᥇ ᤜᤠᤱ 14 - LIFOTNTᤕᤠᤖᤥᤒᤠᤔᤖᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ 1 ᤂᤧᤴ ᤕᤧᤶᤔᤥ ᤕᤠᤖᤥᤒᤠᤔᤖᤧ ᤁᤢᤛ᤻ᤛᤠ ᤀᤒᤡᤕᤠᤴ ᤋᤢᤃᤧ. 2 ᤜᤧᤰᤁᤩᤠᤱ ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤡᤴ ᤔᤧᤳᤋᤢ. “ᤂᤧᤏᤧ᤹ ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤏᤧ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤁᤢᤛᤣ᤺ᤴ ᤔᤧᤴᤏᤡᤔᤠᤖᤧ ᤗᤠᤃᤡ ᤁᤧᤈᤠᤱᤜᤠ᤹ ᤗᤧᤰᤋᤧ᤹॥ ᤂᤧᤒᤩᤠᤱ ᤂᤧᤏᤧ᤹ ᤛᤡᤗᤥᤀᤥ ᤐᤣᤃᤧ᤹॥ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤜᤠᤱ ᤁᤧᤒᤥᤱ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤠᤵᤔᤡ ᤁᤧᤔᤧᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤜᤡᤕᤠᤜᤴ ᤂᤧᤵᤔᤥ ᤘᤠ᤹॥ 3 ᤂᤧᤏᤧ᤹ ᤌᤡᤒᤥᤱ ᤁᤢᤗᤧᤵ ᤂᤖᤧ᤺ᤱ. ᤁᤢᤓᤠ ᤆᤠᤖ᤺ᤵᤐᤠᤜᤠ᤹ ᤏᤢ ᤆᤢᤰᤛᤠ ᤁᤢᤸᤗᤡᤱᤔᤠ ᤌᤡᤰ ᤛᤰᤘᤠᤄᤢ ᤋᤣ᤹ᤖᤧᤀᤠᤱ ᤂᤢᤏᤧ᤹ᤀᤥ ᤐᤣᤃᤧ᤹॥ ᤀᤅᤧ᤺ᤰᤘᤠᤴ ᤌᤣ ᤗ᤹ ᤂᤧᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤧᤈᤧᤰ॥” 4 ᤁᤸᤗᤧᤆᤥᤃᤢᤸᤗᤧ ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤡᤸᤗᤧ ᤁᤢᤕᤧᤶᤒᤠ᤺ᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤢ. ᤜᤧᤰᤁᤩᤠᤱ ᤀᤜᤡᤕᤠᤜᤖᤧ ᤁᤢᤜᤡᤶ ᤛᤡᤗᤥᤀᤥ ᤐᤣ॥ ᤂᤧᤴ ᤕᤧᤶᤔᤥ ᤀᤜᤡᤕᤠᤜᤖᤧ ᤏᤡᤔᤠ ᤔᤧᤛᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤂᤍᤠᤰᤔᤡ ᤋᤢᤶᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤔᤡᤰᤜᤠᤱᤔᤠ ᤀᤠᤃᤧᤀᤠᤱ ᤘᤕᤧ॥ 5 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤡᤴ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤐᤠᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤑᤧᤴᤗ ᤐᤳ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤢᤰ. ᤜᤧᤰᤁᤩᤠᤱ ᤂᤧᤏᤧ᤹ ᤀᤰᤋᤱᤒᤠ ᤏᤥᤃᤵ ᤐᤡᤖᤧ᤹॥ ᤀᤠᤸᤗ ᤂᤧᤴ ᤁᤧᤵᤑᤧᤴᤏᤠᤱ ᤁᤢᤓᤠ ᤘᤣ᤹ ᤗᤧᤱᤛᤡᤱ᤹॥” 6 ᤀᤠᤸᤗ ᤀᤜᤡᤕᤠᤜᤖᤧ ᤗᤠᤶᤎᤣ᤺ᤳᤋᤥ ᤂᤧᤸᤗᤧ ᤁᤢᤗᤠᤱᤒᤢᤰᤁᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤣ. ᤂᤧᤏᤧ᤹ ᤁᤳᤏᤠ ᤛᤡᤃᤠᤱ ᤑᤧᤖᤧ᤹॥ ᤌᤣᤀᤠᤱ ᤂᤧᤏᤧ᤹ ᤁᤢᤓᤠ ᤘᤣ᤹ ᤁᤧᤗᤧᤱᤛᤡᤱᤒᤠᤒᤣ᥅ ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤋᤠᤵᤑᤧ᤺ᤶᤒᤠ ᤀᤡᤱᤄᤱ ᤁᤳᤋᤢᤱ᤹॥ 7 ᤂᤧᤏᤧ᤹ ᤐᤣᤃᤧ᤹ᤀᤠᤱ ᤕᤠᤖᤥᤒᤠᤔᤧᤴ ᤔᤧᤳᤋᤧ᤹. ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤱᤃᤠ᤹ ᤂᤧᤏᤧ᤹ ᤔᤏᤠᤜᤠ᤹ᤀᤥᤗᤠᤶ ᤑᤥ᤺ᤱᤏᤧ. ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤗᤳᤇᤠ ᤗᤠᤶᤗᤥᤒᤠ ᤆᤥ᤺ᤰᤏᤧ॥ 8 ᤀᤠᤱᤃᤠ᤹ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤜᤠᤱᤈᤢᤶᤔᤡᤴ ᤏᤠᤵᤋᤢᤱᤛᤡᤱᤅᤠᤱ ᤂᤧᤏᤧ᤹ ᤐᤡᤏᤧ॥ ᤁᤖ ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤜᤧᤰᤁᤣ ᤁᤧᤒᤥ᤺ᤰᤂᤧᤒᤠ ᤜᤥᤵ. ᤂᤢᤏᤧ᤹ ᤀᤠᤱᤃᤠ᤹ ᤀᤠᤏᤡᤔᤥ ᤌᤣ᤺ᤴ ᤏᤢᤒᤠ ᤆᤥᤰ ᤜᤠᤒᤠ ᤂᤧᤴᤗᤰ ᤆᤥᤃᤢᤖ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤛᤡᤰᤗᤢᤱᤔᤠ᤹ᤖᤧ ᤀᤠᤱᤃᤠ᤹ ᤋᤡᤶᤍᤠᤱ॥ 9 ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤁᤧᤜᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤧᤏᤧ᤹ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤘᤠ᤹॥ ᤂᤧᤏᤧ᤹ ᤁᤧᤗᤠᤃᤡ ᤘᤣ᤹ ᤔᤠᤱᤜᤠ᤹. ᤕᤥ᤺ᤶᤔᤏᤠᤀᤠᤱ ᤌᤰᤔᤏᤠᤒᤠ ᤏᤡᤱᤄᤴ ᤏᤠᤘᤠᤀᤡᤳᤗᤠᤜᤠ᤹ ᤁᤧᤈᤥᤃᤢᤛᤡᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤀᤣ᤺ᤰᤌᤠ᤺ᤰᤔᤧᤴ ᤁᤧᤜᤡᤛᤢᤀᤠᤱ ᤘᤠ᤹॥ 10 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤠᤖᤥᤒᤔᤖᤧ ᤁᤢᤜᤡᤶᤛᤕᤱᤅᤥ ᤔᤧᤰᤔᤠᤛᤡᤔᤧᤴ ᤂᤠ ᤋᤠᤖᤢᤱ᤹॥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤀᤥ ᤁᤧᤘᤠ᤹ᤒᤠ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤒᤠ ᤁᤧᤖᤧᤰ ᤕᤧᤶᤒᤡᤳᤇᤠ. ᤕᤥᤃ᤻ᤒᤠ ᤀᤡᤃᤪ ᤕᤥᤃ᤻ᤒᤠ ᤔᤣ᤺ᤶᤒᤠ ᤂᤰᤐᤧᤳ ᤕᤢᤔᤪᤧᤰ ᤔᤧᤰᤂᤢᤱᤛᤡᤱ᤹॥ ᤂᤧᤴ ᤘᤖᤧᤱᤗᤧᤱ ᤂᤰᤐᤧᤳ ᤔᤧᤶᤔᤧᤰᤁᤣ ᤌᤠᤖᤡᤰ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤅᤡᤴ ᤐᤡ᤹ᤜᤡ ᤜᤠ᤺ᤶᤔᤏᤠᤒᤠ ᤜᤧᤰᤁᤣ ᤀᤠᤱᤃᤠ᤹ ᤔᤡᤎᤡᤰᤂᤢᤱ᤹॥ 11 ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤅᤥᤒᤠ ᤕᤧᤰᤕᤰᤁᤥ ᤁᤧᤛᤡᤒᤠᤜᤠ᤹ᤃ ᤁᤥ᤺ᤳᤆᤥᤜᤠ᤹ᤖᤧ ᤔᤧᤈᤛᤡ᤹. ᤜᤧᤰᤁᤩᤠᤱ ᤋᤠᤶᤓᤢᤱᤅᤥ ᤁᤧᤛᤡᤒᤠᤜᤠ᤹ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ᤖᤧ ᤔᤧᤈᤛᤡ᤹ ᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ᥄’” 12 “ᤀᤜᤡᤕᤠᤜ᤺ᤸᤗᤧ ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤡᤴ ᤀᤠᤸᤗ ᤜᤡᤶᤔᤥ ᤏᤢ᤺ᤰᤂᤧᤀᤠᤱ ᤐᤣᤃᤧ᤹ ᤔᤧᤳᤋᤢ॥ ᤂᤧᤏᤧ᤹ ᤁᤧᤕᤧᤰᤕᤰᤁᤥ ᤗᤠᤱᤃᤧᤎᤠᤛᤢᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤛᤡᤖᤥ॥ 13 ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤗᤠᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤖᤡᤱ ᤔᤧᤎᤰᤁᤠᤱ ᤂᤧᤴ ᤔᤧᤗᤢᤵᤋᤢ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤥᤖᤰ ᤁᤢᤓᤠ ᤏᤢᤒᤠ ᤐᤠᤴ ᤂᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤅᤥ ᤂᤧᤴᤗᤰ ᤔᤧᤗᤢᤵᤋᤢ᤹॥ 14 “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤀᤥ ᤜᤠᤱᤎᤡᤰ ᤑᤥ᤺ᤰᤂᤢ᤹. ᤂᤧᤸᤗᤧ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤱᤅᤡᤴ ᤏᤠ᤹ᤖᤢ॥ ᤂᤧᤴ ᤀᤠᤀᤡᤴᤒᤠ ᤕᤧᤴᤏᤥᤛᤠ ᤐᤥᤱ᤹᥄ ᤀᤥᤖᤥ. ᤀᤠᤸᤗᤥᤀᤣ ᤐᤥᤱᤗᤥ॥ 15 ᤆᤫᤠ᤺ᤳᤋᤥ ᤑ᤺ᤱᤍᤢ᤺ᤴ ᤏᤠ ᤏᤢ ᤁᤳᤏᤠ ᤘᤠ᤺ᤴᤈᤥ ᤘᤠ᤺ᤴᤈᤥ ᤔᤢᤶᤒᤠ ᤁᤢᤛᤡᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤜᤡᤵᤋᤢ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤛᤡᤒᤠ ᤁᤴ ᤏᤢᤒᤠ ᤗᤠᤈᤣ᤹ᤗᤠᤶ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤛᤠ᤺ᤵᤐᤥᤏᤢᤀᤣ ᤜᤠ᤹ᤕᤠᤰ ᤀᤠ᤺ᤰᤂᤢᤍᤣᤛᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡ ᤑᤢᤳᤇᤡᤱᤈᤩᤠᤱ ᤛᤧᤛᤢᤍᤣᤛᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤛᤣᤖᤠ ᤏᤠᤘᤠᤀᤡᤳᤗᤠ ᤛᤡᤳᤗᤠᤱᤜᤠ᤹ ᤔᤧᤈᤥᤃᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛ᤻ᤛᤠᤰᤁᤧᤴ ᤔᤧᤓᤥ᤺ᤰᤂᤢ॥ 16 ᤜᤧᤰᤁᤩᤠᤱ ᤕᤠᤖᤥᤒᤠᤔᤖᤧ ᤆᤥᤃᤢᤒᤠ ᤏᤢ ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤐᤠᤱᤄᤢᤒᤠ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤏᤠ᤹ᤖᤢᤖᤥ॥” 17 ᤂᤧᤒᤩᤠᤱ ᤕᤠᤖᤥᤒᤠᤔᤖᤧ ᤁᤢᤔᤣ᤺ᤳᤋᤡᤴ ᤐᤥᤃᤧᤀᤠᤱ ᤋᤡᤷᤛᤠ ᤕᤧᤰᤕᤰᤁᤥ ᤐᤣ॥ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤗᤠᤶᤎᤠ᤺ᤳᤐᤢᤱᤅᤡᤴ ᤁᤠ᤺ᤰᤋᤢᤏᤢᤔᤧ᤺ᤴᤏᤣ ᤂᤧᤴ ᤀᤅᤧ᤺ᤰᤘᤠᤴ ᤁᤢᤛᤰᤔᤠ ᤐᤣ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤜᤡᤕᤠᤜᤴ ᤗᤠᤶᤒᤠ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤧᤴ ᤔᤧᤗᤢᤵᤋᤢ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤔᤧᤎᤰᤋᤧᤖᤥ॥ 19 ᤕᤠᤖᤥᤒᤠᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤌᤱ ᤆᤥᤃᤢᤒᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤰᤂᤣᤗ᤹ᤖᤡᤰ ᤕᤢᤰ ᤆᤥᤃᤢ. ᤂᤧᤴ ᤐᤠ᤺ᤴᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤥ ᤛᤠᤵᤋᤧᤀᤠᤱ ᤐᤳ॥ 20 ᤕᤠᤖᤥᤒᤠᤔᤖᤧ ᤏᤡᤒᤥᤱᤅᤠᤱ ᤏᤧᤴᤇᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ॥ ᤂᤶᤓᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤏᤠᤍᤠᤒᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤖᤜᤒᤠᤔ ( ᥈ ᤛᤠᤵᤔᤢ ᥇᥇:᥋–᥇᥈:᥇᥋ ) 21 ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤖᤜᤒᤠᤔᤖᤧ ᤕᤜᤢᤍᤠᤀᤥ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤗᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤁᤧᤖᤧᤸᤗᤧ ᤜᤠᤱ ᤐᤥ᤺ᤰᤂᤧ॥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤗᤠᤶ ᤂᤢᤏᤧ᤹ ᤁᤢᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤕᤧᤰᤕᤰ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤌᤡᤒᤥᤱᤅᤠᤱ ᤏᤢᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤏᤠᤔᤠ ᤘᤕᤧ॥ ᤂᤢᤏᤧ᤹ ᤗᤳᤇᤠ ᤀᤶᤔᤥᤏᤡ ᤘᤕᤧ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ. ᤜᤠᤒᤠ ᤂᤧᤴᤏᤣ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ᤏᤢ᤺ᤸᤗᤧ ᤕᤖᤡᤰ ᤗᤠᤕᤥ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤡᤰ ᤔᤧᤓᤥ᤺ᤰᤂᤢ॥ 23 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤧᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤥ᤺ᤰᤔᤠᤀᤥᤒᤠ ᤔᤠᤱᤎᤠ᤺ᤴᤜᤠ᤹. ᤛᤢᤳᤌᤥᤒᤠ ᤗᤢᤱᤜᤠ᤹ ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤁᤣ᤺ᤶᤒᤠ ᤌᤧᤃᤢ ᤌᤰᤔᤠ ᤏᤢ ᤜᤢᤶᤒᤧᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤌᤰᤔᤠ ᤔᤧᤕᤢᤰᤂᤢ॥ 24 ᤗᤠᤈᤣ᤹ᤀᤥᤒᤠ ᤔᤠᤱᤎᤠ᤺ᤴᤏᤥ ᤔᤧᤴᤇᤢᤔᤠᤖᤧ ᤔᤧᤓᤳᤇᤢᤛᤡᤒᤠ ᤑᤧᤳᤁᤧᤗᤠ᤹ᤒᤠ ᤕᤧᤶᤒᤡᤳᤇᤠᤜᤠ᤹ᤀᤠᤱ ᤔᤧᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ॥ 25 ᤖᤜᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ ᤔᤡᤛᤪᤒᤠ ᤜᤠᤱ ᤛᤡᤛᤁᤖᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤌᤱᤅᤥ ᤑᤳᤋᤢ॥ 26 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤥᤒᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤀᤡᤔᤧᤸᤗᤢᤱᤒᤠ ᤛᤠᤔᤠᤜᤠ᤹ ᤏᤠᤵᤋᤢᤍᤣ᤹ᤖᤢᤛᤡ॥ ᤂᤢᤏᤧ᤹ ᤛᤥᤗᤥᤔᤏᤖᤧ ᤆᤥᤃᤢᤒᤠ ᤛᤠᤶᤔᤩᤠᤱ ᤂᤥᤜᤠ᤹ᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤣ᤹ᤖᤢ॥ 27 ᤁᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤖᤜᤒᤠᤔ ᤜᤠᤱᤅᤡᤸᤗᤧ ᤁᤠᤛᤠ ᤂᤥᤜᤠ᤹ ᤌᤃᤢᤀᤠᤱ ᤜᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤁᤶᤒᤪᤠᤱ ᤔᤧᤵᤔᤠᤖᤧ ᤗᤠᤃᤡ ᤁᤶᤒᤪᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤗᤰᤐᤧᤴ ᤐᤡᤖᤢᤛᤡ॥ 28 ᤀᤠᤵᤑᤠᤸᤗᤧᤛᤠᤱ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠᤛᤧ ᤌᤰᤔᤠ. ᤂᤧᤴ ᤁᤶᤒᤪᤠᤱᤜᤠ᤹ᤖᤧ ᤂᤧᤴ ᤂᤥᤜᤠ᤹ ᤔᤧᤒᤰᤂᤢ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤁᤶᤒᤪᤠᤱ ᤕᤢᤰᤏᤠ ᤕᤠᤰᤑᤠᤱᤅᤥ ᤕᤠᤶᤔᤥ ᤔᤧᤕᤧᤵᤛᤢ॥ 29 ᤖᤜᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤥᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤶᤒᤡ᥅ 30 ᤖᤜᤒᤠᤔ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤆᤰᤔᤧᤸᤗ᤹ᤀᤣ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥ 31 ᤖᤜᤒᤠᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤗᤢᤵᤋᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤏᤠᤔᤠ ᤘᤕᤧ॥ ᤂᤢᤏᤧ᤹ ᤗᤳᤇᤠ ᤀᤶᤔᤥᤏᤡ ᤘᤕᤧ॥ ᤂᤧᤸᤗᤧ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤀᤒᤡᤕᤠᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.