᥇ ᤜᤠᤱ 12 - LIFOTNTᤌᤠᤱᤃᤧᤳ ᤋᤧᤱᤃᤵᤐᤥᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤐᤡᤑᤩᤢᤱ 1 ᤖᤜᤒᤠᤔᤧᤴ ᤛᤁᤣᤔ ᤐᤣ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤵᤔᤥ ᤔᤧᤒᤣᤀᤠᤱ ᤔᤧᤘᤕᤧ॥ 2 ᤀᤠᤸᤗ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ (ᤂᤢᤏᤧ᤹ ᤀᤠᤸᤗᤥ ᤌᤠᤖᤡᤰ ᤔᤡᤛᤪ ᤗᤠᤈᤣ᤹ᤀᤥᤀᤣ ᤘᤕᤧ. ᤂᤢᤏᤧ᤹ ᤂᤧᤵᤔᤥ ᤛᤥᤗᤥᤔᤏ ᤜᤠᤱᤅᤡᤴ ᤗᤠᤶᤒᤠ ᤂᤧᤳᤇᤡᤱ ᤐᤣᤀᤠᤱ ᤘᤕᤧ). ᤂᤧᤒᤩᤠᤱ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤏᤢ᤺ᤰᤂᤧ ᤌᤠᤅᤧ॥ 3 ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤕᤠᤖᤥᤒᤠᤔᤧᤴ ᤀᤢ᤺ᤵᤔᤠᤖᤧ ᤗᤠᤃᤡ ᤔᤏᤠ ᤔᤧᤒᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤖᤜᤒᤠᤔᤖᤥ ᤔᤧᤒᤣᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. 4 “ᤂᤧᤏᤧ᤹ ᤁᤧᤶᤒᤠᤖᤧ ᤀᤠᤏᤡᤃᤣ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤁᤢ᤺ᤳᤋᤡᤃᤧᤀᤠᤱ ᤘᤕᤧ. ᤁᤖ ᤀᤠᤸᤗ ᤂᤢᤏᤧ᤹ ᤀᤠᤏᤡᤃᤣ ᤁᤢ᤺ᤳᤋᤡᤃᤧᤒᤠ ᤁᤴ ᤁᤧᤛᤠᤰᤐᤠ ᤛᤩᤠᤱᤔᤧᤴᤍᤠᤱᤒᤠ ᤕᤠ᤺ᤶᤒᤰᤁᤡᤴ ᤏᤢ ᤁᤧᤗᤡ᤺ᤵᤐᤠ ᤁᤰᤁᤡᤴ ᤂᤧᤏᤧ᤹ ᤕᤠᤱᤕᤠᤱᤒᤠ ᤆᤥᤃᤧ ᤀᤠᤒᤡᤖᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤏᤧ᤹ ᤁᤧᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥” 5 ᤖᤜᤒᤠᤔᤖᤧ ᤏᤥᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤛᤢᤶᤕᤠᤴ ᤌᤧᤶᤔᤠ ᤕᤧᤶ ᤀᤠᤒᤡᤖᤧᤶᤔᤧ᤹. ᤜᤧᤰᤁᤩᤠᤱ ᤕᤠᤶᤔᤥ ᤋᤩᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤔᤧᤒᤣ ᤔᤧᤄᤧᤖᤧ॥ 6 ᤂᤧᤒᤩᤠᤱ ᤖᤜᤒᤠᤔ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤶᤒᤠ ᤜᤡᤅᤧᤀᤠᤱ ᤘᤕᤧᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤠᤶᤗᤥᤒᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥ ᤂᤢᤏᤧ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤰᤋᤱᤒᤠ ᤏᤢᤃᤵ ᤐᤡᤖᤢᤱᤛᤡᤱᤒᤠᤒᤣ᥅” 7 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤀᤡᤴ ᤀᤠᤍᤠᤱᤒᤠ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤧᤘᤠᤖᤥᤒᤠ ᤁᤧᤒᤥᤱᤅᤠᤱ ᤂᤧᤱᤜᤠ᤹ ᤕᤠ᤺ᤶᤒᤰ ᤁᤧᤈᤥᤃᤢ ᤁᤧᤒᤡᤖᤢᤛᤡ᤹ ᤜᤧᤰᤁᤩᤠᤱ ᤀᤠᤸᤗᤥ ᤂᤧᤱᤜᤠ᤹ᤖᤧ ᤔᤧᤃᤥ᤺ᤳᤋᤢᤒᤠ ᤏᤥᤃᤵᤐᤡᤴ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤁᤧᤔᤧᤳᤋᤢᤛᤡᤏᤧᤓᤃᤪ. ᤂᤧᤱᤜᤠ᤹ ᤀᤠᤵᤑᤠᤸᤗᤧᤛᤠᤱ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤔᤧᤒᤥᤱ᤹॥” 8 ᤁᤖ ᤂᤧᤴ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤡᤖᤢᤒᤠ ᤛᤢᤈᤠᤴ ᤂᤢᤏᤧ᤹ ᤂᤧᤶᤔᤠ ᤔᤧᤍᤧᤴᤍᤧᤴ. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ ᤁᤢᤒᤧᤖᤧ ᤁᤢᤍᤠᤱᤗᤠᤜᤠ᤹ ᤏᤢ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢ॥ 9 ᤂᤢᤏᤧ᤹ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤛᤢᤈᤠᤐᤠᤴ ᤌᤧᤔᤠ ᤘᤠ᤹ᤃ᥅ ᤁᤴ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤰᤂᤣ ᤔᤧᤔᤧᤳᤋᤠᤱᤅᤠᤱ ᤘᤠ᤹. ‘ᤂᤧᤏᤧ᤹ ᤁᤧᤶᤒᤠᤖᤧ ᤀᤠᤏᤡᤃᤣ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤁᤢ᤺ᤳᤋᤡᤃᤧᤀᤠᤱ ᤘᤠ᤹ ᤂᤧᤴ ᤕᤠᤱᤕᤠᤱᤒᤠ ᤆᤥᤃᤧ ᤀᤠᤒᤡᤖᤧ᤹ᤀᤥ’ ᤀᤠᤱᤃᤠ᤹ ᤁᤴᤜᤠ᤹ ᤀᤠᤰᤋᤱᤒᤠ ᤏᤢᤃᤵ ᤐᤡᤖᤢᤱᤒᤠᤒᤣ᥅” 10 ᤂᤢᤏᤧ᤹ ᤁᤢᤒᤧᤖᤧ ᤁᤢᤍᤠᤱᤗᤠ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤳᤋᤡᤴ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤀᤰᤂᤣ ᤁᤧᤶᤔᤧᤳᤋᤧᤀᤠᤱ ᤘᤠ᤹. ‘ᤀᤠᤍᤠᤱᤒᤠᤖᤧ ᤁᤧᤶᤒᤠᤖᤧ ᤀᤠᤏᤡᤃᤣ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤁᤢ᤺ᤳᤋᤡᤃᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤴ ᤕᤠᤱᤕᤠᤱᤒᤠ ᤆᤥᤃᤧ ᤀᤠᤒᤡᤖᤧ᤹॥’ ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤀᤠᤜᤢᤰᤆᤥ᤺ᤰ ᤑᤥ᤺ᤰᤘᤠᤔᤧᤴ ᤀᤠᤶᤒᤠᤖᤧ ᤁᤢᤃᤧᤱᤅᤡᤴᤏᤢ᤺ᤸᤗᤧ ᤕᤶᤒᤠ ᤆᤥᤰ॥ 11 ᤀᤠᤱᤃᤠ᤹ ᤀᤠᤶᤒᤠᤖᤧ ᤂᤡᤏᤡ᤹ ᤁᤧᤗᤡ᤺ᤵᤐᤠ ᤁᤰ ᤁᤧᤃᤢ᤺ᤳᤋᤡᤀᤠᤱ ᤘᤕᤧ॥ ᤀᤠᤱᤃᤠ᤹ ᤂᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤀᤠᤶᤒᤠᤖᤧ ᤋᤡ ᤋᤰᤁᤠ᤺ᤳᤋᤡᤸᤗᤧ ᤂᤡᤏᤡ᤹ ᤁᤧᤶᤜᤡᤵᤋᤡᤖ ᤁᤧᤕᤠ᤺ᤴᤍᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤋᤠᤱᤛᤠᤱ ᤂᤧᤒᤰᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤡᤰᤋᤡᤖ ᤕᤠ᤺ᤴᤏᤡᤱ᤹॥’” 12 ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤛᤢᤶᤕᤠᤴ ᤀᤣᤃᤠᤱ ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤶ ᤋᤩᤧᤶᤔᤧ᤹॥” ᤂᤧᤴ ᤁᤢᤀᤡᤛᤡᤰ ᤕᤠᤖᤥᤒᤠᤔᤧᤴ ᤏᤢ ᤁᤧᤖᤧᤰ ᤔᤏᤠᤜᤠ᤹ ᤖᤜᤒᤠᤔᤖᤧᤀᤥ ᤔᤧᤏᤢ᤺ᤰᤂᤧ ᤔᤧᤍᤩᤧ॥ 13 ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤀᤠᤱ ᤏᤢᤃᤵ ᤐᤡᤖᤢᤛᤡ॥ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤛᤢᤈᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤂᤧᤶᤔᤠ ᤔᤧᤍᤧᤴᤍᤧᤴᤗ 14 ᤂᤧᤴ ᤌᤠᤱᤒᤧᤴᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤛᤢᤈᤠᤴ ᤂᤧᤵᤛᤢᤀᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤶᤒᤠᤖᤧᤃ ᤂᤡᤏᤡ᤹ ᤁᤰᤁᤡᤴ ᤁᤧᤗᤡ᤺ᤵᤐᤠ ᤆᤥᤃᤢ ᤁᤧᤒᤡᤖᤡᤀᤠᤱ ᤘᤕᤧ॥ ᤀᤠᤱᤃᤠ᤹ ᤂᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤀᤠᤶᤒᤠᤖᤧ ᤋᤡ ᤋᤰᤁᤠ᤺ᤳᤋᤡᤸᤗᤧ ᤂᤡᤏᤡ᤹ ᤁᤧᤜᤡᤵᤋᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤋᤠᤱᤛᤠᤱ ᤂᤧᤒᤰᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤡᤰᤋᤡᤖ ᤕᤠ᤺ᤴᤏᤡᤱ᤹॥” 15 ᤁᤶᤓᤗ᤹ᤖᤡᤰ ᤜᤠᤱᤅᤡᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ. ᤌᤣᤀᤠᤱᤓᤧᤸᤗᤧ ᤛᤡᤗᤥᤒᤠ ᤀᤜᤡᤕᤠᤜᤗᤠᤶ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤈᤠ᤺ᤰᤁᤡᤴ ᤁᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤰᤋᤱᤒᤠ ᤕᤠᤰᤏᤠᤶ ᤐᤥ᤺ᤰᤂᤧᤖ ᤆᤥᤃᤢᤀᤠᤱ ᤘᤕᤧ॥ 16 ᤀᤠᤸᤗ ᤜᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤶᤒᤠᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢᤖᤥ— “ᤍᤠᤀᤢᤍᤗᤠᤶ ᤀᤠᤏᤡᤃᤣ ᤗᤰᤂᤥᤔᤥ ᤌᤧᤔᤠ ᤘᤠ᤹ᤀᤠᤱᤒᤣ᥅ ᤕᤡᤛᤤᤖᤧ ᤁᤢᤛ᤻ᤛᤠᤀᤥ ᤀᤠᤏᤡ᤹ ᤂᤥᤔᤠ ᤗᤰ ᤌᤣ ᤘᤠ᤹ᤀᤠᤱᤒᤣ᥅ ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥ ᤐᤣᤃᤧᤶᤔᤧ᤹ᤀᤥ. ᤍᤠᤀᤢᤍᤀᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤶᤔᤡᤴ ᤀᤥᤔᤧᤳᤋᤧ᤹ᤀᤥ᥄” ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤔᤧᤒᤣ. 17 ᤁᤖ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤖᤜᤒᤠᤔᤖᤧ ᤀᤠᤸᤗᤛᤠᤱ ᤕᤢᤰ ᤆᤥᤃᤢ॥ 18 ᤖᤜᤒᤠᤔ ᤜᤠᤱᤅᤡᤸᤗᤧ ᤏᤠᤶᤕᤠᤰ ᤔᤣ᤺ᤴᤏᤣ ᤕᤠ᤺ᤶᤒᤰ ᤆᤥ᤺ᤰᤔᤥ ᤔᤧᤓᤳᤇᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤛᤠᤒᤠ ᤀᤍᤥᤏᤡᤖᤠᤔᤧᤴ ᤐᤠᤱᤄᤢ. ᤁᤖ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢ॥ ᤜᤧᤰᤁᤣᤛᤠᤱ ᤖᤜᤒᤠᤔ ᤜᤠᤱᤅᤡᤴᤃ ᤁᤢᤀᤴᤗᤠ᤺ᤴ ᤕᤢᤰᤔᤠᤀᤠᤱ ᤕᤖᤢᤛᤗᤧᤔ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤂᤥᤛᤧ॥ 19 ᤜᤧᤰᤁᤩᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗᤧᤴ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ 20 ᤀᤠᤸᤗ ᤕᤠᤖᤥᤒᤠᤔᤧᤴ ᤔᤡᤛᤪᤗᤠᤶ ᤏᤢ᤺ᤰᤂᤧ ᤑᤧᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡᤀᤠᤱ ᤂᤢᤏᤧ᤹ ᤆᤢᤶᤗᤢᤱᤅᤥ ᤔᤧᤀᤢ᤺ᤳᤋᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤂᤢᤏᤧ᤹ ᤜᤠᤱ ᤔᤧᤈᤥᤃᤢ॥ ᤕᤜᤢᤍᤠᤒᤠ ᤌᤠ᤺ᤰᤜᤠ᤹ᤖᤰ ᤍᤠᤀᤢᤍᤖᤧ ᤁᤢᤜᤡᤶᤛᤕᤱ ᤗᤧᤵᤔᤠᤱ ᤜᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤔᤧᤒᤥ᤺ᤰᤂᤧᤖ ᤔᤧᤘᤕᤧᤖᤥ॥ ᤛᤔᤠᤕᤠᤜᤖᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ( ᥈ ᤛᤠᤵᤔᤢ ᥇᥇:᥇-᥊ ) 21 ᤀᤠᤸᤗ ᤖᤜᤒᤠᤔᤧᤴ ᤕᤖᤢᤛᤗᤧᤔ ᤁᤧᤖᤧᤍᤩᤧ. ᤂᤧᤒᤩᤠᤱ ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤖᤜᤒᤠᤔᤖᤧ ᤁᤢᤗᤠᤃᤡ ᤜᤠᤱᤈᤢᤶᤔᤡᤴ ᤏᤢ᤺ᤰᤔᤠ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱ ᤆᤥ᤺ᤰᤛᤧ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤌᤠ᤺ᤰᤁᤥᤒᤠ ᥇.᥎᥆.᥆᥆᥆ ᤌᤰᤛᤢᤒᤠᤜᤠ᤹ ᤂᤢᤏᤧ᤹ ᤑᤢᤰᤂᤢᤛᤡ॥ 22 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤛᤔᤠᤕᤠᤜᤖᤧᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤖᤧ— 23 “ᤛᤥᤗᤥᤔᤏᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤖᤜᤒᤠᤔᤧᤴ ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏᤖᤧ ᤁᤧᤖᤧᤰ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤘᤣ᤹ ᤔᤏᤠᤜᤠ᤹ ᤂᤧᤏᤧ᤹ ᤔᤧᤳᤋᤧᤛᤧ᤹. 24 ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤀᤠᤵᤑᤣᤰ ᤑᤢ᤹ᤏᤢᤛᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤥ ᤔᤧᤎᤥ᤺ᤰᤁᤠᤛᤡᤶ ᤔᤧᤒᤣᤃᤧᤶᤔᤡᤴᤏᤧ᤹॥ ᤂᤡᤏᤡ᤹ ᤀᤠᤵᤑᤣᤰ ᤜᤡᤶᤜᤡᤶ ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ᤀᤣ ᤆᤥᤃᤢᤱᤅᤠᤱ ᤘᤠ᤹॥’” ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤀᤠᤵᤑᤣᤰ ᤂᤢᤴᤇᤡ᤹ ᤜᤡᤶᤜᤡᤶ ᤔᤧᤒᤣᤖᤥ॥ ᤕᤠᤖᤥᤒᤠᤔᤧᤴ ᤕᤜᤘᤣ ᤍᤠᤱᤒᤧᤴᤗᤠᤶ ᤔᤠ᤺ᤱᤄᤠ ᤐᤥᤱ᤹ 25 ᤂᤧᤴ ᤀᤣᤃᤠᤱ ᤕᤠᤖᤥᤒᤠᤔᤖᤧ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤁᤧᤏᤧᤒᤠ ᤛᤁᤣᤔ ᤕᤧᤰᤕᤰᤁᤡᤴ ᤜᤠᤱᤕᤰ ᤆᤥᤃᤢᤀᤠᤱ ᤁᤶᤒᤪᤠᤱ ᤔᤧᤳᤋᤢ. ᤜᤧᤰᤁᤩᤠᤱ ᤜᤠᤒᤠ ᤂᤧᤵᤔᤥᤀᤣ ᤂᤢᤏᤧ᤹ ᤕᤢᤅᤧ ᤘᤕᤧ॥ ᤂᤧᤵᤔᤥᤗᤠᤶ ᤂᤢᤏᤧ᤹ ᤐᤣᤀᤠᤱ ᤐᤏᤡᤀᤣᤗᤧᤴ ᤕᤧᤰᤕᤰ ᤆᤥᤃᤢ॥ 26 ᤕᤠᤖᤥᤒᤠᤔᤖᤧ ᤁᤢᤏᤡᤱᤘᤠ᤹ᤀᤥ ᤀᤰᤋᤱᤒᤠ ᤀᤡ᤺ᤳᤋᤢ. “ᤁᤴ ᤜᤠᤱᤈᤢᤶᤔᤡᤴ ᤍᤠᤀᤢᤍᤖᤧ ᤁᤢᤜᤡᤶᤛᤕᤱ ᤗᤧᤵᤔᤠᤱᤅᤣ ᤏᤢ᤺ᤱᤒᤣ᤺ᤰ ᤐᤡᤗᤠ॥ 27 ᤁᤴ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤕᤖᤢᤛᤗᤧᤔ ᤔᤧᤒᤣ᤺ᤰᤏᤧᤓᤃᤪ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤂᤢᤴᤇᤡ᤹ ᤍᤠᤱᤒᤠ ᤕᤜᤢᤍᤠᤒᤠ ᤜᤠᤱ ᤖᤜᤒᤠᤔᤧᤴ ᤗᤧᤵᤔᤠᤱ ᤜᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤐᤥᤱ᤹॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤛᤧᤳᤋᤠᤀᤠᤱ ᤖᤜᤒᤠᤔ ᤜᤠᤱᤅᤡᤴ ᤗᤧᤵᤔᤠᤱ ᤔᤧᤏᤢ᤺ᤱ ᤔᤧᤒᤣ᤺ᤰ॥” 28 ᤂᤶᤓᤩᤠᤱ ᤛᤢᤈᤠ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤕᤠᤖᤥᤒᤠᤔ ᤜᤠᤱᤅᤡᤸᤗᤧ ᤏᤧᤳᤇᤡ ᤛᤠᤶᤔᤩᤠᤱ ᤐᤡᤳᤛᤠᤳᤜᤠ᤹ ᤆᤥᤃᤢᤛᤡ॥ ᤂᤢᤏᤧ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤖᤢᤛᤗᤧᤔ ᤐᤣ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤁᤧᤍᤢᤔᤢᤶ᤹॥ ᤀᤡᤛᤪᤠᤀᤡᤗᤡᤛᤣ. ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤂᤡᤏᤡ᤹ ᤔᤠᤱᤜᤠ᤹ᤃ ᤁᤵᤔᤥᤏᤡ ᤔᤧᤘᤠ᤹ᤒᤠ॥” 29 ᤂᤢᤏᤧ᤹ ᤗᤳᤇᤠ ᤒᤣᤌᤣᤗᤀᤥ ᤕᤢᤰᤂᤢ ᤜᤧᤰᤁᤩᤠᤱ ᤘᤣ᤹ᤀᤡᤴ ᤍᤠᤏᤀᤥ ᤕᤢᤰᤂᤢ॥ 30 ᤜᤧᤰᤁᤩᤠᤱ ᤜᤠᤒᤠ ᤁᤴ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗᤀᤥ ᤗᤠᤕᤥ ᤐᤥ᤺ᤰᤂᤧ॥ ᤔᤏᤠᤜᤠ᤹ ᤒᤣᤌᤣᤗ ᤏᤢ ᤍᤠᤏ ᤌᤠᤖᤡᤰᤁᤣ ᤂᤧᤵᤔᤥ ᤁᤧᤕᤢᤱᤒᤠ ᤔᤠᤱᤅᤡᤴ ᤛᤧᤘᤠ ᤔᤧᤳᤇᤧ ᤔᤧᤒᤣᤀᤠᤱ ᤔᤧᤒᤳᤇᤧ॥ 31 ᤕᤠᤖᤥᤒᤠᤔᤖᤧ ᤆᤴᤈᤶᤒᤠ ᤆᤥ᤺ᤰᤔᤏᤠᤒᤠᤍᤧᤴᤏᤥ ᤛᤧᤘᤠ ᤆᤥ᤺ᤰᤔᤠ ᤔᤠᤱᤎᤠ᤺ᤴᤜᤠ᤹ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤧᤒᤡ ᤌᤠ᤺ᤰᤁᤥᤒᤠ ᤔᤧ᤺ᤴᤇᤡᤛᤠᤱ ᤁᤧᤖᤧᤰ ᤛᤢᤘᤠᤱᤒᤠ ᤔᤏᤠᤜᤠ᤹ᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡᤖᤥ॥ ᤒᤣᤌᤣᤗᤒᤠ ᤔᤠᤱᤎᤠ᤺ᤴᤜᤠ᤹ᤀᤥ ᤛᤠᤱᤃᤪᤠ ᤔᤠᤱᤍᤣ ᤌᤩᤧ 32 ᤜᤧᤰᤁᤩᤠᤱ ᤕᤠᤖᤥᤒᤠᤔᤖᤧ ᤕᤧᤳᤇᤡᤃᤣ᤺ᤰ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤕᤜᤢᤍᤠᤀᤥ ᤁᤧᤍᤠᤒᤠ ᤋᤱᤏᤠᤶ ᤜᤧᤰᤁᤣ ᤒᤣᤌᤣᤗᤀᤥ ᤗᤳᤇᤠ ᤋᤱᤏᤠᤶ ᤏᤡ᤺ᤴᤎᤥ ᤆᤥᤃᤢ. ᤂᤶᤓᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ ᤒᤣᤌᤣᤗᤀᤥ ᤂᤢᤏᤧ᤹ ᤆᤥᤃᤢᤛᤡᤒᤠ ᤐᤡᤳᤛᤠᤳᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤒᤣᤌᤣᤗᤀᤥ ᤂᤢᤏᤧ᤹ ᤆᤥᤃᤢᤒᤠ ᤁᤥ᤺ᤰᤔᤠ ᤌᤧᤃᤢᤜᤠ᤹ᤀᤥᤒᤠ ᤛᤧᤘᤠ ᤆᤥ᤺ᤰᤔᤠ ᤔᤠᤱᤎᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ ᤕᤢᤰᤋᤡᤱ ᤆᤥᤃᤢᤛᤡ॥ 33 ᤕᤧᤳᤇᤡᤃᤣ᤺ᤰ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ. ᤂᤢᤏᤧ᤹ ᤀᤠᤵᤑᤣᤰᤁᤣ ᤏᤡ᤺ᤴᤎᤥ ᤁᤧᤒᤥᤱᤒᤠ ᤗᤠ ᤒᤣᤌᤣᤗᤀᤥ ᤂᤢᤏᤧ᤹ ᤆᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤢᤏᤧ᤹ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤢᤏᤧ᤹ ᤋᤱᤏᤠᤶ ᤏᤡ᤺ᤴᤎᤥ ᤆᤥᤃᤢ. ᤜᤧᤰᤁᤩᤠᤱ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤀᤠᤵᤑᤣᤰ ᤌᤥ᤺ᤰᤛᤡᤱ ᤗᤠᤛᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.