᥇ ᤛᤠᤵᤔᤢ᤺ᤴᤎᤢᤶ 19 - LIFOTNT

ᤍᤠᤀᤢᤍᤖᤧ ᤀᤶᤔᤥᤏᤡ ᤏᤢ ᤀᤖᤠᤔᤡᤜᤠ᤹ ᤌᤱᤅᤥ ᤏᤠ᤺ᤴᤍᤢᤛᤡ

¹ ᤁᤢᤓᤠ ᤕᤧᤶ ᤀᤣᤃᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤏᤠᤜᤠᤛᤧᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤁᤢᤛ᤻ᤛᤠ ᤜᤠᤏᤢᤏᤧᤴ ᤜᤠᤱ ᤐᤥ᤺ᤰᤂᤧ॥

² ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤜᤠᤏᤢᤏᤖᤧ ᤁᤢᤶᤒᤠ ᤏᤠᤜᤠᤛᤖᤧ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤛ᤻ᤛᤠ᤺ᤴᤏᤢ ᤀᤠᤱᤃᤠ᤹ ᤛᤧᤰᤂᤠᤒᤠ ᤆᤢᤶ ᤐᤥᤱᤔᤠ ᤐᤥᤱ᤹॥” ᤁᤸᤗᤧᤆᤥᤃᤢᤸᤗᤧ ᤜᤠᤏᤢᤏᤖᤧ ᤁᤢᤶᤒᤠ ᤔᤠᤛᤡᤱᤅᤡᤸᤗᤧ ᤂᤢᤏᤧ᤹ ᤀᤠ᤺ᤴᤇᤡᤱᤔᤠ ᤐᤡᤔᤠᤖᤧ ᤗᤠᤃᤡ ᤍᤠᤀᤢᤍᤧᤸᤗᤧ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ॥ ᤀᤠᤸᤗ ᤍᤠᤀᤢᤍᤖᤧ ᤁᤢᤀᤡᤱᤛᤠᤒᤠᤜᤠ᤹ ᤜᤠᤏᤢᤏᤧᤴ ᤀᤠ᤺ᤴᤇᤡᤱᤔᤠ ᤐᤡᤔᤠᤖᤧ ᤗᤠᤃᤡ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤗᤠᤛᤧᤸᤗᤧ.

³ ᤀᤶᤔᤥᤏᤡ ᤋᤢᤶᤔᤩᤠᤜᤠᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤍᤠᤀᤢᤍᤖᤧ ᤀᤠᤍᤠᤱᤒᤠ ᤀᤠ᤺ᤴᤇᤡᤱᤔᤠ ᤐᤡᤛᤧ ᤔᤏᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡᤸᤗᤧ ᤂᤢᤏᤧ᤹ ᤌᤣ ᤀᤠᤍᤠᤱᤒᤠᤖᤧ ᤁᤧᤶᤒᤠ ᤀᤡᤱᤎᤠᤱ ᤐᤡᤖᤢᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤀᤠᤍᤠᤱᤒᤠᤖᤧ ᤁᤧᤗᤠᤈᤣᤴ ᤀᤠᤰᤂᤣᤀᤠᤱ ᤔᤧᤱᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤧ ᤐᤠᤱᤄᤢᤛᤡᤒᤠ ᤍᤠᤀᤢᤍᤖᤧ ᤁᤴ ᤁᤢᤔᤏᤠᤜᤠ᤹ᤃ ᤂᤢᤏᤧ᤹ ᤁᤢᤎᤥ᤺ᤶᤈᤡᤘᤠᤒᤠ ᤔᤧ᤺ᤴᤇᤡᤀᤠᤱᤒᤡ᥅”

⁴ ᤁᤸᤗᤧᤆᤥᤃᤢᤸᤗᤧ ᤜᤠᤏᤢᤏᤖᤧ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤋᤧᤶᤛᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤏ᤺ᤰᤂᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤔᤢᤀᤠᤱᤎᤥ ᤂᤢᤴᤇᤡ᤹ ᤔᤡᤃᤰᤔᤥ ᤌᤠᤖᤡᤰ ᤂᤢᤴᤇᤡ᤹ ᤆᤠᤱᤜᤠ᤹ ᤁᤢᤓᤪᤧ᤺ᤰ ᤂᤰᤋᤢᤀᤠᤱ ᤂᤧᤱᤜᤠ᤹ ᤕᤠᤱᤏᤠ ᤐᤠᤱᤄᤢᤍᤣᤛᤢᤛᤡ॥

⁵ ᤀᤠᤸᤗ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡᤒᤠ ᤂᤧᤴ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤀᤡᤱᤄᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤛᤡᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤕᤢ᤹ᤜᤠ᤹ ᤕᤠᤶᤔᤥ ᤔᤧᤶᤒᤥᤀᤣ ᤌᤠᤖᤡᤰ ᤕᤖᤡᤜᤥᤀᤣ ᤔᤧᤘᤠ᤹ᤖ ᤁᤧᤗ᤹ᤒᤠ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ॥

⁶ ᤀᤠᤸᤗ ᤍᤠᤀᤢᤍᤖᤧ ᤁᤢᤏᤡᤔᤥ ᤀᤶᤔᤥᤏᤡᤜᤠ᤹ ᤛᤡᤰᤁᤧᤗᤧ᤺ᤱᤒᤠ ᤀᤠᤈᤥᤰ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ. ᤂᤧᤒᤩᤠᤱ ᤜᤠᤏᤢᤏ ᤏᤢ ᤀᤶᤔᤥᤏᤡᤜᤠ᤹ᤖᤧ ᤀᤖᤠᤔ-ᤏᤠᤜᤠᤖᤤᤔ ᤏᤢ ᤀᤖᤠᤔ-ᤔᤠᤁᤠ ᤜᤧᤰᤁᤩᤠᤱ ᤛᤥᤒᤠᤗᤠᤶ ᤀᤴᤗᤠᤎᤠᤜᤠ᤹ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤡᤶᤕᤠᤰᤁᤥ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤜᤧᤴᤇᤡᤱ ᤌᤡᤰ ᤋᤥᤖᤠ ᤕᤢᤵᤐᤠ ᤔᤧᤜᤠᤅᤢ ᤔᤧᤍᤣᤛᤢ॥

⁷ ᤂᤧᤱᤜᤠ᤹ᤖᤧ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤀᤴᤗᤠᤎᤠ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹. ᤜᤧᤰᤁᤩᤠᤱ ᤔᤠᤁᤠᤒᤠ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤏᤡᤶᤕᤠᤰᤁᤥ ᤋᤠᤖᤢᤛᤡ. ᤂᤶᤓᤩᤠᤱ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤔᤣᤍᤒᤠ ᤋᤃᤠᤱ ᤗᤧᤵᤔᤠᤱ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤀᤶᤔᤥᤏᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤰᤕᤰᤜᤠ᤹ᤀᤥᤗᤠᤶ ᤔᤧᤍᤩᤧᤀᤠᤱ ᤋᤧᤴᤎᤱᤗᤧ ᤗᤠᤃᤡ ᤔᤧᤈᤢᤵᤛᤧ॥

⁸ ᤍᤠᤀᤢᤍᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤕᤥᤀᤠᤒᤧᤴ ᤏᤢ ᤁᤧᤖᤧᤰ ᤌᤰᤗᤡᤜᤠᤱ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡ॥

⁹ ᤀᤶᤔᤥᤏᤡᤜᤠ᤹ ᤕᤧᤰᤕᤰᤁᤥ ᤐᤣ᤺ᤰᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤔᤧᤓᤧᤖᤧᤀᤠᤱ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤴᤈᤢᤶ ᤁᤢᤴᤍᤣ᤺ᤱᤒᤠ ᤜᤠᤱᤜᤠ᤹ᤖᤧ ᤋᤠᤶᤍᤠᤶᤒᤠ ᤋᤧᤸᤗᤰᤁᤥ ᤂᤢᤴᤇᤡ᤹ ᤕᤢᤰᤏᤠᤍᤧᤴᤏᤥ ᤔᤧᤕᤢᤱᤛᤡᤱ॥

¹⁰ ᤀᤠᤸᤗ ᤕᤥᤀᤠᤒᤖᤧ ᤂᤢᤏᤧ᤹ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤏᤧᤵᤔᤠᤱ ᤐᤡᤛᤠᤱᤗᤠᤶ ᤌᤱᤅᤡᤸᤗᤧ ᤁᤒᤢᤒᤠ ᤏᤡᤱᤘᤠ᤹ ᤂᤥᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤓᤠ ᤔᤧᤛᤣᤃᤢᤛᤡᤒᤠ ᤁᤧᤍᤶᤒᤠ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤀᤖᤠᤔᤡᤜᤠ᤹ᤏᤢ ᤌᤰᤛᤧ ᤐᤠᤱᤄᤢᤛᤡ॥

¹¹ ᤁᤧᤏᤶᤒᤠ ᤌᤰᤛᤢᤒᤠᤜᤠ᤹ ᤂᤢᤏᤧ᤹ ᤀᤠᤒᤠᤅᤣ ᤁᤢᤴᤛᤠ᤹ ᤀᤒᤡᤛᤤᤖᤧ ᤁᤢᤕᤢᤰᤁᤥ ᤋᤠᤖᤢᤛᤡ. ᤂᤢᤏᤧ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤌᤱᤗᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤛᤡ॥

¹² ᤕᤥᤀᤠᤒᤖᤧ ᤀᤒᤡᤛᤤᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤃᤡ ᤀᤖᤠᤔᤡᤜᤠ᤹ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤔᤧᤈᤥᤰᤏᤧᤓᤃᤪ ᤂᤧᤏᤧ᤹ ᤀᤠᤱᤃᤠ᤹ ᤀᤠᤓᤠ᤹ᤛᤧ ᤑᤧᤖᤧ᤹॥ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤔᤧᤈᤥᤰᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤁᤧᤓᤠ᤹ᤛᤧ ᤑᤧᤴᤏᤠ॥

¹³ ᤀᤠᤏᤡ᤹ ᤀᤠᤵᤑᤣᤰ ᤛᤢᤘᤠᤱ ᤏᤢ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰᤜᤠ᤹ᤖᤧ ᤗᤠᤃᤡ ᤜᤠᤱᤜᤠᤱ ᤗ᤹ᤖᤡᤀᤠᤱ ᤌᤱ ᤆᤥᤃᤡ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ ᤂᤢᤏᤧ᤹ ᤜᤠᤒᤠ ᤂᤧᤴᤏᤣ ᤆᤥᤃᤢ᤹॥”

¹⁴ ᤂᤶᤓᤩᤠᤱ ᤕᤥᤀᤠᤒᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤀᤖᤠᤔᤡᤜᤠ᤹ᤏᤢ ᤌᤱ ᤌᤰᤛᤧ ᤋᤃᤡ ᤔᤧᤒᤥᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤀᤖᤠᤔᤡᤜᤠ᤹ ᤂᤧᤳᤇᤡᤱᤔᤠ ᤔᤧᤜᤣ᤺ᤰᤋᤧ॥

¹⁵ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ᤖᤧ ᤀᤖᤠᤔᤡᤜᤠ᤹ ᤔᤧᤄᤧᤳᤇᤡᤱᤒᤠ ᤔᤧᤏᤡᤛᤢᤛᤡᤀᤠᤱ ᤂᤢᤴᤇᤡ᤹ᤀᤠᤱ ᤂᤢᤏᤧ᤹ ᤁᤢᤴᤛᤠ᤹ ᤀᤒᤡᤛᤤ᤺ᤸᤗᤧ ᤁᤢᤍᤃᤡᤗᤠᤶ ᤔᤧᤄᤧᤳᤇᤡᤱᤅᤠᤱ ᤕᤧᤰᤕᤰᤁᤥ ᤔᤧᤗᤠᤛᤧ॥ ᤁᤸᤗᤧᤆᤥᤃᤢᤸᤗᤧ ᤕᤥᤀᤠᤒᤧᤴ ᤕᤖᤢᤛᤗᤧᤔ ᤏᤢ᤺ᤰᤂᤧ॥

¹⁶ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤀᤖᤠᤔᤡᤜᤠ᤹ ᤜᤠᤖᤡᤔᤧᤍᤩᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡᤏᤢ ᤜᤍᤍᤣᤈᤣᤖᤖᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ ᤌᤰᤔᤥᤒᤠ ᤛᤥᤒᤠᤁᤖᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠ ᤘᤣ᤹ ᤀᤖᤠᤔᤡᤜᤠ᤹ ᤔᤧᤀᤢ᤺ᤳᤋᤢᤛᤡ॥

¹⁷ ᤁᤴ ᤐᤠ᤺ᤴᤏᤡᤴᤏᤠᤱ ᤍᤠᤀᤢᤍᤖᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤂᤡᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤑᤢᤰᤂᤢᤛᤡᤀᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢ ᤜᤧᤰᤁᤩᤠᤱ ᤀᤖᤠᤔᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤛᤢᤶᤛᤡᤱ॥ ᤂᤧᤒᤩᤠᤱ ᤀᤖᤠᤔᤡᤜᤠ᤹ ᤍᤠᤀᤢᤍᤧᤴᤏᤢ ᤔᤧᤎᤰᤋᤧ॥

¹⁸ ᤁᤖ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤄᤧᤳᤇᤡᤱ॥ ᤍᤠᤀᤢᤍᤧᤸᤗᤧ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᥍.᥆᥆᥆ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤢ ᥊᥆.᥆᥆᥆ ᤂᤠᤶᤒᤠᤱᤅᤥ ᤁᤧᤎᤰᤐᤠ ᤌᤰᤛᤢᤒᤠᤜᤠ᤹ ᤛᤧᤖᤢᤛᤡ ᤜᤧᤰᤁᤩᤠᤱ ᤌᤰᤔᤥᤒᤠ ᤛᤥᤐᤁᤧᤴᤏᤠᤱ ᤛᤩᤧᤖᤢ॥

¹⁹ ᤜᤍᤍᤣᤈᤣᤖᤖᤧ ᤁᤢᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤠᤖᤡ ᤔᤧᤈᤠ᤺ᤳᤋᤢᤛᤡᤒᤠ ᤔᤧᤏᤡᤛᤢᤀᤠᤱ ᤏᤠᤍᤱ ᤆᤥ᤺ᤰᤔᤠᤖᤧ ᤗᤠᤃᤡ ᤐᤣᤗᤡ ᤔᤧᤓᤠᤰᤋᤢᤛᤡ. ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤧᤸᤗᤧ ᤁᤢᤕᤢᤰᤁᤥ ᤔᤧᤍᤩᤧ॥ ᤁᤸᤗᤧᤆᤥᤃᤢᤸᤗᤧ ᤀᤶᤔᤥᤏᤡᤜᤠ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤀᤖᤠᤔᤡᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤴᤍᤧᤴᤍᤧᤴᤗᤥ॥