᥇ ᤜᤠᤱ 19 - LIFOTNT

ᤜᤥᤖᤣᤒ ᤁᤥ᤺ᤰᤔᤠᤀᤥ ᤀᤣᤗᤡᤕᤠᤴ

¹ ᤀᤠᤸᤗ ᤀᤣᤗᤡᤕᤠᤖᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤒᤠᤗᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤋᤠᤓᤣ᤺ᤸᤗᤧ ᤛᤧᤖᤢᤛᤡᤒᤠ ᤐᤠ᤺ᤴᤏᤡᤴ ᤀᤠᤜᤠᤒᤖᤧ ᤀᤡᤈᤣᤒᤣᤗᤧᤴ ᤔᤧᤳᤋᤢ॥

² ᤁᤸᤗᤧᤆᤥᤃᤢᤸᤗᤧ ᤀᤡᤈᤣᤒᤣᤗᤖᤧ ᤀᤰᤂᤣ ᤔᤧᤳᤋᤢᤀᤠᤱ ᤀᤣᤗᤡᤕᤠᤀᤥ ᤀᤡᤱᤄᤱ ᤁᤧᤛᤠᤒᤠᤎᤡᤰ ᤐᤠᤱᤄᤢᤍᤣᤛᤢ. “ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤂᤧᤱᤜᤠ᤹ ᤁᤧᤛᤧᤖᤢᤛᤡ. ᤜᤧᤰᤁᤣᤗ᤹ᤖᤡᤰᤁᤣ ᤋᤠ᤺ᤴᤍᤡᤰ ᤜᤠᤒᤠ ᤁᤴ ᤕᤧᤶᤔᤥ ᤌᤠᤖᤡᤰᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤧᤛᤧᤳᤏᤧᤴᤏᤧᤓᤃᤪ. ᤔᤠᤱᤜᤠ᤹ᤖᤧ ᤀᤠᤱᤃᤠ᤹ ᤜᤧᤰᤁᤣᤀᤣ ᤔᤧᤔᤧᤳᤋᤠᤖ ᤀᤡᤃᤪ ᤂᤧᤴᤏᤢ᤺ᤸᤗᤧ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤖ॥”

³ ᤀᤣᤗᤡᤕᤠᤴ ᤁᤡᤛᤧᤀᤠᤱ ᤂᤢᤏᤧ᤹ ᤜᤡᤱᤔᤠᤖᤧ ᤗᤠᤃᤡ ᤂᤧᤳᤇᤡᤱ॥ ᤀᤠᤸᤗ ᤂᤢᤏᤧ᤹ ᤕᤜᤢᤍᤠᤒᤠ ᤒᤣᤷᤛᤣᤒᤠ ᤁᤧᤖᤧ. ᤂᤧᤒᤩᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤴ ᤜᤠᤒᤠ ᤂᤧᤵᤔᤥ ᤗᤧᤖᤢᤎ.

⁴ ᤜᤧᤰᤁᤩᤠᤱ ᤂᤢᤏᤧ᤹ᤃ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤌᤡᤰᤕᤠ᤺ᤴᤒᤠ ᤗᤠᤶ ᤗᤠᤱᤄᤣᤃᤧ ᤐᤣ॥ ᤂᤢᤏᤧ᤹ ᤗᤳᤇᤠ ᤕᤈᤧ᤺ᤰ ᤛᤡᤱᤒᤢᤰᤁᤥ ᤁᤧᤖᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤡᤃᤠᤱ ᤕᤢᤱᤛᤡᤱᤅᤠᤱ ᤛᤡᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ ᤜᤣ᤺ᤰᤋᤧ॥ ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤋᤣ᤹ᤖᤧᤀᤥ. ᤀᤠᤱᤃᤠ᤹ ᤁᤧᤖᤧᤰ ᤋᤢᤔᤢᤱ ᤛᤢᤖᤢᤱ॥ ᤀᤠᤱᤃᤠ᤹ᤃ ᤀᤠᤶᤒᤠ ᤀᤠᤴᤎᤧᤒᤠᤛᤡᤏᤢ᤺ᤸᤗᤧ ᤏᤢᤒᤠ ᤔᤧᤈᤥᤰᤁᤠᤴ᥄”

⁵ ᤂᤧᤒᤩᤠᤱ ᤂᤢᤏᤧ᤹ ᤀᤠᤶᤓᤠ ᤂᤧᤴ ᤕᤈᤧ᤺ᤰ ᤛᤡᤱᤒᤢᤰ ᤛᤡᤃᤠᤱ ᤛᤥ᤺ᤴᤇᤡᤱᤅᤠᤱ ᤛᤳᤅᤠ᤺ᤰ ᤀᤡᤵᤛᤧ॥ ᤂᤶᤓᤩᤠᤱ ᤆᤄᤵ ᤔᤠᤱᤗᤠᤀᤡᤱᤒᤠ ᤌᤡᤰᤗᤧ ᤂᤢᤏᤧ᤹ ᤛᤢᤛᤢᤀᤠᤱ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤆᤩᤧ᤹॥”

⁶ ᤂᤢᤏᤧ᤹ ᤏᤠᤏᤠ ᤁᤳᤏᤠ ᤀᤥᤔᤧᤳᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣᤰ ᤗᤧᤵᤔᤠᤱ ᤁᤧᤕᤧᤶᤒᤠ ᤔᤡᤄᤠᤱᤃᤪᤥ᤺ᤰᤁᤥ ᤀᤥ᤹ᤔᤏᤠᤒᤠ ᤆᤠᤖ᤺ᤵᤐᤠ ᤌᤡᤰ ᤏᤢ ᤆᤫᤠ᤺ᤳ ᤕᤠᤱᤔᤠ ᤑᤱᤏᤠ ᤌᤡᤰ ᤏᤡᤛᤢ॥ ᤂᤧᤴ ᤆ ᤌᤢᤅᤢᤀᤠᤱ ᤕᤠᤶᤔᤥ ᤏᤧᤛᤡᤱ॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤕᤠᤶᤔᤥ ᤏᤡᤛᤡᤃᤣᤰᤐᤠᤗᤧᤱ ᤂᤢᤏᤧ᤹ ᤛᤢᤛᤢᤀᤠᤱ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤆᤩᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤗᤠᤃᤡ ᤛᤠ᤹ᤖᤡᤰ ᤔᤠ᤺ᤱᤄᤠ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤘᤠ᤹॥”

⁸ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤆ ᤌᤢᤅᤢ॥ ᤜᤠᤒᤠ ᤂᤧᤴ ᤁᤢᤈᤠ᤺ᤸᤗᤧ ᤁᤧᤎᤢᤶᤒᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤂᤢᤏᤧ᤹ ᤗᤧᤴᤍᤡᤰ ᤛᤧᤴᤍᤡᤰ ᤗᤡᤒᤥᤱ ᤕᤧᤴ ᤗᤠᤱᤄᤣᤃᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠ ᤑᤠᤱᤈᤱ ᤜᤥᤖᤣᤒ ᤁᤧᤖᤧ॥

⁹ ᤂᤢᤏᤧ᤹ ᤂᤧᤵᤔᤥ ᤗᤳᤇᤠ ᤗᤢᤱᤑᤢᤰᤁᤥᤀᤥ ᤗᤠᤛᤧᤀᤠᤱ ᤜᤠᤒᤠ ᤂᤧᤵᤔᤥ ᤏᤠᤶᤍᤠ᤺ᤳᤇᤢᤖᤥ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤀᤣᤗᤡᤕᤠᤀᤥ ᤁᤧᤖᤧ. “ᤀᤣᤗᤡᤕᤠᤀᤣ. ᤂᤧᤏᤧ᤹ ᤁᤵᤔᤥ ᤌᤣ ᤁᤧᤈᤥ᤺ᤰᤗ ᤁᤧᤘᤠ᤹᥅”

ᤕᤜᤘᤣ ᤍᤠᤱᤒᤧᤸᤗᤧ ᤀᤣᤗᤡᤕᤠᤴ ᤐᤠ᤺ᤴᤇᤠ᤺ᤳᤋᤢ

¹⁰ ᤂᤢᤏᤧ᤹ ᤔᤧᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤛᤡᤰ ᤁᤧᤛᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤔᤧᤏᤠ᤹ᤖᤢᤀᤠᤱ ᤘᤠ᤹. ᤂᤧᤏᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤎᤢᤵᤛᤢ ᤔᤧᤗᤢ᤺ᤴᤍᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤀᤠᤱ ᤘᤠ᤹॥ ᤀᤠᤱᤃᤠ᤹ᤖᤰ ᤕᤠ᤺ᤰᤋᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤠᤖ ᤔᤧᤘᤠ᤹॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤁᤥ᤺ᤰᤔᤠᤀᤥ ᤐᤣᤃᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤧᤒᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤧᤵᤔᤥᤗᤠᤶ ᤐᤣ᤺ᤰᤔᤠ ᤆᤥ᤺ᤰᤗ ᤐᤳ॥” ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤢᤍᤃᤡ ᤗᤳᤇᤠ ᤛᤠ᤹ᤖᤡᤰ ᤕᤶᤒᤠ ᤏᤢ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤁᤥ᤺ᤰᤔᤠᤜᤠ᤹ ᤜᤧᤖᤢᤖ ᤜᤧᤰᤁᤩᤠᤱ ᤕᤠᤰᤐᤣ᤹ᤜᤠ᤹ ᤂᤧᤖᤢᤖ ᤂᤀᤡᤰ ᤂᤀᤡᤰ ᤀᤡᤰᤛᤡᤱᤓᤧᤖᤧ. ᤁᤖ ᤛᤢᤖᤡᤳ ᤁᤣᤈᤱᤅᤥ ᤕᤜᤘᤣ ᤍᤠᤱᤒᤧᤴ ᤜᤥ᤺ᤵᤋᤧ॥ ᤛᤢᤖᤡᤳ ᤁᤣᤈᤱ ᤜᤢ᤺ᤰᤋᤧᤒᤠ ᤀᤣᤃᤠᤱ ᤗᤢᤵᤗᤡ ᤌᤠᤅᤧ. ᤁᤖ ᤗᤢᤵᤗᤡᤀᤥ ᤕᤜᤘᤣ ᤍᤠᤱᤒᤧᤴ ᤔᤧᤘᤕᤧᤏᤧᤴ॥

¹² ᤗᤢᤵᤗᤡ ᤌᤠᤅᤧᤒᤠ ᤀᤣᤃᤠᤱ ᤗᤳᤇᤠ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧ. ᤁᤖ ᤔᤡᤎᤢᤱ ᤔᤡᤖᤠ᤺ᤰᤁᤥ ᤕᤜᤘᤣ ᤍᤠᤱᤒᤧᤴ ᤜᤥ᤺ᤵᤋᤧ॥ ᤂᤶᤓᤩᤠᤱ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧᤒᤠ ᤀᤣᤃᤠᤱ ᤂᤢᤛᤢᤰ ᤂᤢᤛᤢᤰ ᤁᤧᤗ᤹ᤒᤠ ᤛᤣ᤺ᤶᤛᤣ᤺ᤶᤒᤠ ᤀᤡᤰᤗᤠᤎᤡᤰ ᤐᤠᤖᤧ॥

¹³ ᤀᤠᤸᤗ ᤀᤣᤗᤡᤕᤠ᤺ᤸᤗᤧ ᤂᤧᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤂᤠᤶᤍᤣ᤺ᤳᤋᤡᤸᤗᤧ ᤁᤢᤏᤠ᤺ᤴ ᤋᤧᤵᤋᤢ. ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤗᤢᤱᤑᤢᤰᤁᤥ᤺ᤸᤗᤧ ᤁᤢᤶᤒᤪᤠᤀᤥ ᤕᤧᤶᤛᤡᤱ॥ ᤂᤧᤒᤩᤠᤱ ᤀᤡᤰᤗᤠᤎᤡᤰᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤣᤗᤡᤕᤠᤀᤣ. ᤂᤧᤏᤧ᤹ ᤁᤵᤔᤥ ᤌᤣ ᤁᤧᤈᤥ᤺ᤰᤗ ᤁᤧᤘᤠ᤹᥅”

¹⁴ ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤛᤡᤰ ᤁᤧᤛᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤔᤧᤏᤠ᤹ᤖᤢᤀᤠᤱ ᤘᤠ᤹. ᤂᤧᤏᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤎᤢᤵᤛᤢ ᤔᤧᤗᤢ᤺ᤴᤍᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤀᤠᤱ ᤘᤠ᤹॥ ᤀᤠᤱᤃᤠ᤹ᤖᤰ ᤕᤠ᤺ᤰᤋᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤠᤖ ᤔᤧᤘᤠ᤹॥”

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤀᤠᤳᤋᤡᤴ ᤗᤠᤶᤒᤠ ᤁᤧᤍᤩᤧᤀᤠᤱ ᤁᤧᤘᤠ᤹. ᤜᤠᤒᤠ ᤂᤧᤴ ᤗᤠᤶᤒᤠ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤍᤔᤛ᤻ᤁᤛᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤐᤣᤃᤧ᤹॥ ᤀᤠᤸᤗ ᤂᤧᤏᤧ᤹ ᤂᤧᤵᤔᤥ ᤁᤧᤃᤧᤳᤋᤡᤸᤗᤧ ᤜᤈᤠᤀᤣᤗᤧᤴ ᤀᤖᤠᤔᤒᤠ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤖᤧ᤹॥

¹⁶ ᤂᤧᤒᤩᤠᤱ ᤏᤡᤶᤛᤡᤖᤧ ᤁᤢᤛ᤻ᤛᤠ ᤕᤣᤜᤢ᤺ᤴᤏᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤖᤧ᤹. ᤜᤧᤰᤁᤩᤠᤱ ᤜᤠᤒᤡᤗ-ᤔᤜᤥᤗᤠᤒᤠ ᤛᤠᤑᤠᤋᤖᤧ ᤁᤢᤛ᤻ᤛᤠ ᤀᤣᤗᤡᤛᤠ᤺ᤴᤏᤠᤱ ᤂᤧᤏᤧ᤹ ᤁᤧᤀᤣᤃᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤖᤧ᤹॥

¹⁷ ᤜᤈᤠᤀᤣᤗᤖᤧ ᤁᤢᤍᤠᤓᤣᤗᤠᤶ ᤁᤧᤒᤡᤶᤒᤠᤜᤠ᤹ ᤕᤣᤜᤢ᤺ᤸᤗᤧ ᤛᤧᤖᤢᤛᤡ᤹. ᤜᤧᤰᤁᤩᤠᤱ ᤕᤣᤜᤢ᤺ᤸᤗᤧ ᤁᤢᤍᤠᤓᤣᤗᤠᤶ ᤁᤧᤄᤧᤳᤇᤡᤱᤒᤠᤜᤠ᤹ ᤀᤣᤗᤡᤛᤠ᤺ᤸᤗᤧ ᤛᤧᤖᤢᤛᤡ᤹॥

¹⁸ ᤜᤧᤰᤁᤣᤛᤠᤱ ᤒᤠᤗ ᤔᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥ᤹ᤜᤈ᤹ ᤔᤧᤴᤕᤢᤱᤛᤡᤱᤔᤏᤠᤒᤠ ᤏᤢ ᤂᤢᤴᤇᤡ᤹ ᤔᤢᤖᤠ᤺ᤸᤗᤧ ᤂᤧᤴ ᤆᤢᤵ ᤔᤧᤶᤔᤧᤵᤔᤏᤠᤒᤠ ᥍.᥆᥆᥆ ᤔᤏᤠᤜᤠ᤹ ᤀᤠᤱᤃᤠ᤹ ᤀᤡᤛᤪᤠᤀᤡᤗᤀᤥ ᤋᤠᤱᤄᤢᤱ ᤁᤳᤋᤢᤱᤛᤡᤱᤗᤥ॥”

ᤀᤣᤗᤡᤛᤠᤴ ᤔᤧᤀᤢ᤺ᤳᤋᤢ

¹⁹ ᤁᤸᤗᤧᤆᤥᤃᤢᤸᤗᤧ ᤀᤣᤗᤡᤕᤠᤴ ᤂᤧᤵᤔᤥᤗᤠᤶ ᤐᤣᤀᤠᤱ ᤛᤠᤑᤠᤋᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤴ ᤋᤢᤔᤢ॥ ᤂᤢᤏᤧ᤹ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤃᤠᤵ ᤐᤡᤳᤜᤠ᤹ᤏᤢ ᤛᤥᤛᤥᤖᤡᤰ ᤀᤡᤰᤋᤠᤵ ᤌᤥᤱᤏᤢ ᤕᤠᤃᤧ॥ ᤂᤢᤏᤧ᤹ᤃ ᤂᤧᤱᤜᤠ᤹ᤀᤥᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤃᤠᤵ ᤀᤣᤃᤠᤱᤒᤠ ᤐᤡᤳᤜᤠ᤹ ᤋᤥ᤺ᤰᤂᤢᤛᤡᤖ ᤕᤠᤃᤧ॥ ᤀᤣᤗᤡᤕᤠᤴ ᤐᤣᤀᤠᤱ ᤂᤢᤏᤧ᤹ ᤁᤢᤄᤠᤶᤍᤣ᤺ᤳᤋᤡᤸᤗᤧ ᤀᤣᤗᤡᤛᤠᤴ ᤂᤢ᤺ᤰᤋᤢ॥

²⁰ ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤁᤢᤒᤡᤳᤜᤠ᤹ ᤗᤧᤖᤢᤎᤛᤡ ᤜᤧᤰᤁᤩᤠᤱ ᤀᤣᤗᤡᤕᤠ᤺ᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤗᤥ᤺ᤰᤋᤧᤀᤠᤱ ᤔᤧᤳᤋᤢ. “ᤆᤡᤛᤠᤈᤡ᤹ ᤀᤠᤱᤃᤠ᤹ ᤀᤠᤶᤒᤠ ᤏᤢ ᤀᤠᤶᤔᤠ ᤆᤢᤵ ᤔᤧᤵᤔᤠᤛᤡᤀᤠᤱ ᤛᤧᤶᤔᤢᤀᤡ ᤐᤥᤱᤔᤠ ᤑᤠ᤺ᤰᤋᤠᤱᤅᤧ᤹॥ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤀᤣᤃᤠᤱ ᤋᤡᤶᤏᤧ॥” ᤀᤣᤗᤡᤕᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤐᤣᤃᤧ᤹ᤒᤠ. ᤀᤠᤱᤃᤠ᤹ ᤂᤧᤏᤧ᤹ ᤌᤣ ᤔᤧᤳᤏᤧᤀᤠᤱ ᤘᤠ᤹ᤒᤣ᥅”

²¹ ᤂᤶᤓᤩᤠᤱ ᤀᤣᤗᤡᤛᤠ᤺ᤸᤗᤧ ᤀᤣᤗᤡᤕᤠᤴ ᤗᤧᤖᤢᤀᤠᤱ ᤐᤣ॥ ᤂᤢᤏᤧ᤹ ᤁᤢᤃᤠᤵ ᤌᤡᤰ ᤁᤢᤒᤡᤳᤜᤠ᤹ ᤕᤠᤱᤛᤡᤱᤅᤠᤱ ᤛᤧᤖᤢᤛᤡ॥ ᤂᤢᤏᤧ᤹ ᤁᤧᤰᤆᤢ ᤛᤡᤱᤜᤠ᤹ ᤜᤠ᤺ᤴᤍᤢᤀᤠᤱ ᤛᤠ ᤌᤥ᤺ᤰᤋᤢ ᤜᤧᤰᤁᤩᤠᤱ ᤔᤏᤠᤜᤠ᤹ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤔᤧᤈ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤀᤣᤗᤡᤕᤠ᤺ᤸᤗᤧ ᤁᤢᤀᤣᤃᤠᤱ ᤌᤠᤛᤡᤱᤅᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤐᤥ᤺ᤰᤂᤧᤖᤥ॥