᥇ ᤛᤠᤵᤔᤢ᤺ᤴᤎᤢᤶ 21 - LIFOTNTᤍᤠᤀᤢᤍᤖᤧ ᤌᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤏᤡᤖᤢᤛᤡ ( ᥈ ᤛᤠᤔᤢ ᥈᥊:᥇-᥈᥋ ) 1 ᤔᤠᤑᤧᤴᤛᤠᤶᤔᤡᤴ ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤍᤠᤀᤢᤍᤧᤴ ᤁᤢᤔᤏᤠᤜᤠ᤹ ᤏᤡ᤺ᤵᤔᤠᤛᤡᤖᤧ ᤗᤠᤃᤡ ᤜᤢᤛᤢ॥ 2 ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤕᤥᤀᤠᤒᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤀᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤒᤣᤷᤛᤣᤒᤠᤀᤠᤱ ᤁᤳᤌᤥ ᤍᤠᤏ ᤌᤠᤖᤡᤰᤐᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤏᤠ᤺ᤳᤏᤡ᤺ᤳ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ॥ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤰᤂᤩᤠᤖᤡᤰ ᤔᤧᤘᤠ᤹. ᤀᤠᤱᤃᤠ᤹ ᤀᤠᤔᤧᤳᤋᤧᤶᤔᤧ᤹॥ 3 ᤕᤥᤀᤠᤒᤖᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤁᤡᤵ ᤌᤡᤰ ᤕᤠᤖᤡᤰ ᤑᤥᤛᤢᤛᤡᤖ᥄ ᤌᤣ ᤀᤠᤍᤠᤱᤒᤠ ᤀᤠᤸᤗᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤍᤠᤱᤒᤠ ᤏᤢ ᤜᤠᤱ ᤁᤧᤖᤧᤰ ᤔᤏᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤔᤧᤶᤒᤥᤱᤏᤧᤴᤏᤠᤱᤒᤡ᥅ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤜᤧᤰᤁᤣ ᤆᤥ᤺ᤰᤔᤠ ᤐᤥᤱᤒᤠᤒᤣ᥅ ᤀᤠᤍᤠᤱᤒᤠᤖᤧ ᤀᤡᤛᤪᤠᤀᤡᤗᤀᤥ ᤌᤣᤀᤠᤱ ᤀᤠᤵᤋᤡᤰ ᤁᤧᤍᤠᤖᤢᤒᤠᤒᤣ᥅” 4 ᤁᤖ ᤜᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤕᤥᤀᤠᤒᤖᤧ ᤁᤢᤒᤠ᤺ᤴᤏᤡᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢ॥ ᤕᤥᤀᤠᤒᤧᤴ ᤌᤠᤛᤡᤱᤅᤠᤱ ᤐᤣ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤁᤧᤖᤧᤰ ᤋᤠᤰᤁᤴᤍᤧᤀᤠᤱ ᤕᤖᤢᤛᤗᤧ᤺ᤶᤔᤥ ᤏᤢ᤺ᤰᤂᤧᤍᤩᤧ॥ 5 ᤂᤧᤒᤩᤠᤱ ᤂᤢᤏᤧ᤹ ᤏᤢ᤺ᤰᤂᤧᤍᤩᤧᤀᤠᤱ ᤕᤠᤶᤏᤠ᤺ᤳᤏᤡ᤺ᤳ ᤆᤥᤃᤢᤛᤡᤒᤠᤜᤠ᤹ ᤁᤶᤓᤗ᤹ᤖᤡᤰ ᤍᤠᤀᤢᤍᤧᤴ ᤆᤧᤰᤋᤢ—“ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤕᤠᤱᤔᤠ ᤁᤧᤛᤢᤰᤐᤠ ᤀᤡᤛᤪᤠᤀᤡᤗᤀᤥ ᥇᥇.᥆᥆.᥆᥆᥆ ᤏᤢ ᤕᤜᤢᤍᤠᤀᤥ ᥊.᥍᥆.᥆᥆᥆ ᤔᤧᤘᤠ᤹ᤖᤧᤳᤇ॥” 6 ᤁᤖ ᤕᤥᤀᤠᤒᤖᤧ ᤗᤧᤒᤡ ᤏᤢ ᤒᤣᤏᤩᤠᤔᤡᤏᤡᤜᤠ᤹ ᤕᤠᤶᤏᤠ᤺ᤳᤏᤡ᤺ᤳ ᤔᤧᤈᤥᤃᤢᤛᤡᤴ. ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤅᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤧᤴᤍᤠᤀᤣ ᤘᤕᤧ॥ 7 ᤁᤴ ᤀᤡᤱᤈᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤴᤍᤠᤀᤣ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ॥ 8 ᤂᤧᤒᤩᤠᤱ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤠ᤹ᤖᤡᤰ ᤕᤶᤒᤠ ᤗᤠᤕᤥ ᤆᤥᤃᤢᤱ᥄ ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤧᤸᤗᤧ ᤀᤠᤀᤠᤵᤋᤡᤰᤁᤧᤴ ᤂᤧᤳᤋᤠᤱ ᤐᤡᤖᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥” 9 ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤖᤧ ᤁᤢᤄᤠᤃᤧᤀᤡᤰᤐᤠ ᤃᤠᤍᤧᤴ ᤔᤧᤳᤋᤢ. 10 “ᤂᤧᤏᤧ᤹ ᤐᤥᤃᤧᤀᤠᤱ ᤍᤠᤀᤢᤍᤧᤴ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤃᤡ ᤛᤢᤶᤛᤡ ᤐᤠ᤺ᤴᤜᤠ᤹ ᤕᤢᤰᤂᤢᤱᤗ ᤐᤳᤋᤠ॥ ᤂᤧᤱᤜᤠ᤹ᤀᤥᤗᤠᤶ ᤗᤳᤇᤠ ᤛᤣᤃᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤁᤧᤛᤶᤎᤠᤱ ᤋᤠᤖᤢᤱ᤹॥’” 11 ᤁᤸᤗᤧᤆᤥᤃᤢᤸᤗᤧ ᤃᤠᤍᤧᤴ ᤍᤠᤀᤢᤍᤖᤧᤀᤥ ᤐᤣᤀᤠᤱ ᤀᤰᤂᤣ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ᤹—‘ᤂᤧᤏᤧ᤹ ᤗᤳᤇᤠ ᤛᤣᤃᤧ᤹— 12 ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤛᤠᤰᤘᤠᤴ ᤋᤠᤒᤠ. ᤀᤡᤃᤪ ᤗᤠ ᤛᤢᤶᤛᤡ ᤌᤠᤖᤡᤰ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ᤖᤧ ᤋᤢᤰᤂᤣ ᤁᤧᤶᤈᤠ᤺ᤵᤐᤠ. ᤀᤡᤃᤪ ᤛᤢᤶᤕᤧᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤧᤖᤧᤰ ᤔᤠᤱᤍᤢᤰᤔᤠ ᤋᤠᤖᤢᤒᤠ॥ ᤀᤠᤱᤃᤠ᤹ ᤁᤧᤒᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤌᤣ ᤏᤢᤃᤵ ᤐᤡᤖᤢᤱᤒᤠᤒᤣ’ ᤔᤧᤳᤋᤠᤱᤅᤧ᤹॥” 13 ᤂᤧᤒᤩᤠᤱ ᤍᤠᤀᤢᤍᤖᤧ ᤃᤠᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤥ ᤌᤩᤠᤱᤅᤠᤱ ᤘᤠ᤹ᤀᤠ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤀᤣ ᤌᤠᤀᤠᤖ ᤕᤠ᤺ᤴᤍᤠᤱᤅᤧ᤹॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰ॥ ᤁᤖ ᤀᤠᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠ ᤔᤧᤒᤥᤱᤏᤧᤴᤗ॥” 14 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗ ᤁᤧᤖᤧᤰᤁᤣ ᤗᤳᤇᤠ ᤔᤠᤱᤍᤢᤰᤔᤠ ᤐᤠᤱᤄᤢ ᤋᤠᤛᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤏᤢᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤔᤧᤛᤩᤧ॥ 15 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤠᤱᤗᤠᤀᤡᤱᤒᤠ ᤌᤡᤰ ᤐᤠᤱᤄᤢᤕᤢᤛᤢ॥ ᤁᤖ ᤂᤢᤏᤧ᤹ ᤂᤧᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤏᤡᤛᤢᤀᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤗᤠᤶ ᤁᤢᤏᤡᤱᤘᤠ᤹ ᤏᤢ᤺ᤰᤋᤢᤀᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤔᤠᤱᤗᤠᤀᤡᤱᤒᤧᤴ ᤔᤧᤳᤋᤢ. “ᤀᤠᤸᤗ ᤕᤠ᤺ᤰᤋᤢ᥄ ᤁᤧᤜᤢᤰᤁᤡᤴ ᤆᤰ ᤌᤠᤛᤧ᤹᥄” ᤂᤧᤴ ᤕᤧᤶᤔᤥ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤕᤒᤢᤛᤡ ᤀᤖᤦᤏᤠ᤺ᤸᤗᤧ ᤁᤢᤈᤠ ᤌᤠᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤅᤠᤱ ᤕᤧᤒᤧ॥ 16 ᤍᤠᤀᤢᤍᤧᤴ ᤌᤥᤜᤠᤱ ᤗᤧᤵᤔᤠᤱ ᤀᤥᤔᤕᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠ ᤀᤡᤱᤒᤧᤴ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤗᤢᤶᤔᤥ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤕᤖᤢᤛᤗᤧᤔ ᤛᤶᤎᤠᤱ ᤛᤴᤇᤢᤀᤠᤱ ᤕᤧᤒᤧᤃᤖᤧᤒᤠ ᤏᤡᤛᤢ॥ ᤂᤧᤒᤩᤠᤱ ᤍᤠᤀᤢᤍᤧᤴ ᤏᤢ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤛᤃᤡᤋᤣᤳ ᤔᤧᤈᤠᤰᤂᤢᤀᤠᤱ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱ॥ 17 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤌᤰᤗᤡᤜᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ᤏᤡ ᤀᤡᤱᤈᤠᤱ ᤆᤥᤃᤢᤱᤅᤠᤱ ᤘᤕᤧ॥ ᤀᤠᤱᤃᤠ᤹ᤏᤣ ᤗᤠᤕᤥ ᤆᤥᤃᤢᤱᤅᤠᤱ ᤕᤠ᤺ᤶᤒᤰ ᤑᤣ᤺ᤴᤍᤢᤱᤅᤠᤱ ᤘᤕᤧ॥ ᤁᤖ ᤐᤵᤐᤪᤠ᤹ᤔᤠ ᤂᤧᤴ ᤁᤢᤍᤥ᤺ᤵᤔᤠ ᤔᤧᤸᤗᤢᤰ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤌᤣ ᤔᤧᤈᤥᤃᤢᤀᤠᤱ ᤘᤕᤧᤒᤣ᥅ ᤕᤜᤘᤣ ᤍᤠᤱᤒᤠ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥᤒᤠ ᤔᤡᤱᤍᤣᤴ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤜᤡᤶᤛᤕᤱ ᤛᤶᤎᤠᤱ ᤌᤠᤖᤖᤥ. ᤁᤖ ᤁᤴ ᤔᤧᤰᤔᤠᤛᤡᤔᤠᤴ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤛᤶᤎᤠᤱ ᤔᤧᤎᤠᤏᤧᤴᤗᤖᤥ॥” 18 ᤍᤠᤀᤢᤍᤧᤴ ᤕᤒᤢᤛᤡ ᤀᤖᤦᤏᤠ᤺ᤸᤗᤧ ᤁᤢᤈᤠ ᤌᤠᤶᤔᤠᤍᤧᤴᤏᤥ ᤐᤣᤃᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤃᤠᤍᤧᤴ ᤔᤧᤳᤋᤢ॥ 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤃᤠᤍᤖᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤍᤠᤀᤢᤍᤧᤴ ᤂᤧᤳᤌᤥ ᤌᤥ᤺ᤰᤛᤡᤱᤅᤠᤱ ᤐᤣ॥ 20 ᤀᤖᤦᤏᤠᤴ ᤔᤠᤛᤡ ᤏᤢᤰᤏᤢ ᤕᤠᤃᤧ॥ ᤂᤢᤏᤧ᤹ ᤀᤰᤂᤣ ᤜᤡᤛᤡᤱᤅᤡᤸᤗᤧ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤏᤡᤛᤢ॥ ᤀᤖᤦᤏᤠ᤺ᤴᤏᤢ ᤁᤧᤘᤠ᤹ᤒᤠ ᤂᤢᤏᤧ᤹ ᤁᤢᤛ᤻ᤛᤠ ᤗᤡᤛᤡᤜᤠ᤹ ᤔᤧᤈᤡᤱᤛᤡᤱ॥ 21 ᤍᤠᤀᤢᤍᤧᤴ ᤂᤧᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤀᤖᤦᤏᤠ᤺ᤸᤗᤧ ᤀᤥᤔᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤛᤢᤀᤠᤱ ᤆᤠᤎᤠᤶᤔᤠᤍᤧᤴᤏᤥᤗᤠᤶ ᤐᤥᤃᤧ ᤑᤧᤖᤧᤀᤠᤱ ᤂᤢᤏᤧ᤹ ᤁᤢᤍᤃᤡ ᤂᤠᤶᤒᤠᤱᤅᤥ ᤛᤠᤒᤴ ᤜᤒᤳ ᤑᤴᤇᤡᤱ॥ 22 ᤍᤠᤀᤢᤍᤖᤧ ᤀᤖᤦᤏᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤴ ᤆᤠᤎᤠᤶᤔᤠᤍᤧᤴᤏᤥᤒᤠ ᤗᤠᤈᤣᤴ ᤐᤡᤖᤠᤱᤅᤧ᤹ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥ᤺ᤰᤔᤠ ᤛᤢᤰᤋᤢᤱᤗ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤁᤧᤎᤠᤒᤠ ᤔᤠᤱᤍᤢᤰᤔᤧᤴ ᤐᤣ᤺ᤰᤗ॥ ᤂᤧᤸᤗᤧ ᤕᤠᤖᤢᤒᤠ ᤁᤢᤔᤧᤸᤗᤢᤱᤅᤥ ᤀᤠᤱᤃᤠ᤹ᤀᤥ ᤛᤱᤄᤧ᤹॥” 23 ᤀᤖᤦᤏᤠ᤺ᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤂᤧᤴ ᤂᤧᤏᤧ᤹ ᤋᤣ᤹ᤖᤧ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤌᤣ ᤆᤥ᤺ᤰᤔᤠ ᤁᤧᤏᤡᤱᤘᤠ᤹ ᤘᤠ᤹ ᤆᤥᤃᤧ᤹॥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤵᤔᤥ ᤁᤢᤶᤒᤠᤒᤠ ᤐᤡᤳᤜᤠ᤹ ᤔᤧᤕᤧᤵ. ᤆᤠᤏᤢᤰᤔᤠ ᤛᤡᤱᤜᤠ᤹ ᤜᤠ᤺ᤶᤔᤠ ᤛᤡᤱ ᤏᤢ ᤔᤠᤛᤡᤴ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤘᤠ᤹॥ ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤍᤠᤱᤒᤠ ᤐᤡᤏᤧᤖᤥ॥” 24 ᤁᤖ ᤍᤠᤀᤢᤍ ᤜᤠᤱᤅᤡᤸᤗᤧ ᤀᤖᤦᤏᤠᤴ ᤔᤧᤳᤋᤢ. “ᤔᤣ᤺ᤴ. ᤀᤠᤱᤃᤠ᤹ ᤁᤧᤖᤧᤰ ᤁᤢᤔᤧᤸᤗᤢᤱ ᤐᤡᤏᤧ॥ ᤀᤠᤱᤃᤠ᤹ ᤁᤢᤔᤧᤸᤗᤢᤱ ᤔᤧᤴᤜᤢᤱᤅᤣᤒᤠ ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤋᤠ᤺ᤰᤋᤢᤱᤅᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥ᤺ᤴᤏᤠᤴ॥” 25 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤗᤠᤈᤣ᤺ᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤀᤖᤦᤏᤠᤴ ᤁᤡᤵ ᤋᤢᤰᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤣ᤹ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ॥ 26 ᤀᤠᤶᤓᤠ ᤂᤧᤵᤔᤥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴ ᤆᤥᤃᤢᤀᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠᤗᤠᤶ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡ ᤌᤠᤛᤢᤀᤠᤱ ᤏᤢᤃᤵ ᤐᤡᤖᤢ॥ 27 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤴ ᤔᤠᤱᤗᤠᤀᤡᤱᤒᤧᤸᤗᤧ ᤁᤢᤍᤠᤓᤣᤴ ᤁᤢᤛᤢ᤺ᤵᤐᤥ ᤕᤠᤰᤋᤢ॥ 28 ᤜᤠᤒᤠ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤒᤢᤛᤡ ᤀᤖᤦᤏᤠ᤺ᤸᤗᤧ ᤁᤢᤈᤠ ᤌᤠᤶᤔᤠᤍᤧᤴᤏᤥ ᤏᤢᤃᤵ ᤐᤡᤖᤠᤱ ᤁᤧᤗ᤹ᤒᤠ ᤏᤡᤛᤢᤀᤠᤱ ᤍᤠᤀᤢᤍᤖᤧ ᤂᤧᤵᤔᤥ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ 29 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤥᤛᤠ᤺ᤸᤗᤧ ᤆᤥᤃᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤃ ᤂᤧᤴ ᤕᤧᤶᤔᤥ ᤌᤠᤖᤡᤰ ᤃᤡᤒᤥᤏᤀᤥᤒᤠ ᤀᤢ᤺ᤰᤆᤶᤈᤶᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴᤏᤡᤴᤏᤧ ᤏᤧᤛ᤻ᤛᤧ॥ 30 ᤁᤖ ᤕᤜᤘᤣ ᤍᤠᤱᤒᤧᤴ ᤐᤠᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤍᤠᤀᤢᤍᤧᤴ ᤐᤣ᤺ᤰᤔᤠ ᤔᤧᤴᤇᤢᤰᤁᤣ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤠᤱᤗᤠᤀᤡᤱᤒᤧᤸᤗᤧ ᤁᤢᤍᤠᤓᤣ᤺ᤸᤗᤧ ᤂᤢᤏᤧ᤹ ᤁᤢᤛᤠᤶᤔᤡᤰ ᤔᤕᤧᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.