᥇ ᤛᤠᤵᤔᤢ᤺ᤴᤎᤢᤶ 5 - LIFOTNTᤖᤢᤒᤣᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ 1 ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤋᤢᤶᤒᤠ ᤖᤢᤒᤣᤏᤖᤧ ᤁᤢᤛ᤻ᤛᤠᤜᤠ᤹. ᤛᤧᤰᤂᤠ᤺ᤸᤗᤧ ᤂᤧᤴ ᤋᤃᤡ ᤛᤠᤘᤠ᤺ᤴᤇᤡᤱᤅᤠᤱ ᤘᤕᤧ. ᤁᤖ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤠᤖᤧ ᤗᤳᤇᤠ ᤁᤢᤈᤰᤔᤣ᤺ᤳ ᤌᤡᤰᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤢᤄᤥᤔᤠ ᤋᤢᤶᤒᤠ ᤗᤰᤁᤡᤴ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤕᤥᤛᤣᤑᤖᤧ ᤁᤢᤛ᤻ᤛᤠᤜᤠ᤹ ᤔᤧᤒᤡᤖᤢᤛᤡ. ᤜᤧᤰᤁᤩᤠᤱ ᤔᤡᤱᤏᤠ᤺ᤳᤋᤥ ᤂᤧᤴ ᤋᤢᤶᤒᤠ ᤔᤧᤸᤗᤣ᤺ᤳᤋᤢᤴ॥ 2 ᤜᤧᤰᤁᤩᤠᤱ ᤕᤜᤢᤍᤠᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤴᤛᤠ᤹ᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤎᤢᤶᤒᤠ ᤘᤕᤧᤛᤠᤱ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤗᤳᤇᤠ ᤕᤢᤰᤛᤠᤒᤠ ᤗ᤺ᤴᤍᤧᤛᤠᤱ ᤋᤢᤶᤒᤠ ᤗᤰᤂᤥᤔᤠ ᤕᤢᤰᤁᤡᤴ ᤕᤥᤛᤣᤑᤖᤧᤀᤣ ᤂᤥᤛᤢ॥ 3 ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤋᤢᤶᤒᤠ ᤖᤢᤒᤣᤏᤖᤧ ᤁᤢᤛ᤻ᤛᤠᤜᤠ᤹— ᤜᤠᤏᤥᤁ. ᤐᤸᤗᤢ. ᤜᤣᤛᤪᤥᤏ ᤏᤢ ᤁᤷᤔᤡ॥ 4 ᤕᤥᤀᤣᤗᤖᤧ ᤁᤢᤛ᤻ᤛᤠᤜᤠ᤹— ᤂᤢᤏᤧ᤹ ᤁᤢᤛ᤻ᤛᤠ ᤛᤔᤠᤕᤠᤜ. ᤛᤔᤠᤕᤠᤜᤖᤧ ᤁᤢᤛ᤻ᤛᤠ ᤃᤥᤃ. ᤃᤥᤃᤖᤧ ᤁᤢᤛ᤻ᤛᤠ ᤛᤡᤔᤡ. 5 ᤛᤡᤔᤡᤖᤧ ᤁᤢᤛ᤻ᤛᤠ ᤔᤡᤁᤠ. ᤔᤡᤁᤠᤖᤧ ᤁᤢᤛ᤻ᤛᤠ ᤖᤠᤕᤠᤜ. ᤖᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤗ. 6 ᤜᤧᤰᤁᤩᤠᤱ ᤒᤠᤗᤖᤧ ᤁᤢᤛ᤻ᤛᤠ ᤒᤡᤖᤜ. ᤂᤢᤏᤧ᤹ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤖᤖᤧ ᤋᤧᤶᤛᤢᤀᤠᤱ ᤋᤣ᤹ᤖᤢ॥ ᤒᤡᤖᤜᤴ ᤖᤢᤒᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧ॥ 7 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤠ᤹ᤀᤡᤜᤠ᤹. ᤌᤠ᤺ᤰᤌᤠ᤺ᤰ ᤔᤧᤈᤥᤃᤢᤛᤡᤀᤠᤱ ᤂᤢᤴᤇᤡ᤹ ᤔᤡᤱᤛᤪᤠ ᤔᤡᤱᤏᤠ᤺ᤳᤋᤥ ᤔᤧᤛᤠᤵᤋᤢᤀᤠᤱ ᤐᤳ— ᤋᤢᤶᤒᤠ ᤗᤠᤶᤗᤥᤒᤠ ᤕᤡᤀᤣᤗ. ᤈᤁᤖᤡᤕᤠ. 8 ᤜᤧᤰᤁᤩᤠᤱ ᤀᤈᤠᤈᤖᤧ ᤁᤢᤛ᤻ᤛᤠ ᤒᤣᤗᤠ. ᤛᤣᤔᤠᤖᤧ ᤁᤢᤶᤔᤧᤴᤇᤠ᤹ ᤏᤢ ᤕᤥᤀᤣᤗᤖᤧ ᤁᤢᤈᤰᤔᤧᤴᤇᤠ᤹ ᤘᤕᤧ॥ ᤂᤧᤱᤜᤠ᤹ ᤀᤖᤥᤀᤣᤖᤀᤥ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤋᤧᤱᤃᤵᤐᤡᤴ ᤏᤣᤒᤥ ᤏᤢ ᤒᤠᤗ-ᤔᤥᤏ ᤌᤠᤖᤡᤰ ᤁᤧᤖᤧ॥ 9 ᤏᤠᤱᤃᤧᤴ ᤐᤡᤛᤠᤱ ᤂᤧᤱᤜᤠ᤹ᤖᤧ ᤕᤢᤑᤪᤣᤋᤡᤛ ᤘᤜ᤺ᤱ ᤌᤠᤖᤡᤰ ᤁᤧᤒᤥᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤡᤸᤗᤧ ᤁᤢᤕᤠᤀᤥ ᤌᤧᤶᤒᤠ ᤗᤳᤇᤠ ᤋᤧᤱᤃᤵᤐᤡᤴ ᤔᤧᤕᤢᤰᤋᤢᤀᤠᤱ ᤏᤧᤛ᤻ᤛᤧ. ᤌᤣᤀᤠᤱᤓᤧᤸᤗᤧ ᤃᤡᤗᤠᤍᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤳᤌᤰᤛᤠᤜᤠ᤹ ᤕᤖᤡᤰ ᤔᤧᤒᤥᤴᤍᤧᤀᤠᤱ ᤘᤕᤧ॥ 10 ᤛᤠᤀᤢᤗᤖᤧ ᤁᤢᤜᤠᤱᤕᤢᤰ ᤕᤧᤶᤔᤥ ᤂᤧᤱᤜᤠ᤹ ᤜᤃᤪᤡᤜᤠ᤹ᤏᤢ ᤌᤱ ᤔᤧᤎᤰᤋᤧᤀᤠᤱ ᤂᤢᤴᤇᤡ᤹ ᤔᤧᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤃᤡᤗᤠᤍ ᤏᤠᤱᤃᤧᤴ ᤐᤡᤛᤠᤱᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤕᤢᤰᤋᤢ ᤔᤧᤍᤣ᤹ᤖᤢᤖᤥ॥ ᤃᤠᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ 11 ᤃᤠᤍᤡᤜᤠ᤹ ᤖᤢᤒᤣᤏᤡᤜᤠ᤹ᤖᤧ ᤁᤢᤍᤥ᤺ᤵᤔᤠ ᤌᤥᤜᤠᤱ ᤗᤧᤵᤔᤠᤱ ᤒᤠᤛᤠᤏᤒᤠ ᤛᤗᤁᤠ ᤌᤠᤖᤡᤰᤁᤣ ᤔᤧᤕᤢᤅᤧᤖᤥ— 12 ᤕᤥᤀᤣᤗᤧᤴ ᤋᤢᤶ ᤗᤠᤶᤗᤥᤒᤠ ᤘᤕᤧ. ᤋᤠᤰᤑᤠᤀᤥ ᤏᤡᤛᤡᤃᤣᤰᤐᤠ ᤛᤠᤐᤠᤔᤧᤴ ᤘᤕᤧ. ᤂᤧᤴ ᤀᤣᤃᤠᤱ ᤒᤠᤛᤠᤏᤀᤥ ᤕᤠᤏᤤᤴ ᤏᤢ ᤛᤠᤑᤠᤋᤧᤴ ᤘᤕᤧᤛᤡ॥ 13 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤠ᤹ᤀᤡᤜᤠ᤹— ᤔᤡᤂᤠᤀᤣᤗ. ᤔᤛᤢᤸᤗᤠᤔ. ᤛᤣᤒᤠ. ᤕᤥᤖᤤ. ᤕᤁᤠᤏ. ᤈᤡᤀᤠ ᤏᤢ ᤀᤣᤒᤣᤖ—ᤁᤧᤖᤧᤰᤗᤧ ᤏᤢᤛᤡ ᤔᤧᤘᤕᤧ॥ 14 ᤀᤒᤡᤜᤣᤗᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤁᤴᤜᤠ᤹ᤀᤣ ᤔᤧᤘᤕᤧ॥ ᤀᤒᤡᤜᤣᤗᤧᤴ ᤜᤢᤖᤡᤖᤧ ᤁᤢᤛ᤻ᤛᤠ ᤘᤕᤧ. ᤜᤢᤖᤡᤴ ᤕᤠᤖᤥᤜᤖᤧ ᤁᤢᤛ᤻ᤛᤠ ᤘᤕᤧ. ᤕᤠᤖᤥᤜᤴ ᤃᤡᤗᤠᤍᤖᤧ ᤁᤢᤛ᤻ᤛᤠ ᤘᤕᤧ. ᤃᤡᤗᤠᤍᤧᤴ ᤔᤡᤂᤠᤀᤣᤗᤖᤧ ᤁᤢᤛ᤻ᤛᤠ ᤘᤕᤧ. ᤔᤡᤂᤠᤀᤣᤗᤧᤴ ᤕᤛᤡᤛᤤᤖᤧ ᤁᤢᤛ᤻ᤛᤠ ᤘᤕᤧ. ᤕᤛᤡᤛᤤᤴ ᤕᤜᤍᤥᤖᤧ ᤁᤢᤛ᤻ᤛᤠ ᤘᤕᤧ. ᤕᤜᤍᤥᤴ ᤒᤢᤈᤖᤧ ᤁᤢᤛ᤻ᤛᤠ ᤘᤕᤧ॥ 15 ᤃᤢᤏᤡᤖᤧ ᤁᤢᤛ᤻ᤛᤠ ᤀᤒᤍᤡᤀᤣᤗᤖᤧ ᤁᤢᤛ᤻ᤛᤠ ᤀᤜᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤒᤠ ᤋᤢᤶ ᤗᤠᤶᤗᤥᤒᤠ ᤘᤕᤧ॥ 16 ᤃᤠᤍᤡᤜᤠ᤹ ᤃᤡᤗᤠᤍ. ᤒᤠᤛᤠᤏ ᤏᤢ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹ᤀᤥ. ᤜᤧᤰᤁᤩᤠᤱ ᤛᤠᤖᤥᤏᤒᤠ ᤁᤧᤖᤧᤰ ᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤁᤧᤒᤥᤒᤠᤀᤠᤱ ᤁᤧᤏᤧᤒᤠ ᤋᤧᤴᤜᤠ᤹ᤀᤥ ᤌᤠᤖᤡᤰᤁᤣ ᤔᤧᤕᤢᤅᤧ॥ 17 ᤕᤜᤢᤍᤠᤒᤠ ᤜᤠᤱ ᤕᤥᤋᤠᤔ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤜᤠᤱᤕᤢᤰ ᤕᤧᤶᤔᤥ ᤁᤴ ᤁᤧᤖᤧᤰ ᤔᤡᤱᤜᤠ᤹ ᤂᤢᤴᤇᤡ᤹ ᤔᤡᤱᤛᤪᤠ ᤔᤡᤱᤏᤠ᤺ᤳᤋᤥ ᤔᤧᤛᤠᤵᤋᤢᤀᤠᤱ ᤐᤳᤗᤥ॥ ᤏᤠᤱᤃᤧᤴ ᤐᤡᤛᤠᤱ ᤌᤠ᤺ᤰᤁᤥᤒᤠ ᤌᤰᤛᤢᤒᤠᤜᤠ᤹ 18 ᤖᤢᤒᤣᤏᤡᤜᤠ᤹. ᤃᤠᤍᤡᤜᤠ᤹ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᥊᥊.᥍᥌᥆ ᤔᤧᤘᤕᤧ॥ ᤂᤧᤱᤜᤠ᤹ ᤂᤥᤜᤠ᤹. ᤋᤠᤓᤣᤜᤠ᤹ ᤏᤢ ᤋᤥᤱ ᤗᤡᤜᤠ᤹ ᤌᤱᤅᤥ ᤏᤢᤖᤡᤰᤁᤠᤱ ᤕᤠᤱᤔᤠ ᤁᤧᤗᤧᤒᤠ ᤔᤧᤘᤕᤧ॥ 19 ᤁᤴᤜᤠ᤹ ᤜᤃᤪᤡᤜᤠ᤹. ᤕᤋᤢᤖ. ᤏᤠᤐᤡᤛ ᤜᤧᤰᤁᤩᤠᤱ ᤏᤥᤍᤠᤒᤜᤠ᤹ᤏᤢ ᤌᤱ ᤔᤧᤈᤥᤃᤧ॥ 20 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶ ᤀᤥᤔᤧᤔᤧᤳᤋᤢᤀᤠᤱ ᤐᤣᤗᤡ ᤔᤧᤓᤠᤰᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠ ᤁᤧᤏᤠ᤺ᤶᤒᤠ ᤔᤧᤒᤥ᤺ᤰᤂᤧ॥ ᤜᤧᤰᤁᤩᤠᤱ ᤜᤃᤪᤡᤜᤠ᤹ ᤏᤢ ᤂᤢᤴᤇᤡ᤹ ᤁᤧᤖᤧᤰ ᤋᤣ᤺ᤱᤈᤢᤶᤒᤠ ᤗᤠᤈᤣ᤹ᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤎᤩᤧ॥ 21 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤳᤌᤰᤛᤠᤜᤠ᤹. ᥋᥆.᥆᥆᥆ ᤀᤢᤔᤣ. ᥈.᥋᥆.᥆᥆᥆ ᤔᤧᤸᤗᤢᤰ ᤏᤢ ᥈.᥆᥆᥆ ᤀᤍᤱᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤛᤡ. ᤜᤧᤰᤁᤩᤠᤱ ᥇.᥆᥆.᥆᥆᥆ ᤔᤏᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥ 22 ᤘᤣ᤹ ᤕᤖᤡᤰ ᤔᤏᤠᤜᤠ᤹ ᤔᤧᤛᤧᤖᤢᤛᤡ. ᤌᤣᤀᤠᤱᤓᤧᤸᤗᤧ ᤁᤴ ᤌᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤐᤥ᤺ᤰᤂᤧᤀᤠᤱ ᤘᤕᤧ॥ ᤀᤛ᤻ᤛᤢᤖᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤴᤍᤧᤶᤛᤢᤛᤡᤴᤏᤠᤱ ᤔᤧᤴᤍᤣ᤹ᤖᤢᤛᤡᤴᤗ ᤌᤠᤖᤡᤰ ᤂᤧᤱᤜᤠ᤹ ᤂᤧᤴ ᤗᤠᤈᤣ᤹ᤀᤥ ᤔᤧᤕᤢᤅᤧᤖᤥ॥ ᤏᤠᤱᤃᤧᤴ ᤐᤡᤛᤠᤱ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ 23 ᤔᤏᤛ᤻ᤛᤣᤒᤠ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ ᤒᤠᤛᤠᤏᤗᤠᤶ ᤒᤠᤗ-ᤜᤣᤷᤔᤥᤏ. ᤛᤣᤏᤡᤖ (ᤜᤣᤷᤔᤥᤏ ᤁᤥ᤺ᤰᤔᤠ) ᤌᤠᤖᤡᤰᤐᤠ ᤗᤠᤈᤣ᤹ᤀᤥ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤠᤏᤡ᤺ᤳᤋᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤒᤥ᤺ᤰᤂᤧ॥ 24 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤒᤠ ᤁᤢᤎᤧᤃᤣᤰ ᤔᤏᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—ᤀᤣᤐᤣᤖ. ᤕᤡᤛᤡ. ᤀᤣᤗᤡᤀᤣᤗ. ᤀᤈᤪᤡᤀᤣᤗ. ᤕᤷᤔᤡᤕᤠ. ᤜᤥᤍᤒᤡᤕᤠ ᤏᤢ ᤕᤜᤍᤡᤀᤣᤗ॥ ᤂᤧᤱᤜᤠ᤹ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠ ᤏᤢ ᤂᤢᤴᤇᤡ᤹ ᤔᤡᤱ ᤁᤧᤍᤡ᤺ᤵᤐᤠ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤀᤥᤒᤠ ᤁᤢᤎᤧᤃᤣᤰ ᤗᤠᤶᤗᤥᤒᤠ ᤔᤧᤘᤕᤧᤖᤥ॥ ᤏᤠᤱᤃᤧᤴᤒᤠ ᤌᤠ᤺ᤰᤜᤠ᤹ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢᤛᤡ 25 ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤰᤂᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠᤏᤢ ᤁᤢᤍᤱᤒᤠ ᤔᤧᤈᤥ᤺ᤰᤛᤡᤱ॥ 26 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤛ᤻ᤛᤢᤖᤒᤠ ᤜᤠᤱ ᤐᤢᤗ ᤀᤡᤃᤪ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤣᤖᤧᤴ ᤜᤢᤛᤢ. ᤂᤶᤓᤩᤠᤱ ᤂᤢᤏᤧ᤹ ᤖᤢᤒᤣᤏ. ᤃᤠᤍ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤁᤥᤒᤠ ᤔᤏᤠᤜᤠ᤹ ᤋᤧᤶᤛᤢᤍᤣ᤹ᤖᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤜᤗᤜ. ᤜᤠᤒᤥᤖ. ᤜᤠᤖᤠ ᤏᤢ ᤃᤥᤈᤠᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤔᤧᤕᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.