᥇ ᤛᤠᤵᤔᤢ᤺ᤴᤎᤢᤶ 28 - LIFOTNTᤍᤠᤀᤢᤍᤖᤧ ᤔᤠᤱᤜᤡᤶ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡ 1 ᤍᤠᤀᤢᤍᤖᤧ ᤕᤖᤢᤗᤧ᤺ᤶᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹. ᤌᤠ᤺ᤰᤜᤠ᤹ᤀᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤁᤧᤓᤠ᤹ᤒᤠ ᤁᤢᤗᤢᤵ ᤁᤢᤗᤢᤵᤐᤥᤒᤠ ᤌᤰᤔᤥᤒᤠᤜᤠ᤹. ᤜᤧᤴᤇᤡᤱ ᤏᤢ ᤁᤡᤵ ᤌᤡᤰᤁᤥᤒᤠ ᤌᤰᤔᤥᤒᤠᤜᤠ᤹. ᤜᤧᤰᤁᤩᤠᤱ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧᤴ ᤁᤧᤖᤧᤰ ᤕᤠᤱᤛᤠᤁᤢᤴᤎᤣ ᤏᤢ ᤐᤡᤳᤜᤠ᤹ ᤀᤥᤔᤧᤵᤔᤠ ᤗᤰᤐᤧᤴ ᤛᤢᤜᤠᤱᤕᤢᤰᤐᤠᤜᤠ᤹. ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤁᤧᤍᤶᤔᤠ ᤛᤢᤶᤒᤥᤎᤠᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤁᤧᤍᤶᤒᤠ ᤁᤧᤍᤶᤒᤠ ᤌᤰᤗᤡᤜᤠᤱᤜᤠ᤹ ᤛᤢᤵᤛᤢᤛᤡ॥ 2 ᤂᤧᤒᤩᤠᤱ ᤍᤠᤀᤢᤍ ᤜᤠᤱᤅᤡᤴ ᤌ᤺ᤵᤐᤧᤳ ᤕᤧᤶᤛᤡᤱᤅᤠᤱ ᤔᤧᤳᤋᤢᤛᤡ. “ᤀᤠᤶᤓᤢ᤹ ᤀᤠᤴᤛᤠ᤹ ᤏᤢ ᤀᤠᤔᤏᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤗᤠᤃᤡ ᤗᤳᤇᤠ ᤏᤠ᤺ᤶᤛᤡᤱᤔᤠᤍᤧᤴ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤱ ᤋᤥ᤹ᤓᤣ᤺ᤳᤋᤧᤸᤗᤧ ᤗᤠᤃᤡ ᤗᤳᤇᤠ ᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵᤐᤠᤱ ᤆᤥᤃᤢᤱ॥ 3 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. ‘ᤀᤠᤱᤃᤠ᤹ ᤀᤠᤔᤡᤱᤗᤧ ᤗᤠᤃᤡ ᤂᤧᤏᤧ᤹ ᤜᤡᤶ ᤁᤧᤴᤈᤥᤃᤢᤴ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤌᤱ ᤁᤧᤈᤥ᤺ᤰᤐᤠ ᤔᤏᤠᤏᤧ. ᤜᤧᤰᤁᤩᤠᤱ ᤂᤧᤏᤧ᤹ ᤔᤠᤰᤂᤡᤛᤡᤘᤠ ᤁᤧᤛᤧᤛᤢᤀᤠᤱ ᤘᤠ᤹॥’ 4 “ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤅᤥᤗᤠᤶ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤛᤣᤃᤠᤱ॥ ᤂᤢᤏᤧ᤹ ᤗᤠᤶᤗᤥᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤢᤍᤠᤴ ᤛᤣᤃᤢ. ᤜᤧᤰᤁᤩᤠᤱ ᤕᤜᤢᤍᤠ᤺ᤸᤗᤧ ᤁᤢᤜᤡᤶᤛᤕᤱᤗᤠᤶ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤛᤱᤅᤡᤴ ᤛᤣᤃᤢ॥ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤛ᤻ᤛᤠᤜᤠ᤹ᤀᤥᤗᤠᤶ ᤂᤢᤏᤧ᤹ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤀᤠᤱᤃᤠ᤹ᤀᤣ ᤜᤠᤱᤆᤥ᤺ᤰᤔᤠ ᤂᤢᤏᤧ᤹ ᤏᤢᤒᤠ ᤀᤡ᤺ᤳᤋᤢ॥ 5 ᤀᤡᤛᤪᤠᤀᤡᤗᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤡᤰ ᤕᤧᤶᤒᤡᤳᤇᤠᤛᤠᤜᤠ᤹ ᤐᤡᤖᤠᤱᤛᤠᤱ ᤀᤡᤛᤪᤠᤀᤡᤗ ᤛᤶᤎᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤈᤢᤶᤔᤥᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤥᤗᤥᤔᤏᤧᤴ ᤛᤣᤃᤢᤀᤠᤱ ᤘᤠ᤹॥ 6 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. ‘ᤂᤧᤏᤧ᤹ ᤁᤧᤛ᤻ᤛᤠ ᤛᤥᤗᤥᤔᤏᤖᤧᤀᤣ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤏᤢ ᤀᤠᤗᤰᤂᤢᤶᤜᤠ᤹ ᤆᤥᤃᤢ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤴ ᤀᤠᤛ᤻ᤛᤠ ᤐᤥᤱᤔᤠᤖᤧ ᤗᤠᤃᤡ ᤛᤣᤃᤢᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤶᤒᤠ ᤐᤥᤱᤅᤠ॥ 7 ᤀᤠᤸᤗᤥ ᤂᤢᤏᤧ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤌᤎᤵ ᤔᤧᤸᤗ᤹ᤀᤣ ᤀᤡ᤺ᤳᤋᤢ ᤏᤠ᤺ᤳᤋᤢᤏᤧᤓᤃᤪ. ᤀᤠᤱᤃᤠ᤹ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤱ᤹॥’ 8 “ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤴ ᤏᤢᤒᤠ ᤗᤠᤈᤣᤴ ᤆᤰᤔᤧᤸᤗ᤹ᤀᤣ ᤕᤢᤰᤔᤠ ᤛᤢᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ ᤐᤠᤏᤢᤍᤡᤱ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ ᤁᤢᤀᤡᤛᤡᤰ ᤂᤡᤏᤡ᤹ ᤀᤣᤃᤠᤱ ᤀᤠᤓᤧᤸᤗᤧᤛᤠᤱ ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤐᤡᤔᤠ ᤁᤧᤛᤢᤰᤋᤢᤶᤛᤡᤶᤗ ᤑᤠ᤹ᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤏᤢ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤖ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰ ᤀᤡᤱᤈᤠᤱ ᤐᤡᤏᤡᤱ᤹॥” 9 “ᤜᤧᤰᤁᤩᤠᤱ ᤂᤧᤏᤧ᤹ ᤛᤥᤗᤥᤔᤏ ᤀᤠᤱᤃᤠ᤹ ᤀᤠᤛ᤻ᤛᤠ᤺ᤸᤗᤧᤃ. ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤔᤠᤱᤅᤡᤴ ᤀᤠᤵᤑᤣᤰ ᤁᤧᤏᤡᤱᤘᤠ᤹ᤑᤢᤔᤠᤱ ᤀᤡ᤺ᤳᤋᤧ᤹. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤁᤧᤏᤡᤱᤘᤠ᤹ ᤋᤠᤔᤠ ᤏᤡᤱᤘᤠ᤹ᤖᤧ ᤂᤢᤏᤧ᤹ ᤁᤢᤔᤠᤱᤛᤣᤘᤠ ᤆᤥᤃᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤜᤠ᤹ ᤛᤠ᤹ᤖᤢ᤹ ᤜᤧᤰᤁᤩᤠᤱ ᤔᤏᤠᤖᤧ ᤁᤧᤖᤧᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤒᤠ ᤏᤢ ᤔᤧᤀᤡ᤺ᤳᤋᤢᤒᤠ ᤆᤀᤡ᤺ᤳ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤂᤥᤛᤢ᤹॥ ᤂᤧᤏᤧ᤹ ᤂᤢᤏᤧ᤹ ᤁᤧᤃᤥᤳᤋᤢᤏᤧᤓᤃᤪ ᤂᤢᤏᤧ᤹ ᤁᤧᤄᤥᤛᤢ᤹. ᤁᤖ ᤂᤢᤏᤧ᤹ ᤁᤧᤗᤧᤖᤢᤏᤧᤓᤃᤪ ᤂᤢᤏᤧ᤹ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤏᤧ᤹ ᤁᤧᤏᤠ᤹॥ 10 ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ ᤜᤧᤳᤇᤡᤱᤅᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤣᤛᤣᤍᤧᤴᤏᤡᤸᤗᤧ ᤗᤠᤃᤡ ᤗᤳᤇᤠ ᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ᤀᤣ ᤁᤧᤛᤣᤃᤧᤀᤠᤱ ᤘᤠ᤹॥ ᤌᤎᤵ ᤔᤧᤸᤗ᤹ᤀᤣ ᤘᤕᤧ᤹. ᤜᤧᤰᤁᤩᤠᤱ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤧ᤹॥” 11 ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤔᤠᤱᤜᤡᤶᤔᤥᤒᤠ ᤀᤠ᤺ᤶᤓᤥ᤹ ᤏᤢ ᤂᤧᤵᤔᤥᤒᤠ ᤜᤡᤶᤜᤠ᤹. ᤌᤠ᤺ᤱᤜᤠ᤹. ᤌᤠ᤺ᤱᤛᤔᤠ ᤕᤠᤰᤑᤠᤱᤜᤠ᤹. ᤛᤡᤃᤠᤱᤒᤠ ᤕᤠᤰᤑᤠᤱᤜᤠ᤹ ᤜᤧᤰᤁᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤍᤧᤴᤏᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤐᤡᤖᤢ॥ 12 ᤕᤠᤶᤛᤠᤶᤔᤡᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤕᤢᤰᤂᤢᤒᤠ ᤁᤴ ᤁᤧᤖᤧᤰ ᤆᤀᤡ᤺ᤳ ᤐᤠ᤺ᤴᤜᤠ᤹ ᤜᤧᤰᤁᤣ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤰᤂᤢᤶᤜᤠ᤹ ᤏᤢ ᤁᤧᤖᤧᤰ ᤐᤡᤛᤠᤱᤒᤠ ᤕᤠᤰᤑᤠᤱᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤌᤠ᤺ᤱᤜᤠ᤹ ᤜᤧᤰᤁᤩᤠᤱ ᤔᤧᤍᤥᤴᤍᤢᤒᤠ ᤜᤢᤰᤘᤠ ᤕᤢᤱᤍᤧᤴ ᤌᤠ᤺ᤱᤜᤠ᤹ᤖᤧ ᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤛᤥᤗᤥᤔᤏᤧᤴ ᤐᤡᤖᤢ॥ 13 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤛᤢᤶᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠᤀᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤕᤠ᤺ᤶᤒᤰ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠᤱᤔᤏᤠᤒᤠ ᤁᤧᤖᤧᤰ ᤂᤵᤐᤩᤠᤜᤠ᤹ᤖᤧ ᤗᤠᤃᤡ ᤀᤡᤱᤈᤠᤱᤜᤠ᤹ ᤂᤢᤏᤧ᤹ ᤐᤡᤖᤢ॥ 14 ᤘᤣ᤹ ᤘᤣ᤹ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤕᤠᤱᤔᤏᤠᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤂᤵᤐᤩᤠ ᤛᤠᤔᤠᤜᤠ᤹ᤖᤧ ᤗᤠᤃᤡ ᤛᤠᤶᤔᤩᤠᤱ ᤌᤠᤱᤔᤠᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤕᤢᤵᤐᤠ ᤂᤵᤐᤩᤠ ᤛᤠᤔᤠᤜᤠ᤹ᤖᤧ ᤗᤠᤃᤡ ᤕᤢᤵᤐᤠ ᤌᤠᤱᤔᤠᤜᤠ᤹ ᤂᤢᤏᤧ᤹ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢ॥ 15 ᤂᤢᤏᤧ᤹ ᤛᤠᤶᤔᤩᤠᤱ ᤇᤰᤁᤱᤜᤠ᤹ ᤏᤢ ᤂᤧᤸᤗᤧ ᤁᤢᤜᤠ᤺ᤶᤔᤠᤜᤠ᤹ᤖᤧ ᤗᤠᤃᤡ ᤇᤰᤁᤱᤜᤠ᤹ ᤜᤧᤰᤁᤩᤠᤱ ᤕᤢᤵᤐᤠ ᤛᤣᤔᤡᤕᤢᤱᤍᤧᤴ ᤌᤰᤔᤠ ᤕᤠᤱᤔᤠᤖᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤁᤢᤀᤡᤛᤡᤰ ᤛᤣᤔᤡᤜᤠ᤹ ᤏᤢ ᤛᤣᤔᤡᤕᤢᤱᤍᤧᤴᤜᤠ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤕᤠᤖᤡᤰ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢ॥ 16 ᤛᤡᤍᤢᤱᤈᤓᤠᤀᤥᤒᤠ ᤂᤖᤧ᤺ᤱ ᤌᤰᤔᤣ ᤆᤵᤋᤧᤴᤗᤧ ᤗᤠᤃᤡ ᤛᤠᤶᤔᤩᤠᤱ. ᤜᤧᤰᤁᤩᤠᤱ ᤕᤢᤵᤐᤠ ᤆᤵᤋᤧᤴᤜᤠ᤹ᤖᤧ ᤗᤠᤃᤡ ᤕᤢᤵᤐᤠ ᤂᤢᤏᤧ᤹ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢ. 17 ᤂᤢᤏᤧ᤹ ᤛᤢᤶᤈᤢᤗᤡᤜᤠ᤹. ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹ ᤏᤢ ᤑᤱᤏᤠᤜᤠ᤹ ᤜᤧᤰᤁᤩᤠᤱ ᤗᤰᤆᤢᤜᤠ᤹ᤖᤧ ᤗᤠᤃᤡ ᤛᤠᤶᤔᤩᤠᤱ ᤛᤠᤔᤠ ᤌᤵᤔᤣ ᤛᤠᤶᤔᤩᤠᤱ. ᤕᤢᤵᤐᤠ ᤛᤠᤔᤠ ᤌᤵᤔᤣ ᤕᤢᤵᤐᤠ ᤌᤠᤱᤔᤠ ᤂᤶᤓᤩᤠᤱ ᤁᤧᤖᤧᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤛᤠᤔᤠᤜᤠ᤹ᤖᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤛᤠᤶᤔᤩᤠᤱ ᤕᤢᤵᤐᤠ ᤂᤢᤏᤧ᤹ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢ॥ 18 ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤅᤡᤸᤗᤧ ᤗᤠᤃᤡᤀᤠᤱ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱ ᤌᤠᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢ॥ ᤀᤴᤗᤠᤎᤠ᤺ᤸᤗᤧ ᤗᤠᤃᤡ. ᤀᤡᤃᤪ ᤁᤢᤗᤠᤵᤜᤠ᤹ ᤜᤵᤑᤧ ᤁᤧᤓᤧᤒᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤁᤧᤎᤣ᤺ᤰᤐᤠ ᤛᤠᤶᤔᤩᤠᤱ ᤁᤖᤢᤒᤜᤠ᤹ᤖᤧ ᤗᤠᤃᤡᤀᤠᤱ ᤂᤢᤏᤧ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤆᤀᤡ᤺ᤳ ᤐᤠ᤺ᤴᤜᤠ᤹ ᤐᤡᤖᤢ॥ 19 ᤍᤠᤀᤢᤍᤖᤧ ᤔᤧᤳᤋᤢ. “ᤁᤴᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤢᤜᤢᤰᤁᤡᤸᤗᤧ ᤛᤠᤵᤋᤢᤒᤠ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤗᤥ. ᤜᤧᤰᤁᤩᤠᤱ ᤁᤸᤗᤧ ᤗᤠᤃᤡ ᤁᤧᤖᤧᤰ ᤆᤢᤈᤢᤰᤛᤠ ᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤐᤡᤖᤠᤱᤒᤠᤖᤥ॥” 20 ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤀᤰᤂᤣᤀᤠᤱ ᤔᤧᤳᤋᤢ. “ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹ ᤜᤧᤰᤁᤩᤠᤱ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤧ᤹॥ ᤔᤧᤃᤡᤛᤧᤴᤏᤧ᤹ ᤜᤧᤰᤁᤩᤠᤱ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ. ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤁᤧᤖᤧᤰ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠ᤺ᤰᤒᤰᤜᤠ᤹ ᤂᤧᤏᤧ᤹ ᤔᤧᤴᤈᤥᤰ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤁᤧᤴᤏᤠ᤹ᤏᤧᤴ ᤜᤧᤰᤁᤩᤠᤱ ᤗᤠᤵᤐᤠᤱ ᤁᤧᤶᤓᤢᤏᤧᤴ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤁᤧᤖᤧᤰ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤒᤠ ᤔᤏᤠᤛᤢᤶᤜᤠ᤹ ᤕᤠᤖᤡᤵ ᤔᤧᤘᤠ᤹॥ ᤂᤧᤏᤧ᤹ ᤁᤧᤖᤧᤰ ᤁᤧᤕᤠ᤺ᤶᤒᤰᤁᤥ ᤁᤧᤏᤡᤱᤘᤠ᤹ ᤁᤢᤀᤡᤛᤡᤰ ᤀᤠᤳᤋᤡᤴ ᤕᤠ᤺ᤶᤒᤰᤁᤡᤴᤇᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤆᤥᤒᤣᤃᤢᤜᤠ᤹ᤗᤠᤶ ᤂᤧᤏᤧ᤹ ᤁᤢᤓᤠ᤹ ᤁᤧᤄᤥᤛᤢ᤹॥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤔᤢᤖᤠ ᤁᤧᤔᤧᤳᤋᤢᤛᤡᤒᤠᤀᤥ ᤕᤠ᤺ᤶᤒᤰ ᤔᤧᤃᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.