᥇ ᤛᤠᤵᤔᤢ᤺ᤴᤎᤢᤶ 18 - LIFOTNT

ᤍᤠᤀᤢᤍᤖᤧ ᤌᤰᤛᤢᤒᤠᤜᤠ᤹ᤗᤠᤶ ᤌᤱ ᤏᤠ᤺ᤴᤍᤢᤒᤠᤜᤠ᤹

¹ ᤁᤢᤓᤠ ᤕᤧᤶ ᤀᤣᤃᤠᤱ ᤍᤠᤀᤢᤍᤖᤧ ᤐᤗᤡᤛ᤻ᤋᤡᤜᤠ᤹ ᤌᤱᤅᤥ ᤑᤳᤋᤢᤛᤡᤀᤠᤱ ᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤃᤠᤋ ᤏᤢ ᤂᤧᤴ ᤁᤒᤪᤡᤱᤒᤠ ᤐᤠᤱᤓᤣ᤹ᤜᤠ᤹ ᤜᤢᤰᤁᤠᤵ ᤆᤥᤃᤢ॥

² ᤂᤢᤏᤧ᤹ ᤔᤥᤀᤠᤒᤡᤜᤠ᤹ᤀᤠᤱ ᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤘᤕᤧᤀᤠᤱ ᤂᤢᤏᤧ᤹ᤀᤥ ᤀᤣ᤺ᤱᤕᤠᤱ ᤔᤧᤜᤢᤅᤢ॥

³ ᤂᤧᤴ ᤀᤣᤃᤠᤱ ᤍᤠᤀᤢᤍᤧᤸᤗᤧ ᤜᤔᤠᤋ ᤗᤠᤈᤣ᤹ ᤁᤢᤕᤠᤀᤥ ᤁᤧᤏᤧᤒᤠ ᤀᤖᤠᤔᤡ ᤗᤠᤈᤣ᤹ ᤛᤥᤒᤠᤒᤠ ᤜᤠᤱ ᤜᤍᤍᤣᤈᤣᤖᤧᤴ ᤌᤱᤅᤥ ᤑᤳᤋᤢ ᤌᤣᤀᤠᤱᤓᤧᤸᤗᤧ ᤜᤍᤍᤣᤈᤣᤖᤧᤸᤗᤧ ᤌᤥᤛᤔᤠ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠ ᤗᤧᤵᤔᤠᤱᤒᤠ ᤋᤧᤱᤃᤵᤐᤡᤴ ᤜᤢᤰᤁᤠᤵ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥

⁴ ᤂᤧᤴ ᤗᤠᤶᤒᤠ ᤍᤠᤀᤢᤍᤖᤧ ᤜᤧᤴᤇᤡᤱ ᤌᤡᤰ ᤀᤴᤗᤠᤎᤠᤜᤠ᤹. ᤜᤧᤴᤇᤡᤱ ᤏᤢᤛᤡ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤢ ᤏᤡᤒᤥᤱ ᤜᤧᤴᤇᤡᤱ ᤂᤠᤶᤒᤠᤱᤅᤥ ᤌᤱ ᤁᤧᤈᤥ᤺ᤰᤐᤠ ᤌᤰᤛᤢᤒᤠᤜᤠ᤹ ᤋᤧᤶᤛᤢᤛᤡ॥ ᤂᤢᤏᤧ᤹ ᤁᤡᤵ ᤌᤡᤰ ᤀᤴᤗᤠᤎᤠᤜᤠ᤹ ᤗᤥ᤺ᤱᤔᤠᤖᤧ ᤗᤠᤃᤡ ᤁᤡᤵ ᤌᤡᤰ ᤀᤴᤜᤠ᤹ᤖᤰ ᤋᤠᤱᤄᤢᤛᤡᤀᤠᤱ ᤘᤣ᤹ ᤁᤧᤖᤧᤰ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤛᤠ᤹ᤀᤡ ᤂᤰᤋᤢ ᤐᤡᤖᤢᤛᤡᤀᤠᤱ ᤗᤠᤱᤛᤰᤐᤠ ᤆᤥᤃᤢᤛᤡ॥

⁵ ᤀᤠᤸᤗ ᤛᤥᤒᤠᤒᤠ ᤜᤠᤱ ᤜᤍᤍᤣᤈᤣᤖᤧᤴ ᤑᤠ᤹ᤔᤠᤖᤧ ᤗᤠᤃᤡ ᤍᤔᤛ᤻ᤁᤛᤗᤠᤶ ᤀᤠᤖᤠᤔᤡᤜᤠ᤹ ᤔᤧᤓᤧᤖᤧᤸᤗᤧ ᤍᤠᤀᤢᤍᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤰᤂᤢᤛᤡ॥

⁶ ᤜᤧᤰᤁᤩᤠᤱ ᤂᤧᤴ ᤀᤠᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶ ᤍᤔᤛ᤻ᤁᤛᤀᤥ ᤌᤰᤛᤢᤒᤠᤜᤠ᤹ ᤏᤧᤛ᤻ᤛᤢᤛᤡ॥ ᤂᤧᤴ ᤀᤠᤖᤠᤔᤡᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤘᤕᤧᤀᤠᤱ ᤀᤣ᤺ᤱᤕᤠᤱ ᤔᤧᤜᤢᤅᤢ॥ ᤁᤶᤓᤗ᤹ᤖᤡᤰ ᤍᤠᤀᤢᤍᤧᤴ ᤀᤠᤳᤋᤠᤴ ᤐᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢ॥

⁷ ᤜᤍᤍᤣᤈᤣᤖᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤔᤧᤜᤣᤛᤢᤒᤠ ᤛᤠᤶᤔᤩᤠᤱ ᤂᤥᤜᤠ᤹ ᤍᤠᤀᤢᤍᤖᤧ ᤏᤠᤵᤋᤢᤛᤡᤀᤠᤱ ᤕᤖᤢᤛᤗᤧᤔ ᤑᤧᤳᤋᤢ॥

⁸ ᤂᤢᤏᤧ᤹ ᤜᤍᤍᤣᤈᤣᤖᤖᤧ ᤁᤢᤕᤧᤰᤕᤰ ᤋᤣᤒᤜ ᤏᤢ ᤁᤢᤏ ᤗᤠᤶᤒᤠᤀᤠᤱ ᤛᤠ᤹ᤖᤡᤰ ᤕᤖᤡᤰ ᤁᤠᤛᤠᤜᤠ᤹ ᤑᤧᤳᤋᤢ॥ ᤀᤠᤶᤓᤠ ᤁᤴᤗᤠᤶ ᤛᤥᤗᤥᤔᤏᤖᤧ ᤗᤳᤇᤠ ᤛᤠ᤹ᤖᤡᤰ ᤕᤶᤒᤠ ᤁᤠᤛᤠ ᤑᤛᤡ ᤌᤡᤰ. ᤛᤡᤳᤗᤠᤱᤜᤠ᤹ ᤏᤢ ᤐᤖᤡᤰ ᤐᤖᤡᤰᤐᤠ ᤁᤠᤛᤠ ᤛᤠᤔᤠᤜᤠ᤹ ᤌᤃᤢᤛᤡ॥

⁹ ᤀᤠᤸᤗ ᤍᤠᤀᤢᤍᤧᤸᤗᤧ ᤛᤥᤒᤠᤒᤠ ᤜᤠᤱ ᤜᤍᤍᤣᤈᤣᤖᤖᤧ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤌᤱ ᤌᤰᤔᤠ ᤏᤠ᤺ᤴᤍᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤜᤔᤠᤋᤒᤠ ᤜᤠᤱ ᤋᤥᤀᤢ᤺ᤸᤗᤧ ᤂᤧᤵᤛᤢ.

¹⁰ ᤂᤧᤒᤩᤠᤱ ᤍᤠᤀᤢᤍᤧᤸᤗᤧ ᤜᤍᤍᤣᤈᤣᤖᤧᤴ ᤌᤱᤅᤥ ᤏᤠ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤧᤘᤠ ᤔᤧᤵᤔᤠ ᤏᤢ ᤜᤠᤱᤛᤧᤶᤓᤥᤏᤠ ᤐᤡᤔᤠᤖᤧ ᤗᤠᤃᤡ ᤂᤧᤸᤗᤧ ᤀᤠᤵᤑᤣᤰ ᤁᤢᤛ᤻ᤛᤠ ᤜᤍᤥᤖᤔᤧᤴ ᤍᤠᤀᤢᤍ ᤜᤠᤱᤅᤧᤀᤥ ᤐᤠᤱᤄᤢᤍᤣᤛᤢ. ᤌᤣᤀᤠᤱᤓᤧᤸᤗᤧ ᤜᤍᤍᤣᤈᤣᤖᤧᤴ ᤏᤢ ᤋᤥᤀᤢ᤺ᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤌᤱ ᤐᤥ᤺ᤰᤂᤧᤀᤠᤱ ᤘᤕᤧ॥ ᤜᤍᤥᤖᤔᤧᤸᤗᤧ ᤁᤧᤖᤧᤰ ᤐᤖᤡᤰᤐᤠ ᤛᤠᤶᤔᤩᤠᤱ. ᤕᤢᤵᤐᤠ ᤏᤢ ᤁᤠᤛᤠ ᤂᤵᤐᤩᤠ ᤛᤠᤔᤠᤜᤠ᤹ ᤑᤧᤳᤋᤢ॥

¹¹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤴ ᤂᤵᤐᤩᤠ ᤛᤠᤔᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢ॥ ᤂᤢᤏᤧ᤹ ᤘᤣ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱ ᤀᤧᤍᤥᤔ. ᤔᤥᤀᤠᤒ. ᤀᤶᤔᤥᤏᤡ. ᤐᤗᤡᤛ᤻ᤋᤡ ᤏᤢ ᤀᤔᤠᤗᤧᤁᤡᤜᤠ᤹ ᤗᤠᤶᤒᤠ ᤋᤣ᤹ᤖᤢᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤜᤠ᤹ᤀᤠᤱ ᤋᤥ᤺ᤴᤍᤢ॥

¹² ᤀᤣᤍᤥᤔᤡᤜᤠ᤹ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤀᤒᤡᤛᤤ᤺ᤸᤗᤧ ᤏᤠ᤺ᤴᤍᤢᤛᤡ॥ ᤂᤢᤏᤧ᤹ ᤕᤢᤶᤗᤠ᤺ᤰᤂᤠᤱ ᤏᤧᤏᤧᤒᤠᤍᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤡᤒᤥᤱᤅᤠᤱ ᤕᤧᤳᤇᤡ ᤜᤧᤴᤇᤡᤱ ᤔᤏᤠᤜᤠ᤹ ᤔᤧᤰᤂᤢᤛᤡ॥

¹³ ᤀᤣᤍᤥᤔᤀᤥ ᤁᤢᤎᤰᤛᤢᤒᤠᤜᤠ᤹ ᤏᤧᤛ᤻ᤛᤢᤛᤡ. ᤁᤧᤖᤧᤰ ᤀᤣᤍᤥᤔᤡᤜᤠ᤹ ᤀᤠᤸᤗ ᤍᤠᤀᤢᤍᤖᤧ ᤁᤢᤜᤢᤰᤁᤥ ᤔᤧᤎᤩᤧ॥ ᤀᤠᤳᤋᤡ ᤀᤠᤳᤋᤡ ᤍᤠᤀᤢᤍᤧᤴ ᤐᤣ ᤂᤧᤱᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤖᤥ॥

ᤍᤠᤀᤢᤍᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹

¹⁴ ᤍᤠᤀᤢᤍᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤜᤠᤱᤕᤢᤰ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ᤀᤥ ᤁᤧᤘᤠ᤹ᤒᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤐᤥ᤺ᤰᤂᤧᤖ ᤆᤥᤃᤢ॥

¹⁵ ᤂᤧᤴ ᤕᤧᤶᤔᤥ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧ॥ ᤜᤧᤰᤁᤩᤠᤱ ᤀᤜᤡᤗᤢᤍᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤂᤠᤏᤡ᤺ᤳ ᤁᤧᤕᤢᤱᤒᤠ ᤘᤕᤧ॥

¹⁶ ᤀᤜᤡᤋᤢᤒᤖᤧ ᤁᤢᤛ᤻ᤛᤠ ᤛᤍᤥᤁᤧᤴ ᤏᤢ ᤀᤒᤡᤕᤠᤌᤠᤖᤖᤧ ᤁᤢᤛ᤻ᤛᤠ ᤀᤜᤡᤔᤣᤗᤣᤁᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤛᤡ॥ ᤛᤒ᤻ᤛᤠᤴ ᤛᤢᤜᤠᤱᤔᤡᤒᤠ ᤘᤕᤧ॥

¹⁷ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤁᤖᤣᤋᤡ ᤏᤢ ᤐᤣᤗᤣᤌᤡᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤛᤠᤒᤠ ᤘᤕᤧ॥ ᤍᤠᤀᤢᤍᤖᤧ ᤁᤢᤛ᤻ᤛᤠᤜᤠ᤹ ᤜᤠᤱᤅᤡᤸᤗᤧ ᤔᤠ ᤁᤢᤛᤢᤜᤠᤱᤕᤢᤰᤐᤠ ᤔᤧᤘᤕᤧᤖᤥ॥