᥇ ᤁᤥᤖᤴᤌᤡ 15 - LIFOTNTᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤜᤡᤱ 1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤀᤥ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤒᤠ ᤛᤢᤏᤠᤀᤡᤱᤅᤡᤴ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤋᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤴ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶᤔᤠᤱ ᤒᤠ ᤂᤧᤴ ᤏᤛᤠ᤺ᤴᤏᤥ ᤆᤰᤔᤧᤸᤗ᤹ᤀᤣ ᤁᤧᤒᤳᤇᤡᤖᤥ॥ 2 ᤀᤡᤱᤃᤠ᤹ ᤀᤡᤱᤓᤴ ᤆᤥ᤺ᤰᤏᤡᤱᤒᤠ ᤂᤧᤴ ᤛᤢᤏᤠᤀᤡᤱᤅᤡᤴ ᤏᤛᤠᤴ ᤁᤧᤈᤥᤃᤢᤶᤔᤠᤱ ᤁᤧᤴᤗᤧᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤴᤗᤵ ᤁᤧᤄᤥᤛᤢᤶᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤒᤠᤱᤃ ᤜᤏᤧᤖᤰ ᤐᤥᤱᤗᤥ॥ 3 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤥᤛᤢᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤜᤢᤰᤛᤢᤵᤏᤡᤱᤅᤠᤱ ᤘᤠ᤹ᤖᤥ—ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤛᤧ ᤛᤩᤧ. 4 ᤂᤢᤏᤧ᤹ ᤔᤧᤗᤢᤵᤋᤢᤒᤠ. ᤛᤢᤶ ᤕᤧᤴᤏᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤛᤡᤔᤧᤴᤗᤠᤶ ᤜᤡᤅᤧ. 5 ᤂᤢᤏᤧ᤹ ᤐᤋᤪᤢᤛᤧᤴᤏᤢ ᤌᤠ᤺ᤶᤛᤡᤱ. ᤜᤧᤰᤁᤩᤠᤱ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥ 6 ᤕᤠᤱᤛᤡ ᤌᤡᤰᤗᤧᤱᤔᤥ ᤁᤢᤃᤡᤵ ᤅᤠᤛᤡ (᥋᥆᥆) ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥ ᤂᤧᤱᤜᤠ᤹ᤀᤥᤃ ᤁᤢᤓᤠ ᤔᤧᤛᤩᤧ ᤔᤧᤒᤣᤛᤠᤱ ᤁᤢᤓᤠᤃ ᤁᤢᤜᤡᤱᤘᤧᤳᤋᤣ ᤔᤧᤘᤠ᤹ᤖᤥ॥ 7 ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤁᤢᤒᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥ 8 ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤁᤢᤕᤧᤶ ᤔᤧᤱᤃᤧᤳᤋᤣ ᤛᤠᤃᤧᤘᤠ᤺ᤴᤇᤡᤱᤒᤠᤸᤗᤥ ᤁᤢᤀᤡᤛᤡᤰ ᤀᤡᤱᤃᤠ᤹ᤀᤥᤀᤠᤱ ᤌᤠ᤺ᤶᤛᤡᤱᤗᤥ॥ 9 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢ᤺ᤰᤐᤠᤀᤠᤖᤥ॥ ᤀᤡᤱᤃᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤴ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤅᤠᤱ ᤘᤕᤧᤖᤥ॥ 10 ᤁᤖ ᤀᤠᤸᤗᤥ ᤀᤡᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤘᤠ᤹ᤀᤠ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧᤀᤣᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤀᤡᤱᤃᤠ᤹ᤀᤥ ᤆᤠᤔᤧᤛᤥ᤺ᤰᤋᤧᤴᤗᤥ॥ ᤂᤧᤴ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠᤃ ᤔᤣ᤺ᤴᤗᤥ ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤒᤠᤖᤥ॥ 11 ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ᤛᤠᤱ ᤂᤧᤱᤜᤠ᤹ᤖᤧᤛᤠᤱ ᤀᤡᤱᤓᤴ ᤆᤥ᤺ᤰᤔᤏᤠᤒᤠ ᤛᤢᤏᤠᤀᤡᤱᤅᤡᤴ ᤗᤳᤇᤠᤖᤥ. ᤜᤧᤰᤁᤩᤠᤱ ᤒᤠ ᤂᤧᤴᤏᤣ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥ 12 ᤁᤖ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤶᤒᤧᤀᤠᤱ ᤘᤠ᤹ᤀᤡᤸᤗᤧ ᤂᤡᤏᤡ᤹ ᤁᤢᤓᤠᤖᤧ ᤀᤠᤰᤂᤣᤗ᤹ᤖᤡᤰ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤔᤧᤒᤥᤱᤏᤧᤴ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤒᤠᤒᤣ᥅ 13 ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤔᤧᤒᤥᤱᤏᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤴᤗᤥ॥ 14 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤀᤠᤏᤡᤃᤣ ᤀᤡᤱᤓᤴ ᤆᤥᤃᤢᤶᤒᤧᤒᤠ ᤏᤢ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤒᤠᤱᤃ ᤜᤏᤧᤖᤰ ᤐᤥᤱᤗᤥ॥ 15 ᤂᤧᤴᤏᤢ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤏᤡᤃᤣ ᤀᤡᤱᤗᤧᤰᤁᤣ ᤐᤥ᤺ᤰᤂᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴ ᤜᤡᤱᤔᤴᤏᤥ ᤑᤥ᤺ᤰᤂᤢ ᤗ᤹ᤖᤡᤰ ᤛᤠ᤺ᤰᤂᤡ ᤐᤡᤖᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤁᤖ ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤁᤧᤛᤡᤒᤠᤜᤠ᤹ ᤛᤡᤔᤧᤴᤗᤠᤶ ᤜᤡᤱᤔᤴᤏᤥ ᤔᤧᤓᤥ᤺ᤰᤂᤢᤴᤛᤡᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤜᤡᤱᤔᤴᤏᤥ ᤔᤧᤓᤥ᤺ᤰᤂᤢᤴᤗᤥ॥ 16 ᤌᤣᤀᤠᤱᤓᤧᤸᤗᤧ ᤁᤧᤛᤡᤒᤠᤜᤠ᤹ ᤛᤡᤔᤧᤴᤗᤠᤶ ᤔᤧᤴᤜᤡᤱᤏᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤠᤱ ᤛᤡᤔᤧᤴᤗᤠᤶ ᤔᤧᤜᤡᤅᤧᤴᤗᤥ॥ 17 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤜᤏᤧᤒᤠ ᤐᤥᤱ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤂᤡᤏᤡ᤹ ᤗᤠᤕᤥᤀᤥᤀᤣ ᤁᤧᤘᤕᤡ᤹ᤖᤥ॥ 18 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡᤒᤠᤜᤠ᤹ᤖᤧᤀᤠᤱ ᤛᤧᤴᤗᤵ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥ 19 ᤁᤴ ᤜᤡᤱᤔᤴᤗᤧ ᤗᤠᤃᤡᤖᤰ ᤂᤪᤡᤛ᤻ᤋᤀᤥ ᤀᤠᤏᤡ᤹ ᤏᤡᤱᤛᤠᤱ ᤀᤠᤈᤥᤃᤢᤶᤒᤠᤏᤧ ᤑᤠ᤹ᤃᤪ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤒᤠ ᤀᤠᤈᤥ᤺ᤰᤗᤥ॥ 20 ᤁᤖ ᤂᤪᤡᤛ᤻ᤋᤧᤱᤃ ᤛᤧᤰᤂᤠᤀᤣ ᤛᤡᤔᤧᤴᤗᤠᤶ ᤜᤡᤅᤧᤖᤥ. ᤜᤧᤰᤁᤩᤠᤱ ᤁᤧᤛᤡᤒᤠᤀᤠᤱ ᤁᤧᤜᤡᤱᤒᤠᤜᤠ᤹ᤀᤥ ᤂᤢᤏᤧ᤹ᤀᤣ ᤋᤢᤶᤒᤠᤖᤥ॥ 21 ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤱᤃ ᤗᤳᤌᤡᤰ ᤔᤏᤠᤗᤠᤶᤒᤠᤀᤣ ᤋᤩᤧ. ᤜᤧᤰᤁᤣᤗ᤹ᤖᤡᤰᤁᤣ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤏᤠᤱ ᤗᤳᤌᤡᤰ ᤔᤏᤠᤗᤠᤶᤒᤠᤀᤣ ᤋᤠ᤺ᤖᤥ॥ 22 ᤌᤣᤀᤠᤱᤓᤧᤸᤗᤧ ᤀᤠᤍᤶᤔᤡᤸᤗᤧ ᤁᤢᤎᤠ᤺ᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤛᤡ᤺. ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤜᤡᤱᤗᤥ॥ 23 ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤕᤧᤶᤔᤡᤴ ᤜᤠᤱᤔᤠᤀᤣ ᤐᤥᤱᤗᤥ॥ ᤛᤡᤔᤧᤴᤗᤠᤶ ᤁᤧᤜᤡᤱᤒᤠᤜᤠ᤹ᤀᤥ ᤂᤪᤡᤛ᤻ᤋᤧᤱᤃ ᤋᤢᤶᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤱ ᤕᤢ᤺ᤸᤗᤧ ᤁᤢᤔᤏᤠᤜᤠ᤹ ᤔᤧᤜᤡᤱᤗᤥ॥ 24 ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠᤖᤥ॥ ᤂᤧᤴ ᤕᤧᤶᤔᤥ ᤂᤪᤡᤛ᤻ᤋᤖᤧ ᤁᤧᤖᤧᤰ ᤕᤠᤶᤛᤠᤶᤃᤧᤴ ᤜᤠᤱᤕᤢᤰ. ᤕᤢᤰᤜᤠ᤹ ᤏᤢ ᤔᤢᤰᤛᤠᤶᤜᤠ᤹ ᤔᤧᤰᤂᤢᤀᤠᤱ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤢᤰᤛᤢᤵᤋᤢ᤹॥ 25 ᤌᤣᤀᤠᤱᤓᤧᤸᤗᤧ ᤁᤢᤏᤡᤱᤔᤡᤜᤠ᤹ ᤁᤢᤕᤢᤰᤁᤥ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤂᤢᤏᤧ᤹ᤃ ᤜᤠᤱ ᤆᤥ᤺ᤰᤔᤠᤀᤣ ᤐᤥᤱᤗᤥ॥ 26 ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤔᤧᤱᤔᤠ ᤁᤧᤒᤥᤱᤒᤠ ᤏᤡᤱᤔᤡ᤺ᤱᤃ ᤛᤡᤔᤧᤴᤗᤥ॥ 27 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤢᤕᤢᤰᤁᤥ ᤋᤠᤖᤢᤀᤠᤱ ᤘᤠ᤹॥” ᤁᤖ “ᤁᤧᤖᤧᤰ ᤐᤠ᤺ᤴᤜᤠ᤹” ᤁᤢᤕᤢᤰᤁᤥ ᤘᤠ᤹ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤁᤢᤕᤢᤰᤁᤥ ᤘᤠ᤹ ᤁᤧᤗ᤹ᤒᤠᤃ ᤔᤧᤒᤥᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤥ ᤏᤧᤛ᤻ᤛᤢᤐᤡᤖᤢᤒᤠᤖᤥ॥ 28 ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤕᤢᤰᤁᤥ ᤋᤠ᤹᤺. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤕᤢᤰᤁᤥ ᤁᤧᤍᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤰᤁᤥ ᤀᤠᤒᤢᤃᤧᤴ ᤁᤢᤛ᤻ᤛᤠᤴᤏᤠᤱ ᤋᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤁᤧᤖᤧᤰ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤐᤠ ᤐᤥᤱᤗᤥ॥ 29 ᤀᤠᤸᤗ ᤛᤡᤔᤧᤴᤗᤠᤶ ᤜᤡᤱᤔᤴ ᤔᤧᤒᤥᤱᤏᤧᤴᤏᤧ ᤑᤠ᤹ᤃᤪ ᤁᤧᤛᤡᤒᤠᤜᤠ᤹ᤖᤧ ᤗᤠᤃᤡ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤁᤢᤒᤣᤴ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤁᤧᤛᤡᤒᤠᤜᤠ᤹ ᤔᤧᤴᤜᤡᤱᤏᤧᤴᤏᤡᤸᤗᤧ ᤌᤣᤀᤠᤱ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤒᤵᤋᤡᤛ᤻ᤔᤠ ᤔᤧᤒᤥᤱᤒᤠᤒᤣ᥅ 30 ᤜᤧᤰᤁᤩᤠᤱ ᤀᤠᤏᤡᤃᤧᤀᤠᤱ ᤁᤧᤖᤧᤰ ᤕᤧᤶᤔᤥ ᤌᤣᤀᤠᤱ ᤁᤡᤵᤔᤠ ᤁᤧᤄᤢᤒᤠᤀᤥ ᤌᤩᤧ᤹ᤀᤡᤃᤧᤖ ᤘᤕᤡᤃᤧᤒᤠᤒᤣ᥅ 31 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤂᤡᤏᤡ᤹ᤀᤥ ᤆᤥᤃᤢᤒᤠ ᤐᤠ᤺ᤴᤏᤥᤒᤠ ᤀᤠᤛᤡᤰ ᤛᤶᤔᤠᤸᤗᤧ “ᤀᤡᤱᤃᤠ᤹ ᤌᤡᤰᤕᤠ᤺ᤴᤎᤰ ᤛᤡᤔᤠ ᤕᤠᤖᤡᤵ ᤐᤥᤱᤅᤠ” ᤐᤠ᤺ᤵᤔᤠ ᤛᤢᤰᤋᤢᤱᤗᤥ॥ 32 ᤀᤣᤑᤡᤛᤛ ᤕᤧᤰᤕᤰᤁᤥ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤌᤱ ᤌᤰᤋᤠᤱᤅᤡᤸᤗᤧ ᤌᤣ ᤀᤡᤴᤎᤠ᤺ᤱ ᤂᤥᤛᤢᤱᤒᤣ᥅ ᤁᤧᤛᤡᤒᤠᤜᤠ᤹ ᤛᤡᤔᤧᤴᤗᤠᤶ ᤔᤧᤴᤜᤡᤱᤏᤧᤴᤏᤧ ᤑᤠ᤹ᤃᤪ “ᤀᤠᤏᤡ᤹ ᤆᤠᤶ ᤌᤢᤅᤢᤶ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤁ ᤀᤠᤏᤡ᤹ ᤀᤠᤛ᤻ᤛᤡᤀᤣᤖᤥ॥” 33 ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ “ᤋᤠᤵᤑᤧ᤺ᤶᤒᤠ ᤋᤣ᤺ᤱᤈᤢᤶᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤏᤢᤒᤠ ᤕᤧᤵᤗᤧᤰᤁᤡᤴ ᤑᤧᤳᤗᤠ᤹ᤖᤥ॥” 34 ᤂᤡᤏᤡ᤹ᤃ ᤛᤣᤏᤡᤱᤘᤠ᤹ᤀᤥ ᤏᤢ᤺ᤰᤂᤧᤶᤔᤧ᤹ᤀᤠᤱ ᤗᤠᤕᤥ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤥ॥ ᤂᤡᤏᤡ᤹ᤀᤥ ᤁᤢᤓᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧ᤺ᤶᤏᤠᤒᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥ ᤁᤱᤃ ᤂᤡᤏᤡ᤹ ᤛᤡᤖᤡᤱ ᤁᤧᤔᤕᤡᤖ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥ ᤛᤡᤔᤧᤴᤗᤠᤶ ᤁᤧᤜᤡᤱᤒᤠ ᤏᤠᤛᤡᤱᤃᤧᤴ ᤌᤰᤁᤡᤴ 35 ᤁᤖ ᤂᤡᤏᤡ᤹ᤀᤥ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤒᤡᤗᤠ. “ᤀᤠᤰᤂᤣᤗ᤹ᤖᤡᤰ ᤁᤧᤛᤡᤒᤠᤜᤠ᤹ ᤔᤧᤜᤡᤱᤒᤣ᥅ ᤀᤠᤰᤋᤱᤒᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤔᤧᤄᤥ᤺ᤛᤢ᤹ᤒᤣ᥅” 36 ᤀᤍᤱᤛᤣ. ᤂᤡᤏᤡ᤹ ᤁᤧᤜᤣ᤹ᤖᤢᤶᤒᤠ ᤕᤠ᤹ᤖᤡ᤺ᤶᤒᤠᤴ ᤔᤧᤴᤇᤡᤀᤣ ᤌᤠᤖᤡᤰ ᤔᤧᤗᤡᤱᤏᤧᤴᤗᤥ॥ 37 ᤂᤡᤏᤡ᤹ ᤁᤧᤜᤣ᤹ᤖᤢᤶᤒᤠ ᤕᤠ᤹ᤖᤡ᤺ᤶᤒᤠᤴ ᤋᤠ᤺ᤴᤍᤡ ᤁᤧᤒᤥᤱᤒᤠ ᤁᤢᤒᤢᤱᤅᤡᤴ ᤔᤣ᤺ᤴᤗᤥ. ᤁᤖ ᤛᤡ᤺ᤸᤗᤧᤴ ᤀᤡᤃᤪ ᤘᤣ᤹ ᤐᤖᤡᤰᤗᤧᤴ ᤕᤠ᤹ᤖᤡ᤺ᤶᤒᤠᤴᤗᤰ ᤁᤧᤜᤣ᤹ᤖᤢᤶ॥ 38 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤜᤠ᤹ ᤀᤠᤒᤠᤅᤣ ᤐᤖᤡᤰᤐᤠ ᤁᤢᤒᤢᤱᤔᤠ ᤐᤡᤖᤢᤛᤡ᤹ᤖᤥ॥ 39 ᤜᤧᤰᤁᤣᤗ᤹ᤖᤡᤰᤁᤣ ᤏᤠᤛᤡᤱᤃᤧᤴ ᤌᤰᤜᤠ᤹ᤀᤠᤱ ᤌᤡᤰ ᤐᤖᤡᤰᤗᤧᤴ ᤔᤧᤜᤥᤵᤗᤥ॥ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤌᤡᤰ ᤐᤖᤡᤰᤗᤧᤴ. ᤌᤰᤛᤠᤜᤠ᤹. ᤐᤢᤛᤠᤜᤠ᤹ ᤏᤢ ᤅᤠᤜᤠ᤹ᤖᤧᤴ ᤘᤣ᤹ ᤘᤣ᤹ ᤐᤖᤡᤰᤗᤧᤴ ᤌᤰ ᤘᤠ᤹ᤖᤥ॥ 40 ᤋᤠᤱᤛᤠᤰᤐᤥ ᤗᤠᤒᤠ. ᤏᤠᤶ. ᤂᤣ᤺ᤶᤛᤡᤰᤜᤠ᤹ ᤔᤧᤒᤳ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤌᤰᤜᤠ᤹ ᤔᤧᤘᤠ᤹ᤖᤥ. ᤁᤖ ᤋᤠᤱᤛᤠᤰᤐᤥᤒᤠ ᤗᤠᤒᤠ. ᤏᤠᤶ. ᤂᤣ᤺ᤶᤛᤡᤰᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤵᤔᤠᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤌᤰᤜᤠ᤹ᤖᤧ ᤂᤢᤏᤡ᤹ ᤂᤧᤶᤛᤡᤱᤔᤠᤴ ᤘᤣ᤹ ᤘᤣ᤹ ᤆᤥᤰᤗᤥ॥ 41 ᤏᤠᤶᤔᤡᤸᤗᤧ ᤁᤢᤀᤥ᤺ᤵᤔᤠᤴ ᤌᤡᤰ ᤐᤖᤡᤰᤗᤧᤴ. ᤗᤠᤒᤠᤸᤗᤧᤴ ᤘᤣ᤹ ᤐᤖᤡᤰᤗᤧᤴ ᤆᤥᤰ. ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤘᤣ᤹ ᤐᤖᤡᤰᤗᤧᤴ ᤆᤥᤰ॥ ᤜᤧᤰᤁᤣᤗ᤹ᤖᤡᤰᤁᤣ ᤌᤡᤰ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤏᤢ ᤘᤣ᤹ᤛᤔᤠ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤘᤣ᤹ ᤘᤣ᤹ ᤆᤥᤰᤗᤥ॥ 42 ᤜᤧᤰᤁᤩᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤆᤥᤰᤗᤥ॥ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤡ᤹᤺ ᤜᤧᤰᤁᤩᤠᤱ ᤗᤢᤵᤔᤠᤀᤠᤱ ᤁᤡ᤹᤺. ᤁᤖ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠ ᤌᤰᤁᤡᤴ ᤀᤠᤈᤢᤏᤡ ᤐᤥᤱᤗᤥ॥ 43 ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤗᤢᤵᤐᤡᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤌᤢᤶ ᤔᤣ᤺ᤴᤏᤣᤒᤠ ᤆᤥᤰ. ᤁᤖ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤅᤡᤸᤗᤧ ᤏᤢᤒᤠ ᤏᤢ ᤁᤧᤎᤢᤶᤒᤠ ᤐᤥᤱᤗᤥ॥ 44 ᤏᤠᤛᤡᤱᤃᤧᤴ ᤌᤰᤁᤡᤴ ᤗᤢᤵ. ᤜᤧᤰᤁᤩᤠᤱ ᤕᤠᤶᤛᤠᤶᤃᤧᤴ ᤌᤰᤁᤡᤴ ᤜᤡᤱᤗᤥ॥ ᤏᤠᤛᤡᤱᤃᤧᤴ ᤌᤰ ᤘᤠ᤹ᤒᤠ ᤜᤧᤰᤁᤣᤀᤣ ᤕᤠᤶᤛᤠᤶᤃᤧᤴ ᤌᤰᤁᤡᤴᤏᤠᤱ ᤘᤠ᤹ᤖᤥ॥ 45 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤌᤡᤰᤛᤡᤃᤣ᤺ᤰᤛᤔᤠ ᤔᤏᤠ ᤀᤠᤍᤶᤔᤡᤱᤃ ᤁᤢᤜᤡᤱᤘᤧᤳ ᤔᤏᤠ ᤐᤥ᤺ᤰᤂᤧ.” ᤕᤠᤱᤛᤡᤒᤠ ᤀᤠᤍᤶᤔᤡᤱᤃ (ᤂᤪᤡᤛ᤻ᤋ) ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤕᤠᤶᤛᤠᤶ ᤐᤥ᤺ᤰᤂᤧᤖᤥ॥ 46 ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤠᤛᤡᤱᤃᤧᤴ ᤌᤰᤁᤡᤴ ᤋᤠ᤹᤺. ᤜᤧᤰᤁᤩᤠᤱᤗᤰ ᤕᤠᤶᤛᤠᤶᤃᤧᤴ ᤌᤰᤁᤡᤴ ᤋᤠᤖᤥ॥ 47 ᤌᤡᤰᤛᤡᤃᤣᤰᤐᤠ ᤔᤏᤠ᤺ᤱᤃ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤗᤠᤶᤒᤠ ᤆᤥᤃᤧᤀᤠᤱ ᤘᤕᤧ. ᤁᤖ ᤏᤡᤛᤡᤃᤣ᤺ᤰᤛᤔᤠ ᤔᤏᤠ᤺ᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠᤒᤠᤖᤥ॥ 48 ᤀᤡᤰᤛᤠᤒᤠ ᤔᤏᤠᤜᤠ᤹ ᤂᤠᤶᤔᤡᤸᤗᤧ ᤁᤧᤒᤥᤱᤒᤠ ᤔᤏᤠᤴ ᤜᤧᤰᤋᤱᤒᤠᤛᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤏᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢᤒᤠ ᤔᤏᤠᤴ ᤜᤧᤰᤋᤱᤒᤠᤛᤡᤖᤥ॥ 49 ᤀᤠᤸᤗᤥ ᤀᤠᤏᤡ᤹ ᤂᤠᤶᤔᤡᤸᤗᤧ ᤁᤧᤒᤥᤱᤒᤠ ᤔᤏᤠᤴ ᤜᤧᤰᤋᤱᤒᤠ ᤀᤠᤈᤥᤰ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤏᤠᤴ ᤜᤧᤰᤋᤱᤒᤠ ᤀᤠᤒᤥᤱᤗᤥ॥ 50 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠᤴ ᤁᤴᤗᤥ. ᤏᤧᤰᤛᤠ ᤏᤢ ᤔᤠᤰᤂᤡ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤰ ᤂᤥᤔᤠ ᤔᤧᤛᤢᤰᤋᤢᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤔᤧᤰᤐᤠ ᤁᤧᤒᤣ᤺ᤰᤐᤠᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠᤸᤗᤧᤴ ᤗᤰ ᤂᤥᤔᤠ ᤔᤧᤛᤢᤰᤋᤢᤴᤗᤥ॥ 51 ᤂᤧᤵᤛᤧᤶᤔᤧ᤹ᤀᤥ᥄ ᤀᤡᤱᤃᤠ᤹ ᤗᤳᤇᤠ ᤛᤡᤒᤡ᤹ᤒᤠ ᤐᤠ᤺ᤴᤎᤡᤰ ᤔᤧᤳᤏᤡᤱ—ᤀᤠᤏᤡ᤹ ᤁᤧᤖᤧᤰ ᤀᤠᤴᤇᤡᤏᤧᤴᤗᤥ. ᤁᤖ ᤀᤠᤏᤡ᤹ ᤁᤧᤖᤧᤰ ᤀᤠᤗᤧᤱᤛᤡᤱ ᤀᤠᤒᤣ᤺ᤰᤗᤥ॥ 52 ᤛᤵᤑᤠᤖᤧᤛᤠ. ᤔᤡᤰᤆᤡᤖᤠᤵᤐᤥᤛᤠ. ᤌᤢᤳᤌᤢᤖᤡ᤺ᤵᤐᤠᤸᤗᤧ ᤁᤢᤏᤢᤵᤐᤥᤒᤠ ᤀᤡᤰᤗᤠᤀᤥ ᤀᤠᤗᤧᤰᤛᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤌᤢᤳᤌᤢᤖᤡ᤺ᤵᤐᤧᤴ ᤔᤢᤰ ᤜᤧᤰᤁᤩᤠᤱ ᤁᤧᤛᤡᤒᤠ ᤁᤧᤒᤣ᤺ᤰᤐᤠᤜᤠ᤹ ᤔᤧᤶᤔᤧᤰᤔᤏᤠᤒᤠ ᤔᤧᤒᤥᤱᤅᤠᤱ ᤔᤧᤜᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰ ᤀᤠᤗᤧᤱᤛᤡᤱ ᤀᤠᤒᤣ᤺ᤰᤗᤥ॥ 53 ᤌᤣᤀᤠᤱᤓᤧᤸᤗᤧ ᤁᤴ ᤁᤧᤛᤡᤒᤠ ᤁᤧᤒᤣ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤀᤠᤈᤢᤏᤡ ᤌᤰᤁᤥ ᤗᤧᤱᤛᤡᤱᤔᤠ ᤐᤥᤱᤗᤥ॥ 54 ᤜᤧᤰᤁᤩᤠᤱ ᤁᤴ ᤁᤧᤛᤡᤒᤠ ᤁᤧᤒᤣ᤺ᤰᤐᤠ ᤌᤰᤁᤡᤴ ᤔᤧᤴᤇᤡ᤺ᤶᤏᤠᤒᤠ ᤀᤠᤈᤢᤏᤡ ᤌᤰᤁᤥ ᤗᤧᤱᤛᤡᤱᤅᤡᤸᤗᤧ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤈᤠᤰᤁᤡᤴ ᤁᤧᤳᤗᤥ. “ᤛᤡᤔᤧᤴ ᤌᤱᤅᤥ ᤜᤠᤖᤡ ᤋᤩᤧᤀᤠᤱ ᤘᤠ᤹ᤖᤥ” 55 “ᤛᤡᤔᤧᤴᤏᤣ. ᤂᤧᤏᤧ᤹ ᤁᤧᤎᤱᤏᤠ᤺ᤴᤏᤡᤴ ᤀᤠᤳᤋᤥ ᤘᤠ᤹ᤒᤣ᥅ ᤛᤡᤔᤧᤴᤏᤣ. ᤂᤧᤏᤧ᤹ ᤁᤧᤔᤢᤰᤛᤠᤶᤔᤡᤴ ᤀᤠᤳᤋᤥ ᤘᤠ᤹ᤒᤣ᥅” 56 ᤛᤡᤔᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤗᤠᤕᤥᤗᤠᤶ ᤂᤥᤛᤢ᤹ᤖᤥ. ᤜᤧᤰᤁᤩᤠᤱ ᤗᤠᤕᤥᤸᤗᤧ ᤁᤢᤔᤢᤰᤛᤠᤶᤔᤡᤱᤃ ᤛᤠᤶᤕᤥᤌᤡᤶ ᤀᤡᤱᤈᤠᤱᤗᤠᤶ ᤂᤥᤛᤢ᤹ᤖᤥ॥ 57 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄ ᤂᤢᤏᤧ᤹ᤀᤣ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤌᤱᤏᤠ᤺ᤴᤏᤡᤴ ᤀᤠᤒᤡ᤹ᤖᤥ॥ 58 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤔᤧᤶᤔᤢᤴᤏᤣ ᤘᤕᤧᤶᤔᤧ᤹ᤀᤥ॥ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤥ ᤛᤍᤠᤍᤡᤱ ᤐᤥᤖᤧᤶᤔᤧ᤹ᤖ ᤐᤣᤃᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤗᤠᤃᤡ ᤂᤡᤏᤡ᤹ ᤕᤠᤶᤒᤢᤎᤡᤰᤁᤡᤴ ᤆᤠᤔᤧᤛᤥ᤺ᤰᤏᤧᤴ ᤑᤠ᤹ᤀᤠᤱ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.