᥇ ᤜᤠᤱ 20 - LIFOTNT

ᤀᤖᤠᤔᤒᤠ ᤒᤣᤏ-ᤜᤍᤍᤖᤧ ᤛᤠᤔᤖᤡᤕᤠᤴ ᤑᤳᤋᤢ

¹ ᤀᤠᤸᤗ ᤀᤖᤠᤔᤒᤠ ᤒᤣᤏ-ᤜᤍᤍᤖᤧ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤑᤢᤰᤂᤢᤛᤡ॥ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤜᤠᤱᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ᤀᤠᤱ ᤛᤥᤛᤥᤖᤡᤰ ᤑᤧᤳᤋᤢᤛᤡᤀᤠᤱ ᤌᤥ ᤛᤠᤔᤖᤡᤕᤠᤴ ᤁᤒᤪᤡᤱ ᤁᤡᤷᤃᤵ ᤁᤒᤢ ᤜᤧᤰᤁᤩᤠᤱ ᤌᤱ ᤆᤥᤃᤢᤀᤠᤱ ᤂᤧᤴ ᤑᤳᤋᤢ॥

² ᤂᤢᤏᤧ᤹ ᤕᤧᤰᤕᤰᤁᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧᤀᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. “ᤒᤣᤏ-ᤜᤍᤍᤖᤧ ᤀᤰᤂᤣ ᤐᤠ᤺ᤳᤋᤢ᤹—

³ ‘ᤂᤧᤏᤧ᤹ ᤁᤧᤛᤠᤶᤔᤩᤠᤱ ᤏᤢ ᤁᤧᤕᤢᤵᤐᤠᤜᤠ᤹ ᤀᤠᤱᤃᤠ᤹ ᤀᤠᤛᤠᤶᤔᤩᤠᤱ ᤀᤠᤕᤢᤵᤐᤠᤖᤥ. ᤜᤧᤰᤁᤩᤠᤱ ᤏᤢᤔᤠ ᤏᤢᤔᤠ ᤁᤧᤔᤣ᤺ᤳᤜᤠ᤹ ᤏᤢ ᤁᤧᤛ᤻ᤛᤠᤜᤠ᤹ ᤀᤠᤱᤃᤠ᤹ ᤀᤠᤔᤣᤳ ᤀᤠᤛ᤻ᤛᤠᤛᤡᤖᤥ॥’”

⁴ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤠ ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢᤒᤠ ᤁᤢᤀᤡᤛᤡᤰ. ᤀᤠᤱᤃᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ ᤔᤏᤠᤜᤠ᤹ ᤂᤧᤏᤧ᤹ᤀᤡᤴᤇᤡᤖᤥ॥”

⁵ ᤂᤧᤴ ᤀᤡᤱᤛᤠᤒᤠᤜᤠ᤹ ᤕᤠᤶᤔᤥ ᤔᤧᤓᤧᤖᤧᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤛᤠᤶᤔᤩᤠᤱ ᤏᤢ ᤁᤧᤕᤢᤵᤐᤠᤜᤠ᤹. ᤁᤧᤔᤣ᤺ᤳᤜᤠ᤹ ᤏᤢ ᤁᤧᤛ᤻ᤛᤠᤜᤠ᤹ ᤀᤠᤱᤃᤠ᤹ ᤜᤢᤰᤛᤢᤵᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ॥

⁶ ᤁᤖ ᤋᤠ᤺ᤴᤍᤡᤰ ᤀᤠᤶᤓᤠ ᤁᤴ ᤕᤧᤶᤔᤥ ᤂᤧᤏᤧ᤹ ᤁᤧᤜᤠᤱᤜᤡᤶᤔᤡᤴ ᤏᤢ ᤂᤧᤏᤧ᤹ ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤗᤡᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤛᤢᤜᤠᤱᤕᤢᤰᤐᤠᤜᤠ᤹ ᤐᤠᤱᤄᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤡᤔᤧᤸᤗᤢᤱᤒᤠ ᤁᤧᤗᤣ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤶᤏᤠᤵ ᤁᤧᤶᤍᤧ᤹॥”

⁷ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤗᤠᤈᤣ᤹ᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤀᤢ᤺ᤵᤔᤠ ᤋᤠ᤺ᤵᤔᤠᤛᤡ ᤐᤠᤱᤄᤢᤛᤡᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧᤃ ᤂᤧᤔᤠ᤹ᤖᤰ ᤆᤥ᤺ᤰᤔᤠ ᤁᤥ᤺ᤳᤋᤢᤖ ᤘᤠ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶ᥄ ᤂᤧᤸᤗᤧ ᤀᤠᤱᤃᤠ᤹ ᤀᤠᤔᤣ᤺ᤳᤜᤠ᤹. ᤀᤠᤛ᤻ᤛᤠᤜᤠ᤹ ᤏᤢ ᤀᤠᤛᤠᤶᤔᤩᤠᤱ ᤀᤠᤕᤢᤵᤐᤠᤜᤠ᤹ ᤔᤧᤳᤇᤡᤱᤔᤠ ᤁᤥ᤺ᤳᤋᤢᤸᤗᤧ ᤀᤠᤱᤃᤠ᤹ ᤔᤣ᤺ᤴ ᤔᤧᤔᤧᤳᤋᤢᤱᤅᤡᤴ॥”

⁸ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤧᤴᤏᤧ᤹॥ ᤂᤧᤸᤗᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤥ ᤂᤧᤏᤧ᤹ ᤔᤧᤍᤧᤴᤍᤧᤴᤏᤧ᤹॥”

⁹ ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤖᤧ ᤒᤣᤏ-ᤜᤍᤍᤖᤧ ᤁᤢᤀᤡᤱᤛᤠᤒᤠᤜᤠ᤹ ᤀᤰᤋᤱᤒᤠ ᤏᤢᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤀᤠᤍᤠᤱᤒᤠ ᤐᤕᤶ ᤜᤠᤱᤅᤡᤴ ᤀᤰᤂᤣ ᤔᤧᤳᤋᤧᤶᤔᤧ᤹. ‘ᤐᤕᤶ ᤜᤠᤱᤅᤡᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤠ᤺ᤰᤋᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤁᤧᤖᤧᤰ ᤐᤡᤖᤢᤱ᤹॥ ᤁᤖ ᤁᤴ ᤏᤠ᤺ᤰᤋᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤁᤧᤵᤔᤠ ᤔᤧᤛᤢᤰᤁᤠᤴ॥’” ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤒᤣᤏ-ᤜᤍᤍᤧᤴ ᤀᤰᤋᤱᤒᤠ ᤏᤢᤃᤵ ᤔᤧᤒᤡᤖᤢ॥

¹⁰ ᤂᤧᤒᤩᤠᤱ ᤒᤣᤏ-ᤜᤍᤍᤖᤧ ᤀᤠᤜᤠᤒᤧᤴ ᤘᤣ᤹ ᤀᤡᤱᤄᤱ ᤜᤠᤰᤋᤢ—“ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤛᤠᤔᤖᤡᤕᤠᤀᤥᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤂᤠᤶᤜᤡ᤺ᤰᤁᤡᤴ ᤀᤠᤱᤃᤠ᤹ ᤀᤠᤎᤰᤛᤢᤒᤠᤜᤠ᤹ ᤁᤧᤖᤧᤰ ᤜᤢᤰᤐᤰ ᤌᤡᤰᤌᤡᤰ ᤐᤡᤔᤠᤛᤡᤖᤰ ᤋᤧᤰᤋᤢᤛᤡᤏᤧᤓᤃᤪ. ᤔᤠᤱᤜᤠ᤹ᤖᤧ ᤀᤠᤱᤃᤠ᤹ ᤜᤧᤰᤁᤣᤗ᤹ᤖᤡᤰᤁᤣ ᤋᤠᤵᤑᤧ᤺ᤸᤗᤡᤰ ᤀᤡᤃᤪ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤖ॥”

¹¹ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤏᤢᤃᤵ ᤐᤡᤖᤢᤛᤡ. “ᤂᤧᤴ ᤔᤧᤳᤋᤧᤶᤔᤧ᤹—‘ᤛᤠ᤺ᤱᤒᤣ ᤛᤧ᤺ᤵᤆᤠᤱ ᤁᤧᤈᤠᤱᤒᤠ ᤔᤏᤠᤴ ᤂᤧᤴ ᤛᤠ᤺ᤱᤒᤣ ᤛᤧ᤺ᤵᤆᤠᤱ ᤁᤧᤓᤧᤶᤒᤠ ᤁᤧᤍᤣᤒᤠ ᤔᤏᤠᤴ ᤁᤢᤀᤡᤛᤡᤰ ᤕᤶᤒᤠ ᤗᤧᤱᤛᤡᤱᤔᤠ ᤔᤧᤏᤠ᤹ᤏᤧᤴᤗᤥ॥’”

¹² ᤒᤣᤏ-ᤜᤍᤍᤧᤴ ᤏᤢ ᤘᤣ᤹ ᤜᤠᤱᤜᤠ᤹ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤛᤣᤈ᤺ᤱᤘᤠ ᤌᤢᤱᤏᤢ ᤔᤧᤕᤢᤅᤧ ᤂᤧᤒᤩᤠᤱ ᤂᤧᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. “ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤴ ᤕᤧᤰᤕᤰᤁᤡᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧᤖᤥ॥

ᤀᤠᤜᤠᤒᤖᤧ ᤒᤣᤏᤜᤍᤍᤧᤴ ᤏᤠ᤺ᤴᤍᤢ

¹³ ᤜᤠᤒᤠ ᤁᤴ ᤗᤢᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤀᤡᤛᤪᤠᤀᤡᤒᤠ ᤜᤠᤱ ᤀᤠᤜᤠᤒᤖᤧᤀᤥ ᤋᤩᤧᤀᤠᤱ ᤀᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤌᤣ ᤂᤧᤏᤧ᤹ ᤁᤴ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ ᤁᤧᤏᤡᤛᤢᤛᤡᤖ ᤁᤧᤒᤵᤐᤡ᥅ ᤀᤠᤱᤃᤠ᤹ ᤀᤠᤀᤡᤴᤇᤠ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢ᤹॥’”

¹⁴ ᤀᤠᤜᤠᤒᤖᤧ ᤛᤣ᤺ᤴᤍᤥᤛᤢ. “ᤁᤖ ᤂᤧᤴ ᤜᤠ᤺ᤳᤗᤧ ᤆᤥᤃᤢᤀᤠᤱᤒᤣ᥅” ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤋᤧᤱᤃᤵᤐᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤴ ᤔᤧᤈᤥᤃᤢ᤹॥” ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤌᤱᤅᤡᤴ ᤜᤠ᤺ᤳᤗᤧ ᤜᤣ᤺ᤰᤋᤢᤒᤣ᥅” ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤜᤣ᤺ᤰᤋᤢ᤹॥”

¹⁵ ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤖᤧ ᤂᤧᤴ ᤋᤧᤱᤃᤵᤐᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᥈᥉᥈ ᤌᤠᤱᤒᤧᤴ ᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤵᤔᤠ ᤋᤠ᤺ᤵᤔᤠᤛᤡ ᤐᤠᤱᤄᤢᤛᤡ॥ ᤂᤧᤒᤩᤠᤱ ᤂᤢᤏᤧ᤹ ᤁᤧᤏᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤛᤢᤵᤛᤢᤛᤡ. ᤂᤰᤐᤧᤳ ᤁᤧᤖᤧᤰᤗᤧ ᤜᤧᤴᤇᤡᤱ ᤏᤢᤛᤡ ᤔᤧᤘᤕᤧ॥

¹⁶ ᤗᤧᤴᤍᤡᤰ ᤗᤧᤴᤈᤥᤛᤧᤸᤗᤧ ᤒᤣᤏ-ᤜᤍᤍᤧᤴ ᤏᤢ ᤂᤢᤏᤧ᤹ ᤁᤢᤴᤈᤢᤶ ᤗᤠᤈᤣ᤹ᤀᤥᤒᤠ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤜᤠᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥ ᤛᤣᤈᤱᤘᤠᤴ ᤔᤧᤎᤢᤅᤢᤀᤠᤱ ᤔᤕᤢᤛᤡᤀᤠᤱ ᤔᤧᤕᤢᤅᤧᤒᤠ ᤕᤧᤶᤔᤥ.

¹⁷ ᤋᤧᤱᤃᤵᤐᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤛᤢᤜᤠᤱᤕᤢᤰᤐᤠᤜᤠ᤹ ᤋᤃᤡ ᤗᤡᤃᤰ ᤔᤧᤗ᤺ᤴᤍᤧ ᤔᤧᤍᤩᤧ॥ ᤀᤠᤸᤗ ᤒᤣᤏ-ᤜᤍᤍᤖᤧ ᤐᤠᤱᤄᤢᤛᤡᤀᤠᤱ ᤁᤧᤘᤠ᤹ᤒᤠ ᤌᤥ᤺ᤶᤈᤡᤒᤠᤜᤠ᤹ᤖᤧ ᤔᤧᤍᤩᤧᤀᤠᤱ ᤔᤧᤒᤠ᤺ᤳᤋᤢ. “ᤔᤏᤠᤜᤠ᤹ ᤛᤠᤔᤖᤡᤕᤠᤗᤠᤶ ᤋᤃᤡ ᤔᤧᤕᤢᤖ ᤔᤧᤒᤳ॥”

¹⁸ ᤒᤣᤏ-ᤜᤍᤍᤖᤧ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤛᤏᤠᤖᤢᤱᤗᤧ ᤗᤠᤃᤡ ᤔᤧᤕᤧᤒᤠᤏᤧᤓᤃᤪ. ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤋᤧᤶᤛᤧᤶᤛᤡᤶᤔᤧ᤹॥ ᤌᤱ ᤆᤥ᤺ᤰᤛᤧ ᤔᤧᤕᤧᤒᤠᤏᤧᤓᤃᤪᤛᤠᤱ ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤋᤧᤶᤛᤧᤶᤛᤡᤶᤔᤧ᤹॥”

¹⁹ ᤋᤧᤱᤃᤵᤐᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤧᤴ ᤌᤠᤱᤒᤧᤴ ᤛᤢᤜᤠᤱᤕᤢᤰᤐᤠᤜᤠ᤹ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤁᤧᤒᤵᤐᤠ ᤌᤰᤛᤢᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤕᤧᤰᤕᤰᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ.

²⁰ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤁᤧᤀᤵᤐᤠᤜᤠ᤹ ᤔᤧᤛᤧᤖᤢᤛᤡ॥ ᤜᤧᤰᤁᤣ ᤐᤥ᤺ᤰᤂᤧᤸᤗᤧ ᤀᤖᤠᤔᤒᤠ ᤌᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤳᤋᤢᤛᤡ॥ ᤁᤖ ᤀᤖᤠᤔᤒᤠ ᤜᤠᤱ ᤒᤣᤏ-ᤜᤍᤍᤧᤴ ᤀᤴᤏᤡᤴ ᤕᤢᤰᤋᤢᤀᤠᤱ ᤂᤢᤏᤧ᤹ ᤁᤢᤓᤠ ᤁᤢᤀᤴ ᤁᤧᤗᤥᤱᤒᤠᤜᤠ᤹ᤏᤢ ᤛᤥᤖᤡᤰ ᤐᤡᤴᤍᤧ॥

²¹ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤧᤴ ᤋᤃᤡ ᤐᤣ. ᤜᤧᤰᤁᤩᤠᤱ ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ ᤁᤧᤗᤥᤱᤒᤠᤜᤠ᤹ ᤏᤠ᤺ᤴᤍᤢᤛᤡᤀᤠᤱ ᤀᤖᤠᤔᤡᤜᤠ᤹ ᤕᤖᤡᤰ ᤔᤧᤰᤂᤢᤛᤡ॥

²² ᤂᤧᤴ ᤀᤣᤃᤠᤱ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧᤀᤥ ᤋᤩᤧᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤍᤠᤰᤑᤠᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤧ᤹. ᤜᤧᤰᤁᤩᤠᤱ ᤌᤣ ᤆᤥ᤺ᤰᤔᤠ ᤐᤥᤱ᤹ ᤂᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹. ᤌᤣᤀᤠᤱᤓᤧᤸᤗᤧ ᤁᤧᤍᤠᤒᤠ ᤜᤠᤱᤘᤠᤔᤠ ᤕᤧᤶᤔᤥ ᤀᤖᤠᤔᤒᤠ ᤜᤠᤱᤅᤡᤸᤗᤧ ᤀᤠᤍᤠᤱᤒᤠ ᤕᤠᤶᤔᤥ ᤌᤱᤅᤥ ᤁᤧᤓᤳᤗᤥ॥”

ᤀᤖᤠᤔᤒᤠ ᤜᤠᤱᤅᤡᤸᤗᤧ ᤕᤠᤶᤔᤥ ᤌᤱ ᤆᤥᤃᤢ

²³ ᤜᤠᤒᤠ ᤁᤴ ᤗᤢᤶᤔᤥ ᤀᤖᤠᤔᤒᤠ ᤜᤠᤱ ᤒᤣᤏ-ᤜᤍᤍᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤀᤰᤋᤱᤒᤠ ᤛᤢᤈᤠ ᤔᤧᤒᤡᤖᤢ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤃ ᤁᤥ᤺ᤰᤔᤠᤜᤠ᤹ᤀᤥᤒᤠ ᤔᤠᤱᤛᤡᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤗᤠᤃᤡ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤔᤧᤈᤥᤃᤧ॥ ᤁᤖ ᤀᤠᤏᤡ᤹ ᤂᤧᤱᤜᤠ᤹ᤏᤢ ᤏᤧᤏᤧᤒᤠᤍᤧᤴᤏᤥ ᤌᤱ ᤀᤠᤈᤥᤰᤏᤧᤓᤃᤪ. ᤂᤧᤱᤜᤠ᤹ᤏᤢ᤺ᤸᤗᤧ ᤀᤠᤏᤡ᤹ ᤔᤢᤰᤁᤧᤃᤢᤒᤠ ᤀᤠᤒᤥᤱ᤹॥

²⁴ ᤀᤠᤍᤠᤱᤒᤠᤖᤧ ᤀᤰᤂᤣ ᤆᤥᤃᤧ᤹—ᤌᤰᤛᤢᤒᤠ ᤗᤠᤶᤗᤥᤒᤠ ᤋᤠᤰᤑᤠᤗᤠᤶ ᤁᤧᤖᤧᤰ ᤜᤠᤱᤜᤠ᤹ ᤗ᤺ᤳᤋᤧᤍᤣᤛᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤘᤣ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤕᤢᤰᤋᤡᤱ ᤆᤥᤃᤧᤛᤧ᤹॥

²⁵ ᤋᤃᤡ ᤜᤠᤖᤡ ᤁᤧᤍᤠᤒᤠ ᤌᤰᤛᤢᤒᤠᤜᤠ᤹ ᤕᤠᤖᤡᤰᤁᤣ ᤌᤰᤛᤢᤒᤠᤜᤠ᤹ ᤋᤠᤖᤧᤛᤧ᤹—ᤀᤴᤜᤠ᤹ᤖᤧ ᤗᤠᤃᤡ ᤀᤴ ᤏᤢ ᤀᤴᤗᤠᤎᤠᤜᤠ᤹ᤖᤧ ᤗᤠᤃᤡ ᤀᤴᤗᤠᤎᤠᤜᤠ᤹—ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤏᤧᤏᤧᤒᤠᤍᤧᤴᤏᤥ ᤀᤠᤏᤡ᤹ ᤌᤱ ᤆᤥ᤺ᤰᤔᤠ ᤀᤠᤛᤢᤰᤗ॥ ᤂᤧᤒᤩᤠᤱ ᤛᤧᤰᤂᤠᤀᤣ ᤀᤠᤏᤡ᤹ ᤂᤧᤱᤜᤠ᤹ᤏᤢ᤺ᤸᤗᤧ ᤔᤢᤰᤁᤧᤃᤢᤒᤠ ᤀᤠᤒᤥᤱ᤹॥” ᤂᤢᤏᤧ᤹ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤋᤧᤴᤍᤧᤀᤠᤱ ᤂᤧᤴ ᤜᤧᤰᤋᤱᤒᤠᤀᤣ ᤆᤥᤃᤢ॥

²⁶ ᤁᤢᤀᤠᤳᤏᤡᤶᤔᤠ ᤜᤠᤒᤠ ᤂᤧᤴ ᤕᤧᤶᤔᤥ ᤒᤣᤏ-ᤜᤍᤍᤖᤧ ᤀᤖᤠᤔᤡᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤰᤛᤧ ᤀᤐᤣᤁ ᤗᤧᤵᤔᤠᤱ ᤌᤠᤛᤡᤱ॥

²⁷ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤔᤧᤈᤢᤵᤛᤧᤀᤠᤱ ᤂᤧᤱᤜᤠ᤹ ᤆᤠᤔᤠ ᤌᤢᤱᤔᤠ ᤁᤢᤓᤠ ᤁᤢᤈᤠ ᤔᤧᤒᤡᤖᤢᤛᤡ ᤜᤧᤰᤁᤩᤠᤱ ᤂᤢᤴᤇᤡ᤹ ᤁᤢᤗᤢᤵ ᤁᤢᤗᤢᤵ ᤔᤧᤈᤥ᤺ᤰᤛᤡᤱᤅᤠᤱ ᤂᤧᤱᤜᤠ᤹ᤏᤢ ᤌᤰᤛᤧ ᤔᤧᤗ᤺ᤴᤍᤧ॥ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤍᤥ᤺ᤵᤔᤠ ᤗᤧᤵᤔᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤀᤡᤛᤪᤠᤀᤡᤗᤡᤜᤠ᤹ ᤁᤢᤗᤢᤵ ᤏᤧᤳᤇᤡ ᤆᤢᤰᤛᤠ ᤔᤧ᤺ᤴᤍᤠᤗᤢᤵ ᤜᤧᤰᤋᤱᤒᤠ ᤏᤡᤔᤧᤎᤠᤒᤧ. ᤁᤖ ᤀᤖᤠᤔᤡᤜᤠ᤹ᤖᤧᤃ ᤁᤧᤖᤧᤰ ᤗᤧᤵᤔᤠᤱ ᤏᤧᤏᤧᤒᤠᤍᤧᤴᤏᤡᤴ ᤛᤡᤍᤧᤵ ᤔᤧᤍᤧᤵᤋᤢᤀᤠᤱ ᤔᤧᤕᤢᤅᤧ॥

²⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧᤀᤥ ᤋᤩᤧᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤕᤜᤘᤣ ᤍᤠᤱᤒᤧᤱᤃ ᤁᤥ᤺ᤰᤔᤠᤜᤠ᤹ᤀᤥᤒᤠ ᤔᤠᤱ. ᤏᤧᤏᤧᤒᤠᤍᤧᤴᤏᤥᤒᤠ ᤔᤠᤱ ᤔᤣ᤺ᤴ ᤑᤠ᤹ᤀᤠᤱ ᤀᤖᤠᤔᤡᤜᤠ᤹ᤖᤧ ᤔᤧᤀᤡ᤺ᤳᤋᤢ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥’”

²⁹ ᤂᤧᤱᤜᤠ᤹ ᤋᤰ ᤏᤢ ᤋᤰ ᤏᤢᤛᤡ ᤕᤧᤴ ᤌᤠᤖᤡᤰ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥᤀᤣ ᤔᤧᤕᤢᤅᤧ ᤔᤧᤃᤖᤧ॥ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤌᤱ ᤐᤥᤱᤔᤠ ᤜᤣ᤺ᤰᤋᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤌᤡᤰᤕᤠ᤺ᤴᤗᤧ ᥇.᥆᥆.᥆᥆᥆ ᤗᤠᤱᤃᤧᤄᤣ᤺ᤰᤐᤠ ᤀᤖᤠᤔᤡ ᤌᤰᤛᤢᤒᤠᤜᤠ᤹ ᤔᤧᤄᤠ᤺ᤴᤍᤢᤛᤡ॥

³⁰ ᤂᤧᤱᤜᤠ᤹ᤀᤥᤒᤠ ᤁᤢᤓᤠ ᤁᤧᤜᤡᤱᤒᤠᤜᤠ᤹ ᤀᤐᤣᤁ ᤕᤧᤰᤕᤰᤁᤥ ᤔᤧᤄᤧᤳᤇᤡᤱ. ᤂᤧᤵᤔᤥᤀᤠᤱ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤧᤀᤠᤱ ᥈᥍.᥆᥆᥆ ᤔᤏᤠᤜᤠ᤹ ᤛᤶᤎᤠᤱ ᤆᤢᤰᤋᤧ॥ ᤂᤶᤓᤩᤠᤱ ᤒᤣᤏ-ᤜᤍᤍᤧᤴᤃ ᤕᤧᤰᤕᤰᤁᤥ ᤂᤧᤳᤇᤡᤱ ᤜᤧᤰᤁᤩᤠᤱ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤐᤣᤀᤠᤱ ᤆᤡᤱᤛᤡᤱ॥

³¹ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤵᤛᤧ᤹. ᤀᤡᤛᤪᤠᤀᤡᤗᤡ ᤜᤡᤶᤛᤕᤱᤒᤠ ᤜᤠᤱᤜᤠ᤹ᤃ ᤁᤧᤏᤢ᤹ᤒᤠ ᤔᤏᤠ ᤔᤧᤈᤥᤰ ᤁᤧᤗ᤹ᤒᤠ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤀᤠᤵᤑᤣᤰ ᤀᤠᤵᤑᤣᤰ ᤁᤧᤱᤅᤥ ᤛᤠᤃᤡᤍᤣ᤺ᤳ ᤑᤳᤇᤢᤶ᤹. ᤜᤧᤰᤁᤩᤠᤱ ᤌᤧᤃᤣ᤺ᤰᤁᤥ ᤀᤡᤍᤠᤰ ᤂᤣ᤺ᤰᤂᤢᤶᤔᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤥ ᤐᤣᤃᤡ॥ ᤂᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤛᤰᤔᤠ ᤛᤧ᤺ᤵᤋᤢ ᤁᤧᤒᤡᤒᤡ ᤜᤠᤃ॥”

³² ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤁᤧᤱᤅᤥ ᤛᤡᤰᤘᤠᤑᤠ᤺ᤱᤃᤪᤡ ᤔᤧᤓᤳᤇᤢ ᤜᤧᤰᤁᤩᤠᤱ ᤌᤧᤃᤣ᤺ᤰᤐᤥ ᤀᤡᤍᤠᤰ ᤔᤧᤄᤣ᤺ᤰᤂᤢᤀᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤅᤧᤀᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤒᤣᤏ-ᤜᤍᤍᤖᤧ ᤐᤠ᤺ᤳᤋᤢ᤹—‘ᤆᤡᤛᤠᤈᤡ ᤀᤠᤱᤃᤠ᤹ ᤜᤡᤱᤔᤠ ᤑᤠ᤺ᤰᤋᤠᤱᤅᤧ᤹ᤀᤥ॥’” ᤜᤠᤱᤅᤡᤸᤗᤧ ᤏᤢᤃᤵ ᤐᤡᤖᤢᤛᤡ. “ᤌᤣ ᤂᤢᤏᤧ᤹ ᤀᤠᤸᤗᤛᤠᤱ ᤁᤢᤜᤡᤱᤘᤧᤳᤋᤣ ᤘᤠ᤹ᤒᤡ᥅ ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤶᤓᤢ᤹ᤖᤥ᥄”

³³ ᤂᤧᤴ ᤔᤏᤠᤜᤠ᤹ᤖᤧ ᤀᤠᤜᤠᤒ ᤜᤠᤱᤅᤡᤸᤗᤧ ᤁᤴ ᤁᤢᤒᤠ᤺ᤴᤏᤡᤴ ᤏᤢᤒᤠ ᤋ᤹ᤕᤠᤴ ᤔᤧᤀᤡ᤺ᤳᤋᤢ ᤜᤧᤰᤁᤩᤠᤱ ᤂᤡᤔᤥ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤔᤧᤗᤣ᤺ᤳᤋᤢᤀᤠᤱ ᤔᤧᤔᤧᤳᤋᤢ. “ᤀᤥᤖᤥ. ᤀᤠᤍᤠᤱᤒᤠᤖᤧ ᤁᤧᤶᤓᤢ᤹ ᤒᤣᤏ-ᤜᤍᤍᤧᤴ॥” ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤂᤢᤏᤧ᤹ ᤕᤢᤖᤧᤶᤔᤧ᤹॥” ᤀᤠᤸᤗ ᤒᤣᤏ-ᤜᤍᤍᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤧ. ᤂᤧᤒᤩᤠᤱ ᤀᤠᤜᤠᤒᤖᤧ ᤂᤢᤏᤧ᤹ ᤁᤢᤀᤴᤗᤠᤎᤠᤀᤥ ᤕᤢᤰᤂᤢ॥

³⁴ ᤒᤣᤏ-ᤜᤍᤍᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤒᤠᤖᤧ ᤀᤠᤍᤠᤱᤒᤠᤖᤧ ᤁᤧᤶᤒᤠᤗᤠᤶ ᤜᤢᤰᤁᤠᤵ ᤆᤥᤃᤢᤒᤠ ᤕᤧᤰᤕᤰᤜᤠ᤹ ᤀᤠᤱᤃᤠ᤹ ᤏᤢ᤺ᤰᤏᤧ ᤐᤡᤏᤧᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤒᤠᤖᤧ ᤛᤠᤔᤖᤡᤕᤠ ᤗᤠᤈᤣ᤹ᤀᤥ ᤆᤥᤃᤢᤒᤠ ᤜᤧᤰᤁᤣ ᤂᤧᤏᤧ᤹ᤀᤠᤱ ᤍᤔᤛ᤻ᤁᤛᤀᤥ ᤗᤧᤱᤜᤱ ᤆᤥ᤺ᤰᤔᤠ ᤐᤠᤱᤈᤢᤶᤜᤠ᤹ ᤆᤥ᤺ᤰᤔᤠ ᤁᤧᤛᤢᤰᤋᤢ᤹॥” ᤀᤠᤜᤠᤒᤖᤧ ᤔᤧᤳᤋᤢ. “ᤏᤠᤍᤱ ᤆᤥᤃᤢᤱᤅᤠᤱ ᤂᤧᤴ ᤁᤢᤍᤱᤒᤠ ᤋᤱᤔᤠ ᤐᤠ᤺ᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ ᤗᤧᤖᤢᤱ ᤐᤡᤏᤧᤖᤥ॥” ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤖᤧ ᤒᤣᤏ-ᤜᤍᤍᤧᤴᤏᤢ ᤗᤳᤇᤠ ᤏᤠᤍᤱ ᤆᤥᤃᤢᤀᤠᤱ ᤂᤢᤏᤧ᤹ ᤐᤣ᤺ᤰᤔᤠ ᤑᤠ᤺ᤰᤋᤢᤖᤥ॥

ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤀᤠᤜᤠᤒᤧᤴ ᤀᤠᤵᤋᤡᤰ ᤁᤢ᤺ᤳᤋᤢ

³⁵ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤢᤶᤜᤠ᤹ᤀᤥᤒᤠ ᤌᤡᤰᤐᤠᤖᤧ ᤀᤠᤵᤑᤣᤰ ᤁᤢᤴᤍᤣ᤺ᤱᤒᤠ ᤌᤡᤰ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤄᤈᤢᤶ ᤁᤧᤄᤕᤠ᤺ᤸᤗᤧ ᤜᤡᤵᤋᤠᤱᤅᤧ᤹॥” ᤁᤖ ᤂᤧᤴ ᤔᤏᤠᤴ ᤔᤧᤍᤧᤴᤍᤧᤴ॥

³⁶ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤐᤠ᤺ᤳᤋᤢ. “ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤴᤀᤡ᤺ᤳᤋᤢᤴ ᤁᤧᤴᤏᤠ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤁᤧᤗᤧᤳᤋᤠᤀᤠᤱ ᤁᤧᤒᤣ᤺ᤰᤏᤢᤔᤧ᤺ᤴᤏᤣ ᤂᤡᤖᤡᤱᤒᤠ ᤌᤡᤰᤗᤧ ᤂᤧᤏᤧ᤹ ᤁᤧᤛᤧᤳ॥” ᤜᤧᤰᤁᤩᤠᤱ ᤀᤠᤸᤗ ᤂᤧᤴ ᤔᤏᤠᤴ ᤐᤣ. ᤂᤧᤒᤩᤠᤱ ᤂᤡᤖᤡᤱᤒᤠ ᤌᤡᤰᤗᤧ ᤂᤢᤏᤧ᤹ ᤋᤢᤔᤢᤀᤠᤱ ᤛᤧᤖᤢ॥

³⁷ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤘᤣ᤹ ᤗᤳᤇᤠ ᤔᤏᤠ ᤋᤢᤔᤢᤀᤠᤱ ᤔᤧᤳᤋᤢ. “ᤆᤡᤛᤠᤈᤡ ᤀᤠᤱᤃᤠ᤹ ᤜᤡᤵᤋᤠᤱᤅᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤂᤢᤏᤧ᤹ ᤜᤡᤵᤋᤢᤀᤠᤱ ᤂᤠ᤺ᤴᤄᤢ॥

³⁸ ᤂᤧᤒᤩᤠᤱ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤐᤣᤀᤠᤱ ᤗᤠᤶᤔᤥ ᤜᤠᤱᤅᤡᤴ ᤜᤠᤱᤄᤢᤀᤠᤱ ᤕᤢᤅᤧ॥ ᤂᤢᤏᤧ᤹ ᤁᤢᤔᤡᤰᤁᤥ ᤆᤡᤖᤡᤰᤁᤡᤴ ᤂᤧ᤺ᤰᤂᤢᤀᤠᤱ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤆᤠᤱ ᤗᤧᤰᤛᤡᤱ॥

³⁹ ᤀᤠᤸᤗ ᤜᤠᤱᤅᤡᤴ ᤁᤢᤕᤠᤀᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤐᤠ᤺ᤴᤇᤠ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴ ᤌᤱᤅᤥ ᤌᤩᤠᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤔᤏᤠ ᤌᤡᤰ ᤁᤢᤓᤠᤖᤧ ᤀᤠᤱᤃᤠ᤹ᤀᤥ ᤋᤠᤖᤢᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱ. ‘ᤁᤴ ᤔᤏᤠᤴ ᤛᤧ᤺ᤵᤋᤧ ᤁᤳᤋᤧ᤹॥ ᤁᤴ ᤔᤏᤠᤴ ᤂᤧᤳᤇᤡᤱ ᤐᤣ᤺ᤰᤏᤧᤓᤃᤪ. ᤂᤧᤏᤧ᤹ ᤛᤡᤔᤠ ᤁᤧᤒᤥᤱᤒᤠ ᤐᤥᤱ᤹ ᤀᤡᤃᤪ ᤂᤧᤏᤧ᤹ ᥉᥊ ᤁᤡᤗᤥ ᤕᤢᤵᤐᤠ ᤁᤧᤜᤢᤅᤢᤖ ᤐᤥᤱ᤹॥’

⁴⁰ ᤀᤠᤸᤗ ᤀᤠᤱᤃᤠ᤹ ᤁᤢᤓᤠ ᤕᤠ᤺ᤶᤒᤰᤁᤥ ᤏᤠ ᤏᤢ ᤁᤳᤏᤠ ᤛᤡ᤹ᤔᤧᤴᤇᤡ᤹ ᤕᤠᤃᤠᤱᤅᤡᤸᤗᤧ. ᤀᤠᤍᤠᤱᤒᤣ. ᤂᤧᤴ ᤔᤏᤠ᤺ᤱᤃ ᤔᤕᤧᤒᤣ॥” ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤵᤑᤣᤰ ᤂᤠᤛᤧᤴ ᤁᤧᤗᤥ᤺ᤴᤇᤡᤱ॥ ᤜᤠᤒᤠ ᤂᤧᤴᤏᤣ ᤂᤧᤏᤧ᤹ ᤁᤧᤄᤠᤛᤧᤴᤗᤥ॥”

⁴¹ ᤂᤧᤒᤩᤠᤱ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤔᤡᤰᤁᤥᤒᤠ ᤂᤧᤴ ᤆᤡᤖᤡᤰᤁᤡᤴ ᤐᤧᤸᤗᤧᤰ ᤑᤧᤴᤍᤢᤍᤣᤛᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥᤒᤠ ᤌᤡᤰᤐᤠᤖᤧᤳᤇ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤍᤣᤛᤢ॥

⁴² ᤂᤢᤏᤧ᤹ ᤜᤠᤱᤅᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤱᤃᤠ᤹ ᤌᤩ᤺ᤱ ᤔᤧᤱᤔᤠ ᤁᤥ᤺ᤳᤋᤢᤱᤒᤠ ᤔᤏᤠᤴ ᤂᤧᤏᤧ᤹ ᤁᤧᤗᤧᤖᤢ ᤁᤧᤍᤣᤛᤢ॥ ᤁᤸᤗᤧᤆᤥᤃᤢᤸᤗᤧ ᤁᤴ ᤔᤏᤠ᤺ᤸᤗᤧ ᤁᤢᤛᤡᤔᤧᤸᤗᤧ ᤁᤢᤗᤧᤰᤘᤠ ᤂᤧᤏᤧ᤹ ᤁᤧᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤔᤧᤸᤗᤧ ᤁᤢᤗᤧᤰᤘᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤔᤧᤛᤡᤖᤥ॥’”

⁴³ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤐᤅᤧ. ᤜᤧᤰᤁᤩᤠᤱ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤛᤠᤔᤖᤡᤕᤠᤒᤠ ᤀᤠᤵᤑᤣᤰ ᤁᤢᤜᤠᤱᤜᤡᤶᤔᤥ ᤐᤣᤖᤥ॥