᥇ ᤁᤥᤖᤴᤌᤡ 11 - LIFOTNT

¹ ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤈᤥᤱ ᤀᤡ᤺ᤳᤋᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤀᤠᤈᤥ᤺ᤱ ᤀᤡ᤺ᤳᤋᤧᤶᤔᤧ᤹ᤀᤥ॥

ᤛᤧᤘᤠ ᤆᤥ᤺ᤰᤔᤠ ᤀᤥ᤺ᤴᤎᤠᤰᤜᤠ᤹

² ᤀᤠᤸᤗ ᤁᤠᤰ ᤐᤠ᤺ᤴᤏᤥ ᤕᤠᤵᤔᤡ ᤏᤡᤱᤘᤠ᤹ ᤁᤧᤀᤡ᤺ᤳᤋᤡᤒᤠ ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤒᤠᤀᤥ ᤂᤡᤏᤡ᤹ ᤏᤠᤖᤠ ᤑᤥᤛᤢᤱᤗᤥ॥

³ ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ᤜᤠ᤹ᤖᤧ ᤂᤢᤏᤡ᤹ ᤌᤧᤃᤣᤰᤐᤠᤱᤃ ᤂᤪᤡᤛ᤻ᤋᤖᤥ. ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤌᤧᤃᤣᤰᤐᤠᤱᤃ ᤂᤢᤏᤡ᤹ ᤕᤧᤶᤒᤠ᤹ᤖᤥ. ᤜᤧᤰᤁᤩᤠᤱ ᤂᤪᤡᤛ᤻ᤋᤖᤧ ᤁᤢᤎᤧᤃᤣᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤧᤶᤔᤧ᤹ ᤑᤠ᤹ᤀᤠᤱ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

⁴ ᤁᤢᤎᤧᤃᤣᤰ ᤁᤧᤍᤧᤵᤐᤠᤀᤠᤱ ᤋᤢᤘᤠ ᤁᤧᤈᤥ᤺ᤰᤐᤠ ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤎᤧᤃᤣᤰᤐᤠ ᤂᤪᤡᤛ᤻ᤋᤧᤴ ᤜᤡᤏᤠ᤺ᤶ ᤔᤧᤳᤋᤢ᤹ᤖᤥ॥

⁵ ᤁᤢᤎᤧᤃᤣᤰ ᤔᤧᤴᤍᤧᤵᤐᤣ ᤋᤢᤘᤠ ᤁᤧᤈᤥ᤺ᤰᤔᤠ ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤧᤃᤣᤰ ᤁᤢᤕᤧᤶᤒᤠ᤹ᤀᤡᤴ ᤜᤡᤏᤠ᤺ᤶ ᤔᤧᤳᤋᤢ᤹ᤖᤥ॥ ᤁᤱᤃ ᤂᤧᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤏ᤺ᤰᤂᤢᤒᤠ ᤁᤢᤀᤡᤛᤡ᤺ᤰᤗᤥ॥

⁶ ᤁᤢᤎᤧᤃᤣᤰ ᤔᤧᤴᤍᤧᤵᤔᤏᤠᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤏ᤺ᤰᤂᤢᤖᤖᤥ॥ ᤜᤧᤰᤁᤩᤠᤱ ᤌᤧᤃᤣ᤺ᤰᤀᤡ᤺ᤴ ᤂᤰᤔᤠ ᤀᤡᤃᤪ ᤏ᤺ᤱᤔᤠᤱᤃ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤗᤠᤃᤡ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤠ᤺ᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤎᤣᤃᤣ᤺ᤰᤐᤧᤴ ᤋᤧᤵᤔᤠ ᤐᤥᤱᤗᤥ॥

⁷ ᤁᤖ ᤕᤧᤶᤒᤡᤳᤇᤠ᤹ᤀᤡᤸᤗᤧᤃ ᤌᤧᤃᤣ᤺ᤰᤐᤧᤴ ᤋᤧᤵᤔᤠ ᤔᤧᤏᤢ᤹ᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡ᤺ᤳ ᤏᤢ ᤁᤢᤔᤡᤔᤡᤍᤡᤱᤗᤥ॥ ᤁᤖ ᤔᤧᤴᤇᤢᤔᤠ᤹ᤀᤡᤱᤃ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤡᤔᤡᤍᤡᤱᤗᤥ॥

⁸ ᤌᤣᤀᤠᤱᤓᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤕᤧᤶᤒᤡᤳᤇᤠ᤹ᤀᤡᤱᤃ ᤔᤧᤴᤇᤢᤔᤠ᤹ᤗᤠᤶᤒᤠ ᤔᤧᤈᤥᤃᤧᤴ ᤁᤖ ᤔᤧᤴᤇᤢᤔᤠ᤹ᤀᤡᤴᤏᤣ ᤕᤧᤶᤒᤡᤳᤇᤠᤗᤠᤶ ᤆᤥ᤺ᤰᤔᤏᤠᤔᤠᤖᤥ॥

⁹ ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤡᤳᤇᤠ᤹ᤀᤡᤱᤃ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤗᤠᤃᤡ ᤔᤧᤈᤥᤃᤧᤴ. ᤁᤖ ᤔᤧᤴᤇᤢᤔᤠ᤹ᤀᤡᤴᤏᤣ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤗᤠᤃᤡ ᤆᤥᤃᤧᤒᤠᤖᤥ॥

¹⁰ ᤒᤠ ᤂᤧᤸᤗᤧᤆᤥᤃᤢᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤀᤠᤕᤧᤶᤒᤠ᤹ᤀᤡᤸᤗᤧ ᤁᤢᤕᤢᤰᤁᤥ ᤘᤠ᤹ᤀᤠ ᤁᤧᤗ᤹ᤒᤠ ᤔᤡᤰᤛᤣ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤛᤧ ᤁᤢᤎᤣᤃᤣ᤺ᤰᤐᤧᤴ ᤋᤧᤵᤔᤠ ᤐᤥᤱᤗᤥ॥

¹¹ ᤁᤖ ᤍᤠᤱᤒᤠᤸᤗᤧ ᤁᤢᤔᤏᤠ ᤗᤢᤶᤔᤥᤃ ᤔᤧᤴᤇᤢᤔᤠ᤹ᤀᤡᤴ ᤕᤧᤶᤒᤡᤳᤇᤠ᤹ᤗᤠᤶᤒᤠ ᤆᤥ᤺ᤰᤕᤢᤶᤓᤥᤔᤠ ᤜᤥᤵᤗᤥ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ᤀᤡᤴᤏᤠᤱ ᤔᤧᤴᤇᤢᤔᤠ᤹ᤗᤠᤶᤒᤠ ᤆᤥ᤺ᤰᤕᤢᤶᤓᤥᤒᤠ ᤜᤥᤵᤗᤥ॥

¹² ᤌᤣᤀᤠᤱᤓᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤔᤧᤴᤇᤢᤔᤠ᤹ᤀᤡᤴ ᤕᤧᤶᤒᤡᤳᤇᤠ᤹ᤗᤠᤶᤒᤠ ᤗ᤺ᤳᤋᤧᤀᤠᤱ ᤘᤕᤧᤛᤠᤱ ᤁᤠᤰ ᤕᤧᤶᤒᤡᤳᤇᤠ᤹ᤜᤠ᤹ᤃ ᤔᤧᤴᤇᤢᤔᤠᤜᤠ᤹ᤗᤠᤶᤒᤠᤀᤣ ᤛᤠᤔᤧᤘᤠ᤺ᤴᤇᤡᤱᤗᤥ॥ ᤁᤖ ᤁᤠᤰ ᤐᤠ᤺ᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤋᤠᤖᤥ॥

¹³ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤔᤧᤴᤍᤧᤵᤐᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤆᤥ᤺ᤰᤔᤠ ᤗᤠ᤹ᤖᤢᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤀᤡ᤺ᤳᤋᤧᤶᤔᤧ᤹ᤀᤥ॥

¹⁴ ᤕᤧᤶᤒᤡᤳᤇᤠ᤹ᤀᤡᤸᤗᤧᤃ ᤁᤣ᤺ᤶᤒᤠ ᤌᤧᤃᤣ᤺ᤰᤀᤡ ᤜᤡᤱᤔᤠᤃ ᤁᤢᤗᤠᤃᤡ ᤆᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤠ᤺ᤴᤗᤥ ᤑᤠ᤹ᤀᤠᤱ ᤆᤀᤡ᤺ᤳᤗᤠᤶᤒᤠᤀᤣ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥

¹⁵ ᤁᤖ ᤔᤧᤴᤇᤢᤔᤠ᤹ᤀᤡᤸᤗᤧᤃ ᤁᤣ᤺ᤶᤒᤠ ᤌᤧᤃᤣ᤺ᤰᤀᤡ ᤁᤳᤋᤢ᤹ᤏᤧ ᤑᤠ᤹ᤃᤪ. ᤂᤧᤴ ᤂᤧᤸᤗᤧ ᤁᤢᤔᤡᤔᤡᤍᤡᤱᤗᤥ. ᤌᤣᤀᤠᤱᤓᤧᤸᤗᤧ ᤁᤣ᤺ᤶᤒᤠ ᤁᤢᤎᤧᤃᤣ᤺ᤰᤀᤡ᤺ᤱᤃ ᤂᤢᤏᤧ᤹ ᤁᤢᤄᤢ᤺ᤱᤔᤠ ᤐᤥᤱᤗ ᤑᤠ᤹ᤀᤠᤱ ᤐᤡᤖᤧᤒᤠᤖᤥ॥

¹⁶ ᤂᤧᤸᤗᤧᤆᤥᤃᤢᤸᤗᤧ ᤁᤢᤓᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤥ ᤐᤠ᤺ᤴᤎᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤏᤧ ᤑᤠ᤹ᤃᤪ ᤀᤠᤏᤡᤃᤣ ᤘᤣ᤹ ᤌᤡᤶ ᤔᤧᤃᤳᤋᤢᤶᤒᤠᤴ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤸᤗᤧᤀᤠᤱ ᤔᤧᤃᤳᤋᤢᤴᤗᤥ॥

ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ

¹⁷ ᤀᤠᤸᤗ ᤁᤴ ᤀᤡᤱᤈᤠᤱᤅᤡᤴ ᤂᤡᤏᤡ᤹ ᤐᤡᤏᤡᤱᤅᤡᤸᤗᤧ ᤂᤡᤏᤡ᤹ ᤏᤠᤖᤠ ᤔᤧᤓᤥᤛᤢᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤏᤢᤒᤠ ᤐᤠᤴ ᤔᤣ᤺ᤴ. ᤁᤖ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤁᤧᤈᤥᤃᤢᤶᤗᤥ॥

¹⁸ ᤌᤣᤀᤠᤱᤓᤧᤸᤗᤧ ᤁᤠᤰᤏᤢ ᤋᤃᤡᤃ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤁᤧᤛᤧᤴᤏᤠᤛᤡᤔᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤥ ᤔᤡᤛᤠᤰ ᤏᤛᤠ᤺ᤴᤏᤠᤱ ᤆᤥᤃᤢᤱᤗᤥ॥

¹⁹ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤛᤡᤒᤠᤜᤠ᤹ ᤘᤣ᤹ ᤔᤧᤎᤠ᤺ᤵᤗ ᤑᤠ᤹ᤀᤠᤱ ᤛᤧᤴᤇᤡᤱᤔᤠᤀᤣ ᤐᤥᤱᤗᤥ॥

²⁰ ᤂᤡᤏᤡ᤹ ᤛᤥᤖᤡᤰ ᤁᤧᤈᤢᤵᤛᤡᤀᤠᤱ ᤁᤧᤈᤠᤶ ᤁᤧᤎᤢᤅᤢᤶᤒᤠᤱᤃ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤔᤣ᤺ᤴᤗᤥ॥

²¹ ᤌᤣᤀᤠᤱᤓᤧᤸᤗᤧ ᤆᤠᤈᤠᤛᤧ ᤁᤧᤕᤢᤱᤅᤠᤛᤡᤸᤗᤧ ᤁᤧᤖᤧᤰᤗᤧ ᤀᤠᤳᤋᤡᤴᤏᤠᤱ ᤔᤧᤴᤜᤠᤱᤅᤣ ᤀᤠᤒᤠᤅᤣ ᤆᤠ᤺ᤴ ᤆᤠᤔᤠ ᤁᤧᤜᤣ᤺ᤰᤋᤢᤶ. ᤜᤧᤰᤁᤩᤠᤱ ᤁᤢᤓᤠ ᤛᤠᤰᤔᤧᤴᤈᤠ ᤔᤧᤒᤥᤱ. ᤁᤢᤓᤠ ᤔᤧᤔᤛᤡᤱᤗᤥ॥

²² ᤂᤡᤏᤡ᤹ ᤜᤡᤶᤔᤥ ᤆᤠᤔᤠ ᤌᤢᤱᤔᤠ ᤁᤧᤴᤇᤢᤰᤋᤢᤶᤔᤡᤶᤒᤡ᥅ ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤴ ᤁᤢᤏᤠ ᤁᤧᤴᤇᤠ᤹ᤖᤢᤶᤔᤡᤴᤏᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠ ᤁᤧᤎᤠᤛᤢᤶ ᤁᤧᤒᤡᤖᤢᤶᤛᤡᤶᤒᤠᤒᤡ᥅ ᤀᤠᤰᤂᤣ ᤔᤧᤳᤏᤡᤱᤒᤠᤒᤣ᥅ ᤌᤣ ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤏᤠᤖᤠ ᤑᤥᤛᤢᤱᤒᤠᤒᤡ᥅ ᤛᤧᤰᤂᤠᤛᤠᤱ ᤔᤧᤓᤥᤛᤢᤱᤅᤡᤴᤗᤥ᥄

²³ ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤗᤠᤶ ᤂᤥᤛᤢᤱᤒᤠ ᤏᤡᤛᤠᤶᤔᤡᤴ ᤂᤡᤏᤡ᤹ ᤐᤡᤏᤡᤱᤅᤠᤱ ᤘᤠ᤹ᤀᤠᤖᤥ—ᤍᤠᤱᤒᤠ ᤕᤧᤛᤢᤴ ᤀᤡᤱᤗᤧᤰᤋᤧᤒᤠ ᤛᤧᤴᤍᤡᤰ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤂᤵᤛᤢ.

²⁴ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤖᤧ᤺ᤱᤅᤡᤴ ᤂᤧ᤺ᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤏᤠᤛᤡᤱᤃᤧᤴ ᤀᤠᤎᤰᤗᤥ॥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”

²⁵ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤈ ᤔᤧᤛᤢᤖᤢᤀᤠᤱ ᤆᤸᤗᤱᤏᤠ ᤂᤥᤷᤕᤠᤴ ᤕᤠᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤁᤴ ᤀᤠᤔᤠᤰᤂᤡ᤹ᤀᤡᤴ ᤘᤍᤣ᤺ᤴᤍᤧᤀᤠᤱ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠ ᤁᤢᤛᤱ ᤔᤠᤱᤜᤢᤵᤐᤡᤴᤗᤥ॥ ᤁᤴ ᤁᤧᤎᤢᤅᤢᤶᤔᤡᤸᤗᤧ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”

²⁶ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤴ ᤂᤖᤧ᤺ᤱᤅᤡᤴ ᤁᤧᤈᤠᤶᤔᤡᤸᤗᤧ ᤜᤧᤰᤁᤩᤠᤱ ᤁᤴ ᤂᤥᤷᤕᤠᤗᤠᤶ ᤁᤧᤎᤢᤅᤢᤶᤔᤡᤸᤗᤧ ᤍᤠᤱᤒᤠᤴ ᤔᤧᤴᤕᤢᤀᤣ ᤌᤠᤖᤡᤰ ᤁᤢᤛᤡᤔᤧᤴ ᤀᤡᤱᤃᤧᤓᤥᤛᤢᤶᤗᤥ॥

²⁷ ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖ ᤍᤠᤱᤒᤠᤸᤗᤧ ᤁᤢᤄᤖᤧ᤺ᤱᤅᤡᤴ ᤆ᤹᤺ ᤜᤧᤰᤁᤩᤠᤱ ᤁᤢᤄᤥᤷᤕᤠᤗᤠᤶ ᤌᤢᤅᤢ᤹ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤏᤢ ᤁᤢᤔᤠᤰᤂᤡ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤖᤥ॥

²⁸ ᤂᤖᤧ᤺ᤱ ᤆᤠᤔᤠ ᤏᤢ ᤂᤥᤷᤕᤠᤗᤠᤶ ᤌᤢᤱᤔᤠᤏᤢ᤺ᤸᤗᤧ ᤋᤃᤡ ᤁᤧᤖᤧᤰᤗᤧ ᤀᤡᤱᤃᤠ᤹ ᤛᤢᤶᤒᤥᤎᤠᤒᤠ ᤆᤥ᤺ᤰᤁᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤀᤠᤒᤠᤅᤣ ᤛᤠ᤹ᤛᤡᤱᤔᤠ ᤐᤥᤱᤗᤥ॥

²⁹ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤀᤡᤱᤎᤠᤱ ᤔᤧᤶᤒᤡᤀᤣ ᤂᤖᤧ᤺ᤱᤅᤡᤴ ᤆ᤹᤺ ᤜᤧᤰᤁᤩᤠᤱ ᤂᤥᤷᤕᤠᤗᤠᤶ ᤌᤢᤅᤢ᤹ ᤂᤧᤸᤗᤧ ᤀᤠᤒᤠᤅᤣ ᤁᤢᤛᤶᤍᤠᤱ ᤂᤠᤛᤧᤴᤏᤡᤴ ᤋᤠᤖᤢᤖᤥ॥

³⁰ ᤂᤧᤸᤗᤧᤆᤥᤃᤢᤸᤗᤧᤀᤣ ᤂᤡᤏᤡ᤹ ᤗᤢᤶᤔᤥ ᤕᤖᤡᤰ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠᤜᤠ᤹ ᤏᤢ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤁᤢᤓᤠᤃ ᤔᤧᤛᤩᤧ ᤔᤧᤒᤣᤀᤠᤱᤗᤥ॥

³¹ ᤁᤖ ᤀᤠᤒᤠᤅᤣ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤛᤧᤰᤂᤠᤀᤣ ᤀᤠᤛᤠ᤹ᤖᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢ ᤂᤢᤶᤍᤡᤱᤅᤥ ᤀᤠᤴᤎᤠᤏᤧᤴᤗᤥ॥

³² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤠᤛᤧᤴ ᤀᤠᤈᤥ᤺ᤰᤁᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰᤁᤣ ᤑᤥᤋᤩᤠᤀᤥ ᤀᤠᤴᤎᤠ᤺ᤴᤏᤧᤴᤗ ᤑᤠ᤹ᤀᤠᤱ ᤜᤧᤴᤎᤡᤶ ᤀᤠᤕᤠᤰᤗᤥ॥

³³ ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤆᤠᤔᤠ ᤌᤢᤱᤔᤠᤀᤥ ᤁᤧᤈᤢᤵᤛᤡᤸᤗᤧ ᤜᤠᤱᤅᤠᤛᤡᤶᤔᤧ᤹ᤀᤥ॥

³⁴ ᤀᤠᤳᤋᤡᤴ ᤛᤠᤰᤔᤧᤴᤈᤠ ᤘᤠ᤹. ᤂᤧᤸᤗᤧ ᤜᤠᤖᤠ᤹ ᤜᤡᤶᤔᤥᤀᤣ ᤆᤀᤠᤱ ᤋᤠᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤌᤡᤰᤋᤧᤴᤏᤥ ᤁᤧᤈᤢᤵᤛᤡᤸᤗᤧ ᤂᤢᤶᤍᤡᤱᤅᤥ ᤁᤧᤴᤎᤩᤧ᤹ᤀᤡᤴᤗᤖᤥ॥ ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤘᤣ᤹ ᤐᤠ᤺ᤴᤜᤠ᤹ᤖᤧᤴ ᤀᤥ᤺ᤴᤎᤠᤰ ᤐᤡᤏᤡᤱᤗᤥ॥