᥇ ᤁᤥᤖᤴᤌᤡ 9 - LIFOTNTᤐᤠᤘᤗᤖᤧ ᤁᤢᤗᤠᤄᤥᤜᤠ᤹ ᤗᤧᤖᤢ᤹ 1 ᤘᤣ᤹ᤜᤠ᤹ ᤁᤢᤀᤡᤛᤡᤰ ᤀᤡᤱᤃᤠ᤹ ᤆᤥ᤺ᤰᤕᤢᤶᤓᤥ ᤔᤧᤃᤳᤋᤠᤴᤒᤡ᥅ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤔᤧ᤺ᤴᤏᤠᤒᤡ᥅ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤡᤰᤁᤡᤸᤗᤧ ᤔᤧᤴᤏᤡᤒᤧᤴᤒᤡ᥅ ᤍᤠᤱᤒᤠᤀᤥ ᤕᤠᤶᤒᤢᤎᤡᤰᤐᤠ ᤀᤠᤕᤠ᤺ᤶᤒᤰᤁᤡᤴ ᤂᤡᤏᤡ᤹ᤏᤡᤱᤅᤣ ᤔᤣ᤺ᤶᤒᤡ᥅ 2 ᤘᤣ᤹ᤜᤠ᤹ᤖᤧ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤗ᤹ᤖᤡᤰ ᤔᤧᤴᤀᤡ᤺ᤳᤋᤠᤴᤇᤠᤱ ᤂᤡᤏᤡ᤹ ᤗᤠᤃᤡᤃ ᤛᤣ᤺ᤰᤕᤢᤰᤔᤡᤒᤠᤀᤠᤀᤣᤖᤥ॥ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤁᤢᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ᤀᤣ ᤋᤛᤡ-ᤐᤷᤔᤠᤱᤃᤡ ᤁᤧᤘᤕᤡ᤹ᤖᤥ॥ 3 ᤀᤡᤱᤃᤠ᤹ ᤀᤠᤕᤢᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤜᤠ᤹ᤃ ᤒᤠᤁᤴ ᤏᤥᤃᤵ ᤐᤡᤖᤢᤱᤛᤡᤱᤗᤥ॥ 4 ᤀᤠᤏᤡᤃᤣ ᤕᤠ᤺ᤶᤒᤰᤗᤠᤶ ᤆᤠᤔᤠ ᤌᤢᤱᤔᤠ ᤔᤧᤄᤥ᤺ᤛᤢᤶᤒᤧᤶᤒᤡ᥅ 5 ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤍᤠᤱᤒᤠᤸᤗᤧ ᤁᤢᤴᤛᤠ᤹ᤛᤡ ᤜᤧᤰᤁᤩᤠᤱ ᤐᤋᤪᤢᤛᤛᤡ ᤁᤢᤀᤡᤛᤡᤰ ᤀᤠᤒᤠᤅᤣ ᤏᤛᤠᤏᤡᤔᤠ ᤔᤣ᤺ᤳᤋᤡᤴᤏᤢ ᤗᤠᤶᤍᤡᤰ ᤆᤥ᤺ᤰᤔᤠ ᤕᤢᤰ ᤔᤧᤃᤳᤋᤢᤶᤒᤠᤴᤒᤡ᥅ 6 ᤀᤡ ᤒᤖᤏᤠᤒᤠᤛ ᤏᤢ ᤀᤡᤱᤃᤠ᤹ᤖᤰ ᤜᤡᤱᤒᤪᤠᤶᤗᤧ ᤗᤠᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱᤒᤠᤒᤡ᥅ 7 ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤐᤣ᤺ᤰᤕᤠᤱᤅᤥ ᤌᤰᤛᤢᤒᤠ ᤕᤠ᤺ᤶᤒᤰ ᤆᤥᤃᤢᤒᤣ᥅ ᤀᤠᤳᤋᤡᤸᤗᤧ ᤆᤧᤸᤗᤧᤰᤛᤣ᤹ᤀᤡᤰ ᤗᤣ᤺ᤳᤋᤢᤀᤠᤱ ᤁᤢᤈᤠ᤹ᤀᤡᤴ ᤔᤧᤈᤏᤧᤴᤒᤣ᥅ ᤀᤠᤳᤋᤡᤸᤗᤧ ᤐᤡᤵᤔᤠ᤺ᤴ ᤜᤡᤱᤄᤢᤀᤠᤱ ᤂᤧᤸᤗᤧ ᤁᤢᤏᤢ᤺ᤴ ᤔᤧᤎᤢᤅᤢᤴᤒᤣ᥅ 8 ᤁᤱᤃ ᤀᤡᤱᤃᤠ᤹ ᤔᤧᤴᤇᤠᤶ ᤁᤢᤛᤡᤱ ᤏᤡ᤺ᤵᤔᤥᤖᤰ ᤐᤠ᤺ᤳᤋᤢᤱᤒᤠ ᤔᤣ᤺ᤴᤗᤥ. ᤁᤖ ᤛᤠᤶᤕᤥᤌᤡᤶᤔᤡᤸᤗᤧᤀᤠᤱ ᤒᤠ ᤀᤰᤂᤣ ᤔᤧᤒᤠ᤺ᤳᤋᤢᤶᤒᤡ᥅ 9 ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤆᤠ ᤁᤧᤏᤢᤰᤐᤠ ᤐᤡᤳᤋᤡᤸᤗᤧ ᤁᤢᤔᤢᤖᤠᤀᤥ ᤆ᤺ᤵᤐᤡᤸᤗᤧ ᤔᤧᤛᤢ᤺ᤵᤋᤧᤴᤏᤧ᤹ᤀᤥ.” ᤌᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤳᤜᤠ᤹ᤖᤰ ᤂᤧᤶᤔᤩᤠᤰ ᤁᤥᤈᤠᤰ ᤔᤧᤳᤋᤢᤛᤡᤒᤡ᥅ 10 ᤛᤧᤰᤂᤠᤛᤠᤱ ᤁᤱᤃ ᤀᤠᤏᤡ᤹ ᤗᤠᤃᤡᤀᤣ ᤐᤠ᤺ᤳᤋᤢᤒᤠ ᤔᤣ᤺ᤶᤒᤡ᥅ ᤀᤥᤖᤥ. ᤌᤣᤀᤠᤱᤓᤧᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤁᤧᤎᤥ᤺ᤱᤒᤠ ᤏᤢ ᤐᤥᤃᤢᤃᤧᤴ ᤁᤢᤈᤠ ᤁᤧᤛᤢᤶᤒᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧᤴ ᤗᤰ ᤂᤥᤔᤠ ᤂᤢᤏᤧ᤹ ᤏᤡᤱᤛᤠᤱ ᤆᤥᤃᤢ᤹ᤖᤥ॥ 11 ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤣ ᤕᤠᤶᤛᤠᤶᤃᤧᤴ ᤕᤠ᤹ᤖᤡ᤺ᤶᤒᤠᤴ ᤜᤧ᤹ᤖᤢᤶᤒᤧᤀᤠᤱ ᤘᤕᤡᤃᤧᤏᤧ ᤑᤠ᤹ᤃᤪ ᤂᤡᤏᤡ᤹ᤗᤠᤶ ᤀᤠᤏᤡᤃᤣ ᤆᤠᤜᤠᤒᤠ ᤆᤥᤃᤡᤃᤧᤒᤠ ᤐᤠ᤺ᤴᤜᤠ᤹ ᤂᤥᤔᤠ ᤔᤧᤛᤢᤰᤋᤢᤶᤒᤧᤴᤒᤡ᥅ 12 ᤘᤣ᤹ᤜᤠ᤹ᤖᤧ ᤂᤡᤏᤡ᤹ᤗᤠᤶ ᤁᤢᤓᤠ᤹ ᤂᤥᤔᤠ ᤕᤢᤰ ᤔᤧᤃᤳᤋᤢᤏᤧ ᤑᤠ᤹ᤃᤪ ᤀᤠᤏᤡᤃᤧᤃ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤃᤳᤋᤢᤶᤒᤧᤴᤒᤡ᥅ ᤁᤖ ᤀᤠᤏᤡᤃᤧᤃ ᤁᤴ ᤕᤢᤰᤁᤡᤴ ᤀᤥᤃᤵ ᤔᤧᤈᤥᤃᤢᤶᤒᤧᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠᤃ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤂᤔᤠ ᤔᤣ᤺ᤴ ᤑᤠ᤹ᤀᤠᤱ ᤌᤣᤛᤠᤱ ᤌᤖᤢᤶᤒᤧᤖᤥ॥ 13 ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤠᤱᤜᤡᤶᤔᤥᤗᤠᤶ ᤋᤥ᤺ᤶᤔᤏᤠᤒᤠ ᤁᤢᤈᤠᤴ ᤔᤧᤄᤥᤛᤢ᤹ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤶᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤗᤰ ᤔᤧᤄᤥᤛᤢ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ 14 ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧᤀᤠᤱ ᤛᤢᤏᤠᤀᤡᤱ ᤀᤡᤱᤓᤴ ᤁᤧᤈᤥ᤺ᤰᤐᤠᤜᤠ᤹ ᤛᤢᤏᤠᤀᤡᤱᤗᤠᤶᤒᤠᤀᤣ ᤔᤧᤜᤡᤱᤗ ᤑᤠ᤹ᤀᤠᤱ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤠ᤹ᤖᤥ॥ 15 ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤴᤏᤠᤱ ᤁᤴ ᤕᤢᤰᤜᤠ᤹ ᤀᤥᤃᤵ ᤔᤧᤴᤈᤥ᤺ᤰᤐᤠᤴᤗᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤀᤠᤗᤠᤃᤡ ᤕᤠᤵᤔᤡ ᤁᤧᤈᤥᤃᤡ ᤁᤧᤒᤡᤖᤡᤖ ᤁᤧᤗ᤹ᤒᤠ ᤏᤡᤱᤛᤠᤱᤏᤢ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤒᤠ ᤔᤣ᤺ᤴᤗᤥ॥ ᤁᤴ ᤐᤠ᤺ᤴᤏᤥ ᤆᤥᤃᤢᤱᤒᤠ ᤀᤠᤱᤍᤡᤱᤅᤡᤴ ᤁᤢᤓᤠ ᤔᤏᤠᤜᤠ᤹ᤖᤧ ᤜᤏᤧ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤡᤀᤠᤛᤠᤱ ᤐᤥᤱᤗᤥ॥ 16 ᤜᤧᤰᤁᤣᤛᤠᤱ ᤛᤢᤏᤠᤀᤡᤱ ᤀᤡᤱᤓᤥᤛᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤱᤍᤡᤱ ᤔᤧᤈᤥ᤺ᤰᤁᤠᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤆᤥ᤺ᤰᤔᤠᤀᤣ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ ᤛᤢᤏᤠᤀᤡᤱ ᤀᤡᤱᤔᤧᤓᤥᤀᤠᤴᤏᤧ ᤑᤠ᤹ᤃᤪ ᤆᤡ᤺ᤳᤋᤠᤱ ᤛᤩᤠᤱᤗᤥ᥄ 17 ᤁᤖ ᤁᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤗᤠᤶᤔᤣ ᤆᤥᤃᤢᤱᤏᤧ ᤑᤠ᤹ᤃᤪ ᤜᤠᤱᤛᤧᤶᤔᤡᤴ ᤂᤥᤛᤢᤱᤗᤥ. ᤁᤖ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤗᤠᤶ ᤔᤧᤈᤥ᤺ᤰᤁᤠᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤠ᤹ᤖᤠᤱᤅᤠᤱ ᤐᤡᤖᤠᤱᤒᤠ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤗᤰᤐᤧᤴᤏᤡᤴᤗᤰ ᤆᤥᤃᤢᤱᤗᤥ॥ 18 ᤜᤧᤰᤁᤣ᤺ᤸᤗᤧ ᤀᤠᤜᤠᤱᤛᤧᤶᤔᤡᤱᤃ ᤌᤣ᤺ᤴᤒᤣ᥅ ᤀᤠᤜᤠᤱᤛᤧᤶᤔᤡᤴ ᤒᤠ ᤁᤴᤗᤥ—ᤀᤡᤱᤃᤠ᤹ᤃ ᤛᤢᤏᤠᤀᤡᤱ ᤀᤡᤱᤓᤥᤛᤢᤱᤅᤡᤸᤗᤧ ᤏᤠᤶᤕᤠᤰ ᤔᤣ᤺ᤴᤏᤣ ᤀᤡᤱᤓᤥᤔᤠ ᤐᤥᤱᤗ॥ ᤜᤧᤰᤁᤣᤗ᤹ᤖᤡᤰ ᤛᤢᤏᤠᤀᤡᤱ ᤀᤡᤱᤓᤥᤛᤢᤱᤅᤡᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤀᤠᤕᤢᤰᤜᤠ᤹ ᤀᤥᤃᤵ ᤔᤧᤈᤥ᤺ᤰᤁᤠᤴᤗᤥ॥ 19 ᤀᤡᤱᤃᤠ᤹ᤃ ᤆᤥ᤺ᤰᤕᤢᤶᤓᤥᤀᤥ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤕᤢᤰᤁᤥ ᤜᤥ᤺ᤵᤐᤠᤛᤠᤱ ᤕᤖᤡᤰ ᤔᤏᤠᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤥᤰ ᤐᤥ᤺ᤰᤂᤠᤱᤗᤥ॥ 20 ᤕᤜᤢᤍᤡᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ ᤁᤢᤀᤡᤛᤡᤰ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤖᤧ ᤁᤢᤕᤢᤰᤁᤥᤃ ᤜᤥ᤺ᤵᤋᤠᤱᤛᤠᤱ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤁᤧᤘᤠ᤹ᤒᤠᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ 21 ᤛᤠᤶᤕᤥᤌᤡᤶ ᤔᤧᤴᤏᤠ᤺ᤵᤔᤏᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ (ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤏᤠ᤺ᤳᤋᤢᤱᤅᤡᤴᤒᤠ ᤔᤣ᤺ᤴ. ᤁᤖ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥) 22 ᤏᤛᤠᤴ ᤁᤧᤒᤠ᤺ᤰᤐᤠᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ᤀᤠᤱ ᤏᤛᤠᤴ ᤁᤧᤒᤠ᤺ᤰᤐᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ ᤁᤢᤓᤠ ᤔᤏᤠᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠ ᤛᤢᤰᤋᤢᤱᤛᤡᤱᤒᤡ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ 23 ᤛᤢᤏᤠᤀᤡᤱᤅᤡᤸᤗᤧᤴ ᤔᤢ᤹ᤀᤡᤛᤠᤶᤜᤠ᤹ ᤂᤥᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤛᤢᤏᤠᤀᤡᤱᤅᤡᤸᤗᤧ ᤗᤠᤃᤡᤀᤣ ᤁᤴ ᤁᤠᤰ ᤐᤠ᤺ᤴᤜᤠ᤹ ᤆᤥᤃᤢᤱᤗᤥ॥ 24 ᤗᤥ᤺ᤰᤗᤥ᤺ᤰᤁᤣ ᤜᤰᤆᤠ᤺ᤳ ᤏᤠ᤺ᤴᤒᤥᤀᤥ ᤁᤠᤰ ᤔᤏᤠᤜᤠ᤹ ᤔᤧᤗᤥᤰ. ᤁᤖ ᤌᤡᤰᤗᤧᤖᤰ ᤌᤢᤶᤄᤥᤴ ᤂᤥᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤌᤢᤶᤄᤥᤴ ᤂᤥᤔᤠ ᤑᤠ᤹ᤀᤠᤱ ᤗᤥ᤺ᤰᤋᤧᤶᤔᤧ᤹ᤀᤥ॥ 25 ᤀᤠᤸᤗ ᤜᤰᤆᤠ᤺ᤳ ᤁᤧᤈᤠ᤺ᤵᤐᤠ ᤁᤧᤖᤧᤰᤗᤧ ᤁᤧᤛᤠᤰᤐᤠ ᤛᤎᤠᤛᤡᤱᤔᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤁᤧᤔᤧᤰᤐᤠ ᤁᤧᤒᤣ᤺ᤰᤐᤠ ᤋᤡᤆ᤺ ᤂᤥᤛᤧ ᤜᤧᤰᤁᤣ ᤔᤧᤈᤥᤃᤢ᤹. ᤁᤖ ᤀᤠᤏᤡ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤌᤢᤶᤄᤥᤃᤧᤴ ᤋᤡᤆ᤺ ᤂᤥᤛᤧ ᤜᤧᤰᤁᤣ ᤀᤠᤈᤥᤃᤢᤶᤗᤥ॥ 26 ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ᤃ ᤋᤠᤖᤵ ᤔᤣ᤺ᤴᤏᤣ ᤔᤧᤗᤥ᤺ᤰᤁᤠᤴᤗᤥ॥ ᤜᤧᤰᤁᤩᤠᤱ ᤜᤢᤰᤐᤢᤳᤋᤡᤸᤗᤧ ᤛᤢᤖᤡᤳᤔᤠᤀᤥ ᤁᤧᤜᤡᤵᤐᤠ ᤁᤢᤀᤡᤛᤡ᤺ᤰᤁᤠᤱ ᤔᤧᤈᤥ᤺ᤰᤁᤠᤴᤗᤥ॥ 27 ᤘᤣ᤹ᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥᤛᤢᤱᤛᤡᤱᤅᤠᤱ ᤀᤠᤒᤠᤅᤣᤃ ᤛᤢᤶᤒᤥᤎᤠ ᤔᤣ᤺ᤴᤏᤣᤒᤠ ᤔᤧᤒᤥᤱᤅᤠᤴᤗ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤡᤴ ᤀᤡᤱᤃᤠ᤹ ᤀᤠᤕᤢᤰᤁᤥ ᤁᤳᤋᤢᤱ ᤜᤧᤰᤁᤩᤠᤱ ᤀᤠᤕᤥᤰ ᤆᤥᤃᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.