᥇ ᤛᤠᤵᤔᤢ᤺ᤴᤎᤢᤶ 16 - LIFOTNT1 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤍᤠᤖᤢᤀᤠᤱ ᤂᤧᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤂᤡᤱᤄᤢᤒᤠ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤔᤧᤕᤢᤰᤂᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ 2 ᤀᤠᤸᤗ ᤍᤠᤀᤢᤍᤖᤧ ᤁᤴ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ ᤛᤢᤖᤢᤀᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ. 3 ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤁᤢᤗᤧᤵ ᤌᤡᤰᤌᤡᤰ ᤂᤖᤧ᤺ᤱ. ᤁᤢᤃᤠᤰᤔᤠ ᤌᤡᤰ ᤂᤧᤒᤰᤛᤡᤱᤅᤡᤸᤗᤧ ᤁᤢᤈᤠ᤹ ᤏᤢ ᤂᤧᤱᤔᤏᤠᤒᤠ ᤁᤢᤃᤠᤰᤔᤠ ᤆᤧᤸᤗᤧᤰᤛᤣ᤹ᤜᤠ᤹ ᤆᤠᤔᤠ ᤐᤡᤖᤢᤛᤡ॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ. ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡ᤺ᤵᤔᤠ. ᤏᤢᤃᤧᤴ ᤐᤡᤔᤠ. ᤏᤢ ᤁᤢᤏᤠᤖᤠ ᤑᤥᤔᤠ. ᤐᤣᤗᤡ ᤑᤠᤰᤔᤠ ᤜᤧᤰᤁᤩᤠᤱ ᤀᤡᤱᤎᤠᤱ ᤐᤡᤔᤠᤔᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤓᤠ ᤗᤧᤒᤡᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥ 5 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤀᤠᤛᤠᤐᤧᤴ ᤘᤕᤧ. ᤂᤢᤏᤧ᤹ ᤁᤢᤀᤣᤃᤠᤱ ᤈᤁᤖᤡᤕᤠ. ᤂᤧᤒᤩᤠᤱ ᤂᤧᤴ ᤀᤣᤃᤠᤱ ᤀᤴᤔᤣ ᤏᤢ ᤋᤢ᤺ᤱᤃᤣ ᤁᤧᤔᤢᤱᤒᤠ ᤕᤡᤀᤣᤗ. ᤛᤔᤡᤖᤠᤔᤥᤋ. ᤕᤜᤡᤀᤣᤗ. ᤔᤳᤋᤡᤋᤩᤠᤜ. ᤀᤣᤗᤡᤀᤠᤒ. ᤒᤏᤠᤕᤠᤜ. ᤀᤥᤒᤣᤍ-ᤀᤣᤍᤥᤔ ᤏᤢ ᤕᤡᤀᤣᤗ ᤔᤧᤘᤕᤧ॥ ᤀᤠᤛᤠᤐᤖᤧᤃ ᤛᤠᤵᤑᤱᤃᤠᤜᤠ᤹ ᤗᤠᤀᤡ᤺ᤰᤂᤢ॥ 6 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤆᤰᤔᤧᤸᤗ᤹ᤀᤣ ᤛᤠᤍᤠᤱᤜᤠ᤹ ᤔᤢ᤺ᤵᤔᤠᤖᤧ ᤗᤠᤃᤡ ᤒᤏᤠᤕᤠᤜ ᤏᤢ ᤕᤜᤠᤛᤣᤗ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤢᤰᤋᤡᤱ ᤐᤥ᤺ᤰᤂᤧᤛᤡᤀᤠᤱ ᤘᤕᤧᤛᤡᤖᤥ॥ ᤍᤠᤀᤢᤍᤖᤧ ᤏᤢᤃᤧᤴ ᤁᤢᤍᤥ᤺ᤶᤔᤠ ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ ( ᤏᤡᤱ ᤛᤢᤶ ᥇᥆᥋:᥇-᥇᥋ . ᥏᥌:᥇-᥇᥉ . ᥇᥆᥌:᥇ . ᥊᥍-᥊᥎ ) 7 ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤛᤠᤐ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤢᤃᤧᤴ ᤋᤥ᤺ᤴᤇᤧ ᤍᤠᤀᤢᤍᤧᤸᤗᤧ ᤌᤡᤰᤛᤡᤃᤣᤰᤐᤠ ᤗᤧᤱ ᤕᤢᤰᤋᤡᤱ ᤆᤥᤃᤢᤛᤡᤖᤥ— 8 ᤕᤜᤘᤣ ᤍᤠᤱᤒᤠᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ. ᤂᤢᤏᤧ᤹ ᤐᤕᤶ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤥᤛᤧᤶᤔᤧ᤹ᤀᤥ॥ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤧᤰᤋᤧᤶᤛᤡᤶᤔᤧ᤹ᤀᤥ॥ 9 ᤂᤢᤏᤧ᤹ ᤁᤢᤗᤠᤃᤡ ᤛᤠᤶᤗᤥᤖᤧᤶᤔᤧ᤹ᤀᤥ. ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥᤴ ᤛᤠᤶᤔᤧᤳᤋᤧᤶᤔᤧ᤹ᤀᤥ. ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ ᤐᤠ᤺ᤳᤋᤧᤶᤔᤧ᤹ᤀᤥ॥ 10 ᤂᤢᤏᤧ᤹ ᤁᤢᤛᤣᤛᤣ ᤔᤡᤱᤅᤥ ᤂᤡᤏᤡ᤹ ᤏᤧᤒᤥ ᤑᤥᤛᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤴ ᤁᤧᤃᤥ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖᤖᤥ॥ 11 ᤕᤜᤘᤣ ᤍᤠᤱᤒᤧᤴ ᤏᤢ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤴ ᤜᤰᤛᤧᤶᤔᤧ᤹ᤀᤥ. ᤂᤢᤏᤧ᤹ ᤁᤢᤏᤠᤖᤠᤴ ᤀᤥᤔᤧᤵᤔᤠ ᤆᤰᤔᤧᤸᤗ᤹ᤀᤣ ᤁᤥ᤺ᤳᤋᤧᤶᤔᤧ᤹ᤀᤥ॥ 12 ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤁᤢᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤁᤧᤈᤧᤰᤋᤡᤒᤠ ᤁᤢᤄᤠᤛᤧᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. 13 ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤁᤣ. ᤕᤠᤁᤢᤒᤖᤧ ᤁᤢᤛ᤻ᤛᤠᤛᤣ. ᤂᤢᤏᤧ᤹ ᤁᤧᤛᤣᤃᤡᤒᤠᤛᤣ॥ 14 ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ. ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤏᤧ᤹ ᤁᤢᤄᤠᤛᤧᤴᤜᤠ᤹ ᤘᤠ᤹ᤖᤥ॥ 15 ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤛᤍᤠᤍᤡᤱ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤁᤢᤒᤠ᤺ᤴᤈᤠᤰᤁᤡᤴ ᤜᤧᤴᤇᤡᤱ ᤜᤧᤴᤇᤡᤱ ᤔᤧᤴᤇᤠᤶ ᤌᤠ᤺ᤰ ᤌᤠᤖᤡᤰ ᤘᤠ᤹ᤖᤥ॥ 16 ᤜᤠᤒᤠ ᤂᤧᤴ ᤔᤠᤱᤜᤢᤵᤐᤡᤴ. ᤂᤢᤏᤧ᤹ ᤀᤒᤪᤠᤜᤠᤔᤏᤢ ᤆᤥᤃᤢᤀᤠᤱ ᤘᤕᤧᤖᤥ. ᤀᤠᤶᤓᤠ ᤔᤠᤱᤜᤧᤰᤁᤡᤴ. ᤂᤢᤏᤧ᤹ ᤀᤡᤛᤜᤠᤁᤏᤢ ᤆᤥᤃᤢᤀᤠᤱ ᤘᤕᤧᤖᤥ. 17 ᤂᤢᤏᤧ᤹ ᤂᤧᤴ ᤀᤡᤱᤈᤠᤱ ᤁᤢᤀᤡᤛᤡᤰ ᤕᤠᤁᤢᤒᤧᤴᤏᤢ ᤏᤡ᤺ᤴᤎᤥ ᤆᤥᤃᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴᤏᤢ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤔᤠᤱᤜᤢᤵ ᤁᤢᤀᤡᤛᤡᤰ ᤜᤢᤵᤋᤢᤖᤥ 18 ᤂᤢᤏᤧ᤹ ᤐᤠ᤺ᤳᤋᤢ. “ᤂᤧᤏᤧ᤹ ᤁᤏᤠᤏ ᤗᤠᤈᤣᤴ ᤐᤡᤏᤧᤖᤥ. ᤜᤧᤰᤁᤩᤠᤱ ᤂᤧᤴ ᤂᤧᤏᤧ᤹ ᤁᤧᤗᤰ ᤐᤥᤱᤗᤥ॥” 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤛᤢ᤺ᤴᤍᤧᤖᤥ. ᤂᤧᤱᤜᤠ᤹ ᤁᤏᤠᤏ ᤗᤠᤈᤣ᤹ᤀᤥ ᤋᤠᤰᤁᤴᤏᤡᤒᤠ ᤔᤧᤘᤕᤧᤖᤥ॥ 20 ᤂᤧᤱᤜᤠ᤹ ᤌᤡᤰ ᤗᤠᤈᤣ᤹ ᤏᤢ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤋᤠᤰᤔᤧᤃᤴᤍᤧᤖᤥ. ᤌᤡᤰ ᤜᤠᤱᤈᤢᤶ ᤏᤢ ᤘᤣ᤹ ᤜᤠᤱᤈᤢᤶᤜᤠ᤹ᤀᤥ ᤔᤧᤘᤕᤧᤖᤥ॥ 21 ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤳᤋᤡᤴᤜᤠ᤹ᤀᤠᤱ ᤂᤧᤱᤜᤠ᤹ ᤋᤢᤰᤂᤣ ᤆᤠ᤺ᤵᤔᤠ ᤔᤧᤓᤠ᤺ᤰᤋᤢᤛᤡᤴᤗᤥ॥ ᤂᤧᤱᤜᤠ᤹ ᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤜᤠᤱᤜᤠ᤹ᤀᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤑᤧ᤺ᤰᤋᤢᤛᤡᤖᤥ— 22 “ᤀᤠᤱᤃᤠ᤹ ᤀᤠᤔᤠᤱᤌᤥ᤺ᤰᤏᤠ ᤁᤧᤒᤥᤱᤒᤠᤜᤠ᤹ ᤔᤧᤛᤢᤛᤧᤶᤔᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤠᤔᤏᤠᤜᤠ᤹ ᤌᤣᤀᤠᤱ ᤜᤠᤴᤋᤡ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥” 23 ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤠᤶᤗᤥᤖᤧᤶᤔᤧ᤹ᤀᤥ. ᤂᤢᤏᤧ᤹ ᤛᤧᤴᤗᤵ ᤀᤠᤒᤡᤖᤧᤒᤠ ᤐᤠ᤺ᤴᤏᤡᤴ ᤌᤡᤰᤕᤠ᤺ᤴᤎᤰ ᤀᤡᤱᤓᤴ ᤆᤥᤃᤧᤶᤔᤧ᤹ᤀᤥ॥ 24 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤢᤏᤧ᤹ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤳᤋᤠᤶᤛᤡᤶᤔᤧ᤹ᤀᤥ. ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤔᤏᤠᤜᤠ᤹ ᤆᤧᤰᤋᤠᤶᤛᤡᤶᤔᤧ᤹ᤀᤥ॥ 25 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠ ᤛᤠ᤹ᤖᤡᤰ ᤗᤠ᤹ᤖᤢᤖᤥ. ᤁᤧᤖᤧᤰ ᤔᤠᤱᤜᤠ᤹ᤏᤢ᤺ᤸᤗᤧ ᤂᤢᤏᤧ᤹ᤀᤣ ᤆᤠ᤹ᤖᤡᤰ ᤁᤡᤵᤔᤠ ᤐᤥᤱᤗᤥ॥ 26 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤔᤠᤱᤜᤠ᤹ᤃ ᤏᤠᤘᤠᤀᤡᤳᤗᤠᤛᤡᤖᤰᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧᤃ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤖᤥ॥ 27 ᤜᤠᤱᤘᤠ ᤔᤠᤱᤘᤠ ᤏᤢ ᤔᤡᤔᤡᤍᤡᤱᤅᤡᤴ ᤂᤢᤏᤧ᤹ ᤁᤢᤍᤃᤡ ᤘᤠ᤹ᤖᤥ. ᤂᤢᤏᤧ᤹ ᤁᤢᤕᤢᤱᤔᤠᤍᤧᤴᤏᤥ ᤔᤢᤰᤛᤠᤶ ᤏᤢ ᤛ᤺ᤵᤔᤠ ᤘᤠ᤹ᤖᤥ॥ 28 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠᤴ ᤔᤡᤔᤡᤍᤡᤱ ᤐᤡᤖᤧᤶᤔᤧ᤹ᤀᤠᤱ ᤁᤢᤔᤢᤰᤛᤠᤶᤔᤡᤴ ᤀᤡᤱᤓᤥᤛᤧᤶᤔᤧ᤹ᤀᤥ॥ 29 ᤕᤜᤘᤣ ᤍᤠᤱᤒᤠᤴ ᤗᤠ᤹ᤖᤢᤒᤠ ᤔᤡᤔᤡᤍᤡᤱ ᤐᤡᤖᤧᤶᤔᤧ᤹ᤀᤥ. ᤜᤢᤰᤛᤥᤕᤠᤱ ᤋᤠᤖᤧᤶᤔᤧ᤹ᤀᤠᤱ ᤂᤢᤏᤧ᤹ ᤁᤢᤍᤃᤡ ᤋᤩᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤛᤣᤛᤣᤃᤧᤴ ᤁᤢᤔᤡᤔᤡᤍᤡᤱᤅᤥ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹ᤀᤥ॥ 30 ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤛᤣ. ᤂᤢᤏᤧ᤹ ᤁᤢᤍᤃᤡ ᤌᤧᤃᤰᤁᤰᤏᤠ ᤕᤰᤂᤧ᤹ᤀᤥ᥄ ᤕᤥ᤹ᤒᤠ ᤗᤠᤈᤣᤴ ᤌᤎᤵ ᤔᤧᤸᤗ᤹ᤀᤣ ᤕᤢᤱᤛᤡᤱᤅᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤂᤧᤴ ᤜᤠ᤺ᤳᤗᤧᤀᤠᤱ ᤔᤢᤶᤔᤠ ᤔᤧᤛᤢᤰᤋᤢᤴᤗᤥ॥ 31 ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤁᤢᤏᤡᤱᤘᤠ ᤋᤠᤖᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤐᤛ᤺ᤳ ᤛ᤺ᤳᤗᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤗ᤹ᤀᤠᤱ ᤀᤡᤱᤓᤴ ᤔᤧᤈᤥᤃᤢᤖᤖᤥ. “ᤕᤜᤘᤣ ᤍᤠᤱᤒᤧᤸᤗᤧᤀᤣ ᤜᤠᤱᤕᤢᤰ ᤆᤥᤃᤢᤖᤥ॥” 32 ᤘᤖ᤺ᤱᤅᤡᤴ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤔᤧᤛ᤺ᤰᤗᤖᤥ. ᤀᤡᤰᤋᤠᤵ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤠᤰ ᤁᤢᤈᤠᤜᤠ᤹ ᤔᤧᤛ᤺ᤳᤗᤖᤥ॥ 33 ᤂᤧᤒᤩᤠᤱ ᤋᤠᤶᤓᤢᤱᤅᤥ ᤁᤧᤕᤢᤱᤒᤠ ᤛᤡᤱᤒᤢᤱᤜᤠ᤹ ᤛᤠᤶᤔᤧᤗᤥᤖᤥ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤛ᤺ᤳᤋᤠᤱ ᤛᤠᤶᤔᤧᤗᤥᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤂᤠᤛᤧᤴ ᤆᤥ᤺ᤰᤛᤧ ᤕᤢᤖᤥ॥ 34 ᤕᤜᤘᤣ ᤍᤠᤱᤒᤧᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ. ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤀᤠᤵᤑᤠᤸᤗᤧᤛᤠᤱ ᤜᤠᤒᤠ ᤘᤠ᤹ᤖᤥ॥ 35 ᤀᤰᤂᤣ ᤗ᤹ᤖᤧᤶᤔᤧ᤹ᤀᤠᤱ ᤀ᤺ᤰᤋᤧᤶᤔᤧ᤹ᤀᤥ. “ᤀᤠᤏᤡᤃᤣ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤕᤠᤵᤔᤡ ᤋᤠᤱᤀᤠᤛᤧ᤺ᤵᤋᤧ᤹ᤀᤥ॥ ᤀᤠᤏᤡᤃᤣ ᤕᤠᤵᤔᤡ ᤛᤥᤖᤡᤰ ᤀᤠᤓᤢᤰᤂᤧ᤹ᤀᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤀᤠᤛᤧ᤺ᤵᤋᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤁᤧᤛᤣᤛᤣ ᤔᤡᤱᤅᤥ ᤏᤢᤃᤧᤴ ᤋᤥ᤺ᤶᤔᤠ ᤛᤢᤰᤋᤢᤶᤒᤧᤖᤖᤥ. ᤜᤶᤓᤩᤠᤱ ᤁᤧᤏᤠᤖᤠ ᤑᤥᤔᤠᤀᤥ ᤀᤠᤏᤡᤃᤣ ᤏᤧᤒᤥ ᤐᤳᤗᤖᤥ॥” 36 ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤢᤏᤠᤖᤠ ᤐᤥᤖᤖᤥ॥ ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤀᤠᤔᤡᤴ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤛᤥ ᤐᤥᤱᤗᤖᤥ॥” ᤕᤖᤢᤛᤗᤧᤔ ᤏᤢ ᤃᤡᤒᤥᤏᤀᤥ ᤔᤠᤱᤛᤧᤘᤠ 37 ᤍᤠᤀᤢᤍᤧᤸᤗᤧ ᤌᤡᤰᤕᤠ᤺ᤴᤎᤰᤐᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤆᤰᤔᤧᤸᤗ᤹ᤀᤣᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤀᤠᤛᤠᤐ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡᤀᤠᤱ ᤕᤢᤰᤂᤢᤛᤡ॥ 38 ᤂᤢᤏᤧ᤹ ᤀᤥᤒᤣᤍ-ᤀᤣᤍᤥᤔᤧᤴ ᤜᤧᤰᤁᤩᤠᤱ ᤜᤥᤛᤠᤴ ᤀᤠᤛᤠᤐᤧᤴᤏᤢ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤋᤢᤰᤐᤥᤱᤅᤠᤱ ᤕᤧᤳᤇᤡ ᤁᤢᤃᤠ᤹ᤀᤡᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥ ᤕᤍᤢᤋᤢᤏᤖᤧ ᤁᤢᤛ᤻ᤛᤠ ᤀᤥᤒᤣᤍ-ᤀᤣᤍᤥᤔᤧᤴ ᤏᤢ ᤜᤥᤛᤠᤴ ᤗᤠᤶᤎᤣᤳ ᤁᤧᤃᤥᤒᤠ ᤘᤕᤧᤛᤡ॥ 39 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡᤰ ᤋᤠᤏᤠᤶ ᤏᤢ ᤕᤢ᤺ᤴᤇᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤴᤇᤧ 40 ᤍᤠᤀᤢᤍᤖᤧ ᤛᤠᤍᤥᤁ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤏᤢ ᤂᤧᤸᤗᤧ ᤁᤢᤴᤍᤣ᤺ᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤃᤡᤒᤥᤏᤀᤥ ᤁᤧᤏᤧᤒᤠ ᤛᤧᤘᤠ ᤆᤥ᤺ᤰᤔᤠ ᤌᤧᤃᤢᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤗᤧ ᤁᤢᤍᤃᤡ ᤘᤠ᤹ᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤛᤡ॥ 41 ᤂᤧᤱᤜᤠ᤹ᤏᤢ ᤛᤥᤖᤡᤰ ᤜᤣᤔᤠᤏ ᤏᤢ ᤕᤍᤢᤋᤢᤏ ᤜᤧᤰᤁᤩᤠᤱ ᤔᤡᤱ ᤌᤰᤔᤠ ᤔᤧᤛᤣᤃᤢᤛᤡᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤏᤢᤃᤧᤴ ᤋᤥ᤺ᤶᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤛᤡ. “ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡ᤺ᤴᤈᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥” 42 ᤛᤣᤛᤣ ᤛᤧᤘᤠ ᤛᤠᤶᤗᤥᤖᤧ ᤗᤠᤃᤡ ᤛᤠᤍᤠᤱᤜᤠ᤹ ᤔᤢ᤺ᤵᤔᤠ ᤏᤢ ᤛᤠᤵᤑᤱᤃᤠᤜᤠ᤹ ᤜᤡᤵᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤘᤣ᤹ ᤔᤢᤰᤗᤠᤜᤠ᤹ ᤔᤢᤱᤔᤠ ᤕᤠ᤺ᤶᤒᤰᤁᤡᤴ ᤜᤣᤔᤠᤏ ᤏᤢ ᤕᤍᤢᤋᤢᤏᤧᤴ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤕᤍᤢᤋᤢᤏᤖᤧ ᤁᤢᤛ᤻ᤛᤠᤜᤠ᤹ᤖᤧ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤁᤥᤔᤠ ᤕᤠ᤺ᤶᤒᤰ ᤔᤧᤈᤥᤃᤢ॥ 43 ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤀᤠᤵᤑᤣᤰ ᤁᤢᤜᤡᤶᤛᤕᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤛᤧ ᤐᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.