᥇ ᤁᤥᤖᤴᤌᤡ 5 - LIFOTNT

ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤗ᤺ᤵᤔᤠᤍᤣᤔᤠ

¹ ᤂᤡᤏᤡ᤹ ᤗᤢᤶᤔᤥ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤠ᤹. ᤂᤡᤏᤡ᤹ᤀᤥ ᤗᤳᤇᤠ᤺ᤸᤗᤧ ᤀᤠᤒᤠᤅᤣ ᤁᤢᤶᤔᤠ ᤐᤠ᤺ᤰᤔᤠᤴ ᤔᤣ᤺ᤳ ᤁᤳᤋᤢᤀᤠᤱ ᤘᤠ᤹ᤔᤢ᥄ ᤜᤧᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤱᤃ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤢᤘᤠᤱᤗᤢᤶᤔᤥᤀᤠᤱ ᤔᤧᤒᤥᤱᤏᤧᤸᤗᤥ॥

² ᤁᤖ ᤂᤡᤏᤡ᤹ᤃ ᤀᤠᤱᤍᤡᤱᤏᤧ ᤁᤧᤗ᤹ᤖᤡ᤹᥄ ᤂᤡᤏᤡ᤹ᤃ ᤔᤧᤖᤡᤱ ᤌᤰᤔᤠ ᤁᤧᤒᤥᤱᤒᤠᤏᤧ ᤘᤕᤧ. ᤜᤧᤰᤁᤩᤠᤱ ᤜᤧᤰᤋᤱᤒᤠ ᤔᤏᤠᤴ ᤂᤡᤏᤡ᤹ ᤛᤣᤛᤣ ᤋᤱᤈᤢᤶᤗᤠᤶ ᤗ᤺ᤵᤔᤠᤍᤣᤔᤠ ᤁᤧᤒᤥᤱᤒᤠ ᤘᤕᤧ॥

³ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤀᤠᤏᤡᤱᤘᤠ᤹ᤀᤥᤃ ᤛᤥᤖᤡᤰᤁᤣ ᤘᤠ᤹ᤀᤠᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤴᤍᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥

⁴ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤛᤣᤛᤣᤜᤢᤵᤗᤰᤁᤥ ᤂᤡᤏᤡ᤹ ᤁᤧᤈᤢᤵᤛᤡᤸᤗᤧ ᤂᤡᤏᤡ᤹ᤏᤢ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤴ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤢᤰᤛᤠᤶᤔᤡᤴᤏᤢ ᤘᤠ᤹ᤀᤡᤸᤗᤧ.

⁵ ᤂᤧᤴ ᤔᤏᤠᤴ ᤛᤣᤛᤣᤜᤢᤵᤗᤰᤗᤠᤶᤒᤠ ᤗ᤺ᤳᤋᤧᤶᤍᤣᤛᤧᤶᤔᤧ᤹ᤀᤠᤱ ᤔᤠᤑᤧᤴᤛᤠᤶᤔᤡᤴ ᤜᤢᤰᤛᤢᤵᤋᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤔᤧᤰᤗ ᤜᤧᤰᤁᤩᤠᤱ ᤁᤢᤕᤠᤶᤛᤠᤶᤔᤡᤴ ᤍᤠᤱᤒᤠᤴ ᤏᤢᤱ ᤕᤢᤒᤠ ᤕᤧᤴᤏᤥ ᤋᤠᤱᤛᤧ᤺ᤵᤗᤖᤥ॥

⁶ ᤂᤡᤏᤡ᤹ ᤀᤠᤱᤍᤡᤱ ᤗ᤹ᤔᤠᤱᤃ ᤏᤢᤒᤠ ᤐᤠᤴ ᤔᤣ᤺ᤴᤗᤥ॥ ᤂᤖᤧ᤺ᤱ ᤁᤧᤓᤱᤒᤠ ᤆᤩ᤹ᤛᤡᤰ ᤛᤡᤍᤠ᤹ᤀᤡᤸᤗᤧ ᤁᤧᤖᤧᤰ ᤑᤣ᤹ᤖᤢᤶᤔᤡᤴ ᤕᤢᤰᤋᤢᤒᤠ ᤁᤢᤀᤡᤛᤡᤰ ᤆᤩ᤹ᤛᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤑᤧᤳᤗᤠ᤺ᤴᤍᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅

⁷ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤣᤛᤣᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤧᤴ ᤗᤠᤕᤥ ᤁᤧᤈᤥ᤺ᤰᤐᤠ ᤋᤠᤵᤑᤧ᤺ᤶᤒᤠ ᤔᤏᤠᤴ ᤂᤡᤏᤡ᤹ ᤗᤢᤶᤔᤥᤗᤠᤶ ᤗ᤺ᤳᤋᤧᤶᤍᤣᤛᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤀᤠᤏᤡ᤹ ᤗᤠᤃᤡ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤆᤢᤖᤧᤀᤠᤱ ᤘᤠ᤹ᤖᤥ. ᤂᤢᤏᤧ᤹ᤀᤣ ᤀᤠᤏᤡ᤹ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤔᤧᤸᤗᤢᤰᤛᤠᤖᤥ॥

⁸ ᤀᤠᤏᤡ᤹ᤃ ᤋᤃᤡᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤗᤠᤕᤥ ᤜᤧᤰᤋᤱᤒᤠ ᤂᤧ᤹ᤛᤢᤱ ᤁᤢᤎᤡᤶᤒᤠ ᤂᤖᤧ᤺ᤱᤅᤡᤸᤗᤧ ᤔᤣ᤺ᤴ. ᤁᤖ ᤛᤣᤛᤣᤒᤠ ᤏᤢ ᤛᤧᤰᤂᤠᤒᤠ ᤁᤢᤛᤱ ᤂᤖᤧ᤺ᤱᤅᤡᤸᤗᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤗᤧᤴ ᤛᤛᤠᤱᤛᤪᤥᤳ ᤆᤥᤃᤢᤶᤗᤥ॥

⁹ ᤋᤃᤡ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤔᤧᤘᤕᤧᤶᤔᤡᤴᤏᤧ᤹ ᤗ᤹ᤖᤡᤰ ᤀᤡᤱᤃᤠ᤹ ᤛᤰᤀᤡᤱᤄᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤅᤠᤱ ᤘᤕᤠᤱ॥

¹⁰ ᤂᤧᤴ ᤑᤠ᤹ᤀᤡᤱᤃ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤂᤡ᤺ᤶᤕᤰᤐᤠ. ᤀᤡᤱᤗᤧᤰᤐᤠ. ᤏᤠᤘᤠᤀᤡᤳᤗᤠ ᤔᤠᤱᤃᤧᤄᤒᤠᤜᤠ᤹ᤏᤢ ᤔᤧᤘᤕᤧᤶᤔᤡᤴᤏᤧ᤹ ᤁᤧᤗ᤹ᤒᤠᤃ ᤔᤣ᤺ᤴᤗᤥ॥ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠ ᤗ᤺ᤶᤔᤠ ᤐᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧᤖᤥ॥

¹¹ ᤁᤖ ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤰᤀᤡᤱᤄᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ. ᤀᤠᤳᤋᤡᤸᤗᤧ ᤀᤠᤒᤠᤅᤣ ᤏᤛᤠᤏᤡᤒᤠ ᤏᤢᤛᤠ᤹ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤡ᤺ᤶᤕᤰᤐᤠ ᤆᤥᤰ. ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤆᤥᤃᤢ᤹. ᤔᤏᤠ ᤀᤡᤱᤍᤥ ᤔᤧᤳᤋᤢᤛᤡ᤹. ᤌᤡᤔᤛᤠᤱ ᤏᤢ ᤀᤡᤱᤗᤧᤰᤐᤠ ᤆᤥᤰ ᤜᤧᤰᤋᤱᤒᤠ ᤔᤏᤠ᤺ᤱᤃ ᤆᤢᤶ ᤔᤧᤗᤣ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤜᤧᤰᤋᤱᤒᤠ ᤔᤏᤠ᤺ᤴᤏᤢ ᤛᤥᤖᤡᤰ ᤆᤠᤀᤠᤱ ᤔᤧᤈᤧᤶᤔᤡᤴᤏᤧ᤹ᤀᤥ॥

¹² ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤣᤛᤣᤜᤢᤵᤗᤰᤐᤠ ᤗᤠᤁᤠᤳᤐᤠ ᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤶᤔᤠᤛᤡ ᤀᤡᤱᤃᤠ᤹ ᤀᤠᤗᤰᤐᤧᤴ ᤔᤣ᤺ᤴᤗᤥ. ᤁᤖ ᤛᤣᤛᤣᤜᤢᤵᤗᤰ ᤛᤡᤃᤠᤱᤒᤠ ᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤶᤔᤠᤃ ᤂᤡᤏᤡ᤹ ᤕᤠ᤺ᤶᤒᤰᤗᤥ॥

¹³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤁᤠᤳᤐᤠ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ. ᤁᤖ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ “ᤋᤠᤵᤑᤧ᤺ᤶᤒᤠ ᤗᤠᤕᤥ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤂᤡᤏᤡ᤹ ᤗᤢᤶᤔᤥᤗᤠᤶ ᤗ᤺ᤳᤋᤧᤶᤍᤣᤛᤧᤶᤛᤡᤶᤔᤧ᤹ᤀᤥ॥”