᥇ ᤜᤠᤱ 11 - LIFOTNTᤛᤥᤗᤥᤔᤏᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤐᤥᤱ᤹ 1 ᤀᤠᤸᤗ ᤛᤥᤗᤥᤔᤏ ᤜᤠᤱᤅᤡᤴ ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤢ᤺ᤸᤗᤧ ᤘᤣ᤹ ᤜᤡᤳᤋᤡ. ᤔᤥᤀᤠᤒᤡ. ᤀᤶᤔᤥᤏᤡ. ᤀᤣᤍᤥᤔᤡ ᤏᤢ ᤛᤡᤍᤥᤏᤡ ᤘᤣ᤹ ᤗᤠᤈᤣ᤹ᤒᤠ ᤕᤖᤡᤰ ᤔᤧᤴᤇᤢᤔᤠᤜᤠ᤹ᤏᤢ ᤗᤢᤱᤔᤠ᤹ ᤜᤡ᤺ᤵᤛᤡᤱᤔᤥ ᤌᤩᤧ॥ 2 ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤂᤡᤏᤡ᤹ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠᤀᤣ ᤂᤡᤏᤡ᤹ ᤏᤡᤱᤘᤠᤴ ᤂᤢᤴᤇᤡ᤹ ᤔᤠᤱᤜᤠ᤹ ᤗᤧᤵᤔᤠᤱ ᤔᤧᤜᤡᤛᤢ ᤔᤧᤍᤣ᤹ᤖᤢ᤹॥” ᤁᤖᤛᤠᤱ ᤛᤥᤗᤥᤔᤏᤧᤴ ᤂᤧᤱᤜᤠ᤹ ᤗᤧᤵᤔᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ᤜᤡ᤺ᤶᤔᤥ ᤌᤩᤧ॥ 3 ᤂᤢᤏᤧ᤹ ᤁᤡᤵ ᤏᤢᤛᤡ ᤜᤠᤱᤛᤠᤔᤠ ᤔᤣ᤺ᤳᤜᤠ᤹ ᤏᤢ ᤁᤡᤵ ᤛᤢᤶᤛᤡ ᤆᤰᤔᤣ᤺ᤳᤜᤠ᤹ ᤁᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤱᤘᤠᤴ ᤔᤧᤜᤡᤛᤢ ᤔᤧᤍᤣ᤹ᤖᤢ॥ 4 ᤛᤥᤗᤥᤔᤏᤧᤴ ᤁᤠᤵᤐᤥᤒᤠ ᤋᤢᤶᤛᤧᤸᤗᤧ ᤁᤢᤔᤣ᤺ᤳᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤱᤘᤠᤴ ᤘᤣ᤹ ᤔᤠᤱᤜᤠ᤹ ᤗᤧᤵᤔᤠᤱ ᤔᤧᤜᤡᤛᤢ ᤔᤧᤒᤡᤖᤢ. ᤂᤶᤓᤩᤠᤱ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤧᤴ ᤁᤢᤀᤡᤛᤡᤰ ᤁᤧᤖᤧᤰ ᤐᤖᤡᤰᤗᤧ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤥ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤰᤂᤧᤴ॥ 5 ᤂᤢᤏᤧ᤹ ᤛᤡᤍᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤛ᤻ᤋᤥᤖᤣᤋ ᤔᤠᤱᤅᤡᤴ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤔᤥᤗᤣᤂ ᤔᤠᤱᤅᤡᤴ ᤗᤧᤵᤔᤠᤱ ᤗᤠᤛᤧᤒᤣ॥ 6 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤛᤥᤗᤥᤔᤏᤖᤧ ᤆᤥᤃᤢ. ᤜᤧᤰᤁᤩᤠᤱ ᤁᤢᤶᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤧᤖᤧᤰ ᤁᤢᤏᤡᤱᤘᤠ᤺ᤸᤗᤧ ᤔᤧᤍᤡᤶᤍᤢᤴ ᤔᤧᤏᤠ᤺ᤳᤋᤢᤴ॥ 7 ᤛᤥᤗᤥᤔᤏᤖᤧ ᤔᤥᤀᤠᤒᤒᤠ ᤕᤠᤶᤃᤧᤛᤡᤱᤒᤠ ᤔᤠᤱ ᤁᤔᤥᤛ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤔᤠᤱ ᤔᤥᤗᤣᤂᤖᤧ ᤁᤢᤗᤠᤃᤡ ᤕᤖᤢᤛᤗᤧᤔ ᤏᤠᤱᤃᤧᤴ ᤐᤡᤛᤠᤱᤒᤠ ᤗᤳᤇᤠ ᤁᤥ᤺ᤰᤔᤠᤀᤥ ᤛᤧᤘᤠ ᤆᤥ᤺ᤰᤔᤠ ᤆᤴᤈᤶᤒᤠ ᤔᤠᤱᤎᤠ᤺ᤴ ᤆᤥᤃᤢ॥ 8 ᤁᤶᤓᤗ᤹ᤖᤡᤰᤁᤣ ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤒᤠ ᤁᤧᤖᤧᤰ ᤁᤢᤔᤣ᤺ᤳᤜᤠ᤹ᤖᤧ ᤗᤠᤃᤡ ᤔᤠᤱᤎᤠ᤺ᤴᤜᤠ᤹ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤠᤱᤜᤠ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢᤀᤠᤱ ᤛᤢᤰᤐᤠ ᤔᤧᤜᤠ᤺ᤴᤍᤢ॥ 9 ᤕᤜᤘᤣ ᤍᤠᤱᤒᤧᤴ ᤛᤥᤗᤥᤔᤏᤧᤴᤏᤢ ᤁᤢᤕᤠ᤺ᤰᤗᤧ᤹ᤖᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤏᤡᤗᤧᤱ ᤀᤥᤛᤣ᤺ᤴᤎᤠᤱ ᤁᤧᤒᤥᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤢᤏᤧ᤹ ᤁᤢᤏᤡᤱᤘᤠᤴ ᤜᤡᤛᤡᤱᤒᤣᤀᤠᤱ ᤘᤕᤧ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤛᤥᤗᤥᤔᤏᤧᤴ ᤘᤣ᤹ ᤔᤠᤱᤜᤠ᤹ ᤋᤡᤶᤔᤠᤛᤡ ᤔᤧᤓᤠ᤺ᤰᤋᤢᤴᤏᤠᤱ ᤘᤕᤧᤛᤠᤱ. ᤛᤥᤗᤥᤔᤏᤖᤧ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ॥ 11 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤥᤗᤥᤔᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤡᤱᤘᤠᤴ ᤀᤰᤋᤱᤒᤠᤀᤣ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤧᤀᤠᤱ ᤘᤕᤧᤒᤠ ᤀᤠᤔᤠᤱᤜᤢᤵᤐᤡᤴ ᤏᤢ ᤀᤠᤛᤠᤶᤕᤥ ᤌᤡᤶᤜᤠ᤹ ᤂᤧᤏᤧ᤹ ᤁᤧᤴᤀᤡ᤺ᤳᤋᤢᤴ ᤁᤧᤴᤏᤠ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤧᤰᤂᤠᤛᤠᤱ ᤁᤴ ᤜᤠᤱᤈᤢᤶᤔᤡᤴ ᤂᤧᤏᤧ᤹ ᤏᤠᤵᤏᤧᤀᤠᤱ ᤁᤧᤍᤠᤰᤑᤠ ᤛᤡᤃᤠᤱᤒᤠ ᤔᤏᤠᤎᤡᤰ ᤐᤡᤖᤢᤱ᤹॥ 12 ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤶᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤂᤧᤏᤧ᤹ ᤁᤧᤜᤡᤱᤅᤠᤱ ᤁᤧᤘᤠ᤹ᤖ ᤌᤠᤖᤡᤰ ᤆᤤᤲ ᤀᤠᤱᤃᤠ᤹ ᤁᤴ ᤔᤧᤈᤥᤰᤁᤠᤴ॥ ᤀᤠᤱᤃᤠ᤹ ᤁᤴ ᤜᤠᤱᤈᤢᤶᤔᤡᤴ ᤂᤧᤏᤧ᤹ ᤁᤧᤛ᤻ᤛᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤏᤠᤵᤋᤢᤱ᤹॥ 13 ᤁᤖᤛᤠᤱ ᤂᤧᤴ ᤗᤠᤶᤒᤠ ᤀᤠᤱᤃᤠ᤹ ᤁᤧᤖᤧᤰ ᤜᤠᤱᤈᤢᤶᤔᤡᤱᤃ ᤔᤧᤏᤠᤵᤐᤠᤴ. ᤁᤖ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤏᤢ ᤛᤣᤃᤢᤱᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤗᤳᤇᤠ ᤛᤢᤘᤠᤱᤛᤔᤠ ᤁᤧᤛ᤻ᤛᤠᤎᤡᤰ ᤐᤡᤖᤢᤱᤗᤥ॥” ᤛᤥᤗᤥᤔᤏᤖᤧ ᤁᤢᤏᤡᤱᤔᤡᤜᤠ᤹ 14 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤣᤍᤥᤔᤡ ᤜᤠᤱᤜᤡᤶᤛᤕᤱᤒᤠ ᤜᤍᤍᤧᤴ ᤛᤥᤗᤥᤔᤏᤖᤧ ᤁᤢᤍᤰᤗᤧᤱᤘᤠᤀᤥ ᤗᤳᤇᤠ ᤁᤧᤀᤵᤐᤠ ᤑᤥ᤺ᤰᤂᤢ॥ 15 ᤋᤃᤡ ᤍᤠᤀᤢᤍᤧᤴ ᤀᤣᤍᤥᤔᤡᤜᤠ᤹ᤏᤢ ᤌᤱ ᤌᤰᤋᤧᤖ ᤕᤠᤃᤧᤒᤠ ᤕᤧᤶᤔᤥ. ᤂᤢᤏᤧ᤹ ᤁᤢᤎᤰᤔᤥᤒᤠ ᤕᤥᤀᤠᤒᤧᤴ ᤌᤱᤅᤥ ᤁᤧᤛᤡᤒᤠ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤵᤛᤧ ᤐᤣᤀᤠᤱ ᤘᤕᤧᤸᤗᤧ ᤂᤧᤴ ᤗᤠᤈᤣ᤹ᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤔᤧᤰᤂᤢᤛᤡᤀᤠᤱ ᤘᤕᤧ॥ 16 ᤀᤣᤍᤥᤔᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤕᤢᤔᤪᤧᤰ ᤔᤧᤶᤔᤧᤱ ᤔᤧᤴᤇᤢ᤺ᤳᤇᤣ ᤌᤠᤖᤡᤰ ᤕᤥᤀᤠᤒᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤵᤔᤥ ᤗᤠ ᤋᤢᤰᤛᤡ ᤌᤠᤖᤡᤰ ᤔᤧᤕᤠ᤺ᤰᤋᤧᤀᤠᤱ ᤔᤧᤘᤕᤧ॥ 17 ᤁᤖ ᤂᤧᤴ ᤕᤧᤶᤔᤥ ᤜᤍᤍᤧᤴ ᤆᤢᤰᤛᤠ ᤜᤡᤴᤈᤠ᤹ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤛᤧᤘᤠᤖᤥᤒᤠ ᤁᤢᤓᤠ ᤀᤣᤍᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤛᤥᤖᤡᤰ ᤔᤡᤛᤪ ᤗᤠᤈᤣ᤹ᤀᤥ ᤂᤧᤳᤇᤡᤱᤅᤠᤱ ᤐᤣ॥ 18 ᤂᤧᤱᤜᤠ᤹ ᤔᤡᤍᤩᤠᤏᤗᤠᤶ ᤔᤧᤗ᤺ᤴᤍᤧᤀᤠᤱ ᤐᤠᤖᤠᤏ ᤔᤧᤒᤣ॥ ᤂᤧᤒᤩᤠᤱ ᤐᤠᤖᤠᤏᤗᤠᤶ ᤁᤢᤓᤠ ᤔᤏᤠᤜᤠ᤹ ᤛᤥᤖᤡᤰ ᤔᤧᤍᤣ᤹ᤖᤢᤛᤡᤀᤠᤱ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤧᤀᤥ ᤔᤧᤍᤩᤧ॥ ᤂᤢᤏᤧ᤹ ᤜᤍᤍᤧᤴ ᤗᤳᤇᤠ ᤜᤡᤶ ᤏᤢ ᤗᤠᤈᤣ᤹ᤛᤡᤱᤒᤢᤱ ᤜᤧᤰᤁᤩᤠᤱ ᤆᤠᤔᤠ ᤌᤢᤱᤔᤠ ᤜᤡᤛᤢ ᤋᤱᤄᤢ ᤐᤡᤖᤢ॥ 19 ᤑᤠᤖᤥᤴ ᤜᤍᤍᤧᤴᤏᤢ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣᤳ ᤋᤜᤐᤏᤣᤛ ᤜᤠᤱᤔᤧᤸᤗᤧ ᤁᤢᤴᤛᤠ᤹ ᤌᤡᤰᤏᤢ ᤜᤍᤍᤧᤴ ᤔᤣ᤺ᤰᤂᤡᤶ ᤔᤧᤳᤋᤢ॥ 20 ᤋᤜᤐᤏᤣᤛᤖᤧ ᤁᤢᤴᤛᤠ᤹ᤖᤧ ᤜᤍᤍᤗᤠᤶ ᤃᤏᤢᤒᤋ ᤔᤧᤵᤔᤏᤠᤒᤠ ᤗᤳᤇᤠ ᤕᤧᤶᤒᤡᤳᤇᤠᤛᤠ ᤁᤳᤋᤢ. ᤋᤜᤐᤏᤣᤛᤖᤧ ᤂᤧᤴ ᤑᤠᤖᤥᤸᤗᤧ ᤁᤢᤜᤠᤱᤜᤡᤶᤔᤥ ᤜᤡᤱᤄᤢᤀᤠᤱ ᤕᤶᤒᤠ ᤆᤥᤃᤢ॥ ᤃᤒᤢᤏᤋᤧᤴ ᤂᤧᤵᤔᤥ ᤑᤠᤖᤥᤸᤗᤧ ᤀᤠᤵᤑᤣᤰ ᤁᤢᤛ᤻ᤛᤠ ᤀᤅᤧ᤺ᤰᤘᤠᤜᤠ᤹ᤏᤢ ᤛᤥᤖᤡᤰ ᤕᤶᤒᤠ ᤐᤥ᤺ᤰᤂᤧ॥ 21 ᤜᤍᤍᤧᤴ ᤔᤡᤛᤪ ᤗᤠᤈᤣ᤹ᤀᤥ ᤘᤕᤧᤸᤗᤧ ᤍᤠᤀᤢᤍᤧᤴ ᤁᤢᤎᤠ᤺ᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣᤈᤢᤖᤧᤒᤠ ᤏᤢ ᤂᤢᤏᤧ᤹ ᤁᤢᤎᤰᤔᤥᤒᤠ ᤕᤥᤀᤠᤒᤧᤴᤏᤠᤱ ᤛᤩᤧᤄᤧᤖᤧᤒᤠ ᤀᤡᤱᤄᤱ ᤂᤧᤵᤛᤢ॥ ᤂᤧᤒᤩᤠᤱ ᤜᤍᤍᤖᤧ ᤑᤠᤖᤥᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤈᤣ᤹ᤀᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹ᤀᤥ॥” 22 ᤑᤠᤖᤥᤸᤗᤧ ᤛᤣ᤺ᤴᤍᤥᤛᤢ. “ᤀᤠᤱᤃᤠ᤹ ᤀᤠᤗᤠᤈᤣ᤹ᤀᤥ ᤂᤧᤏᤧ᤹ ᤌᤣ᤺ᤸᤗᤧ ᤁᤧᤴᤕᤥᤖᤧᤴᤏᤠᤱ ᤀᤠᤵᤑᤣᤰ ᤁᤧᤗᤠᤈᤣ᤹ᤀᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤁᤧᤃᤥ᤺ᤵᤐᤠᤒᤣ᥅” ᤜᤍᤍᤖᤧ ᤏᤥᤃᤵ ᤐᤡᤖᤢ. “ᤌᤣ᤺ᤸᤗᤧᤀᤠᤱ ᤔᤧᤕᤥᤖᤠᤱᤅᤧᤴᤒᤠᤃ ᤜᤥᤵ. ᤁᤖ ᤐᤣᤗᤡ ᤑᤠᤰᤏᤧ. ᤀᤠᤱᤃᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹॥” 23 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤥᤗᤥᤔᤏᤖᤧ ᤁᤢᤍᤰᤗᤧᤱᤘᤠᤀᤥ ᤗᤳᤇᤠ ᤘᤣ᤹ ᤔᤏᤠ ᤀᤣᤗᤩᤠᤍᤠᤖᤧ ᤁᤢᤛ᤻ᤛᤠ ᤖᤣᤛᤥᤏᤧᤴ ᤁᤧᤀᤵᤐᤠ ᤑᤥ᤺ᤰᤂᤢ. ᤖᤣᤛᤥᤏᤧᤴ ᤁᤢᤴᤍᤠᤱᤒᤠ ᤛᤥᤒᤠᤒᤠ ᤜᤠᤱ ᤜᤍᤍᤣᤈᤣᤖᤧᤴ ᤗᤠᤶᤒᤠ ᤂᤧᤳᤇᤡᤱ ᤐᤣᤀᤠᤱ ᤘᤕᤧ॥ 24 ᤀᤠᤸᤗ ᤍᤠᤀᤢᤍᤖᤧ ᤛᤥᤒᤠᤒᤠ ᤔᤏᤠᤛᤢᤶᤜᤠ᤹ ᤔᤧᤰᤂᤢᤛᤡ. ᤂᤧᤒᤩᤠᤱ ᤖᤣᤛᤥᤏᤧᤴ ᤗᤧᤵᤔᤠᤱ ᤔᤏᤠᤜᤠ᤹ ᤑᤢᤰᤂᤢᤛᤡᤀᤠᤱ ᤂᤢᤏᤧ᤹ ᤐᤡᤑᤩᤢᤱᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤐᤥ᤺ᤰᤂᤧ॥ ᤁᤴ ᤐᤡᤑᤩᤢᤱᤒᤠᤜᤠ᤹ ᤍᤔᤛ᤻ᤁᤛ ᤔᤧᤒᤣᤀᤠᤱ ᤂᤧᤵᤔᤥ ᤂᤢᤴᤇᤡ᤹ ᤔᤧᤕᤢᤱᤛᤡᤱ ᤜᤧᤰᤁᤩᤠᤱ ᤂᤧᤴ ᤂᤢᤴᤇᤡ᤹ ᤜᤢᤰᤁᤥ ᤔᤧᤎᤠᤛᤢ॥ 25 ᤛᤥᤗᤥᤔᤏᤖᤧ ᤁᤢᤜᤡᤱᤜᤡᤱ ᤖᤣᤛᤥᤏᤧᤴ ᤀᤡᤛᤪᤠᤀᤡᤗᤧᤴ ᤁᤧᤀᤵᤐᤠ ᤐᤥ᤺ᤰᤂᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤜᤍᤍᤖᤧ ᤆᤥᤃᤢᤒᤠ ᤜᤠᤴᤋᤡᤀᤥ ᤂᤢᤏᤧ᤹ ᤁᤢᤈᤰ ᤜᤠᤴᤋᤡ ᤐᤥ᤺ᤰᤂᤧᤖ ᤕᤥ᤹ᤖᤢ॥ ᤜᤧᤰᤁᤩᤠᤱ ᤖᤣᤛᤥᤏᤖᤧ ᤀᤠᤖᤠᤔᤀᤥ ᤜᤠᤱᤕᤢᤰ ᤆᤥᤃᤢᤀᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤀᤳᤋᤢᤖ ᤘᤕᤧᤃᤳᤋᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤥᤒᤠᤔᤧᤴᤏᤢ ᤔᤠᤱᤜᤢᤵ ᤆᤥᤃᤢ 26 ᤀᤠᤸᤗ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴᤏᤠᤱ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤛᤥᤗᤥᤔᤏᤖᤧ ᤗᤳᤇᤠ ᤁᤢᤛᤢᤜᤠᤱᤕᤢᤰᤐᤠ ᤈᤣᤖᤣᤍᤠ ᤗᤠᤶᤒᤠᤒᤠ ᤗᤳᤇᤠ ᤀᤣᤑᤪᤠᤀᤡᤔᤡ ᤘᤕᤧ॥ ᤂᤢᤏᤧ᤹ ᤁᤢᤶᤔᤠ ᤛᤣᤖᤢᤀᤠ ᤔᤧᤵᤔᤏᤠᤔᤠ ᤔᤣᤔᤣᤍᤢᤔᤠ ᤘᤕᤧ॥ 27 ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤧ᤹ ᤀᤠᤰᤂᤣᤀᤠᤱ ᤐᤡᤑᤩᤢᤱᤒᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤁᤵᤔᤥ ᤐᤡᤔᤏᤠᤀᤠᤱ ᤐᤳ॥ ᤛᤥᤗᤥᤔᤏᤖᤧ ᤁᤦᤛᤡᤜᤠ᤹ᤖᤧ ᤁᤢᤍᤰᤔᤠ ᤗᤢᤱᤎᤠᤰᤜᤠ᤹ ᤛᤧᤳᤋᤢᤀᤠᤱ ᤕᤢᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ᤀᤥᤒᤠ ᤁᤧᤃᤠ᤹ᤒᤠ ᤁᤢᤓᤡ᤺ᤵᤔᤠᤜᤠ᤹ ᤜᤢ᤹ᤖᤢᤖ ᤕᤠᤃᤧ॥ 28 ᤕᤠᤖᤥᤒᤠᤔᤧᤴᤃ ᤗᤳᤇᤠ ᤁᤧᤍᤶᤒᤠ ᤔᤏᤠ ᤘᤕᤧ. ᤜᤧᤰᤁᤩᤠᤱ ᤂᤧᤴ ᤌᤠᤱᤒᤧᤴ ᤔᤏᤠᤴ ᤛᤠ᤹ᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤡᤛᤢᤀᤠᤱ ᤛᤥᤗᤥᤔᤏᤖᤧ ᤂᤢᤏᤧ᤹ ᤕᤥᤛᤣᤑᤖᤧ ᤁᤢᤜᤡᤶᤛᤕᤱᤒᤠ ᤁᤧᤖᤧᤰ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤔᤧᤓᤳᤇᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤆᤥᤃᤢ॥ 29 ᤜᤠᤒᤠ ᤂᤧᤴ ᤕᤧᤶᤔᤥ ᤕᤠᤖᤥᤒᤠᤔᤧᤴ ᤕᤖᤢᤛᤗᤧᤔᤗᤠᤶ ᤗᤠ᤺ᤰᤁᤠᤳ ᤐᤣᤖ ᤐᤳᤇᤧ. ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥᤀᤣ ᤛᤡᤗᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤜᤡᤕᤠᤜ᤺ᤸᤗᤧ ᤗᤠᤶᤔᤥ ᤂᤢᤏᤧ᤹ ᤋᤢᤔᤢ॥ ᤀᤜᤡᤕᤠᤜ᤺ᤸᤗᤧ ᤁᤢᤛᤱ ᤂᤠᤶᤍᤣ᤺ᤳ ᤜᤧᤵᤛᤢᤀᤠᤱ ᤘᤕᤧ॥ ᤗᤠᤶᤔᤥ ᤂᤢᤴᤇᤡ᤹ ᤏᤧᤳᤇᤡᤖᤰ ᤘᤕᤧᤛᤡ॥ 30 ᤀᤜᤡᤕᤠᤜ᤺ᤸᤗᤧ ᤜᤧᤵᤛᤢᤒᤠ ᤁᤢᤛᤱ ᤂᤠᤶᤍᤣ᤺ᤳᤋᤡᤴ ᤑᤧᤴᤍᤢ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤧ᤺ᤰᤂᤢᤀᤠᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤗᤧᤵ ᤆᤥᤃᤢ॥ 31 ᤂᤧᤒᤩᤠᤱ ᤂᤢᤏᤧ᤹ ᤕᤠᤖᤥᤒᤠᤔᤧᤴ ᤔᤧᤳᤋᤢ. “ᤁᤵᤔᤥᤗᤠᤶ ᤂᤧᤏᤧ᤹ ᤁᤧᤗᤠᤃᤡ ᤌᤡᤒᤥᤱ ᤁᤢᤗᤧᤵ ᤔᤧᤳᤇᤡᤱᤅᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤛᤥᤗᤥᤔᤏᤖᤧ ᤁᤢᤜᤢᤰᤁᤥᤗᤠᤶ ᤜᤠᤱᤈᤢᤶᤔᤡᤴ ᤏᤠᤵᤋᤢᤱ᤹. ᤜᤧᤰᤁᤩᤠᤱ ᤌᤡᤒᤥᤱ ᤌᤠ᤺ᤰᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤖᤥ॥ 32 ᤁᤖ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤗᤠᤶ ᤛᤣᤃᤢᤱᤒᤠ ᤕᤧᤰᤕᤰ ᤕᤖᤢᤛᤗᤧᤔᤖᤧ ᤗᤠᤃᤡ ᤗᤳᤇᤠ ᤌᤠ᤺ᤰ ᤆᤤᤲ ᤆᤠᤜᤡ᤺ᤴ ᤛᤥᤗᤥᤔᤏᤖᤧᤴ ᤐᤥᤱ᤹॥ 33 ᤀᤠᤱᤃᤠ᤹ ᤁᤴ ᤆᤥᤃᤢᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤧᤏᤠ᤹ᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤛᤡᤍᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤛ᤻ᤋᤥᤖᤣᤋ ᤔᤠᤱᤅᤡᤴ. ᤔᤥᤀᤠᤒᤒᤠ ᤔᤠᤱ ᤁᤔᤥᤛᤧᤴ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱ ᤔᤥᤗᤣᤂᤧᤴ ᤂᤧᤱᤜᤠ᤹ᤖᤧ ᤛᤧᤘᤠ ᤔᤧᤔᤧᤳᤋᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤶᤔᤥ ᤂᤧᤱᤜᤠ᤹ ᤗᤠᤱᤔᤧᤱᤄᤣ᤺ᤰᤏᤧᤴ ᤀᤠᤱᤃᤠ᤹ ᤀᤠᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤁᤢᤍᤥ᤺ᤵᤔᤠ ᤆᤥᤰ ᤂᤧᤴᤏᤠᤱ ᤔᤧᤴᤈᤥᤃᤢᤴ᤹. ᤛᤥᤗᤥᤔᤏᤖᤧ ᤁᤢᤶᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤛᤠᤶᤕᤥᤒᤠ ᤌᤡᤶᤜᤠ᤹ᤀᤠᤱ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ 34 “‘ᤁᤖ ᤛᤥᤗᤥᤔᤏᤖᤧ ᤁᤢᤜᤢᤰᤁᤥᤗᤠᤶ ᤀᤠᤱᤃᤠ᤹ ᤁᤧᤖᤧᤰ ᤜᤠᤱᤈᤢᤶᤔᤡᤱᤃ ᤔᤧᤏᤠᤵᤐᤠᤴ॥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤀᤠᤱᤃᤠ᤹ ᤛᤣᤃᤢᤱᤒᤠ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤛᤥᤗᤥᤔᤏᤧᤴ ᤁᤢᤜᤡᤱᤜᤡᤱ ᤀᤠᤱᤃᤠ᤹ ᤂᤧᤴ ᤕᤢᤰᤛᤠᤒᤠ ᤆᤥᤃᤢᤱᤅᤠᤱ ᤘᤠ᤹॥ 35 ᤂᤧᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤏᤠᤵᤋᤢᤱᤅᤠᤱ ᤌᤡᤒᤥᤱ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤔᤡᤴ ᤂᤧᤏᤧ᤹ ᤐᤡᤏᤧᤖᤥ॥ 36 ᤀᤠᤱᤃᤠ᤹ ᤀᤠᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤛᤣᤃᤢᤱᤒᤠ ᤕᤧᤰᤕᤰ ᤕᤖᤢᤛᤗᤧ᤺ᤶᤔᤥ ᤀᤠᤱᤃᤠ᤹ ᤀᤠᤍᤃᤡ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤛᤣᤔᤡᤎᤡᤰ ᤋᤡ᤺ᤳᤋᤠᤱ ᤕᤢᤱᤗ ᤑᤠ᤹ᤀᤠᤱ ᤗᤳᤇᤠ ᤌᤠ᤺ᤰ ᤆᤤᤲ ᤀᤠᤱᤃᤠ᤹ ᤂᤢᤏᤧ᤹ ᤁᤢᤛ᤻ᤛᤠᤴ ᤐᤡᤖᤢᤱ᤹॥ 37 ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤂᤧᤏᤧ᤹ᤃ ᤋᤠ᤺ᤰᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ᤖᤧ ᤀᤡ᤺ᤳᤋᤢᤒᤠ ᤁᤧᤖᤧᤰ ᤛᤶᤎᤠᤱ ᤂᤧᤏᤧ᤹ ᤜᤠᤱᤕᤢᤰ ᤁᤧᤈᤥᤃᤢ᤹॥ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤁᤧᤒᤥᤱ᤹॥ 38 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤜᤧᤰᤁᤣ ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢᤀᤠᤱ ᤀᤠᤱᤃᤠ᤹ ᤀᤠᤗᤠᤶᤔᤥ ᤗᤠᤱᤃᤧᤄᤣ᤺ᤰ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤡᤶᤍᤢᤀᤠᤱ ᤀᤠᤱᤃᤠ᤹ ᤀᤠᤏᤡᤔᤥ ᤀᤠᤳᤋᤡᤴ ᤏᤢᤒᤠ ᤆᤥᤰ ᤂᤧᤴ ᤁᤧᤈᤥᤃᤢᤏᤧᤓᤃᤪ. ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ॥ ᤍᤠᤀᤢᤍᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤎᤠ᤺ᤰᤜᤠ᤹ᤖᤧ ᤗᤠᤃᤡ ᤛᤍᤠᤍᤡᤱ ᤁᤧᤘᤠ᤹ᤒᤠ ᤌᤡᤶᤎᤡᤰ ᤆᤥᤃᤢᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤖᤥ॥ 39 ᤛᤥᤗᤥᤔᤏᤖᤧ ᤁᤢᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹. ᤁᤖ ᤛᤍᤠᤍᤡᤱᤗᤧ ᤗᤠᤃᤡᤃ ᤔᤣ᤺ᤴ॥’” 40 ᤂᤧᤴ ᤀᤣᤃᤠᤱ ᤛᤥᤗᤥᤔᤏᤖᤧ ᤕᤠᤖᤥᤒᤠᤔᤧᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤕᤠᤖᤥᤒᤠᤔᤧᤴ ᤔᤡᤛᤪ ᤗᤠᤈᤣ᤹ ᤛᤡᤛᤁ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤂᤧᤳᤇᤡᤱ ᤐᤣ ᤜᤧᤰᤁᤩᤠᤱ ᤛᤥᤗᤥᤔᤏᤧᤴ ᤔᤧᤶᤔᤠᤛᤡᤱᤅᤣ ᤌᤠᤖᤡᤰ ᤂᤧᤵᤔᤥᤀᤣ ᤘᤕᤧᤖᤥ॥ ᤛᤥᤗᤥᤔᤏᤧᤴ ᤔᤠᤛᤡᤱ ( ᥈ ᤛᤠᤵᤔᤢ ᥏:᥈᥏-᥉᥇ ) 41 ᤛᤥᤗᤥᤔᤏᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤥᤛᤣ᤺ᤴᤎᤠᤱ ᤆᤥᤃᤢᤒᤠ ᤁᤧᤖᤧᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤠ᤺ᤴᤜᤠ᤹ ᤌᤣ ᤛᤥᤗᤥᤔᤏᤖᤧ ᤁᤢᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ 42 ᤛᤥᤗᤥᤔᤏᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤕᤖᤢᤛᤗᤧᤔᤗᤠᤶ ᤗᤡᤒᤥᤱ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 43 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤎᤠ᤺ᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤖᤜᤒᤠᤔᤧᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.