᥇ ᤛᤠᤵᤔᤢ᤺ᤴᤎᤢᤶ 29 - LIFOTNTᤔᤠᤱᤜᤡᤶ ᤆᤥ᤺ᤰᤛᤧ ᤔᤧᤍᤠᤖᤢᤒᤠ ᤜᤢᤰᤘᤠ ᤁᤢᤓᤠ᤹ᤜᤠ᤹ 1 ᤂᤧᤴ ᤀᤣᤃᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤆᤢ᤺ᤰᤐᤠ ᤛᤧ᤺ᤵᤔᤠ ᤁᤧᤘᤠ᤹ᤒᤠ ᤀᤠᤱᤃᤠ᤹ ᤀᤠᤛ᤻ᤛᤠ ᤛᤥᤗᤥᤔᤏᤧᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤀᤠᤱ ᤘᤠ᤹॥ ᤁᤴ ᤕᤠ᤺ᤶᤒᤰᤁᤡᤴ ᤐᤕᤶ ᤕᤶᤒᤠ ᤆᤥᤰ. ᤌᤣᤀᤠᤱᤓᤧᤸᤗᤧ ᤁᤴ ᤜᤡᤶᤔᤡᤱᤃ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤣ᤺ᤴ ᤁᤖ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡᤖᤥ॥ 2 ᤀᤠᤱᤃᤠ᤹ ᤀᤠᤛᤢᤰᤛᤢᤰ ᤌᤠᤖᤡᤰ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤛᤠᤶᤔᤩᤠᤱ ᤕᤠ᤺ᤶᤒᤰᤗᤧ ᤗᤠᤃᤡ ᤛᤠᤶᤔᤩᤠᤱ. ᤕᤢᤵᤐᤠ ᤕᤠ᤺ᤶᤒᤰᤗᤧ ᤗᤠᤃᤡ ᤕᤢᤵᤐᤠ. ᤁᤠᤛᤠ᤺ᤸᤗᤧ ᤗᤠᤃᤡ ᤁᤠᤛᤠ. ᤑᤧᤴᤈᤣᤸᤗᤧ ᤗᤠᤃᤡ ᤑᤧᤴᤈᤣ᤹. ᤛᤡᤱᤗᤧ ᤗᤠᤃᤡ ᤛᤡᤱ. ᤜᤧᤰᤁᤩᤠᤱ ᤜᤡᤶᤗᤧ ᤗᤠᤃᤡ ᤔᤢᤎᤡᤱᤗᤢᤱ. ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱ. ᤛᤠ᤹ᤖᤡᤰ ᤕᤖᤡᤰ ᤗᤢᤱᤜᤠ᤹ ᤏᤢ ᤁᤧᤖᤧᤰ ᤐᤖᤡᤰᤐᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤁᤧᤄᤡ᤺ᤰᤐᤠ ᤗᤢᤱᤜᤠ᤹ ᤏᤢ ᤔᤠᤱᤗᤢᤱᤜᤠ᤹ ᤘᤧᤳᤋᤧᤛᤖᤧ ᤗᤢᤵᤛᤢᤱᤅᤠᤱ ᤏᤧᤖᤥ॥ 3 ᤂᤧᤴᤏᤢ᤺ᤸᤗᤧ ᤘᤣ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤀᤠᤛᤡᤖᤠ᤹ᤌᤠᤅᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤎᤠ᤺ᤱᤅᤥᤗᤠᤶ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤗ᤺ᤳᤋᤢᤱᤗ ᤐᤳᤋᤠ॥ ᤁᤱᤃ ᤛᤣᤛᤣ ᤔᤠᤱᤜᤡᤶᤔᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤑᤢᤰᤂᤢᤱᤒᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤐᤠ᤺ᤴᤗᤥ॥ 4 ᤜᤧᤴᤇᤡᤱ ᤛᤢᤶᤛᤡ ᤋᤣᤗᤣᤴᤋ ᤛᤠᤶᤔᤩᤠᤱ (ᤀᤥᤐᤡᤖᤒᤠ ᤛᤠᤶᤔᤩᤠᤱ) ᤏᤢ ᤔᤠᤱᤜᤡᤶᤔᤥᤒᤠ ᤗᤢᤱᤎᤠᤰᤁᤡᤴ ᤐᤶᤔᤠᤖᤧ ᤗᤠᤃᤡ ᤜᤧᤴᤇᤡᤱ ᤏᤢᤛᤡ ᤋᤠᤗᤣᤴᤋ ᤕᤢᤵᤐᤠ ᤀᤡᤛᤣ᤺ᤱ. 5 ᤛᤠᤶᤔᤩᤠᤱ ᤕᤠ᤺ᤶᤒᤰᤗᤧ ᤗᤠᤃᤡ ᤏᤢ ᤕᤢᤵᤐᤠ ᤕᤠ᤺ᤶᤒᤰᤗᤧ ᤗᤠᤃᤡ ᤜᤧᤰᤁᤩᤠᤱ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤆᤥᤒᤣᤃᤢᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤕᤠ᤺ᤶᤒᤰᤗᤧ ᤗᤠᤃᤡ ᤐᤡᤖᤢᤱᤛᤡᤱᤗ ᤐᤳᤋᤠ॥ ᤀᤠᤸᤗ ᤀᤠᤀᤡᤴ ᤕᤜᤘᤣ ᤍᤠᤱᤒᤠᤀᤥ ᤜᤢᤰᤘᤠᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤀᤠᤳᤋᤡᤴᤜᤠ᤹ ᤕᤠᤖᤡᤵ ᤔᤧᤘᤠ᤹ᤒᤣ᥅” 6 ᤂᤧᤒᤩᤠᤱ ᤜᤡᤶᤛᤕᤱ ᤜᤡᤶᤛᤕᤱᤒᤠ ᤗᤠᤶᤗᤥᤒᤠᤜᤠ᤹. ᤀᤡᤛᤪᤠᤀᤡᤗ ᤌᤠ᤺ᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤜᤧᤴᤇᤡᤱ ᤏᤢ ᤁᤡᤵ ᤌᤡᤰᤁᤥᤒᤠ ᤌᤰᤔᤥᤒᤠᤜᤠ᤹ ᤏᤢ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥᤒᤠ ᤗᤰᤐᤧᤴᤏᤥ ᤁᤧᤘᤠ᤹ᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤔᤧᤍᤥᤴᤍᤢ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤜᤧᤴᤇᤡᤱ ᤅᤠᤛᤡ ᤋᤠᤗᤣᤴᤋ ᤏᤢ ᥇᥆.᥆᥆᥆ ᤛᤠᤶᤔᤩᤠᤱ ᤍᤠᤖᤡᤁ ᤜᤧᤰᤁᤩᤠᤱ ᥋.᥆᥆᥆ ᤋᤠᤗᤣᤴᤋ ᤕᤢᤵᤐᤠ. ᥇᥎.᥆᥆᥆ ᤁᤠᤛᤠ ᤋᤠᤗᤣᤴᤋ ᤏᤢ ᥇.᥆᥆.᥆᥆᥆ ᤑᤧᤴᤈᤣ᤹ ᤋᤠᤗᤣᤴᤋ ᤔᤧᤗ᤺ᤳᤋᤢ॥ 8 ᤂᤧᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ᤖᤧ ᤁᤢᤔᤧᤴ ᤁᤧᤄᤡ᤺ᤰᤐᤠ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤔᤧᤃᤳᤋᤢ. ᤂᤧᤱᤜᤠ᤹ᤖᤧ ᤂᤧᤴ ᤃᤣᤷᤛᤥᤏᤡ ᤕᤜᤡᤀᤣᤗᤖᤧ ᤁᤢᤗᤰᤐᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤆᤠᤎᤠ᤺ᤱᤅᤡᤸᤗᤧ ᤗᤠᤃᤡ ᤔᤧᤒᤡᤖᤢᤛᤡᤖᤥ॥ 9 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤁᤶᤓᤗ᤹ᤖᤡᤰ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤔᤧᤒᤡᤖᤢᤛᤡᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤕᤧᤕᤧ ᤗ᤹ᤖᤡᤰ ᤔᤧᤛ᤺ᤳᤋᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤏᤢ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ ᤔᤠᤱᤛᤧᤘᤠᤏᤢ ᤛᤥᤛᤥᤖᤡᤰ ᤀᤠᤵᤑᤣᤰ ᤂᤧᤴ ᤐᤠ᤺ᤴᤜᤠ᤹ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤍᤠᤀᤢᤍ ᤜᤠᤱᤅᤡᤴᤏᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧ॥ ᤍᤠᤀᤢᤍᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢ᤹ 10 ᤍᤠᤀᤢᤍᤖᤧ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤖᤥ— “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤡᤛᤪᤠᤀᤡᤗᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤣ. ᤛᤍᤠᤍᤡᤱ ᤛᤍᤠᤍᤡᤱ ᤌᤠᤖᤡᤰ ᤁᤧᤏᤠᤖᤠ ᤐᤥᤖᤖᤥ॥ 11 ᤕᤜᤘᤣ ᤍᤠᤱᤒᤠᤀᤣ. ᤐᤕᤶ ᤕᤶᤒᤠ ᤏᤢ ᤔᤢᤰᤛᤠᤶᤔᤡᤴ ᤀᤠᤍᤠᤱᤒᤠᤖᤧᤴᤏᤣᤖᤥ. ᤔᤡᤔᤡᤍᤡᤱ ᤏᤢ ᤜᤠᤱᤘᤠ ᤔᤠᤱᤘᤠᤴ ᤀᤠᤍᤠᤱᤒᤠᤖᤧᤴᤏᤣᤖᤥ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤍᤠᤱᤒᤠᤖᤧᤴᤏᤣᤖᤥ॥ ᤜᤠᤱᤈᤢᤶᤔᤡᤴᤏᤠᤱ ᤀᤠᤍᤠᤱᤒᤠᤖᤧᤴᤏᤣᤖᤥ. ᤕᤜᤘᤣ ᤍᤠᤱᤒᤠᤀᤣ. ᤁᤧᤖᤧᤰ ᤐᤠ᤺ᤴᤜᤠ᤹ ᤛᤶᤎᤠᤱ ᤁᤧᤕᤢᤱᤒᤠ ᤀᤠᤍᤠᤱᤒᤠ ᤜᤠᤱᤏᤧᤖᤥ॥ 12 ᤕᤠᤱᤛᤠᤁᤢᤴᤎᤣ ᤏᤢ ᤔᤡᤱᤛᤥ ᤀᤡᤱᤎᤠᤱ ᤀᤠᤍᤠᤱᤒᤠ ᤗᤠᤶᤔᤣ ᤋᤠᤖᤥ. ᤀᤠᤍᤠᤱᤒᤠᤀᤣ ᤁᤧᤖᤧᤰ ᤛᤶᤎᤠᤱ ᤕᤢᤰ ᤁᤧᤈᤥ᤺ᤰᤗᤥ. ᤔᤢᤰᤁᤢᤶ ᤏᤢ ᤔᤢᤰᤛᤠᤶ ᤀᤠᤍᤠᤱᤒᤠᤖᤧᤀᤣ ᤁᤧᤜᤢᤰᤁᤥ ᤘᤠ᤹ᤖᤥ. ᤀᤠᤳᤋᤡᤴᤜᤠ᤹ᤛᤠᤱ ᤌᤠ᤺ᤱ ᤑᤥᤱᤔᤠᤛᤡ ᤏᤢ ᤔᤢᤰᤛᤠᤶ ᤐᤡᤔᤠᤛᤡ ᤁᤧᤜᤢᤰᤁᤥ ᤘᤠ᤹ᤖᤥ॥ ᤀᤠᤳᤋᤡᤴᤜᤠ᤹ᤛᤠᤱ ᤌᤠ᤺ᤱ ᤆᤥ᤺ᤰᤔᤠᤛᤡ ᤏᤢ ᤁᤧᤎᤢᤶᤒᤠ ᤆᤥ᤺ᤰᤔᤠ ᤁᤧᤛᤢᤰᤋᤢᤛᤡᤖᤥ॥ 13 ᤀᤠᤸᤗ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤏᤢᤃᤧᤴ ᤐᤡᤀᤠᤛᤡᤃᤧᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤡᤔᤡᤍᤡᤱᤃᤧᤴ ᤔᤡᤱᤅᤥ ᤁᤧᤏᤠᤖᤠ ᤑᤥᤛᤢᤶᤒᤧᤖᤥ॥ 14 “ᤁᤖ ᤀᤠᤱᤃᤠ᤹ ᤜᤠ᤺ᤳᤋᤠᤒᤣ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤜᤠ᤺ᤳᤇᤡᤀᤠᤱ ᤀᤠᤏᤡᤃᤣ ᤜᤧᤰᤁᤣᤗ᤹ᤖᤡᤰ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤁᤶᤓᤗ᤹ᤖᤡᤰ ᤐᤡᤔᤠ ᤛᤢᤰᤋᤢᤶᤛᤡᤶᤒᤧᤒᤣ᥅ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤏᤧ᤹ ᤗᤠᤶᤒᤠᤀᤣ ᤋᤠᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥᤗᤠᤶ ᤁᤧᤍᤠᤒᤴᤗᤰ ᤀᤠᤏᤡᤃᤣ ᤐᤡᤀᤠᤛᤡᤃᤧᤖᤥ॥ 15 ᤀᤠᤏᤡᤃᤣ ᤛᤢᤎᤧᤒᤠ ᤌᤠ᤺ᤰᤌᤧᤒᤠᤜᤠ᤹ ᤜᤧᤰᤁᤣᤀᤣ ᤀᤠᤏᤡᤃᤧᤃ ᤀᤠᤍᤠᤱᤒᤠᤖᤧ ᤁᤧᤏᤡᤔᤥ ᤘᤣ᤹ ᤗᤠᤈᤣ᤹ᤒᤠ ᤏᤢ ᤘᤧᤵᤔᤡᤒᤠᤛᤡᤃᤧ॥ ᤀᤠᤏᤡᤃᤣ ᤕᤧᤴᤏᤡᤴ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤶᤔᤡ᤺ᤰᤂᤢᤱᤒᤠ ᤜᤧᤰᤋᤱᤒᤠᤖᤰ ᤆᤥᤰ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤃᤡ ᤏᤡᤱᤛᤠᤱ ᤆᤥ᤺ᤰᤔᤠᤗᤠᤶ ᤜᤥᤵ॥ 16 ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤛᤣᤛᤣ ᤔᤡᤱᤅᤡᤸᤗᤧᤴ ᤀᤡᤱᤎᤠᤱᤗᤧ ᤗᤠᤃᤡ ᤜᤡᤶ ᤆᤥ᤺ᤰᤛᤧ ᤀᤠᤏᤡᤃᤣ ᤑᤢᤰᤂᤢᤶᤒᤧᤀᤠᤱ ᤁᤧᤕᤢᤱᤒᤠ ᤁᤴ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰ ᤗᤠᤶᤒᤠᤀᤣ ᤋᤠᤖᤥ. ᤜᤧᤰᤁᤩᤠᤱ ᤁᤴᤜᤠ᤹ ᤁᤧᤖᤧᤰ ᤀᤠᤍᤠᤱᤒᤠᤖᤧᤴᤏᤣᤖᤥ॥ 17 ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤛᤠ᤹ᤖᤢ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤗᤠᤶ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ ᤋᤠᤖᤥ॥ ᤛᤧᤰᤂᤠᤒᤠ ᤏᤡᤱᤘᤠ᤺ᤸᤗᤧ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤏᤡᤱᤘᤠ᤹ᤀᤥᤗᤠᤶ ᤁᤴ ᤁᤧᤖᤧᤰ ᤜᤢᤰᤘᤠᤜᤠ᤹ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤥᤗᤠᤶ ᤀᤠᤍᤠᤱᤒᤠᤖᤧ᤹ᤀᤥ ᤋᤥ᤺ᤴᤍᤢᤱᤅᤠᤱ ᤘᤠ᤹॥ ᤜᤧᤰᤁᤩᤠᤱ ᤀᤠᤸᤗ ᤁᤵᤔᤥ ᤁᤧᤘᤠ᤹ᤒᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤜᤢᤰᤘᤠ ᤔᤧᤍᤥᤴᤍᤢᤒᤠ ᤏᤡᤛᤢᤱᤅᤡᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤛ᤺ᤳᤋᤠᤖᤥ॥ 18 ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤀᤡᤛᤪᤠᤀᤡᤗᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤴ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤆᤰᤔᤧᤸᤗ᤹ᤀᤣ ᤐᤥᤱᤅᤠᤱ ᤐᤳᤗ ᤆᤥᤃᤧ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤀᤠᤍᤠᤱᤒᤠ ᤗᤧᤵᤔᤠᤱ ᤐᤳᤗ ᤆᤥᤃᤧ᤹ᤀᤥ॥ 19 ᤀᤠᤱᤃᤠ᤹ ᤀᤠᤛ᤻ᤛᤠ ᤛᤥᤗᤥᤔᤏᤖᤧ ᤀᤠᤍᤠᤱᤒᤠᤖᤧ ᤁᤧᤀᤡᤱᤈᤠᤱᤜᤠ᤹. ᤀᤠᤍᤠᤱᤒᤠᤖᤧ ᤁᤧᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤍᤠᤱᤒᤠᤖᤧ ᤁᤧᤎᤡᤶᤜᤠ᤹ ᤛᤧᤘᤠ ᤆᤥ᤺ᤰᤏᤢ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤕᤶᤒᤠ ᤏᤡᤱᤘᤠ᤹ ᤐᤡᤖᤧ᤹ᤀᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤡᤶᤜᤠ᤹ ᤁᤧᤖᤧᤰ ᤁᤧᤵᤔᤠ ᤛᤢᤰᤋᤢᤖᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤜᤡᤶᤔᤡᤴ ᤆᤥ᤺ᤰᤔᤠ ᤛᤢᤰᤋᤢᤖᤖᤥ. ᤂᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤕᤠᤖᤡᤵ ᤆᤥᤃᤢᤱᤅᤠᤱ ᤘᤠ᤹ᤖᤥ॥” 20 ᤂᤧᤒᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤍᤠᤀᤢᤍᤖᤧ ᤔᤧᤳᤋᤢᤛᤡ. “ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥” ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤴᤇᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥᤛᤢ॥ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤴ ᤏᤢ ᤜᤠᤱᤅᤡᤸᤗᤧ ᤁᤢᤍᤃᤡ ᤛᤠᤒᤴ ᤜᤵᤐᤧᤳ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤈᤥᤃᤧᤖᤥ॥ ᤛᤥᤗᤥᤔᤏᤧᤴ ᤜᤠᤱᤆᤥ᤺ᤰᤔᤠ ᤔᤧᤍᤧᤴ 21 ᤁᤢᤍᤠ᤺ᤴᤍᤡᤰᤔᤠ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᥇.᥆᥆᥆ ᤛᤧᤃᤶᤒᤠ ᤐᤡᤳ. ᥇.᥆᥆᥆ ᤌᤢ᤺ᤶᤒᤠ. ᥇.᥆᥆᥆ ᤁᤢᤶᤒᤠᤒᤠ ᤔᤧᤸᤗᤢᤰ. ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤏᤢ ᤛᤥᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤖᤧ ᤗᤠᤃᤡ ᤘᤣ᤹ ᤕᤖᤡᤰ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ॥ 22 ᤁᤶᤓᤗ᤹ᤖᤡᤰ ᤛᤠ᤹ᤖᤡᤰ ᤏᤡᤱᤘᤠ᤹ ᤛ᤺ᤵᤔᤠᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤖᤧ ᤂᤧᤸᤗᤧ ᤕᤠ᤺ᤴᤍᤡᤰ ᤁᤢᤈᤠ ᤔᤧᤈ ᤔᤧᤎᤢᤅᤢ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤜᤠᤱᤆᤥ᤺ᤰᤔᤠ ᤔᤧᤍᤧᤴᤍᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤢᤏᤧ᤹ ᤜᤠᤱ ᤔᤠᤱᤌᤥ᤺ᤰᤏᤠ ᤔᤧᤈᤥᤃᤢ ᤜᤧᤰᤁᤩᤠᤱ ᤛᤠᤍᤥᤁᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤠᤱᤌᤥ᤺ᤰᤏᤠ ᤔᤧᤈᤥᤃᤢ॥ 23 ᤁᤶᤓᤗ᤹ᤖᤡᤰ ᤛᤥᤗᤥᤔᤏᤧᤴ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤗᤧᤰᤘᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤜᤠᤱ ᤐᤥ᤺ᤰᤂᤧᤀᤠᤱ ᤕᤢᤱᤛᤡᤱ॥ ᤂᤢᤏᤧ᤹ ᤏᤢᤖᤧ ᤋᤠᤛᤧ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ॥ 24 ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤌᤰᤗᤡᤜᤠᤱᤜᤠ᤹ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤛ᤻ᤛᤠᤜᤠ᤹ᤖᤧᤀᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤗᤧᤵᤔᤠᤱ ᤂᤢᤴᤇᤡ᤹ ᤜᤠᤱᤛᤧᤘᤠ ᤆᤥ᤺ᤰᤔᤠ ᤐᤠ᤺ᤴᤏᤡᤴ ᤔᤠᤱᤜᤢᤵ ᤔᤧᤈᤥᤃᤢ॥ 25 ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤛᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤛᤥᤗᤥᤔᤏᤧᤴ ᤛᤠ᤹ᤖᤡᤰ ᤌᤥᤎᤥᤰᤐᤠ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤀᤠᤳᤋᤡᤴ ᤜᤠᤱᤅᤡᤴᤏᤠᤱ ᤔᤧᤶᤒᤡᤀᤣ ᤁᤧᤘᤠ᤹ᤒᤠ ᤜᤠᤱᤘᤠ ᤔᤠᤱᤘᤠᤴ ᤂᤢᤏᤧ᤹ ᤛᤥᤗᤥᤔᤏᤧᤴ ᤐᤡᤖᤢᤖᤥ॥ ᤍᤠᤀᤢᤍᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤁᤢᤏᤢᤵᤔᤠ ᤐᤠ᤺ᤴᤜᤠ᤹ 26 ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤧᤸᤗᤧ ᤁᤠᤰ ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥᤃᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤗᤡᤒᤥᤱ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 27 ᤜᤣᤒᤪᤥᤏᤀᤥ ᤋᤱᤒᤣ ᤏᤢᤛᤡ ᤏᤢ ᤕᤖᤢᤛᤗᤧ᤺ᤶᤔᤥ ᤛᤢᤶᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤌᤠᤖᤡᤰ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢ॥ 28 ᤂᤢᤏᤧ᤹ ᤕᤖᤡᤰ ᤋᤱᤒᤣ ᤌᤠᤖᤡᤰ ᤜᤡᤅᤧ ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤱᤛᤠᤁᤢᤴᤎᤣ ᤏᤢ ᤔᤡᤱᤛᤥ ᤌᤠ᤺ᤱᤛᤥᤖᤧ ᤁᤠᤵᤋᤢᤀᤠᤱ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤔᤠᤛᤡᤱ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤜᤠᤱ ᤐᤥ᤺ᤰᤂᤧ॥ 29 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛᤠᤵᤔᤢ᤺ᤴᤎᤢᤶᤔᤡᤴ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤠᤔᤢᤀᤧᤗᤖᤧ ᤁᤢᤛᤠᤵᤐᤴᤏᤥ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤖᤧ ᤁᤢᤛᤠᤵᤐᤴᤏᤥ ᤏᤢ ᤂᤠᤃᤧᤀᤡᤰᤐᤠ ᤃᤠᤍᤖᤧ ᤁᤢᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 30 ᤂᤧᤴ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ᤀᤥ ᤂᤢᤏᤧ᤹ ᤀᤠᤰᤂᤣᤗ᤹ᤖᤡᤰ ᤜᤠᤱᤕᤢᤰ ᤆᤥᤃᤢ. ᤂᤢᤏᤧ᤹ ᤀᤠᤰᤂᤩᤠᤖᤡᤰ ᤔᤢᤰᤛᤠᤶᤛᤠᤒᤠ ᤆᤥᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤜᤠᤱᤈᤢᤶᤜᤠ᤹ᤏᤢ ᤌᤧᤔᤠ ᤌᤧᤔᤠ ᤜᤡᤴᤍᤥᤰᤜᤠ᤹ ᤐᤥ᤺ᤰᤂᤧᤀᤠᤱ ᤘᤕᤧ. ᤂᤧᤱᤜᤠ᤹ ᤁᤧᤖᤧᤰ ᤐᤥᤎᤰ ᤐᤥ᤺ᤰᤂᤧᤀᤠᤱ ᤐᤳᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.