᥇ ᤁᤥᤖᤴᤌᤡ 3 - LIFOTNTᤛᤣᤛᤣᤜᤢᤵᤗᤰᤁᤥ ᤏᤡᤱᤘᤠ᤹ ᤔᤧᤴᤍᤱ ᤐᤠ᤺ᤴᤜᤠ᤹ 1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤂᤡᤏᤡ᤹ᤏᤢ ᤐᤠᤖᤠᤱᤅᤡᤸᤗᤧ ᤕᤠᤶᤛᤠᤶᤃᤧᤴ ᤔᤏᤠᤜᤠ᤹ᤏᤢ ᤐᤠᤖᤠᤱᤒᤠ ᤁᤢᤀᤡᤛᤡᤰ ᤔᤧᤶᤒᤠ᤺ᤵᤐᤧᤴ. ᤁᤖ ᤀᤡᤰᤛᤠᤒᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤜᤧᤰᤋᤱᤒᤠ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤀᤅᤧ᤺ᤰᤘᤠᤜᤠ᤹ᤏᤢ ᤐᤠ᤺ᤵᤔᤏᤠᤒᤠ ᤁᤢᤀᤡᤛᤡᤰ ᤐᤠᤖᤠᤱᤗᤥ॥ 2 ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤂᤠᤰᤂᤠᤰᤐᤠ ᤋ᤺ᤰ ᤜᤧᤰᤁᤣ ᤔᤧᤈᤥᤃᤧᤴ. ᤁᤖ ᤏᤢ ᤜᤧᤰᤋᤱᤒᤠ ᤆᤥᤃᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤠᤰᤂᤠᤰᤐᤠ ᤋ᤺ᤰ ᤆᤠᤔᤠ ᤔᤧᤴᤇᤢᤰᤁᤣ ᤁᤧᤘᤕᤡᤖᤥ॥ ᤀᤠᤸᤗᤥᤛᤠᤱ ᤂᤠᤰᤂᤠᤰᤐᤠ ᤋ᤺ᤰ ᤆᤠᤔᤠ ᤁᤧᤛᤢᤰᤐᤠ ᤔᤧᤶᤒᤥᤱᤅᤣ ᤁᤧᤘᤕᤡ᤹ᤖᤥ. 3 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤸᤗᤥ ᤌᤠᤖᤡᤰ ᤀᤡᤰᤛᤠᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤗᤢᤶᤔᤥ ᤏᤠᤜᤧᤳᤇᤡᤱᤔᤠ ᤏᤢ ᤂᤧᤔᤠ᤹ ᤘᤠ᤹ᤀᤡᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤀᤡᤰᤛᤠᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤡᤀᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ ᤁᤢᤀᤡᤛᤡᤰ ᤁᤧᤶᤒᤥ᤺ᤰᤂᤡᤴᤒᤡ᥅ 4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤐᤠᤘᤗᤧᤴ ᤋᤡᤶᤍᤢᤱ ᤗ᤹. ᤘᤣ᤹ᤛᤔᤠᤸᤗᤧ ᤀᤡᤱᤃᤠ᤹ ᤀᤵᤐᤥᤗᤥᤛᤧᤴ ᤋᤡᤶᤍᤢᤱ ᤗ᤹ᤀᤡᤸᤗᤧ ᤂᤡᤏᤡ᤹ ᤏᤛᤠᤴ ᤔᤧᤴᤈᤥ᤺ᤰᤔᤏᤠ ᤔᤏᤠ ᤜᤧᤰᤋᤱᤒᤠ ᤁᤧᤶᤒᤥ᤺ᤰᤂᤡᤶᤒᤡ᥅ 5 ᤀᤵᤐᤥᤗᤥᤛᤧᤴ ᤏᤢ ᤐᤠᤘᤗᤧᤴ ᤜᤠ᤺ᤳᤇᤡᤒᤣ᥅ ᤀᤠᤴᤇᤡᤃᤣᤃ ᤍᤠᤱᤒᤠᤸᤗᤧ ᤔᤢᤖᤠ ᤔᤧᤳᤋᤧᤇᤡᤃᤧᤒᤠ. ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤛᤣᤘᤠᤖᤥᤒᤠᤛᤡᤃᤧᤖᤰᤗᤥ॥ ᤀᤠᤴᤇᤡᤃᤧᤗᤠᤶᤒᤠᤀᤣ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥ 6 ᤀᤡᤱᤃᤠ᤹ ᤕᤠ᤹ᤖᤡ᤺ᤶᤒᤠ ᤗᤣ᤺ᤳᤋᤢᤱ. ᤀᤵᤐᤥᤗᤥᤛᤖᤧ ᤆᤫᤠ᤺ᤳ ᤁᤣ᤺ᤳᤋᤢ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤥᤛᤢᤖᤥ॥ 7 ᤂᤧᤸᤗᤧᤆᤥᤃᤢᤸᤗᤧ ᤕᤠ᤹ ᤁᤧᤗᤣ᤺ᤵᤐᤠ ᤏᤢ ᤆᤫᤠ᤺ᤳ ᤁᤧᤃᤣ᤺ᤵᤐᤠᤜᤠ᤹ ᤌᤣᤛᤡᤀᤠᤱ ᤔᤣ᤺ᤴᤗᤥ॥ ᤁᤖ ᤁᤧᤓᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤁᤧᤕᤧᤰᤐᤠᤖᤥ॥ 8 ᤕᤠ᤹ᤖᤡ᤺ᤶᤒᤠ ᤁᤧᤗᤣ᤺ᤵᤐᤧᤴ ᤏᤢ ᤆᤫᤠ᤺ᤳ ᤁᤧᤃᤣ᤺ᤵᤐᤠᤱᤃ ᤁᤢᤍᤱᤒᤠᤛᤡᤖᤥ॥ ᤂᤧᤱᤜᤠ᤹ᤖᤧ ᤕᤠᤶᤒᤢᤎᤡᤰ ᤆᤥ᤺ᤰᤛᤢᤒᤠ ᤁᤢᤀᤡᤛᤡᤰ ᤀᤠᤒᤠᤅᤣ ᤂᤢᤴᤇᤡ᤹ ᤌᤢᤶᤄᤥᤴ ᤂᤥᤛᤢ᤹ᤖᤥ॥ 9 ᤌᤣᤀᤠᤱᤓᤧᤸᤗᤧ ᤀᤠᤴᤇᤡᤃᤣ ᤛᤥᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤃᤧᤖᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤋᤠᤵ ᤏᤢ ᤁᤢᤜᤡᤶᤏᤡᤱᤗᤥ॥ 10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ ᤀᤡᤱᤃᤠ᤹ ᤆᤠ᤺ᤵᤐᤠ ᤜᤡᤶ ᤁᤧᤈᤥ᤺ᤰᤐᤠ ᤁᤢᤀᤡᤛᤡᤰ ᤜᤡᤶᤐᤠᤱᤕᤰᤁᤡᤴ ᤏᤧᤛ᤻ᤛᤢᤱ. ᤜᤧᤰᤁᤩᤠᤱ ᤘᤣ᤹ᤛᤔᤠᤸᤗᤧ ᤂᤧᤴ ᤛᤶᤍᤠᤱ ᤗᤢᤱᤎᤠᤰ ᤛᤧᤳᤋᤢᤖ ᤜᤡᤶ ᤆᤥᤃᤢ᤹॥ ᤁᤖ ᤗᤢᤱᤎᤠᤰ ᤁᤧᤛᤧᤵᤐᤠᤖ ᤜᤡᤶ ᤁᤧᤈᤥ᤺ᤰᤐᤠᤸᤗᤧ ᤜᤡᤶ ᤆᤥᤃᤢᤸᤗᤧ ᤂᤢᤏᤧ᤹ ᤛᤡᤱᤛᤡᤱ ᤗ᤹ᤔᤠ ᤐᤥᤱᤗᤥ॥ 11 ᤌᤣᤀᤠᤱᤓᤧᤸᤗᤧ ᤋᤃᤡ ᤏᤧᤛ᤻ᤛᤧ ᤆᤢᤖᤧᤒᤠ ᤜᤡᤶᤐᤠᤱᤕᤰᤁᤡᤱᤃ ᤕᤧᤛᤢ ᤂᤪᤡᤛ᤻ᤋᤖᤥ॥ ᤂᤧᤴ ᤏᤧᤔᤏᤠᤒᤠ ᤜᤡᤶᤐᤠᤱᤕᤰᤁᤡᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤘᤣ᤹ ᤜᤡᤶᤐᤠᤱᤕᤰ ᤏᤧᤔᤠ ᤔᤧᤴᤇᤢᤰᤋᤢᤴᤗᤥ॥ 12 ᤀᤠᤸᤗ ᤜᤡᤶ ᤁᤧᤈᤥ᤺ᤰᤐᤠᤸᤗᤧ ᤂᤧᤴ ᤛᤶᤍᤠᤱ ᤛᤠᤶᤔᤩᤠᤱ. ᤕᤢᤵᤐᤠ. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱ. ᤛᤡᤱ. ᤕᤠ᤺ᤴᤛᤢᤱ ᤀᤡᤃᤪ ᤕᤠ᤹ᤗᤠᤱᤅᤡᤸᤗᤧ ᤜᤡᤶ ᤆᤥᤃᤢᤏᤧ ᤑᤠ᤹ᤃᤪ 13 ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤡᤴ ᤀᤠᤰᤋᤱᤒᤠ ᤆᤥᤰ ᤑᤠ᤹ᤀᤠᤱ ᤂᤧᤴ ᤂᤠᤛᤧᤴ ᤕᤧᤴᤏᤥ ᤀᤥᤛᤣ᤺ᤴᤍᤠᤱ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤛᤧᤰᤂᤠᤒᤠ ᤆᤥ᤺ᤰᤐᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤔᤡ᤺ᤸᤗᤧᤀᤣ ᤛᤠ᤹ᤖᤢᤖᤥ॥ 14 ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤡ᤺ᤸᤗᤧ ᤔᤧᤈᤏᤧᤴ ᤂᤧᤸᤗᤧ ᤌᤢᤶᤄᤥ ᤂᤥᤛᤢ᤹ᤖᤥ॥ 15 ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤡ᤺ᤸᤗᤧ ᤌᤩ᤺ᤱ ᤆᤍᤣᤛᤢ᤹. ᤂᤧᤴ ᤔᤏᤠᤴ ᤕᤶᤒᤠ ᤑᤧᤳᤗᤠ᤹ᤔᤠᤀᤥ ᤌᤠᤖᤥ॥ ᤂᤧᤴ ᤋᤠᤱᤛᤧ᤺ᤵᤛᤠᤱ ᤔᤡ᤺ᤸᤗᤧ ᤂᤵᤔᤧ ᤗᤠᤒᤢ ᤛᤧᤖᤢᤒᤠ ᤁᤢᤀᤡᤛᤡᤰ ᤐᤥᤱᤗᤥ॥ 16 ᤂᤡᤏᤡ᤹ᤃ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤏᤡᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤶᤒᤡ᥅ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤡᤏᤡ᤹ᤀᤥ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤶᤒᤡ᥅ 17 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤑᤧᤳᤗᤠ᤺ᤴᤍᤢ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤰᤂᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤱᤃ ᤛᤣᤛᤣ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤴ ᤔᤠᤱᤜᤡᤶᤔᤡᤱᤃ ᤂᤡᤏᤡ᤹ᤀᤣᤖᤥ॥ 18 ᤂᤡᤏᤡ᤹ ᤀᤡᤱᤔᤧᤗᤧᤰᤁᤠᤛᤡᤶᤔᤡᤴᤏᤧ᤹ᤀᤥ᥄ ᤀᤠᤳᤋᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤰᤁᤢᤶᤍᤠᤱᤒᤠ ᤏᤢ ᤆᤠ᤺ᤵᤐᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹ ᤜᤠᤖᤠ᤹ ᤂᤧᤴ ᤌᤣᤀᤠᤱ ᤔᤧᤸᤗᤧ᤺ᤶᤏᤠᤒᤠ ᤀᤍᤱ ᤁᤢᤀᤡᤛᤡᤰ ᤐᤥᤱᤏᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤛᤡᤰᤁᤢᤶᤛᤠᤒᤠ ᤐᤥᤱ॥ 19 ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤰᤁᤢᤶ ᤏᤡᤱᤘᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥᤃ ᤀᤍᤱᤐᤠᤴ ᤁᤢᤀᤡᤛᤡ᤺ᤰᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ᤃ ᤛᤡᤰᤁᤢᤶᤍᤠᤱᤒᤠᤜᤠ᤹ ᤂᤢᤏᤡ᤹ ᤀᤡᤛᤫᤠᤔᤥ ᤋᤧᤶᤛᤢᤛᤡᤖᤥ॥” 20 ᤜᤧᤰᤁᤩᤠᤱ ᤕᤠᤶᤔᤥ. “ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤏᤧᤒᤠ ᤆᤥᤰ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤏᤡᤖᤥ॥” 21 ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤀᤠᤱᤍᤡᤱ ᤔᤧᤴᤗ᤹ᤏᤧᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤂᤢᤏᤧ᤹ᤀᤡᤴᤏᤣᤖᤥ॥ 22 ᤐᤠᤘᤗ. ᤀᤵᤐᤥᤸᤗᤥᤛ. ᤐᤋᤪᤢᤛ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤏᤧᤳᤋᤡᤃᤧᤴ ᤜᤡᤱᤔᤴ. ᤛᤡᤔᤧᤴ. ᤁᤥᤕᤧᤶᤒᤠ ᤕᤧᤶᤔᤡᤴ ᤏᤢ ᤋᤠᤕᤧᤶᤔᤡᤴᤏᤠᤱ ᤂᤢᤏᤧ᤹ᤀᤡᤴᤏᤣᤖᤥ॥ 23 ᤜᤧᤰᤁᤩᤠᤱ ᤂᤡᤏᤡ᤹ᤃ ᤂᤪᤡᤛ᤻ᤋᤧᤸᤗᤧᤴᤏᤡᤱᤗᤥ॥ ᤜᤧᤰᤁᤩᤠᤱ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.