᥇ ᤁᤥᤖᤴᤌᤡ 14 - LIFOTNTᤔᤠᤱᤏᤡᤱᤘᤠ᤹ᤐᤠᤴ ᤏᤢ ᤘᤣ᤹ ᤐᤠ᤺ᤴᤍᤠᤱ 1 ᤂᤧᤸᤗᤧᤆᤥᤃᤢᤸᤗᤧ ᤔᤡ᤺ᤶᤈᤡᤴ ᤂᤡᤏᤡ᤹ ᤋᤡᤶᤍᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤂᤥᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤁᤢᤳᤆᤠ᤹ᤀᤥᤃ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤐᤷᤎᤠ᤺ᤶᤔᤡᤴ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ 2 ᤌᤣᤀᤠᤱᤓᤧᤸᤗᤧ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤧᤴ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤏᤢ ᤔᤧᤒᤠ᤺ᤳᤏᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤐᤠ᤺ᤳᤗᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤳᤋᤡᤸᤗᤧᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤡᤃᤠᤱ ᤐᤠ᤺ᤴᤜᤠ᤹ ᤛᤣᤛᤣᤔᤠᤱᤗᤠᤶᤒᤠᤏᤧ ᤐᤠ᤺ᤳᤋᤢ᤹ᤖᤥ॥ 3 ᤁᤖ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ. ᤜᤠᤱᤜᤠᤱ ᤔᤧᤵᤔᤠ ᤜᤧᤰᤁᤩᤠᤱ ᤛᤰᤔᤠ ᤕᤠᤰᤔᤠ ᤕᤠ᤺ᤶᤒᤰ ᤆᤥᤃᤢᤖᤥ॥ 4 ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠ᤺ᤵᤐᤠᤸᤗᤧ ᤀᤠᤒᤠᤅᤣᤖᤰ ᤌᤥᤒᤥ ᤆᤥᤃᤢ᤹ᤖᤥ. ᤁᤖ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧᤃ ᤛᤣᤛᤣᤜᤢᤵᤗᤰᤗᤧᤴ ᤕᤠᤶᤛᤠᤶᤃᤧᤴ ᤌᤥᤒᤥ ᤆᤥᤃᤢ᤹ᤖᤥ॥ 5 ᤂᤡᤏᤡ᤹ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠ᤺ᤖᤡᤒᤠ ᤀᤠᤛᤡᤖᤠ᤹ ᤌᤠᤱᤗᤥ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤛᤣᤛᤣᤜᤢᤵᤗᤰᤗᤧᤴ ᤕᤠᤶᤛᤠᤶᤃᤧᤴ ᤌᤥᤒᤥᤖᤧ ᤗᤠᤃᤡ ᤘᤣ᤹ᤛᤔᤠ ᤐᤠ᤺ᤴᤍᤠᤱᤅᤡᤴ ᤁᤧᤗᤧᤱᤒᤠ ᤔᤧᤜᤥ᤺ᤵᤏᤧ ᤑᤠ᤹ᤃᤪ ᤘᤣ᤹ᤛᤔᤠ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠᤏᤢ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠᤴᤏᤣ ᤕᤶᤒᤠᤖᤥ॥ 6 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤳᤋᤠᤖ ᤋᤠᤀᤠᤸᤗᤧ ᤌᤣ ᤀᤡᤴᤎᤠ᤺ᤱ ᤁᤧᤄᤥᤛᤢᤶᤒᤣ᥅ ᤁᤖ ᤀᤥᤛᤣ᤺ᤴᤍᤠᤱ ᤐᤠ᤺ᤴ. ᤀᤡᤃᤪ ᤏᤧᤜᤡᤏᤡᤱᤘᤠ᤹ ᤐᤠ᤺ᤴ. ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠᤴ ᤀᤡᤃᤪ ᤏᤡᤛᤠᤶᤖᤧ ᤐᤠ᤺ᤴᤈᤠᤰᤁᤡᤴ ᤋᤠᤖᤢᤱᤅᤡᤸᤗᤧ ᤂᤡᤏᤡ᤹ ᤗᤠᤃᤡ ᤁᤢᤓᤠ᤹ ᤐᤥᤱᤗᤥ॥ 7 ᤔᤧᤵᤑᤪᤠ ᤏᤢ ᤁᤥ᤺ᤶ ᤜᤧᤰᤋᤱᤒᤠ ᤁᤢᤛᤰᤔᤠ ᤔᤧᤴᤕᤠᤰᤔᤏᤠᤒᤠ ᤔᤢᤰᤗᤠᤜᤠ᤹ᤗᤠᤶᤒᤠ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤀᤡᤰᤗᤠ ᤗ᤺ᤴᤏᤧ ᤑᤠ᤹ᤃᤪ ᤌᤣ ᤔᤢᤰᤗ ᤐᤳ ᤑᤠ᤹ᤀᤠᤱ ᤜᤠ᤺ᤳᤗᤧ ᤐᤠ᤺ᤵᤔᤠ ᤛᤢᤰᤋᤢᤒᤣ᥅ 8 ᤕᤠᤶᤔᤥ ᤌᤢᤳᤋᤢᤖᤡ᤺ᤵᤐᤧᤸᤗᤧ ᤌᤱ ᤆᤥ᤺ᤰᤛᤧ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤀᤡᤰᤗᤠᤴ ᤏᤢᤖᤡᤰ ᤗᤠᤔᤧᤀᤡᤃᤢᤴᤏᤧ ᤑᤠ᤹ᤃᤪ ᤜᤠᤳ ᤌᤱ ᤌᤰᤛᤧ ᤕᤠᤖᤡᤵ ᤐᤥᤱᤒᤠᤒᤣ᥅ 9 ᤂᤡᤏᤡ᤹ᤏᤢᤀᤠᤱ ᤒᤠ ᤜᤧᤰᤁᤣᤀᤣ ᤐᤥᤱᤗᤥ॥ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠ ᤐᤠ᤺ᤴᤏᤥ ᤁᤧᤒᤠᤖᤡᤏᤧ ᤑᤠ᤹ᤃᤪ ᤌᤣ ᤁᤧᤒᤠ᤺ᤳᤋᤢᤶᤗ ᤁᤧᤒᤳᤇᤡ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤒᤣ᥅ ᤂᤡᤏᤡ᤹ᤃ ᤛᤢᤖᤡᤳᤋᤥ ᤁᤧᤒᤠ᤺ᤖᤡᤒᤠ ᤜᤧᤰᤁᤣ ᤐᤥᤱᤗᤥ॥ 10 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤖᤡᤰ ᤐᤠ᤺ᤴᤍᤠᤱᤜᤠ᤹ ᤘᤠ᤹. ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤁᤢᤒᤣ ᤔᤧ᤺ᤴᤏᤣᤒᤠᤃ ᤜᤥᤵᤗᤥ॥ 11 ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤏᤧ ᤑᤠ᤹ᤃᤪ ᤁᤧᤒᤠ᤺ᤵᤐᤠᤸᤗᤧ ᤗᤠᤃᤡ ᤀᤡᤱᤃᤠ᤹ᤃ ᤐᤠ᤺ᤴᤔᤧᤴᤍᤱ ᤐᤥᤱᤅᤠᤖᤥ. ᤜᤧᤰᤁᤩᤠᤱ ᤁᤧᤒᤠ᤺ᤵᤐᤧᤴ ᤀᤠᤗᤠᤃᤡ ᤐᤠ᤺ᤴᤔᤧᤴᤍᤱ ᤐᤥᤱᤗᤥ॥ 12 ᤂᤡᤏᤡ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤜᤠ᤹ ᤂᤥᤔᤠ ᤛᤠ᤹ᤖᤡᤰ ᤂᤡᤏᤡ᤹ ᤛᤡᤰ ᤛᤶᤒᤠᤸᤗᤧ ᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤗᤧᤴ ᤌᤥᤒᤥ ᤁᤧᤒᤥᤱᤒᤠ ᤐᤷᤎᤠ᤺ᤶᤜᤠ᤹ ᤀᤥᤃᤵ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ 13 ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤠ᤺ᤴᤗᤧᤱᤔᤠ ᤛᤢᤰᤋᤢᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤖᤖᤥ॥ 14 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤘᤣ᤹ ᤐᤠ᤺ᤴᤍᤠᤱᤅᤥ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤀᤠᤕᤠᤶᤛᤠᤶᤔᤡᤸᤗᤧ ᤋᤢᤘᤠ ᤆᤥᤃᤢ᤹. ᤁᤖ ᤀᤠᤏᤡᤱᤘᤠ᤹ᤀᤡᤸᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥ 15 ᤀᤠᤸᤗ ᤀᤠᤰᤂᤣ ᤆᤥᤃᤢᤱᤒᤠᤒᤣ᥅ ᤀᤡᤱᤃᤠ᤹ ᤕᤠᤶᤛᤠᤶᤔᤡᤸᤗᤧ ᤋᤢᤘᤠ ᤆᤥ᤺ᤰᤁᤠ. ᤁᤖ ᤀᤠᤏᤡᤱᤘᤠ᤹ᤀᤡᤸᤗᤧᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤶᤛᤠᤶᤔᤡᤸᤗᤧ ᤛᤠᤶᤗᤥᤀᤠ. ᤁᤖ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤸᤗᤧᤀᤠᤱ ᤛᤠᤶᤗᤥᤀᤠᤖᤥ॥ 16 ᤂᤧᤏᤧ᤹ ᤁᤧᤕᤠᤶᤛᤠᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤁᤧᤓᤥᤛᤢᤸᤗᤧ ᤂᤧᤏᤧ᤹ ᤏᤢᤖᤡᤰᤁᤠᤱ ᤏᤥᤃᤧᤴ ᤁᤧᤒᤡᤖᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ “ᤀᤠᤔᤧᤴ” ᤐᤠ᤺ᤳᤋᤢᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤴ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥ 17 ᤂᤧᤏᤧ᤹ᤃ ᤏᤢᤖᤡᤰᤁᤠᤱ ᤏᤥᤃᤧᤴ ᤁᤧᤒᤡᤖᤢᤒᤡᤗᤠ. ᤁᤖ ᤘᤣ᤹ ᤔᤏᤠ᤺ᤸᤗᤧᤴ ᤌᤣᤀᤠᤱ ᤌᤥᤒᤥ ᤔᤧᤒᤥᤱᤏᤧᤸᤗᤥ॥ 18 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤕᤖᤡᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤳᤋᤠᤖᤥ॥ 19 ᤜᤧᤰᤁᤣᤛᤠᤱ ᤛᤣᤛᤣᤜᤢᤵᤗᤰᤁᤥᤃ ᤜᤧᤴᤇᤡᤱ ᤌᤡᤒᤥᤱ (᥇᥆.᥆᥆᥆) ᤐᤠ᤺ᤴᤛᤢᤳᤗᤠᤜᤠ᤹ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠᤴᤏᤢ᤺ᤸᤗᤧᤃ ᤘᤣ᤹ᤜᤠ᤹ ᤏᤡᤛᤠᤶ ᤐᤡᤔᤠᤛᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤁᤧᤍᤧᤵᤐᤠ ᤅᤠᤛᤡ (᥋) ᤐᤠ᤺ᤴᤛᤢᤳᤗᤠᤜᤠ᤹ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ 20 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤜᤡᤴᤈᤠ᤹ᤒᤡᤳᤇᤠ ᤁᤢᤀᤡᤛᤡᤰ ᤏᤡᤱᤘᤠ᤹ ᤀᤡ᤺ᤵᤔᤠ ᤗᤧᤖᤧᤶᤔᤧ᤹ᤀᤥ॥ ᤑᤧᤴᤐᤠ᤺ᤴᤏᤥ ᤀᤅᤧ᤺ᤰᤘᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤶᤔᤧ᤹ᤀᤥ. ᤁᤖ ᤏᤡᤱᤘᤠ᤹ ᤀᤡ᤺ᤵᤔᤠᤀᤥᤃ ᤁᤢᤏᤡᤱᤘᤠ᤹ ᤁᤧᤍᤢᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤐᤥ᤺ᤰᤂᤧᤶᤔᤧ᤹ᤀᤥ॥ 21 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤗᤠᤶ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤏᤠ ᤐᤠ᤺ᤴᤍᤠᤱᤗᤠᤶ ᤀᤠᤒᤠᤅᤣ ᤀᤠᤔᤏᤠᤜᤠ᤹ᤏᤢ ᤐᤠ᤺ᤳᤋᤠᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤴ ᤔᤧᤱᤄᤧᤵᤛᤢᤴ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤖᤥ॥” 22 ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤐᤷᤎᤠ᤺ᤶᤔᤡᤱᤃ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤔᤣ᤺ᤴ. ᤁᤖ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤔᤡᤰᤛᤣ᤺ᤴᤗᤥ॥ ᤜᤧᤰᤁᤣᤛᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤐᤷᤎᤠᤶᤔᤡᤱᤃ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤔᤣ᤺ᤴ. ᤁᤖ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡᤖᤥ॥ 23 ᤂᤧᤸᤗᤧᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠᤖᤡᤏᤧ ᤑᤠ᤹ᤃᤪ ᤂᤧᤵᤔᤥ ᤐᤠᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤀᤡᤃᤪ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤔᤧᤍᤠ᤺ᤸᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤏᤠᤱ ᤂᤡᤏᤡ᤹ ᤁᤧᤖᤧᤰ ᤁᤧᤏᤠᤰᤂᤡ ᤁᤧᤒᤣᤃᤡ᤹ ᤗ᤹ᤖᤡᤰ ᤔᤧᤶᤒᤠ᤺ᤳᤋᤢᤴᤒᤡ᥅ 24 ᤁᤖ ᤁᤧᤖᤧᤰᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤰᤁᤡᤸᤗᤧ ᤏᤛᤠᤴ ᤔᤧᤴᤈᤠ᤺ᤰᤔᤏᤠ ᤀᤡᤃᤪ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤏᤠᤴ ᤂᤧᤵᤔᤥ ᤋᤠᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤵᤛᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤛᤡᤰᤗᤢᤱᤔᤠ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤁᤢᤏᤡᤱᤘᤠ᤹ᤒᤠᤴ ᤌᤡᤰᤋᤢ᤹ᤖᤥ॥ ᤂᤧᤵᤔᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ ᤗᤥᤖᤥ॥ 25 ᤜᤧᤰᤁᤩᤠᤱ ᤁᤢᤛᤡᤰᤗᤢᤱᤔᤠ ᤛᤡᤃᤠᤱᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤧᤴ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥᤃᤢᤖ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤘᤠ᤹ᤖᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥ ᤛᤧᤘᤠ ᤆᤥ᤺ᤰᤔᤠ ᤌᤡᤶ 26 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ॥ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤗᤳᤌᤡᤰᤁᤡᤸᤗᤧ ᤛᤠᤶᤗᤥ ᤁᤳᤋᤢ᤹. ᤘᤣ᤹ᤛᤔᤠᤸᤗᤧ ᤏᤡᤛᤠᤶ ᤁᤳᤋᤢ᤹. ᤘᤣ᤹ᤛᤔᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤀᤥᤛᤣ᤺ᤴᤍᤠᤱ ᤐᤠᤴ ᤁᤳᤋᤢ᤹. ᤘᤣ᤹ᤛᤔᤠᤸᤗᤧ ᤘᤣ᤹ ᤐᤠ᤺ᤴᤍᤠᤱ ᤁᤳᤋᤢ᤹ ᤜᤧᤰᤁᤩᤠᤱ ᤘᤣ᤹ᤛᤔᤠᤸᤗᤧ ᤘᤣ᤹ ᤐᤠ᤺ᤴᤍᤠᤱᤅᤡᤴ ᤐᤠ᤺ᤴᤗᤧᤱᤔᤠ ᤐᤷᤎᤠ᤺ᤶ ᤁᤳᤋᤢ᤹ᤖᤥ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤣᤛᤣᤜᤢᤵᤗᤰᤁᤡᤸᤗᤧᤴ ᤕᤠᤶᤛᤠᤶᤃᤧᤴ ᤌᤥᤒᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤥᤃᤵ ᤆᤥ᤺ᤰᤔᤠ ᤐᤥᤱᤗᤥ॥ 27 ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ ᤔᤧᤒᤠ᤺ᤳᤏᤧ ᤑᤠ᤹ᤃᤪ ᤏᤧᤵᤑᤢᤖᤧᤖᤰ ᤀᤡᤃᤪ ᤛᤢᤶᤛᤡ ᤌᤠᤖᤡᤰᤗᤧ ᤀᤣ᤺ᤰᤀᤣ᤺ᤰ ᤔᤧᤒᤠ᤺ᤳᤋᤢᤖ. ᤜᤧᤰᤁᤩᤠᤱ ᤌᤡᤰᤐᤠᤖᤧ ᤐᤠᤴ ᤗᤧᤰᤂᤢᤖᤖᤥ॥ 28 ᤁᤖ ᤐᤠᤴ ᤁᤧᤗᤧᤱᤒᤠᤴ ᤜᤥ᤺ᤵᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ ᤛᤣᤛᤣᤜᤢᤵᤗᤰᤁᤥ ᤛᤫᤠ᤺ᤳ ᤔᤧᤕᤢᤱᤅᤠᤱ ᤀᤠᤒᤠᤅᤣᤏᤢ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤒᤠ᤺ᤳᤗᤖᤥ॥ 29 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤏᤧᤵᤑᤢ ᤀᤡᤃᤪ ᤛᤢᤶᤛᤡ ᤔᤧᤒᤠ᤺ᤳᤗ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤛᤠ᤹ᤔᤠ ᤐᤥᤱᤗᤥ॥ 30 ᤁᤖ ᤂᤧᤵᤔᤥ ᤁᤧᤕᤢᤱᤒᤠ ᤁᤢᤓᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤀᤥᤛᤣ᤺ᤴᤍᤠᤱ ᤐᤠ᤺ᤴᤏᤡᤴ ᤋᤠᤏᤧ ᤑᤠ᤹ᤃᤪ ᤋᤃᤡ ᤁᤧᤒᤠ᤺ᤵᤐᤧᤴ ᤛᤫᤠ᤺ᤳ ᤕᤢᤱᤏᤡᤖᤥ॥ 31 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤡᤰᤐᤠ ᤌᤡᤰᤐᤠᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤁᤧᤛᤢᤰᤋᤡ᤹. ᤜᤧᤰᤁᤣ᤺ᤸᤗᤧ ᤁᤧᤖᤧᤰᤗᤧ ᤁᤧᤜᤢ᤹ᤀᤠᤛᤡᤀᤠᤱ ᤕᤠᤶᤈᤠᤱᤘᤠ ᤁᤧᤄᤥᤛᤢᤶᤗᤥ॥ 32 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤐᤷᤎᤠ᤺ᤶᤔᤡᤴ ᤀᤠᤒᤠᤅᤣ ᤕᤢᤰᤁᤥ ᤁᤵᤔᤠ ᤐᤥᤱᤗᤥ॥ 33 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤕᤧᤔᤧᤴᤍᤱ ᤔᤣ᤺ᤴ. ᤁᤖ ᤛᤏᤠᤖᤢᤱᤗᤧᤴ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤁᤧᤖᤧᤰ ᤛᤣᤛᤣ ᤔᤏᤠᤜᤠ᤹ᤖᤧ ᤁᤧᤖᤧᤰ ᤂᤢᤏᤡ᤹ ᤛᤣᤛᤣᤜᤢᤵᤗᤰᤁᤥᤒᤠ ᤆᤥ᤺ᤰᤌᤡᤶ ᤁᤢᤀᤡᤛᤡᤰ 34 ᤛᤣᤛᤣᤜᤢᤵᤗᤰᤁᤥ ᤆᤢᤶᤗᤢᤱ ᤐᤥᤱᤗ ᤐᤳᤋᤡᤸᤗᤧ ᤔᤧᤴᤇᤢᤔᤠᤜᤠ᤹ ᤛᤫᤠ᤺ᤳ ᤕᤢᤱᤔᤠ ᤐᤥᤱᤗᤥ॥ ᤂᤧᤱᤜᤠ᤹ ᤂᤧᤴ ᤕᤧᤶᤔᤥ ᤐᤠ᤺ᤵᤔᤠ ᤏᤢᤒᤠ ᤔᤣ᤺ᤴ. ᤁᤖ ᤂᤧᤱᤜᤠ᤹ᤃ ᤕᤢᤰᤁᤥ ᤘᤠ᤹ᤔᤠ ᤐᤥᤱᤗᤥ॥ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧᤀᤠᤱ ᤜᤧᤰᤁᤣ ᤐᤠ᤺ᤳᤋᤢ᤹ᤖᤥ॥ 35 ᤂᤢᤏᤡ᤹ ᤛᤣ᤺ᤴᤍᤥᤔᤠ ᤐᤠᤴ ᤔᤧᤃᤳᤋᤢ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤔᤥ ᤀᤠᤒᤠᤅᤣ ᤂᤢᤏᤡ᤹ ᤕᤧᤶᤒᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡᤖᤖᤥ. ᤌᤣᤀᤠᤱᤓᤧᤸᤗᤧ ᤛᤣᤛᤣᤜᤢᤵᤗᤰ ᤆᤢᤶᤗᤢᤱ ᤐᤥᤱᤗ ᤐᤳᤋᤡᤸᤗᤧ ᤔᤧᤴᤇᤢᤔᤠᤜᤠ᤹ ᤋᤠ᤹ᤈᤧᤱᤔᤠᤃ ᤏᤢ᤺ᤶᤔᤠᤛᤡᤔᤠ ᤐᤠ᤺ᤴᤗᤥ॥ 36 ᤂᤡᤏᤡ᤹ ᤁᤥᤖᤴᤌᤡᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤗᤠᤶᤒᤠ ᤜᤣ᤺ᤰᤛᤡᤱᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤀᤡᤃᤪ ᤂᤡᤏᤡ᤹ᤖᤰ ᤁᤧᤄᤥᤛᤢᤶᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤏᤧ ᤑᤠ᤹ᤃᤪ ᤁᤧᤒᤣ᤺ᤴᤍᤡᤀᤠᤱ ᤁᤧᤘᤕᤡᤖᤥ॥ 37 ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤀᤠ ᤗ᤹ᤖᤡᤰ ᤀᤡᤃᤪ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶ ᤁᤳᤋᤢᤱ ᤗ᤹ᤖᤡᤰ ᤀᤡ᤺ᤳᤋᤢ᤹ ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤁᤴ ᤐᤠ᤺ᤴᤜᤠ᤹ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱ ᤗ᤹ᤖᤡᤰ ᤋᤧᤴᤍᤡᤱ ᤆᤥᤃᤢᤖᤖᤥ॥ 38 ᤂᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤴᤏᤧ ᤑᤠ᤹ᤃᤪ ᤂᤧᤸᤗᤧ ᤁᤢᤒᤠ᤺ᤴᤏᤡᤴᤏᤠᤱ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ 39 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ॥ 40 ᤁᤖ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤌᤧᤵᤌᤧᤵᤐᤠᤱ ᤏᤢᤖᤡᤰ ᤆᤥ᤺ᤰᤔᤠ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.