᥇ ᤜᤠᤱ 17 - LIFOTNT

ᤀᤣᤗᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤛᤠᤱᤕᤠᤃᤧᤒᤠ

¹ ᤀᤠᤸᤗ ᤃᤡᤗᤠᤍ ᤋᤡᤛ᤻ᤒᤣᤒᤠ ᤋᤡᤛ᤻ᤒᤡ ᤀᤣᤗᤡᤕᤠᤖᤧ ᤀᤠᤜᤠᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤧᤘᤠ ᤔᤧᤳᤋᤢᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤁᤧᤍᤠᤒᤠ ᤁᤢᤓᤠ ᤋᤱᤒᤣᤜᤠ᤹ᤀᤥ ᤀᤠᤱᤃᤠ᤹ ᤀᤠᤒᤠ᤺ᤴᤈᤠᤰ ᤔᤣ᤺ᤴᤏᤣ ᤛᤣ᤺ᤰᤘᤠᤀᤠᤱ ᤔᤧᤎᤠᤏᤧᤴ ᤘᤜᤡᤳᤋᤠᤱ ᤔᤧᤎᤠᤏᤧᤴ॥”

² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤣᤗᤡᤕᤠᤀᤥ ᤁᤧᤖᤧ—

³ “ᤂᤧᤏᤧ᤹ ᤁᤴ ᤋᤧᤴᤏᤡᤴ ᤗᤧᤖᤧ᤹ᤀᤠᤱ ᤏᤠᤱᤃᤧᤴ ᤐᤡᤛᤠᤱ ᤐᤣᤃᤧ᤹. ᤜᤧᤰᤁᤩᤠᤱ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ ᤁᤧᤏᤧᤒᤠ ᤁᤖᤡᤋ ᤜ᤺ᤱᤃᤢᤀᤥ ᤐᤣᤃᤧ᤹ᤀᤠᤱ ᤆᤡᤱᤛᤡᤱᤅᤧ᤹ᤀᤠᤱ ᤕᤢᤅᤧ᤹॥

⁴ ᤂᤧᤏᤧ᤹ ᤜ᤺ᤱᤃᤢᤀᤥᤒᤠ ᤆᤫᤠ᤺ᤳᤋᤡᤴ ᤌᤢᤅᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤂᤧᤏᤧ᤹ ᤁᤢᤈᤠ ᤆᤠ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤠ᤺ᤰᤘᤠᤜᤠ᤹ ᤔᤢᤖᤠ ᤔᤧᤳᤋᤢᤛᤡᤱᤅᤠᤱ ᤘᤠ᤹॥”

⁵ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ ᤁᤧᤏᤧᤒᤠ ᤁᤖᤡᤋ ᤜ᤺ᤱᤃᤢᤀᤥ ᤐᤣᤀᤠᤱ ᤕᤢᤅᤧ॥

⁶ ᤂᤧᤵᤔᤥ ᤁᤠ᤺ᤰᤘᤠᤜᤠ᤹ᤖᤧ ᤂᤢᤏᤧ᤹ ᤋᤠᤏᤠᤶ ᤂᤖᤧ᤺ᤱ ᤏᤢ ᤛᤠ ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤂᤖᤧ᤺ᤱ ᤏᤢ ᤛᤠ ᤔᤧᤍᤠᤖᤢ ᤔᤧᤒᤡᤖᤢ. ᤂᤶᤓᤩᤠᤱ ᤂᤢᤏᤧ᤹ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤢᤅᤢ॥

⁷ ᤁᤢᤓᤠ ᤕᤧᤶ ᤀᤣᤃᤠᤱ ᤗᤠᤈᤣ᤹ᤀᤥ ᤘᤜᤡᤳ ᤔᤧᤎᤩᤧᤏᤧᤶᤒᤠᤸᤗᤧ ᤆᤢᤃᤢᤸᤗᤧ ᤂᤧᤴ ᤜ᤺ᤱᤃᤢᤀᤥᤒᤠ ᤆᤫᤠ᤺ᤳᤋᤡᤴ ᤆᤒᤧᤖᤥ॥

ᤀᤣᤗᤡᤕᤠ ᤏᤢ ᤛᤠᤖᤐᤋᤒᤠ ᤔᤣᤔᤣᤍᤢᤔᤠ

⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤀᤣᤗᤡᤕᤠᤀᤥ ᤁᤧᤖᤧ—

⁹ “ᤀᤠᤸᤗ ᤂᤧᤏᤧ᤹ ᤂᤡᤔᤥ ᤛᤡᤍᤥᤏᤒᤠ ᤛᤠᤖᤐᤋᤀᤥ ᤐᤣᤃᤧ᤹ᤀᤠᤱ ᤂᤧᤵᤔᤥ ᤕᤢᤅᤧ᤹॥ ᤂᤧᤏᤧ᤹ ᤁᤢᤈᤠ ᤆᤠ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤴ ᤋᤧᤴᤏᤥ ᤔᤣᤔᤣᤍᤢᤔᤠ ᤌᤡᤰ ᤔᤢᤖᤠ ᤔᤧᤳᤋᤢᤱᤅᤠᤱ ᤘᤠ᤹॥”

¹⁰ ᤁᤸᤗᤧᤆᤥᤃᤢᤸᤗᤧ ᤀᤣᤗᤡᤕᤠᤴ ᤛᤠᤖᤐᤋ ᤐᤣ॥ ᤀᤠᤸᤗ ᤂᤢᤏᤧ᤹ ᤛᤠᤖᤐᤠᤋᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤖᤧᤸᤗᤧ. ᤂᤢᤏᤧ᤹ ᤔᤣᤔᤣᤍᤢᤔᤠ ᤌᤡᤰ ᤛᤡᤱᤔᤢᤈᤡ᤹ᤜᤠ᤹ ᤑᤢᤰᤂᤢᤖ ᤕᤠᤃᤧᤒᤠ ᤏᤡᤛᤢ॥ ᤂᤢᤏᤧ᤹ ᤑᤧ᤺ᤰᤋᤢᤀᤠᤱ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤆᤫᤠ᤺ᤳ ᤌᤢᤱᤔᤠᤖᤧᤗᤠᤃᤡ ᤆᤡᤛᤠᤈᤡ᤹ ᤑᤱᤏᤠ ᤌᤡᤰᤁᤥ ᤆᤢ᤺ᤰᤇᤡᤰ ᤆᤫᤠ᤺ᤳ ᤑᤧᤳᤋᤠᤱ ᤐᤡᤖᤠᤱᤅᤧ᤹॥”

¹¹ ᤂᤧᤴ ᤔᤣᤔᤣᤍᤢᤔᤠᤴ ᤆᤫᤠ᤺ᤳ ᤑᤧᤳᤇᤧ ᤐᤣᤖ ᤐᤳᤇᤧᤸᤗᤧ ᤂᤢᤏᤧ᤹ ᤕᤠᤶᤔᤥ ᤑᤧ᤺ᤰᤋᤢᤀᤠᤱ ᤂᤧᤴ ᤔᤧᤳᤋᤢ. “ᤆᤡᤛᤠᤈᤡ ᤁᤢᤗᤧᤵ ᤌᤡᤰ ᤂᤖᤧ᤺ᤱᤅᤠᤱ ᤑᤧᤳᤋᤠᤱ ᤐᤡᤖᤠᤱᤅᤧ᤹॥”

¹² ᤂᤧᤴ ᤔᤣᤔᤣᤍᤢᤔᤠᤸᤗᤧ ᤏᤥᤃᤵ ᤐᤡᤖᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤂᤵᤐᤩᤠᤀᤥ ᤜᤢᤰᤐᤰ ᤌᤡᤰ ᤑᤣ᤹ᤖᤢᤶ ᤏᤢ ᤁᤠ᤺ᤴᤍᤩᤠᤀᤥ ᤀᤠᤈᤧ᤺ᤳᤇᤡᤰ ᤏᤡ᤺ᤱᤃᤣ᤹ᤏᤢ᤺ᤸᤗᤧ ᤘᤣ᤹ ᤀᤠᤱᤃᤠ᤹ ᤂᤖᤧ᤺ᤱ ᤔᤧᤃᤳᤋᤠᤴ॥ ᤀᤠᤱᤃᤠ᤹ ᤀᤠᤵᤑᤣᤰ ᤏᤢ ᤀᤠᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤁᤢᤈᤠ ᤌᤥ᤺ᤰᤔᤠ ᤜᤧᤰᤁᤩᤠᤱ ᤆᤠᤔᤠᤀᤠᤱ ᤛᤡᤔᤠᤖᤧ ᤗᤠᤃᤡ ᤜᤡᤶᤔᤥ ᤁᤢᤓᤠ ᤛᤡᤱᤔᤢᤈᤡ᤹ᤜᤠ᤹ ᤋᤣ᤹ᤔᤠ ᤑᤠ᤹ᤀᤠᤱ ᤁᤥ᤺ᤳᤋᤢᤱᤗ ᤕᤠᤰᤁᤠ॥”

¹³ ᤀᤣᤗᤡᤕᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤜᤡᤶᤔᤥ ᤐᤣᤃᤧ᤹ᤀᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤧ᤹॥ ᤁᤖ ᤂᤧᤴᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤆᤩᤠ ᤁᤧᤃᤳᤋᤢ᤹ ᤂᤧᤴ ᤗᤳᤇᤠ ᤆᤢᤰᤛᤠ ᤂᤖᤧ᤺ᤱ ᤗᤧ᤺ᤱᤛᤧ᤹ᤀᤠᤱ ᤀᤠᤱᤃᤠ᤹ ᤂᤢ᤹ᤖᤠᤱᤅᤧ᤹. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤏᤧ᤹ ᤏᤢ ᤁᤧᤛ᤻ᤛᤠ᤺ᤸᤗᤧ ᤗᤠᤃᤡ ᤁᤢᤓᤠ ᤌᤧᤔᤠᤀᤡ ᤆᤥᤃᤧ᤹॥

¹⁴ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤘᤜᤡᤳ ᤌᤠᤛᤢᤖ ᤔᤧᤴᤕᤠ᤺ᤴᤏᤣ ᤌᤠᤖᤡᤰ ᤂᤵᤐᤩᤠᤀᤥᤒᤠ ᤑᤣ᤹ᤖᤢᤶᤔᤡᤴ ᤔᤧᤔᤠ᤺ᤳᤏᤧᤴ ᤜᤧᤰᤁᤩᤠᤱ ᤁᤠ᤺ᤴᤍᤩᤠᤀᤥᤒᤠ ᤏᤡ᤺ᤱᤃᤣᤴ ᤔᤧᤔᤧᤰᤏᤧᤴ॥’”

¹⁵ ᤂᤧᤴ ᤔᤣᤔᤣᤍᤢᤔᤠᤴ ᤐᤣᤀᤠᤱ ᤀᤣᤗᤡᤕᤠᤖᤧ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤆᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤀᤣᤗᤡᤕᤠᤖᤧ ᤁᤢᤗᤠᤃᤡ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤌᤡᤰᤕᤠ᤺ᤴᤎᤰᤐᤠ ᤆᤠᤔᤠ ᤁᤢᤈᤠ ᤐᤥ᤺ᤰᤂᤧ॥

¹⁶ ᤌᤣᤀᤠᤱᤓᤧᤸᤗᤧ ᤀᤣᤗᤡᤕᤠᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤂᤵᤐᤩᤠᤀᤥᤒᤠ ᤑᤣ᤹ᤍᤢᤶᤔᤡᤴ ᤔᤧᤔᤠᤖᤧᤴ. ᤂᤧᤒᤩᤠᤱ ᤁᤠ᤺ᤴᤍᤩᤠᤀᤥᤒᤠ ᤏᤡ᤺ᤱᤃᤣᤴᤏᤠᤱ ᤔᤧᤔᤧᤃᤧᤴ॥

¹⁷ ᤁᤢᤓᤠ ᤕᤧᤶ ᤀᤣᤃᤠᤱ ᤂᤧᤴ ᤔᤧᤴᤇᤢᤔᤠ. ᤂᤧᤴ ᤜᤡᤶᤔᤥᤒᤠ ᤜᤡᤶᤍᤠᤱᤔᤧᤸᤗᤧ ᤁᤢᤛ᤻ᤛᤠᤴ ᤋᤢᤃᤧ. ᤂᤶᤓᤩᤠᤱ ᤂᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤋᤢᤰᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤴ ᤆᤢᤰᤐᤧᤴ ᤛᤰᤔᤠ ᤛᤥ᤺ᤴᤇᤡᤱᤔᤠᤀᤠᤱ ᤏᤠ᤹ᤖᤧ॥

¹⁸ ᤂᤧᤒᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤀᤣᤗᤡᤕᤠᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤌᤧᤔᤠ ᤐᤠᤴ ᤁᤧᤃᤳᤋᤢᤒᤣ᥅ ᤌᤣ ᤂᤧᤏᤧ᤹ ᤁ᤹ᤕᤥ ᤀᤠᤱᤃᤠ᤹ ᤀᤠᤗᤠᤕᤥᤴ ᤏᤡᤱᤘᤠ᤹ᤛᤢᤶ ᤁᤧᤍᤠᤖᤠᤱ ᤁᤧᤒᤡᤖᤠᤱᤅᤠᤱ ᤀᤠᤱᤃᤠ᤹ ᤀᤠᤛ᤻ᤛᤠᤴ ᤛᤧᤳᤇᤧ ᤁᤧᤍᤩᤧᤒᤠᤒᤡ᥅”

¹⁹ ᤀᤣᤗᤡᤕᤠᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤛ᤻ᤛᤠᤴ ᤁᤵᤔᤥ ᤀᤠᤱᤃᤠ᤹ ᤐᤡᤖᤠᤱᤅᤧ᤹॥” ᤀᤣᤗᤡᤕᤠ᤺ᤸᤗᤧ ᤂᤧᤴ ᤆᤢᤰᤐᤧᤴ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤋᤠ᤺ᤰᤋᤢᤀᤠᤱ ᤂᤢᤏᤧ᤹ ᤕᤢᤅᤧᤒᤠ ᤜᤡᤶᤔᤥᤒᤠ ᤌᤠ᤺ᤱᤛᤔᤠ ᤕᤠᤰᤑᤠᤱᤅᤥ ᤋᤣ᤹ᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤧᤳᤏᤠᤀᤥ ᤂᤧᤴ ᤆᤢᤰᤐᤧᤴ ᤏᤧᤛ᤻ᤛᤢ॥

²⁰ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣ ᤀᤠᤱᤃᤠ᤹ ᤕᤢᤱᤅᤠᤒᤠ ᤜᤡᤶᤔᤥᤒᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠᤴ ᤂᤧᤏᤧ᤹ ᤁᤧᤛᤧᤖᤢᤀᤠᤱ ᤂᤧᤴ ᤔᤣᤔᤣᤍᤢᤔᤠᤀᤥ ᤁᤴ ᤋᤢᤰᤂᤣᤴ ᤁᤧᤍᤠᤖᤢᤒᤠᤒᤡ᥅”

²¹ ᤂᤧᤒᤩᤠᤱ ᤂᤢᤏᤧ᤹ ᤛᤢᤶᤍᤢ᤺ᤰ ᤌᤠᤖᤡᤰ ᤂᤧᤴ ᤆᤢᤰᤐᤧᤸᤗᤧ ᤁᤢᤛᤶᤎᤠᤱ ᤛᤶᤒᤧᤳ ᤏᤧᤛᤡᤱ. ᤜᤧᤰᤁᤩᤠᤱ ᤀ᤺ᤰᤋᤧᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤕᤠᤶᤔᤥ ᤁᤴ ᤆᤢᤰᤐᤧᤸᤗᤧ ᤁᤢᤛᤰᤔᤠ ᤏᤢ᤺ᤱᤅᤠᤱ ᤜᤡᤱᤗᤖᤥ॥”

²² ᤀᤣᤗᤡᤕᤠ᤺ᤸᤗᤧ ᤁᤢᤒᤣᤗᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢ. ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤸᤗᤧ ᤁᤢᤛᤰᤔᤠ ᤏᤢ᤺ᤰᤂᤧᤀᤠᤱ ᤂᤧᤴ ᤜᤡᤅᤧ॥

²³ ᤀᤣᤗᤡᤕᤠ᤺ᤸᤗᤧ ᤆᤢᤰᤐᤧᤴ ᤑᤥ᤺ᤰᤂᤢᤀᤠᤱ ᤕᤠᤰᤑᤠᤱᤅᤥᤗᤠᤶ ᤕᤥ ᤜᤡᤶᤔᤥ ᤋᤣ᤹ᤖᤢ॥ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤔᤠ ᤂᤢᤏᤧ᤹ ᤐᤡᤖᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤥᤔᤧᤳᤋᤧᤛᤠ᤹ᤖᤧ. ᤂᤧᤏᤧ᤹ ᤁᤧᤛ᤻ᤛᤠᤴ ᤁᤢᤜᤡᤱᤘᤧᤳᤋᤣ ᤘᤠ᤹᥄”

²⁴ ᤂᤧᤒᤩᤠᤱ ᤂᤧᤴ ᤔᤣᤔᤣᤍᤢᤔᤧᤸᤗᤧ ᤀᤣᤗᤡᤕᤠᤴ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤏᤧᤖᤳᤇ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤒᤪᤠᤀᤥᤗᤠᤶ ᤁᤧᤗ᤺ᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤛᤧᤰᤂᤠᤖᤳᤇ ᤑᤠ᤹ᤀᤠᤱ ᤀᤠᤸᤗ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ॥”