᥇ ᤁᤥᤖᤴᤌᤡ 12 - LIFOTNTᤛᤣᤛᤣᤔᤠᤱᤗᤠᤶ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ 1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤛᤣᤛᤣᤔᤠᤱᤗᤠᤶᤒᤠᤒᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡᤒᤠ ᤀᤠᤏᤡᤱᤘᤠ᤹ ᤜᤥᤵᤗᤥ॥ 2 ᤍᤠᤱᤒᤠ ᤕᤧᤛᤢᤴ ᤂᤡᤏᤡ᤹ ᤏᤛᤠᤴ ᤔᤧᤴᤈᤥ᤺ᤰᤁᤣ ᤁᤧᤘᤕᤡᤸᤗᤧ ᤁᤢᤒᤠᤴ ᤔᤧᤴᤗ᤺ᤶᤏᤠ ᤕᤖᤡᤰ ᤐᤖᤡᤰᤐᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤃᤧᤄᤕᤢᤶᤗ ᤋᤠᤵᤁᤧᤒᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ 3 ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤗᤠᤶᤗᤥᤛᤢᤒᤠ ᤀᤠᤳᤋᤡᤸᤗᤧᤀᤠᤱ ᤕᤧᤛᤢᤴ ᤛᤠᤱᤃᤪᤠ ᤔᤧᤵᤔᤠ ᤔᤧᤛᤢᤰᤋᤢᤴᤗᤥ. ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤔᤧᤸᤗᤥ᤺ᤀᤣ ᤌᤠᤖᤡᤰ ᤀᤠᤳᤋᤡᤸᤗᤧᤀᤠᤱ ᤕᤧᤛᤢᤴ ᤏᤣ ᤍᤠᤱᤒᤠᤖᤥ ᤐᤠ᤺ᤵᤔᤠ ᤔᤧᤛᤢᤰᤋᤢᤴ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹॥ 4 ᤀᤠᤸᤗ ᤕᤖᤡᤰ ᤐᤖᤡᤰᤐᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤔᤧᤘᤠ᤹. ᤁᤖ ᤐᤷᤎᤠ᤺ᤶ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤗᤳᤌᤡᤰᤗᤰ ᤘᤠ᤹ᤖᤥ॥ 5 ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤐᤖᤡᤰᤐᤠ ᤔᤠᤱᤛᤣᤘᤠᤜᤠ᤹ ᤔᤧᤘᤠ᤹. ᤁᤖ ᤍᤠᤱᤒᤠᤃ ᤗᤳᤌᤡᤰᤗᤰ ᤘᤠ᤹ᤖᤥ॥ 6 ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤐᤖᤡᤰᤐᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤛᤢᤰᤋᤢᤶ. ᤁᤖ ᤒᤠ ᤗᤳᤇᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤁᤧᤖᤧᤰᤗᤠᤶ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ 7 ᤀᤠᤸᤗ ᤛᤣᤛᤣᤜᤢᤵᤗᤰᤁᤥ ᤁᤢᤓᤠ᤹ ᤐᤡᤛᤡᤱᤔᤠᤖᤧ ᤗᤠᤃᤡ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤌᤠ᤺ᤵᤗ ᤑᤠ᤹ᤀᤠᤱ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤁᤠᤰ ᤔᤏᤠᤜᤠ᤹ ᤗᤳᤇᤠᤀᤠᤱ ᤔᤧᤴᤇᤧᤴᤇᤡᤱᤅᤣ ᤐᤡᤖᤧᤀᤠᤱ ᤘᤠ᤹ᤖᤥ॥ 8 ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤌᤡᤰᤁᤡᤴ ᤛᤡᤰᤁᤢᤶ ᤏᤡᤱᤘᤠ᤹ᤗᤧᤴ ᤐᤠ᤺ᤴᤈᤠᤰ ᤐᤡᤖᤢ᤹. ᤘᤣ᤹ᤛᤔᤠᤴ ᤜᤠᤒᤠ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤧᤜᤡ ᤏᤡᤱᤘᤠ᤹ᤖᤧᤴ ᤐᤠ᤺ᤴᤈᤠᤰ ᤐᤡᤖᤢ᤹॥ 9 ᤘᤣ᤹ᤛᤔᤠᤴ ᤜᤠᤒᤠ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤛᤠ᤺ᤴᤗᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ. ᤜᤧᤰᤁᤩᤠᤱ ᤘᤣ᤹ᤀᤡᤴ ᤁᤧᤍᤢᤰᤐᤠ ᤘᤣ᤺ᤶᤔᤠ ᤐᤷᤎᤠ᤺ᤶᤜᤠ᤹ ᤒᤠ ᤂᤧᤴ ᤗᤳᤇᤠ ᤛᤣᤛᤣᤔᤠᤱᤅᤡᤸᤗᤧ ᤐᤡᤖᤢ᤹॥ 10 ᤘᤣ᤹ᤛᤔᤠᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤘᤣ᤹ᤛᤔᤠᤴ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤘᤣ᤹ᤛᤔᤠᤴ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠᤶᤛᤠᤶᤜᤠ᤹ ᤛᤧᤶᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤐᤖᤡᤰ ᤐᤖᤡᤰᤐᤠ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤐᤠ᤺ᤵᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤜᤧᤰᤁᤩᤠᤱ ᤘᤣ᤹ᤛᤔᤠᤴ ᤂᤧᤴ ᤐᤠ᤺ᤴᤍᤠᤱᤜᤠ᤹ ᤗᤧᤱᤔᤠ ᤐᤷᤎᤠ᤺ᤶ ᤐᤡᤖᤢ᤹ᤖᤥ॥ 11 ᤁᤱᤜᤠ᤹ ᤁᤧᤖᤧᤰ ᤗᤳᤇᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤛᤡᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤁᤴ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤗᤳᤇᤠᤀᤠᤱ ᤔᤧᤴᤇᤧᤴᤇᤡᤱᤅᤣ ᤁᤧᤖᤧᤰ ᤐᤡᤖᤢᤛᤡ᤹ᤖᤥ॥ ᤗᤳᤌᤡᤰ ᤌᤰᤁᤥ ᤕᤖᤡᤰ ᤕᤠᤶᤗᤰᤜᤠ᤹ 12 ᤏᤠᤛᤡᤱᤃᤧᤴ ᤌᤰᤁᤥ ᤕᤖᤡᤰ ᤕᤠᤶᤗᤰᤜᤠ᤹ ᤔᤧᤒᤳᤗᤥ॥ ᤁᤴ ᤘᤣ᤹ ᤘᤣ᤹ ᤕᤠᤶᤗᤰᤜᤠ᤹ᤗᤠᤶ ᤗᤳᤇᤠ ᤏᤠᤛᤡᤱᤃᤧᤴ ᤌᤰ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤁᤢᤎᤰᤁᤡᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤆᤥᤰᤗᤥ॥ 13 ᤒᤠ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤕᤜᤢᤍᤡ. ᤌᤡᤶᤔᤧᤴᤍᤱ ᤛᤢᤘᤠᤱᤒᤠ. ᤕᤥᤰ ᤀᤡᤃᤪ ᤆᤥ᤺ᤰᤕᤢᤶᤓᤥᤒᤠ ᤀᤠᤳᤋᤡᤴᤇᤠᤱ ᤌᤡᤰ ᤛᤣᤛᤣᤔᤠᤱᤅᤡᤸᤗᤧ ᤌᤡᤰ ᤌᤰᤁᤥ ᤒᤵᤋᤡᤛ᤻ᤔᤠ ᤀᤠᤈᤥᤃᤧᤀᤠᤱ ᤘᤠ᤹॥ ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰᤗᤧ ᤗᤳᤇᤠ ᤛᤣᤛᤣᤔᤠᤱ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹ᤖᤥ॥ 14 ᤀᤠᤸᤗ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤗᤳᤌᤡᤰ ᤕᤠᤶᤗᤰᤗᤧᤖᤰ ᤔᤣ᤺ᤴ. ᤁᤖ ᤕᤖᤡᤰ ᤕᤠᤶᤗᤰᤜᤠ᤹ᤖᤧ ᤆᤥᤃᤧᤀᤠᤱ ᤘᤠ᤹ᤖᤥ॥ 15 ᤀᤠᤸᤗ ᤗᤠᤱᤅᤡᤸᤗᤧ “ᤀᤡᤱᤃᤠ᤹ ᤜᤢᤰ ᤔᤣ᤺ᤴᤀᤠ. ᤜᤧᤰᤁᤣᤗ᤹ᤖᤡᤰ ᤁᤴ ᤌᤰᤁᤥᤒᤠ ᤕᤠᤶᤗᤰ ᤔᤧ᤺ᤴᤏᤠᤖᤥ” ᤐᤠ᤺ᤳᤋᤢ᤹ᤛᤠᤱ ᤂᤧᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤕᤠᤶᤗᤰ ᤔᤧᤒᤥᤱᤏᤧᤴᤒᤡ᥅ 16 ᤜᤧᤰᤁᤣᤗ᤹ᤖᤡᤰᤁᤣ ᤏᤧᤰᤂᤥ᤹ᤀᤡᤸᤗᤧ “ᤀᤡᤱᤃᤠ᤹ ᤔᤡᤰ ᤔᤣ᤺ᤴᤀᤠ. ᤂᤧᤸᤗᤧᤆᤥᤃᤢᤸᤗᤧ ᤁᤴ ᤌᤰᤁᤥᤒᤠ ᤕᤠᤶᤗᤰ ᤔᤧ᤺ᤴᤏᤠᤖᤥ” ᤐᤠ᤺ᤳᤋᤢ᤹ᤛᤠᤱ ᤂᤧᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤕᤠᤶᤗᤰ ᤔᤧᤒᤥᤱᤏᤧᤴᤒᤡ᥅ 17 ᤁᤠᤰ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤔᤡᤰ ᤐᤥ᤺ᤰᤂᤧᤸᤗᤧᤃ. ᤌᤣ᤺ᤸᤗᤧ ᤂᤧᤶᤔᤏᤠᤒᤠᤒᤣ᥅ ᤁᤠᤰ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤏᤧᤰᤂᤥ᤹ ᤐᤥ᤺ᤰᤂᤧᤸᤗᤧᤃ. ᤌᤣ᤺ᤸᤗᤧ ᤏᤠᤶᤔᤏᤠᤒᤠᤒᤣ᥅ 18 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤁᤠᤰ ᤕᤠᤶᤗᤰᤜᤠ᤹ ᤀᤠᤒᤠᤅᤣ ᤋᤧᤴᤏᤥ ᤑᤳᤇᤢᤛᤡᤀᤠᤱ ᤐᤳᤗᤥ॥ 19 ᤁᤠᤰ ᤕᤠᤶᤌᤰᤁᤡᤴᤏᤣ ᤌᤡᤰ ᤕᤠᤶᤌᤰᤗᤰ ᤐᤥ᤺ᤰᤂᤧᤸᤗᤧᤃ. ᤏᤠᤛᤡᤱᤃᤧᤴ ᤌᤰᤁᤡᤴ ᤀᤠᤳᤋᤥ ᤘᤕᤧᤒᤠᤒᤣ᥅ 20 ᤁᤖ ᤀᤠᤸᤗ ᤕᤖᤡᤰ ᤕᤠᤶᤗᤰᤜᤠ᤹ ᤔᤧᤒᤳᤇᤠᤱ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤗᤳᤌᤡᤰᤗᤰ ᤘᤠ᤹ᤖᤥ॥ 21 ᤔᤡᤰᤁᤡᤸᤗᤧ ᤜᤢᤰᤁᤡᤴ “ᤀᤡᤱᤃᤠ᤹ ᤂᤧᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ” ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥ ᤜᤧᤰᤁᤩᤠᤱ ᤌᤧᤃᤣ᤺ᤰᤁᤡᤸᤗᤧᤀᤠᤱ ᤗᤠᤱᤅᤡᤴ “ᤀᤡᤱᤃᤠ᤹ ᤂᤧᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ” ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥ 22 ᤛᤧᤰᤂᤠ᤺ᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠ ᤁᤧᤎᤠ᤺ᤵᤐᤠ ᤕᤠᤶᤗᤰᤜᤠ᤹ᤃ ᤛᤠ᤹ᤖᤡᤰ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤥᤰᤗᤥ. 23 ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤏᤡ᤹ ᤛᤠ᤹ᤖᤡᤰ ᤁᤧᤕᤧᤰᤐᤠ ᤔᤧᤈᤥᤰᤏᤧᤴ ᤗ᤹ᤖᤡᤰ ᤀᤠᤀᤡ᤺ᤳᤋᤢᤶᤒᤠ ᤕᤠᤶᤗᤰᤜᤠ᤹ᤃ ᤀᤠᤏᤡ᤹ ᤛᤠ᤹ᤖᤡᤰᤁᤠᤱ ᤁᤶᤒᤪᤠᤱ ᤀᤠᤔᤧᤳᤋᤢᤶᤗᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤀᤥᤛᤣ᤺ᤴᤎᤠᤰᤔᤠ ᤔᤧᤴᤏᤢ᤹ᤔᤏᤠ ᤕᤠᤶᤗᤰᤜᤠ᤹ ᤏᤢᤖᤡᤰᤁᤠᤱ ᤀᤠᤏᤡ᤹ ᤀᤠᤍᤧᤵᤋᤢᤶᤗᤥ. 24 ᤁᤖ ᤏᤡᤔᤠ ᤛᤢᤰᤁᤧᤍᤧᤵᤐᤠ ᤕᤠᤶᤗᤰᤜᤠ᤹ ᤂᤧᤶᤔᤩᤠᤰ ᤛᤠ᤹ᤖᤡᤰ ᤁᤶᤒᤪᤠᤱ ᤀᤠᤶᤔᤧᤳᤋᤢᤶᤔᤡᤴᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤛᤠ᤹ᤖᤡᤰ ᤁᤧᤕᤧᤰᤐᤠ ᤏᤡᤔᤧᤴᤎᤠ᤺ᤵᤔᤏᤠᤒᤠ ᤕᤠᤶᤗᤰᤜᤠ᤹ᤖᤧ ᤏᤢᤖᤡᤰᤁᤠᤱ ᤁᤶᤒᤪᤠᤱ ᤔᤧᤄᤥᤛᤢᤏᤡ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤑᤳᤇᤢᤛᤡᤀᤠᤱ ᤐᤳ॥ 25 ᤜᤧᤰᤁᤣᤗ᤹ᤖᤡᤰ ᤏᤠᤛᤡᤱᤃᤧᤴ ᤌᤰᤁᤥ ᤕᤧᤔᤧᤴᤍᤱ ᤔᤧᤒᤥᤱᤏᤧᤴᤗ. ᤁᤖ ᤌᤡᤰ ᤕᤠᤶᤗᤰᤁᤡᤸᤗᤧ ᤘᤣ᤹ ᤕᤠᤶᤗᤰᤁᤡᤴ ᤁᤶᤒᤪᤠᤱ ᤆᤥᤃᤢᤏᤡ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ 26 ᤏᤠᤛᤡᤱᤃᤧᤴ ᤌᤰᤁᤥ ᤗᤳᤇᤠ ᤕᤠᤶᤗᤰᤁᤡᤴ ᤋᤢᤰᤂᤣ ᤆᤠᤏᤧ ᤑᤠ᤹ᤃᤪ ᤂᤧᤴᤏᤢᤀᤣ ᤘᤣ᤹ ᤁᤠᤰ ᤕᤠᤶᤗᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤋᤢᤰᤂᤣ ᤔᤧᤈᤠᤖᤥ॥ ᤜᤧᤰᤁᤩᤠᤱ ᤗᤳᤇᤠ ᤕᤠᤶᤗᤰᤁᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢ᤹ᤏᤧ ᤑᤠ᤹ᤃᤪ ᤂᤧᤴᤏᤢ ᤘᤣ᤹ ᤁᤠᤰ ᤕᤠᤶᤗᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤔᤧᤛ᤺ᤳᤗᤥ॥ 27 ᤀᤠᤸᤗ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤏᤡᤱᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤁᤢᤎᤰᤁᤡᤸᤗᤧ ᤁᤢᤕᤠᤶᤗᤰᤏᤡᤱᤗᤥ॥ 28 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤎᤰ ᤛᤣᤛᤣᤜᤢᤵᤗᤰᤁᤥ ᤀᤰᤂᤣᤗ᤹ᤖᤡᤰ ᤛᤣ᤺ᤰᤕᤢᤰ ᤆᤥᤃᤢᤛᤡᤀᤠᤱ ᤘᤠ᤹ᤖᤥ— ᤌᤡᤰᤛᤡᤃᤣ᤺ᤰᤐᤥ ᤛᤣ᤺ᤰᤕᤢᤰᤔᤡᤒᤠᤜᤠ᤹. ᤏᤡᤛᤡᤃᤣ᤺ᤰᤐᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤛᤢᤶᤛᤡᤃᤣ᤺ᤰᤐᤥ ᤛᤡᤰᤛᤠᤶᤒᤠᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤁᤧᤍᤢᤰᤐᤠ ᤔᤏᤠᤜᤠ᤹ ᤁᤧᤘᤣ᤺ᤶᤒᤠᤜᤠ᤹. ᤁᤢᤓᤠ᤹ ᤁᤧᤒᤡᤒᤠᤜᤠ᤹. ᤗᤠᤶᤃᤧᤗᤥᤒᤠᤜᤠ᤹. ᤜᤧᤰᤁᤩᤠᤱ ᤐᤖᤡᤰᤐᤖᤡᤰᤐᤠ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹॥ 29 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤛᤣ᤺ᤰᤕᤢᤰᤔᤡᤒᤠᤛᤡᤒᤡ᥅ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤛᤡᤒᤡ᥅ ᤁᤧᤖᤧᤰ ᤛᤡᤰᤛᤠᤶᤒᤠᤛᤡᤒᤡ᥅ ᤁᤧᤖᤧᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤒᤡ᥅ 30 ᤌᤣ ᤁᤧᤖᤧᤰᤗᤧ ᤁᤧᤍᤢᤰᤐᤠ ᤔᤏᤠᤜᤠ᤹ ᤘᤣ᤺ᤶᤔᤠ ᤐᤷᤎᤠ᤺ᤶᤜᤠ᤹ ᤔᤧᤃᤳᤋᤢᤒᤡ᥅ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱ ᤔᤧᤒᤠ᤺ᤵᤐᤡ᥅ ᤁᤧᤖᤧᤰᤗᤧ ᤂᤧᤴ ᤐᤠ᤺ᤴᤍᤠᤱᤜᤠ᤹ ᤗᤧᤱᤔᤠ ᤔᤧᤛᤢᤰᤋᤢᤒᤡ᥅ 31 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤐᤷᤎᤠ᤺ᤶᤜᤠ᤹ ᤂᤥᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤸᤗ ᤀᤡᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤏᤢᤒᤠ ᤗᤠᤶ ᤀᤥᤛᤣ᤺ᤴᤎᤠᤰᤏᤡᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.