᥇ ᤛᤠᤵᤔᤢ᤺ᤴᤎᤢᤶ 17 - LIFOTNTᤏᤠᤋᤠᤏᤖᤧ ᤍᤠᤀᤢᤍᤧᤴ ᤀᤡᤱᤄᤱ ᤔᤧᤳᤋᤢ ( ᥈ ᤛᤠᤔᤢ ᥍:᥇-᥇᥍ ) 1 ᤍᤠᤀᤢᤍᤧᤴ ᤁᤢᤜᤠᤱᤜᤡᤶᤔᤥ ᤕᤢᤅᤧᤀᤠᤱ ᤀᤣᤃᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ᤃ ᤁᤵᤔᤥ ᤛᤠᤶᤔᤠᤛᤡᤱᤅᤡᤸᤗᤧ ᤆᤥ᤺ᤰᤔᤏᤠᤒᤠ ᤜᤡᤶᤔᤥ ᤕᤢᤱᤅᤠᤖ ᤘᤠ᤹ᤀᤠ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤛᤠ᤺ᤱᤃᤠᤜᤡᤶᤔᤥ ᤕᤢᤱᤔᤏᤠᤀᤠᤱ ᤕᤢᤱ᤹॥” 2 ᤏᤠᤋᤠᤏᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤀᤥ ᤌᤣ ᤘᤠ᤹ ᤜᤠᤒᤠᤄᤧᤴ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤍᤠᤱᤒᤠᤏᤢ ᤘᤠ᤹॥” 3 ᤁᤖ ᤀᤠᤶᤓᤠ ᤂᤧᤴ ᤛᤧᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤄᤱᤅᤡᤴ ᤏᤠᤋᤠᤏᤖᤧ᤹ᤀᤥ ᤁᤧᤖᤧ— 4 “ᤐᤣᤃᤧ᤹ᤀᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ—ᤀᤠᤱᤃᤠ᤹ ᤀᤠᤗᤠᤃᤡ ᤜᤡᤶ ᤁᤧᤈᤥ᤺ᤰᤐᤠ ᤂᤧᤏᤧ᤹ᤀᤣᤃ ᤔᤣ᤺ᤴ॥ 5 ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤌᤠᤰᤔᤏᤠᤛᤡᤒᤠ ᤕᤧᤴᤏᤠᤱᤎᤥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤜᤡᤶᤔᤥ ᤔᤧᤴᤕᤢᤱᤅᤣ ᤘᤠ᤹ᤀᤠ॥ ᤀᤠᤱᤃᤠ᤹ ᤗᤳᤇᤠ ᤛᤠ᤺ᤱᤃᤠᤜᤡᤶᤔᤥᤏᤢ ᤘᤣ᤹ ᤛᤠ᤺ᤱᤃᤠᤜᤡᤶᤔᤥ ᤌᤠᤖᤡᤰ ᤆᤳᤇᤡᤱᤅᤠᤖ ᤕᤢᤅᤠᤱᤗ ᤌᤠᤅᤠᤱ॥ 6 ᤀᤠᤳᤋᤠᤴ ᤀᤠᤳᤋᤠᤴ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤗᤠᤶᤍᤡᤰ ᤆᤥᤃᤠᤱ. ᤀᤠᤱᤃᤠ᤹ ᤀᤠᤗᤠᤃᤡ ᤛᤠᤶᤔᤠᤅᤛᤡᤱᤅᤡᤸᤗᤧᤴ ᤜᤡᤶ ᤌᤣᤀᤠᤱ ᤔᤧᤴᤈᤥᤃᤢᤶᤒᤠ ᤑᤠ᤹ᤀᤠᤱ ᤌᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤛᤣ᤺ᤴᤍᤥᤛᤢᤱᤛᤡᤅᤠᤱ ᤘᤕᤧᤒᤡ᥅’ 7 “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤔᤧᤳᤋᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤌᤰᤛᤠ ᤆᤠᤖᤠᤶᤍᤧᤴᤏᤥᤗᤠᤶ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤖᤠᤶᤔᤠᤛᤡ ᤗᤠᤶᤒᤠ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤛᤣ᤺ᤴᤏᤧ॥ 8 ᤂᤧᤏᤧ᤹ ᤀᤠᤳᤋᤡ ᤀᤠᤳᤋᤡ ᤁᤧᤒᤣ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤛᤥᤖᤡᤰ ᤘᤕᤠᤱ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤶᤔᤥᤗᤠᤶ ᤁᤧᤏᤡᤱᤔᤡᤜᤠ᤹ ᤔᤧᤰᤂᤢᤛᤡᤱ॥ ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤕᤶ ᤕᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤁᤢᤔᤡᤱ ᤁᤧᤀᤡᤱᤒᤠ ᤆᤥ᤺ᤰᤏᤧ॥ 9 ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤋᤧᤴ ᤛᤣᤃᤢᤱ᤹॥ ᤀᤠᤶᤓᤠ ᤂᤧᤵᤔᤥ ᤀᤠᤱᤃᤠ᤹ ᤂᤧᤱᤜᤠ᤹ ᤕᤢᤰᤂᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤔᤧᤕᤢᤱ॥ ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤔᤏᤠᤜᤠ᤹ᤖᤧ ᤕᤠᤶᤔᤥ ᤋᤢᤰᤂᤣ ᤔᤧᤴᤈᤠ᤺ᤳᤋᤢᤛᤡᤴ॥ 10 ᤀᤠᤱᤃᤠ᤹ ᤀᤢᤴᤇᤥᤴ ᤀᤢᤴᤇᤥᤴ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤱᤛᤡᤱᤒᤠ ᤕᤧᤶᤔᤠᤱᤎᤥ ᤁ᤹ᤕᤥ ᤂᤧᤱᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠ ᤁᤢᤀᤡᤛᤡᤰ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤋᤢᤛᤡᤴ᤹॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤋᤠᤖᤢᤱᤛᤡᤱ᤹॥ “‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤧᤏᤧ᤹ ᤜᤧᤰᤋᤱᤒᤠ ᤜᤠᤱ ᤆᤥᤃᤢᤱᤛᤡᤱ᤹॥ 11 ᤀᤠᤸᤗ ᤂᤧᤏᤧ᤹ ᤁᤠᤵᤐᤥᤒᤠ ᤁᤧᤍᤢᤶᤔᤠᤱ ᤁᤧᤔᤠᤛᤡᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤁᤧᤒᤣ᤺ᤰ. ᤂᤧᤒᤩᤠᤱ ᤂᤧᤏᤧ᤹ᤀᤣ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ᤀᤥᤒᤠ ᤔᤏᤠᤎᤡᤰ ᤂᤧᤏᤧ᤹ ᤁᤧᤀᤣᤃᤠᤱ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤑᤥ᤺ᤰᤂᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤜᤠᤱᤈᤢᤶᤔᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤱ᤹॥ 12 ᤂᤧᤸᤗᤧᤀᤣ ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤜᤡᤶ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤠᤱᤕᤢᤰᤏᤠᤴ ᤛᤍᤠᤍᤡᤱᤗᤧ ᤗᤠᤃᤡ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤱ᤹॥ 13 ᤀᤠᤱᤃᤠ᤹ᤃ ᤂᤧᤸᤗᤧ ᤐᤠᤏᤢᤍᤡᤱ ᤁᤢᤶᤒᤠ ᤐᤥᤱᤅᤠ. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ ᤐᤥᤱ᤹॥ ᤀᤠᤱᤃᤠ᤹ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤕᤢᤰ ᤁᤧᤈᤥ᤺ᤰᤐᤥᤗᤠᤶ ᤀᤠᤱᤃᤠ᤹ ᤀᤠᤔᤡ᤺ᤶᤈᤡᤴ ᤕᤠᤱᤏᤠ ᤏᤢ᤺ᤰᤋᤢᤱᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤴᤗᤠᤶᤒᤠ ᤀᤠᤱᤃᤠ᤹ ᤀᤠᤔᤡ᤺ᤶᤈᤡᤴ ᤀᤠᤓᤧᤸᤗᤧᤀᤠᤱ ᤔᤧᤏᤢ᤺ᤰᤁᤠᤴ॥ 14 ᤀᤠᤱᤃᤠ᤹ ᤂᤢᤏᤧ᤹ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤏᤢ ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤕᤢᤰᤂᤢᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤛᤍᤠᤍᤡᤱᤗᤧ ᤗᤠᤃᤡ ᤌᤎᤵ ᤔᤧᤸᤗ᤹ᤔᤏᤠᤒᤠ ᤐᤥᤱ᤹॥’” 15 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤋᤠᤏᤧᤴ ᤔᤧᤳᤋᤢᤒᤠ ᤏᤢ ᤀᤥᤛᤣ᤺ᤴᤎᤠᤱ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤍᤠᤀᤢᤍᤧᤴ ᤆᤧᤰᤋᤢᤖᤥ॥ ᤍᤠᤀᤢᤍᤖᤧ ᤁᤢᤏᤢᤃᤧᤴ ᤐᤣᤗᤡ ( ᥈ ᤛᤠᤔᤢ ᥍:᥇᥎-᥈᥏ ) 16 ᤂᤧᤒᤩᤠᤱ ᤍᤠᤀᤢᤍ ᤜᤠᤱᤅᤡᤴ ᤛᤡᤃᤠᤱ ᤐᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤢᤱᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤜᤠ᤺ᤳᤋᤠᤀᤠᤱᤒᤣ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤡᤶᤛᤕᤱᤅᤡᤴ ᤌᤧᤔᤠᤀᤠᤱ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤁᤵᤔᤥ ᤌᤠᤖᤡᤰ ᤁᤧᤃᤧᤳᤋᤠᤱᤒᤠᤒᤣ᥅ 17 ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤏᤡᤔᤥ ᤁᤱᤃ ᤀᤠᤸᤗᤛᤠᤱ ᤛᤢ᤺ᤴᤗᤥ॥ ᤀᤠᤍᤠᤱᤒᤠᤖᤧ ᤁᤧᤔᤠᤱᤜᤢᤵᤐᤡᤴ ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤜᤡᤶᤛᤕᤱᤅᤥ ᤋᤠ᤺ᤴᤍᤡᤒᤠ ᤐᤠ᤺ᤴᤏᤡᤴᤏᤣ ᤁᤧᤒᤠ᤺ᤳᤋᤢᤖᤥ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤕᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤀᤥᤃᤧᤔᤧᤳᤋᤠᤱᤅᤠᤱ ᤘᤠ᤹॥ 18 “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤁᤧᤒᤡᤖᤢᤒᤠ ᤔᤡᤱᤛᤥ ᤀᤡᤱᤎᤠᤱᤅᤡᤸᤗᤧ ᤗᤠᤃᤡ ᤀᤠᤍᤠᤱᤒᤠ ᤘᤣ᤹ ᤌᤣ ᤔᤧᤵᤔᤠ ᤛᤢᤰᤏᤧᤀᤠᤱᤒᤣ᥅ ᤀᤠᤍᤠᤱᤒᤠᤖᤧᤃ ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤴ ᤏᤢᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱᤅᤣ ᤘᤠ᤹॥ 19 ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤗᤠᤃᤡ ᤏᤢ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ ᤁᤢᤀᤡᤛᤡᤰ ᤀᤠᤍᤠᤱᤒᤠᤖᤧ ᤁᤴ ᤁᤧᤖᤧᤰ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤀᤠᤱ ᤘᤠ᤹. ᤂᤶᤓᤩᤠᤱ ᤁᤴ ᤐᤕᤶ ᤕᤶᤒᤠ ᤔᤠᤱᤜᤢᤵᤜᤠ᤹ ᤁᤧᤔᤧᤳᤋᤠᤱᤅᤠᤱ ᤘᤠ᤹॥ 20 “ᤀᤠᤍᤠᤱᤒᤠ ᤜᤧᤰᤋᤱᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵ. ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤏᤧᤓᤠᤰᤁᤡᤸᤗᤧ ᤂᤧᤵᤛᤢᤶᤒᤧᤒᤠ ᤜᤧᤰᤁᤣ ᤀᤠᤍᤠᤱᤒᤠᤏᤢ᤺ᤸᤗᤧ ᤘᤣ᤹ ᤔᤠᤱ ᤜᤠ᤺ᤳᤋᤠᤱ ᤜᤥᤵ॥ 21 ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤀᤠᤳᤋᤡᤴᤜᤠ᤹ᤏᤢ ᤋᤱᤔᤠ ᤛᤢᤰᤔᤧᤍᤧᤳᤋᤠᤱᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤥ᤺ᤃ᤻ᤒᤠᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤛᤡᤒᤠ ᤀᤡᤛᤪᤠᤀᤡᤗᤡᤜᤠ᤹ ᤜᤧᤰᤋᤱᤒᤠ ᤘᤣ᤹ ᤛᤢᤘᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤜᤥᤵ॥ ᤀᤠᤍᤠᤱᤒᤠᤖᤧ ᤐᤕᤶ ᤕᤶᤒᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤕᤠ᤺ᤶᤒᤰᤜᤠ᤹ᤗᤠᤶ ᤔᤡᤛᤪ ᤗᤠᤈᤣ᤹ᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤛᤡᤒᤠ ᤀᤠᤵᤑᤣᤰ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤣᤛᤢᤛᤡᤀᤠᤱ ᤀᤠᤵᤑᤣᤰ ᤗᤠᤃᤡ ᤔᤡᤱᤛᤥ ᤌᤠᤱᤛᤥ ᤁᤧᤈᤥᤃᤢᤀᤠᤱ ᤘᤠ᤹॥ 22 ᤀᤠᤍᤠᤱᤒᤠᤖᤧ ᤀᤠᤵᤑᤣᤰ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤵᤑᤣᤰ ᤁᤧᤔᤏᤠ ᤁᤧᤈᤥᤃᤢᤛᤡᤀᤠᤱ ᤘᤠ᤹॥ ᤀᤠᤍᤠᤱᤒᤠ. ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹॥ 23 “ᤀᤠᤸᤗ ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤴ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤌᤣ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤘᤠ᤹ ᤂᤧᤴ ᤁᤧᤖᤧᤰ ᤕᤧᤶᤔᤡᤸᤗᤧ ᤗᤠᤃᤡ ᤌᤥ ᤕᤥ ᤔᤧᤸᤗ᤹ᤀᤣ ᤘᤠ᤹ᤖ॥ ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢᤀᤠᤱ ᤘᤠ᤹ᤒᤠ ᤐᤠ᤺ᤴᤏᤡᤴ ᤁᤧᤳᤋᤧ᤹ᤀᤥ॥ 24 ᤜᤧᤰᤁᤣᤗ᤹ᤖᤡᤰ ᤔᤡᤱᤛᤥ ᤎᤠ᤺ᤱᤛᤥ᤺ᤴ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤕᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤂᤧᤴ ᤕᤥᤎᤥ ᤔᤧᤸᤗ᤹ᤀᤣ ᤘᤠ᤹ᤖ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤖᤥ. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤛᤪᤠᤀᤡᤗᤖᤧᤀᤣ ᤁᤢᤏᤡᤱᤘᤠ᤹ᤑᤢᤔᤠᤱᤗᤥ᥄’ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤌᤎᤵ ᤔᤧᤸᤗ᤹ᤔᤏᤠᤒᤠ ᤐᤥᤱ᤹॥ 25 “ᤀᤠᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤧᤸᤗᤧ ᤀᤠᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ ᤀᤥᤛᤣ᤺ᤴᤎᤠᤱ ᤁᤧᤈᤥᤃᤠᤱᤅᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤐᤣᤗᤡ ᤑᤠᤰᤔᤠ ᤀᤠ᤺ᤴᤇᤡᤱᤔᤠ ᤂᤥᤛᤢᤱᤅᤠᤱ ᤘᤠ᤹॥ 26 ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴᤏᤢ ᤁᤴ ᤏᤢᤒᤠ ᤐᤠ᤺ᤴᤜᤠ᤹ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤘᤠ᤹ᤖᤥ॥ 27 ᤁᤴ ᤀᤠᤵᤑᤠᤸᤗᤧᤛᤠᤱ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤜᤠᤒᤠ ᤘᤠ᤹ᤖ ᤑᤠ᤹ᤀᤠᤱ ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤜᤡᤶᤛᤕᤱᤅᤡᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ ᤐᤥ᤺ᤰᤂᤧ॥ ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧᤀᤣ ᤂᤧᤴ ᤜᤡᤶᤛᤕᤱᤅᤡᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤀᤠᤱ ᤘᤠ᤹. ᤂᤧᤒᤩᤠᤱ ᤂᤧᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤥᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.