᥇ ᤜᤠᤱ 22 - LIFOTNTᤔᤡᤁᤠᤕᤠ᤺ᤸᤗᤧ ᤀᤠᤜᤠᤒᤧᤴ ᤐᤠ᤺ᤴᤔᤧᤳᤋᤢ ( ᥈ ᤛᤠᤵᤔᤢ ᥇᥎:᥈-᥈᥍ ) 1 ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤀᤖᤠᤔ ᤏᤢ ᤀᤡᤛᤪᤠᤀᤡᤗ ᤗᤢᤶᤔᤥ ᤌᤱ ᤔᤧᤒᤥ᤺ᤰᤂᤧᤴ॥ 2 ᤁᤖ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤍᤢᤶᤛᤧ ᤕᤥ ᤕᤧ॥ 3 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤖᤠᤔᤥᤋ-ᤃᤡᤗᤠᤍᤧᤴ ᤀᤠᤏᤡ᤹ᤀᤡᤴ ᤑᤠ᤹ᤀᤠᤱ ᤌᤣ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅ ᤜᤧᤰᤁᤣᤛᤠᤱ ᤀᤖᤠᤔᤒᤠ ᤜᤠᤱᤅᤡᤴᤗᤠᤶ ᤂᤧᤴ ᤏᤢ᤺ᤰᤔᤠᤖᤧ ᤗᤠᤃᤡ ᤀᤠᤏᤡ᤹ ᤌᤣᤀᤠᤱ ᤀᤠᤴᤈᤥᤃᤢᤶᤔᤡᤴᤒᤡ᥅” 4 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤕᤜᤥᤛᤠᤐᤠᤋᤧᤴ ᤛᤣ᤺ᤴᤍᤥᤛᤢ. “ᤖᤠᤔᤥᤍ-ᤃᤡᤗᤠᤍᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤌᤣ ᤀᤠᤍᤠᤱᤒᤠ ᤀᤠᤱᤃᤠ᤹ᤏᤢ ᤁᤧᤒᤣ᤺ᤰᤐᤡ᥅” ᤕᤜᤥᤛᤠᤐᤠᤋᤖᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤧᤰᤋᤱᤒᤠᤀᤣᤀᤠ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤜᤧᤰᤋᤱᤒᤠᤛᤡ. ᤀᤠᤱᤃᤠ᤹ ᤀᤠᤀᤴᤜᤠ᤹ ᤀᤠᤍᤠᤱᤒᤠᤖᤧᤀᤣ ᤁᤧᤀᤴᤜᤠ᤹ ᤜᤧᤰᤋᤱᤒᤠᤛᤡ॥” 5 ᤁᤖ ᤕᤜᤥᤛᤠᤐᤠᤋᤖᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤀᤰᤂᤣᤀᤠᤱ ᤔᤧᤳᤋᤢ. “ᤋᤃᤡ ᤕᤜᤘᤣ ᤍᤠᤱᤒᤧᤴ ᤛᤢᤈᤠ ᤏᤠ᤺ᤰᤋᤧ᤹॥” 6 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤡᤵ ᤗᤡᤛᤡ ᤕᤠᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤛᤢᤵᤛᤢᤛᤡᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤱᤃᤠ᤹ ᤖᤠᤔᤥᤋ-ᤃᤡᤗᤠᤍᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤐᤣ᤺ᤰᤁᤠᤒᤡ ᤔᤧᤒᤣ᤺ᤰᤁᤠᤴᤒᤡ᥅” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤴ ᤂᤧᤴ ᤜᤢᤰᤛᤢᤵᤋᤢ᤹॥” 7 ᤁᤖ ᤕᤜᤥᤛᤠᤐᤠᤋᤖᤧ ᤛᤣ᤺ᤴᤍᤥᤛᤢᤛᤡ. “ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤵᤔᤥ ᤜᤠ᤺ᤳᤋᤠᤱ ᤜᤥ᤺ᤵᤐᤡ᥅ ᤀᤠᤏᤡ᤹ ᤂᤧᤱᤜᤠ᤹ ᤛᤣ᤺ᤴᤍᤥᤔᤠ ᤀᤠᤛᤢᤰᤋᤢᤶᤛᤡᤶ᤹॥” 8 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤕᤜᤥᤛᤠᤐᤠᤋᤧᤴ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤠᤗᤠᤶ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤔᤏᤠ ᤌᤡᤰᤁ ᤘᤠ᤹. ᤁᤖ ᤀᤠᤱᤃᤠ᤹ ᤂᤧᤴ ᤆᤡ᤺ᤳᤋᤢᤱ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤴ᤹. ᤁᤖ ᤀᤠᤓᤧᤸᤗᤧᤛᤠᤱ ᤋᤠᤵᤑᤧ᤺ᤶᤒᤠᤖᤰ ᤐᤠ᤺ᤳᤋᤢ॥ ᤂᤧᤱᤃ ᤕᤡᤶᤗᤠᤖᤧ ᤁᤢᤛ᤻ᤛᤠ ᤔᤡᤁᤠᤕᤠᤴᤗᤥ॥” ᤕᤜᤥᤛᤠᤐᤠᤋᤖᤧ ᤏᤢᤃᤵ ᤐᤡᤖᤢ. “ᤜᤠᤱᤅᤡᤸᤗᤧ ᤜᤧᤰᤁᤣ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ॥” 9 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤌᤡᤰᤐᤠ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤕᤡᤶᤗᤠᤖᤧ ᤁᤢᤛ᤻ᤛᤠ ᤔᤡᤁᤠᤕᤠᤴ ᤀᤠᤸᤗᤥ ᤋᤠᤖᤧ᤹ᤀᤥ॥” 10 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤏᤢ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤜᤠᤱᤈᤠᤱ ᤆᤠᤰᤂᤧᤛᤢᤀᤠᤱ ᤛᤠᤔᤖᤡᤕᤠᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤆᤠᤎᤠᤶᤔᤠᤍᤧᤴᤏᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤠᤱᤕᤢᤱᤏᤠᤜᤠ᤹ᤀᤥ ᤕᤢᤅᤧᤃᤖᤧᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤂᤢᤴᤇᤡ᤹ ᤋᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤃᤧ॥ 11 ᤁᤣᤏᤠᤏᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤸᤗᤧᤃ ᤑᤧᤴᤈᤣ᤹ ᤋᤠᤱᤜᤠ᤹ ᤌᤃᤢᤀᤠᤱ ᤁᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤖᤠᤔᤡᤜᤠ᤹ ᤔᤧᤶᤔᤧᤰᤏᤧᤴᤗ ᤌᤠᤖᤡᤰᤁᤣ ᤁᤴ ᤋᤠᤱᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤆᤡᤎᤰ ᤆᤡᤎᤰ ᤁᤧᤎᤃᤢᤛᤡ᤹॥’” 12 ᤘᤣ᤹ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤜᤧᤰᤁᤣᤗ᤹ᤖᤡᤰᤁᤣ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤃᤧ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤳᤋᤧ᤹ᤀᤠᤱ ᤏᤠ᤺ᤴᤍᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤴ ᤂᤧᤴ ᤜᤢᤰᤛᤢᤵᤋᤢ᤹॥” 13 ᤔᤡᤁᤠᤕᤠᤴ ᤀᤢ᤺ᤵᤔᤠ ᤋᤠ᤺ᤵᤔᤠᤖᤧ ᤗᤠᤃᤡ ᤁᤧᤒᤣ᤺ᤰᤐᤠ ᤀᤡᤱᤄᤱᤛᤠᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤘᤣ᤹ᤜᤠ᤹ᤖᤧᤃ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤜᤠᤱᤅᤡᤴ ᤏᤢ᤹ᤋᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤰ॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰᤁᤡᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤈᤠ᤺ᤰᤁᤡᤴᤏᤢᤀᤣ ᤋᤱᤗ. ᤏᤢᤒᤠ ᤐᤠᤴ ᤐᤠ᤺ᤳᤋᤧ᤹ᤀᤥ॥” 14 ᤁᤖ ᤔᤡᤁᤠᤕᤠ᤺ᤸᤗᤧ ᤔᤧᤳᤋᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤆᤩᤠ ᤔᤧᤳᤋᤠ. ᤜᤠᤒᤠ ᤂᤧᤴᤗᤰ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹॥” 15 ᤀᤠᤸᤗ ᤂᤢᤏᤧ᤹ ᤁᤧᤖᤧᤍᤩᤧ ᤂᤧᤒᤩᤠᤱ ᤀᤠᤜᤠᤒ ᤜᤠᤱᤅᤡᤸᤗᤧ ᤂᤢᤏᤧ᤹ ᤛᤣ᤺ᤴᤗᤠᤵᤋᤢ. “ᤔᤡᤁᤠᤕᤠᤀᤣ. ᤖᤠᤔᤥᤋ-ᤃᤡᤗᤠᤍᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤀᤠᤏᤡᤃᤣ ᤐᤣᤃᤡᤃᤧᤒᤡ. ᤀᤡ ᤔᤧᤒᤣᤃᤡᤃᤧᤴᤒᤡ᥅” ᤔᤡᤁᤠᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤌᤱᤅᤥ ᤑᤳᤋᤧᤶᤔᤧ᤹ᤀᤠᤱ ᤏᤠ᤺ᤴᤍᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤴ ᤂᤧᤴ ᤜᤢᤰᤛᤢᤵᤋᤢ᤹॥” 16 ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤧᤏᤧ᤹ ᤛᤧᤰᤂᤠᤒᤠ ᤐᤠ᤺ᤴᤗᤰ ᤔᤧᤳᤋᤠᤱᤅᤧ᤹. ᤘᤣ᤹ ᤐᤠᤴ ᤔᤧᤒᤠ᤺ᤳᤋᤧᤴᤏᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤰᤂᤧᤴᤗᤧᤱ ᤂᤧᤏᤧ᤹ ᤔᤠᤱᤜᤧᤰᤛᤡᤱᤔᤠ ᤐᤠᤱᤏᤧᤒᤣ᥅” 17 ᤂᤧᤒᤩᤠᤱ ᤔᤡᤁᤠᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ᤃ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤸᤗᤢᤰᤁᤶᤒᤠ ᤔᤣ᤺ᤴᤏᤣᤒᤠ ᤔᤧᤸᤗᤢᤰᤜᤠ᤹ ᤁᤥ᤺ᤰᤔᤠᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧᤀᤠᤱ ᤔᤧᤘᤕᤧᤒᤠ ᤜᤧᤰᤁᤣ ᤏᤡᤛᤢᤱᤛᤡᤱ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ—‘ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤍᤠᤱᤒᤠ ᤜᤥᤵ॥ ᤁᤧᤖᤧᤰ ᤛᤏᤠᤖᤢᤱᤅᤠᤱ ᤜᤡᤶᤔᤥ ᤔᤧᤒᤣ᤺ᤰᤗᤖᤥ॥’” 18 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤂᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤋᤠᤵᤑᤧ᤺ᤶᤒᤠᤖᤰ ᤐᤠ᤺ᤳᤋᤢ᤹ ᤏᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤴ᤹ ᤑᤠ᤹ᤀᤠᤱ ᤌᤣ ᤂᤧᤏᤧ᤹ ᤔᤧᤳᤏᤧᤀᤠᤱ ᤔᤧᤘᤕᤧᤏᤧᤶᤒᤡ᥅” 19 ᤔᤡᤁᤠᤕᤠ᤺ᤸᤗᤧ ᤀᤠᤸᤗᤛᤠᤱ ᤐᤠ᤺ᤳᤋᤢ. “ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤵᤛᤧ᤹—ᤕᤜᤘᤣ ᤍᤠᤱᤒᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤆᤢᤵᤛᤠᤱ ᤗᤧᤵᤔᤠᤱ ᤏᤢ ᤑᤧᤴᤇᤠᤱ ᤗᤧᤵᤔᤠᤱ ᤕᤧᤵᤛᤢᤛᤡᤀᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤕᤢᤅᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ 20 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. ‘ᤖᤠᤔᤥᤋ-ᤃᤡᤗᤠᤍᤧᤴ ᤌᤱᤅᤥ ᤑᤵᤔᤠᤀᤠᤱ ᤂᤧᤵᤔᤥ ᤛᤡᤔᤠᤖᤧ ᤗᤠᤃᤡ ᤜᤠ᤺ᤳᤗᤧ ᤀᤠᤜᤠᤒᤧᤴ ᤜᤢᤛᤢᤒᤣ᥅’ “ᤌᤡᤰᤗᤧ ᤀᤰᤋᤱᤒᤠ ᤛᤢᤈᤠ ᤏᤢ ᤘᤣ᤹ᤀᤡᤸᤗᤧ ᤘᤣ᤹ ᤛᤢᤈᤠ ᤐᤡᤖᤢ॥ 21 ᤐᤡᤵᤔᤡᤖᤡ ᤁᤢᤛᤥ᤺ᤴᤍᤡᤀᤥ ᤕᤠᤶᤛᤠᤶ ᤌᤡᤰ ᤋᤃᤡ ᤋᤩᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤠᤱ ᤕᤧᤶᤛᤡᤱᤅᤠᤱ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤂᤧᤴ ᤜᤢᤛᤢᤱ᤹॥’ 22 “ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤥᤛᤢ. ‘ᤀᤠᤰᤂᤣᤀᤠᤱᤒᤣ᥅’ “ᤂᤧᤸᤗᤧ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤀᤠᤜᤠᤒᤖᤧ ᤁᤧᤖᤧᤰ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤗᤳᤇᤠ ᤕᤠᤶᤛᤠᤶ ᤐᤥᤱᤅᤠ॥’ “ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. ‘ᤂᤢᤏᤧ᤹ ᤜᤢᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥᤱ᤹॥ ᤐᤣᤃᤧ᤹. ᤐᤣᤃᤧ᤹ᤀᤠᤱ ᤜᤧᤰᤁᤣᤀᤣ ᤆᤥᤃᤧ᤹॥’” 23 “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤴ ᤁᤧᤖᤧᤰ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤕᤠᤶᤛᤠᤶ ᤁᤣᤋᤢ ᤐᤡᤖᤢᤛᤡᤀᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤔᤧᤰᤔᤧᤴ ᤀᤢᤘᤠ ᤆᤥᤃᤢ ᤛᤢᤖᤢᤀᤠᤱ ᤘᤠ᤹॥” 24 ᤂᤧᤒᤩᤠᤱ ᤁᤣᤏᤠᤏᤠᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤴ ᤌᤥ ᤌᤠᤅᤧᤀᤠᤱ ᤔᤡᤁᤠᤕᤠᤜᤖᤧ ᤁᤢᤴᤍᤧᤱᤒᤧᤴ ᤑᤰᤂᤢ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤳᤋᤡᤗᤠᤶ ᤐᤥ᤺ᤰᤂᤧᤀᤠᤱ ᤀᤠᤱᤃᤠ᤹ᤗᤠᤶ ᤂᤧᤏᤧ᤹ᤏᤢ ᤐᤠ᤺ᤳᤇᤧ ᤐᤣᤒᤣ᥅” 25 ᤔᤡᤁᤠᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤁᤱᤃ ᤂᤧᤏᤧ᤹ ᤀᤠᤵᤑᤣᤰ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤆᤡᤱᤛᤡᤱᤛᤧ ᤁᤧᤒᤣ᤺ᤰᤐᤠ ᤕᤧᤴᤏᤥ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥” 26 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤛᤢᤜᤠᤱᤕᤢᤰᤐᤠ ᤌᤡᤰ ᤀᤡᤱᤈᤠᤱ ᤐᤡᤖᤢ. “ᤔᤡᤁᤠᤕᤠᤴ ᤋᤧᤶᤛᤧ᤹. ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤕᤢᤰᤛᤠᤒᤠ ᤀᤔᤥᤏᤧᤴ ᤏᤢ ᤜᤠᤱᤛᤠ ᤕᤥᤀᤠᤛᤧᤴ ᤜᤢᤰᤛᤢᤵᤋᤧᤛᤧ᤹. 27 ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤧᤛᤧ᤹. ‘ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤔᤏᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤛᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢᤖᤡᤰ ᤋᤠᤖᤡᤰ ᤔᤧ᤺ᤴᤏᤢᤱ ᤔᤧᤶᤓᤧᤴᤏᤣ ᤌᤠᤖᤡᤰ ᤂᤢᤏᤧ᤹ ᤂᤖᤧ᤺ᤱ ᤏᤢ ᤆᤫᤠ᤺ᤳᤗᤰ ᤐᤡᤖᤧᤛᤧ᤹ ᤘᤣ᤹ ᤌᤧᤔᤠᤀᤠᤱ ᤔᤧᤒᤡᤖᤧᤛᤧᤴᤏᤧ᤹॥’” 28 ᤔᤡᤁᤠᤕᤠ᤺ᤸᤗᤧ ᤀᤢᤘᤠ ᤆᤥᤃᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤏᤢᤖᤡᤰ ᤋᤠᤖᤡᤰᤁᤠᤱ ᤁᤧᤏᤢ᤺ᤱ ᤁᤧᤓᤧᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤗᤠᤶ ᤐᤠᤖᤧᤒᤠ ᤔᤧ᤺ᤴᤗᤳᤇ॥” ᤂᤢᤏᤧ᤹ ᤀᤠᤸᤗᤛᤠᤱ ᤕᤥ᤹ᤖᤢᤀᤠᤱ ᤐᤠ᤺ᤳᤋᤢ. “ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ᥄” ᤀᤠᤜᤠᤒᤧᤴ ᤔᤠᤛᤡᤱ ( ᥈ ᤛᤠᤵᤔᤢ ᥇᥎:᥈᥎-᥉᥊ ) 29 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤧᤴ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤖᤠᤔᤥᤋ-ᤃᤡᤗᤠᤍᤀᤥ ᤌᤥ᤺ᤰᤏᤧᤛᤡ ᤐᤣᤛᤡ॥ 30 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤆᤠᤱ ᤆᤠᤰᤂᤢᤱᤅᤠᤱ ᤌᤱᤅᤥ ᤗᤠ᤺ᤳᤋᤠ. ᤁᤖ ᤂᤧᤏᤧ᤹ᤃ ᤜᤠᤱᤈᤠᤱᤅᤣ ᤆᤠᤰᤂᤧ᤹॥” ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤁᤢᤛᤣ᤺ᤴ ᤏᤡᤔᤧᤶᤍᤧᤵᤔᤏᤠᤒᤠ ᤆᤠᤱ ᤆᤠᤰᤂᤢᤀᤠᤱ ᤌᤱᤅᤥ ᤐᤣ॥ 31 ᤀᤠᤖᤠᤔᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤀᤴᤗᤠᤜᤠ᤹ᤀᤥᤒᤠ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤌᤰᤔᤥᤒᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ. “ᤜᤠᤱᤜᤠ᤹ᤏᤢᤖᤰ ᤌᤠᤰᤋᤧᤶᤔᤧ᤹ ᤘᤣ᤹ ᤆᤢᤰᤐᤠ ᤕᤶᤒᤠ ᤜᤠ᤺ᤳᤏᤢᤀᤠᤱ ᤔᤧᤎᤰᤋᤧᤶᤔᤡᤴᤏᤧ᤹॥” 32 ᤀᤠᤸᤗ ᤀᤴᤗᤠᤎᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤕᤜᤥᤛᤠᤐᤠᤋᤧᤴ ᤔᤧᤏᤡᤛᤢᤀᤠᤱ ᤂᤢᤴᤇᤡ᤹ ᤀᤰᤂᤣ ᤔᤧᤀᤡ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴᤏᤣ ᤀᤡᤛᤪᤠᤀᤡᤗᤒᤠ ᤜᤠᤱᤗᤥ॥” ᤂᤧᤱᤜᤠ᤹ ᤂᤢᤏᤧ᤹ ᤑᤵᤔᤠᤖᤧ ᤗᤠᤃᤡ ᤜᤡᤸᤗᤡᤰ ᤔᤧᤜᤡᤛᤡᤱ. ᤁᤖ ᤀᤠᤸᤗ ᤕᤜᤥᤛᤠᤐᤠᤋᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. 33 ᤂᤧᤒᤩᤠᤱ ᤂᤧᤴ ᤀᤴᤗᤠᤎᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤜᤠᤱ ᤔᤧ᤺ᤴᤗᤳᤇ ᤑᤠ᤹ᤀᤠᤱ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤠ᤺ᤵᤔᤠ ᤔᤧᤏᤠ᤹ᤖᤢ॥ 34 ᤁᤖ ᤁᤢᤓᤠ ᤌᤡᤰᤗᤧ ᤁᤢᤗᤡᤴ ᤗᤧ᤹ᤖᤢᤀᤠᤱ ᤀᤡᤔᤧᤴᤏᤡ ᤂᤠᤔᤧᤴᤏᤡ ᤋᤥ᤺ᤱᤅᤡᤴ ᤀᤠᤒᤢᤍᤣᤛᤢ. ᤜᤧᤰᤁᤩᤠᤱ ᤂᤧᤴ ᤋᤥ᤺ᤱᤅᤡᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤁᤢᤛᤠ᤺ᤱᤒᤣ ᤛᤧ᤺ᤵᤈᤠᤱᤅᤡᤸᤗᤧ ᤁᤢᤍᤢᤶᤒᤣᤀᤥ ᤕᤠᤱᤄᤢ॥ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤀᤴᤗᤠᤎᤠ ᤁᤧᤗᤥᤱᤒᤧᤴ ᤔᤧᤳᤋᤢ. “ᤀᤴᤗᤠᤎᤠᤴ ᤜᤡᤛᤧ᤹ᤀᤠᤱ ᤀᤠᤱᤃᤠ᤹ ᤌᤱᤅᤥᤗᤠᤶ ᤗᤠ᤺ᤰᤁᤠᤳ ᤋᤣ᤹ᤖᤠᤱᤅᤧ᤹॥ ᤀᤠᤱᤃᤠ᤹ ᤁᤠ᤺ᤴᤍᤠᤱᤅᤠᤱ ᤐᤳ॥” 35 ᤗᤧᤴᤍᤡᤰ ᤏᤠᤶᤎᤠᤎᤠ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤜᤠᤱᤅᤡᤴ ᤁᤢᤀᤴᤗᤠᤎᤠᤀᤥ ᤋᤰᤛᤡᤱᤅᤠᤱ ᤀᤖᤠᤔᤡᤜᤠ᤹ ᤋᤰᤔᤧᤳᤋᤢᤛᤡᤀᤠᤱ ᤐᤳᤇᤧ॥ ᤂᤢᤏᤧ᤹ ᤁᤠ᤺ᤴᤍᤧᤒᤠᤍᤧᤴᤏᤥᤗᤠᤶ ᤁᤧᤗ᤺ᤶᤒᤠ ᤔᤠᤰᤂᤡᤴ ᤀᤴᤗᤠᤎᤠᤀᤥᤏᤢ ᤛᤡᤃᤠᤱᤅᤣ ᤘᤃᤢᤛᤧᤖ ᤐᤳᤇᤧ. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤢ᤺ᤴᤎᤥ ᤂᤢᤏᤧ᤹ ᤛᤩᤧ॥ 36 ᤏᤠᤶᤎᤩᤧᤖ ᤐᤳᤇᤧᤸᤗᤧ ᤌᤰᤛᤢᤒᤠᤜᤠ᤹ᤀᤥ ᤀᤰᤋᤱᤒᤠ ᤀᤡᤰᤗᤠ ᤁᤧᤖᤧ. “ᤁᤧᤖᤧᤰ ᤔᤏᤠᤜᤠ᤹ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤐᤠᤱᤈᤢᤶᤜᤠ᤹ᤀᤥ ᤏᤢ ᤗᤠᤈᤣ᤹ᤀᤥ ᤐᤣᤃᤧᤶᤔᤧ᤹ᤀᤥ᥄” 37 ᤁᤶᤓᤗ᤹ᤖᤡᤰ ᤀᤠᤜᤠᤒ ᤜᤠᤱᤅᤡᤴ ᤛᤩᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠ ᤔᤧᤕᤢᤖᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤠᤶᤓᤠ ᤂᤧᤵᤔᤥ ᤔᤧᤈᤡᤰᤂᤢ॥ 38 ᤂᤧᤱᤜᤠ᤹ᤖᤧ ᤂᤧᤴ ᤀᤴᤗᤠᤎᤠᤴ ᤛᤠᤔᤖᤡᤒᤠ ᤗᤳᤇᤠ ᤘᤖᤰᤁᤥ ᤘᤠᤔᤧᤜᤵᤋᤢ. ᤁᤧᤳᤏᤡᤔᤠᤜᤠ᤹ᤖᤧ ᤂᤧᤴ ᤂᤢᤴᤇᤡ᤹ ᤘᤖᤢ᤺ᤶᤛᤡᤱᤔᤠ ᤘᤠᤜᤵᤛᤡᤱᤔᤠᤍᤧᤴ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤢᤘᤠ ᤐᤥ᤺ᤰᤂᤧᤒᤠ ᤁᤢᤀᤡᤛᤡᤰ ᤂᤩᤠᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤔᤠᤰᤂᤡᤴ ᤔᤧᤗᤠᤃᤢ ᤔᤧᤈ॥ 39 ᤀᤠᤜᤠᤒᤖᤧ ᤁᤢᤜᤠᤱᤕᤢᤰ ᤕᤧᤶᤔᤥ ᤁᤧᤒᤥᤱᤒᤠ ᤘᤣ᤹ ᤜᤡᤴᤍᤥᤰ ᤐᤠ᤺ᤴᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤋᤰᤔᤡᤒᤠ ᤁᤣ᤺ᤱᤅᤡᤸᤗᤧ ᤛᤢ᤺ᤵᤋᤢᤀᤠᤱ ᤁᤧᤄᤧᤶᤛᤡᤱᤒᤠ ᤆᤥᤃᤢᤒᤠ ᤜᤠᤱᤜᤡᤶᤔᤡᤴ ᤏᤢ ᤂᤢᤏᤧ᤹ ᤜᤠᤱᤕᤰᤁᤡᤸᤗᤧ ᤁᤵᤔᤠ ᤐᤠᤱᤄᤢᤛᤡᤒᤠ ᤕᤧᤰᤕᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 40 ᤀᤠᤜᤠᤒᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤀᤜᤈᤩᤠᤜᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋ ( ᥈ ᤛᤠᤵᤔᤢ ᥈᥆:᥉᥇–᥈᥇:᥇ ) 41 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤀᤠᤛᤠᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ॥ 42 ᤀᤠᤸᤗ ᤕᤜᤥᤛᤠᤐᤠᤋᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤈᤢᤒᤠ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤸᤜᤡᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 43 ᤁᤧᤖᤧᤰ ᤐᤠ᤺ᤴᤏᤥ ᤕᤜᤥᤛᤠᤐᤠᤋᤧᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤠᤶᤔᤥ ᤗᤠᤱᤄᤣᤃᤧ. ᤜᤧᤰᤁᤩᤠᤱ ᤂᤧᤴᤗᤠᤶ ᤆᤒᤧ᤺ᤳᤇᤡᤰᤁᤠᤱ ᤏᤠᤜᤠᤱ ᤁᤳᤏᤠᤜᤠᤱ ᤔᤧᤗ᤹ᤖᤧᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢ॥ ᤜᤧᤰᤁᤣᤛᤠᤱ ᤁᤥ᤺ᤰᤔᤠᤜᤠ᤹ᤀᤥᤒᤠ ᤛᤧᤘᤠ ᤆᤥ᤺ᤰᤔᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤔᤧᤄᤧᤳᤋᤢᤴ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤵᤔᤥ ᤀᤠᤸᤗᤛᤠᤱ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖ ᤜᤧᤰᤁᤩᤠᤱ ᤛᤢᤰᤐᤠ ᤔᤧᤜᤠ᤺ᤴᤍᤢᤖ ᤔᤧᤘᤕᤧ॥ 44 ᤕᤜᤥᤛᤠᤐᤠᤋᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴᤏᤢᤀᤠᤱ ᤋᤅᤧᤀᤠᤱ ᤘᤕᤧ॥ 45 ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤜᤡᤴᤍᤥᤰ ᤐᤠ᤺ᤴᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤌᤥᤒᤥ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤢᤗᤡᤱᤍᤥ ᤔᤧᤃᤧᤳᤋᤢᤒᤠ ᤐᤠ᤺ᤴᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤱᤅᤠᤱᤒᤡ᥅ 46 ᤂᤢᤏᤧ᤹ ᤁᤢᤶᤒᤠ ᤀᤠᤛᤠᤖᤧ ᤁᤢᤜᤠᤱᤕᤢᤰ ᤕᤧᤶ ᤀᤣᤃᤠᤱ ᤂᤧᤵᤔᤥ ᤀᤠᤸᤗᤛᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤔᤧᤴᤇᤢᤔᤠᤖᤧ ᤔᤧᤓᤳᤇᤢᤛᤡᤒᤠ ᤑᤧᤳᤁᤧᤗᤠ᤹ᤒᤠ ᤔᤠᤱᤎᤠ᤺ᤴᤏᤥᤒᤠ ᤕᤧᤶᤒᤡᤳᤇᤠᤜᤠ᤹ ᤂᤢᤏᤧ᤹ ᤗ᤺ᤳᤋᤢᤍᤣᤛᤢᤛᤡ॥ 47 ᤂᤧᤴ ᤕᤧᤶᤔᤥ ᤀᤧᤍᤥᤔ ᤗᤠᤈᤣ᤹ᤀᤥ ᤜᤠ᤺ᤳᤋᤠᤱ ᤜᤠᤱ ᤜᤥ᤺ᤵᤋᤧ॥ ᤕᤢᤰ ᤁᤧᤄᤥᤒᤠ ᤁᤢᤓᤠ ᤁᤢᤓᤠ᤹ᤒᤠᤱ ᤌᤡᤰᤗᤧ ᤕᤢᤰ ᤆᤥᤃᤢ॥ 48 ᤀᤥᤐᤡᤖᤗᤠᤶ ᤛᤠᤶᤔᤩᤠᤱ ᤌᤠᤰᤔᤠᤖᤧ ᤗᤠᤃᤡ ᤕᤜᤥᤛᤠᤐᤠᤋᤖᤧ ᤁᤧᤈᤠᤵᤐᤠ ᤗᤧᤱᤜᤱᤒᤠ ᤘᤠᤗᤠᤎᤠᤜᤠ᤹ ᤆᤥᤃᤢᤛᤡ॥ ᤁᤖ ᤀᤣᤛᤩᤥᤏ-ᤃᤣᤒᤣᤖᤀᤥ ᤂᤧᤴ ᤘᤠᤗᤠᤎᤠᤜᤠ᤹ ᤕᤷᤃᤧᤰ ᤘᤷᤃᤧᤰ ᤔᤧᤕᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤘᤖ᤺ᤱᤅᤥᤀᤣ ᤐᤣ᤺ᤰᤔᤠ ᤔᤧᤴᤇᤢᤰᤋᤧᤴ॥ 49 ᤂᤧᤴ ᤕᤧᤶᤔᤥ ᤀᤠᤜᤠᤒᤖᤧ ᤁᤢᤛ᤻ᤛᤠ ᤀᤜᤈᤩᤠᤜ᤺ᤸᤗᤧ ᤕᤜᤥᤛᤠᤐᤠᤋᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤔᤏᤠᤜᤠ᤹ᤏᤢ ᤛᤥᤖᤡᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤘᤠᤗᤠᤎᤠᤀᤥ ᤔᤧᤒᤣ᤺ᤰᤗ॥” ᤁᤖ ᤕᤜᤥᤛᤠᤐᤠᤋᤧᤴ ᤔᤧᤍᤧᤴᤍᤧᤴ॥ 50 ᤂᤧᤴ ᤀᤣᤃᤠᤱ ᤕᤜᤥᤛᤠᤐᤠᤋᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤂᤢᤴᤇᤡ᤹ᤏᤢ ᤛᤥᤖᤡᤰ ᤔᤧᤏᤧᤛ᤻ᤛᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤜᤥᤖᤠᤔᤧᤴ ᤂᤢᤏᤧ᤹ ᤁᤢᤀᤣᤃᤠᤱ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤜᤈᤩᤠᤜ 51 ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤕᤢᤰ ᤕᤧᤶ ᤌᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤀᤠᤜᤠᤒᤖᤧ ᤁᤢᤛ᤻ᤛᤠ ᤀᤜᤈᤩᤠᤜᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤠ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 52 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤒᤠ ᤏᤢ ᤁᤢᤶᤔᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤶᤔᤥ ᤂᤢᤏᤧ᤹ ᤗᤠᤱᤄᤣᤃᤧ॥ 53 ᤂᤢᤏᤧ᤹ ᤒᤠᤗ ᤔᤠᤱᤅᤡᤴ ᤛᤧᤘᤠ ᤔᤧᤳᤋᤢᤀᤠᤱ ᤂᤧᤴ ᤔᤠᤱᤛᤧᤘᤠ ᤔᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤆᤥᤃᤢᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤑᤥ᤺ᤰᤂᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.