᥇ ᤜᤠᤱ 16 - LIFOTNT1 ᤂᤧᤴ ᤀᤣᤃᤠᤱ ᤒᤠᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤏᤠᤏᤡᤖᤧ ᤁᤢᤛ᤻ᤛᤠ ᤕᤣᤜᤢᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤖᤧ— 2 “ᤀᤠᤱᤃᤠ᤹ ᤂᤧᤏᤧ᤹ ᤂᤠᤶᤑᤢᤳᤇᤪᤢ᤺ᤶᤒᤥᤗᤠᤶ ᤑᤥ᤺ᤱᤏᤧᤀᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤆᤥ᤺ᤰᤏᤧ. ᤁᤖ ᤕᤠᤖᤥᤒᤠᤔᤖᤧ ᤁᤢᤗᤠᤶᤔᤥ ᤗᤠᤱᤃᤧᤄᤣᤃᤧᤀᤠᤱ ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ᤗᤠᤶ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢ॥ 3 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤒᤠᤛᤠᤏ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤔᤧᤱᤔᤠ ᤀᤡ᤺ᤳᤋᤢᤱᤛᤡᤱᤗ ᤐᤳᤋᤠ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤜᤠ᤹ ᤁᤢᤛᤡᤰ ᤔᤧᤰᤂᤢᤱᤛᤡᤱ᤹॥ 4 ᤒᤠᤛᤠᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤁᤥ ᤁᤧᤛᤡᤒᤠᤜᤠ᤹ ᤁᤥ᤺ᤳᤆᤥᤜᤠ᤹ᤖᤧ ᤔᤧᤈᤛᤡ᤹. ᤜᤧᤰᤁᤩᤠᤱ ᤋᤠᤶᤓᤢᤱᤅᤥ ᤁᤧᤛᤡᤒᤠᤜᤠ᤹ᤃ ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹ᤖᤧ ᤔᤧᤈᤛᤡ᤹॥” 5 ᤒᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤂᤥᤛᤢᤒᤠ ᤌᤥᤒᤥ ᤐᤠ᤺ᤴᤜᤠ᤹ ᤌᤣ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ 6 ᤒᤠᤛᤠᤏ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤋᤡᤷᤛᤠᤀᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤣᤗᤠᤜ᤺ᤴ ᤜᤠᤱ ᤐᤥ᤺ᤰᤂᤧ॥ 7 ᤂᤧᤴᤏᤢ᤺ᤸᤗᤧ ᤘᤣ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤒᤠᤛᤠ᤺ᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤰ ᤑᤥ᤺ᤰᤂᤢᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤱᤜᤠ᤹ ᤜᤧᤰᤋᤱᤒᤠᤀᤣ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ. ᤂᤧᤒᤩᤠᤱ ᤒᤠᤛᤠ᤺ᤸᤗᤧ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤜᤠ᤹ ᤔᤧᤰᤂᤢᤛᤡᤒᤠᤸᤗᤧ ᤆᤥᤃᤢᤸᤗᤧ—ᤜᤏᤠᤏᤡᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤣᤜᤢᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤒᤠᤛᤠᤏ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤅᤥ ᤕᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤣᤗᤠᤜ 8 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤅᤠᤱ ᤋᤢᤰᤛᤡᤃᤣᤰᤐᤠ ᤋᤱᤒᤣᤀᤥ ᤒᤠᤛᤠᤖᤧ ᤁᤢᤛ᤻ᤛᤠ ᤀᤣᤗᤠᤜ᤺ᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤡᤷᤛᤠᤀᤥ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 9 ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤌᤡᤰᤐᤠ ᤂᤢᤏᤧ᤹ ᤁᤢᤀᤴᤗᤠᤎᤠ ᤁᤧᤗᤥᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤈᤡᤔᤪᤡ᤺ᤸᤗᤧ ᤀᤣᤗᤠᤜᤖᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ॥ ᤂᤧᤴ ᤕᤧᤶᤔᤥ ᤀᤣᤗᤠᤜ᤺ᤴ ᤋᤡᤷᤛᤠᤀᤥᤒᤠ ᤂᤢᤏᤧ᤹ ᤁᤢᤜᤠᤱᤜᤡᤶ ᤀᤥᤃᤧᤔᤧᤵᤐᤠ ᤀᤠᤷᤛᤠ᤺ᤸᤗᤧ ᤁᤢᤜᤡᤶᤔᤥ ᤛᤣᤈᤱᤘᤠᤴ ᤌᤢᤅᤢᤀᤠᤱ ᤔᤛᤡᤱᤅᤠᤱ ᤕᤠᤃᤧ॥ 10 ᤕᤜᤢᤍᤠᤒᤠ ᤜᤠᤱ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤈᤡᤔᤪᤡ᤺ᤴ ᤜᤡᤶᤔᤥ ᤗᤠᤛᤧᤀᤠᤱ ᤀᤣᤗᤠᤜ᤺ᤴ ᤜᤡᤵᤋᤢᤛᤧᤖᤢ॥ ᤀᤠᤶᤓᤠ ᤂᤧᤴ ᤈᤡᤔᤪᤡ᤺ᤴ ᤂᤢᤏᤧ᤹ ᤁᤢᤀᤣᤃᤠᤱ ᤜᤠᤱ ᤐᤥ᤺ᤰᤂᤧ॥ 11 ᤈᤡᤔᤪᤡ᤺ᤴ ᤜᤠᤱ ᤐᤥ᤺ᤰᤂᤧᤀᤠᤱ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤒᤠᤛᤠ᤺ᤸᤗᤧ ᤁᤢᤜᤡᤶᤛᤕᤱᤜᤠ᤹ ᤁᤧᤖᤧᤰ ᤛᤧᤖᤢᤛᤡ॥ ᤂᤢᤏᤧ᤹ ᤒᤠᤛᤠ᤺ᤸᤗᤧ ᤁᤢᤃᤠ᤹ᤀᤡᤜᤠ᤹ ᤏᤢ ᤁᤢᤈᤢᤶ ᤁᤢᤍᤣ᤺ᤱᤜᤠ᤹ᤀᤥᤒᤠ ᤕᤧᤶᤒᤡᤳᤇᤠ ᤌᤡᤰᤁᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤢᤛᤡᤴ॥ 12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤣᤜᤢᤗᤠᤶ ᤒᤠᤛᤠᤖᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤁᤢᤛᤡᤰ ᤁᤶᤓᤗ᤹ᤖᤡᤰ ᤈᤡᤔᤪᤡ᤺ᤸᤗᤧ ᤒᤠᤛᤠᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤔᤧᤰᤂᤢᤛᤡ॥ 13 ᤒᤠᤛᤠᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤀᤣᤗᤠᤜᤖᤧ ᤆᤥᤃᤧᤛᤢᤒᤠ ᤗᤠᤕᤥ ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤆᤥᤰ ᤐᤠᤱᤄᤧᤛᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤣᤏᤠᤎᤣᤒᤠ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴ ᤑᤥ᤺ᤰᤂᤧᤛᤢᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ 14 ᤀᤣᤗᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ ᤀᤡᤛᤪᤠᤀᤡᤗᤒᤠ ᤜᤠᤱ ᤈᤡᤔᤪᤡ 15 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤈᤡᤔᤪᤡ᤺ᤸᤗᤧ ᤏᤢᤛᤡ ᤕᤧᤴ ᤌᤠᤖᤡᤰ ᤋᤡᤷᤛᤠᤀᤥ ᤜᤠᤱᤕᤢᤰ ᤆᤥᤃᤢ॥ ᤂᤧᤴ ᤕᤧᤶᤔᤥ ᤌᤰᤛᤢᤒᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤃᤡᤒ᤻ᤒᤋᤥᤏ ᤏᤡ᤺ᤳᤋᤠᤱᤒᤠ ᤌᤰᤛᤢᤒᤠ ᤏᤧᤳᤏᤠᤀᤥ ᤔᤧᤘᤕᤧ॥ 16 ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤸᤗ ᤈᤡᤔᤪᤡ᤺ᤸᤗᤧ ᤆᤧᤶᤓᤴ ᤆᤥᤃᤢᤀᤠᤱ ᤀᤣᤗᤠᤜ ᤜᤠᤱᤅᤡᤴ ᤛᤧᤖᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ. ᤂᤧᤒᤩᤠᤱ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤀᤥᤔᤪᤡ᤺ᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧᤒᤠ ᤀᤢᤘᤠ ᤔᤧᤈᤥᤃᤢ॥ 17 ᤂᤶᤓᤩᤠᤱ ᤀᤥᤔᤪᤡ᤺ᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤃᤡᤒ᤻ᤒᤋᤥᤏᤗᤠᤶ ᤔᤧᤏᤢ᤺ᤰᤂᤧᤀᤠᤱ ᤋᤡᤷᤛᤠ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢ॥ 18 ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢᤒᤠ ᤏᤡᤛᤢᤏᤢᤔᤧ᤺ᤴᤏᤣ ᤈᤡᤔᤪᤡ᤺ᤴ ᤜᤠᤱᤜᤡᤶᤔᤥᤒᤠ ᤜᤠᤱᤕᤰᤁᤥ ᤑᤢᤖᤢᤳ ᤗᤠᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤜᤡᤶᤔᤡᤴ ᤔᤡᤎᤡᤰᤂᤢ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤔᤡᤍᤡᤃᤧ ᤛᤩᤧ॥ 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴᤏᤣ ᤆᤥᤃᤢᤀᤠᤱ ᤕᤠᤖᤥᤒᤠᤔᤖᤧ ᤁᤢᤕᤧᤵᤗᤧᤰ ᤏᤢ ᤂᤧᤸᤗᤧ ᤆᤥᤃᤢᤒᤠ ᤗᤠᤕᤥᤴ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤆᤥᤰ ᤐᤠᤱᤄᤢᤛᤡᤒᤠ ᤗᤠᤕᤥᤀᤥ ᤂᤢᤏᤧ᤹ ᤘᤕᤧᤀᤠᤱ ᤂᤧᤴ ᤗᤠᤕᤥᤜᤠ᤹ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ 20 ᤈᤡᤔᤪᤡ᤺ᤸᤗᤧ ᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤐᤡᤑᤩᤢᤱᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤥᤔᤪᤡ 21 ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤁᤢᤗᤢᤵ ᤏᤧᤳᤇᤡ ᤀᤣ᤹ᤀᤣ ᤔᤧᤛᤧᤖᤧ॥ ᤔᤏᤠᤜᤠ᤹ᤀᤥᤒᤠ ᤁᤢᤓᤪᤧ᤺ᤱᤗᤧ ᤃᤡᤏᤋᤖᤧ ᤁᤢᤛ᤻ᤛᤠ ᤋᤡᤒ᤻ᤏᤡ᤺ᤴ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤧᤓᤠ᤹ᤖᤢ ᤜᤧᤰᤁᤩᤠᤱ ᤁᤢᤓᤪᤧ᤺ᤱᤗᤧ ᤀᤥᤔᤪᤡ᤺ᤴ ᤔᤧᤓᤠ᤹ᤖᤢ॥ 22 ᤁᤖ ᤃᤡᤏᤋᤖᤧ ᤁᤢᤛ᤻ᤛᤠ ᤋᤡᤒ᤻ᤏᤡ᤺ᤴ ᤁᤧᤓᤠ᤹ᤒᤠᤜᤠ᤹ᤏᤢ᤺ᤸᤗᤧ ᤀᤥᤔᤪᤡ᤺ᤴ ᤁᤧᤓᤠ᤹ᤒᤠᤜᤠ᤹ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤔᤧᤈᤥᤃᤧ॥ ᤁᤸᤗᤧᤆᤥᤃᤢᤸᤗᤧ ᤋᤡᤒ᤻ᤏᤡ᤺ᤴ ᤛᤩᤧ. ᤜᤧᤰᤁᤩᤠᤱ ᤀᤥᤔᤪᤡ᤺ᤴ ᤜᤠᤱ ᤐᤥ᤺ᤰᤂᤧ॥ 23 ᤕᤜᤢᤍᤠᤒᤠ ᤜᤠᤱ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤀᤥᤔᤪᤡ᤺ᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤌᤧᤶᤒᤠ ᤜᤠᤱᤕᤢᤰ ᤆᤥᤃᤢ॥ ᤂᤧᤴ ᤋᤱᤒᤣᤜᤠ᤹ᤀᤥ ᤋᤱᤒᤣ ᤋᤢᤰᤛᤡᤃ ᤂᤢᤏᤧ᤹ ᤋᤡᤷᤛᤠ ᤕᤧᤰᤕᤰᤁᤥ ᤜᤠᤱᤕᤢᤰ ᤆᤥᤃᤢ॥ 24 ᤂᤢᤏᤧ᤹ ᤜᤧᤴᤇᤡᤱ ᤋᤢᤰᤛᤡ ᤁᤢᤀᤠ᤺ᤳ ᤕᤢᤵᤐᤠᤖᤧ ᤛᤣᤔᤣᤖᤖᤧ ᤁᤢᤜᤢᤰᤁᤥᤗᤠᤶ ᤛᤠᤔᤖᤡᤕᤠᤒᤠ ᤁᤥ᤺ᤰᤔᤠᤴ ᤀᤡᤅᤢᤀᤠᤱ ᤗᤳᤇᤠ ᤕᤧᤰᤕᤰ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤁᤥ᤺ᤰᤔᤠᤸᤗᤧ ᤋᤃᤡᤒᤠ ᤁᤢᤴᤍᤠᤱᤒᤠ ᤛᤣᤔᤣᤖᤖᤧ ᤁᤢᤔᤡᤱᤅᤥ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤛᤠᤔᤖᤡᤕᤠ ᤔᤡᤱ ᤘᤠ᤺ᤳᤋᤢ॥ 25 ᤁᤖ ᤀᤥᤔᤪᤡ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡᤒᤠ ᤜᤠᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤗᤠᤕᤥ ᤆᤥᤃᤢ॥ 26 ᤂᤢᤏᤧ᤹ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤧᤖᤧᤰ ᤁᤢᤕᤧᤵᤗᤧᤰ ᤏᤢ ᤂᤧᤸᤗᤧ ᤁᤢᤗᤠᤕᤥᤀᤥ ᤗᤠᤱᤄᤣᤃᤧ. ᤂᤧᤴ ᤗᤠᤕᤥᤴ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤆᤥᤰ ᤐᤠᤱᤄᤢᤛᤡᤀᤠᤱ ᤘᤕᤧ. ᤂᤶᤓᤩᤠᤱ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤰ ᤔᤧᤓᤥᤰᤂᤢᤀᤠᤱ ᤘᤕᤧ॥ 27 ᤀᤥᤔᤪᤡᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤥᤛᤢᤒᤠ ᤌᤥᤒᤥ ᤐᤠ᤺ᤴᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ 28 ᤀᤥᤔᤪᤡ᤺ᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤜᤠᤒᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒ 29 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤀᤥᤔᤪᤡᤖᤧ ᤁᤢᤛ᤻ᤛᤠ ᤀᤠᤜᤠᤒᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 30 ᤀᤥᤔᤪᤡᤖᤧ ᤁᤢᤛ᤻ᤛᤠ ᤀᤠᤜᤠᤒᤖᤧ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡᤒᤠ ᤁᤧᤖᤧᤰ ᤜᤠᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤑᤧᤴᤕᤠ᤺ᤶᤒᤰ ᤆᤥᤃᤢ॥ 31 ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤏᤠ᤺ᤳᤋᤢᤒᤠ ᤗᤠᤕᤥᤒᤠ ᤗᤠᤶᤜᤠ᤹ᤀᤥ ᤂᤧᤴ ᤗᤠᤱᤄᤣᤃᤧᤒᤠᤖᤰ ᤔᤣ᤺ᤴ. ᤁᤖ ᤂᤢᤏᤧ᤹ ᤛᤡᤍᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤀᤣᤋᤠᤒᤠᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤡᤈᤣᤒᤣᤗᤧᤴᤏᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ. ᤜᤧᤰᤁᤩᤠᤱ ᤒᤠᤗ ᤔᤠᤱᤅᤡᤴ ᤛᤧᤘᤠ ᤔᤧᤳᤋᤢᤀᤠᤱ ᤂᤧᤴ ᤔᤠᤱᤛᤧᤘᤠ ᤔᤧᤳᤋᤢ॥ 32 ᤛᤠᤔᤖᤡᤕᤠᤀᤥ ᤂᤢᤏᤧ᤹ ᤆᤥᤃᤢᤒᤠ ᤒᤠᤗ ᤔᤠᤱᤜᤡᤶᤔᤥ ᤒᤠᤗᤖᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ॥ 33 ᤀᤠᤜᤠᤒᤖᤧ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠ ᤌᤡᤰᤁᤠᤱ ᤕᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡᤒᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤜᤠᤱᤜᤠ᤹ᤏᤢ᤺ᤸᤗᤧ ᤕᤖᤡᤰ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤑᤥᤱᤔᤠ ᤕᤠ᤺ᤶᤒᤰ ᤆᤥᤃᤢ॥ 34 ᤀᤠᤜᤠᤒᤖᤧ ᤁᤢᤕᤧᤶᤔᤥ ᤒᤣᤌᤣᤗᤒᤠ ᤜᤡᤀᤣᤗᤖᤧ ᤕᤖᤡᤜᤥᤀᤥ ᤕᤠᤶᤔᤥ ᤕᤧᤰᤕᤰ ᤆᤢᤰᤋᤧᤖ ᤆᤥᤃᤢ॥ ᤂᤧᤵᤔᤥ ᤁᤢᤒᤢᤱ ᤕᤢᤰᤂᤢᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤠ ᤀᤒᤡᤖᤠᤔᤧᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤧᤵᤔᤥ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤑᤥ᤹ᤒᤠ ᤛᤃᤢᤒᤧᤴ ᤔᤠᤛᤡᤱ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤗᤠᤶ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.