᥇ ᤁᤥᤖᤴᤌᤡ 7 - LIFOTNTᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ 1 ᤀᤠᤸᤗ ᤂᤡᤏᤡ᤹ ᤁᤧᤛᤠᤵᤋᤢᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤀᤡᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ—ᤕᤧᤶᤒᤡᤳᤇᤠ᤹ᤀᤡᤸᤗᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤡᤸᤗᤧᤀᤣ ᤏᤢᤒᤠ ᤐᤥᤱᤗᤥ॥ 2 ᤁᤖ ᤆᤠᤖᤠᤶᤔᤠ ᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰ ᤐᤥᤱᤒᤠᤸᤗᤧ ᤆᤥᤃᤢᤸᤗᤧ ᤔᤏᤠ᤺ᤸᤗᤧ ᤀᤠᤒᤠᤅᤣ ᤔᤧᤸᤗᤡᤱᤃᤧᤴ ᤔᤣ᤺ᤳ ᤁᤳᤋᤢᤏᤡᤖᤥ ᤜᤧᤰᤁᤩᤠᤱ ᤔᤧᤴᤇᤢᤔᤠ᤹ᤀᤡᤸᤗᤧᤀᤠᤱ ᤀᤠᤒᤠᤅᤣ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ ᤁᤳᤋᤢᤏᤡᤖᤥ॥ 3 ᤜᤧᤰᤁᤩᤠᤱ ᤕᤧᤶᤒᤠ᤹ᤀᤡᤴ ᤀᤠᤒᤠᤅᤣ ᤁᤢᤔᤣ᤺ᤳᤋᤡᤴᤏᤢ ᤀᤡᤶᤔᤠ ᤐᤥᤱ. ᤜᤧᤰᤁᤣᤗ᤹ᤖᤡᤰᤁᤣ ᤔᤣ᤺ᤳᤋᤡᤴᤏᤠᤱ ᤀᤠᤒᤠᤅᤣ ᤁᤢᤕᤧᤶᤒᤠ᤹ᤀᤡᤴᤏᤢ ᤀᤡᤶᤔᤠ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤔᤣ᤺ᤰᤂᤡᤶᤗᤧᤴ ᤗᤰᤐᤧᤴᤏᤥ ᤀᤳᤇᤡᤱᤔᤠ ᤔᤣ᤺ᤴᤗᤥ॥ 4 ᤔᤣ᤺ᤳᤋᤡᤸᤗᤧ ᤁᤢᤎᤰ ᤛᤶᤍᤠᤱ ᤀᤠᤒᤠᤅᤣ ᤕᤢᤰ ᤔᤧᤃᤳᤋᤢᤴ ᤁᤖ ᤁᤢᤕᤧᤶᤒᤠ᤺ᤸᤗᤧ ᤁᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤠ᤺ᤸᤗᤧᤀᤠᤱ ᤁᤢᤎᤰ ᤛᤶᤍᤠᤱ ᤀᤠᤒᤠᤅᤣ ᤕᤢᤰ ᤔᤧᤃᤳᤋᤢᤴ ᤁᤖ ᤁᤢᤔᤣ᤺ᤳᤋᤡᤸᤗᤧ ᤁᤳᤋᤢ᤹ᤖᤥ॥ 5 ᤔᤣ᤺ᤳ ᤕᤧᤶᤒᤠ᤹ᤃ ᤔᤧᤴᤏᤠ᤹ᤛᤡᤱᤅᤣ ᤔᤧᤴᤀᤳᤇᤡᤱᤅᤣ ᤛᤥᤖᤡᤰ ᤀᤡᤶᤔᤠ ᤐᤥᤱᤗᤥ॥ ᤋᤢᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤓᤠ ᤕᤧᤶᤗᤧ ᤗᤠᤃᤡᤖᤰ ᤏᤡᤱᤘᤠ᤹ ᤋᤱᤔᤠᤀᤠᤱ ᤘᤣ᤹ ᤘᤠ᤹ᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤕᤠᤶᤔᤥ ᤂᤡᤏᤡ᤹ᤃ ᤛᤥᤖᤡᤰ ᤘᤕᤧᤶᤔᤧ᤹ᤀᤥ ᤔᤣ᤺ᤴᤏᤣ ᤑᤠ᤹ᤃᤪ ᤕᤠᤶᤌᤰᤏᤡᤱᤘᤠ᤹ ᤌᤶᤔᤠ ᤔᤧᤴᤇᤢᤰᤔᤏᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤄᤡ᤹ᤖᤥ॥ 6 ᤁᤱᤃ ᤀᤡᤱᤈᤠᤱ ᤁᤢᤀᤡᤛᤡ᤺ᤰᤁ ᤔᤣ᤺ᤴ. ᤁᤖ ᤜᤧᤰᤁᤣ ᤆᤥ᤺ᤰᤔᤠ ᤛᤢᤈᤠ ᤐᤡᤏᤡᤱᤒᤠᤖᤥ॥ 7 ᤁᤠᤰ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤢᤀᤡᤛᤡᤰ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤁᤖ ᤁᤠᤰ ᤔᤏᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤠᤱ ᤘᤠ᤹ᤔᤠ ᤀᤡᤃᤪ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤘᤠ᤹ᤔᤠ ᤐᤷᤎᤠ᤺ᤶ ᤔᤧᤄᤥᤛᤢᤀᤠᤱ ᤘᤠ᤹ᤖᤥ॥ 8 ᤀᤠᤸᤗ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤗᤥ—ᤂᤧᤱᤜᤠ᤹ᤃ ᤀᤡᤱᤃᤠ᤹ ᤁᤢᤀᤡᤛᤡ᤺ᤰᤁᤣ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤀᤡᤸᤗᤧ ᤏᤢᤒᤠ ᤐᤥᤱᤗᤥ॥ 9 ᤁᤖ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤕᤠᤶᤛᤥ᤺ᤵᤔᤠᤴ ᤕᤢᤰᤔᤠ ᤔᤧᤴᤇᤢᤰᤋᤢᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤖᤀᤣ ᤐᤥᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠᤖᤠᤶᤔᤠ ᤏᤡᤱᤘᤠ᤹ᤀᤡᤸᤗᤧ ᤕᤧ᤺ᤱᤛᤡᤱᤔᤠᤖ ᤘᤠ᤹ᤔᤠᤏᤢ᤺ᤸᤗᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤏᤢᤒᤠ ᤐᤥᤱᤗᤥ॥ 10 ᤀᤠᤸᤗ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠᤜᤠ᤹ᤃ ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤱᤛᤡᤱᤗᤥ (ᤀᤡᤱᤃᤠ᤹ᤃ ᤔᤣ᤺ᤴ. ᤁᤖ ᤍᤠᤱᤒᤠᤸᤗᤧᤖᤥ) ᤔᤧᤸᤗᤡᤱᤃᤧᤴ ᤔᤣ᤺ᤳᤋᤡᤴ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤺ᤴᤏᤢ ᤛᤧᤶᤔᤠᤀᤠᤱ ᤘᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥ 11 ᤁᤖ ᤂᤧᤴ ᤘᤣ᤹ ᤛᤧᤴᤏᤠᤱ ᤘᤠ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤘᤠ᤹ᤏᤡᤖᤥ. ᤔᤣ᤺ᤴᤏᤣ ᤑᤠ᤹ᤃᤪ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤺ᤴᤏᤢ ᤏᤠᤍᤱ ᤆᤥ᤺ᤰᤔᤠ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤳᤌᤢᤱᤃᤧᤴ ᤕᤧᤶᤒᤠ᤺ᤸᤗᤧᤀᤠᤱ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤔᤧᤏᤠ᤹ᤖᤢᤴᤗᤖᤥ॥ 12 ᤀᤠᤸᤗ ᤂᤡᤏᤡ᤹ ᤘᤣ᤹ᤜᤠ᤹ ᤀᤰᤂᤣ ᤔᤧᤳᤏᤡᤱᤗᤥ (ᤁᤱᤃ ᤀᤡᤱᤃᤠ᤹ ᤀᤠᤒᤠ᤺ᤴᤗᤥ. ᤍᤠᤱᤒᤠᤸᤗᤧᤴ ᤔᤣ᤺ᤴᤗᤥ) ᤏᤛᤠᤴ ᤁᤧᤈᤥ᤺ᤰᤐᤠ ᤏᤢᤛᤠ᤹ᤀᤡᤸᤗᤧ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤧᤶᤒᤠ᤹ᤀᤡᤴᤏᤢᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ. ᤂᤧᤴ ᤏᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥ 13 ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠᤴ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤧᤶᤒᤠ᤹ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤴ ᤁᤢᤔᤣ᤺ᤳᤋᤡᤴᤏᤢᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ. ᤂᤧᤸᤗᤧᤀᤠᤱ ᤁᤢᤕᤧᤶᤒᤠ᤹ᤀᤡᤴ ᤗᤠᤵᤑᤢᤔᤠ ᤔᤧᤏᤢ᤹ᤏᤧᤴᤗᤥ॥ 14 ᤌᤣᤀᤠᤱᤓᤧᤸᤗᤧ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤀᤡᤴ ᤏᤛᤠᤴ ᤁᤧᤈᤥ᤺ᤰᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳᤋᤡᤴᤏᤢ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧᤴ ᤛᤣᤛᤣ ᤆᤥᤰᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠᤴ ᤁᤧᤈᤥ᤺ᤰᤐᤠ ᤀᤡᤳᤌᤢᤱᤃᤧᤴ ᤕᤧᤶᤒᤠ᤺ᤴᤏᤢ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳᤋᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤣᤛᤣ ᤆᤥᤰᤗᤥ॥ ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ ᤀᤠᤛᤢᤳᤌᤥ ᤔᤧᤒᤥᤱᤒᤠ ᤘᤕᤧ. ᤁᤖ ᤜᤧᤰᤁᤣ ᤔᤧᤶᤒᤥᤱᤏᤧᤴᤗᤥ. ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤛᤣᤛᤣ ᤔᤧᤈᤥᤰᤗᤥ॥ 15 ᤜᤧᤰᤁᤣᤛᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤧᤸᤗᤡᤱᤃᤧᤴ ᤔᤣ᤺ᤳᤋᤡᤸᤗᤧ ᤀᤡᤃᤪ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤀᤡᤸᤗᤧ ᤛᤧᤶᤔᤠᤀᤠᤱ ᤐᤣ᤺ᤰᤔᤠᤀᤣ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤐᤣ᤺ᤰᤏᤡᤖᤥ॥ ᤀᤰᤋᤱᤒᤠ ᤕᤠᤰᤏᤠᤶᤔᤥ ᤏᤛᤠᤴ ᤁᤧᤈᤥ᤺ᤰᤔᤠ ᤔᤣ᤺ᤳ ᤀᤡᤃᤪ ᤕᤧᤶᤒᤠ᤹ ᤀᤠᤳᤋᤡᤴᤏᤠᤱ ᤀᤡᤓᤢᤳᤋᤥ ᤔᤧᤴᤘᤠ᤹ᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤛᤏᤠᤖᤢᤱᤅᤥ ᤘᤠ᤹ᤛᤧᤏᤧ ᤀᤠᤀᤢ᤺ᤳᤋᤧᤀᤠᤱ ᤀᤠᤘᤠ᤹ᤖᤥ॥ 16 ᤏᤛᤠᤴ ᤁᤧᤈᤥ᤺ᤰᤔᤠ ᤔᤣ᤺ᤳᤜᤠ᤹ᤖᤧ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤡᤏᤡ᤹ ᤕᤧᤶᤒᤠᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤠᤒᤡ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤠᤜᤠ᤹ᤖᤧᤀᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤔᤠ ᤂᤡᤏᤡ᤹ ᤔᤣ᤺ᤳᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤠᤒᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤘᤠ᤹ᤔᤠ 17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤢ᤺ᤳᤋᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤘᤕᤧ. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧ ᤛᤣ᤺ᤰᤕᤢᤰ ᤁᤧᤈᤥᤃᤧᤒᤠᤀᤥ ᤁᤧᤘᤠ᤹ᤖ ᤐᤥᤱᤗᤥ॥ ᤁᤠᤰ ᤛᤣᤛᤣᤜᤢᤵᤗᤰᤁᤥ ᤒᤠ ᤁᤴᤏᤣ ᤀᤡᤱᤃᤠ᤹ ᤀᤠᤈᤥ᤺ᤰᤌᤡᤶᤗᤥ॥ 18 ᤜᤧᤰᤁᤣᤛᤠᤱ ᤜᤷᤍᤥ ᤁᤧᤜᤧᤰᤐᤠᤸᤗᤧ ᤏᤛᤠᤴ ᤆᤥᤃᤢᤏᤧ ᤑᤠ᤹ᤃᤪ. ᤂᤧᤴ ᤜᤷᤍᤥ ᤔᤧᤴᤜᤧᤰᤔᤏᤠ ᤁᤢᤀᤡᤛᤡᤰ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤜᤷᤍᤥ ᤔᤧᤴᤜᤧᤰᤔᤏᤠᤒᤠᤸᤗᤧ ᤏᤛᤠᤴ ᤆᤥᤃᤢᤏᤧ ᤑᤠ᤹ᤃᤪ. ᤂᤧᤸᤗᤧ ᤜᤷᤍᤥ ᤜᤧᤰᤔᤠ ᤔᤧᤒᤥᤱᤏᤧᤸᤗᤥ॥ 19 ᤜᤷᤍᤥ ᤜᤧᤰᤔᤠᤴ ᤏᤢ ᤔᤧᤴᤜᤧᤰᤔᤠᤱᤃ ᤕᤶᤒᤠ ᤐᤠᤴ ᤔᤣ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤐᤥᤱᤔᤠᤀᤣ ᤁᤧᤕᤧᤰᤐᤠ ᤐᤠ᤺ᤴᤗᤥ॥ 20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤴ ᤀᤢ᤺ᤳᤋᤢᤸᤗᤧ ᤂᤧᤴ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤕᤧ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤘᤠ᤹ᤖ ᤐᤥᤱᤗᤥ॥ 21 ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤀᤢ᤺ᤳᤋᤧᤸᤗᤧ ᤕᤥᤰ ᤁᤧᤘᤕᤧᤒᤡ᥅ ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤛᤠᤶᤔᤥ ᤔᤧᤎᤩᤧᤴᤏᤧ᤹ᤀᤥ. ᤁᤖ ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤆᤥ᤺ᤰᤕᤢᤶᤓᤥᤒᤠ ᤐᤥᤱᤔᤠ ᤋᤶᤛᤡᤱ ᤆᤥᤃᤧ᤹ᤀᤥ॥ 22 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤀᤢ᤺ᤳᤋᤢᤸᤗᤧ ᤕᤥᤰ ᤁᤧᤘᤠ᤹ᤒᤠ ᤔᤏᤠᤴ ᤍᤠᤱᤒᤠᤸᤗᤧ ᤆᤥ᤺ᤰᤕᤢᤶᤓᤥᤒᤠ ᤁᤢᤔᤏᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧ ᤀᤢ᤺ᤳᤋᤢᤸᤗᤧ ᤆᤥ᤺ᤰᤕᤢᤶᤓᤥᤀᤥ ᤁᤧᤘᤠ᤹ᤒᤠ ᤔᤏᤠ᤺ᤱᤃ ᤂᤪᤡᤛ᤻ᤋᤖᤧ ᤁᤢᤕᤥᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 23 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤂᤡᤏᤡ᤹ ᤁᤧᤎᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤔᤧᤴᤇᤠᤶ ᤕᤥᤰ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ᤀᤥ॥ 24 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤏᤠᤴ ᤀᤢ᤺ᤳᤋᤧᤸᤗᤧ ᤂᤧᤴ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤕᤧ. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤠ᤹ᤖ ᤐᤥᤱᤗᤥ॥ ᤔᤣ᤺ᤰᤂᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤜᤠ᤹ 25 ᤀᤠᤸᤗ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤍᤠᤱᤒᤠᤗᤠᤶ ᤌᤣᤀᤠᤱ ᤀᤡᤱᤈᤠᤱ ᤀᤡᤱᤃᤠ᤹ ᤔᤧᤃᤳᤋᤢᤱᤅᤡᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤏᤛᤠ᤺ᤴᤛᤠᤒᤠ ᤔᤏᤠ ᤁᤢᤀᤡᤛᤡᤰ ᤛᤢᤈᤠ ᤐᤡᤏᤡᤱᤗᤥ॥ 26 ᤁᤥᤕᤧᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤁᤧᤘᤠ᤹. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤁᤧᤘᤠ᤹ᤀᤡᤸᤗᤧ ᤏᤢᤒᤠ ᤐᤥᤱᤗᤥ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ 27 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤔᤣ᤺ᤰᤂᤡᤶ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤏᤧ ᤑᤠ᤹ᤃᤪ ᤛᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹ᤀᤥ॥ ᤂᤧᤏᤧ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤏᤧ ᤑᤠ᤹ᤃᤪ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹ᤀᤥ॥ 28 ᤁᤖ ᤔᤣ᤺ᤰᤂᤡᤶ ᤁᤧᤈᤥᤃᤢ᤹ᤏᤧ ᤑᤠ᤹ᤃᤪ ᤗᤠᤕᤥ ᤔᤧᤒᤥᤱᤏᤧᤸᤗᤥ॥ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠᤸᤗᤧᤀᤠᤱ ᤔᤣ᤺ᤰᤂᤡᤶ ᤆᤥᤃᤢ᤹ᤏᤧ ᤑᤠ᤹ᤃᤪ ᤗᤠᤕᤥ ᤔᤧᤈᤥᤃᤢᤴᤗᤥ॥ ᤁᤖ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤴ ᤜᤡᤱᤔᤴᤏᤥ ᤀᤡᤏᤥᤃᤧᤴ ᤋᤢᤰᤂᤣᤴ ᤔᤧᤍᤢᤔᤢ᤹ᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤜᤧᤰᤋᤱᤒᤠ ᤋᤢᤰᤂᤣᤀᤥᤗᤠᤶᤒᤠ ᤂᤡᤏᤡ᤹ ᤋᤠᤱᤛᤧ᤺ᤵᤔᤠᤏᤡᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥ 29 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤑᤠ᤹ᤗᤧ. ᤍᤠᤱᤒᤠᤴ ᤜᤠᤖᤠ ᤕᤢ᤺ᤖ ᤐᤳᤗᤥ॥ ᤀᤠᤸᤗᤀᤠᤱᤎᤥ ᤔᤣ᤺ᤳ ᤁᤧᤘᤠ᤹ᤒᤠᤜᤠ᤹ ᤔᤣ᤺ᤳ ᤔᤣ᤺ᤴᤏᤣ ᤁᤧᤘᤠ᤹ᤒᤠᤜᤠ᤹ ᤁᤢᤀᤡᤛᤡᤰ ᤘᤠ᤹ᤔᤠ ᤐᤥᤱᤗᤥ. 30 ᤜᤧᤰᤁᤩᤠᤱ ᤔᤧᤖᤡᤱ ᤁᤧᤎᤰᤐᤠᤜᤠ᤹ ᤔᤧᤖᤡᤱ ᤔᤧᤴᤎᤰᤔᤏᤠ ᤁᤢᤀᤡᤛᤡᤰ. ᤀᤥᤔᤢ ᤁᤧᤗ᤹ᤒᤠᤜᤠ᤹ ᤀᤥᤔᤢ ᤔᤧᤴᤗ᤹ᤔᤏᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤆᤡᤃᤰᤘᤠ ᤁᤧᤃᤵᤐᤠᤜᤠ᤹ ᤌᤣᤀᤠᤱ ᤔᤧᤱᤃᤵᤔᤏᤠᤒᤠ ᤁᤢᤀᤡᤛᤡᤰ ᤔᤧᤘᤠ᤹ᤏᤡᤖᤥ॥ 31 ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤆᤡᤃᤰᤘᤠᤜᤠ᤹ ᤀᤥᤃᤵ ᤁᤧᤈᤥ᤺ᤰᤐᤠᤜᤠ᤹ ᤂᤧᤵᤔᤥ ᤏᤡᤱᤘᤠ᤹ ᤔᤧᤶᤒᤡᤔᤏᤠᤒᤠ ᤔᤏᤠ ᤁᤢᤀᤡᤛᤡᤰ ᤘᤠ᤹ᤔᤠ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤗᤧᤱᤛᤡᤱᤅᤠᤱ ᤐᤣ᤺ᤰᤗ ᤐᤳᤗᤥ॥ 32 ᤁᤴ ᤜᤡᤱᤔᤴᤏᤥᤒᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤌᤠ᤺ᤖᤥ॥ 33 ᤁᤖ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧᤃ ᤀᤠᤰᤂᤣᤗ᤹ᤖᤡᤰ ᤀᤠᤔᤣ᤺ᤳᤋᤡᤴ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤖᤧᤴ ᤏᤡᤱᤛᤠᤶᤔᤥ ᤌᤠᤖᤥ. 34 ᤜᤧᤰᤁᤣᤗ᤹ᤖᤡᤰ ᤁᤢᤏᤡᤱᤘᤠ᤹ ᤜᤠᤛᤡᤱᤗᤥ॥ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ ᤀᤡᤃᤪ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤸᤗᤧ ᤌᤰᤁᤡᤴ ᤏᤢ ᤕᤠᤶᤛᤠᤶᤔᤡᤴ ᤛᤣᤛᤣ ᤁᤵᤔᤠ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤢ᤹ᤖᤥ॥ ᤁᤖ ᤔᤣ᤺ᤰᤂᤡᤶ ᤁᤧᤒᤥᤱᤔᤠ ᤔᤧᤴᤇᤢᤔᤠ᤹ᤀᤡᤸᤗᤧᤃ ᤀᤠᤰᤂᤣᤗ᤹ᤖᤡᤰ ᤀᤠᤕᤧᤶᤒᤠᤴ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤢ᤹ᤖᤥ॥ 35 ᤀᤡᤱᤃᤠ᤹ᤃ ᤂᤡᤏᤡ᤹ᤀᤣ ᤏᤢᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤒᤠᤖᤥ॥ ᤂᤡᤏᤡ᤹ ᤔᤣ᤺ᤰᤂᤡᤶ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤰᤏᤡᤱᤒᤠᤃ ᤔᤣ᤺ᤴᤗᤥ॥ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤥ ᤂᤡᤏᤡ᤹ ᤏᤡᤱᤘᤠ᤹ ᤔᤧᤴᤜᤠᤛᤡᤱᤅᤣ ᤁᤢᤍᤥ᤺ᤵᤔᤠ ᤐᤠ᤺ᤴᤏᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ 36 ᤀᤠᤳᤋᤡᤴ ᤔᤏᤠ᤺ᤸᤗᤧ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤐᤠᤴ ᤁᤧᤒᤢ᤹ᤔᤠ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤏᤢᤒᤠ ᤐᤠᤴ ᤔᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹ᤀᤠᤱ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤠᤱ ᤋᤢᤶ ᤔᤧᤴᤇᤡᤕᤠ᤹ ᤐᤥᤱᤗ ᤐᤳᤋᤠᤱ ᤂᤧᤸᤗᤧ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡᤋᤢᤏᤧ ᤑᤠ᤹ᤃᤪ. ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤆᤥᤃᤢᤖᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤗᤠᤕᤥ ᤔᤧᤈᤥᤃᤢᤴᤗᤥ॥ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥᤱᤗᤥ॥ 37 ᤁᤖ ᤀᤠᤳᤋᤡᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤀᤥ ᤀᤡᤃᤢ ᤔᤧᤳᤇᤡᤱᤅᤠᤱ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥᤱ ᤁᤧᤗ᤹ᤒᤠ ᤛᤠᤰᤁᤧᤸᤗᤧᤰ ᤜᤥ᤺ᤵᤐᤠᤱ ᤁᤢᤏᤡᤱᤘᤠ᤹ ᤕᤢᤰᤔᤠ ᤛᤢᤰᤋᤢ᤹ᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤏᤢᤒᤠᤀᤣ ᤆᤥᤃᤢ᤹ᤖᤥ॥ 38 ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤏᤢᤒᤠᤀᤣ ᤆᤥᤃᤢ᤹. ᤁᤖ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤏᤢᤒᤠ ᤆᤥᤃᤢ᤹ᤖᤥ॥ 39 ᤜᤧᤰᤁᤣᤗ᤹ᤖᤡᤰ ᤕᤧᤶᤒᤠ᤹ᤀᤡᤴ ᤜᤡᤱᤗ ᤌᤠᤖᤡᤰᤗᤰ ᤔᤣ᤺ᤳᤋᤡᤴ ᤁᤢᤕᤧᤶᤒᤠ᤺ᤸᤗᤧ ᤁᤢᤕᤢᤰᤁᤥ ᤘᤠ᤹ᤖᤥ॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡᤀᤠᤱᤃ ᤂᤧᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤘᤣ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤛᤢᤰᤋᤢ᤹. ᤁᤖ ᤂᤧᤴ ᤔᤏᤠ᤺ᤱᤃ ᤏᤛᤠᤏᤡᤒᤠᤀᤣ ᤐᤥᤱᤔᤠ ᤐᤥᤱᤗᤥ॥ 40 ᤁᤖ ᤀᤠᤏᤡᤱᤘᤠ᤹ᤀᤥ ᤂᤧᤸᤗᤧ ᤕᤠᤶᤔᤥ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤁᤢᤗᤠᤃᤡ ᤏᤢᤒᤠ ᤐᤥᤱ. ᤜᤧᤰᤁᤩᤠᤱ ᤁᤴ ᤐᤠ᤺ᤳᤋᤢᤱᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤛᤢᤈᤠ ᤐᤡᤏᤡᤱᤒᤠ ᤑᤠ᤹ᤀᤠᤱ ᤀᤡ᤺ᤳᤋᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.