᥇ ᤜᤠᤱ 21 - LIFOTNTᤏᤠᤒᤥᤋᤖᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵ 1 ᤁᤢᤓᤠ ᤕᤧᤶ ᤀᤣᤃᤠᤱ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤗᤳᤇᤠ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤡᤴᤍᤥᤰ ᤌᤡᤰ ᤐᤥ᤺ᤰᤂᤧ॥ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤕᤡᤈᤖᤣᤗᤀᤥ ᤛᤠᤔᤖᤡᤕᤠᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤜᤠᤱᤜᤡᤶ ᤐᤣᤛᤠᤱ ᤏᤧᤛ᤻ᤛᤧ॥ 2 ᤀᤠᤜᤠᤒᤖᤧ ᤏᤠᤒᤠᤋᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤀᤠᤱᤃᤠ᤹ ᤏᤢᤎᤡᤛᤠᤰᤆᤡ᤹ ᤗᤣ᤺ᤵᤔᤠᤖᤧ ᤗᤠᤃᤡ ᤐᤡᤖᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤱᤃᤠ᤹ ᤀᤠᤜᤠᤱᤜᤡᤶᤔᤡᤸᤗᤧ ᤁᤢᤒᤣᤛᤠᤱᤅᤣ ᤏᤧ॥ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤂᤧᤴᤏᤢ᤺ᤸᤗᤧᤀᤠᤱ ᤏᤢᤒᤠ ᤘᤣ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤌᤡᤰ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧ. ᤀᤡᤃᤪ ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧᤓᤃᤪ ᤀᤠᤰᤂᤩᤠᤖᤡᤰ ᤁᤢᤔᤧᤸᤗᤢᤱ ᤕᤠᤱᤄᤢ᤹ ᤀᤠᤱᤃᤠ᤹ ᤂᤧᤴ ᤐᤡᤏᤧ॥” 3 ᤁᤖ ᤏᤠᤒᤥᤋᤖᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤗᤰᤂᤥᤔᤠᤴ ᤂᤧᤏᤧ᤹ ᤐᤡᤔᤠ ᤔᤧᤶᤒᤥᤱᤔᤏᤠᤒᤠ ᤆᤥᤃᤢᤖᤖᤥ॥” 4 ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤧᤴ ᤛᤡᤳᤇᤡᤱᤅᤠᤱ ᤁᤢᤕᤠ᤺ᤰᤗᤧ᤹ᤖᤧᤖ ᤜᤡᤶᤔᤥ ᤐᤣ. ᤌᤣᤀᤠᤱᤓᤧᤸᤗᤧ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤀᤠᤶᤒᤠ ᤗᤠᤶᤒᤠᤒᤠ ᤗᤰᤂᤥᤔᤠᤴ ᤀᤠᤱᤃᤠ᤹ ᤂᤧᤏᤧ᤹ ᤔᤧᤒᤡᤏᤧᤴ॥” ᤂᤢᤏᤧ᤹ ᤁᤢᤏᤧᤳᤏᤠᤀᤥ ᤛᤡᤳᤇᤡᤱᤅᤠᤱ ᤜᤠᤒᤠ ᤀᤡᤵᤛᤧᤀᤠᤱ ᤏᤧᤛ᤻ᤛᤧ ᤜᤧᤰᤁᤩᤠᤱ ᤁᤢᤈᤠ ᤆᤠᤔᤠ ᤔᤧᤍᤧᤴᤍᤧᤴ॥ 5 ᤂᤢᤏᤧ᤹ ᤁᤢᤔᤣᤳ ᤀᤡᤈᤣᤒᤣᤗᤧᤴ ᤋᤩᤧᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤛᤡᤳᤇᤡᤱᤒᤠᤒᤣ᥅ ᤂᤧᤏᤧ᤹ ᤌᤣᤀᤠᤱ ᤌᤧᤔᤠᤀᤠᤱ ᤁᤧᤴᤈᤏᤧᤶᤒᤠᤒᤣ᥅” 6 ᤂᤢᤏᤧ᤹ ᤀᤡᤈᤣᤒᤣᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤡᤈᤣᤖᤣᤗᤡ ᤏᤠᤒᤥᤋᤧᤴ ᤔᤧᤳᤋᤢᤱ. ‘ᤂᤧᤏᤧ᤹ ᤁᤧᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤀᤠᤱᤃᤠ᤹ ᤀᤡᤱᤔᤠ ᤐᤡᤖᤠᤱᤅᤧ᤹. ᤀᤡᤃᤪ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤏᤧ᤹ ᤁᤧᤛᤡᤖᤠ᤹ ᤁᤧᤎᤠᤱᤒᤠ ᤘᤣ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧ॥’ ᤁᤖ ᤂᤢᤏᤧ᤹ ᤔᤧᤳᤋᤠᤱ. ‘ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤂᤧᤏᤧ᤹ ᤔᤧᤒᤡᤏᤧᤴ॥’” 7 ᤂᤢᤏᤧ᤹ ᤁᤢᤔᤣᤳ ᤀᤡᤈᤣᤒᤣᤗᤖᤧ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ᤀᤥ ᤜᤠᤱ ᤁᤧᤒᤥᤱᤒᤠ ᤀᤠᤍᤠᤱᤒᤠᤖᤧ ᤀᤰᤂᤣᤗ᤹ᤖᤡᤰ ᤕᤠ᤺ᤶᤒᤰ ᤁᤧᤈᤥᤃᤢᤒᤡ᥅ ᤐᤥᤃᤧ᤹ᤀᤠᤱ ᤁᤢᤈᤠ ᤆᤧ᤹ ᤌᤢᤅᤧ᤹ ᤜᤧᤰᤁᤩᤠᤱ ᤕᤧᤕᤧ ᤗ᤹ᤖᤧ᤹॥ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤀᤠᤱᤃᤠ᤹ ᤂᤧᤏᤧ᤹ ᤜᤡᤛᤢᤱ ᤐᤡᤏᤧ॥” 8 ᤂᤧᤒᤩᤠᤱ ᤀᤡᤈᤣᤒᤣᤗᤖᤧ ᤀᤠᤜᤠᤒᤖᤧ ᤁᤢᤔᤡᤱᤅᤥ ᤛᤰᤀᤡᤱᤄᤱ ᤛᤠᤵᤐᤣ᤺ᤳᤋᤠᤜᤠ᤹ ᤛᤠᤵᤋᤢ. ᤂᤧᤵᤔᤥ ᤜᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵᤐᤡᤴ ᤕᤢᤰᤋᤢ. ᤜᤧᤰᤁᤩᤠᤱ ᤏᤠᤒᤠᤋᤖᤧ ᤁᤢᤕᤧᤰᤕᤰᤁᤥ ᤂᤢᤏᤧ᤹ᤏᤢ ᤁᤧᤕᤢᤱᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤋᤢᤶᤔᤩᤠᤱᤜᤠᤱᤜᤠ᤹ᤀᤥ ᤜᤠᤅᤢᤍᤣᤛᤢ॥ 9 ᤁᤴ ᤛᤰᤀᤡᤱᤄᤱ ᤛᤠᤵᤐᤣ᤺ᤳᤋᤠᤜᤠ᤹ᤀᤥ ᤂᤢᤏᤧ᤹ ᤀᤰᤋᤱᤒᤠ ᤛᤠᤵᤋᤢ—“ᤋ᤺ᤰᤏᤧᤳ ᤕᤢᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤡᤰᤕᤠᤴ ᤀᤢᤘᤠ ᤆᤥᤃᤧ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤠᤒᤥᤋᤧᤴ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤢᤰᤏᤠᤀᤥ ᤕᤢᤰᤂᤧ᤹॥ 10 ᤁᤖ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤏᤠ ᤏᤧᤳᤇᤡ ᤂᤢᤏᤧ᤹ ᤁᤢᤍᤃᤡ ᤕᤢᤰᤂᤧᤛᤧ᤹ ᤜᤧᤰᤁᤩᤠᤱ ᤏᤠᤒᤥᤋᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤜᤠᤱᤅᤡᤴ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤋᤛᤡ ᤐᤡᤔᤠ ᤐᤠᤱᤄᤧᤛᤧ᤹॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤳᤋᤧᤀᤠᤱ ᤗᤢᤱᤅᤡᤸᤗᤧ ᤗᤧᤵᤋᤧᤛᤧᤖᤧ᤹॥” 11 ᤂᤧᤒᤩᤠᤱ ᤀᤡᤈᤣᤒᤣᤗᤖᤧ ᤛᤰᤀᤡᤱᤄᤱ ᤛᤠᤵᤐᤧ᤺ᤵᤋᤠᤜᤠ᤹ᤀᤥ ᤛᤠᤵᤋᤢᤀᤠᤱ ᤂᤧᤱᤜᤠ᤹ ᤜᤠᤰᤋᤢᤛᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤏᤠᤒᤥᤋᤖᤧ ᤁᤢᤕᤧᤰᤕᤰᤁᤥ ᤁᤧᤕᤢᤱᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤋᤢᤶᤔᤩᤠᤱᤜᤠ᤹ᤖᤧ ᤔᤧᤈᤥᤃᤢ॥ 12 ᤂᤧᤱᤜᤠ᤹ᤖᤧ ᤋ᤺ᤰᤏᤧᤳ ᤕᤢᤱᤔᤠ ᤀᤢᤘᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤏᤠᤒᤥᤋᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤡᤱᤛᤥ ᤀᤡᤱᤎᤠᤱ ᤕᤢᤰᤏᤠᤀᤥ ᤔᤧᤕᤢᤰᤂᤢ॥ 13 ᤂᤧᤒᤩᤠᤱ ᤂᤧᤴ ᤏᤧᤵᤑᤢ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤏᤠᤜᤠ᤹ ᤋᤩᤧᤛᤡᤀᤠᤱ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤕᤢᤱᤏᤧᤛᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤜᤠᤱᤅᤡᤴ ᤂᤢᤏᤧ᤹ ᤔᤠᤱᤍᤣᤛᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤴ ᤏᤠᤍᤢᤶᤍᤢᤶᤒᤠ ᤀᤠᤵᤋᤡᤰ ᤁᤢ᤺ᤳᤋᤧᤛᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤏᤠᤒᤥᤋᤧᤴ ᤕᤧᤰᤕᤰ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢ॥ 14 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤴ ᤀᤡᤱᤄᤱᤅᤡᤴ ᤀᤡᤈᤣᤒᤣᤗᤧᤴ ᤔᤧᤜᤠᤰᤋᤢ. “ᤏᤠᤒᤥᤋᤧᤴ ᤗᤢᤱᤅᤡᤸᤗᤧ ᤗᤧᤵᤔᤏᤠ ᤛᤧᤵᤔᤏᤠᤖᤥ॥” 15 ᤏᤠᤒᤥᤋᤧᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤈᤣᤒᤣᤗᤖᤧ ᤂᤧᤵᤛᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤀᤠᤜᤠᤒᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤂᤧᤏᤧ᤹ ᤀᤡᤱᤔᤠ ᤁᤧᤶᤒᤡᤖᤧᤶᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤔᤧᤳᤇᤡᤱᤅᤧ᤹॥ ᤂᤢᤏᤧ᤹ ᤀᤠᤸᤗ ᤁᤢᤜᤡᤱᤘᤧᤳ ᤜᤥᤵ. ᤂᤢᤏᤧ᤹ ᤛᤩᤧ॥” 16 ᤀᤠᤸᤗ ᤏᤠᤒᤥᤋᤧᤴ ᤛᤩᤧ ᤁᤧᤗ᤹ᤒᤠ ᤀᤠᤜᤠᤒᤖᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤐᤥᤃᤧ ᤜᤧᤰᤁᤩᤠᤱ ᤕᤧᤀᤠᤱ ᤏᤠᤒᤥᤋᤖᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤂᤢᤏᤧ᤹ ᤔᤧᤳᤇᤡᤱ॥ 17 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤋᤡᤛ᤻ᤒᤡᤒᤠ ᤀᤣᤗᤡᤕᤠᤀᤥ ᤁᤧᤖᤧ— 18 “ᤛᤠᤔᤕᤠᤖᤡᤕᤠᤀᤥ ᤕᤢᤰ ᤁᤧᤈᤥ᤺ᤰᤐᤠ ᤀᤡᤛᤪᤠᤀᤡᤗᤒᤠ ᤀᤠᤜᤠᤒ ᤜᤠᤱᤅᤡᤸᤗᤧ ᤁᤢᤍᤢᤶᤛᤧ ᤂᤧᤏᤧ᤹ ᤕᤥ ᤐᤣᤃᤧ᤹॥ ᤏᤠᤒᤥᤋᤖᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤔᤧᤳᤇᤡᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤂᤧᤵᤔᤥ ᤐᤣᤀᤠᤱ ᤕᤠᤰ॥ 19 ᤂᤧᤏᤧ᤹ ᤂᤧᤴ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤌᤣ ᤂᤧᤏᤧ᤹ ᤗᤳᤇᤠ ᤔᤏᤠ ᤁᤧᤛᤧᤖᤢᤀᤠᤱ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤴ ᤜᤢᤰᤁᤠᤵ ᤁᤧᤈᤥᤃᤢᤀᤠᤱ ᤔᤧᤘᤠ᤹ᤏᤧᤶᤒᤡ᥅’ ᤂᤧᤒᤩᤠᤱ ᤂᤧᤴ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤏᤠᤒᤥᤋᤖᤧ ᤁᤢᤔᤠᤰᤂᤡᤴ ᤁᤥ᤺ᤳᤆᤥᤜᤠ᤹ᤖᤧ ᤔᤧᤗᤠᤃᤢᤒᤠᤍᤧᤴᤏᤥᤀᤣ ᤂᤧᤏᤧ᤹ᤀᤠᤱ ᤁᤧᤔᤠᤰᤂᤡᤴ ᤂᤩᤠᤒᤠᤜᤠ᤹ᤖᤧ ᤔᤧᤗᤠᤃᤢ. ᤀᤥᤘᤠ. ᤁᤧᤔᤠᤰᤂᤡᤴᤏᤣ ᤔᤧᤗᤠᤃᤢᤖᤥ᥄’” 20 ᤀᤠᤜᤠᤒᤖᤧ ᤀᤣᤗᤡᤕᤠᤴ ᤔᤧᤳᤋᤢ. “ᤀᤠᤏᤡᤱᤔᤡᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤍᤢᤶᤔᤠᤱᤅᤠᤱ ᤘᤠ᤹ᤒᤡ᥅” ᤀᤣᤗᤡᤕᤠᤖᤧ ᤔᤧᤳᤋᤢ. “ᤀᤥᤘᤠ. ᤀᤠᤱᤃᤠ᤹ ᤂᤧᤏᤧ᤹ ᤋᤢᤶᤏᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤵᤑᤣᤰ ᤁᤧᤛᤱᤛᤡᤱ॥ 21 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤱᤛᤡᤱ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥᤒᤠ ᤕᤧᤶᤒᤡᤳᤇᤠᤜᤠ᤹ ᤕᤥ᤺ᤃ᤻ᤒᤠᤛᤠᤱ. ᤕᤥᤃ᤻ᤒᤠ ᤔᤣ᤺ᤴᤇᤠᤱ ᤁᤧᤖᤧᤰ ᤔᤧᤰᤂᤢᤱᤛᤡᤱ᤹॥ 22 ᤂᤧᤏᤧ᤹ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢᤒᤠ ᤏᤢ ᤀᤡᤛᤪᤠᤀᤡᤗᤧᤴ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤄᤢᤒᤠᤸᤗᤧ ᤆᤥᤃᤢᤸᤗᤧ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤏᤢ ᤀᤜᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤛᤠᤏ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ ᤔᤧᤳᤋᤢᤱᤛᤡᤱ᤹॥’ 23 “ᤜᤧᤰᤁᤩᤠᤱ ᤀᤡᤈᤣᤒᤣᤗᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹—‘ᤕᤡᤈᤖᤣᤗᤒᤠ ᤗᤢᤱᤎᤠᤰᤁᤡᤸᤗᤧ ᤁᤢᤕᤠᤀᤥ ᤀᤡᤈᤣᤒᤣᤗᤧᤴ ᤁᤥ᤺ᤳᤆᤥᤜᤠ᤹ᤖᤧ ᤔᤧᤈᤖᤥ॥’ 24 “ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤁᤥ ᤁᤧᤛᤡᤒᤠᤜᤠ᤹ᤃ ᤁᤥ᤺ᤳᤆᤥᤜᤠ᤹ᤖᤧ ᤔᤧᤈᤛᤡ᤹. ᤜᤧᤰᤁᤩᤠᤱ ᤋᤠᤶᤓᤢᤱᤅᤥ ᤁᤧᤛᤡᤒᤠᤜᤠ᤹ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ᤖᤧ ᤔᤧᤈᤛᤡᤖᤥ॥” 25 (ᤀᤠᤜᤠᤒᤧᤴ ᤁᤢᤔᤣᤳ ᤀᤡᤈᤣᤒᤣᤗᤖᤧ ᤜᤢᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤵᤑᤣᤰ ᤁᤧᤛᤱᤛᤡᤱᤒᤠ ᤂᤢᤏᤧ᤹ ᤜᤧᤰᤋᤱᤒᤠ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤰᤂᤧᤴ॥ 26 ᤏᤠᤘᤠᤀᤡᤳᤗᤠᤜᤠ᤹ ᤔᤧᤍᤡᤶᤍᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤗᤠᤶ ᤏᤠ᤺ᤳᤋᤢᤍᤣᤛᤢᤛᤡᤒᤠ ᤀᤣᤔᤥᤖᤡᤜᤠ᤹ ᤁᤢᤀᤡᤛᤡᤰ ᤀᤠᤜᤠᤒᤖᤧ ᤁᤧᤖᤧᤰᤏᤢ᤺ᤸᤗᤧ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤆᤥᤃᤢ॥) 27 ᤀᤠᤸᤗ ᤀᤠᤜᤠᤒᤖᤧ ᤁᤴ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢ. ᤂᤧᤒᤩᤠᤱ ᤛᤠᤃᤡᤍᤣ᤺ᤳ ᤆᤠᤰᤛᤡᤱᤅᤠᤱ ᤋ᤺ᤰᤏᤧᤳ ᤕᤢᤅᤧ॥ ᤂᤢᤏᤧ᤹ ᤛᤠᤃᤡᤍᤣ᤺ᤳ ᤆᤠᤰᤂᤢᤀᤠᤱᤅᤣ ᤀᤡᤵᤛᤧ. ᤜᤧᤰᤁᤩᤠᤱ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤀᤠᤱ ᤗᤠᤱᤄᤣᤃᤧ॥ 28 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤋᤡᤛ᤻ᤒᤡᤒᤠ ᤀᤣᤗᤡᤕᤠᤀᤥ ᤁᤧᤖᤧ— 29 “ᤀᤠᤱᤃᤠ᤹ ᤀᤠᤍᤃᤡ ᤀᤠᤜᤠᤒᤧᤴ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱᤒᤠᤴ ᤌᤣ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤒᤡ᥅ ᤂᤢᤏᤧ᤹ ᤀᤠᤵᤑᤣᤰ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤢᤏᤧ᤹ ᤁᤢᤕᤧᤶᤔᤥ ᤔᤧᤰᤔᤠᤛᤡᤔᤠ ᤔᤧᤍᤠ᤺ᤳᤋᤠᤴ. ᤁᤖ ᤂᤢᤏᤧ᤹ ᤁᤢᤛ᤻ᤛᤠ᤺ᤸᤗᤧ ᤁᤢᤕᤧᤶᤔᤥ ᤂᤢᤏᤧ᤹ ᤁᤢᤜᤡᤶᤛᤕᤱᤅᤥ ᤂᤧᤴ ᤔᤧᤰᤔᤠᤛᤡᤔᤧᤴ ᤋᤠᤖᤢᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.