᥇ ᤜᤠᤱ 13 - LIFOTNTᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤕᤠᤖᤥᤒᤠᤔᤧᤴ ᤆᤧ᤹ᤕᤠ ᤔᤧᤳᤋᤢ 1 ᤕᤠᤖᤥᤒᤠᤔᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤕᤧᤒᤧᤃᤖᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤎᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤌᤠᤰᤋᤢᤀᤠᤱ ᤕᤜᤢᤍᤠᤗᤠᤶ ᤒᤣᤌᤣᤗ ᤌᤠᤅᤧ॥ 2 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤗᤠᤶ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀ᤺ᤰᤋᤧᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤣ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤣ᥄ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤥ ᤕᤥᤛᤡᤕᤠᤜ ᤔᤡᤱ ᤁᤧᤘᤠ᤺ᤵᤐᤠᤎᤡᤰ ᤛᤠᤘᤠ᤺ᤴᤇᤡᤱ᤹॥ ᤂᤢᤏᤧ᤹ ᤁᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤥ᤺ᤰᤔᤠᤀᤥᤒᤠ ᤔᤠᤱᤎᤠ᤺ᤴᤜᤠ᤹ᤀᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤛᤶᤎᤠᤱ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡ᤹. ᤜᤧᤰᤁᤩᤠᤱ ᤁᤧᤛᤶᤎᤠᤱ ᤔᤏᤠ ᤕᤧᤳᤜᤠ᤹ ᤔᤡᤎᤡᤰᤂᤢ᤹॥’” 3 ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤀᤰᤋᤱᤒᤠ ᤔᤡᤰᤛᤣᤴ ᤐᤡᤖᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤒᤠ ᤔᤡᤰᤛᤣ᤺ᤴᤏᤧᤴ ᤜᤠᤒᤠ ᤁᤴᤗᤥ—‘ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤢᤗᤢᤶᤔᤥ ᤐᤰᤁᤪᤧ᤹ ᤐ᤺ᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤁᤧᤏᤧᤒᤠ ᤂᤠᤵᤐᤢ᤺ᤴ ᤗᤠ᤺ᤰᤁᤠᤳ ᤔᤧᤜᤢᤰᤂᤢ᤹॥’” 4 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤒᤣᤌᤣᤗᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤕᤠᤖᤥᤒᤠᤔ ᤜᤠᤱᤅᤡᤸᤗᤧ ᤂᤧᤵᤛᤢ. ᤂᤧᤒᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤂᤢᤏᤧ᤹ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤐᤠ᤺ᤳᤋᤢ. “ᤂᤧᤴ ᤔᤏᤠᤴ ᤋᤧᤶᤛᤧᤶᤔᤧᤶᤔᤧ᤹᥄” ᤁᤖ ᤂᤢᤏᤧ᤹ ᤗᤧᤵᤔᤠᤱ ᤛᤴᤇᤢᤒᤠ ᤕᤠᤖᤥᤒᤠᤔᤖᤧ ᤁᤢᤜᤢᤰᤁᤡᤴ ᤛᤷᤃᤧᤱ ᤜᤣᤖᤧ. ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤂᤢᤏᤧ᤹ ᤗᤧᤵᤔᤠᤱ ᤏᤢ᤺ᤰᤔᤠ ᤔᤧᤛᤢᤰᤋᤢᤴ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤔᤡᤰᤛᤣᤴ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤠᤱ ᤁᤢᤗᤢᤶᤔᤥ ᤐᤰᤁᤪᤧ᤹ ᤜᤧᤖᤧᤀᤠᤱ ᤗᤢ᤺ᤴᤍᤧ ᤜᤧᤰᤁᤩᤠᤱ ᤂᤠᤵᤐᤢ᤺ᤴ ᤗᤠ᤺ᤰᤁᤠᤳ ᤘᤧᤳᤋᤧ॥ 6 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤋᤃᤡ ᤁᤢᤀᤡᤛᤡ᤺ᤰᤛᤡ᤺ᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤠᤱ ᤐᤡᤖᤠᤱᤅᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤜᤢᤰᤁᤡᤴ ᤋᤃᤡ ᤜᤧᤰᤁᤣᤀᤣ ᤁᤢᤀᤡᤛᤡ᤺ᤰᤛᤡ᤺ᤰ ᤐᤥ᤺ᤰᤂᤧ॥ 7 ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤜᤡᤶᤔᤥ ᤕᤧ᤹. ᤜᤧᤰᤁᤩᤠᤱ ᤁᤢᤓᤠ ᤁᤢᤈᤠ ᤆᤩᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤁᤢᤓᤠ ᤌᤥ᤺ᤰᤗᤠ ᤐᤧ᤺ᤴᤍᤡ ᤐᤡᤏᤧᤖᤥ॥” 8 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤜᤠᤱᤅᤡᤴ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣ᤺ᤴ ᤀᤠᤱᤃᤠ᤹ ᤁᤢᤓᤪᤧ᤺ᤱ ᤁᤧᤒᤡᤀᤠᤛᤠᤱ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤔᤧᤒᤣ᤺ᤰᤁᤠᤴ. ᤀᤠᤱᤃᤠ᤹ ᤁᤵᤔᤥ ᤂᤖᤧ᤺ᤱᤅᤠᤱ ᤔᤧᤈᤠᤀᤠᤴ ᤜᤧᤰᤁᤩᤠᤱ ᤆᤫᤠ᤺ᤳᤋᤠᤱ ᤔᤧᤎᤢᤱᤅᤠᤴ॥ 9 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤀᤠᤱᤃᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤠᤱᤅᤠᤱ ᤘᤠ᤹. ‘ᤂᤧᤏᤧ᤹ ᤂᤧᤵᤔᤥ ᤂᤖᤧ᤺ᤱ ᤔᤧᤴᤈᤠᤀᤧ᤹ ᤀᤡᤃᤪ ᤆᤫᤠ᤺ᤳ ᤔᤧᤎᤢᤅᤧᤴᤏᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤠᤅᤧᤒᤠ ᤗᤠᤶ ᤔᤧᤏᤢ᤺ᤰᤂᤧᤴ ᤔᤧᤒᤣᤃᤧᤴᤏᤧ᤹॥’” 10 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤌᤡᤰᤏᤠᤜᤠᤱ ᤗᤠᤶᤒᤠ ᤐᤥ᤺ᤰᤂᤧᤀᤠᤱ ᤐᤣ. ᤜᤧᤰᤁᤩᤠᤱ ᤒᤣᤌᤣᤗ ᤌᤠᤅᤧᤒᤠ ᤗᤠᤶ ᤗᤠᤶᤒᤠ ᤔᤧᤏᤢ᤺ᤰᤂᤧᤴ ᤔᤧᤒᤣᤏᤧᤴᤗᤥ॥ ᤒᤣᤌᤣᤗᤒᤠ ᤋᤢᤶᤓᤠᤰᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ 11 ᤂᤧᤴ ᤕᤧᤶᤔᤥ ᤒᤣᤌᤣᤗᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤋᤢᤶᤓᤠᤰᤛᤠ ᤌᤡᤰ ᤘᤕᤧ॥ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤧᤍᤩᤧᤀᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤒᤣᤌᤣᤗᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤔᤧᤔᤧᤳᤋᤢ॥ ᤂᤧᤸᤗᤧ ᤜᤠᤱᤅᤡᤴ ᤔᤧᤳᤋᤢᤒᤠ ᤐᤠ᤺ᤴᤏᤡᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠᤴ ᤔᤧᤈᤧᤰᤋᤢ॥ 12 ᤂᤢᤴᤇᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤂᤢᤏᤧ᤹ ᤀᤠᤳᤋᤥᤗᤠᤶ ᤌᤠᤛᤡᤱ᥅” ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤕᤜᤢᤍᤠᤗᤠᤶ ᤁᤧᤎᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤐᤣᤒᤠ ᤗᤠᤶᤔᤡᤴ ᤀᤥ᤺ᤴᤔᤧᤎᤠᤰᤋᤢ॥ 13 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤗᤠᤃᤡ ᤀᤍᤱᤅᤥ ᤁᤖᤣᤗᤡ ᤏᤢ ᤕᤢᤰᤏᤠᤜᤠ᤹ ᤀᤠᤄᤣ᤺ᤰᤂᤧ ᤀᤠᤒᤡᤖᤧ᤹॥” ᤀᤠᤸᤗ ᤂᤧᤱᤜᤠ᤹ᤖᤧ ᤀᤍᤱᤅᤥ ᤁᤖᤣᤗᤡ ᤏᤢ ᤕᤢᤰᤏᤠᤜᤠ᤹ ᤔᤧᤄᤣ᤺ᤰᤂᤢ ᤔᤧᤒᤡᤖᤢ. ᤂᤧᤒᤩᤠᤱ ᤂᤢᤏᤧ᤹ ᤂᤧᤵᤔᤥ ᤕᤢᤱᤛᤡᤱ॥ 14 ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤁᤢᤔᤏᤠᤴ ᤕᤥ᤺ᤰᤌᤰᤛᤧ ᤐᤣ॥ ᤂᤧᤴ ᤗᤳᤇᤠ ᤕᤜᤡᤒᤠ ᤛᤡᤱᤒᤢᤱ ᤛᤡᤃᤠᤱ ᤕᤢᤅᤧᤃᤖᤧᤒᤠ ᤂᤢᤏᤧ᤹ ᤋᤢᤔᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤕᤜᤢᤍᤠᤗᤠᤶ ᤁᤧᤎᤠᤱᤒᤠᤴ ᤂᤧᤏᤧ᤹ᤀᤣᤏᤧᤒᤡ᥅” ᤂᤧᤸᤗᤧ ᤔᤧᤳᤋᤢ. “ᤀᤥᤖᤥ. ᤀᤠᤱᤃᤠ᤹ᤀᤣᤀᤠᤖᤥ॥” 15 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤑᤧᤖᤧ᤹ᤀᤠᤱ ᤁᤢᤓᤠ ᤁᤢᤈᤠᤈᤡ ᤆᤩᤧ᤹ ᤌᤢᤅᤧ᤹॥” 16 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ᤏᤢ ᤏᤢ᤺ᤱᤔᤠ ᤐᤣ᤺ᤰᤔᤠ ᤔᤧᤛᤢᤰᤁᤠᤴ. ᤁᤴ ᤋᤧᤴᤏᤥ ᤂᤧᤏᤧ᤹ᤏᤢ ᤂᤖᤧ᤺ᤱᤅᤠᤱ ᤆᤠᤔᤠ ᤔᤧᤛᤢᤰᤁᤠᤴ. ᤜᤧᤰᤁᤩᤠᤱ ᤆᤫᤠ᤺ᤳᤋᤠᤱ ᤌᤢᤱᤔᤠ ᤔᤧᤛᤢᤰᤁᤠᤴ॥ 17 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹. ‘ᤂᤧᤏᤧ᤹ ᤂᤧᤵᤔᤥ ᤂᤖᤧ᤺ᤱ ᤔᤧᤈᤧᤴᤏᤧ᤹ ᤀᤡᤃᤪ ᤆᤫᤠ᤺ᤳᤋᤠᤱ ᤔᤧᤎᤢᤅᤧᤴᤏᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤠᤅᤧᤒᤠ ᤗᤠᤶᤔᤥ ᤔᤧᤏᤢ᤺ᤰᤂᤧᤴᤏᤧ᤹॥’” 18 ᤂᤧᤴ ᤁᤠᤵᤐᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ᤀᤠᤱ ᤂᤧᤏᤧ᤹ ᤜᤧᤰᤁᤣᤀᤣ ᤗᤳᤇᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤀᤠ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤗᤠᤶ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤛᤥᤖᤡᤰ ᤆᤠᤛᤧ ᤌᤢᤱᤛᤧ ᤀᤠᤜᤡᤶᤔᤥ ᤋᤠ᤺ᤵᤔᤠᤖᤧ ᤗᤠᤃᤡ ᤔᤠᤱᤗᤠᤀᤡᤱᤒᤠ ᤌᤡᤰᤗᤧ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹॥” (ᤁᤖ ᤂᤧᤴ ᤁᤠᤵᤐᤥᤒᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢᤒᤠ ᤁᤴ ᤐᤠ᤺ᤴᤏᤡᤴ ᤀᤡᤱᤗᤧᤰ ᤘᤕᤧ॥) 19 ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤁᤢᤔᤏᤠᤴ ᤏᤢ᤺ᤰᤂᤧᤀᤠᤱ ᤂᤧᤴᤏᤢ ᤛᤥᤖᤡᤰ ᤐᤣ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤡᤶᤔᤥ ᤁᤢᤈᤠ ᤆ ᤌᤢᤅᤢ॥ 20 ᤀᤠᤸᤗ ᤂᤢᤴᤇᤡ᤹ ᤆᤠᤈᤠᤔᤠ ᤆᤵᤋᤧᤴᤏᤥ ᤁᤢᤈᤠ ᤆᤠᤏᤢ ᤌᤢᤱᤏᤢ ᤕᤢᤅᤧᤛᤡᤸᤗᤧ ᤂᤢᤏᤧ᤹ ᤁᤧᤏᤢ᤺ᤰᤐᤠ ᤁᤧᤍᤣ᤹ᤒᤠ ᤂᤧᤴ ᤁᤠᤵᤐᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤖᤧ॥ 21 ᤂᤢᤏᤧ᤹ ᤕᤜᤢᤍᤠᤗᤠᤶ ᤁᤧᤎᤠᤱᤒᤠ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤑᤧ᤺ᤰᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤂᤧᤏᤧ᤹ ᤀᤠᤵᤑᤣᤰ ᤁᤧᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤒᤡᤖᤧᤒᤠ ᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤏᤣ ᤁᤧᤘᤠ᤹॥ 22 ᤂᤢᤏᤧ᤹ ᤂᤧᤏᤧ᤹ ᤋᤠᤔᤠ ᤁᤧᤶᤓᤠ᤺ᤰᤋᤧᤶᤒᤠ ᤋᤧᤴᤏᤥ ᤂᤖᤧ᤺ᤱ ᤆᤠᤛᤧ ᤏᤢ ᤆᤫᤠ᤺ᤳ ᤌᤢᤱᤛᤧ ᤁᤧᤏᤢ᤺ᤰᤂᤧ ᤁᤧᤍᤩᤧᤀᤠᤱ ᤁᤧᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤈᤣ ᤌᤰᤁᤡᤴ ᤂᤧᤏᤧ᤹ ᤁᤧᤎᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥ ᤔᤧᤴᤈᤡᤰᤂᤢᤴ᤹॥’” 23 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤁᤢᤔᤏᤠ᤺ᤸᤗᤧ ᤁᤢᤈᤠ ᤆ ᤌᤢᤅᤢᤛᤢᤖᤢ. ᤂᤧᤒᤩᤠᤱ ᤁᤧᤗᤧᤶᤒᤠᤀᤠᤱ ᤁᤧᤍᤠ᤺ᤵᤐᤠ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤁᤢᤀᤍᤱᤅᤥ ᤁᤖᤣ᤺ᤸᤗᤡ ᤋᤠᤰᤂᤥ᤺ᤱ ᤕᤢᤰᤏᤠᤜᤠ᤹ ᤂᤣ᤺ᤰᤂᤢ ᤐᤡᤖᤢ॥ 24 ᤀᤠᤸᤗ ᤂᤢᤏᤧ᤹ ᤐᤣᤖ ᤐᤳᤇᤧᤸᤗᤧ ᤂᤡᤖᤡᤱᤒᤠ ᤌᤡᤰᤗᤧ ᤗᤠᤶᤔᤥ ᤋᤢᤔᤢᤀᤠᤱ ᤂᤢᤏᤧ᤹ ᤛᤧᤖᤢ. ᤂᤶᤓᤩᤠᤱ ᤂᤢᤏᤧ᤹ ᤁᤢᤈᤣ ᤌᤰᤁᤡᤴ ᤗᤠᤶᤔᤥ ᤜᤠᤒᤠ ᤏᤧᤛ᤻ᤛᤧᤃᤖᤧ॥ ᤀᤍᤱᤅᤡᤴ ᤏᤢ ᤌᤧᤖᤡᤱᤒᤧᤴ ᤏᤧᤵᤔᤠᤱ ᤁᤢᤒᤣᤛᤠᤱ ᤕᤧᤒᤧᤃᤖᤧᤛᤡ॥ 25 ᤜᤠᤒᤠ ᤂᤧᤴ ᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤂᤧᤴ ᤆᤣ᤺ᤴ ᤗᤠᤶᤔᤥᤀᤣ ᤗᤠᤵᤐᤢᤱ ᤐᤣᤀᤠᤱ ᤏᤧᤛ᤻ᤛᤧᤒᤠ ᤏᤢ ᤂᤧᤴ ᤌᤧᤖᤡᤱᤒᤧᤴ ᤆᤣ᤺ᤸᤗᤧᤀᤣ ᤁᤢᤒᤣᤛᤠᤱ ᤕᤧᤒᤧᤃᤖᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤔᤧᤒᤣᤀᤠᤱ ᤂᤧᤴ ᤁᤠᤵᤐᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤢᤅᤧᤒᤠ ᤒᤣᤌᤣᤗ ᤕᤧᤰᤕᤰᤁᤥ ᤂᤧᤴ ᤀᤡᤱᤄᤱᤅᤡᤴ ᤔᤧᤔᤧᤳᤋᤢᤛᤡ॥ 26 ᤀᤠᤸᤗ ᤂᤢᤏᤧ᤹ ᤗᤠᤶᤍᤡ᤺ᤰᤁᤥᤗᤠᤶ ᤁᤧᤏᤢ᤺ᤰᤐᤠ ᤁᤧᤓᤧᤵᤐᤠ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤂᤧᤵᤔᤠ ᤔᤧᤴᤍᤧᤶᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤂᤧᤴ ᤁᤢᤔᤏᤠ᤺ᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤌᤧᤖᤡᤱᤒᤧᤴ ᤐᤡᤖᤢᤖᤧᤳᤇ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤛᤠᤶᤍᤡᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤧᤴ ᤌᤧᤖᤡᤱᤒᤧᤸᤗᤧ ᤂᤢᤏᤧ᤹ ᤑᤢᤕᤢᤀᤠᤱ ᤛᤧᤖᤢᤖᤧᤳᤇ॥” 27 ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤛ᤻ᤛᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤗᤠᤃᤡ ᤀᤍᤱᤅᤥ ᤁᤖᤣ᤺ᤸᤗᤡ ᤋᤠᤰᤂᤥ᤺ᤱ ᤕᤢᤰᤏᤠᤜᤠ᤹ ᤂᤣ᤺ᤰᤂᤧ ᤀᤠᤒᤡᤖᤧ᤹॥” ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤄᤣ᤺ᤰᤂᤢ ᤔᤧᤒᤡᤖᤢ॥ 28 ᤜᤧᤰᤁᤩᤠᤱ ᤂᤢᤏᤧ᤹ ᤐᤣᤀᤠᤱ ᤂᤧᤴ ᤆᤣ᤺ᤴ ᤗᤠᤶᤔᤥᤀᤣ ᤏᤧᤛ᤻ᤛᤧᤃᤖᤧᤒᤠ ᤜᤧᤰᤁᤩᤠᤱ ᤀᤍᤱᤅᤡᤴ ᤏᤢ ᤌᤧᤖᤡᤱᤒᤧᤴ ᤁᤢᤒᤣᤛᤠᤱᤅᤣ ᤕᤧᤒᤧᤃᤖᤧᤛᤡᤒᤠ ᤏᤡᤛᤢᤛᤡ॥ ᤂᤧᤴ ᤌᤧᤖᤡᤱᤒᤧᤸᤗᤧ ᤂᤠᤴ ᤆᤣ᤺ᤴ ᤔᤧᤴᤈᤠᤀᤣ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤀᤍᤱᤅᤡᤴᤏᤠᤱ ᤔᤧᤶᤓᤢ ᤔᤧᤱᤄᤠ᤺ᤴᤏᤣ ᤕᤧᤒᤧ॥ 29 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤈᤣᤴ ᤐᤰᤂᤢᤀᤠᤱ ᤀᤍᤱ ᤛᤶᤎᤠᤱ ᤏᤧᤛ᤻ᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤌᤰᤛᤧ ᤏᤢ ᤗᤢᤵᤔᤠᤖᤧ ᤗᤠᤃᤡ ᤁᤠᤵᤐᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤀᤠᤵᤑᤣᤰ ᤁᤢᤕᤧᤰᤕᤰᤁᤥ ᤋᤠᤖᤢ॥ 30 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤆᤣ᤺ᤴ ᤀᤠᤒᤠᤅᤣ ᤜᤡᤶᤛᤕᤱᤒᤠ ᤀᤡᤐᤢᤱᤅᤥ ᤏᤧᤛ᤻ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤗ᤹ᤖᤧᤀᤠᤱ ᤔᤧᤖᤡᤱ ᤔᤧᤎᤰᤋᤧ. “ᤀᤠᤕᤠᤰᤁᤥ ᤀᤣ. ᤀᤠᤏᤡᤃᤣ ᤏᤢᤛ᤻ᤛᤠ᤹ᤀᤣ᥄” 31 ᤂᤢᤏᤧ᤹ ᤔᤧᤈᤡᤰᤂᤢ ᤔᤧᤛᤢᤖᤢᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤛ᤻ᤛᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤛᤡᤀᤠᤕᤠᤱ ᤀᤠᤱᤃᤠ᤹ᤀᤠᤱ ᤜᤠᤒᤠ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤏᤧᤔᤏᤠᤒᤠ ᤀᤡᤐᤢᤱᤅᤥ ᤀᤠᤈᤡᤰᤂᤧ᤹ᤀᤥ॥ ᤀᤠᤱᤃᤠ᤹ ᤀᤠᤕᤧᤳᤜᤠ᤹ ᤂᤢᤏᤧ᤹ᤀᤣ ᤁᤢᤕᤠᤀᤥ ᤏᤧᤖᤖᤥ॥ 32 ᤌᤣᤀᤠᤱᤓᤧᤸᤗᤧ ᤒᤣᤌᤣᤗᤀᤥ ᤁᤧᤏᤧᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤢ ᤛᤠᤔᤖᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤆᤴᤈᤶᤒᤠᤍᤧᤴᤏᤥᤒᤠ ᤔᤠᤱᤎᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤗᤠᤶ ᤂᤢᤏᤧ᤹ ᤀᤢᤘᤠ ᤆᤥᤃᤢᤒᤠ ᤀᤡᤱᤄᤱᤅᤡᤴ ᤛᤧᤰᤂᤠᤀᤣ ᤁᤧᤳᤗᤥ॥” ᤕᤠᤖᤥᤒᤠᤔᤖᤧ ᤁᤢᤗᤠᤕᤥ 33 ᤂᤧᤴ ᤀᤣᤃᤠᤱᤅᤠᤱ ᤕᤠᤖᤥᤒᤠᤔᤖᤧ ᤂᤢᤏᤧ᤹ ᤋᤠᤵᤑᤧ᤺ᤶᤒᤠ ᤁᤢᤕᤧᤵᤗᤧᤰᤜᤠ᤹ ᤔᤧᤗᤧᤖᤢᤴ. ᤁᤖ ᤁᤥ᤺ᤰᤔᤠᤜᤠ᤹ᤀᤥ ᤁᤧᤏᤧᤒᤠ ᤆᤴᤈᤶᤒᤠᤍᤧᤴᤏᤥᤒᤠ ᤔᤠᤱᤎᤠ᤺ᤴᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤁᤧᤖᤧᤰ ᤛᤢᤘᤠᤱᤒᤠ ᤔᤏᤠᤜᤠ᤹ᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤀᤠᤳᤋᤡᤴ ᤔᤏᤠ᤺ᤴᤇᤠᤱ ᤂᤢᤏᤧ᤹ ᤁᤥ᤺ᤰᤔᤠᤀᤥᤒᤠ ᤔᤠᤱᤎᤠ᤺ᤴᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤆᤥᤃᤢ॥ 34 ᤕᤠᤖᤥᤒᤔᤖᤧ ᤁᤢᤜᤡᤶᤛᤕᤱᤅᤥᤒᤠ ᤗᤠᤕᤥᤴ ᤜᤠᤒᤠ ᤁᤴᤏᤣ ᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤌᤥ ᤔᤧᤒᤥᤃᤧᤴ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤢᤏᤧ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.