᥇ ᤜᤠᤱ 10 - LIFOTNTᤛᤣᤒᤠᤒᤠ ᤜᤠᤱᤔᤧᤴ ᤛᤥᤗᤥᤔᤏᤖᤧ ᤁᤢᤍᤢᤶᤛᤧ ᤌᤠᤅᤧ ( ᥈ ᤛᤠᤵᤔᤢ ᥏:᥇-᥇᥈ ) 1 ᤀᤠᤸᤗ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤥᤗᤥᤔᤏᤖᤧ ᤁᤢᤔᤡᤱᤛᤥ ᤁᤢᤎᤠᤱᤛᤥᤴ ᤂᤧᤵᤛᤢ. ᤜᤧᤰᤁᤩᤠᤱ ᤁᤧᤛᤠᤰᤐᤠ ᤁᤧᤛᤠᤰᤐᤠ ᤐᤠ᤺ᤴᤛᤣ᤺ᤴᤍᤥᤜᤠ᤹ ᤌᤠᤰᤋᤢᤀᤠᤱ ᤛᤥᤗᤥᤔᤏᤖᤧ ᤁᤢᤏᤡᤱᤘᤠ᤹ ᤛᤠ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤌᤠᤅᤧ॥ 2 ᤂᤢᤏᤧ᤹ ᤕᤖᤡᤰ ᤁᤢᤍᤡ᤺ᤰ ᤁᤢᤍᤡ᤺ᤰ ᤔᤏᤠᤜᤠ᤹ᤏᤢ ᤕᤖᤢᤛᤗᤧᤔ ᤌᤠᤅᤧ—ᤔᤠᤖᤢ᤺ᤰᤜᤠ᤹. ᤕᤖᤡᤰ ᤛᤠᤶᤔᤩᤠᤱ ᤏᤢ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤢᤎᤡᤱᤜᤠ᤹ ᤁᤰ ᤁᤢ᤺ᤳᤋᤢᤛᤡᤒᤠ ᤀᤢᤔᤣᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤛᤥᤗᤥᤔᤏᤀᤥ ᤌᤠᤅᤧ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ᤀᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤛᤥᤗᤥᤔᤏᤧᤴᤏᤢ ᤋᤠ᤹ᤈᤧᤰᤂᤧ॥ 3 ᤂᤧᤸᤗᤧ ᤁᤧᤖᤧᤰ ᤁᤢᤒᤠ᤺ᤴᤛᤣ᤺ᤴᤍᤥᤜᤠ᤹ ᤛᤥᤗᤥᤔᤏᤖᤧ ᤏᤥᤃᤵ ᤐᤡᤖᤢ॥ ᤂᤧᤴ ᤐᤠ᤺ᤴᤜᤠ᤹ᤖᤧ ᤁᤢᤒᤣᤴ ᤜᤶᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤀᤠᤈᤧ᤺ᤳᤇᤡᤰᤁᤠᤱ ᤁᤧᤛᤠᤰᤐᤠ ᤔᤧᤍᤢᤔᤢᤴ॥ 4 ᤀᤠᤸᤗ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤛᤥᤗᤥᤔᤏᤖᤧ ᤁᤧᤖᤧᤰ ᤁᤢᤛᤡᤰᤁᤢᤶ ᤏᤡᤱᤘᤠ᤹. ᤂᤢᤏᤧ᤹ ᤆᤥᤃᤢᤒᤠ ᤜᤠᤱᤜᤡᤶ. 5 ᤂᤢᤏᤧ᤹ ᤁᤢᤈᤠᤈᤠᤔᤠ ᤆᤵᤋᤧᤴ. ᤂᤢᤏᤧ᤹ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤂᤢᤴᤇᤡ᤹ ᤀᤢᤘᤠ ᤆᤥ᤺ᤰᤔᤠ ᤆᤠᤱ ᤁᤧᤈᤠᤱᤒᤠᤀᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤠ ᤁᤢᤓᤠ᤹ᤒᤠᤱᤜᤠ᤹. ᤂᤢᤏᤧ᤹ ᤁᤢᤈᤧᤸᤗᤧᤰᤛᤣ᤹ ᤌᤡ ᤁᤧᤒᤡᤒᤠᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢᤖ ᤔᤧᤕᤠᤃᤧᤒᤠ ᤛᤡᤍᤢᤱᤈᤓᤠᤜᤠ᤹ ᤏᤡᤛᤢᤀᤠᤱ ᤂᤧᤴ ᤁᤢᤏᤡᤱᤘᤠ᤹ ᤔᤕᤧ॥ 6 ᤂᤧᤸᤗᤧ ᤛᤥᤗᤥᤔᤏ ᤜᤠᤱᤅᤡᤴ ᤔᤧᤳᤋᤢ. “ᤂᤧᤏᤧ᤹ ᤌᤥᤒᤥ ᤁᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤏᤢ ᤁᤧᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤀᤠᤗᤠᤈᤣ᤹ᤀᤥ ᤂᤧᤵᤛᤢᤱᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣᤖᤧᤳᤇ॥ 7 ᤁᤖ ᤀᤠᤱᤃᤠ᤹ ᤀᤠᤵᤑᤣᤰ ᤌᤠᤅᤠᤱᤅᤠᤱ ᤀᤠᤔᤡᤰᤁᤡᤸᤗᤧ ᤔᤧᤴᤏᤡᤀᤣ ᤌᤠᤖᤡᤰ ᤀᤠᤱᤃᤠ᤹ ᤏᤛᤠᤴ ᤔᤧᤴᤈᤥ᤺ᤰᤁᤣ ᤘᤕᤠᤱ॥ ᤛᤧᤰᤂᤠᤀᤣ. ᤁᤱᤃ ᤀᤠᤱᤃᤠ᤹ ᤁᤢᤓᤪᤧ᤺ᤱᤅᤠᤱ ᤔᤧᤶᤔᤧᤳᤋᤣ ᤔᤧᤃᤳᤋᤠᤱᤗᤳᤇ॥ ᤂᤧᤏᤧ᤹ ᤁᤢᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤀᤠᤱᤃᤠ᤹ ᤂᤧᤵᤛᤢᤱᤒᤠᤴᤏᤢ᤺ᤸᤗᤧᤃ ᤕᤖᤡᤰᤁᤣ ᤘᤠ᤹ᤖᤧᤳᤇ॥ 8 ᤂᤧᤏᤧ᤹ ᤁᤧᤔᤏᤠᤜᤠ᤹ᤃ ᤀᤠᤰᤂᤩᤠᤖᤡᤰ ᤕᤧᤕᤧ ᤔᤧᤗ᤹ᤒᤡᤗᤠ᥄ ᤂᤧᤏᤧ᤹ ᤁᤧᤍᤃᤡ ᤆᤰᤔᤧᤸᤗ᤹ᤀᤣ ᤁᤧᤕᤧᤵᤐᤠ ᤏᤢ ᤂᤧᤏᤧ᤹ ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤂᤧᤶᤔᤠ ᤁᤧᤄᤥᤒᤠ ᤁᤴ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤀᤠᤰᤂᤩᤠᤰ ᤔᤧᤛ᤺ᤳ ᤐᤡᤗᤠ᥄ 9 ᤂᤧᤏᤧ᤹ᤏᤢ ᤁᤢᤏᤡᤱᤘᤠ᤹ ᤁᤧᤍᤠᤒᤠᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤂᤧᤏᤧ᤹ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖ॥ ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤠᤛᤧᤴ ᤏᤢ ᤛᤠᤶᤕᤥᤏᤡᤔᤠᤴ ᤀᤠᤓᤧᤸᤗᤧᤛᤠᤱ ᤘᤠ᤹ᤖ ᤑᤠ᤹ᤀᤠᤱ ᤂᤢᤏᤧ᤹ ᤜᤠᤱ ᤁᤧᤈᤥᤃᤧᤀᤠᤱ ᤘᤠ᤹॥” 10 ᤂᤧᤴ ᤀᤣᤃᤠᤱ ᤂᤧᤸᤗᤧ ᤛᤥᤗᤥᤔᤏ ᤜᤠᤱᤅᤡᤴ ᤜᤧᤴᤇᤡᤱ ᤗᤡᤛᤡ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ. ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤠᤖᤢ᤺ᤰᤜᤠ᤹ ᤏᤢ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤢᤎᤡᤱᤜᤠ᤹ ᤐᤡᤖᤢ॥ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤛᤥᤗᤥᤔᤏ ᤜᤠᤱᤅᤡᤴ ᤐᤡᤖᤢᤒᤠ ᤕᤠᤖᤡᤰ ᤕᤖᤡᤰ ᤔᤠᤖᤢᤰ ᤀᤠᤳᤋᤡᤸᤗᤧᤀᤠᤱ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤍᤠᤖᤢᤴ॥ 11 (ᤂᤧᤶᤓᤩᤠᤖᤡᤰᤗᤰ ᤔᤣ᤺ᤴ ᤜᤧᤖᤠᤔᤖᤧ ᤁᤢᤘᤠᤗᤠᤎᤠᤜᤠ᤹ᤖᤧ ᤀᤥᤐᤡᤖᤗᤠᤶ ᤛᤠᤶᤔᤩᤠᤱ ᤔᤧᤎᤠᤰᤋᤢ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤜᤠ᤹ᤖᤧ ᤋᤄ᤹ᤛᤡᤱᤜᤠ᤹ ᤏᤢ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤢᤎᤡᤱᤗᤢᤱᤜᤠ᤹ ᤘᤠᤗᤠᤎᤠᤗᤠᤶ ᤔᤧᤎᤠᤰᤋᤢ॥ 12 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤴ ᤋᤄ᤹ᤛᤡᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤏᤢ ᤂᤢᤏᤧ᤹ ᤁᤢᤜᤠᤱᤜᤡᤶᤔᤡᤸᤗᤧ ᤗᤠᤃᤡ ᤁᤢᤍᤰᤔᤠ ᤛᤡᤳᤗᤠᤱᤜᤠ᤹ ᤆᤥᤃᤢ. ᤂᤶᤓᤩᤠᤱ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤗᤠᤃᤡ ᤁᤱᤏᤡ ᤏᤢ ᤋᤢ᤺ᤱᤃᤣ ᤜᤠᤒᤠ ᤁᤴ ᤛᤡᤱᤜᤠ᤹ ᤗᤠᤶᤒᤠ ᤆᤥᤃᤢ॥ ᤁᤶᤓᤩᤠᤖᤡᤰ ᤕᤖᤡᤰ ᤋᤄ᤹ᤛᤡᤱ ᤀᤠᤓᤧᤸᤗᤧᤀᤠᤱ ᤔᤧᤴᤍᤠ᤺ᤳᤋᤣ ᤘᤕᤧ. ᤜᤧᤰᤁᤩᤠᤱ ᤂᤧᤴ ᤕᤧᤶᤔᤠᤱᤎᤥ ᤀᤰᤋᤱᤒᤠ ᤔᤧᤴᤏᤡᤀᤣᤀᤠᤱ ᤘᤠ᤹॥) 13 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤛᤣᤒᤠᤒᤠ ᤜᤠᤱᤔᤧᤴ ᤂᤢᤏᤧ᤹ ᤁᤢᤜᤠᤱᤏᤡᤱᤘᤠ᤹ᤗᤠᤶ ᤐᤡᤖᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤜᤠᤱᤔᤧᤸᤗᤧ ᤏᤠ᤺ᤰᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤠᤱ ᤐᤡᤖᤢ॥ ᤂᤧᤴ ᤜᤠᤱᤔᤧᤴ ᤂᤢᤏᤧ᤹ ᤁᤢᤍᤡ᤺ᤰ ᤁᤢᤍᤡ᤺ᤰ ᤀᤠᤵᤑᤣᤰ ᤁᤢᤔᤏᤠᤜᤠ᤹ᤏᤢ ᤁᤢᤗᤠᤈᤣ᤹ᤀᤥ ᤐᤣᤖᤥ॥ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤕᤠᤱᤛᤠᤁᤢᤴᤎᤣ ( ᥈ ᤛᤠᤵᤔᤢ ᥏:᥇᥉-᥈᥎ ) 14 ᤛᤥᤗᤥᤔᤏᤖᤧᤀᤥ ᤋᤱᤒᤣ ᤌᤰᤔᤠ ᤁᤧᤍᤠᤒᤠ ᤛᤠᤶᤔᤩᤠᤱᤅᤡᤴ ᤏᤡᤒᤥᤱᤅᤠᤱ ᤛᤢᤶᤛᤡ ᤜᤧᤴᤇᤡᤱ ᤁᤡᤗᤥᤃᤪᤠᤔ ᤕᤥᤖᤧ॥ 15 ᤂᤧᤴᤏᤢ᤺ᤸᤗᤧ ᤘᤣ᤹ ᤗᤧᤱᤜᤱ ᤆᤥ᤺ᤰᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤗᤧᤱᤜᤱᤒᤠᤜᤠ᤹ ᤜᤧᤰᤁᤩᤠᤱ ᤀᤖᤒ ᤗᤠᤈᤣ᤹ᤒᤠ ᤁᤧᤖᤧᤰ ᤜᤠᤱᤜᤠ᤹ ᤏᤢ ᤋᤧᤱᤃᤵᤐᤥᤒᤠ ᤆᤢᤰᤛᤠ ᤜᤠᤱᤜᤠ᤹ᤗᤠᤶ ᤀᤣ᤺ᤱᤕᤠᤱᤜᤠ᤹ ᤆᤢᤵᤛᤧ॥ 16 ᤛᤥᤗᤥᤔᤏ ᤜᤠᤱᤅᤡᤸᤗᤧ ᤑᤧ᤺ᤳᤇᤢᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤁᤡᤵ ᤏᤧᤳᤇᤡ ᤕᤶᤒᤕᤶᤒᤠ ᤂᤥᤜᤠ᤹ ᤌᤃᤢ॥ ᤗᤳᤇᤠ ᤂᤥ ᤌᤰᤔᤠᤖᤧ ᤗᤠᤃᤡ ᤁᤡᤗᤥᤃᤪᤠᤔ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤛᤠᤶᤔᤩᤠᤱ ᤗᤠᤛᤧ॥ 17 ᤂᤢᤏᤧ᤹ ᤑᤧᤔᤏᤠᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤁᤡᤵ ᤛᤢᤶᤛᤡ ᤆᤢᤈᤢᤰᤛᤠ ᤂᤥᤜᤠ᤹ᤀᤠᤱ ᤌᤃᤢ॥ ᤂᤥ ᤌᤰᤔᤠ ᤜᤵᤔᤧᤴ ᤁᤡᤗᤥᤃᤪᤠᤔ ᤌᤡᤰᤁᤠᤱ ᤁᤢᤓᤪᤧ᤺ᤱ ᤛᤠᤶᤔᤩᤠᤱ ᤕᤠᤃᤧ॥ ᤜᤠᤱᤅᤡᤸᤗᤧ ᤂᤧᤴ ᤂᤥᤜᤠ᤹ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤜᤠᤱᤜᤡᤶᤔᤥ ᤏᤧᤛ᤻ᤛᤢ॥ 18 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤕᤶᤒᤠ ᤜᤠᤱᤕᤢᤰᤏᤠ ᤌᤡᤰ ᤆᤥᤃᤢᤀᤠᤱ ᤂᤧᤸᤗᤧ ᤁᤢᤓᤠ ᤁᤢᤗᤰᤜᤠ᤹ ᤋᤰᤔᤡᤒᤠ ᤁᤣ᤺ᤱ ᤏᤢ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥ 19 ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤔᤠ ᤋᤢᤰᤛᤡ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧ॥ ᤂᤧᤸᤗᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤁᤒᤪᤡᤱ ᤁᤧᤀᤡᤒᤠ ᤁᤠᤰᤐᤧᤵᤐᤠ ᤁᤢᤛᤶ ᤐᤳᤇᤧ॥ ᤕᤢᤱᤍᤧᤴᤏᤥᤒᤠ ᤏᤠᤜᤠᤱ ᤁᤳᤏᤠᤜᤠᤱ ᤗᤧᤵᤔᤠᤱ ᤜᤢᤰᤏᤠ᤺ᤶᤓᤣ ᤐᤳᤇᤧ॥ ᤁᤢᤕᤠ ᤁᤢᤕᤠᤀᤥ ᤗᤳᤇᤠ ᤗᤳᤇᤠ ᤂᤡᤖᤡᤱᤒᤠ ᤏᤧᤳᤇᤡ ᤋᤰᤐᤧᤳ ᤋᤰᤐᤧᤳ ᤕᤧᤒᤧᤛᤡ॥ 20 ᤋᤢᤰᤛᤡᤀᤣ ᤏᤠᤜᤠᤱᤛᤣ᤺ᤰᤜᤠ᤹ᤖᤧ ᤏᤠᤜᤠᤱ ᤏᤢ ᤁᤳᤏᤠᤜᤠᤱ ᤁᤢᤕᤠ ᤌᤰᤔᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤂᤡᤖᤡᤱᤒᤠᤜᤠ᤹ ᤗᤳᤇᤠ ᤗᤳᤇᤠ ᤋᤰᤐᤧᤳ ᤋᤰᤐᤧᤳ ᤔᤧᤕᤧᤒᤧ॥ ᤀᤠᤳᤋᤡᤴ ᤜᤠᤱᤈᤢᤶᤔᤡᤸᤗᤧ ᤗᤠᤃᤡᤀᤠᤱ ᤁᤴ ᤐᤖᤡᤰᤐᤠ ᤜᤠᤱᤕᤢᤰᤏᤠ ᤀᤠᤓᤧᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤕᤧ॥ 21 ᤛᤥᤗᤥᤔᤏᤖᤧ ᤁᤢᤎᤢᤱᤔᤠ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤁᤧᤖᤧᤰ ᤛᤠᤶᤔᤩᤠᤱᤅᤡᤸᤗᤧᤴ ᤘᤕᤧ. ᤜᤧᤰᤁᤩᤠᤱ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤜᤠᤱᤜᤡᤶᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤆᤥᤃᤧ॥ ᤕᤢᤵᤐᤠᤗᤠᤶ ᤌᤧᤔᤠᤀᤠᤱ ᤔᤧᤴᤎᤰᤁᤣ ᤘᤕᤧ. ᤌᤣᤀᤠᤱᤓᤧᤸᤗᤧ ᤛᤥᤗᤥᤔᤏᤖᤧ ᤁᤢᤕᤧᤶᤔᤥ ᤕᤢᤵᤐᤠᤴ ᤜᤏᤧᤒᤠ ᤆᤥᤃᤧ॥ 22 ᤜᤧᤖᤠᤔᤖᤧ ᤁᤢᤘᤠᤗᤠᤎᤠᤜᤠ᤹ᤏᤢ ᤛᤥᤛᤥᤖᤡᤰ ᤘᤖ᤺ᤱᤅᤥ ᤛᤥᤗᤥᤔᤏᤖᤧ ᤜᤠᤱᤅᤡᤸᤗᤧ ᤗᤧᤱᤜᤱ ᤆᤥ᤺ᤰᤔᤠ ᤁᤢᤗᤢᤵ ᤌᤡᤰ ᤘᤠᤗᤠᤎᤠᤜᤠ᤹ ᤁᤳᤋᤢᤛᤡ॥ ᤋᤱᤒᤣ ᤛᤢᤶᤛᤡ ᤌᤰᤔᤠ ᤁᤴ ᤘᤠᤗᤠᤎᤠᤜᤠ᤹ᤖᤧ ᤛᤠᤶᤔᤩᤠᤱ. ᤕᤢᤵᤐᤠ. ᤋᤰᤔᤡᤒᤠ ᤁᤣ᤺ᤱ. ᤁᤢᤔᤡ ᤁᤧᤜᤥᤵᤐᤠ ᤂ᤹ᤒᤢᤜᤠ᤹ ᤏᤢ ᤛᤒᤠᤜᤠ᤹ ᤔᤧᤍᤠᤖᤢᤛᤡᤀᤠᤱ ᤔᤧᤍᤩᤧ॥ 23 ᤛᤥᤗᤥᤔᤏ ᤜᤠᤱᤅᤡᤴ ᤕᤠᤱᤛᤠᤁᤢᤴᤎᤣ ᤜᤧᤰᤁᤩᤠᤱ ᤛᤡᤰᤁᤢᤶᤏᤡᤱᤘᤠ᤹ᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤘᤣ᤹ ᤁᤧᤖᤧᤰ ᤜᤠᤱᤜᤠ᤹ᤏᤢ᤺ᤸᤗᤧ ᤁᤧᤃᤵᤐᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥᤃᤧ॥ 24 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤡᤰᤗᤢᤱᤔᤠ᤹ᤀᤥ ᤁᤣ᤺ᤳᤋᤢ ᤐᤡᤖᤢᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤧᤶᤛᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤛᤥᤗᤥᤔᤏᤖᤧ ᤁᤢᤍᤢᤶᤛᤧ ᤔᤧᤍᤩᤧ॥ 25 ᤜᤧᤰᤁᤣᤗ᤹ᤖᤡᤰ ᤁᤧᤍᤠᤒᤠ ᤁᤧᤖᤧᤰᤗᤧ ᤋᤱᤒᤣ ᤌᤰᤔᤠ ᤕᤢᤵᤐᤠ. ᤛᤶᤔᤩᤠᤱ ᤛᤠᤔᤠᤜᤠ᤹. ᤆᤠᤱᤜᤠ᤹. ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹. ᤔᤠᤖᤢ᤺ᤰᤜᤠ᤹. ᤀᤴ ᤏᤢ ᤀᤴᤕᤥᤰᤜᤠ᤹ ᤂᤢᤴᤇᤡ᤹ ᤌᤥ᤺ᤰᤗᤠ ᤔᤧᤍᤠᤖᤢ॥ 26 ᤛᤥᤗᤥᤔᤏᤖᤧ ᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ ᤛᤢᤵᤛᤢᤛᤡ॥ ᤂᤢᤏᤧ᤹ ᤜᤧᤴᤇᤡᤱ ᤌᤡᤰᤁᤠᤱ ᤁᤡᤵ ᤗᤡᤛᤡ ᤀᤴᤗᤠᤎᤠᤜᤠ᤹ ᤏᤢ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤀᤴᤜᤠ᤹ ᤁᤳᤋᤢᤛᤡ. ᤂᤧᤱᤜᤠ᤹ ᤂᤢᤏᤧ᤹ ᤀᤴᤗᤠᤎᤠ ᤕᤧᤶᤔᤠ ᤕᤧᤰᤕᤰᤜᤠ᤹ᤀᤥ ᤏᤢ ᤂᤢᤏᤧ᤹ᤏᤢ ᤛᤥᤖᤡᤰ ᤕᤖᤢᤛᤗᤧ᤺ᤶᤔᤥᤀᤠᤱ ᤕᤧᤵᤛᤢᤛᤡ॥ 27 ᤕᤖᤢᤛᤗᤧ᤺ᤶᤔᤥ ᤜᤠᤱᤅᤡᤸᤗᤧ ᤗᤢᤱ ᤕᤠᤖᤡᤰ ᤕᤖᤡᤰ ᤕᤢᤵᤐᤠ ᤁᤳᤋᤢ ᤜᤧᤰᤁᤩᤠᤱ ᤛᤠᤶᤔᤠᤱᤛᤡᤱᤜᤠ᤹ᤃ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥᤒᤠ ᤋᤠᤶᤓᤢᤱ ᤐᤀᤣᤵᤐᤠᤜᤠ᤹ᤖᤧ ᤁᤢᤒᤢᤱᤜᤠ᤹ ᤕᤠᤖᤡᤰ ᤕᤖᤡᤰ ᤆᤥᤃᤢ॥ 28 ᤛᤥᤗᤥᤔᤥᤏᤖᤧ ᤁᤢᤀᤴᤜᤠ᤹ ᤔᤡᤛᤪ ᤗᤠᤈᤣ᤹ ᤏᤢ ᤁᤩᤢᤀᤣᤗᤠᤶ ᤔᤧᤎᤠᤰᤋᤢᤛᤡᤀᤠᤱ ᤘᤕᤧ॥ ᤜᤠᤱᤅᤡᤸᤗᤧ ᤁᤢᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤧᤱᤜᤠ᤹ ᤁᤩᤢᤀᤣᤗᤠᤶ ᤔᤧᤀᤡᤅᤢ ᤔᤧᤎᤠᤰᤋᤢᤛᤡ॥ 29 ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤗᤠᤶ ᤁᤡᤵ ᤋᤢᤰᤛᤡ ᤕᤢᤵᤐᤠ ᤁᤢᤀᤠ᤺ᤳ ᤁᤢᤔᤧᤸᤗᤢᤱᤗᤧ ᤗᤳᤇᤠ ᤀᤴᤗᤠᤎᤠ ᤏᤢ ᤁᤡᤵ ᤌᤡᤰᤁᤠᤱ ᤁᤢᤓᤪᤧ᤺ᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤁᤢᤔᤧᤸᤗᤢᤱᤗᤧ ᤗᤳᤇᤠ ᤀᤴ ᤔᤧᤀᤡᤅᤢ ᤔᤧᤍᤠᤖᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤡᤳᤋᤡᤜᤠ᤹ ᤏᤢ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤀᤥ ᤂᤧᤴ ᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ ᤔᤧᤛᤱᤄᤢ ᤔᤧᤍᤣᤛᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.