᥇ ᤛᤠᤵᤔᤢ᤺ᤴᤎᤢᤶ 23 - LIFOTNTᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ 1 ᤀᤠᤸᤗ ᤍᤠᤀᤢᤍᤧᤴ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤕᤖᤡᤰ ᤋᤱᤒᤣ ᤕᤥᤖᤧᤀᤠᤱ ᤘᤕᤧ. ᤂᤧᤒᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤆᤥᤃᤢ॥ 2 ᤍᤠᤀᤢᤍᤖᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤗᤠᤶᤗᤥᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤑᤢᤰᤂᤢᤛᤡ॥ 3 ᤗᤧᤒᤡᤜᤠ᤹ᤀᤥ ᤋᤱᤒᤣ ᤛᤢᤶᤒᤥᤱ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤕᤥᤒᤠᤜᤠ᤹ ᤔᤧᤏᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤔᤏᤠᤜᤠ᤹ ᤁᤧᤖᤧᤰᤗᤧ ᥉᥎.᥆᥆᥆ ᤔᤧᤘᤕᤧ॥ 4 ᤂᤧᤱᤜᤠ᤹ᤀᤥᤒᤠ ᥈᥊.᥆᥆᥆ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠ ᥌.᥆᥆᥆ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤂᤠᤛᤧᤴᤗᤥ᤺ᤶᤒᤠᤜᤠ᤹. 5 ᥊.᥆᥆᥆ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹. ᤜᤧᤰᤁᤩᤠᤱ ᥊.᥆᥆᥆ ᤔᤏᤠᤖᤧ ᤔᤢᤰᤗᤠᤜᤠ᤹ ᤔᤢᤱᤔᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤔᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤔᤢᤖᤠ ᤔᤧᤳᤋᤢᤛᤡ॥ 6 ᤍᤠᤀᤢᤍᤖᤧ ᤗᤧᤒᤡᤜᤠ᤹ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤃᤣᤷᤛᤥᤏ. ᤁᤜᤠᤋ ᤏᤢ ᤔᤖᤠᤖᤡᤴ ᤁᤢᤗᤢᤵ ᤛᤢᤶᤛᤡᤀᤥ ᤛᤧᤴᤍᤢᤛᤡᤖᤥ॥ ᤃᤣᤷᤛᤥᤏᤡᤜᤠ᤹ 7 ᤃᤣᤷᤛᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹— ᤗᤠᤍᤠᤏ ᤏᤢ ᤛᤡᤔᤡ॥ 8 ᤗᤠᤍᤠᤏᤖᤧ ᤁᤢᤛ᤻ᤛᤠᤜᤠ᤹— ᤁᤢᤛ᤻ᤛᤠ ᤋᤢᤶᤒᤠ ᤕᤜᤡᤀᤣᤗ. ᤈᤣᤋᤠᤔ ᤏᤢ ᤕᤥᤀᤣᤗ ᤁᤧᤖᤧᤰᤗᤧ ᤛᤢᤶᤛᤡ॥ 9 ᤛᤡᤔᤡᤖᤧ ᤁᤢᤛ᤻ᤛᤠᤜᤠ᤹— ᤛᤗᤥᤔᤥᤋ. ᤜᤈᤡᤀᤣᤗ ᤏᤢ ᤜᤠᤖᤠᤏ ᤁᤧᤖᤧᤰᤗᤧ ᤛᤢᤶᤛᤡ॥ ᤗᤠᤍᤠᤏᤖᤧ ᤁᤢᤜᤡᤶᤛᤕᤱᤅᤥᤒᤠ ᤗᤠᤶᤗᤥᤒᤠᤜᤠ᤹ ᤀᤠᤶᤓᤠ ᤁᤴᤜᤠ᤹ᤀᤣ ᤔᤧᤘᤕᤧ॥ 10 ᤜᤧᤰᤁᤩᤠᤱ ᤛᤡᤔᤡᤖᤧ ᤁᤢᤛ᤻ᤛᤠᤜᤠ᤹— ᤕᤜᤋ. ᤈᤡᤈᤠ. ᤕᤣᤀᤢᤛ ᤏᤢ ᤒᤖᤡᤀᤠ॥ ᤛᤡᤔᤡᤖᤧ ᤁᤢᤛ᤻ᤛᤠᤜᤠ᤹ ᤁᤧᤖᤧᤰᤗᤧ ᤗᤡᤛᤡ ᤜᤠᤒᤠ ᤁᤥᤜᤠ᤹ᤀᤣ ᤔᤧᤘᤕᤧ॥ 11 ᤕᤜᤋᤧᤴ ᤁᤢᤛ᤻ᤛᤠ ᤋᤢᤶᤒᤠ ᤘᤕᤧ. ᤏᤡᤛᤡᤃᤣᤰᤐᤠ ᤈᤡᤈᤠ. ᤁᤖ ᤕᤣᤀᤢᤛ ᤏᤢ ᤒᤖᤡᤀᤠᤖᤧ ᤛᤢ᤺ᤸᤗᤡᤰᤗᤰ ᤂᤢᤴᤇᤡ᤹ ᤛᤠᤀᤣᤜᤠ᤹ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤗᤳᤇᤠ ᤜᤡᤶᤛᤕᤱᤅᤥ ᤔᤧᤏᤡᤖᤢᤛᤡᤖᤥ॥ ᤁᤜᤠᤋᤡᤜᤠ᤹ 12 ᤁᤜᤠᤋᤖᤧ ᤁᤢᤛ᤻ᤛᤠᤜᤠ᤹— ᤀᤔᤪᤠᤔ. ᤕᤡᤛᤜᤠᤖ. ᤜᤣᤒᤪᤥᤏ ᤏᤢ ᤀᤢᤈ᤻ᤈᤡᤀᤣᤗ ᤁᤧᤖᤧᤰᤗᤧ ᤗᤡᤛᤡ॥ 13 ᤀᤔᤪᤠᤔᤖᤧ ᤁᤢᤛ᤻ᤛᤠᤜᤠ᤹ ᤜᤠᤖᤢᤏ ᤏᤢ ᤔᤥᤛᤠ॥ ᤜᤠᤖᤢᤏᤧᤴ ᤗᤠ᤺ᤳᤗᤠ᤺ᤳ ᤔᤧᤛᤧᤴᤍᤢᤀᤠᤱ ᤘᤕᤧ॥ ᤂᤧᤴ ᤏᤢ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣ ᤐᤠ᤺ᤴᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤏᤢ ᤂᤢᤏᤧ᤹ ᤁᤢᤍᤃᤡ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤥ ᤀᤠᤓᤧᤸᤗᤧᤛᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠᤛᤡᤖᤧ ᤗᤠᤃᤡ ᤔᤧᤘᤕᤧ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠ ᤔᤥᤛᤠ᤺ᤸᤗᤧ ᤁᤢᤛ᤻ᤛᤠᤜᤠ᤹ ᤗᤧᤒᤡᤖᤧ ᤁᤢᤎᤠ᤺ᤰᤁᤥᤒᤠ ᤔᤧᤗᤣ᤺ᤳᤋᤢᤛᤡ॥ 15 ᤔᤥᤛᤠ᤺ᤸᤗᤧ ᤁᤢᤛ᤻ᤛᤠᤜᤠ᤹— ᤃᤣᤷᤛᤥᤔ ᤏᤢ ᤀᤣᤗᤡᤀᤣᤈᤖ॥ 16 ᤃᤣᤷᤛᤥᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹— ᤛᤢᤒᤠᤀᤣᤗᤧᤴ ᤋᤢᤶᤒᤠ ᤘᤕᤧ॥ 17 ᤀᤣᤗᤡᤀᤣᤈᤖᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹— ᤖᤜᤒᤩᤠᤜᤴ ᤋᤢᤶᤒᤠ ᤛᤠ ᤘᤕᤧ॥ ᤀᤣᤗᤡᤀᤣᤈᤖᤖᤧ ᤘᤣ᤹ ᤁᤢᤛ᤻ᤛᤠᤜᤠ᤹ ᤔᤧᤜᤥ᤺ᤵᤋᤧ. ᤁᤖ ᤖᤜᤒᤩᤠᤜᤖᤧ ᤁᤢᤛ᤻ᤛᤠᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤘᤕᤧ॥ 18 ᤕᤡᤛᤜᤠᤖᤖᤧ ᤁᤢᤛ᤻ᤛᤠᤜᤠ᤹— ᤛᤗᤥᤔᤡᤋᤧᤴ ᤁᤢᤛ᤻ᤛᤠ ᤋᤢᤶᤒᤠ ᤘᤕᤧ॥ 19 ᤜᤣᤒᤪᤥᤏᤖᤧ ᤁᤢᤛ᤻ᤛᤠᤜᤠ᤹— ᤕᤖᤡᤕᤠᤜᤴ ᤁᤢᤛ᤻ᤛᤠ ᤋᤢᤶᤒᤠ ᤘᤕᤧ. ᤏᤡᤛᤡᤃᤣᤰᤐᤠᤴ ᤀᤔᤷᤕᤠᤜ. ᤛᤢᤶᤛᤡᤃᤣᤰᤐᤠᤴ ᤕᤜᤠᤛᤣᤗ ᤏᤢ ᤗᤡᤛᤡᤃᤣᤰᤐᤠᤴ ᤕᤁᤔᤠᤔ ᤘᤕᤧ॥ 20 ᤀᤢᤈ᤻ᤈᤡᤀᤣᤗᤖᤧ ᤁᤢᤛ᤻ᤛᤠᤜᤠ᤹— ᤔᤡᤁᤠᤴ ᤁᤢᤛ᤻ᤛᤠ ᤋᤢᤶᤒᤠ ᤏᤢ ᤏᤡᤛᤡᤃᤣᤰᤐᤠᤴ ᤕᤡᤛᤡᤕᤠᤜ ᤘᤕᤧᤖᤥ॥ ᤔᤖᤠᤖᤡᤜᤠ᤹ 21 ᤔᤖᤠᤖᤡᤖᤧ ᤁᤢᤛ᤻ᤛᤠᤜᤠ᤹— ᤔᤜᤗᤡ ᤏᤢ ᤔᤢᤛᤡ॥ ᤔᤜᤗᤡᤖᤧ ᤁᤢᤛ᤻ᤛᤠᤜᤠ᤹— ᤀᤣᤗᤠᤈᤠᤖᤧᤴ ᤏᤢ ᤁᤡᤛ॥ 22 ᤀᤣᤗᤠᤈᤠᤖᤧᤴ ᤔᤠᤛᤡᤱᤅᤡᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠᤖᤰ ᤔᤧᤘᤕᤧ. ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤜᤥ᤺ᤵᤋᤧ॥ ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹. ᤀᤡᤃᤪ ᤁᤡᤛᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤧᤱᤜᤠ᤹ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤛᤡ॥ 23 ᤔᤢᤛᤡᤖᤧ ᤁᤢᤛ᤻ᤛᤠᤜᤠ᤹— ᤔᤜᤗᤡ. ᤀᤣᤍᤣᤖ ᤏᤢ ᤕᤖᤡᤔᤥᤋ ᤁᤧᤖᤧᤰᤗᤧ ᤛᤢᤶᤛᤡ ᤔᤧᤘᤕᤧᤖᤥ॥ 24 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤔᤡᤱᤅᤥ ᤜᤡᤶᤛᤕᤱ ᤜᤡᤶᤛᤕᤱ ᤔᤧᤛᤧᤴᤍᤢᤛᤡᤒᤠ ᤁᤢᤀᤡᤛᤡᤰ ᤗᤧᤒᤡᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱᤅᤥᤒᤠ ᤗᤠᤶᤗᤥᤒᤠᤜᤠ᤹ᤀᤥ ᤋᤱᤒᤣ ᤏᤡᤒᤥᤱ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤃᤧᤵᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤂᤧᤱᤜᤠ᤹ ᤀᤰᤋᤱᤒᤠᤀᤣ ᤔᤧᤘᤕᤧ॥ 25 ᤌᤣᤀᤠᤱᤓᤧᤸᤗᤧ ᤍᤠᤀᤢᤍᤖᤧ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤳᤋᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤛᤍᤠᤍᤡᤱ ᤘᤠ᤹॥ 26 ᤁᤸᤗᤧᤆᤥᤃᤢᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤀᤡᤃᤪ ᤂᤧᤵᤔᤥ ᤔᤠᤱᤛᤧᤘᤠ ᤕᤠ᤺ᤶᤒᤰᤗᤧ ᤗᤠᤃᤡ ᤕᤠᤱᤔᤏᤠᤒᤠ ᤂᤵᤐᤩᤠ ᤛᤠᤔᤠᤜᤠ᤹ ᤗᤧᤒᤡᤜᤠ᤹ᤖᤧ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤐᤱᤔᤠ ᤔᤧᤒᤥᤱᤏᤧᤴ॥” 27 ᤍᤠᤀᤢᤍᤖᤧ ᤀᤠᤶᤓᤠ ᤁᤴ ᤕᤠᤱᤛᤡᤒᤠ ᤁᤢᤒᤠ᤺ᤴᤜᤠ᤹ᤗᤠᤶ ᤏᤡᤒᤥᤱ ᤋᤱᤒᤣ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤕᤥᤒᤠ ᤗᤧᤒᤡᤜᤠ᤹ ᤔᤧᤏᤡᤖᤢᤛᤡ॥ 28-29 ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠᤀᤥ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤑᤠ᤹ᤔᤠᤛᤡ ᤁᤧᤒᤥᤱᤒᤠ ᤘᤕᤧ॥ ᤗᤰᤂᤢᤶ ᤏᤢ ᤕᤠᤰᤑᤠᤱᤜᤠ᤹ ᤀᤥᤔᤧᤵᤔᤠ. ᤁᤧᤖᤧᤰ ᤛᤣᤛᤣ ᤐᤠ᤺ᤴᤜᤠ᤹ ᤛᤢᤳᤌᤥ ᤆᤥ᤺ᤰᤔᤠ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥᤒᤠ ᤘᤣ᤹ ᤕᤠ᤺ᤶᤒᤰ ᤆᤥ᤺ᤰᤔᤠ. ᤜᤧᤰᤁᤩᤠᤱ ᤆᤵᤋᤧᤴᤏᤥ ᤏᤧᤔᤏᤠᤒᤠ ᤂᤖᤧ᤺ᤱᤜᤠ᤹ ᤐᤧᤴᤒᤧᤴ ᤋᤱᤔᤠ. ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧ ᤑᤣ᤹ᤍᤢᤶᤔᤡᤴ. ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤛᤣᤛᤣ ᤂᤖᤧ᤺ᤱᤅᤡᤴ. ᤀᤥ᤹ᤔᤏᤠᤒᤠ ᤏᤢ ᤏᤡ᤺ᤱᤃᤣ᤹ᤀᤥ ᤗᤧ᤺ᤱᤔᤏᤠᤒᤠ ᤆᤠᤖ᤺ᤵᤐᤠ ᤜᤧᤰᤁᤩᤠᤱ ᤁᤢᤛᤡ᤺ᤰᤔᤠ ᤏᤢ ᤁᤢᤎᤠᤱᤔᤠ ᤋᤧᤶᤍᤢᤖᤡᤴ ᤕᤠᤖᤡᤵ ᤆᤥ᤺ᤰᤔᤠ. ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤥᤔᤧᤵᤔᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴ ᤘᤕᤧ॥ 30 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤋᤠᤏᤠᤶ ᤌᤰᤔᤠ ᤕᤧᤵᤔᤠᤀᤠᤱ ᤏᤢᤃᤧᤴ ᤐᤡᤔᤠ ᤏᤢ ᤁᤢᤏᤠᤖᤠ ᤑᤥᤔᤠ ᤁᤧᤒᤥᤱᤒᤠ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤕᤢ᤺ᤴᤇᤡᤰ. 31 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠᤖᤡᤰ ᤌᤡᤶ ᤁᤧᤵᤔᤠᤀᤠᤱ ᤆᤰᤔᤧᤸᤗ᤹ᤀᤣ ᤛᤒᤠᤌ. ᤗᤠᤍᤢᤵ ᤏᤢ ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤁᤧᤒᤥᤱᤒᤠ ᤘᤕᤧ॥ 32 ᤁᤶᤓᤗ᤹ᤖᤡᤰ ᤗᤧᤒᤡᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤛᤣᤛᤣᤍᤧᤴᤏᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤠ᤹ᤀᤡ ᤜᤠᤖᤢᤏᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤡᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠᤀᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.