥ ᤀᤣ᤺ᤱᤕᤠᤱ ᤔᤧᤜᤢᤅᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤱᤜᤡᤱ ᤌᤧᤶᤒᤠᤀᤣ ᤂᤧᤱᤜᤠ᤹ ᤂᤢᤏᤧ᤹ ᤁᤢᤔᤏᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤕᤢᤅᤧ॥ 22 ᤛᤥᤗᤥᤔᤏᤖᤧ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠᤔᤠ ᤆᤠ᤺ᤴ ᥍.᥋᥆᥆ ᤔᤢᤖᤡ ᤆᤢᤴᤈᤢᤶᤒᤠ ᤑᤣ᤹ᤍᤢᤶ ᤏᤢ ᥇᥋᥆ ᤔᤢᤖᤡ ᤑᤧ᤺ᤱᤔᤏᤠᤒᤠ ᤁᤢᤈᤠ. 23 ᤐᤡᤳᤌᤠ᤺ᤱᤅᤥ ᤜᤡᤱᤔᤏᤠᤛᤡᤒᤠ ᤌᤡᤒᤥᤱ ᤐᤡᤳᤌᤰᤛᤠᤜᤠ᤹. ᤆᤠᤖᤠᤶᤔᤠᤍᤧᤴᤏᤥ ᤜᤡᤱᤔᤏᤠᤛᤡᤒᤠ ᤏᤡᤒᤥᤱ ᤐᤡᤳᤜᤠ᤹. ᤁᤡᤵ ᤌᤡᤰ ᤔᤧᤸᤗᤢᤰ ᤏᤢ ᤔᤧ᤺ᤴᤍᤠ. ᤜᤧᤰᤁᤩᤠᤱ ᤐᤧ᤺ᤱᤘᤠ. ᤛᤩᤠ᤺ᤰᤐᤠ. ᤛᤠᤶᤔᤧ᤺ᤴᤍᤠ. ᤀᤡᤰᤛᤠ ᤏᤢ ᤘᤠᤜᤠ᤹ ᤔᤧᤘᤕᤧ॥ 24 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤏᤠᤶᤎᤠ ᤗᤧᤵᤔᤠᤱᤒᤠ ᤁᤧᤖᤧᤰ ᤗᤠᤈᤣ᤹. ᤀᤡᤃᤪ ᤋᤡᤑᤛᤠᤗᤠᤶ ᤃᤠᤈᤠ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤛᤏᤠᤖᤢᤱ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ 25 ᤛᤥᤗᤥᤔᤏᤖᤧ ᤁᤢᤜᤡᤱᤜᤡᤱ ᤌᤧᤶᤒᤠᤀᤣ ᤍᤠᤏᤗᤠᤶ ᤒᤣᤷᤛᤣᤒᤠ ᤌᤠᤖᤡᤰᤁᤣ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤧᤴ ᤆᤡᤈᤡ ᤕᤧᤶᤕᤧᤶ ᤏᤧᤛ᤻ᤛᤧ. ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤆᤧᤸᤗᤧᤰᤛᤣ᤹ ᤏᤢ ᤐ᤺ᤳᤇᤣ᤹ᤒᤢᤱ ᤛᤡᤃᤠᤱ ᤌᤠᤵᤌᤣ᤺ᤰ ᤕᤠᤶᤎᤣᤰ ᤔᤧᤕᤢᤅᤧ॥ 26 ᤛᤥᤗᤥᤔᤏᤖᤧ ᤁᤢᤀᤴᤗᤠᤎᤠ ᤁᤧᤗᤥᤱᤒᤠ ᤀᤴᤜᤠ᤹ᤖᤧ ᤗᤠᤃᤡ ᤜᤧᤴᤇᤡᤱ ᤗᤡᤛᤡ ᤀᤴᤕᤧᤵᤏᤠᤜᤠ᤹ ᤏᤢ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤀᤴᤃᤧᤗᤥᤱᤒᤠᤜᤠ᤹ ᤁᤳᤋᤢᤛᤡ॥ 27 ᤌᤢᤶ ᤌᤢᤶᤔᤥᤒᤠ ᤛᤢᤜᤠᤱᤛᤢᤰᤐᤠᤜᤠ᤹ᤖᤧ ᤗᤠ ᤌᤰᤔᤠ ᤔᤧᤗᤧᤰᤛᤡᤱᤗ ᤛᤥᤗᤥᤔᤏ ᤏᤢ ᤂᤢᤏᤧ᤹ ᤁᤢᤈᤠ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤠᤀᤠᤱ ᤁᤧᤈᤠᤒᤠᤜᤠ᤹ ᤁᤧᤖᤧᤰᤗᤧ ᤗᤠᤃᤡ ᤆᤠᤔᤠ ᤁᤢᤈᤠᤜᤠ᤹ ᤔᤧᤍᤠᤖᤢ॥ ᤁᤶᤓᤗ᤹ᤖᤡᤰ ᤔᤧᤍᤠᤖᤢᤸᤗᤧ ᤆᤠᤔᤠ ᤁᤢᤈᤠ ᤌᤧᤔᤠ᤺ᤴᤏᤠᤱ ᤔᤧᤛᤢ᤺ᤴᤏᤧᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤛᤠ᤹ᤖᤢ ᤀᤥᤔᤧᤔᤧᤳᤋᤢ॥ 28 ᤀᤴᤗᤠᤎᤠ ᤁᤧᤗᤥᤱᤒᤠ ᤀᤴᤜᤠ᤹ ᤏᤢ ᤘᤣ᤹ ᤀᤴᤜᤠ᤹ᤖᤧ ᤗᤠᤃᤡᤀᤠᤱ ᤂᤧᤱᤜᤠ᤹ᤖᤧ ᤋᤠ᤺ᤵᤔᤠ ᤁᤧᤒᤥᤱᤒᤠ ᤜ᤺ᤰᤛᤡ ᤏᤢ ᤜ᤺ᤰᤛᤡᤗᤠᤱᤜᤠ᤹ ᤔᤧᤍᤠᤖᤢ॥ 29 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤥᤗᤥᤔᤏᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹. ᤀᤡ᤺ᤳᤇᤡᤱᤛᤠᤶ ᤏᤢ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠ ᤕᤠᤖᤡᤰᤁᤣ ᤏᤡ᤺ᤳᤔᤧᤴᤍᤧᤳ ᤂᤠᤛᤡᤱᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤐᤡᤖᤢ॥ 30 ᤏᤠᤱᤃᤧᤴ ᤐᤡᤛᤠᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ᤺ᤸᤗᤧ ᤛᤥᤗᤥᤔᤏᤧᤴ ᤛᤠ᤹ᤖᤡᤰ ᤛᤡᤰᤁᤢᤶᤛᤠᤒᤠ ᤆᤥᤃᤧ॥ 31 ᤂᤢᤏᤧ᤹ ᤘᤣ᤹ ᤁᤧᤖᤧᤰ ᤔᤏᤠᤜᤠ᤹ᤏᤢ᤺ᤸᤗᤧ ᤛᤡᤰᤁᤢᤶᤛᤠᤒᤠ ᤆᤥᤃᤧ—ᤀᤣᤋᤠᤏ. ᤀᤣᤈᤪᤡ ᤏᤢ ᤔᤠᤜᤥᤗᤖᤧ ᤁᤢᤛ᤻ᤛᤠ ᤜᤣᤔᤠᤏ. ᤁᤗᤁᤥᤗ ᤜᤧᤰᤁᤩᤠᤱ ᤍᤷᤍᤠ᤺ᤴᤏᤢ᤺ᤸᤗᤧᤀᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤛᤡᤰᤁᤢᤶᤛᤠᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤡᤅᤧ॥ 32 ᤂᤢᤏᤧ᤹ ᤜᤧᤴᤇᤡᤱ ᤛᤢᤶᤛᤡ ᤂᤠᤜᤢᤴᤜᤠ᤹ ᤛᤠᤵᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤠᤶᤗᤥᤜᤠ᤹ᤖᤧ ᤂᤠᤏᤡ᤺ᤳᤋᤡᤴ ᤜᤧᤴᤇᤡᤱ ᤌᤡᤰᤁᤠᤱ ᤁᤡᤵ ᤅᤠᤛᤡ ᤘᤕᤧ॥ 33 ᤂᤢᤏᤧ᤹ ᤌᤠᤒᤢ ᤛᤡᤱᤛᤣ᤹ᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ. ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱᤜᤠ᤹ ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤌᤢᤵᤌᤠ᤹ᤀᤥ ᤁᤧᤗᤡᤱᤒᤠ ᤜᤡᤛᤐ ᤕᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤌᤠᤖᤡᤰ ᤐᤥᤎᤰ ᤆᤥᤃᤢ॥ ᤂᤢᤏᤧ᤹ ᤌᤰᤛᤠᤜᤠ᤹. ᤐᤢᤛᤠᤜᤠ᤹. ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤅᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥᤀᤠᤱ ᤜᤢ᤹ᤖᤢᤛᤡ॥ 34 ᤛᤥᤗᤥᤔᤏᤖᤧ ᤁᤢᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤁᤧᤄᤥᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤜᤠᤱᤜᤠ᤹ᤗᤠᤶ ᤔᤧᤒᤠᤱᤄᤢᤛᤡᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤁᤢᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤧᤶᤛᤧ ᤂᤢᤏᤧ᤹ᤀᤥ ᤔᤧᤍᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.