᥇ ᤜᤠᤱ 15 - LIFOTNTᤀᤒᤡᤕᤠᤖᤧ ᤕᤜᤢᤍᤠᤀᤥ ᤜᤠᤱᤕᤢᤰ ᤆᤥᤃᤢ ( ᥈ ᤛᤠᤵᤔᤢ ᥇᥉:᥇–᥇᥊:᥇ ) 1 ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤀᤒᤡᤕᤠᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ. 2 ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤛᤢᤶᤛᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤔᤠᤁᤠ ᤘᤕᤧ॥ ᤂᤢᤏᤧ᤹ ᤀᤒᤡᤛᤠᤗᤥᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 3 ᤂᤧᤸᤗᤧᤀᤠᤱ ᤋᤃᤡ ᤂᤢᤏᤧ᤹ ᤁᤢᤶᤒᤠᤖᤧ ᤆᤥᤃᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ ᤆᤥᤃᤢ॥ ᤂᤢᤏᤧ᤹ ᤁᤢᤏᤡᤱᤘᤠᤴ ᤁᤢᤴᤎᤧᤒᤠ ᤁᤢᤎᤠ᤺ᤰᤌᤧᤒᤠ ᤍᤠᤀᤢᤍᤖᤧ ᤁᤢᤏᤡᤱᤘᤠᤴ ᤏᤡᤱᤘᤠ᤹ᤑᤢᤔᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤘᤕᤧᤒᤠ ᤜᤧᤰᤁᤣ ᤂᤢᤏᤧ᤹ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤐᤖᤡᤰᤗᤧ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧᤒᤥ᤺ᤰᤂᤧᤴ॥ 4 ᤁᤖᤛᤠᤱ ᤍᤠᤀᤢᤍᤖᤧ ᤁᤢᤗᤰᤂᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤛ᤻ᤛᤠᤎᤡᤰ ᤑᤥ᤺ᤰᤂᤢᤀᤠᤱ ᤕᤖᤢᤛᤗᤧ᤺ᤶᤔᤡᤴ ᤁᤧᤎᤢᤶᤒᤠ ᤆᤥᤃᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤡᤕᤠᤴ ᤍᤠᤀᤢᤍᤖᤧ ᤁᤢᤗᤠᤃᤡ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤗᤳᤇᤠ ᤛᤣᤔᤡ ᤜᤧᤰᤁᤣ ᤐᤡᤖᤢ॥ 5 ᤌᤣᤀᤠᤱᤓᤧᤸᤗᤧ ᤜᤡᤳᤋᤡ ᤀᤢᤖᤡᤕᤠᤜᤏᤢ᤺ᤸᤗᤧ ᤘᤣ᤹ ᤐᤠ᤺ᤴᤏᤥ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤁᤢᤍᤥ᤺ᤵᤔᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤁᤢᤜᤡᤱᤜᤡᤱ ᤂᤢᤏᤧ᤹ ᤀᤠᤳᤋᤡᤴ ᤁᤢᤀᤡᤱᤈᤠᤱᤅᤡᤴᤏᤠᤱ ᤑᤣ᤺ᤴᤍᤢᤒᤠ ᤜᤥ᤺ᤵᤋᤧ॥ 6 ᤖᤜᤒᤠᤔ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤜᤣ᤺ᤰᤛᤡᤱᤒᤠ ᤌᤱᤅᤡᤴ ᤀᤒᤡᤕᤠᤖᤧ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤐᤥ᤺ᤰᤂᤧᤀᤠᤱ ᤐᤳᤇᤧ॥ 7 ᤀᤒᤡᤕᤠᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ ᤀᤒᤡᤕᤠ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤆᤰᤔᤧᤸᤗ᤹ᤀᤣ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥ 8 ᤜᤧᤰᤁᤩᤠᤱ ᤀᤒᤡᤕᤠᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤂᤶᤓᤩᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤗᤢᤵᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤛᤠᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤀᤥᤒᤠ ᤜᤠᤱ ᤀᤠᤛᤠ ( ᥈ ᤛᤠᤵᤔᤢ ᥇᥋:᥇᥌–᥇᥌:᥌ ) 9 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱ ᤋᤱᤒᤣᤀᤥ ᤀᤠᤛᤠᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ. 10 ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤀᤒᤡᤛᤠᤗᤥᤔᤖᤧ ᤁᤢᤛ᤻ᤛᤠ ᤔᤠᤁᤠᤴ ᤂᤢᤏᤧ᤹ ᤁᤢᤕᤢᤔᤠ ᤘᤕᤧ॥ 11 ᤀᤠᤛᤠ᤺ᤸᤗᤧ ᤂᤢᤏᤧ᤹ ᤁᤢᤎᤠ᤺ᤰᤌᤧᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤁᤢᤍᤥ᤺ᤵᤔᤠ ᤘᤕᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ 12 ᤂᤢᤏᤧ᤹ ᤔᤠᤱᤎᤠ᤺ᤴᤏᤥ ᤁᤧᤕᤢᤱᤒᤠ ᤔᤧᤴᤇᤢᤔᤠᤖᤧ ᤔᤧᤓᤳᤇᤢᤛᤡᤒᤠ ᤑᤧᤳᤁᤧᤗᤠ᤹ᤒᤠ ᤕᤧᤶᤒᤡᤳᤇᤠᤜᤠ᤹ ᤗᤠᤈᤣ᤹ᤗᤠᤶ ᤗ᤺ᤳᤋᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ ᤂᤧᤳᤋᤢᤍᤣᤛᤢᤛᤡ॥ 13 ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤢᤔᤠ ᤔᤠᤁᤠᤴ ᤔᤠᤏᤢᤍᤡᤱ ᤜᤠᤱᤔᤠ ᤋᤠᤰᤑᤠᤗᤠᤶ ᤂᤧᤳᤋᤢᤍᤣᤛᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤗᤳᤇᤠ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠ ᤛᤡᤳᤗᤠᤱ ᤌᤡᤰ ᤆᤥᤃᤢᤀᤠᤱ ᤘᤕᤧ॥ ᤀᤠᤛᤠ᤺ᤸᤗᤧ ᤂᤧᤴ ᤆᤩᤧᤵᤋᤢᤀᤠᤱ ᤛᤥ᤺ᤴᤍᤢ. ᤜᤧᤰᤁᤩᤠᤱ ᤁᤡᤍᤪᤥᤏ ᤕᤜ᤺ᤱᤅᤥ ᤂᤧᤴ ᤔᤡᤎᤡᤰᤂᤢᤍᤣᤛᤢ॥ 14 ᤂᤢᤏᤧ᤹ ᤁᤥ᤺ᤰᤔᤠᤜᤠ᤹ᤀᤥ ᤁᤧᤕᤢᤱᤒᤠ ᤛᤧᤘᤠ ᤆᤥ᤺ᤰᤔᤠᤍᤧᤴ ᤔᤠᤱᤎᤠ᤺ᤴᤜᤠ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴᤇᤠᤱ ᤀᤠᤛᤠ᤺ᤸᤗᤧ ᤁᤢᤛᤡᤰᤗᤢᤱᤔᤠᤴ ᤂᤢᤏᤧ᤹ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤠᤀᤥ ᤁᤧᤖᤧᤰ ᤋᤥ᤺ᤴᤍᤢᤀᤠᤱ ᤘᤕᤧ॥ 15 ᤂᤢᤏᤧ᤹ ᤋᤥ᤺ᤴᤍᤢᤒᤠ ᤜᤧᤰᤁᤩᤠᤱ ᤁᤢᤶᤒᤠᤖᤧ ᤋᤥ᤺ᤴᤍᤢᤒᤠ ᤕᤢᤵᤐᤠ. ᤛᤠᤶᤔᤩᤠᤱ ᤏᤢ ᤛᤠᤔᤠᤜᤠ᤹ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤠᤖᤢ॥ 16 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤴ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰ ᤆᤥᤃᤧᤛᤢᤒᤠ ᤕᤧᤶ ᤂᤠᤖᤠᤰ ᤌᤱ ᤐᤥ᤺ᤰᤂᤧᤀᤠᤱ ᤘᤕᤧ॥ 17 ᤀᤡᤛᤪᤠᤀᤡᤗᤒᤠ ᤒᤠᤛᤠ ᤜᤠᤱᤅᤡᤴ ᤐᤣᤀᤠᤱ ᤕᤜᤢᤍᤠᤴ ᤌᤱᤅᤥ ᤑᤳᤋᤢ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤀᤠᤛᤠ᤺ᤸᤗᤧ ᤁᤢᤍᤧ᤺ᤱᤃᤵᤐᤥᤗᤠᤶ ᤗ᤺ᤶᤔᤠ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤀᤠᤳᤋᤡᤴᤏᤠᤱ ᤔᤧᤶᤓᤠ᤺ᤰᤔᤠᤛᤡᤖᤧ ᤗᤠᤃᤡ ᤖᤠᤔᤠᤀᤥ ᤜᤠᤱᤕᤰ ᤆᤥᤃᤢ॥ 18 ᤂᤧᤒᤩᤠᤱ ᤀᤠᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤠᤱᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥ ᤁᤧᤕᤠ᤺ᤰᤐᤠ ᤁᤧᤖᤧᤰ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤕᤠᤱᤛᤡᤱ॥ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤜᤢᤰᤛᤢᤵᤋᤢᤛᤡᤀᤠᤱ ᤋᤒᤪᤡᤔᤥᤏᤖᤧ ᤁᤢᤛ᤻ᤛᤠ. ᤜᤣᤈᤩᤥᤏᤖᤧ ᤁᤢᤶᤔᤧᤴᤇᤠ᤹ ᤀᤖᤠᤔᤒᤠ ᤜᤠᤱ ᤒᤣᤏ-ᤜᤍᤧᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢ. ᤂᤧᤸᤗᤧ ᤍᤔᤛ᤻ᤁᤛᤀᤥ ᤜᤠᤱᤕᤢᤰ ᤆᤥᤃᤢᤖ ᤘᤕᤧ॥ 19 “ᤀᤠᤱᤃᤠ᤹ ᤀᤠᤶᤒᤠ ᤏᤢ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤗᤢᤶᤔᤥ ᤐᤠ᤺ᤴᤍᤱ ᤐᤥ᤺ᤰᤂᤧᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤏᤢ ᤂᤧᤏᤧ᤹ ᤗᤢᤶᤔᤥᤀᤠᤱ ᤐᤠ᤺ᤴᤍᤱ ᤐᤥᤱᤗ॥ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤛᤠᤶᤔᤩᤠᤱ ᤏᤢ ᤕᤢᤵᤐᤠ᤺ᤸᤗᤧᤴ ᤁᤴ ᤌᤥ᤺ᤰᤗᤠ᤺ᤴ ᤜᤠᤰᤏᤧᤖ ᤐᤳᤋᤠ॥ ᤀᤠᤸᤗ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ᤺ᤴᤏᤢ ᤂᤧᤏᤧ᤹ ᤁᤧᤈᤥᤃᤢᤒᤠ ᤐᤠ᤺ᤴᤍᤱ ᤔᤧᤴᤍᤱᤔᤏᤠᤒᤠ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ᤗᤠᤶ ᤕᤠᤱᤏᤠ ᤏᤢ᤺ᤱᤅᤠᤱ ᤐᤣ᤺ᤰᤗ॥” 20 ᤀᤠᤛᤠ᤺ᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤏᤥ ᤒᤣᤏ-ᤜᤍᤍᤧᤴ ᤋᤧᤴᤍᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ ᤀᤡᤛᤪᤠᤀᤡᤗᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤐᤠᤱᤄᤢᤍᤣᤛᤢᤛᤡ॥ ᤂᤢᤏᤧ᤹ ᤀᤡᤕᤥᤏ. ᤍᤠᤏ. ᤜᤠᤒᤡᤗ-ᤒᤣᤌ-ᤔᤠᤁᤠ ᤏᤢ ᤏᤵᤋᤠᤗᤡ ᤛᤥᤛᤥᤖᤡᤰ ᤃᤠᤗᤡᤗ ᤁᤧᤖᤧᤰ ᤜᤢᤰᤁᤠᤵ ᤔᤧᤈᤥᤃᤢ॥ 21 ᤀᤠᤸᤗ ᤒᤠᤛᤠ᤺ᤸᤗᤧ ᤁᤴ ᤂᤧᤵᤛᤢᤀᤠᤱ ᤖᤠᤔᤠ᤺ᤴ ᤜᤠᤱᤕᤰ ᤆᤥ᤺ᤰᤔᤠ ᤗᤧᤖᤢ. ᤜᤧᤰᤁᤩᤠᤱ ᤋᤡᤷᤛᤠ ᤗᤧᤵᤔᤠᤱ ᤏᤢ᤺ᤰᤂᤧᤀᤠᤱ ᤐᤣ॥ 22 ᤂᤧᤒᤩᤠᤱ ᤀᤠᤛᤠ ᤜᤠᤱᤅᤡᤸᤗᤧ ᤁᤧᤖᤧᤰ ᤕᤜᤢᤍᤠᤀᤥ ᤗᤳᤇᤠ ᤀᤡᤱᤈᤠᤱ ᤆᤥᤃᤢ—ᤜᤧᤰᤁᤩᤠᤱ ᤜᤠ᤺ᤳᤋᤠᤱ ᤔᤧᤸᤗᤧᤳᤋᤣ ᤂᤧᤱᤜᤠ᤹ᤖᤧ ᤂᤧᤵᤔᤥ ᤒᤠᤛᤠ᤺ᤸᤗᤧ ᤀᤥᤃᤵ ᤆᤥᤃᤢᤒᤠ ᤗᤢᤱ ᤏᤢ ᤛᤡᤱᤜᤠ᤹ ᤔᤧᤍᤣ᤹ᤖᤢ॥ ᤂᤧᤴ ᤗᤢᤱ ᤏᤢ ᤛᤡᤱᤜᤠ᤹ ᤀᤥᤃᤵ ᤆᤥᤃᤢᤀᤠᤱ ᤀᤠᤛᤠ ᤜᤠᤱᤅᤡᤸᤗᤧ ᤒᤣᤏᤩᤠᤔᤡᤏ ᤃᤣᤒᤠ ᤏᤢ ᤔᤡᤛ᤻ᤐᤠ᤺ᤴᤏᤠᤱ ᤆᤥᤃᤢ॥ 23 ᤀᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤌᤥᤒᤥᤜᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤧᤰᤕᤰᤜᤠ᤹ ᤌᤣ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ ᤜᤧᤰᤁᤣᤛᤠᤱ ᤂᤢᤏᤧ᤹ ᤂᤍᤠᤰᤔᤡ ᤋᤢᤶᤛᤧᤒᤠ ᤕᤧᤶᤔᤥ ᤁᤢᤕᤠᤶ ᤋᤢᤃᤧᤒᤠᤸᤗᤧ ᤁᤢᤗᤠᤱ ᤁᤧᤍᤢᤰᤐᤠ ᤐᤥ᤺ᤰᤂᤧ॥ 24 ᤂᤧᤒᤩᤠᤱ ᤀᤠᤛᤠᤴ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤗᤢᤵᤋᤢ॥ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤏᤠᤍᤠᤒ 25 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤕᤠᤖᤥᤒᤠᤔᤖᤧ ᤁᤢᤛ᤻ᤛᤠ ᤏᤠᤍᤠᤒᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ॥ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 26 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤠᤶᤓᤠ ᤂᤧᤴᤏᤣ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤧ᤹ ᤁᤢᤶᤒᤠᤖᤧ ᤆᤥ᤺ᤰᤔᤠ ᤐᤠᤱᤄᤢᤛᤡᤒᤠ ᤗᤠᤕᤥᤀᤥ ᤘᤕᤧᤀᤠᤱ ᤂᤢᤏᤧ᤹ᤀᤣ ᤁᤢᤕᤧᤵᤗᤧᤰᤁᤥ ᤗᤠᤱᤄᤣᤃᤧ॥ 27 ᤀᤡᤛ᤻ᤛᤠᤂᤠᤖᤖᤧ ᤁᤢᤜᤡᤶᤛᤕᤱᤅᤥᤒᤠ ᤀᤜᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤛᤠ᤺ᤸᤗᤧ ᤏᤠᤍᤠᤒᤖᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ. ᤜᤧᤰᤁᤩᤠᤱ ᤏᤠᤍᤠᤒ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤃᤒᤢ ᤔᤧᤏᤧᤛ᤻ᤛᤢᤒᤠ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤃᤡᤒ᤻ᤒᤋᤥᤏ ᤕᤧᤰᤕᤰᤁᤥ ᤏᤠᤍᤠᤒᤧᤴ ᤔᤧᤜᤡᤵᤋᤢ ᤔᤧᤛᤧᤖᤢ॥ 28 ᤕᤜᤢᤍᤠᤒᤠ ᤜᤠᤱ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤒᤠᤛᤠ᤺ᤸᤗᤧ ᤏᤠᤍᤠᤒᤧᤴ ᤛᤧᤖᤢ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ॥ 29 ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤏᤢᤔᤧ᤺ᤴᤏᤣ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤜᤠ᤹ ᤁᤧᤖᤧᤰ ᤛᤧᤖᤢᤛᤡ॥ ᤂᤧᤸᤗᤧ ᤕᤠᤖᤥᤒᤠᤔᤖᤧ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤢᤜᤡᤱᤘᤧᤳ ᤁᤢᤎᤣᤀᤠᤱ ᤔᤧᤗᤧᤖᤢᤴ. ᤁᤖ ᤂᤧᤱᤜᤠ᤹ ᤁᤧᤖᤧᤰ ᤔᤧᤰᤂᤢᤛᤡ॥ ᤁᤶᤓᤗ᤹ᤖᤡᤰ ᤛᤡᤗᤥᤒᤠ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤀᤜᤡᤕᤠᤜᤗᤠᤶ ᤐᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤖᤧ॥ 30 ᤕᤠᤖᤥᤒᤠᤔᤖᤧ ᤆᤥᤃᤢᤒᤠ ᤗᤠᤕᤥᤜᤠ᤹ ᤏᤢ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤆᤥ᤺ᤰᤔᤠ ᤐᤠᤱᤄᤢᤛᤡᤒᤠ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤰ ᤑᤥ᤺ᤰᤂᤢᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤐᤥ᤺ᤰᤂᤧᤀᤠᤱ ᤘᤕᤧ॥ 31 ᤏᤠᤍᤠᤒᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ 32 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤴ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤶ ᤂᤠᤖᤠᤰ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥ 33 ᤕᤜᤢᤍᤠᤒᤠ ᤜᤠᤱ ᤀᤠᤛᤠᤖᤧ ᤁᤢᤜᤠᤱᤕᤢᤰ ᤕᤧᤶ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤀᤜᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤛᤠᤏ ᤋᤡᤷᤛᤠᤀᤥ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤒᤥᤱᤅᤠᤱ ᤗᤡᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 34 ᤕᤠᤖᤥᤒᤠᤔᤖᤧᤀᤣ ᤁᤢᤗᤠᤶᤜᤠ᤹ ᤏᤠ᤺ᤳᤋᤢ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤆᤥ᤺ᤰᤔᤠ ᤐᤠᤱᤄᤢᤛᤡᤒᤠ ᤗᤠᤕᤥᤜᤠ᤹ ᤆᤥᤃᤢᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.