᥇ ᤜᤠᤱ 18 - LIFOTNT

ᤀᤣᤗᤡᤕᤠ ᤏᤢ ᤀᤥᤒᤍᤡᤕᤠ

¹ ᤕᤖᤡᤰ ᤕᤧᤶ ᤀᤣᤃᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤀᤣᤗᤡᤕᤠᤀᤥ ᤁᤧᤖᤧ—“ᤂᤧᤏᤧ᤹ ᤀᤠᤵᤑᤣᤰ ᤀᤠᤜᤠᤒᤀᤥ ᤐᤣᤃᤧ᤹ᤀᤠᤱ ᤋᤥ᤺ᤴᤇᤡᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤠᤈᤣ᤹ᤀᤥ ᤐᤠᤱᤃᤧᤴᤍᤡᤱ ᤘᤜᤡᤳ ᤌᤠᤛᤢᤖ ᤕᤠ᤺ᤴᤍᤢᤱ᤹॥”

² ᤁᤸᤗᤧᤆᤥᤃᤢᤸᤗᤧ ᤀᤣᤗᤡᤕᤠᤴ ᤀᤠᤜᤠᤒᤀᤥ ᤀᤠᤵᤑᤣᤰ ᤋᤥ᤺ᤴᤇᤡᤱᤔᤠᤖᤧ ᤗᤠᤃᤡ ᤐᤣ॥ ᤂᤧᤴ ᤕᤧᤶᤔᤥ ᤛᤠᤔᤖᤡᤕᤠᤀᤥ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤐᤥᤃᤧᤀᤠᤱ ᤏᤧᤛ᤻ᤛᤧ.

³ ᤜᤧᤰᤁᤩᤠᤱ ᤀᤠᤜᤠᤒᤖᤧ ᤁᤢᤜᤠᤱᤜᤡᤶᤔᤥᤒᤠ ᤗᤰᤐᤧᤴᤛᤠᤒᤠ ᤀᤥᤒᤍᤡᤕᤠᤴ ᤀᤢ᤺ᤵᤔᤠ ᤋᤠ᤺ᤵᤔᤠ ᤐᤠᤱᤄᤢᤛᤡ॥ (ᤀᤥᤒᤍᤡᤕᤠᤴ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤛᤠ᤺ᤴᤛᤠᤒᤠ ᤘᤕᤧ॥

⁴ ᤀᤠᤸᤗ ᤀᤠᤜᤠᤒᤖᤧ ᤁᤢᤔᤣᤳ ᤀᤡᤈᤣᤒᤣᤗᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤖᤢᤛᤡᤖ ᤕᤠᤃᤧᤸᤗᤧ. ᤀᤥᤒᤍᤡᤕᤠ᤺ᤸᤗᤧ ᤁᤡᤵ ᤌᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤋᤠᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡᤀᤠᤱ ᤅᤠᤒᤥᤱ ᤅᤠᤒᤥᤱ ᤁᤢᤗᤢᤵ ᤏᤧᤳᤇᤡ ᤆᤥᤃᤢᤛᤡᤀᤠᤱ ᤏᤧᤳᤇᤡ ᤗᤢᤱᤑᤢᤰᤁᤥᤀᤥ ᤆᤡᤰᤂᤢ ᤕᤢᤰᤂᤢᤛᤡ॥)

⁵ ᤀᤠᤜᤠᤒᤖᤧ ᤀᤥᤒᤍᤡᤕᤠᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤁᤧᤖᤧᤰ ᤘᤒᤢᤴᤍᤠᤰᤘᤠᤜᤠ᤹ᤀᤥ ᤏᤢ ᤏᤧᤏᤧᤒᤠᤍᤧᤴᤜᤠ᤹ᤀᤥ ᤐᤣᤃᤧ᤹॥ ᤀᤴᤜᤠ᤹ ᤏᤢ ᤀᤴᤕᤥᤰᤜᤠ᤹ ᤁᤢᤜᤡᤱᤘᤧᤳ ᤁᤵᤔᤠᤛᤡᤖᤧ ᤗᤠᤃᤡ ᤜᤠᤃ ᤁᤢᤓᤠ ᤁᤢᤖᤣ᤺ᤳᤗᤠ ᤕᤠ᤺ᤴᤛᤢᤱᤜᤠ᤹ ᤂᤥᤔᤠ ᤛᤢᤰᤋᤧᤵᤐᤡ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤌᤰᤛᤠᤜᤠ᤹ ᤛᤧᤵᤔᤠᤛᤡ ᤔᤧᤒᤥᤱᤏᤧᤴ॥”

⁶ ᤁᤸᤗᤧᤆᤥᤃᤢᤸᤗᤧ ᤛᤠ᤹ᤔᤠ ᤀᤥᤔᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤗᤠᤈᤣᤴ ᤔᤧᤓ᤺ᤰᤂᤢ. ᤜᤧᤰᤁᤩᤠᤱ ᤀᤠᤜᤠᤒᤧᤴ ᤀᤣ᤺ᤰ ᤌᤡᤰᤗᤧᤵᤔᤠᤱ ᤏᤢ ᤀᤥᤒᤍᤡᤕᤠᤴ ᤘᤣ᤹ ᤗᤧᤵᤔᤠ ᤐᤣᤛᤡ॥

⁷ ᤀᤠᤸᤗ ᤀᤥᤒᤍᤡᤕᤠᤴ ᤗᤠᤱᤄᤣᤃᤧᤖ ᤐᤳᤇᤧᤸᤗᤧ ᤀᤣᤗᤡᤕᤠᤖᤧ ᤂᤢᤏᤧ᤹ ᤋᤢᤔᤢ॥ ᤀᤥᤒᤡᤍᤡᤕᤠᤖᤧ ᤂᤢᤏᤧ᤹ ᤁᤢᤛᤣ᤺ᤴ ᤏᤡᤛᤢᤀᤠᤱ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤌᤣ ᤂᤧᤏᤧ᤹ ᤛᤧᤰᤂᤠᤀᤣ ᤀᤣᤗᤡᤕᤠᤴᤏᤣᤏᤧᤒᤡ᥅”

⁸ ᤂᤢᤏᤧ᤹ ᤏᤥᤃᤵ ᤐᤡᤖᤢ. “ᤀᤠᤱᤃᤠ᤹ᤀᤣ ᤀᤣᤗᤡᤕᤠᤀᤠᤖᤥ॥ ᤂᤧᤏᤧ᤹ ᤐᤣᤃᤧ᤹ᤀᤠᤱ ᤁᤧᤴᤍᤠᤱᤒᤧᤴ ᤔᤧᤳᤋᤧ᤹. ‘ᤀᤣᤗᤡᤕᤠᤴ ᤁᤵᤔᤥ ᤘᤠ᤹॥’”

⁹ ᤀᤥᤒᤍᤡᤕᤠ᤺ᤸᤗᤧ ᤛᤣ᤺ᤴᤍᤥᤛᤢ. “ᤀᤠᤱᤃᤠ᤹ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤱᤅᤠᤱ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤴ ᤛᤧᤵᤔᤠᤖᤧ ᤗᤠᤃᤡ ᤀᤠᤜᤠᤒᤧᤴ ᤜᤢᤰᤁᤧᤛᤢᤵᤋᤢᤖ ᤁᤧᤒᤵᤐᤠᤒᤣ᥅

¹⁰ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤁᤥ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧ ᤔᤧᤒᤠᤱᤄᤢᤶᤒᤠ ᤛᤢᤘᤠᤱ ᤀᤠᤳᤋᤡᤴᤏᤠᤱ ᤜᤥᤵ ᤀᤡᤃᤪ ᤀᤠᤳᤋᤡᤴ ᤜᤠᤱᤈᤢᤶᤔᤡᤴᤏᤠᤱ ᤕᤠ᤺ᤰᤋᤧᤒᤠ ᤜᤥᤵ॥ ᤜᤧᤰᤁᤩᤠᤱ ᤀᤠᤸᤗ ᤁᤢᤓᤠ ᤛᤢᤘᤠᤱ ᤀᤡᤃᤪ ᤜᤠᤱᤈᤢᤶᤔᤥ ᤀᤠᤍᤠᤱᤒᤠ ᤂᤧᤵᤔᤥ ᤁᤧᤜᤥᤵ ᤔᤧᤒᤠ᤺ᤳᤋᤢᤏᤧᤓᤃᤪ. ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤛᤡ. ‘ᤀᤠᤏᤡᤃᤣ ᤂᤧᤴ ᤂᤥᤔᤠ ᤔᤧᤛᤢᤰᤋᤢᤶᤒᤧᤴ॥’

¹¹ ᤁᤖ ᤀᤠᤸᤗᤥ ᤀᤠᤱᤃᤠ᤹ ᤁᤧᤔᤧᤳᤋᤠ. ‘ᤂᤧᤏᤧ᤹ ᤐᤣᤃᤧ᤹ ᤜᤧᤰᤁᤩᤠᤱ ᤀᤣᤗᤡᤕᤠᤴ ᤁ᤹ᤕᤥ ᤘᤠ᤹ᤖᤧᤳᤇ ᤑᤠ᤹ᤀᤠᤱ ᤁᤧᤴᤍᤠᤱᤒᤧᤴ ᤔᤧᤳᤋᤧ᤹॥’

¹² ᤀᤠᤱᤃᤠ᤹ ᤂᤧᤏᤧ᤹ ᤗᤧᤳᤏᤧᤏᤢᤔᤧ᤺ᤴᤏᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤳᤋᤠᤴ ᤁᤧᤃᤧᤳᤋᤡ᥅ ᤀᤠᤱᤃᤠ᤹ ᤔᤧᤏᤡᤀᤠᤴ᤹॥ ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤀᤠᤜᤠᤒᤧᤴ ᤔᤧᤳᤋᤢᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤍᤠᤱᤒᤠ ᤁᤧᤴᤍᤢᤔᤧᤴᤏᤧᤓᤃᤪ. ᤂᤢᤏᤧ᤹ ᤀᤠᤱᤃᤠ᤹ᤀᤣ ᤛᤧᤳᤋᤠ॥ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤸᤗᤧᤃ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤕᤜᤘᤣ ᤍᤠᤱᤒᤠᤴ ᤔᤠᤱᤛᤧᤘᤠ ᤔᤧᤳᤋᤢᤱᤗ ᤘᤠ᤹ᤀᤠ॥

¹³ ᤀᤠᤍᤠᤱᤒᤣ. ᤀᤠᤸᤗ ᤀᤡᤈᤣᤒᤣᤗᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤖᤢᤛᤡᤖ ᤕᤠᤃᤧᤸᤗᤧ ᤀᤠᤱᤃᤠ᤹ ᤌᤣ ᤆᤥᤃᤢᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤡ᥅ ᤀᤠᤱᤃᤠ᤹ ᤅᤠᤒᤥᤱ ᤅᤠᤒᤥᤱ ᤆᤥᤃᤢᤱᤛᤡᤱᤅᤠᤱ ᤂᤧᤱᤜᤠ᤹ᤀᤥᤒᤠ ᤁᤡᤵ ᤌᤡᤰ ᤔᤏᤠᤜᤠ᤹ ᤏᤧᤳᤇᤡ ᤗᤢᤱᤑᤢᤰᤁᤥᤀᤥ ᤆᤡᤰᤂᤢᤱ ᤕᤢᤰᤂᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤠᤔᤠ ᤌᤢᤱᤔᤠ ᤋᤠᤖᤢᤱ ᤐᤡᤖᤢᤱᤛᤡᤱ॥

¹⁴ ᤜᤧᤰᤁᤩᤠᤱ ᤀᤠᤸᤗ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤁᤧᤔᤧᤳᤋᤠ. ‘ᤂᤧᤏᤧ᤹ ᤐᤣᤃᤧ᤹ ᤜᤧᤰᤁᤩᤠᤱ ᤀᤣᤗᤡᤕᤠᤴ ᤁᤵᤔᤥ ᤘᤠ᤹ᤖᤧᤳᤇ ᤑᤠ᤹ᤀᤠᤱ ᤁᤧᤴᤍᤠᤱᤒᤠ ᤀᤠᤜᤠᤒᤧᤴ ᤔᤧᤳᤋᤧ᤹॥’ ᤀᤠᤱᤃᤠ᤹ ᤜᤧᤰᤁᤣ ᤆᤥᤃᤢᤱᤅᤡᤸᤗᤧ ᤂᤢᤏᤧ᤹ ᤛᤧᤳᤋᤠ॥”

¹⁵ ᤀᤣᤗᤡᤕᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤳᤋᤢᤱᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤀᤠᤀᤡᤴ ᤛᤧᤰᤂᤠᤛᤠᤱ ᤀᤠᤜᤠᤒᤖᤧᤀᤥ ᤀᤠᤵᤑᤣᤰ ᤋᤥ᤺ᤴᤇᤡᤱᤅᤠᤖᤥ॥”

ᤀᤣᤗᤡᤕᤠ ᤏᤢ ᤒᤠᤗᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹

¹⁶ ᤂᤧᤒᤩᤠᤱ ᤀᤥᤒᤍᤡᤕᤠᤴ ᤀᤠᤜᤠᤒᤖᤧ ᤁᤢᤍᤢᤶᤛᤧ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. ᤜᤧᤰᤁᤩᤠᤱ ᤀᤠᤜᤠᤒᤧᤴ ᤀᤣᤗᤡᤕᤠᤖᤧ ᤁᤢᤍᤢᤶᤛᤧ ᤐᤣ॥

¹⁷ ᤀᤠᤸᤗ ᤀᤠᤜᤠᤒᤖᤧ ᤀᤣᤗᤡᤕᤠᤴ ᤏᤡᤛᤢᤀᤠᤱ ᤂᤢᤏᤧ᤹ ᤀᤣᤗᤡᤕᤠᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤧᤴ ᤂᤧᤏᤧ᤹ᤀᤣᤏᤧᤒᤡ᥅”

¹⁸ ᤀᤣᤗᤡᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱᤒᤠ ᤜᤥᤵ. ᤁᤖ ᤀᤠᤍᤠᤱᤒᤠ ᤏᤢ ᤀᤠᤍᤠᤱᤒᤠᤖᤧ ᤁᤧᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ᤖᤧᤏᤡ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ᤹॥ ᤀᤠᤍᤠᤱᤒᤠᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤏᤠ᤹ᤖᤢᤀᤠᤱ ᤒᤠᤗ ᤔᤠᤱᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤡᤶᤍᤢᤛᤡᤀᤠᤱ ᤁᤧᤘᤠ᤹॥

¹⁹ ᤀᤠᤸᤗ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤁᤷᤔᤣᤗ ᤁᤥ᤺ᤰᤔᤠᤀᤥ ᤋᤢᤶᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤗᤠᤶ ᤁᤧᤖᤧᤰ ᤔᤏᤠᤜᤠ᤹ ᤀᤢ᤺ᤳᤋᤧᤛᤧ᤹॥ ᤜᤧᤰᤁᤩᤠᤱ ᤀᤡᤈᤣᤒᤣᤗᤖᤧ ᤁᤢᤈᤠ ᤆᤠᤔᤠ ᤆᤵᤋᤧᤴᤏᤥ ᤁᤧᤕᤢᤱᤒᤠᤀᤠᤱ ᤁᤧᤈᤠᤒᤠ ᤒᤠᤗᤖᤧ ᤂᤧᤴ ᥊᥋᥆ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤀᤛᤣᤖᤠᤖᤧ ᥊᥆᥆ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤋᤠᤖᤧᤛᤧ᤹ᤀᤠᤱ ᤋᤩᤧ᤹॥”

²⁰ ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤡᤱᤄᤱ ᤜᤠᤅᤢᤍᤣᤛᤢ. ᤜᤧᤰᤁᤩᤠᤱ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤷᤔᤣᤗ ᤁᤥ᤺ᤰᤔᤠᤀᤥ ᤛᤢᤵᤛᤢᤛᤡ॥

²¹ ᤀᤣᤗᤡᤕᤠᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤩᤧᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤓᤧᤸᤗᤧ ᤌᤠᤖᤡᤰ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤕᤢᤅᤡᤒᤣ᥅ ᤕᤜᤘᤣ ᤍᤠᤱᤒᤧᤴᤏᤣ ᤏᤡᤱᤘᤠ᤹ᤑᤢᤔᤠᤱᤏᤧᤓᤃᤪ ᤂᤢᤏᤧ᤹ ᤋᤡᤶᤍᤧᤶᤔᤧ᤹॥ ᤁᤖ ᤒᤠᤗ ᤔᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤓᤃᤪ ᤂᤧᤴ ᤋᤡᤶᤍᤧᤶᤔᤧ᤹॥ ᤁᤖ ᤔᤏᤠᤜᤠ᤹ᤖᤧ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴ॥”

²² ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤀᤠᤱᤃᤠ᤹ᤖᤰ ᤋᤠᤅᤠᤱᤅᤠᤱ ᤘᤠ᤹ᤀᤠ. ᤁᤖ ᤒᤠᤗᤖᤧᤃ ᥊᥋᥆ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤘᤠ᤹॥

²³ ᤀᤠᤸᤗ ᤀᤠᤏᤡ᤹ ᤗᤠᤃᤡ ᤛᤧᤃᤶᤒᤠ ᤐᤡᤳ ᤏᤧᤳᤇᤡ ᤋᤠᤖᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤗᤳᤇᤠ ᤔᤧᤛᤧᤖᤢᤀᤠᤱ ᤁᤢᤓᤧᤸᤗᤧᤰ ᤁᤢᤓᤧᤸᤗᤧᤰ ᤔᤧᤄᤰᤋᤢᤖ ᤜᤧᤰᤁᤩᤠᤱ ᤔᤡ ᤔᤧᤴᤜᤠ᤺ᤴᤏᤣ ᤛᤡᤱᤛᤶᤎᤠᤱ ᤔᤧᤏᤧᤛ᤻ᤛᤢᤖ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤘᤣ᤹ᤀᤡᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤔᤡ ᤔᤧᤴᤜᤠ᤺ᤴᤏᤣ ᤛᤡᤱᤛᤶᤎᤠᤱ ᤏᤧᤛ᤻ᤛᤢᤱ᤹॥

²⁴ ᤂᤧᤒᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤔᤠᤱᤅᤡᤴ ᤀᤡᤱᤛᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤵᤑᤣᤰ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤀᤡᤱᤛᤢᤱ᤹॥ ᤔᤡᤀᤥᤗᤠᤶ ᤕᤠᤵᤔᤡ ᤏᤢᤃᤵ ᤁᤧᤒᤡᤒᤠ ᤔᤠᤱᤅᤡᤴᤏᤣ ᤏᤡᤱᤘᤠ᤹ᤑᤢᤔᤠᤱᤗᤥ॥” ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰᤗᤥ॥”

²⁵ ᤀᤣᤗᤡᤕᤠᤖᤧ ᤒᤠᤗᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤳᤋᤢᤛᤡ. “ᤛᤧᤃᤶᤒᤠ ᤐᤡᤳ ᤌᤡᤰ ᤛᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤋᤃᤡ ᤕᤠᤖᤡᤵ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤶᤓᤩᤠᤖᤡᤰ ᤕᤖᤡᤰ ᤁᤧᤘᤕᤡ᤹॥ ᤂᤡᤏᤡ᤹ ᤔᤠᤱᤅᤡᤸᤗᤧ ᤁᤢᤔᤡᤱ ᤀᤡᤱᤛᤧᤶᤔᤧ᤹. ᤁᤖ ᤔᤡ ᤃ ᤔᤧᤜᤠ᤺ᤴᤍᤧᤶᤔᤡᤴᤏᤧ᤹॥”

²⁶ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤒᤡᤖᤢᤛᤡᤒᤠ ᤛᤧᤃᤶᤒᤠ ᤐᤡᤳᤋᤧᤴ ᤔᤧᤕᤠᤱᤛᤡᤱᤅᤠᤱ ᤕᤠᤖᤡᤵ ᤔᤧᤈᤥᤃᤢ॥ ᤂᤧᤒᤩᤠᤱ ᤒᤠᤗᤖᤧ ᤁᤢᤔᤡᤱ ᤔᤧᤗᤥ᤺ᤰᤋᤢᤀᤠᤱ ᤂᤧᤱᤜᤠ᤹ᤖᤧ ᤋᤠᤏᤠᤶᤔᤠᤱᤎᤥ ᤗᤧᤴᤈᤥᤈᤥ ᤌᤠᤖᤡᤰ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀᤢ᤺ᤳᤋᤢ. “ᤒᤠᤗ ᤔᤠᤱᤅᤣ. ᤀᤠᤏᤡᤃᤣ ᤏᤢᤃᤵ ᤀᤠᤒᤡᤖᤧ᤹ᤀᤥ॥” ᤁᤖ ᤌᤣ ᤏᤥᤃᤵᤐᤠᤱ ᤔᤧᤱᤄᤥᤛᤢᤴ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤐᤡᤛᤠᤱᤒᤠ ᤂᤧᤱᤜᤠ᤹ ᤔᤧᤒᤡᤴᤍᤧᤖ ᤔᤧᤗᤠ᤺ᤰᤂᤧ॥

²⁷ ᤗᤧᤴᤈᤥᤛᤧᤸᤗᤧ ᤀᤣᤗᤡᤕᤠ᤺ᤸᤗᤧ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤂᤧᤱᤜᤠ᤹ ᤁᤧ᤹ᤔᤠ ᤜᤣ᤺ᤰᤋᤢᤛᤡ. “ᤀᤠᤸᤗᤛᤠᤱ ᤛᤠ᤹ᤖᤡᤰ ᤀ᤺ᤰᤋᤧᤶᤔᤧ᤹ᤒᤠ᥄ ᤂᤢᤏᤧ᤹ᤃ ᤔᤠᤱᤏᤡᤒᤠ᥄ ᤂᤢᤏᤧ᤹ ᤛᤧᤘᤠ ᤆᤥ᤺ᤰᤏᤢ ᤕᤠᤰᤐᤡᤗᤠ. ᤀᤡᤃᤪ ᤕᤠ᤺ᤶᤒᤰᤁᤥ ᤕᤠ᤺ᤴᤍᤡᤰ ᤔᤧᤴᤍᤠᤀᤣ ᤕᤠᤰᤐᤡᤗᤠ. ᤁᤡᤃᤪ ᤗᤠᤶᤍᤡᤰ ᤆᤥ᤺ᤰᤛᤧ ᤐᤣᤀᤠᤱ ᤕᤠᤰᤗᤠ᤹ᤒᤣ॥ ᤂᤢᤏᤧ᤹ ᤀᤡᤵᤛᤧᤀᤠᤱ ᤏᤧᤒᤡᤗᤠ ᤑᤥᤱᤔᤠ ᤐᤥᤱ᤹॥”

²⁸ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤠᤰᤌᤡᤶ ᤁᤢᤀᤡᤛᤡᤰ ᤋᤠᤓᤣ ᤏᤢ ᤗᤠ᤺ᤰᤁᤡᤸᤗᤧ ᤔᤠᤰᤂᤡ᤹ ᤔᤧᤗ᤺ᤴᤍᤧᤴᤗ ᤌᤠᤖᤡᤰ ᤂᤢᤴᤇᤡ᤹ ᤀᤠᤵᤑᤣᤰ ᤔᤧᤄᤠ᤺ᤴᤇᤡᤱ॥

²⁹ ᤗᤧᤴᤈᤥᤀᤠᤱ ᤗᤧᤰᤋᤧᤒᤣ. ᤜᤧᤰᤁᤩᤠᤱ ᤕᤢ᤺ᤴᤇᤡᤰᤐᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶ ᤌᤠᤖᤡᤰ ᤂᤧᤱᤜᤠ᤹ ᤌᤩ᤺ᤱᤅᤠᤱ ᤌᤩ᤺ᤱ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤀᤠᤱ ᤔᤧᤕᤠᤃᤧ॥ ᤁᤖ ᤌᤣᤀᤠᤱ ᤏᤢᤃᤵ ᤔᤧᤱᤄᤥᤛᤢᤴ. ᤜᤠ᤺ᤳᤗᤧᤀᤠᤱ ᤐᤠ᤺ᤴᤔᤧᤛᤠ᤺ᤳᤋᤢᤛᤡᤴ. ᤜᤠ᤺ᤳᤗᤧᤀᤠᤱ ᤂᤧᤶᤄᤧᤶ ᤔᤧᤗᤠᤵᤋᤢᤛᤡᤴ॥

³⁰ ᤂᤧᤒᤩᤠᤱ ᤀᤣᤗᤡᤕᤠᤖᤧ ᤁᤧᤖᤧᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤵᤔᤥ ᤀᤠᤱᤃᤠ᤹ᤀᤥ ᤋᤩᤧᤶᤔᤧ᤹॥” ᤂᤧᤱᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧ॥ ᤂᤧᤴ ᤀᤣᤃᤠᤱ ᤁᤧᤗᤢ᤺ᤶᤒᤠᤀᤠᤱ ᤁᤧᤏᤧᤒᤠ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤂᤢᤏᤧ᤹ ᤛᤧᤳᤋᤢ ᤆᤥᤃᤢ॥

³¹ ᤀᤣᤗᤡᤕᤠᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤕᤠᤱᤛᤡᤱ. ᤁᤧᤖᤧᤰ ᤗᤢᤱᤜᤠ᤹ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤗᤳᤇᤠ ᤌᤠ᤺ᤰᤜᤠ᤹ᤖᤧ ᤗᤠᤃᤡ. ᤂᤧᤱᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤁᤧᤗ᤹ᤒᤠ ᤁᤢᤒᤠ᤺ᤴᤈᤠᤰ ᤁᤧᤖᤧᤀᤠᤱ ᤘᤕᤧ. “ᤂᤧᤏᤧ᤹ ᤁᤧᤔᤡᤱ ᤀᤡᤛᤪᤠᤀᤡᤗ ᤐᤥᤱ᤹॥”

³² ᤁᤴ ᤗᤢᤱᤜᤠ᤹ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ॥ ᤂᤢᤏᤧ᤹ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤐᤡᤛᤠᤱ ᤌᤡᤒᤥᤱᤅᤠᤱ ᤅᤠᤛᤡ ᤗᤡᤋᤖ ᤕᤠᤖᤡᤰ ᤁᤧᤜᤵᤐᤠ ᤕᤶᤒᤠ ᤐᤠᤰᤗᤢᤶᤗᤢᤶᤒᤠ ᤋᤕᤢ॥

³³ ᤂᤢᤏᤧ᤹ ᤛᤡᤱᤅᤡᤴ ᤛᤧᤳᤋᤢ ᤜᤧᤰᤁᤩᤠᤱ ᤂᤧᤴ ᤛᤧᤃᤶᤒᤠ ᤐᤡᤳᤋᤧᤴ ᤁᤢᤓᤧᤸᤗᤧᤰ ᤁᤢᤓᤧᤸᤗᤧᤰ ᤂᤰᤋᤢᤀᤠᤱ ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤏᤧᤛ᤻ᤛᤢ॥ ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤢ᤺ᤴᤍᤠ ᤗᤡᤛᤡ ᤆᤫᤠ᤺ᤳ ᤑᤠ᤺ᤳᤋᤧᤶᤔᤧ᤹ᤀᤠᤱ ᤁᤴ ᤛᤡᤍᤢᤱᤈᤓᤠᤴ ᤏᤢ ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤜᤢᤰᤂᤧᤶᤔᤧ᤹॥”

³⁴ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤕᤠᤶᤔᤥ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥” ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤂᤢᤏᤧ᤹ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. “ᤛᤢᤶᤍᤢ᤺ᤰ ᤌᤠᤖᤡᤰᤁᤠᤱ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥” ᤂᤧᤱᤜᤠ᤹ᤖᤧ ᤛᤢᤶᤍᤢ᤺ᤰ ᤌᤠᤖᤡᤰ ᤜᤧᤰᤁᤣᤀᤣ ᤔᤧᤈᤥᤃᤢ॥

³⁵ ᤆᤫᤠ᤺ᤳᤋᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤖᤧᤰ ᤐᤡᤛᤠᤱ ᤘᤧᤳᤋᤧᤀᤠᤱ ᤐᤠᤰᤗᤢᤶᤗᤢᤶᤒᤠ ᤋᤧᤴᤏᤡᤴᤏᤠᤱ ᤋᤡᤶᤛᤧ॥

³⁶ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤋᤃᤡ ᤐᤣᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠ. ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤛᤪᤠᤀᤡᤗᤀᤥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤀᤠᤖᤥ. ᤂᤧᤒᤩᤠᤱ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤁᤧᤀᤡᤱᤈᤠᤱ ᤁᤢᤀᤡᤛᤡᤰ ᤀᤠᤱᤃᤠ᤹ ᤆᤥᤃᤢᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤀᤡᤴ ᤏᤡᤱᤘᤠ᤹ ᤂᤥᤛᤧ᤹ᤀᤥ॥

³⁷ ᤀᤠᤱᤃᤠ᤹ ᤏᤢᤃᤵ ᤐᤡᤖᤠᤱᤅᤧ᤹ᤀᤥ. ᤕᤜᤘᤣ ᤍᤠᤱᤒᤣ. ᤏᤥᤃᤵ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴᤏᤣ ᤏᤡᤱᤘᤠ᤹ᤑᤢᤔᤠᤱᤏᤧ. ᤜᤧᤰᤁᤩᤠᤱ ᤂᤧᤏᤧ᤹ᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤁᤧᤜᤡᤛᤢᤖ ᤁᤧᤒᤳ ᤑᤠ᤹ᤀᤠᤱ ᤁᤴ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤖᤥ॥”

³⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤔᤡᤴ ᤛᤢ᤺ᤰᤋᤧᤎᤩᤧᤀᤠᤱ ᤔᤡ᤺ᤸᤗᤧ ᤛᤡᤍᤢᤱᤈᤓᤠ᤺ᤴ. ᤛᤡᤱᤅᤡᤴ. ᤗᤢᤱᤜᤠ᤹ ᤏᤢ ᤂᤠᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢ. ᤜᤧᤰᤁᤩᤠᤱ ᤐᤠᤰᤗᤢᤶᤗᤢᤶᤒᤠᤀᤥᤒᤠ ᤆᤫᤠ᤺ᤳᤋᤡᤴᤏᤠᤱ ᤜᤣᤛᤢᤍᤣᤛᤢ॥

³⁹ ᤀᤠᤸᤗ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤴ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤛᤠᤒᤴ ᤜᤵᤐᤧᤳ ᤔᤧᤓᤴᤇᤡᤱᤅᤠᤱ ᤔᤧᤀ᤺ᤰᤋᤧᤀᤠᤱ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤗᤧᤳᤇ᥄ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤗᤧᤳᤇ᥄”

⁴⁰ ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. “ᤒᤠᤗᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤋᤧᤶᤛᤧᤶᤛᤡᤶᤔᤧ᤹॥ ᤗᤳᤇᤠᤀᤠᤱ ᤂᤧᤳᤇᤡᤱᤔᤠ ᤔᤧᤱᤄᤥᤏᤧᤴᤗ॥” ᤂᤧᤱᤜᤠ᤹ᤖᤧ ᤒᤠᤗᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤍᤧᤶᤛᤢᤛᤡ. ᤜᤧᤰᤁᤩᤠᤱ ᤀᤣᤗᤡᤕᤠ᤺ᤸᤗᤧ ᤂᤧᤱᤜᤠ᤹ ᤕᤥ ᤁᤡᤛᤥᤏ ᤏᤧᤏᤧᤒᤠᤍᤧᤴᤏᤥ ᤕᤢ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤧᤖᤢᤛᤡᤖᤥ॥

ᤛᤠᤱᤕᤠᤰᤔᤠ ᤏᤠ᤹ᤖᤧ

⁴¹ ᤜᤧᤰᤁᤩᤠᤱ ᤀᤣᤗᤡᤕᤠᤖᤧ ᤀᤠᤜᤠᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤁᤢᤈᤠ ᤆᤧ᤹ ᤌᤢᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤶᤒᤠ ᤘᤜᤡᤳ ᤀᤡᤰᤛᤡᤱ ᤑᤧᤴᤗ ᤐᤵᤐᤠ ᤂᤧᤵᤛᤢᤱᤗ ᤐᤳᤋᤠ॥”

⁴² ᤂᤧᤒᤩᤠᤱ ᤀᤠᤜᤠᤒᤧᤴ ᤁᤢᤈᤠ ᤆᤠᤛᤧ ᤌᤢᤱᤛᤧ ᤐᤣ. ᤁᤖ ᤀᤣᤗᤡᤕᤠᤴ ᤆᤤᤲ ᤁᤷᤔᤣᤗ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤥ᤺ᤰᤛᤡᤱ. ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤂᤠᤶᤒᤠᤱᤅᤥ ᤛᤠᤒᤴ ᤜᤒᤳ ᤑᤴᤇᤡᤱᤅᤠᤱ ᤁᤢᤎᤧᤃᤣ᤺ᤰᤁᤡᤴ ᤁᤢᤎᤢᤱᤒᤥᤜᤠ᤹ᤖᤧ ᤁᤢᤓᤡ᤺ᤵᤔᤥ ᤑᤳᤇᤢ॥

⁴³ ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤘᤖ᤺ᤱ ᤗᤧᤵᤔᤠᤱ ᤀᤥᤔᤧᤳᤋᤧ᤹॥” ᤂᤧᤴ ᤐᤣᤀᤠᤱ ᤀᤥᤔᤧᤳᤋᤢ. ᤂᤧᤸᤗᤧ ᤐᤠ᤺ᤳᤋᤢ. “ᤂᤧᤵᤔᤥ ᤌᤣᤀᤠᤱ ᤜᤥᤵ॥” ᤀᤣᤗᤡᤕᤠ᤺ᤸᤗᤧ ᤏᤢᤛᤡᤗᤧᤱ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤀᤥᤔᤧᤳᤋᤧ᤹॥”

⁴⁴ ᤏᤢᤛᤡᤗᤧᤱᤅᤥ ᤛᤧᤘᤠᤖᤥᤒᤧᤸᤗᤧ ᤔᤧᤳᤋᤢ. “ᤔᤏᤠ ᤜᤢᤰ ᤕᤠ᤺ᤵᤐᤠ ᤂᤠ᤹ᤔᤡᤳ ᤌᤡᤰ ᤘᤖ᤺ᤱᤅᤥᤗᤠᤶ ᤐᤥ᤺ᤰᤗ ᤐᤳ॥” ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤀᤠᤜᤠᤒᤧᤴ ᤀᤰᤂᤣ ᤔᤧᤳᤋᤧ᤹. ‘ᤁᤧᤀᤴᤗᤠᤎᤠᤴ ᤕᤠᤖᤡᤵ ᤆᤥᤃᤧ᤹ᤀᤠᤱ ᤂᤡᤔᤥ ᤕᤥ ᤐᤣᤃᤧ᤹. ᤔᤣ᤺ᤴᤏᤧᤓᤃᤪ ᤂᤧᤏᤧ᤹ ᤘᤜᤡᤳᤋᤡᤸᤗᤧ ᤁᤧᤛᤠᤰ॥’”

⁴⁵ ᤜᤠᤒᤠ ᤁᤴ ᤗᤢᤶᤔᤥ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤳᤋᤡᤸᤗᤧ ᤋᤠᤱᤛᤠᤱᤒᤧᤴ ᤐᤴᤇᤢ. ᤛᤢᤖᤡᤳ ᤁᤣᤈᤱ ᤜᤢᤖᤧ ᤜᤧᤰᤁᤩᤠᤱ ᤕᤶᤒᤠ ᤘᤜᤡᤳ ᤌᤠᤔᤠ ᤜᤣ᤺ᤰᤋᤧ. ᤂᤧᤒᤩᤠᤱ ᤀᤠᤜᤠᤒᤖᤧ ᤁᤢᤀᤴᤗᤠᤎᤠᤴ ᤕᤢᤰᤋᤢᤀᤠᤱ ᤕᤡᤈᤖᤣᤗ ᤗᤧᤵᤔᤠᤱ ᤐᤣ॥

⁴⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤀᤣᤗᤡᤕᤠᤀᤥ ᤆᤢᤰᤋᤧ. ᤜᤧᤰᤁᤩᤠᤱ ᤁᤢᤄᤠᤶᤍᤣ᤺ᤳᤋᤡᤴ ᤁᤢᤓ᤹ᤀᤡᤀᤥ ᤛᤢᤅᤢᤀᤠᤱ ᤂᤢᤏᤧ᤹ ᤕᤡᤈᤖᤣᤗ ᤌᤠᤖᤡᤰᤁᤣ ᤀᤠᤜᤠᤒᤖᤧ ᤁᤢᤍᤃᤠᤱ ᤁᤢᤍᤃᤠᤱ ᤗᤠᤶᤔᤥ ᤗᤥ᤺ᤰᤋᤧᤖᤥ॥