᥇ ᤛᤠᤵᤔᤢ᤺ᤴᤎᤢᤶ 20 - LIFOTNT

ᤍᤠᤀᤢᤍᤖᤧ ᤖᤒ᤻ᤒᤠ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤢ᤹

¹ ᤜᤠᤱᤘᤠᤔᤠ ᤕᤧᤶ ᤐᤥᤱᤔᤠ ᤜᤣ᤺ᤰᤋᤧᤸᤗᤧ ᤀᤠᤸᤗ ᤜᤠᤱᤜᤠ᤹ ᤋᤧᤴᤎᤱ ᤆᤥ᤺ᤰᤛᤧ ᤔᤧᤒᤣ. ᤂᤧᤒᤩᤠᤱ ᤕᤥᤀᤠᤒᤖᤧ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ. ᤜᤧᤰᤁᤩᤠᤱ ᤖᤒ᤻ᤒᤠ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤂᤧᤴ ᤁᤒᤪᤡᤱ ᤁᤡᤷᤃᤵ ᤔᤧᤃᤒᤢ॥ ᤁᤖ ᤍᤠᤀᤢᤍᤧᤴ ᤃ ᤕᤖᤢᤛᤗᤧ᤺ᤶᤔᤥᤀᤣ ᤘᤕᤧ॥ ᤕᤥᤀᤠᤒᤖᤧ ᤂᤧᤴ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤀᤠᤱ ᤂᤠᤶᤒᤢᤳᤋᤪᤠ ᤐᤥᤃᤧᤖ ᤆᤥᤃᤢ॥

² ᤍᤠᤀᤢᤍᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤡᤸᤗᤧ ᤁᤢᤍᤡᤆ᤺ᤴ ᤂᤢᤴᤇᤡ ᤌᤧᤃᤣ᤺ᤰᤜᤠ᤹ᤀᤥᤗᤠᤶ ᤑᤢᤴᤍᤢ ᤋᤣ᤹ᤖᤢ॥ ᤂᤧᤴ ᤔᤧᤎᤠᤱᤄᤢᤸᤗᤧ ᤛᤠᤶᤔᤩᤠᤱ ᤋᤥᤖᤠ ᤌᤡᤰ ᤕᤥᤖᤧ. ᤜᤧᤰᤁᤩᤠᤱ ᤂᤧᤵᤔᤥ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤜᤠ᤹ᤀᤠᤱ ᤔᤧᤍᤡ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤴ ᤋᤡᤆ᤺ᤴ ᤍᤠᤀᤢᤍᤖᤧ ᤁᤢᤎᤧᤃᤣ᤺ᤰᤁᤥ ᤔᤧᤄᤢ᤺ᤰᤋᤢ॥ ᤂᤢᤏᤧ᤹ ᤂᤧᤴ ᤕᤧᤰᤕᤰᤁᤥᤗᤠᤶ ᤔᤧᤏᤠᤵᤋᤢᤛᤡᤒᤠ ᤛᤠ᤹ᤖᤡᤰ ᤕᤖᤡᤰ ᤛᤠᤔᤠᤜᤠ᤹ ᤑᤧᤳᤋᤢ॥

³ ᤂᤢᤏᤧ᤹ ᤂᤧᤵᤔᤥ ᤕᤰᤕᤢᤱᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤋᤠᤱᤀᤠᤖᤠ ᤏᤢ ᤑᤧᤴᤈᤣ᤹ ᤜᤧᤰᤁᤩᤠᤱ ᤘᤣ᤹ ᤑᤧᤈᤢᤶᤓᤧᤕᤠᤜᤠ᤹ ᤏᤢ ᤋ᤺ᤴᤍᤣ᤹ᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤢᤛᤡ॥ ᤍᤠᤀᤢᤍᤖᤧ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤀᤰᤂᤣᤀᤣ ᤆᤥᤃᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤏᤢ ᤁᤧᤖᤧᤰ ᤁᤢᤔᤏᤠᤜᤠ᤹ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤖᤥ॥

ᤀᤠᤈᤠᤈᤠᤒᤠ ᤜᤧᤰᤋᤱᤒᤠ ᤐᤗᤡᤛ᤻ᤋᤡᤜᤠ᤹ᤏᤢ ᤋᤧᤴᤎᤱ

⁴ ᤁᤢᤓᤠ ᤕᤧᤶ ᤀᤣᤃᤠᤱ ᤃᤣᤈᤣᤖᤀᤥ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤐᤥ᤺ᤰᤂᤧ॥ ᤀᤠᤶᤓᤠ ᤂᤧᤴ ᤕᤧᤶᤔᤥ ᤜᤢᤛᤠᤋᤡ ᤛᤡᤒ᤻ᤒᤁᤤ᤺ᤸᤗᤧ ᤖᤐᤠᤀᤡᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤌᤡᤴᤍᤠᤱ ᤛᤠᤕᤥᤒᤥᤖᤠ ᤛᤡᤵᤐᤤᤴ ᤛᤩᤧᤖᤢ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤁᤢᤜᤢᤰᤁᤥ ᤔᤧᤎᤩᤧ॥

⁵ ᤐᤗᤡᤛ᤻ᤋᤡᤜᤠ᤹ᤏᤢ ᤐᤥ᤺ᤰᤂᤧᤒᤠ ᤗᤳᤇᤠ ᤘᤣ᤹ ᤌᤱᤅᤥ ᤕᤠᤀᤡᤖᤖᤧ ᤁᤢᤛ᤻ᤛᤠ ᤀᤣᤸᤜᤠᤏᤠᤏᤖᤧ ᤃᤠᤋᤒᤠ ᤃᤥᤗᤩᤋᤖᤧ ᤁᤢᤴᤛᤠ᤹ ᤗᤜᤔᤡᤴ ᤛᤩᤧᤖᤢ. ᤂᤧᤴ ᤗᤜᤔᤡ᤺ᤸᤗᤧ ᤁᤢᤗᤠ᤺ᤰᤁᤡᤸᤗᤧ ᤁᤢᤗᤠ᤺ᤴ ᤌᤠᤰ ᤁᤡᤵᤔᤠ ᤛᤡᤱᤗ᤺ᤱᤛᤠ ᤕᤠ᤺ᤵᤐᤠ ᤆᤥᤃᤧ॥

⁶ ᤃᤠᤋᤀᤥ ᤐᤥ᤺ᤰᤂᤧᤒᤠ ᤘᤣ᤹ ᤌᤱᤅᤥ ᤋᤢᤰᤛᤡ ᤋᤢᤰᤛᤡ ᤁᤢᤜᤢᤰᤆᤥᤰ ᤏᤢ ᤋᤢᤰᤛᤡ ᤋᤢᤰᤛᤡ ᤁᤢᤗᤠᤱᤈᤥᤰ ᤁᤧᤒᤵᤐᤠ ᤁᤧᤖᤧᤰᤗᤧ ᤏᤡᤒᤥᤱᤅᤠᤱ ᤗᤡᤛᤡ ᤁᤢᤜᤢᤰᤆᤥ ᤁᤢᤗᤠᤱᤈᤥ ᤁᤧᤒᤵᤐᤠ ᤜᤥᤖᤢ ᤌᤡᤰ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ ᤂᤧᤴᤏᤠᤱ ᤖᤑᤠᤸᤗᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠ ᤘᤕᤧ॥

⁷ ᤀᤠᤸᤗ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡ. ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤶᤓᤢ᤹ ᤛᤡᤔᤣᤀᤖᤧ ᤁᤢᤛ᤻ᤛᤠ ᤈᤥᤏᤠᤌᤏᤧᤸᤗᤧ ᤂᤧᤴ ᤛᤩᤧᤖᤢ॥

⁸ ᤁᤴ ᤜᤥᤖᤢᤜᤠ᤹ ᤃᤠᤋᤒᤠ ᤖᤑᤠ᤺ᤸᤗᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠ ᤔᤧᤘᤕᤧ॥ ᤁᤴᤜᤠ᤹ ᤂᤰᤐᤧᤳ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤗᤠᤶ ᤔᤧᤛᤩᤧᤖᤢᤛᤡᤖᤥ॥