᥇ ᤜᤠᤱ 2 - LIFOTNTᤍᤠᤀᤢᤍᤖᤧ ᤛᤥᤗᤥᤔᤏᤧᤴ ᤁᤢᤏᤢᤵᤔᤠ ᤂᤠᤜᤢᤴ ᤐᤡᤖᤢ᤹ 1 ᤀᤠᤸᤗ ᤍᤠᤀᤢᤍᤖᤧ ᤁᤢᤛᤡᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤁᤧᤖᤧᤸᤗᤧ. ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤁᤴ ᤁᤢᤏᤢᤵᤔᤠ ᤂᤠᤜᤢᤴᤏᤧᤴ ᤐᤡᤖᤢ॥ 2 ᤂᤢᤏᤧ᤹ ᤔᤧᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤥ ᤐᤣ᤺ᤰᤁᤠᤖ ᤐᤳᤋᤠ॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤕᤧᤶᤒᤡᤳᤇᤠ ᤜᤧᤰᤁᤣ ᤜᤠᤱᤜᤠᤱ ᤗ᤹ᤖᤧ᤹. 3 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤜᤠ᤹ ᤁᤧᤳᤗ ᤆᤥᤃᤧ᤹—ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣᤃᤧ᤹. ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤂᤢᤏᤧ᤹ ᤁᤢᤎᤡᤶᤜᤠ᤹ ᤏᤢ ᤁᤢᤀᤡᤱᤈᤠᤱᤜᤠ᤹. ᤂᤢᤏᤧ᤹ ᤁᤢᤓᤠᤱᤜᤠ᤹ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧ ᤏᤧᤳᤋᤢ᤹. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤌᤣᤎᤣ ᤁᤧᤈᤥᤃᤢ᤹ ᤜᤧᤰᤁᤩᤠᤱ ᤀᤠᤳᤋᤠᤴ ᤀᤠᤳᤋᤠᤴ ᤁᤧᤒᤣᤰ. ᤂᤧᤵᤔᤥ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖᤖᤥ. 4 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤠᤱᤅᤠᤱ ᤀᤠᤱᤃᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳᤗᤖᤥ—‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤘᤠ᤹ᤔᤠ ᤐᤥᤱ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤹ᤖᤧ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥ ᤏᤛᤠ᤺ᤴᤛᤠᤒᤠ ᤔᤧᤒᤥᤱᤅᤠᤱ ᤗᤠᤱᤔᤧᤄᤣ᤺ᤰᤏᤧᤓᤃᤪ. ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤔᤏᤠᤔᤧ᤺ᤴᤏᤣ ᤁᤧᤶᤒᤥᤱᤏᤧᤴ॥’ 5 “ᤂᤧᤶᤔᤩᤠᤰᤗᤰ ᤔᤣ᤺ᤴ. ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤀᤠᤱᤃᤠ᤹ ᤌᤣ ᤔᤧᤳᤋᤠᤱ. ᤀᤡᤛᤪᤠᤀᤡᤗᤒᤠ ᤏᤧᤵᤑᤢ ᤌᤰᤔᤥᤒᤠ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖ ᤏᤢ ᤕᤣᤋᤣᤖᤖᤧ ᤁᤢᤛ᤻ᤛᤠ ᤀᤔᤠᤛᤠᤴ ᤂᤧᤸᤗᤧ ᤌᤣ ᤔᤧᤳᤋᤢᤛᤡ ᤂᤧᤴ ᤐᤠ᤺ᤴᤏᤡᤴ ᤂᤧᤏᤧ᤹ ᤀᤠᤵᤑᤣᤰ ᤁᤧᤏᤡᤛᤢᤀᤠᤱᤅᤣ ᤘᤠ᤹॥ ᤌᤱᤅᤥᤒᤠ ᤕᤧᤶ ᤁᤢᤀᤡᤛᤡᤰ ᤛᤏᤠᤖᤢᤱ ᤐᤥ᤺ᤰᤂᤧᤀᤠᤱ ᤘᤕᤧᤛᤠᤱ ᤂᤢᤏᤧ᤹ ᤂᤧᤴ ᤏᤧᤵᤔᤠᤱ ᤛᤧᤖᤢᤛᤡ॥ ᤜᤠᤒᤠ ᤂᤧᤴ ᤔᤠᤰᤂᤡᤸᤗᤧ ᤂᤢᤏᤧ᤹ ᤁᤢᤓ᤹ᤀᤡ᤺ᤴ ᤏᤢ ᤁᤢᤗᤠᤱᤅᤥᤒᤠ ᤗᤠᤱᤛᤢ᤺ᤵᤐᤡᤴ ᤆᤡ᤺ᤴᤍᤢ॥ 6 ᤂᤧᤏᤧ᤹ ᤁᤧᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤌᤣᤎᤣ ᤁᤧᤔᤧᤳ. ᤂᤧᤴ ᤜᤧᤰᤁᤣᤀᤣ ᤂᤢᤏᤧ᤹ᤏᤢ ᤕᤠ᤺ᤶᤒᤰ ᤆᤥᤃᤧ᤹. ᤁᤖ ᤂᤢᤏᤧ᤹ ᤁᤢᤎᤧᤃᤣᤰ ᤑᤢᤵᤔᤠᤏᤢ ᤛᤥᤖᤡᤰ ᤂᤧᤔᤠ ᤕᤱᤛᤱᤅᤥ ᤛᤏᤠᤖᤢᤱᤅᤠᤱ ᤐᤣ᤺ᤰᤔᤠ ᤔᤧᤄᤥᤏᤧᤴᤗ॥ 7 “ᤁᤖ ᤃᤡᤗᤠᤍᤒᤠ ᤒᤷᤈᤡᤸᤗᤤᤖᤧ ᤁᤢᤛ᤻ᤛᤠᤜᤠ᤹ᤃ ᤗᤢᤱᤔᤠ᤹ ᤋᤢᤰᤋᤧᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤱᤜᤠ᤹ ᤀᤥᤔᤧᤳᤋᤧ ᤆᤥᤃᤧᤛᤧ᤹॥ ᤂᤧᤏᤧ᤹ ᤁᤧᤶᤓᤢ᤹ ᤀᤒ᤻ᤛᤠᤗᤥᤔᤗᤠᤶ ᤀᤠᤱᤃᤠ᤹ ᤂᤧᤳᤇᤡᤱᤅᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ᤏᤢᤀᤣ ᤛᤥᤖᤡᤰ ᤔᤧᤘᤕᤧ॥ 8 “ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤒᤜᤢᤖᤡᤔᤒᤠ ᤒᤣᤏᤩᤠᤔᤡᤏᤡ ᤃᤣᤖᤠᤖᤧ ᤁᤢᤛ᤻ᤛᤠ ᤛᤡᤔᤡᤴᤏᤢ ᤂᤧᤏᤧ᤹ ᤛᤡᤱᤛᤡᤱ ᤗ᤹ᤖᤧ᤹॥ ᤀᤠᤱᤃᤠ᤹ ᤔᤜᤏᤥᤔᤀᤥ ᤐᤣᤃᤠᤱᤒᤠ ᤕᤧᤴᤏᤥ ᤂᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤠᤱᤍᤣᤛᤠᤱᤅᤠᤱ ᤘᤕᤧ॥ ᤀᤠᤱᤃᤠ᤹ ᤏᤢ᤺ᤰᤛᤠᤱᤅᤧᤸᤗᤧ ᤂᤧᤴ ᤀᤠᤱᤃᤠ᤹ ᤀᤠᤍᤢᤶᤛᤧ ᤕᤷᤍᤏ ᤘᤜ᤺ᤱᤅᤥ ᤕᤧ. ᤂᤢᤏᤧ᤹ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤅᤠᤱ. ‘ᤀᤠᤱᤃᤠ᤹ ᤂᤧᤏᤧ᤹ ᤋᤠᤓᤣ᤺ᤸᤗᤧ ᤔᤧᤛᤧᤳᤏᤧᤴ᤹॥’ 9 ᤁᤖ ᤀᤠᤸᤗ ᤂᤧᤏᤧ᤹ ᤂᤧᤴ ᤁᤢᤍᤥ᤺ᤵᤔᤠ ᤔᤧᤗᤣ᤺ᤳᤋᤧᤴᤏᤧ᤹॥ ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤔᤏᤠ ᤁᤧᤈᤥᤰ ᤜᤧᤰᤁᤩᤠᤱ ᤂᤧᤴ ᤀᤠᤰᤂᤣ ᤔᤧᤵᤔᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤏᤡᤛᤢ᤹॥ ᤂᤢᤏᤧ᤹ ᤁᤢᤎᤧᤃᤣᤰ ᤑᤢᤵᤔᤠᤏᤢ ᤛᤥᤖᤡᤰ ᤔᤠᤰᤂᤡ᤹ᤏᤢ ᤂᤧᤔᤠ ᤕᤱᤛᤱᤅᤥ ᤐᤣ᤺ᤰᤗᤖᤥ॥” ᤍᤠᤀᤢᤍ ᤜᤠᤱᤅᤡᤴ ᤔᤠᤛᤡᤱ 10 ᤂᤧᤒᤩᤠᤱ ᤍᤠᤀᤢᤍᤧᤴ ᤁᤢᤎᤠ᤺ᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ 11 ᤜᤣᤒᤪᤥᤏᤀᤥ ᤋᤱᤒᤣ ᤏᤢᤛᤡ ᤏᤢ ᤕᤖᤢᤛᤗᤧ᤺ᤶᤔᤥ ᤛᤢᤶᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤁᤧᤖᤧᤰᤗᤧ ᤂᤢᤏᤧ᤹ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥᤃᤢ॥ 12 ᤜᤧᤰᤁᤩᤠᤱ ᤛᤥᤗᤥᤔᤏᤧᤴ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤌᤎᤵ ᤔᤧᤸᤗ᤹ᤀᤣ ᤕᤢᤰᤛᤡᤱ ᤐᤥ᤺ᤰᤂᤧᤖᤥ॥ ᤀᤍᤥᤏᤡᤕᤠᤜᤴ ᤔᤠᤛᤡᤱ 13 ᤀᤠᤸᤗ ᤜᤃ᤻ᤃᤡᤋᤖᤧ ᤁᤢᤛ᤻ᤛᤠ ᤀᤍᤥᤏᤡᤕᤠᤜᤴ ᤛᤥᤗᤥᤔᤏᤖᤧ ᤁᤢᤶᤔᤠ ᤒᤋᤛᤣᤒᤠᤀᤥ ᤐᤣ॥ ᤒᤋᤛᤣᤒᤠ᤺ᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤌᤣ ᤂᤧᤏᤧ᤹ ᤏᤢᤒᤠ ᤁᤧᤀᤡ᤺ᤳᤋᤢᤀᤠᤱ ᤁᤧᤍᤧᤒᤡ᥅” ᤂᤢᤏᤧ᤹ ᤏᤥᤃᤵ ᤐᤡᤖᤢ. “ᤀᤥᤘᤠ. ᤏᤢᤒᤠᤀᤣ ᤀᤡ᤺ᤳᤋᤢᤱᤗᤥ॥” 14 ᤂᤧᤒᤩᤠᤱ ᤂᤧᤸᤗᤧ ᤀᤠᤸᤗᤛᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤌᤧᤔᤠᤀᤡ ᤐᤠᤴ ᤔᤧᤵᤔᤠ ᤁᤳᤏᤧ॥” ᤂᤢᤏᤧ᤹ ᤔᤧᤳᤋᤢ. “ᤐᤠ᤺ᤳᤋᤧ᤹॥” 15 ᤀᤍᤥᤏᤡᤕᤠᤜᤖᤧ ᤂᤢᤏᤧ᤹ ᤔᤧᤳᤋᤢ. “ᤜᤠᤱᤈᤢᤶᤔᤡᤴ ᤀᤠᤱᤃᤠ᤹ᤀᤣ ᤂᤥᤔᤠ ᤁᤧᤒᤥᤱᤒᤠ ᤘᤕᤧ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤘᤠ᤹॥ ᤀᤠᤱᤃᤠ᤹ᤀᤣ ᤜᤠᤱ ᤐᤥᤱᤅᤠ ᤑᤠ᤹ᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤀᤡ᤺ᤳᤋᤢᤀᤠᤱ ᤘᤕᤧ॥ ᤜᤠᤱᤈᤢᤶᤔᤡᤴ ᤀᤠᤱᤃᤠ᤹ ᤀᤠᤴᤛᤠ᤹ᤖᤧᤴ ᤐᤥ᤺ᤰᤂᤧ॥ ᤁᤖ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤠᤱᤃᤪᤠᤳᤆᤡ ᤘᤃᤪᤠᤳᤆᤡ ᤐᤥ᤺ᤰᤂᤧ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤴ ᤜᤠᤱᤈᤢᤶᤔᤡᤴ ᤂᤢᤏᤧ᤹ᤀᤡᤴᤏᤣ ᤘᤕᤧ॥ 16 ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤗᤳᤇᤠ ᤐᤠᤴ ᤐᤣᤗᤡ ᤑᤠᤰᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤴ ᤔᤧᤒᤥᤱᤏᤧᤴ ᤔᤧᤒᤠ᤺ᤳᤋᤧᤴᤏᤧ᤹ᤀᤥ॥” ᤂᤢᤏᤧ᤹ ᤔᤧᤳᤋᤢ. “ᤂᤧᤴ ᤌᤣᤒᤣ᥅” 17 ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤛᤢᤏᤶᤔᤡ ᤀᤒᤡᤛᤃᤧᤴ ᤔᤣ᤺ᤰᤂᤡᤶ ᤔᤧᤵᤔᤠ ᤂᤥᤛᤢᤱᤗ ᤑᤠ᤹ᤀᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤐᤣᤗᤡ ᤑᤠᤰᤋᤠᤱ ᤐᤡᤖᤠᤱᤅᤧ᤹॥ ᤂᤢᤏᤧ᤹ ᤔᤣ᤺ᤴ ᤁᤧᤶᤔᤣᤳᤏᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹॥” 18 ᤒᤋᤛᤣᤒᤠᤖᤧ ᤏᤥᤃᤵ ᤐᤡᤖᤢ. “ᤐᤥᤱ᤹. ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤜᤠᤱᤅᤡᤴ ᤋᤠ᤹ᤈᤧᤰᤋᤢᤱ᤹॥” 19 ᤀᤠᤸᤗ ᤀᤍᤥᤏᤡᤕᤠᤜᤖᤧ ᤁᤢᤗᤠᤃᤡ ᤐᤠᤴ ᤁᤧᤔᤠ ᤑᤠ᤹ᤀᤠᤱ ᤒᤋᤛᤣᤒᤠᤴ ᤜᤠᤱᤅᤧᤀᤥ ᤐᤣ᤺ᤸᤗᤧ. ᤂᤢᤏᤧ᤹ ᤗᤠᤶᤍᤠ᤺ᤰᤔᤠᤖᤧ ᤗᤠᤃᤡ ᤜᤠᤱᤅᤡᤴ ᤐᤥᤃᤧ ᤜᤧᤰᤁᤩᤠᤱ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤂᤢᤏᤧ᤹ ᤛᤧᤘᤠ ᤔᤧᤳᤋᤢᤀᤠᤱ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱ॥ ᤁᤢᤶᤔᤠᤖᤧ ᤁᤢᤗᤠᤃᤡ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤜᤠᤱᤕᤢᤰᤏᤠ ᤌᤡᤰ ᤋᤠ᤺ᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱ॥ 20 ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤆᤢᤰᤛᤠ ᤐᤣᤗᤡ ᤌᤡᤰ ᤑᤠᤰᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤴ ᤔᤧᤒᤥᤱᤏᤧᤴ ᤔᤧᤔᤧᤳᤋᤠᤱᤅᤡᤴᤏᤧ᤹ᤀᤥ॥” ᤜᤠᤱᤅᤡᤸᤗᤧ ᤏᤥᤃᤵ ᤐᤡᤖᤢ. “ᤀᤠᤶᤔᤠᤖᤧ ᤌᤣ ᤐᤠ᤺ᤵᤔᤠ ᤁᤧᤃᤳᤋᤢᤒᤣ᥅ ᤀᤠᤱᤃᤠ᤹ ᤂᤧᤴ ᤔᤧᤒᤥᤱᤏᤧᤴ ᤔᤧᤔᤧᤳᤏᤧᤴ᤹॥” 21 ᤂᤢᤏᤧ᤹ ᤔᤧᤳᤋᤢ. “ᤛᤢᤏᤶᤔᤡ ᤀᤒᤡᤛᤃᤧᤴ ᤂᤧᤏᤧ᤹ ᤁᤧᤶᤓᤢ᤹ ᤀᤍᤥᤏᤡᤕᤠᤜ᤺ᤴᤏᤢ ᤔᤣ᤺ᤰᤂᤡᤶ ᤔᤧᤳᤋᤧ᤹॥” 22 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤶᤔᤠ ᤏᤥᤃᤵ ᤐᤡᤖᤢ. “ᤛᤢᤏᤶᤔᤡ ᤀᤒᤡᤛᤃᤧᤴ ᤀᤍᤥᤏᤡᤕᤠᤜ᤺ᤴᤏᤢ ᤔᤣ᤺ᤰᤂᤡᤶ ᤔᤧᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣᤀᤠᤱ ᤐᤣᤗᤡ ᤁᤧᤓᤠᤰᤁᤠᤒᤠᤒᤣ᥅ ᤀᤥᤘᤠ. ᤂᤢᤏᤧ᤹ ᤀᤠᤱᤃᤠ᤹ ᤀᤠᤶᤓᤢ᤹ᤀᤣᤛᤒᤠ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤖᤧ ᤁᤢᤗᤠᤃᤡ ᤏᤢ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤁᤢᤗᤠᤃᤡᤀᤠᤱ ᤂᤧᤏᤧ᤹ ᤜᤠᤱᤈᤢᤶᤔᤡᤴᤏᤣ ᤁᤧᤏᤠ᤺ᤰᤋᤢᤛᤠᤱ ᤐᤥ᤺ᤰᤂᤧᤒᤠ ᤘᤕᤧ᥄” 23 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤔᤠᤱᤜᤧᤰᤛᤡᤱᤅᤠᤱ ᤐᤠ᤺ᤳᤋᤢ. “ᤁᤴ ᤐᤣᤗᤡ᤺ᤸᤗᤧ ᤗᤠᤃᤡ ᤀᤍᤥᤏᤡᤕᤠᤜᤖᤧ ᤂᤢᤏᤧ᤹ ᤁᤢᤜᤡᤱᤔᤧᤴ ᤔᤧᤔᤠᤛᤢᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤠᤖ᥄ 24 ᤀᤠᤸᤗ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤜᤠᤱᤕᤢᤰᤏᤠᤀᤥ ᤀᤠᤱᤃᤠ᤹ ᤕᤢᤰᤋᤡᤱ ᤁᤧᤈᤥ᤺ᤰᤐᤠ ᤏᤢ ᤂᤢᤏᤧ᤹ ᤁᤢᤔᤠᤱᤜᤢᤵ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤜᤡᤶᤛᤕᤱ ᤁᤧᤓᤥᤱᤒᤠ ᤀᤠᤶᤓᤠ ᤁᤴ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤀᤡᤴᤇᤠ ᤀᤍᤥᤏᤡᤕᤠᤜᤴ ᤛᤧᤵᤔᤠ ᤐᤥᤱ᤹ ᤑᤠ᤹ᤀᤠᤱ ᤐᤠ᤺ᤳᤋᤢᤱ᤹᥄” 25 ᤂᤧᤒᤩᤠᤱ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤀᤡᤱᤈᤠᤱ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤍᤥᤏᤡᤕᤠᤜᤴ ᤗ᤺ᤵᤛᤢᤛᤧᤖᤢᤖᤥ॥ ᤀᤒᤡᤕᤠᤌᤠᤖᤧᤴ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤒᤠ ᤏᤢ ᤕᤥᤀᤠᤒᤧᤴ ᤛᤩᤧᤒᤠ 26 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤠᤈᤣ᤹ ᤛᤡᤱᤒᤢᤱ ᤀᤏᤠᤋᤥᤋᤀᤥ ᤐᤣᤃᤧ᤹॥ ᤂᤧᤏᤧ᤹ᤃ ᤛᤡᤔᤠ ᤁᤧᤕᤠᤖᤢ᤹. ᤁᤖ ᤀᤠᤱᤃᤠ᤹ ᤀᤠᤸᤗᤥᤛᤠ ᤂᤧᤏᤧ᤹ ᤔᤧᤛᤧᤳᤏᤧᤴ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤍᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤐᤱᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤠᤶᤒᤠᤖᤧ ᤋᤢᤔᤢᤒᤠ ᤋᤢᤰᤂᤣᤀᤥ ᤂᤧᤏᤧ᤹ᤀᤠᤱ ᤁᤧᤘᤕᤧ॥” 27 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤛᤥᤗᤥᤔᤏᤖᤧ ᤀᤒᤡᤕᤠᤌᤠᤖᤧᤴ ᤗ᤺ᤳᤋᤢᤍᤣᤛᤢ॥ ᤁᤶᤓᤗ᤹ᤖᤡᤰᤁᤣ ᤛᤡᤗᤥᤀᤥ ᤀᤣᤗᤡᤖᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤁᤧᤖᤧᤖᤥ॥ 28 ᤀᤠᤸᤗ ᤁᤴ ᤀᤡᤱᤄᤱᤅᤡᤴ ᤕᤥᤀᤠᤒᤖᤧᤀᤥ ᤁᤧᤖᤧ. ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤂᤧᤳᤇᤡᤱ ᤐᤣᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤠᤱᤜᤠ᤹ ᤋᤧᤶᤛᤢᤀᤠᤱ ᤕᤧᤒᤧ ᤌᤣᤀᤠᤱᤓᤧᤸᤗᤧ ᤀᤒ᤻ᤛᤠᤗᤥᤔᤖᤧ ᤍᤠᤀᤢᤍᤖᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢᤸᤗᤧ ᤂᤢᤏᤧ᤹ ᤀᤒ᤻ᤛᤠᤗᤥᤔᤏᤢ ᤔᤣ᤺ᤴ. ᤁᤖ ᤀᤍᤥᤏᤡᤕᤠᤜ᤺ᤴᤏᤢ ᤆᤧᤶᤓᤴ ᤆᤥᤃᤢᤀᤠᤱ ᤘᤕᤧ॥ 29 ᤕᤥᤀᤠᤒᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤂᤧᤳᤇᤡᤱ ᤐᤣᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤢᤱ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤸᤗ ᤛᤥᤗᤥᤔᤏᤖᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤕᤥᤀᤠᤒᤧᤴ ᤌᤰᤔᤠ ᤛᤧᤵᤔᤠᤖᤧ ᤗᤠᤃᤡ ᤛᤥᤗᤥᤔᤏᤖᤧ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤔᤢᤖᤠ ᤔᤧᤳᤋᤢᤀᤠᤱ ᤐᤠᤱᤄᤢᤍᤣᤛᤢ॥ 30 ᤁᤸᤗᤧᤆᤥᤃᤢᤸᤗᤧ ᤒᤏᤠᤕᤠᤜᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧᤀᤠᤱ ᤕᤥᤀᤠᤒᤧᤴ ᤔᤧᤳᤋᤢ. “ᤜᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤂᤧᤏᤧ᤹ ᤗᤠ᤺ᤰᤁᤠᤳ ᤁᤧᤗ᤺ᤶᤔᤢ॥’” ᤁᤖ ᤕᤥᤀᤠᤒᤖᤧ ᤏᤢᤃᤵ ᤐᤡᤖᤢ. “ᤏᤠ᤹ᤀᤠ. ᤀᤠᤱᤃᤠ᤹ ᤁᤵᤔᤥᤀᤣ ᤛᤡᤀᤠ॥” ᤒᤏᤠᤕᤠᤜᤖᤧ ᤕᤥᤀᤠᤒᤖᤧ ᤁᤢᤒᤠ᤺ᤴᤏᤡᤴ ᤜᤠᤱᤅᤡᤴ ᤆᤧᤰᤋᤢ॥ 31 ᤂᤧᤒᤩᤠᤱ ᤛᤥᤗᤥᤔᤏᤖᤧ ᤒᤠᤏᤠᤕᤠᤜ᤺ᤴ ᤀᤡᤱᤈᤠᤱ ᤐᤡᤖᤢ. “ᤕᤥᤀᤠᤒᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤧ᤹॥ ᤂᤧᤴ ᤛᤧᤖᤧ᤹ᤀᤠᤱ ᤗᤢᤵᤋᤧ᤹. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤕᤥᤀᤠᤒᤖᤧ ᤁᤢᤍᤥ᤺ᤵᤔᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ ᤛᤧᤛᤢᤒᤠ ᤀᤠᤵᤋᤡᤰᤁᤡᤴ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤛᤕᤱᤗᤠᤶ ᤗᤧᤵᤔᤡ ᤏᤠ᤺ᤰᤋᤠᤱ ᤐᤡᤖᤠᤱᤅᤧ᤹॥ 32 ᤕᤥᤀᤠᤒᤖᤧ ᤔᤠᤰᤂᤡ᤹ ᤛᤧᤛᤢᤒᤠᤸᤗᤧ ᤁᤢᤗᤧᤰᤘᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ᤀᤣ ᤏᤢ᤺ᤰᤋᤢ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤏᤡᤱᤘᤠ᤹ᤀᤣ ᤔᤧᤱᤄᤥᤀᤣ ᤕᤥᤀᤠᤒᤖᤧ ᤂᤢᤏᤧ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤀᤡᤛᤪᤠᤀᤡᤗᤒᤠ ᤌᤰᤔᤥᤒᤠ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤏᤢ ᤕᤜᤢᤍᤠᤒᤠ ᤌᤰᤔᤥᤒᤠ ᤕᤣᤋᤣᤖᤖᤧ ᤁᤢᤛ᤻ᤛᤠ ᤀᤔᤠᤛᤠᤴ ᤑᤳᤋᤢᤛᤡᤀᤠᤱ ᤋᤠᤓᤣ᤺ᤸᤗᤧ ᤛᤧᤖᤢᤛᤡ॥ 33 ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤀᤠᤓᤧᤸᤗᤧᤛᤠᤱ ᤕᤥᤀᤠᤒᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤋᤧᤳᤋᤢᤛᤡᤖ॥ ᤁᤖ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤍᤠᤒᤠ ᤏᤢ᤹ᤔᤠᤍᤠᤔᤧᤴ ᤛᤍᤠᤍᤡᤱ ᤘᤠ᤹ᤖᤖᤥ॥” 34 ᤁᤸᤗᤧᤆᤥᤃᤢᤸᤗᤧ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤌᤥ᤺ᤰᤛᤡᤱ ᤐᤣ. ᤜᤧᤰᤁᤩᤠᤱ ᤕᤥᤀᤠᤒᤧᤴ ᤌᤃᤢᤛᤧᤖᤢ. ᤂᤶᤓᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤗᤢᤵᤋᤢ॥ 35 ᤜᤠᤱᤅᤡᤸᤗᤧ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤕᤥᤀᤠᤒᤖᤧ ᤁᤢᤗᤧᤰᤘᤠᤀᤥ ᤌᤰᤔᤥᤒᤠ ᤕᤢᤰᤋᤡᤱ ᤆᤥᤃᤢ. ᤜᤧᤰᤁᤩᤠᤱ ᤀᤒᤡᤕᤠᤌᤠᤖᤖᤧ ᤁᤢᤗᤧᤰᤘᤠᤀᤥ ᤛᤠᤍᤥᤁᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤢᤰᤋᤡᤱ ᤆᤥᤃᤢᤖᤥ॥ ᤛᤡᤔᤡᤴ ᤔᤠᤛᤡᤱ 36 ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤛᤡᤔᤡᤴ ᤀᤢ᤺ᤵᤔᤠᤍᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤕᤖᤢᤛᤗᤧ᤺ᤶᤔᤥ ᤀᤠᤵᤑᤣᤰ ᤁᤧᤗᤠᤃᤡ ᤜᤡᤶ ᤆᤥᤃᤧ᤹ᤀᤠᤱ ᤂᤧᤏᤧ᤹ ᤜᤠᤒᤠ ᤂᤧᤵᤔᤥᤀᤣ ᤕᤢᤅᤧ᤹॥ ᤕᤧᤰᤕᤰᤁᤡᤴ ᤔᤧᤗᤧᤖᤧᤴᤏᤧ᤹ᤀᤠᤱ ᤘᤣ᤹ ᤀᤠᤳᤋᤡᤴ ᤋᤧᤴᤏᤥᤀᤠᤱ ᤔᤧᤒᤣᤃᤧᤴᤏᤧ᤹॥ 37 ᤕᤧᤰᤕᤰᤁᤡᤴ ᤁᤧᤗᤧᤖᤢᤀᤠᤱ ᤁᤡᤍᤪᤥᤏ ᤏᤧᤏᤧᤒᤠᤍᤧᤴᤏᤡᤴ ᤁᤧᤃᤠ᤺ᤰᤋᤢᤀᤠᤱ ᤁᤧᤒᤣ᤺ᤰᤏᤧᤓᤃᤪ ᤂᤧᤏᤧ᤹ ᤁᤧᤛᤡᤖᤥ॥ ᤜᤧᤰᤁᤣ ᤁᤧᤈᤥᤃᤢᤏᤧᤓᤃᤪ ᤂᤧᤏᤧ᤹ ᤁᤧᤔᤠᤰᤂᤡ᤹ ᤛᤧᤒᤠ ᤀᤠᤵᤋᤡᤰᤁᤡᤴ ᤂᤧᤏᤧ᤹ ᤀᤠᤵᤑᤣᤰ ᤁᤧᤛᤶᤎᤠᤱᤅᤣ ᤌᤠᤖᤥ॥” 38 ᤛᤡᤔᤡᤖᤧ ᤜᤠᤱᤅᤡᤴ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤠᤖᤧ ᤆᤩᤠ ᤁᤧᤒᤠ᤺ᤳᤋᤢ᤹. ᤂᤧᤴ ᤏᤢᤒᤠᤀᤣ ᤆᤥᤰ॥ ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤁᤧᤛᤧᤘᤠᤖᤥᤒᤠᤴ ᤔᤧᤔᤧᤳᤋᤠᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤆᤥᤃᤢᤱ᤹॥” ᤜᤧᤰᤁᤩᤠᤱ ᤕᤖᤡᤰ ᤕᤧᤶ ᤌᤠᤖᤡᤰ ᤛᤡᤔᤡᤴ ᤕᤖᤢᤛᤗᤧ᤺ᤶᤔᤥᤀᤣ ᤕᤢᤅᤧ॥ 39 ᤁᤖ ᤋᤱᤒᤣ ᤛᤢᤶᤛᤡ ᤀᤣᤃᤠᤱ ᤛᤡᤔᤡᤖᤧ ᤁᤢᤕᤥ᤺ᤃ᤻ᤒᤠ ᤏᤧᤵᤑᤢ ᤃᤠᤋᤒᤠ ᤜᤠᤱ ᤔᤠᤁᤠᤖᤧ ᤁᤢᤛ᤻ᤛᤠ ᤀᤠᤁᤡᤛᤀᤥ ᤂᤧᤳᤏᤧᤛᤡ ᤐᤣᤛᤡ॥ ᤀᤠᤸᤗ ᤂᤧᤴ ᤏᤧᤵᤑᤢ ᤁᤢᤕᤥ᤺ᤃ᤻ᤒᤠᤜᤠ᤹ ᤃᤠᤋᤀᤥ ᤘᤠ᤹ᤛᤡ ᤑᤠ᤹ᤀᤠᤱ ᤛᤡᤔᤡᤖᤧ ᤂᤧᤵᤛᤢ. 40 ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤍᤱᤅᤥ ᤛᤡᤱᤍᤠ᤺ᤰᤂᤥ᤺ᤴ ᤕᤢᤰᤏᤠᤴ ᤀᤡᤛᤡᤰᤂᤢᤀᤠᤱ ᤂᤢᤏᤧ᤹ ᤁᤢᤕᤥ᤺ᤃ᤻ᤒᤠᤜᤠ᤹ ᤁᤥ᤺ᤵᤔᤠᤛᤡᤖᤧ ᤗᤠᤃᤡ ᤃᤠᤋᤒᤠ ᤀᤠᤁᤡᤛᤀᤥ ᤐᤣ॥ ᤁᤶᤓᤗ᤹ᤖᤡᤰ ᤛᤡᤔᤡᤴ ᤐᤣᤀᤠᤱ ᤃᤠᤋᤗᤠᤶ ᤂᤧᤴ ᤏᤧᤵᤑᤢ ᤁᤢᤕᤥ᤺ᤃ᤻ᤒᤠᤜᤠ᤹ ᤑᤧᤳᤋᤢᤛᤡ. 41 ᤀᤠᤸᤗ ᤛᤡᤔᤡᤴ ᤕᤖᤢᤛᤗᤧᤔᤗᤠᤶ ᤃᤠᤋ ᤐᤣᤀᤠᤱ ᤏᤢ᤺ᤰᤂᤧᤒᤠ ᤀᤡᤱᤄᤱᤅᤡᤴ ᤛᤥᤗᤥᤔᤏ ᤜᤠᤱᤅᤡᤴ ᤔᤧᤈᤧᤰᤋᤢ॥ 42 ᤂᤧᤒᤩᤠᤱ ᤂᤢᤏᤧ᤹ ᤛᤡᤔᤡᤴ ᤀᤢ᤺ᤵᤔᤠᤍᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤂᤧᤴ ᤔᤧᤳᤋᤢ. “ᤌᤣ ᤀᤠᤱᤃᤠ᤹ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤔᤠ ᤐᤠᤱᤏᤧᤀᤠᤱ ᤀᤰᤂᤣ ᤔᤧᤔᤧᤳᤏᤧᤴᤏᤠᤱ ᤛᤠᤶᤍᤡᤱ ᤐᤡᤏᤧᤀᤠᤱ ᤔᤧᤘᤕᤧᤴᤏᤧᤶᤒᤡ᥅ ‘ᤁᤢᤓᤠ ᤘᤣ᤹ ᤋᤧᤴᤏᤥ ᤐᤣ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤴ ᤋᤧᤴᤏᤡᤴ ᤁᤧᤗᤧᤖᤢᤀᤠᤱ ᤁᤧᤒᤣ᤺ᤰᤐᤠ ᤕᤧᤴᤏᤥ ᤛᤧᤰᤂᤠᤀᤣ ᤁᤧᤛᤡᤖᤥ॥’ ᤂᤧᤴ ᤕᤧᤶᤔᤥ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤠᤱ. ‘ᤀᤠᤍᤠᤱᤒᤠᤖᤧ ᤆᤩᤠ ᤁᤧᤒᤠ᤺ᤳᤋᤢ. ᤂᤧᤴ ᤏᤢᤒᤠᤀᤣ ᤆᤥᤰ॥ ᤀᤠᤍᤠᤱᤒᤠᤖᤧ ᤁᤧᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱ᤹॥’ 43 ᤕᤜᤘᤣ ᤍᤠᤱᤒᤠᤀᤥᤒᤠ ᤔᤠᤱᤜᤧᤰᤁᤡᤴ ᤏᤢ ᤀᤠᤱᤃᤠ᤹ ᤐᤡᤏᤧᤒᤠ ᤀᤡᤱᤈᤠᤱᤅᤡᤴ ᤂᤧᤏᤧ᤹ ᤌᤣᤀᤠᤱ ᤁᤧᤴᤀᤡ᤺ᤳᤋᤢᤴ ᤁᤧᤴᤏᤠ᤺ᤳᤋᤢᤴ᥅” 44 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤛᤡᤔᤡᤴ ᤀᤰᤂᤣᤀᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤀᤠᤵᤑᤣᤰ ᤁᤧᤏᤡᤛᤢᤀᤠᤱᤅᤣ ᤘᤠ᤹॥ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤁᤧᤓᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢ᤹॥ 45 ᤁᤖ ᤀᤠᤱᤃᤠ᤹ ᤛᤥᤗᤥᤔᤏ ᤜᤠᤱᤅᤡᤴ ᤔᤢ᤹ᤀᤡᤛᤠᤒᤠ ᤐᤥᤱᤅᤠ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤍᤠᤀᤢᤍᤖᤧ ᤁᤢᤜᤠᤱᤕᤢᤰᤏᤠᤴ ᤀᤠᤓᤧᤸᤗᤧᤛᤠᤱ ᤁᤶᤒᤪᤠᤱ ᤐᤥᤱ᤹॥” 46 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣ. ᤜᤧᤰᤁᤩᤠᤱ ᤒᤏᤠᤕᤠᤜ᤺ᤸᤗᤧ ᤛᤡᤔᤡᤴ ᤌᤃᤢᤀᤠᤱ ᤛᤧᤖᤢ॥ ᤁᤶᤓᤗ᤹ᤖᤡᤰ ᤀᤠᤸᤗ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤁᤢᤜᤠᤱᤈᤢᤶᤔᤡᤴ ᤌᤎᤵ ᤔᤧᤸᤗ᤹ᤀᤣ ᤕᤢᤰᤛᤡᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.