᥇ ᤜᤠᤱ 3 - LIFOTNTᤛᤥᤗᤥᤔᤏᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ ( ᥈ ᤛᤠᤵᤔᤢ ᥇:᥉-᥇᥈ ) 1 ᤛᤥᤗᤥᤔᤏᤖᤧ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤡᤴᤏᤢ ᤋᤱᤔᤠ ᤁᤠ᤹ᤀᤡ ᤆᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥᤃᤢ॥ ᤂᤢᤏᤧ᤹ ᤁᤢᤜᤠᤱᤜᤡᤶᤔᤡᤴ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥ᤺ᤰᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤁᤧᤖᤧᤰ ᤐᤡᤛᤠᤱᤒᤠ ᤗᤢᤱᤎᤠᤰᤁᤡᤴ ᤛᤧᤵᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤌᤠᤰᤋᤢᤀᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤕᤢᤰᤂᤢ॥ 2 ᤔᤏᤠᤜᤠ᤹ᤖᤧᤃ ᤀᤢ᤺ᤰᤆᤶᤈᤶᤒᤠ ᤆᤥ᤺ᤰᤔᤏᤠᤍᤧᤴᤜᤠ᤹ᤀᤥ ᤀᤠᤸᤗᤛᤠᤱ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤁᤢᤓᤠ ᤔᤠᤱᤜᤡᤶ ᤔᤧᤴᤈᤥ᤺ᤰᤁᤣ ᤔᤧᤘᤕᤧ॥ 3 ᤛᤥᤗᤥᤔᤏᤖᤧ ᤀᤠᤵᤑᤣᤰ ᤆᤤᤲ ᤁᤢᤶᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤖ ᤕᤜᤘᤣ ᤍᤠᤱᤒᤧᤴᤏᤣ ᤔᤡ᤺ᤶᤈᤡ ᤔᤧᤳᤋᤢᤒᤠ ᤀᤥᤛᤣ᤺ᤴᤎᤠᤱ ᤆᤥᤃᤢ॥ ᤁᤖ ᤂᤢᤏᤧ᤹ ᤀᤢ᤺ᤰᤆᤶᤈᤶᤒᤠ ᤆᤥ᤺ᤰᤔᤏᤠᤍᤧᤴᤜᤠ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤀᤠᤱ ᤛᤢᤰᤐᤠ ᤜᤠ᤺ᤴᤍᤢ॥ 4 ᤛᤥᤗᤥᤔᤏ ᤜᤠᤱᤅᤡᤴ ᤃᤡᤒᤥᤏᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤐᤣ. ᤌᤣᤀᤠᤱᤓᤧᤸᤗᤧ ᤀᤢ᤺ᤰᤆᤶᤈᤶᤒᤠ ᤆᤥ᤺ᤰᤔᤏᤠᤍᤧᤴᤜᤠ᤹ᤀᤥ ᤘᤣ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤁᤵᤔᤥᤀᤣ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤢᤏᤧ᤹ ᤜᤧᤴᤇᤡᤱ ᤌᤡᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ 5 ᤃᤡᤒᤥᤏᤀᤥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤴᤍᤡᤰ ᤛᤧᤵᤔᤠᤱᤔᤥ ᤀᤥ᤺ᤴᤎᤠᤰᤛᤡᤱᤅᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤌᤧᤔᤠ ᤁᤧᤏᤠ᤺ᤰᤁᤠ. ᤀᤠᤱᤃᤠ᤹ ᤂᤧᤴ ᤐᤡᤏᤧᤖᤥ॥” 6 ᤛᤥᤗᤥᤔᤏᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤏᤧ᤹ᤏᤢ ᤏᤛᤠ᤺ᤴᤛᤠᤒᤠ ᤘᤕᤧ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤁᤢᤛᤡᤰᤗᤢᤱᤔᤥ ᤁᤢᤍᤥ᤺ᤵᤔᤠ ᤘᤕᤧ॥ ᤂᤢᤏᤧ᤹ ᤀᤠᤸᤗᤥᤀᤠᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤖ ᤁᤧᤘᤠ᤹. ᤜᤧᤰᤁᤩᤠᤱ ᤀᤠᤸᤗ ᤂᤢᤏᤧ᤹ ᤁᤢᤀᤣᤃᤠᤱ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤀᤡᤴᤒᤠ ᤕᤧᤴᤏᤥ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤒᤡᤖᤢᤀᤠᤱ ᤘᤠ᤹॥ 7 “ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤶᤒᤠ ᤍᤠᤀᤢᤍᤖᤧ ᤁᤢᤗᤧᤰᤘᤠᤀᤥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤴ ᤜᤠᤱ ᤁᤧᤈᤥᤃᤠᤱᤅᤠᤱ ᤘᤠ᤹॥ ᤁᤖ ᤀᤠᤱᤃᤠ᤹ᤃ ᤆᤢᤰᤛᤠ ᤀᤅᤧ᤺ᤰᤘᤠ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤀᤠᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤗᤧᤀᤠᤴ॥ 8 ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤁᤵᤔᤥ ᤂᤧᤏᤧ᤹ ᤁᤧᤛᤣᤃᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤠ᤹ᤀᤠ. ᤂᤧᤱᤜᤠ᤹ ᤏᤡ᤺ᤵᤔᤧᤴᤍᤧᤳ ᤏᤢ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤘᤠ᤹॥ 9 ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤔᤏᤠᤜᤠ᤹ᤀᤥ ᤁᤧᤘᤠ᤹ᤒᤠ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤴ ᤏᤧᤜᤡᤏᤡᤱᤘᤠ᤹ ᤐᤡᤖᤠᤱᤅᤧ᤹. ᤜᤧᤰᤁᤩᤠᤱ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤀᤠᤱᤃᤠ᤹ ᤛᤧᤶᤔᤠ ᤛᤢᤰᤋᤢᤱᤗ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤶᤔᤩᤠᤰ ᤕᤖᤡᤰ ᤁᤧᤔᤏᤠᤜᤠ᤹ᤀᤥ ᤜᤠ᤺ᤳᤗᤧ ᤕᤢᤰ ᤆᤥ᤺ᤰᤔᤠ ᤛᤢᤰᤋᤢᤒᤣ᥅” 10 ᤛᤥᤗᤥᤔᤏᤖᤧ ᤁᤴ ᤐᤠ᤺ᤴᤏᤡᤴ ᤏᤠ᤺ᤰᤋᤢᤒᤠᤀᤥ ᤕᤜᤘᤣ ᤍᤠᤱᤒᤧᤴ ᤁᤢᤏᤡᤱᤘᤠ᤹ ᤋᤩᤧ॥ 11 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤁᤧᤏᤠ᤺ᤰᤋᤢᤒᤠ ᤏᤢ ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤠᤃᤡ ᤌᤠ᤺ᤰ ᤆᤠ᤹ᤔᤠ ᤀᤡᤃᤪ ᤕᤠᤱᤛᤠᤁᤢᤴᤎᤣ ᤀᤡᤃᤪ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤛᤧᤵᤔᤠᤛᤡ ᤁᤧᤱᤃᤥ᤺ᤳᤋᤢᤛᤡᤴ. ᤁᤖ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤏᤠ᤺ᤰᤋᤢᤒᤠᤸᤗᤧ ᤆᤥᤃᤢᤸᤗᤧ. 12 ᤛᤧᤰᤂᤠᤛᤠᤱ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤧᤴ ᤀᤠᤱᤃᤠ᤹ ᤁᤧᤳᤋᤢᤱ ᤐᤡᤏᤧ॥ ᤀᤠᤱᤃᤠ᤹ ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤏᤢ ᤏᤡ᤺ᤴᤎᤥ ᤆᤥ᤺ᤰᤔᤠ ᤁᤧᤛᤢᤰᤐᤠ ᤏᤡᤱᤘᤠ᤹ ᤐᤡᤏᤧ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤜᤧᤰᤋᤱᤒᤠ ᤀᤠᤓᤧᤸᤗᤧᤀᤠᤱ ᤜᤠ᤺ᤳᤋᤠᤱ ᤔᤧᤶᤒᤥᤱᤅᤣ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤀᤣᤃᤠᤱᤅᤠᤱ ᤀᤠᤵᤑᤠᤸᤗᤧᤀᤠᤱ ᤜᤠ᤺ᤳᤋᤠᤱ ᤔᤧᤒᤥᤱᤏᤧᤴ॥ 13 ᤁᤴᤏᤢ᤺ᤸᤗᤧ ᤘᤣ᤹ ᤂᤧᤏᤧ᤹ ᤁᤧᤴᤏᤠ᤺ᤰᤋᤢᤶᤒᤠ ᤂᤧᤴ ᤐᤠ᤺ᤴᤜᤠ᤹. ᤀᤡᤃᤪ ᤂᤧᤏᤧ᤹ ᤁᤧᤜᤡᤱᤒᤠ ᤕᤧᤶᤔᤥ ᤀᤠᤳᤋᤡᤴ ᤜᤠᤱᤜᤠ᤹ᤀᤠᤱ ᤂᤧᤏᤧ᤹ᤏᤢ ᤁᤢᤍᤱᤒᤠ ᤔᤧᤶᤒᤥᤱᤏᤧᤴᤗ ᤌᤠᤖᤡᤰ ᤀᤠᤱᤃᤠ᤹ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣ ᤏᤢ ᤔᤡᤱᤛᤥ ᤀᤡᤱᤎᤠᤱ ᤐᤡᤏᤧᤖᤥ॥ 14 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤶᤔᤥ ᤗᤠᤱᤃᤧᤄᤣ᤺ᤰᤁᤠᤱ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢᤏᤧᤓᤃᤪ ᤀᤠᤱᤃᤠ᤹ ᤁᤧᤎᤠ᤺ᤰ ᤆᤠ᤹ᤖ ᤆᤥᤃᤢᤱ᤹॥” 15 ᤂᤧᤒᤩᤠᤱ ᤛᤥᤗᤥᤔᤏᤧᤴ ᤛᤥᤖᤧᤀᤠᤱ ᤁᤱᤃ ᤛᤧᤵᤔᤠᤱᤏᤡᤖᤳᤇ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ ᤂᤥᤛᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤖᤢᤛᤗᤧᤔ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤕᤧᤶᤛᤡᤱ. ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤂᤶᤓᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡᤖᤥ॥ ᤛᤥᤗᤥᤔᤏᤖᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤗᤠᤶ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ 16 ᤂᤧᤴ ᤀᤣᤃᤠᤱ ᤁᤧᤳᤏᤡᤔᤠ ᤏᤧᤳᤇᤡ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤍᤃᤡ ᤋᤩᤧᤛᤡᤀᤠᤱ ᤕᤧᤶᤏᤧᤛᤡ॥ 17 ᤂᤧᤴ ᤏᤧᤳᤇᤡᤀᤥ ᤌᤡᤰᤐᤠᤖᤧ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤁᤴ ᤔᤧᤴᤇᤢᤔᤠᤴᤏᤢ ᤀᤠᤱᤃᤠ᤹ ᤗᤳᤇᤠ ᤜᤡᤶᤔᤥ ᤕᤢᤱᤛᤡᤃᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤴ ᤀᤠᤱᤃᤠ᤹ᤏᤢ ᤘᤕᤧᤸᤗᤧ ᤀᤠᤱᤃᤠ᤹ ᤀᤅᤧ᤺ᤰᤘᤠ ᤌᤡᤰ ᤛᤠᤃᤳᤋᤢᤱ॥ 18 ᤀᤠᤱᤃᤠ᤹ ᤀᤅᤧ᤺ᤰᤘᤠᤴ ᤁᤳᤋᤢᤱᤒᤠ ᤛᤢᤶᤕᤠᤴ ᤀᤣᤃᤠᤱ ᤂᤢᤏᤧ᤹ᤀᤠᤱ ᤀᤅᤧ᤺ᤰᤘᤠ ᤌᤡᤰ ᤛᤠᤃᤳᤋᤢ॥ ᤂᤧᤵᤔᤥ ᤀᤠᤴᤇᤡᤃᤧᤖᤰ ᤘᤕᤧᤛᤡᤃᤧ. ᤂᤧᤴ ᤜᤡᤶᤔᤥ ᤀᤠᤴᤇᤡᤃᤧᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤋᤧ॥ 19 “ᤛᤧᤴᤍᤡᤰ ᤁᤴ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤁᤢᤛ᤻ᤛᤠᤴ ᤑᤧᤱᤍᤢ ᤛᤧᤖᤢᤖᤧᤳᤇ॥ 20 ᤛᤧᤴᤍᤡᤰ ᤛᤧᤳᤗᤢᤶᤓᤰᤋᤧᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤔᤧᤴ ᤀᤡᤵᤛᤠᤱᤒᤠ ᤕᤧᤶᤔᤥ ᤀᤠᤱᤃᤠ᤹ ᤀᤠᤒᤣᤛᤠᤱᤗᤠᤶ ᤀᤠᤛ᤻ᤛᤠ ᤀᤅᤧ᤺ᤰᤘᤠᤴ ᤋᤣ᤹ᤖᤢᤀᤠᤱ ᤂᤢᤏᤧ᤹ ᤁᤢᤓᤰᤋᤢᤱᤅᤥ ᤏᤧᤛ᤻ᤛᤢᤖᤧᤳᤇ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤘᤧᤳ ᤁᤢᤛ᤻ᤛᤠ ᤀᤅᤧ᤺ᤰᤘᤠᤴ ᤀᤠᤱᤃᤠ᤹ ᤀᤠᤓᤰᤌᤢᤱᤔᤥ ᤏᤧᤛ᤻ᤛᤢ ᤐᤡᤖᤠᤱᤖᤧᤳᤇ॥ 21 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶᤛᤠ ᤀᤠᤛ᤻ᤛᤠ ᤀᤅᤧ᤺ᤰᤘᤠᤴ ᤏᤢᤎᤢᤰᤛᤧ ᤀᤠᤱᤃᤠ᤹ ᤐᤥᤃᤠᤱᤅᤡᤸᤗᤧᤃ ᤀᤠᤛ᤻ᤛᤠᤴ ᤛᤩᤧᤀᤠᤱ ᤏᤧᤛ᤻ᤛᤧᤒᤠ ᤏᤡᤛᤢᤱ॥ ᤁᤖ ᤋᤠᤏᤠᤶᤒᤠ ᤂᤠᤃᤧᤀᤥ᤺ᤵᤐᤥ ᤀᤠᤱᤃᤠ᤹ ᤂᤧᤴ ᤏᤢᤖᤡᤰ ᤀᤥᤔᤧᤳᤋᤢᤱᤅᤡᤸᤗᤧᤃ ᤂᤧᤴ ᤀᤠᤱᤃᤠ᤹ ᤁᤳᤋᤢᤱᤒᤠ ᤀᤠᤛ᤻ᤛᤠᤴ ᤔᤧ᤺ᤴᤗᤳᤇ॥” 22 ᤂᤧᤴ ᤘᤣ᤹ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ. “ᤔᤣ᤺ᤴᤗᤥ. ᤁᤢᤜᤡᤱᤘᤧᤳᤋᤧᤴ ᤀᤠᤱᤃᤠ᤹ᤀᤣ ᤀᤠᤛ᤻ᤛᤠᤖᤥ. ᤂᤧᤏᤧ᤹ ᤁᤧᤛ᤻ᤛᤠᤴᤃ ᤛᤩᤧᤒᤠᤖᤥ॥” ᤁᤖ ᤋᤃᤡᤔᤧᤸᤗᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤣ᤺ᤴᤗᤥ. ᤁᤢᤛᤡᤘᤧᤳᤋᤧᤴ ᤂᤧᤏᤧ᤹ᤀᤡᤴ. ᤁᤢᤜᤡᤱᤘᤧᤳᤋᤧᤴ ᤀᤠᤱᤃᤠ᤹ᤀᤡᤴ॥” ᤁᤶᤓᤗ᤹ᤖᤡᤰ ᤜᤠᤱᤅᤡᤸᤗᤧ ᤁᤢᤍᤃᤡ ᤂᤧᤴᤜᤠ᤹ ᤐᤠ᤺ᤴᤌᤰᤋᤧᤛᤡ॥ 23 ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤁᤴ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ᤹. ‘ᤁᤢᤜᤡᤱᤘᤧᤳ ᤀᤅᤧ᤺ᤰᤘᤠᤴ ᤀᤠᤱᤃᤧᤴ॥ ᤁᤢᤛᤡᤘᤧᤳᤋᤧᤴ ᤂᤧᤏᤧ᤹ᤀᤡᤴ॥’ ᤜᤧᤰᤁᤩᤠᤱ ᤘᤣ᤹ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ᤹. ‘ᤔᤣ᤺ᤴ. ᤂᤧᤏᤧ᤹ ᤁᤧᤛ᤻ᤛᤠᤴ ᤛᤩᤧᤒᤠ. ᤁᤢᤜᤡᤱᤘᤧᤳᤋᤧᤴᤃ ᤀᤠᤱᤃᤠ᤹ᤀᤡᤴᤗᤥ॥’” 24 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤋᤠᤓᤣᤎᤡᤰ ᤋᤠᤖᤧ ᤀᤠᤒᤡᤖᤧ᤹॥” ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤋᤠᤓᤣᤎᤡᤰ ᤔᤧᤍᤠᤖᤢ ᤔᤧᤒᤡᤖᤢ॥ 25 ᤂᤧᤒᤩᤠᤱ ᤂᤢᤏᤧ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤂᤧᤴ ᤁᤢᤜᤡᤱᤘᤧᤳ ᤀᤅᤧ᤺ᤰᤘᤠᤴ ᤁᤢᤀᤠᤳ ᤏᤧᤳᤇᤡ ᤐᤥᤱᤗ ᤂᤰᤋᤧᤶᤔᤧ᤹. ᤜᤧᤰᤁᤩᤠᤱ ᤁᤢᤓᤪᤧ᤺ᤱ ᤌᤡᤰᤐᤠ ᤐᤡᤖᤧᤶᤔᤧ᤹. ᤁᤢᤓᤪᤧ᤺ᤱ ᤘᤣ᤹ᤀᤡᤴ ᤐᤡᤖᤧᤶᤔᤧ᤹॥” 26 ᤂᤧᤒᤩᤠᤱ ᤀᤠᤵᤑᤣᤰ ᤁᤢᤛ᤻ᤛᤠᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤂᤧᤴ ᤁᤢᤜᤡᤱᤘᤧᤳ ᤀᤅᤧ᤺ᤰᤘᤠ᤺ᤸᤗᤧ ᤁᤢᤶᤔᤠᤖᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤁᤢᤜᤡᤱᤘᤧᤳ ᤀᤅᤧ᤺ᤰᤘᤠᤴ ᤂᤧᤴ ᤔᤧᤴᤇᤢᤔᤠᤴᤏᤣ ᤐᤡᤖᤧᤶᤍᤣᤛᤧᤶᤔᤧ᤹॥ ᤂᤧᤴ ᤀᤅᤧ᤺ᤰᤘᤠᤴ ᤔᤧᤛᤧᤖᤧᤶᤔᤡᤴᤏᤧ᤹॥” ᤁᤖ ᤘᤣ᤹ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ᤀᤠᤱ ᤋᤣ᤹ᤔᤠ ᤔᤧᤄᤥᤀᤠᤴᤗ. ᤂᤧᤸᤗᤧᤀᤠᤱ ᤋᤣ᤹ᤔᤠ ᤔᤧᤄᤥᤛᤢᤴᤗ॥ ᤂᤧᤴ ᤀᤅᤧ᤺ᤰᤘᤠᤴ ᤁᤢᤀᤠ᤺ᤳ ᤏᤧᤳᤇᤡ ᤐᤥᤱᤗ ᤂᤰᤋᤧᤶᤔᤧ᤹॥” 27 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤄᤠᤛᤧᤴ ᤏᤡ᤺ᤴᤎᤥᤴ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤁᤢᤜᤡᤱᤘᤧᤳ ᤀᤅᤧ᤺ᤰᤘᤠᤴ ᤂᤧᤴ ᤋᤃᤡᤔᤠ ᤔᤧᤴᤇᤢᤔᤠᤴ ᤐᤡᤖᤧᤶᤍᤣᤛᤧᤶᤔᤧ᤹॥ ᤂᤧᤴ ᤀᤅᤧ᤺ᤰᤘᤠᤴ ᤔᤧᤛᤧᤖᤧᤶᤔᤡᤴᤏᤧ᤹॥ ᤂᤧᤸᤗᤧ ᤁᤢᤶᤔᤠ ᤂᤧᤴᤏᤣᤖᤥ॥” 28 ᤀᤠᤸᤗ ᤜᤠᤱᤅᤡᤸᤗᤧ ᤁᤢᤄᤠᤛᤧᤴ ᤏᤡ᤺ᤴᤎᤥ ᤐᤠ᤺ᤴᤏᤡᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢ. ᤌᤣᤀᤠᤱᤓᤧᤸᤗᤧ ᤂᤠᤛᤧᤴ ᤗᤥ᤺ᤶᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤍᤠᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤁᤳᤋᤢᤖᤧᤳᤇ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.