᥇ ᤛᤠᤵᤔᤢ᤺ᤴᤎᤢᤶ 22 - LIFOTNT

¹ ᤂᤧᤒᤩᤠᤱ ᤍᤠᤀᤢᤍᤖᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤕᤢᤰᤏᤠᤍᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤶᤓᤠ ᤁᤵᤔᤥ ᤐᤥᤱ᤹. ᤜᤧᤰᤁᤩᤠᤱ ᤀᤠᤶᤓᤠ ᤁᤵᤔᤥᤀᤣ ᤀᤡᤛᤪᤠᤀᤡᤗᤖᤧ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤐᤥᤱᤗᤥ॥”

ᤔᤠᤱᤜᤡᤶ ᤆᤥ᤺ᤰᤔᤠ ᤕᤠᤖᤡᤵ

² ᤂᤶᤓᤩᤠᤱ ᤍᤠᤀᤢᤍᤖᤧ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤆᤢᤶᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤗᤢᤱᤜᤠ᤹ ᤔᤧᤄᤰᤋᤢᤀᤠᤱ ᤕᤠᤖᤡᤵ ᤔᤧᤈᤥᤃᤢᤖ ᤑᤠ᤹ᤀᤠᤱ ᤕᤠ᤺ᤶᤒᤰᤁᤥ ᤑᤳᤇᤢᤛᤡ॥

³ ᤂᤢᤏᤧ᤹ ᤑᤧᤴᤋᤡᤱ ᤏᤢ ᤗᤠᤶᤎᤣᤳ ᤁᤢᤓᤡ᤺ᤵᤔᤠ ᤁᤠᤷᤘᤠᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤕᤖᤡᤰ ᤑᤧᤴᤈᤣ᤹ ᤐᤡᤖᤢᤛᤡ. ᤜᤧᤰᤁᤩᤠᤱ ᤌᤠᤱᤔᤠ ᤛᤢᤰᤔᤧᤴᤍᤧᤳᤋᤣ ᤕᤠᤖᤡᤰ ᤁᤠᤛᤠᤀᤠᤱ ᤐᤡᤖᤢᤛᤡ॥

⁴ ᤜᤧᤰᤁᤩᤠᤱ ᤛᤠᤶᤔᤠᤱᤛᤡᤱ ᤜᤧᤰᤔᤏᤠᤒᤠ ᤛᤡᤱᤜᤠ᤹ ᤏᤡ᤺ᤵᤔᤧᤴᤍᤧᤳᤋᤣ ᤗᤢᤵᤛᤢ. ᤛᤡᤍᤥᤏ ᤏᤢ ᤋᤢᤖᤥᤛᤒᤠ ᤔᤏᤠᤜᤠ᤹ᤖᤧ ᤍᤠᤀᤢᤍᤖᤧ ᤁᤢᤗᤠᤃᤡ ᤘᤧᤳᤋᤧᤛᤖᤧ ᤛᤠᤶᤔᤠᤱᤛᤡᤱᤜᤠ᤹ ᤔᤧᤕᤢᤖᤢ ᤔᤧᤒᤡᤖᤢ॥

⁵ ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤜᤡᤶᤔᤡᤴ ᤛᤠ᤹ᤖᤡᤰᤁᤣ ᤁᤧᤄᤧᤶᤛᤡᤱᤒᤠ ᤏᤢ ᤁᤠᤰ ᤗᤠᤈᤣ᤹ᤜᤠ᤹ᤀᤥ ᤁᤧᤀᤡᤱᤒᤠ ᤏᤢ ᤁᤢᤔᤡᤱ ᤁᤧᤍᤡ᤺ᤵᤐᤠ ᤐᤥᤱᤔᤠ ᤐᤥᤱ᤹ ᤁᤖ ᤀᤠᤱᤃᤠ᤹ ᤀᤠᤛ᤻ᤛᤠ ᤛᤥᤗᤥᤔᤏᤧᤴ ᤛᤧ᤺ᤵᤔᤠ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ᤀᤣ ᤜᤡᤛᤢᤱ ᤋᤱᤄᤢᤱ᤹॥” ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤂᤢᤏᤧ᤹ ᤁᤢᤛᤡᤔᤠᤏᤢ᤺ᤸᤗᤧ ᤋᤃᤡ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤛᤠᤔᤠᤜᤠ᤹ ᤕᤠᤖᤡᤵ ᤆᤥ᤺ᤰᤔᤠ ᤜᤣ᤺ᤰᤋᤢ॥

⁶ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤳᤇᤠ ᤜᤡᤶ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢ॥

⁷ ᤂᤢᤏᤧ᤹ ᤛᤥᤗᤥᤔᤏᤧᤴ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤗᤧ ᤗᤠᤃᤡ ᤗᤳᤇᤠ ᤜᤡᤶ ᤆᤥ᤺ᤰᤔᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤕᤧ॥

⁸ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤔᤧᤓᤠ᤺ᤰᤋᤠᤱᤅᤡᤴᤏᤠᤱ ᤐᤠ᤺ᤳᤋᤢ. ‘ᤂᤧᤏᤧ᤹ ᤕᤖᤡᤰ ᤔᤠᤰᤂᤡ᤹ᤛᤡᤘᤠ ᤁᤧᤛᤧᤛᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤕᤶᤒᤕᤶᤒᤠ ᤌᤱ ᤁᤧᤈᤥᤃᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤂᤧᤏᤧ᤹ ᤁᤴ ᤜᤡᤶᤔᤡᤴ ᤆᤥ᤺ᤰᤔᤠ ᤁᤧᤱᤄᤥᤛᤢᤴ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤖᤡᤰ ᤔᤠᤰᤂᤡ᤹ ᤁᤧᤛᤧᤛᤢᤀᤠᤱ ᤘᤠ᤹॥

⁹ ᤁᤖ ᤂᤧᤏᤧ᤹ ᤁᤧᤛ᤻ᤛᤠ ᤌᤡᤰ ᤘᤠ᤹. ᤂᤧᤴ ᤛᤏᤠᤖᤢᤱᤒᤠ ᤔᤏᤠ ᤐᤥᤱ᤹॥ ᤀᤠᤱᤃᤠ᤹ ᤁᤧᤖᤧᤰ ᤐᤡᤛᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ᤗᤠᤶ ᤁᤶᤒᤪᤠᤱ ᤔᤧᤳᤋᤢᤱ᤹॥ ᤂᤧᤸᤗᤧ ᤁᤢᤔᤡᤱ ᤛᤥᤗᤥᤔᤏ ᤐᤥᤱ᤹॥ ᤂᤢᤏᤧ᤹ ᤁᤢᤜᤠᤱᤕᤢᤰ ᤕᤧᤶᤔᤥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤛᤏᤠᤖᤢᤱ ᤏᤢ ᤆᤡᤈᤡ ᤕᤧᤶᤕᤧᤶ ᤐᤡᤖᤢᤱ᤹॥

¹⁰ ᤂᤧᤸᤗᤧᤀᤣ ᤀᤠᤱᤃᤠ᤹ ᤀᤠᤔᤡᤱᤅᤥ ᤗᤳᤇᤠ ᤜᤡᤶ ᤆᤥᤃᤢ᤹॥ ᤂᤧᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤐᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤶᤒᤠ ᤐᤥᤱᤅᤠ॥ ᤂᤶᤓᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤀᤥ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥᤒᤠ ᤜᤠᤱᤕᤢᤰᤏᤠᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤱ᤹॥’

¹¹ “ᤀᤠᤸᤗ ᤀᤠᤛ᤻ᤛᤠ ᤛᤥᤗᤥᤔᤏᤀᤣ. ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥ ᤂᤢᤏᤧ᤹ ᤁᤢᤜᤡᤶᤔᤡᤴ ᤂᤧᤏᤧ᤹ᤀᤣ ᤁᤧᤈᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤁᤧᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖ. ᤜᤧᤰᤁᤩᤠᤱ ᤂᤧᤏᤧ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤆᤥᤃᤧ᤹ᤀᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤁᤧᤒᤡ᤹ᤖ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤀᤡᤛᤪᤠᤀᤡᤗᤀᤥ ᤕᤢᤰ ᤁᤧᤒᤡ᤺ᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ॥

¹³ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤏᤢ ᤁᤢᤎᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤁᤧᤗ᤹ᤏᤧᤓᤃᤪ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖᤥ॥ ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹. ᤔᤧᤃᤡᤛᤧᤴᤏᤧ᤹ ᤜᤧᤰᤁᤩᤠᤱ ᤁᤢᤏᤡᤱᤛᤠᤱ ᤁᤧᤒᤢᤰᤐᤠ ᤔᤧᤒᤥ᤺ᤰᤂᤧᤴᤏᤧ᤹॥

¹⁴ “ᤛᤠ᤹ᤖᤡᤰ ᤋᤢᤰᤂᤣ ᤆᤥᤃᤢᤱᤅᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᥇.᥆᥆.᥆᥆᥆ ᤋᤥᤖᤠ ᤛᤠᤶᤔᤩᤠᤱ. ᥇᥆.᥆᥆.᥆᥆᥆ ᤋᤥᤖᤠ ᤕᤢᤵᤐᤠ. ᤌᤠᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤁᤠᤛᤠ ᤏᤢ ᤑᤧᤴᤈᤣ᤹ ᤋᤠᤱᤄᤢᤱᤅᤠᤱ ᤘᤠ᤹॥ ᤛᤡᤱᤜᤠ᤹ ᤏᤢ ᤗᤢᤱᤜᤠ᤹ᤀᤠᤱ ᤗᤢᤵᤛᤢᤱᤅᤠᤱ ᤏᤧᤖᤥ॥ ᤂᤧᤵᤔᤥ ᤂᤧᤏᤧ᤹ ᤘᤣ᤹ ᤕᤥ᤹ᤔᤠ ᤁᤧᤛᤢᤰᤋᤢ᤹॥

¹⁵ ᤂᤧᤴᤏᤢ᤺ᤸᤗᤧ ᤘᤣ᤹ ᤂᤧᤏᤧ᤹ᤏᤢ ᤕᤖᤡᤰ ᤆᤥᤒᤣᤃᤢᤜᤠ᤹. ᤗᤢᤱᤃᤠᤶᤒᤠᤜᤠ᤹. ᤗᤢᤱᤃᤧᤄᤰᤐᤠᤜᤠ᤹. ᤛᤡᤱᤃᤠᤶᤒᤠᤜᤠ᤹.

¹⁶ ᤜᤧᤰᤁᤩᤠᤱ. ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ ᤏᤢ ᤑᤧᤴᤈᤣ᤺ᤸᤗᤧᤴ ᤁᤧᤖᤧᤰ ᤐᤖᤡᤰᤐᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤡ᤺ᤳᤔᤧᤴᤍᤧᤳ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤠ᤺ᤶᤒᤰᤁᤡᤴ ᤜᤣ᤺ᤰᤋᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥”

¹⁷ ᤍᤠᤀᤢᤍᤖᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤑᤠ᤹ᤖᤠᤶᤔᤧ᤹ ᤑᤠ᤹ᤀᤠᤱ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ.

¹⁸ “ᤌᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤜᤥ᤺ᤵᤐᤡ᥅ ᤂᤢᤏᤧ᤹ ᤁᤧᤖᤧᤰ ᤐᤡᤛᤠᤱ ᤂᤡᤏᤡ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤃᤳᤋᤡᤒᤠ ᤜᤥ᤺ᤵᤐᤡ᥅ ᤂᤢᤏᤧ᤹ ᤁᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤕᤢᤰᤁᤥ ᤕᤢᤰᤂᤢᤛᤡᤀᤠᤱ ᤘᤠ᤹॥ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤔᤧᤘᤠ᤹॥

¹⁹ ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰ ᤏᤡᤱᤘᤠ᤹ ᤏᤢ ᤛᤡᤰᤗᤢᤱᤔᤠ᤹ᤖᤧ ᤁᤥ᤺ᤳᤋᤧᤶᤔᤧ᤹॥ ᤂᤢᤏᤧ᤹ ᤁᤢᤛᤣᤛᤣᤍᤧᤴ ᤆᤥ᤺ᤰᤔᤠ ᤜᤣ᤺ᤰᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤂᤵᤐᤩᤠ ᤛᤠᤔᤠᤜᤠ᤹ ᤂᤢᤏᤧ᤹ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤁᤧᤈᤥᤃᤢᤶᤒᤠ ᤔᤠᤱᤜᤡᤶᤔᤥ ᤂᤡᤏᤡ᤹ ᤑᤧᤵᤔᤠ ᤁᤧᤛᤢᤰᤋᤢᤶᤗᤖᤥ॥”